Sangalubongan a Parikut, Sangalubongan a Solusion

ADU ti agsagsagaba iti sadinoman ken adu ti siaasi a tumultulong kadakuada. Kas pagarigan, agtartrabaho dagiti doktor ken nars iti adu nga oras iti ospital tapno tumulong kadagiti masakit ken nadangran. Dagiti bombero, polis, mammanday linteg, ken para-arayat ikagkagumaanda nga ep-epen wenno lapdan ti panagsagaba dagiti tattao. Adu ti maitulong dagita a panagregget , ngem saan a kabaelan dagiti indibidual wenno organisasion a pagpatinggaen ti panagsagaba iti intero a lubong. Nupay kasta, kabaelan ti Dios ken kayatna a risuten ti sangalubongan a parikut.

Masarakan ti pammatalged iti maudi a libro ti Biblia: “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apocalipsis 21:4) Panunotem ti saklawen dayta a kari. Dayta ti pannakasumario ti panggep ti Dios nga agpatingga ti amin a panagsagaba. Aramiden ti Dios dayta babaen ti panangikkatna iti gubat, bisin, sakit, ken kinaawan hustisia, agraman ti amin a nadangkes ditoy daga. Awan ti tao a makaaramid iti kasta.

No Ania ti Aramiden ti Pagarian ti Dios

Tungpalen ti Dios dagiti karina babaen ti maikadua a kabilgan a persona iti uniberso​—ti napagungar a ni Jesu-Kristo. Asidegen ti panagturay ni Jesus kas Ari iti intero a daga ket awanto ti bumusor kenkuana. Saanton a dagiti tattao nga ari, presidente, wenno politiko ti mangituray iti sangatauan. Imbes ketdi, iturayanto ida ti maysa laeng nga Ari ken maysa a gobierno​—ti Pagarian ti Dios.

Ikkatento dayta a Pagarian ti amin a gobierno ti tao. Nabayagen nga impadto ti Biblia: “Mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.” (Daniel 2:44) Agkaykaysanton ti amin a tattao ditoy daga iti sidong ti maymaysa a nalinteg a gobierno​—ti Pagarian ti Dios.

Idi adda ditoy daga ni Jesus kas tao, namin-adu a dinakamatna ti maipapan iti Pagarian. Dinakamatna dayta iti modelo a kararag idi nga insurona kadagiti adalanna no kasano ti agkararag: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Impasimudaag ngarud ni Jesus a nainaig ti Pagarian iti pannakaaramid ti pagayatan ti Dios ditoy daga, ket pagayatan ti Dios a pukawen ti panagsagaba iti intero a daga.

Ti nalinteg a gobierno ti Dios ti mangyeg iti bendision a nikaanoman saan a kabaelan nga itden ti gobierno ti tao. Laglagipem nga inted ni Jehova ti Anakna kas subbot tapno magun-od dagiti tattao ti agnanayon a biag. Iti sidong ti naasi a panagturay ti Pagarian, in-inut nga agbalin a perpekto dagiti tattao. Anianto ti resultana? Ni Jehova “alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.”​—Isaias 25:8.

Nalabit iyimtuod ti dadduma: ‘Apay a ti Dios saan a nagtignay a dagus idi? Ania ti ur-urayenna?’ Kabaelan ni Jehova ti agtignay uray pay idi tapno maikkat wenno malapdan la koma ti amin a panagsagaba. Ngem impalubosna nga agtultuloy dayta saan a gapu iti agimbubukodan a rason no di ket agpaay iti agnanayon a pagimbagan dagiti annakna ditoy daga. Uray dagiti naayat a nagannak ipalubosda nga agpasar ti anakda iti pakarigatan no ammoda nga agpaay dayta iti agpaut a gunggona. Umasping iti dayta, adda la ketdi dagiti naimbag a rason no apay nga ipalpalubos ni Jehova a temporario nga agsagaba dagiti tattao ket nailawlawag dagita a rason iti Biblia. Ramanen dagita ti bambanag a kas iti wayawaya nga agpili, basol, ken ti isyu mainaig iti kinaumiso ti turay ni Jehova. Ilawlawag met ti Biblia a pinalubosan ti Dios ti maysa a dakes nga espiritu a parsua a mangituray iti lubong ngem temporario laeng dayta.a

Nupay saan nga umdas ti sumagmamano a panid a mangilawlawag kadagiti rason, adda dua a kinapudno a mangted namnama ken pammaregta. Umuna: Ad-adu nga amang ti bendision nga ipaayto ni Jehova ngem iti aniaman nga impalubosna a sagabaentayo. Maysa pay, ipanamnama kadatayo ti Dios: “Dagiti immun-una a banag saandanto a maipalagip, saandanto met a tumpuar iti puso.” (Isaias 65:17) Ti Dios naan-anay ken permanente nga ikkatennanto ti amin a rigat ken panagsagaba a resulta ti temporario a kinadakes.

Maikadua: Inkeddengen ti Dios no kaano a pagpatinggaenna ti panagsagaba ket saanen a mabalbaliwan dayta. Laglagipem nga inyimtuod ni mammadto a Habakuk no kasano pay kabayag nga ipalubos ni Jehova ti kinaranggas ken panagriringgor. Insungbat ni Jehova: “Ti sirmata agpaay pay laeng iti naituding a tiempo . . . Saanto a maladaw.” (Habakuk 2:3) Makitatayo iti sumaganad nga artikulo nga asidegen dayta a “naituding a tiempo.”

[Footnote]

[Kahon iti panid 7]

Dagiti Teksto ti Biblia a Mangdeskribir iti Naraniag a Masakbayan

AWANTON TI GUBAT:

“Umaykayo, imatanganyo ti ar-aramid ni Jehova, no kasano a nangipasdek iti makapaamanga a paspasamak iti daga. Pagsardengenna dagiti gubat agingga iti ungto ti daga.”​—Salmo 46:8, 9.

AGUNGARTO DAGITI IPATPATEGTAYO:

“Addanto panagungar agpadpada dagiti nalinteg ken dagiti nakillo.”​—Aramid 24:15.

ADDANTO TARAON PARA ITI ISUAMIN:

“Maaddanto ti naruay a bukbukel iti daga; iti tapaw dagiti bantay addanto ti panaglaplapusanan.”​—Salmo 72:16.

AWANTON TI SAKIT:

“Awanto ti agtataeng nga agkuna: ‘Masakitak.’ “​—Isaias 33:24.

AWANTON TI NADANGKES:

“No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.”​—Proverbio 2:22.

AGARINTO TI KINAHUSTISIA:

“Adtoy! Maysa nga ari [ni Kristo Jesus] ti agturayto maipaay iti mismo a kinalinteg; ket no maipapan iti piprinsipe, agturaydanto kas piprinsipe maipaay iti mismo a kinahustisia.”​—Isaias 32:1.

[Dagiti Ladawan iti panid 7]

Risuten ti Pagarian ti Dios ti aniaman a mabalin a sinagabatayo