Panangmatmat iti Lubong
Iti maudi a paset ti 2011, nasuroken a 7 a bilion ti populasion ti lubong idinto ta ‘6 la a bilion idi 1999.’—HARVARD SCHOOL OF PUBLIC HEALTH, U.S.A.
“Kinuna ti 58.8% kadagiti umili ti [UK] a magunggonaan ti pamiliada no adda tiempo nga awan kadakuada ti agusar iti teknolohia, kayatna a sawen, dida agusar iti aniaman a gadyet a pakikomunikar . . . . Maysa iti kada tallo a tattao ti masikoranen kadagiti gadyet a pakikomunikar isu a kayatdan a liklikan dagita.”—UNIVERSITY OF CAMBRIDGE, BRITAIN.
“Sipud idi 1976, ti komperensia dagiti obispo ti Katoliko iti America ket mangiruruaren kadagiti pakaammo sakbay a dumteng ti tunggal tawen a panagbubutos iti presidente. Iti kasta, matulongan dagiti Katoliko a mangusar iti pammatida iti panagpilida kadagiti kandidato.”—FORDHAM UNIVERSITY, U.S.A.
“No kayat ti adu a kriminal ti mangriribuk kadagiti kalsada, kabaelanda dayta. . . . Adda minoria dagiti agtutubo a Briton a di mangipatpateg iti moral a pagannurotan. Nupay bassit a grupo dayta, umdasen ti bilangda a mangriribuk ken mangibabain iti pagilian.”—THE ECONOMIST, BRITAIN.
Mano Dagiti Sibibiag a Parsua Ditoy Daga?
“Ditay pay la ammo ita no kasano kaadu dagiti kita ti sibibiag a parsua. Dayta ti mangipakita a nagbassit ti ammotayo maipapan iti biag ditoy daga,” kuna dagiti sientista a dagiti nasirarakda ket mabasa iti magasin a PLoS Biology. Nupay ipagarupda nga adda 8.7 milion a kita ti sibibiag a parsua, sumurok man dayta wenno kumurang iti 1 milion, ibagbaga met ti dadduma nga eksperto a ti bilang ket adda iti nagbaetan ti 3 milion ken 100 milion. Agarup 1.2 milion pay laeng kadagita ti naklasipikar. Maipagarup a nasurok a 1,000 a tawen ti kasapulan tapno mailista ti nabatbati pay sigun iti agdama a kapartak ti panangklasipikar. “Gapu iti daytoy a nabuntog a panangklasipikar, maungawton ti kaaduan a kita sakbay a maammuantayo nga adda gayam dagiti kasta a kita,” kuna dagiti managsirarak.
Arkeolohia Babaen ti Satellite
Agus-usar dagiti arkeologo iti baro a pamay-an tapno mabirokanda dagiti lugar a kayatda a siraraken. Agar-aramatda iti software ti kompiuter a makatulong tapno mailasinda dagiti rebba kadagiti ladawan a rinetrato ti high-resolution ken infrared satellite photography. Kas pagarigan, naipadamag a kadagiti ladawan a naretrato idiay Egipto iti kangato a 700 kilometro, nailasinen ti ayan ti 17 a di pay nadiskobre a piramid, 1,000 a nagkauna a tanem, ken agarup 3,000 a napukaw a komunidad. Gapu ta masarut ti infrared photography uray ti uneg ti daga, mailasinen ti adu a nabayagen a nagaburan nga estruktura a di makita iti rabaw ti daga.