Ti Aya Kape Pangatuenna ti Kolesterolmo?

BABAEN TI KORESPONSAL TI AGRIINGKAYO! IDIAY BRAZIL

DAGITI managsirarak iti Wageningen Agricultural University, idiay Netherlands, kunada a ti panagkape iti saan a nasagat pangatuenna ti kolesterolmo.

Nagpateg a sasao ti “saan a nasagat.” Apay? Ti Research Reports a pampleta manipud Netherlands Organization for Scientific Research, kunana a ti bukel ti kape addaan iti makunkuna a cafestol, maysa a substansia a mangpangato iti kolesterol. No direkta a mabukbokan iti napudot a danum ti giniling a kape, maparuar ti cafestol. Kasta met laeng ti mapasamak no maulit-ulit a mapaburek ti nagpino ti pannakagilingna a kape, kas ti maar-aramid iti Turkish coffee, wenno no mausar ti sagatan a metal imbes a ti sagatan a papel, kas ti adda iti French press. Maisurot ti cafestol iti kape no di mausar ti sagatan a papel.

Ti sangatasa a kape a saan a nasagat, a nalabit addaan iti aginggat’ uppat a miligramo a cafestol, mapangatona ti kolesterol iti agarup 1 a porsiento. Adda met cafestol ti espresso, gapu ta saan a mausar ti sagatan a papel iti pannakaaramidna. Ngem, basbassit ti epektona iti kolesterolmo no ti bassit a tasa (demitasse) ti pagkapeam. Basbassit nga espresso, basbassit met a cafestol​—nalabit kas iti kabassit ti maysa wenno dua laeng a miligramo iti tunggal tasa. Nupay kasta, mamallaag ti Research Reports a ti panagkape iti lima a babassit a tasa nga espresso iti kada aldaw mapangatona ti kolesterol ti bagi iti 2 a porsiento.

Ti napateg a punto, awan cafestol ti kape a nasagat iti papel.