No Adda Nakaro a Sakitmo

“Idi imbaga ti doktor nga adda kanser ti barak ken bagisko, ammok nga asidegakon a matay. Ngem idi nakaawidakon, imbagak iti bagik, ‘OK, dimo ninamnama dayta, ngem masapul nga ibturam.’”—Linda, agtawen iti 71.

“Adda nakaut-ut-ot a sakitko a mangap-apektar kadagiti urat iti kannigid a paset ti rupak. No dadduma, sobra ti ut-otna nga uray la madepresak. Namin-adun a nariknak nga agmaymaysaak ken napanunotko payen ti agpakamatay.”—Elise, agtawen iti 49.

Agsakit a lakay a naka-wheelchair nga as-asistiran dagiti kapamiliana

NO SIKA wenno ti ay-ayatem ket na-diagnose nga addaan iti makapapatay a sakit, ammom no kasano karigat dayta. Malaksid iti mismo a sakitmo, masapul a daeram dagiti sensitibo a riknam wenno pakibagayam ti nadumaduma a reaksion dagiti mangas-asikaso kenka. Mabalin a kumaro ti buteng ken danagmo gapu iti makapa-stress a panagpadoktor, rigat ti panagbirok wenno panagbayad iti pagpaagasan, wenno kadagiti dakes nga epekto dagiti agas. Mabalin a mariribukanka unay gapu iti nakaro a sakitmo.

Pagpatulongantayo ngay? Napaneknekanen ti adu a ti kangrunaan a nakatulong kadakuada ket ti panagkararagda iti Dios ken ti panagbasada kadagiti makaliwliwa a paset ti Biblia. Ti sabali pay a tulong ket mabalin a babaen ti ayat ken suporta dagiti kapamilia ken gagayyem.

ANIA TI NAKATULONG ITI DADDUMA?

Imbalakad ti 58 ti tawenna a ni Robert: “Pabilgem ti pammatim iti Dios ket tulongannaka nga agibtur. Agkararagka ken Jehova. Ibagam dagiti marikriknam. Kiddawem ti nasantuan nga espirituna. Kiddawem a patibkerennaka, agbalinka a makaparegta iti pamiliam, ken agtalinaedka a kalmado bayat nga ib-ibturam ti sakitmo.

“Makatulong unay no pabilgen ti pamiliam ti pakinakemmo, no addada a mangsaranay kenka. Adda dagiti kapamiliak nga inaldaw a mangtelepono kaniak tapno komustaendak. Dagiti gagayyemko iti nadumaduma a lugar ti mangpappapigsa iti pakinakemko isu a talaga a sumaysayaat ti riknak. Dayta ti tumultulong kaniak tapno saanak a sumuko.”

No maysaka a gayyem a sumarsarungkar iti masakit, tandaanam ti imbaga ni Linda: “Sigurado a kayat ti masakit a no mabalbalin, agbiag a kasla awan sakitna, ken dina kayat a kanayon a mapagsasaritaan dayta. No kasta, dagiti laeng gagangay a banag ti pagsasaritaanyo.”

Babaen ti pammabileg ti Dios ken panangliwliwa ti Biblia, agraman ti tulong dagiti nadungngo a kapamilia ken gagayyem, masiguradotayo nga adda latta serserbi ti biag, uray no adda nakaro a sakit nga ib-ibturantayo.

Dagiti Makatulong a Bersikulo ti Biblia

Agpannurayka iti Dios.

“Immawagak ken Jehova ket sinungbatannak, inispalnak iti amin a pagbutbutngak. Immawag daytoy a marigrigat, ket dimngeg ni Jehova.”—Salmo 34:4, 6.

Kuna ti nadakamaten a ni Linda: “Diak pulos ikarkararag, ‘Paimbagennak.’ Kanayon nga ikarkararagko, ‘Pabilgennak, ken tulongannak a mangibtur iti sakitko.’”

Basaem ti mangpabileg a Sao ti Dios.

“Awanto ti residente a mangibaga: ‘Masakitak.’”—Isaias 33:24.

Panunotem dagiti kari ti Dios para iti masanguanan, a mangted iti namnama ken mangpabileg kenka nga agibtur.

Agpatulongka iti kapamiliam ken gagayyemmo.

“Ti pudno a gayyem agayat iti amin a tiempo ken maysa a kabsat a mapangnamnamaan no adda rigat.”—Proverbio 17:17.

“Dimo bukbukodan dagiti pakarigatam,” imbalakad ni Elise, a nadakamaten. “Awatem ti tulong dagiti gagayyemmo. Nalabit adda dagiti gundaway a mariknam nga agmaymaysaka ken kasla saannaka a dengdenggen ti Dios, ngem dimo bukbukodan dagiti pakarigatam.”