Agtakder a Sititibker kas Maysa nga Arban
1 Ti espesial nga aldaw iti asamblea a maipaay iti 1990 a tawen ti serbisio isut’ natemaan iti “Agtakder a Sititibker kas Maysa nga Arban.” Daytoy a tema ti naibasar iti Filipos 1:27. Ti programa iti agsapa ket saklawenna iti impormasion maipapan ti panagkasapulan a panagtakder a sititibker, dagiti parabor a tumulong kadatayo nga agtakder a natibker, dagiti paguadan iti kinatibker, ken no kasano a masaluadantayo manipud kadagiti makapakapoy nga impluensia. Addanto urnos ti bautismo iti ngudo ti sesion iti agsapa. Siasinoman nga agpampanunot a maipaay iti bautismo masapul nga ipakaammona a nasakbay iti mangidaulo a manangaywan tapno maiyurnos iti panangwanas kadagiti saludsod manipud iti libro nga Organisado a Mangitungpal ti Ministeriotayo.
2 Iti malem addanto sumaria iti Pagwanawanan a sarunuen ti pammaregta a maipaay iti panagpositibo iti ministerio, ti instruksion a tumulong iti dadduma iti ministerio, ken dagiti praktikal a pammagbaga a tumulong kadatayo nga agtakder a sititibker iti maymaysa nga espiritu. Iti amin a tiempo itan, masapul ti panagtakdertayo a natibker kas maysa nga arban iti saklang ni Jehova. Ti nagkaykaysa a takdertayo a maipaay iti pudno a panagdayaw isut’ saluad kadatayo manipud iti mamagsisina a puersa nga isut’ naruay ita iti daytoy lubong ni Satanas, ken isut’ mangipuesto kadatayo a tumulong iti sabsabali a tumipon kadatayo iti pudno a panagdayaw.
3 Pangaasiyo ta imutektekanyo a bayat iti lawas ti espesial nga asamblea, ti regular a panagadal iti Pagwanawanan ken palawag ti publiko ket saandan a maaramid kadagiti kongregasion. Nupay kasta, ti Teokratiko a Pagadalan iti Ministerio, Gimong ti Serbisio ken Panagadal ti Libro iti Kongregasion ket maaramidda met laeng a kas gagangay. Kaipapanan daytoy a dagiti kongregasion nga aggigimong iti Domingo masapul nga iyurnosda dagitoy iti sabali nga aldaw iti uneg dayta a lawas.
4 Mangrugi dagitoy nga espesial nga asamblea iti Marso, ket kayattayo amin a maiyurnos a presentetayo iti agmalmalem.