Umad-adu ti Mangramrambak iti Krismas—Apay?

PADPADAANAM kadi ti Krismas? Wenno madandanaganka no umadanin dayta? Minilion ti mangpampanunot: ‘Siasino ti regaluak? Ania ti iregalok? Kabaelak ngata a gatangen? Kasanonto kabayag a bayadak ti utangek?’

Iti laksid dagita a pakaseknan, nagadu latta ti mangselselebrar iti Krismas. Kinapudnona, simmaknap daytan uray kadagiti pagilian a saan a Kristiano dagiti umili. Idiay Japan, ti Krismas ket ramrambakan ti kaaduan a pamilia, saan a gapu ta narelihiosuan no di ket naragsak ngamin nga okasion dayta. “Ti naragsak ken nalabaga a rupa ni Santa Claus ket nakadispley iti adu a tiendaan kadagiti dadakkel a siudad” ti China, kuna ti The Wall Street Journal. Innayonna: “Dagiti kabbaro a babaknang kadagiti siudad iti China agselebrarda metten iti Krismas ta pamrayanda dayta nga aggatang, agpapangan, ken agraragsak.”

Iti adu a paset ti lubong, dakkel ti maitulong ti Krismas iti idudur-as ti ekonomia. Agpayso la unay dayta itan iti China a “paggapgapuan ti nagadu a plastik a Christmas tree, silaw, ken dadduma pay a dekorasion a para Krismas,” kuna ti Journal.

Kadagiti pagilian a Muslim ti kaaduan nga umili, ramrambakanda met dagiti piesta nga umasping iti Krismas, nupay saan nga iti Disiembre 25. Idiay Ankara, Turkey, ken Beirut, Lebanon, gagangayen dagiti tiendaan a nadekorasionan iti Christmas tree ken nabungon a regregalo. Idiay met Indonesia, mangang-angay dagiti hotel ken mall iti nararagsak nga aktibidad a mabalin a pakipanganan ken pakiretratuan dagiti ubbing ken Santa.

Kadagiti Makinlaud a pagilian, ti Krismas ket kadawyanna a nakomersialanen, saanen a narelihiosuan. Adu nga adbertismen ti “nalawag a nairanta a mangallukoy iti ubbing,” kuna ti Royal Bank Letter ti Canada. Adda latta met ketdi makimisa no Krismas ngem ti ad-addan nga araken ti tattao ket dagiti mall ken dadakkel a tiendaan nga agpatpatokar kadagiti kanta maipapan iti Krismas. Apay? Ti ngata makagapu ket nainaig iti nagtaudan ti Krismas? Ania ngamin ti nangrugian ti Krismas?

Sakbay a sungbatantayo dagita, nasayaat no basaentayo dagiti salaysay ti Biblia a maipagarup a nakaadawan ti makunkuna a Belen.

[Kahon/Ladawan iti panid 4]

TI KUNA DAGITI NAGSURAT ITI EBANGHELIO

Ni apostol Mateo: “Kalpasan a nayanak ni Jesus idiay Betlehem ti Judea idi kaaldawan ni Herodes nga ari, adtoy! dagiti astrologo manipud makindaya a paspaset immayda sadi Jerusalem, a kunkunada: ‘Sadino ti ayan daydiay nayanak nga ari dagiti Judio? Ta nakitami ti bituenna idi addakami idiay daya, ket immaykami agruknoy kenkuana.’ Idi mangngegna daytoy naglagaw ni Ari Herodes.” Isu a dinamagna kadagiti “panguluen a papadi . . . no sadino ti pakayanakan idi ti Kristo.” Idi naammuanna nga “idiay Betlehem,” kinuna ni Herodes kadagiti astrologo: “Inkayo biroken a siaannad ti ubing, ket inton nasarakanyon ipakaammoyo kaniak.”

“Napandan; ket, adtoy! ti bituen a nakitada idi addada idiay daya napan nga immun-una kadakuada, agingga a nagsardeng iti ngatuen ti ayan ti ubing. . . . Idi simrekda iti balay nakitada ti ubing agraman ni Maria nga inana.” Kalpasan a nangtedda iti regalo ken Jesus, “naipaayanda iti nadibinuan a pakdaar iti maysa a tagtagainep a saanda nga agsubli ken Herodes, [isu a] nagsublida iti pagilianda babaen iti sabali a dalan.”

“Kalpasan a nakapanawdan, adtoy! ti anghel ni Jehova nagparang ken Jose iti tagtagainep, a kunkunana: ‘Bumangonka, alaem ti ubing ken ti inana ket agkamangka idiay Egipto . . . ’ Gapuna bimmangon ket innalana ti ubing ken ti inana iti rabii ket napan . . . Idin ni Herodes, idi makitana a sinikapan dagiti astrologo, nagpungtot iti napalalo, ket nagbaon ket pinapapatayna amin dagiti ubbing a lallaki idiay Betlehem ken kadagiti amin a distritona, manipud dua ti tawenna ken agpababa.”—Mateo 2:1-16.

Ni adalan a Lucas: Ni Jose “simmang-at met manipud Galilea, manipud iti siudad ti Nazaret, nga agturong sadi Judea, iti siudad ni David, a maawagan Betlehem, . . . tapno maipasalista agraman ken Maria . . . Bayat nga addada sadiay, . . . impasngayna ti anakna a lalaki, ti inauna, ket binungonna kadagiti lupot a pamalkut ket impaiddana iti maysa a kulluong, agsipud ta awan lugarda iti siled a pagdagusan.”

“Iti dayta met laeng a pagilian adda met idi dagiti pastor nga aggigian iti ruar ken agbambantay iti rabii kadagiti arbanda. Ket kellaat a ti anghel ni Jehova nagtakder iti sibayda, . . . ket nagbutengda unay. Ngem kinuna kadakuada ti anghel: ‘Dikay agbuteng, ta, adtoy! ideklarak kadakayo ti naimbag a damag ti dakkel a rag-o a maaddanto iti amin a tattao, agsipud ta nayanak kadakayo ita nga aldaw ti maysa a Manangisalakan, nga isu ti Kristo nga Apo, iti siudad ni David.’” Iti kasta, dagiti pastor “napanda a sigaganat ket nasarakanda ni Maria kasta met ni Jose, ken ti maladaga a nakaidda iti kulluong.”—Lucas 2:4-16.