“Jehova, Palubosannak Koma nga Agserbi Kenka”

Kas insalaysay ni Danielle Hall

Idi ubingak pay, pagay-ayatko ti mangarruba kada Nanna. Minalem a rumidep. No maranaak iti kasta a gundaway, agtugawkami iti katre bayat nga ibasaannak kadagiti estoria iti Biblia. Masansan nga ibagana kaniak: “Dimo pulos liplipatan nga ay-ayatennaka ni Jehova. No isu ket ayatem, kanayon nga aywanannaka.” Naitukit iti isip ken pusok dagita a sinaona.

NATAY ni Nanna idi 1977, idi agtawenak iti uppat. Isu ket maysa a Saksi ni Jehova, kas iti amin a kakabagian ni Tatang iti lugarmi iti Moe, Australia. Saan a Saksi dagiti dadakkelko, ngem nasingpet kadakuada ni Tatang. Idi agangay, immakar ti pamiliami idiay Tintenbar, maysa a bassit nga ili iti asideg ti kosta ti New South Wales. Sadiay, pasaray a tumabunokami kada Tatang ken manongko a Jamie kadagiti gimong dagiti Saksi.

Idi agtawenak iti walo, nagsina dagiti dadakkelko. Nagsubli ni Tatang idiay Moe, ket nagtalinaedkami ken ni manongko iti denna ni Nanang. Saan nga interesado ni Nanang iti Biblia ken dina kayat a tumabunokami kadagiti gimong dagiti Saksi. Naladingitanak iti dayta. Diak malipatan ti sasao ni Nanna a naitukit iti pusok. Ammok nga ay-ayatek ni Jehova! Kayatko ti agserbi kenkuana. Nagkararagak ngarud kenni Jehova ket imbagak kenkuana a maysaak met kadagiti Saksina. Kasta met laeng ti rikna ni manongko a Jamie.

Dagiti Suot Idiay Eskuelaan

Di nagbayag kalpasanna, kiniddaw ti maysa a mannursuro idiay eskuelaan nga ibaga ti tunggal estudiante ti relihionna tapno maisuratna iti listaanna. Idi batangen ni Manong Jamie, imbagana iti napigsa ken nalawag a timek, “Saksi ni Jehova.” Impaulit ti mannursuro ti sungbatna, isu nga inulit ni Manong Jamie. “Siguradoka? Sige, pagsaludsodankanto manen madamdama,” kinuna ti mannursuro. Idi batangkon, impukkawko met, “Saksi ni Jehova.” Gapu ta nasdaaw, ti mannursuro pinaayabanna ti prinsipal.

“Adda kaniak ti dokumento idi nagpasalistakayo ket saan nga insurat dagiti nagannak kadakayo a maysakay a Saksi ni Jehova,” sititibker a kinuna ti prinsipal. “Ngem dayta ti relihion nga an-annurotenmi,” sidadayaw nga insungbatmi. Isu ken ti mannursuro didan inulit dayta a banag.

Inkagumaak nga inranud kadagiti kaklasek ti bassit a pannakaammok iti Biblia. Itugtugotko ti kopiak a Ti Librok Dagiti Estoria ti Biblia, ket sagpaminsan nga ibasaak ti maysa nga ubing a babai a mamati iti Dios.a Ngem gapu ta ikagkagumaak ti agbiag a maitunos kadagiti Nakristianuan a pagalagadan, adaywandak dagiti kaeskuelaak ket no maminsan, makariknaak iti nakaro a ladingit.

Masansan ken napasnek nga agkararagak kenni Jehova agingga a nagbalin a nasinged a gayyemko. Iti tunggal aldaw kalpasan ti klasek, agtugawak iti kamak ket detalyado nga estoriaek kenni Jehova ti agmalem nga aktibidadko. Masansan nga agsangitak. Bayat nga agarubos dagiti luak, ipakpakaasik, “Jehova, palubosannak koma nga agserbi kenka a kadua dagiti adipenmo.” Kada malpasak nga agkararag, nalaglag-an ti riknak.

