Nabalitokan a Sagut Manipud iti Makin-amianan nga Ungto
BABAEN TI MANNURAT TI AGRIINGKAYO! IDIAY SWEDEN
Sakbay a pimmanawkami ken ni baketko idiay Sweden, pinampanunotmi no ‘ania a gagangay a produkto ti pagilianmi ti ipasarabomi’ kadagiti sarungkaranmi a sumagmamano a gagayyemmi idiay England. Gapu ta kayatmi a makaisuro ti ipasarabomi a di komersial a palaman a cloudberry iti makin-amianan a Europa, nagaramidkami iti makaisuro nga etiketa a naibasar a nangnangruna kadagiti kapaliiwanmi ken kapaliiwan dagiti nagsaludsodanmi. Adtoy ti resulta ti panagsirarakmi.
Ania Dagiti Cloudberry?
Ti cloudberry a mula nga awan pay 12 a pulgada ti katayagna ket maawagan iti Rubus Chamaemorus iti Latin. Tunggal mula ket agpataud iti maysa laeng a puraw a sabong ken maysa a bunga. No naata ti bunga, nalabaga ken natangken, ngem bayat a matangtangkenan, bumalitok wenno dumuyaw sa lumukneng ken agbalin a natubbog. Ti naganna a cloudberry ket mabalin a maigapu iti kasasaad nga agtubo dagiti cloudberry iti kabambantayan iti makin-amianan nga England a pasaray maabbungotan iti ulep. Masarakam met dagitoy kadagiti naagneb a lugar, kangrunaanna kadagiti kapatagan a masansan a maabbungotan iti niebe ken kadagiti aluguog iti intero a makin-abagatan nga Arctic. Idiay Sweden, masansan a maluomda no Agosto, inton asidegen ti otonio iti makin-amianan a Europa.
Ti Balitok Kadagiti Aluguog
Sinigsiglon nga agur-urnong dagiti katutubo nga umili a Lapp kadagiti cloudberry tapno pagtaraonda no tiempo ti lam-ek. Nabaknang dagitoy iti bitamina C ken dadduma pay a bitamina, ket gapu ta addaan dagitoy iti natural a preserbatibo, saan a madadael ti palaman a cloudberry iti adu a tawen no la ket ta maikabil iti nalamiis a disso. Yantangay karne ken ikan ti kangrunaan a pagtaraon dagiti nagkauna a nagnaed kadagitoy makin-amianan a rehion, ti cloudberry ti nagbalin a napateg a gubuayan ti kanayonan a bitamina. Di pakasdaawan a naawagan dagitoy a balitok kadagiti aluguog!
Kadagitoy nga aldaw, adu a cloudberry ti mapuros ken maipan kadagiti supermarket ken industria. Idiay Sweden, kas pagarigan, kabayatan ti maysa a kadawyan a tawen, mabalin a mailako ti nasurok a sangaribu a tonelada a cloudberry—nga amin dagitoy ket pinuros ti ima! Gapu iti kastoy a pamay-an, dagiti nagaget nga agpuros iti cloudberry, a masansan a dagiti nakabakasion nga ubbing nga estudiante, ket mabalin a makagun-odda iti kanayonan a kuarta. Ti cloudberry ket pinadayawan pay ketdin dagiti Pinlandes babaen ti panangikitikitda iti dayta iti baro a sinsilioda a dua a euro!
Naimas
Makarepresko ti nasam-it nga umalsem a raman ti cloudberry. Mabalin a makakitaka kadagiti palaman wenno naartem a cloudberry ken uray ti arak a nalaokan iti pangpaimas a cloudberry kadagiti aglaklako iti taraon wenno dadduma pay a tiendaan iti dadakkel a siudad iti Europa ken Estados Unidos. Ti nalamiis a dulse a naaramid iti agtutuon a prutas, sirup, sorbetes, ken whipped cream ti masansan a maidasar iti tinawen a pangrabii a padayá kadagiti mangabak iti Premio Nobel, a maang-angay idiay Stockholm, Sweden. Mabalin a mangidasar dagiti eksklusibo a restawran iti naipapudot a palaman agraman sorbetes a nalaokan iti vanilla a pangpaimas. Kanayonanna, ti palaman ti mangpaimas iti Swedish cheesecake wenno fried Camembert cheese ken naimas met a mailaok iti dulse. Naaramid idiay Finland ti arak ti bimmalitok a cloudberry, ket nabiit pay a nairugi a nailako idiay Sweden ti arak a cloudberry.
No makapankanto iti lugar a pakaimulmulaan dagiti cloudberry, purosem ken ramanam ti kappuros, nangruna no nawarakiwakan iti puraw nga asukar ken naparabawan iti whipped cream. Umanamongkanto a napategda a kas iti balitok—ket mabalin a matignayka nga agyaman iti Namarsua kenka gapu iti daytoy naimas a sagutna.