Masalbar Pay Ngata Dagiti Relihion?
“DAGITI Britano mamatida iti Dios ngem dida kayat ti maikumit ken ni Kristo,” kuna ni Stephen Tirwomwe, maysa a klero a taga Uganda. Agarup 20 a tawen sakbayna, nalasatanna dagiti naranggas a panangrippuog iti relihionna idiay Uganda. Ita, mangaskasaba kadagiti nagduduma nga asosasion dagiti lallaki idiay Leeds, Inglatera, nga agpalawag iti uneg ti sangapulo a minuto sakbay nga agay-ayam iti bingo dagiti dumdumngeg kenkuana.
Idiay Atlantico, kasta met laeng ti parikut ti nabiit pay a naorganisar nga Anglican Mission iti America. “Iti intero a lubong, ti Estados Unidos ti ayan ita ti kadakkelan a populasion dagiti Ingles ti pagsasaoda a tattao nga awanan iti relihion ken saan a maseknan iti espiritualidad,” kuna ti opisial a Web site ti mision. “Datayo [ti Estados Unidos] ti agkasapulan iti panangisuro dagiti misionero.” Gapu ta napaay ti panangikagumaanda a mangbalbaliw iti relihionda, dagiti baro a naorganisar a mision linaksidda ti tradision ket nakialiansada kadagiti lider iti Asia ken Africa tapno mairugi ti “nasaknap a panagmisionero iti Estados Unidos.”
Ngem apay a dagiti misionero manipud Africa, Asia, ken Latin-America mangaskasabada kadagiti makunkuna a Kristiano a pagilian ti Europa ken Makin-amianan nga America?
Siasino a Talaga ti Matultulongan?
Iti nasurok nga uppat a gasut a tawen, dagiti debotado a taga Europa a misionero intultuloyda ti napan kadagiti umad-adu a kolonia ti Europa, kas iti Africa, Asia, Pacifico, ken Makin-abagatan nga America. Pinanggepda nga isaknap ti relihionda kadagiti makuna a pagano a komunidad kadagita a pagilian. Idi agangay, dagiti kolonia ti America, a naibilang a naipasdek kadagiti Nakristianuan a prinsipio, simrekda iti eksena, ket idi agangay, inartapanda dagiti misionero ti Europa iti panangipasdek kadagiti bukodda a mision a panagebanghelio iti intero a lubong. Nagbaliw ti kasasaad.
“Nagbaliw ti lugar a nakaipamaysaan [ti makunkuna a Kristianidad],” kuna ni Andrew Walls, ti nangipasdek ken direktor ti Centre for the Study of Christianity in the Non-Western World. Idi 1900, taga Europa wenno Makin-amianan nga America ti 80 porsiento kadagiti agkunkuna a Kristiano. Ngem ita, 60 porsiento dagiti amin nga agkunkuna a Kristiano ti agnanaed iti Africa, Asia, ken Latin America. Impadamag ti media itay nabiit: “Dagiti Katoliko idiay Europa agpannurayda kadagiti padi manipud Pilipinas ken India,” ken “naggapu iti sabali a pagilian ti maysa iti kada innem a padi nga agserserbi kadagiti Katoliko a parokia ti America.” Dagiti Africano nga ebanghelisador idiay Netherlands, a kaaduanna a taga Ghana, matmatanda ti bagbagida kas “iglesia dagiti misionero iti sekular a kontinente.” Ken dagiti ebanghelista manipud Brazil addaanda ita kadagiti krusada kadagiti nadumaduma a paset ti Britania. Kuna ti maysa a mannurat: “Sabalin ti pagturturongan ti mision dagiti Kristiano.”
Kumarkaro a Pannakasinasina
Maipagarup nga adda panagkasapulan kadagiti misionero kadagiti kontinente ti Europa ken Makin-amianan nga America gapu ta umad-adu dagiti tattao a saan nga interesado iti relihion. “Idiay Scotland, awan pay 10 porsiento kadagiti Kristiano ti regular a makimismisa,” kuna ti maysa a magasin. Basbassit pay ti makimismisa idiay Francia ken Alemania. Iti surbey, “agarup 40 porsiento dagiti Americano ken 20 porsiento a taga Canada ti mangibaga a regular a makimismisada,” kuna ti sabali pay a report. Maigiddiat iti dayta, naibaga a dandani 70 porsiento ti makimismisa iti Pilipinas, ket kasta met kadagiti dadduma a napanglaw a pagilian.
Nangnangruna pay, dagiti makimismisa iti Makin-abagatan a Hemispero ket mas relihioso ngem kadagiti makimismisa iti Makin-amianan a Hemispero. Kas pagarigan, no mapagsaludsodan dagiti Katoliko iti Estados Unidos ken Europa, kanayon nga ibagada a kumarkaro ti dida panagtalek iti autoridad dagiti klero ken ilunglungalongda ti dakdakkel a paset dagiti miembro ken di panangidumduma kadagiti babbai. Iti sabali a bangir, dagiti Katoliko iti Makin-abagatan a Hemispero sisusungdo a dasiganda ti tradisional a takder ti simbaan kadagitoy nga isyu. Bayat a bumilbileg ti suporta iti Makin-abagatan a Hemispero ken kumapkapuy iti Makin-amianan a Hemispero, marubrubroban ti panagbettak ti maysa a susik. Impakauna ni Philip Jenkins, maysa nga eskolar ti historia ken relihion: “Posible unay nga iti uneg ti maysa wenno dua a dekada, uray ti agsinnumbangir a dasig ti sangalubongan a Kristianidad didanto bigbigen dagiti padada a Kristiano kas naan-anay wenno pudno a Kristiano.”
Gapu kadagitoy a pasamak, kuna ni Walls a ti isyu a nasken a marisut a dagus ket “no kasano a dagiti Kristiano iti Africa, Asia, Latin America, Makin-amianan nga America ken Europa makapagtutunosda kas maysa a relihion, a sitatalek nga alagadenda ti maymaysa a pammati.” Ania ti panagkunayo? Masalbar pay ngata dagiti relihion iti nasinasina a lubong? Ania ti pakaibatayan ti pudno a Nakristianuan a panagkaykaysa? Ti sumaganad nga artikulo iparangna dagiti Nainkasuratan a sungbat, agraman ti nalawag a pammaneknek nga adda maysa a nagkaykaysa a grupo dagiti Kristiano a rumangrang-ay ita iti sangalubongan.
[Ladawan iti panid 4]
Daytoy a dati a simbaan ket maysa itan a pagtokaran ken restawran
[Credit Line]
AP Photo/Nancy Palmieri