Makapabileg a Surat

Idi agtawenak iti sangapulo, nagsubli ni Manong Jamie idiay Moe tapno makipagnaed kenni Tatang. Awanen ti kapinnaregtak iti naespirituan. Ngem bayat nga addaak iti balay ti kaarrubak, nakitak ti sumagmamano a magasin nga impablaak dagiti Saksi ni Jehova. Sigagagar nga inkabesak ti adres ti sanga nga opisina iti lugarmi ket nagdardarasak a nagawid tapno isuratko ti adres. Nagsuratak iti sanga nga opisina, nga inyebkasko ti kasasaadko ken sipapasnek a nagkiddawak iti naespirituan a tulong. Nakasangitak idi mabasak ti makatukay-rikna, dua a panid a subalitda a nairanta para kaniak. Pammaneknek dayta nga ipatpategnak ni Jehova kas indibidual!

Iti suratda, parparegtaendak a mangtulad iti pammati ti balasitang nga Israelita a nagbalin nga adipen ni Naaman, maysa a panguluen ti buyot ti Siria idi panawen ti Biblia. Nupay maysa a kautibo ken agnanaed iti adayo iti lugarda, nagtalinaed ti balasitang a nasinged iti Diosna, ni Jehova. Ken babaen ti situtured a panangisaritana iti pammatina, pinaneknekanna nga isu ket maysa a pudno a saksi ti Dios.―2 Ar-ari 5:1-4.

Innayon ti surat ti sanga nga opisina: “Kas maysa a balasitang, makapagserbika kenni Jehova babaen ti panagtulnogmo kadagiti dadakkelmo ken panagbalinmo a nasaet nga ageskuela. Kasta met, masapul nga agtalinaedka a nasinged kenni Jehova babaen ti kararag ken panagadal.” Kamaudiananna, kinuna ti surat: “Danielle, laglagipem a sadinoman ti pagnanaedantayo, kanayon nga asideg kadatayo ni Jehova. Agtalekkami a patiem dayta.” (Roma 8:35-39) Uray nakadadaanen, adda pay la dayta a surat iti akkub ti Bibliak. Agingga ita, makasangitak pay laeng tunggal basaek dayta.

Di nagbayag kalpasanna, nakaawatak iti sabali a surat a mangipakpakaammo a kiniddaw ni tatangko a mapatulodanak kadagiti magasin a Pagwanawanan ken Agriingkayo! babaen ti koreo. Kasta unay ti ragsakko! Addaanakon iti regular a suplay iti naespirituan a taraon. Apaman a sumangpet ti tunggal isyu, basaek amin ti linaonna. Agingga ita, adda pay la kaniak dagitoy nga agkakapateg a daan a kopiak. Kadagidi a panawen, nangrugi a sarungkarannak ti maysa a Kristiano a panglakayen iti kongregasion iti lugarmi. Nupay mabiit laeng dagiti panagbisitana, makaparegta dagita.

Nangyeg iti Panagrang-ay Dagiti Panagbalbaliw

Nupay simmayaat ti espiritualidadko, tinarigagayak ti ad-adu a panawen nga agserbi kenni Jehova. Gapuna, idi agtawenak iti 13, kiniddawko kenni Nanang no mabalinko ti makipagnaed kenni Tatang. Ay-ayatek unay ni Nanang, no kasano nga ay-ayatennak met. Ngem determinadoak nga agserbi iti Dios. Idi immanamong, nagsubliak idiay Moe ket nagpayadalak iti Biblia kadagiti kakabsat iti dayta a lugar. Immanamong ni Tatang a tabunuanmi ken ni Manong Jamie ti amin a gimong. Inkagumaandakami a tinulongan dagiti Saksi. Napartak ti panagrang-aymi ken ni Manong Jamie agingga a nagpabautisarkami a sumagmamano la a bulan ti baetna. Wen, nasungbatan ti ikarkararagko idi ubingak pay, ti agserbi kenni Jehova a kadua dagiti adipenna!

