Panangmatmat iti Lubong
Idi pinagsaludsodan ti British Broadcasting Corporation ti 13,000 a tao iti 26 a pagilian, naammuan a ti “korapsion ti kangrunaan a mapagsasaritaan a problema iti lubong.” Nupay kasta, ti kinapanglaw ti maibilang a kangrunaan a problema iti lubong.—BBC NEWS, BRITAIN.
“Dagiti simbaan iti intero a U.S. ket mangikabkabil kadagiti alikamen a matunton ti GPS kadagiti estatua ti ubing a ni Jesus a maus-usar iti belen. Iti nabiit pay ngamin a tawtawen, kellaat nga immadu ti natakaw nga estatua ti belen.”—THE WEEK, U.S.A.
“Irekrekomenda ti mamalbalakad a komite para iti [U.S.] Food and Drug Administration a dagiti addaan iti chronic fatigue syndrome ket maparitan nga agdonar iti dara, ta mabalin a retrovirus ti pakaigapuan dayta a sakit.”—THE WALL STREET JOURNAL, U.S.A.
Lawag a Mangpapatay Kadagiti Bakteria
Adda baro a teknolohia nga inaramid ti University of Strathclyde idiay Glasgow, Scotland. Agusar dayta iti napigsa a lawag tapno mapaksiat dagiti narigat a mapapatay a bakteria kadagiti ospital. Nasaysayaat nga amang daytoy a baro a teknik a pangpatay kadagiti mikrobio ngem iti panagdalus ken panagdis-impekta laeng.
Panaguma ken Malaria
Ti panaguma kadagiti tropikal a kabakiran ti mabalin a pakaigapuan ti aganay a 50% nga iyaadu ti agmalaria. Kasta ti konklusion dagiti managsirarak a nangadal iti impormasion manipud iti 54 a health center idiay Brazil ken kadagiti ladawan a naala iti satellite a nangirekord kadagiti aktibidad dagiti agtartarikayo. Kadagita a rehion, ti lamok a pagaammo kas Anopheles darlingi ti kangrunaan a mangyak-akar iti malaria. “Ti kalbon a bakir, a lumawlawan dagiti nawayang a dissona ken di unay main-initan dagiti naurnong a dandanumna, ti kaay-ayo a pagnaedan daytoy a lamok,” kuna ni Sarah Olson a kangrunaan nga autor daytoy a report. Naduktalan a ti kaaduan a nagmalaria ket adda iti aglawlaw dagiti lugar a nakalbon ti kaaduan a kabakiran.
Pusit a Makatayab
Itay nabiit, napaneknekan kadagiti retrato nga adda dagiti kita ti pusit a makatayab babaen iti jet propulsion. Napaliiw dagiti biologo kadagiti parsua iti taaw a “ti pusit a 8 a pulgada ti kabassitna ket makalagto iti kangato a 2 a metro iti ngatuen ti rabaw ti danum. Ipayakpakda ti ipusda ken ipusipusiposda dagiti gamatda isu a makatayabda agingga iti 10 a metro,” kuna ti Scientific American. Babaen ti panangsul-oy ken bigla a panangipugsoda iti danum, adda umdas a puersada a lumagto iti rabaw ti baybay. Ipakita dagiti retrato a dagiti ipusda ti usarenda a pannakapayakda bayat ti panagtayabda.