Kabayatanna, naaddaanak iti naisangsangayan a relasion iti ikit ken ulitegko, da Philip ken Lorraine Taylor, a naikameng iti Kongregasion iti Moe. Imbilangdak a kas anak. Idi immakarda iti isla ti Bougainville, Papua New Guinea, tapno agserbida iti lugar nga addaan iti dakdakkel a panagkasapulan kadagiti agibumbunannag iti Pagarian, dagus a pinatgak ti awisda a kumuyog kadakuada. Agtawenak la idi iti 15, ngem pinalubosandak da Tatang ken Nanang a kumuyog.

Idiay Bougainville, intuloyko ti panageskuelak babaen ti surat. Malaksid iti dayta, binusbosko ti ad-adu a tiempo a nangasaba. Anian a rag-ok a makipagtrabaho kadagiti misionero ken payunir! Dagiti lumugar ti kasingpetan pay laeng a naam-ammok, ket adu kadakuada ti magagaran nga agpayadal iti Biblia.

Iti dayta met la a tawen, bimtak ti napolitikaan a panagsasalisal, ket napeggad no agtalinaedak iti dayta a lugar. Kasla maabrean ti barukongko idi panawak dayta a bassit nga isla dagiti nasingpet a tattao. Idi timmayaben ti nagluganak a bassit nga eroplano, nakitak ti ulitegko a ni Philip nga agpaypayapay bayat a sitatakder iti pagdisuan ti eroplano. Kasta unay ti sangitko bayat a siuulimek nga ikarkararagko kenni Jehova a dumtengto koma ti aldaw a makapagserbiak kas misionera iti ganggannaet a pagilian.

Nasungbatan ti Dadduma Pay a Kararagko

Kalpasan a nagraduarak iti haiskul idiay Australia, nagtrabahoak iti maysa nga opisina ti abogasia. Kabayatanna, nagasawa manen ni Tatang ket adu ti siumanna. Nakipagnaed ni Manong Jamie kenni Nanang. Iti sumagmamano a tiempo, agsinsinnublat a nakipagnaedak kadagiti dadakkelmi. Kasla komplikado ti biagko. Masapul a pasimpleak ti biagko ket ipamaysak ti atensionko kadagiti naespirituan a kalat. Gapuna, idi 1994 simrekak iti amin-tiempo a ministerio idiay Moe kas maysa a payunir.

Naragsakak manen. Nareregta dagiti gagayyemko nga agtutubo iti kongregasion, ket nagbalinda a dakkel a katulongak. Kinapudnona, idi 1996, maysa kadakuada ti nagbalin nga asawak, ni Will. Naalumamay nga agsasao, nasingpet, ken napakumbaba, maysa a pudno a bendision manipud kenni Jehova.

Nakaragragsak ti biagmi kas agassawa. Maysa nga aldaw, simmangpet ni Will manipud iti pannakipagtrabahona iti agdaldaliasat a manangaywan a nangbisita kadagiti kabangibangmi a kongregasion. Kiniddawna nga agtugawkami sana inyimtuod, “Sidadaanka kadi nga umakar tapno tumulong iti sabali a kongregasion?” Iti pusok, wen a dagus ti sungbatko. Ngem inyang-angawko a dinamag: “Sadino koma? Vanuatu? Fiji?” Simmungbat ni Will, “Morwell.” Dagus a kinunak, “Ditoy lugartayo a mismo!” Nagkatawakami a dua ket dagus a nagnumuanmi a kayatmi ti umakar iti kabangibang a kongregasion tapno agserbikami kas payunir.

Naragsak ken nabunga ti simmaruno a tallo a tawenmi iti Morwell. Kalpasanna, dimteng ti simmaruno a sorpresa. Nakaawatkami iti surat manipud iti sanga nga opisina dagiti Saksi ni Jehova idiay Australia a mangaw-awis kadakami nga agserbi kas special pioneer. Ti pakaibaonanmi? Idiay East Timor, maysa a bassit a pagilian iti makindaya nga ungto ti Indonesia.b Nakaluaak. Nagyamanak kenni Jehova ta sinungbatanna ti amin a kararagko. Saannak laeng nga inawat kas adipenna no di ket makapagserbikami itan ken ni lakayko iti sabali a pagilian.

Panagserbi iti Ballasiw Taaw

Idi Hulio 2003, dimtengkami iti kabeserana a Dili. Ti Dili a kongregasion―ti kakaisuna a kongregasion iti pagilian―ket buklen ti 13 nga special pioneer manipud iti Australia ken sumagmamano a lumugar a Saksi. Napanglaw dagiti kakabsat a Timorese; kaaduan ti napukawan kadagiti sanikua ken kakabagian gapu iti 24 a tawen a guerra sibil a nagpatingga idi 1999. Adu met ti mangib-ibtur kadagiti nakaro nga ibubusor ti pamilia gapu iti baro a pammati. Ngem iti laksid ti rigat ken kinapanglawda, nabaknang ken naragsakda iti naespirituan.―Apocalipsis 2:8, 9.

Napaliiwmi a managbuteng iti Dios ti kaaduan a Timorese ken raemenda ti Biblia. Kinapudnona, di pay nagbayag, dimi magabenanen ti kaadu dagiti iyad-adalanmi iti Biblia! Idi agangay, dadduma kadagiti immun-una nga inyadalanmi iti Biblia ti nagbalinen a bautisado a kakabsattayo. Maragsakankami unay a makakita iti naespirituan a panagrang-ayda.

Ngem idi 2006, nariribuk manen ti kasasaad idiay Dili. Dimteng iti kangitingitanna ti panagsasalisal dagiti nagduduma nga etniko a grupo. Nasamsam wenno napuoran ti adu a pagtaengan, ket nagkamang dagiti lumugar a Saksi kadagiti pagtaengan dagiti special pioneer. Nagbalin a temporario a pagkamangan ti balay ken paraanganmi, ket adda tiempo a dandani sangagasut ti nakipagnaed kadakami! Nagbalin a kosina, panganan, ken temporario a Kingdom Hall ti garahemi.

Nupay agkanalbuong dagiti paltog ken granada iti asidegmi, nagbalin a natalinaay a pagkamangan ti balaymi. Mariknami amin ti panangaywan ni Jehova. Kada agsapa, pagsasaritaan ti grupo ti maysa a teksto ti Biblia. Naangay dagiti gimong a kas iti gagangay. Nangyadalkami met iti Biblia kadagiti interesado.

Iti panaglabas dagiti lawlawas, awan duadua a napeggad para kadagiti kakabsat a nayanak iti daya ti pagilian no agtalinaedda pay iti Dili. Gapuna, inkeddeng dagiti mangidadaulo a kakabsat a mabuangay ti maysa a baro a grupo idiay Baucau, ti maikadua a kadakkelan a siudad, a tallo nga oras a biahe manipud iti daya ti Dili. Dayta ti makagapu a nakaawatkami ken ni Will iti baro a teritoriami.

Dimtengkami idiay Baucau idi Hulio 2006, dandani tallo a tawen sipud idi dimmap-awkami idiay East Timor. Ti baro a grupomi ket buklen ti uppat nga special pioneer ken innem a Timorese a Saksi. Pinanawan dagiti lumugar a kakabsat ti amin a sanikuada idiay Dili, ngem kaskasdi a dida napukaw dagiti naragsak nga isemda. Talaga nga apresiarenmi ti nasungdo, managsakripisio nga espirituda!

Agingga ita, agserserbikami ken ni Will idiay Baucau. Ipatpategmi ti pribilehiomi ken matmatanmi dayta kas maysa a bendision manipud kenni Jehova. No lagipek ti napalabas, talaga a husto ni Nanna. Saannak a pulos a binaybay-an ni Jehova bayat ti panaglabas ti panawen. Kanayon nga agyamyamanak kenkuana gapu ta pinalubosannak nga agserbi kenkuana a kadua dagiti adipenna. Segseggaak met ti tiempo a makitak manen ni Nanna inton panagungar. Iti kasta, makapagyamanak kenkuana gapu iti panangipaayna kaniak iti tulbek a nanglukat iti dalan nga agturong iti maysa a naragsak ken makagunggona a biag.

[Footnotes]

[Ladawan iti panid 26]

Dakami ken ni Nanna

[Ladawan iti panid 28, 29]

Dakami ken ni lakayko a Will