Naintiempuan a Kingdom News a Maiwarasto iti Sangalubongan
1 Inton Domingo, Abril 23, maysanto nga espesial a palawag publiko ti maibitla iti makaawis a tema a “Ti Panungpalan ti Ulbod a Relihion Asidegen.” Iti ngudo ti miting iti dayta nga aldaw, maysanto nga uppat-pinanidna a Kingdom News ti mairuar. Ti naintiempuan a mensahe a linaonna ti maipaayanto iti sangalubongan a pannakaiwaras bayat iti tallo-lawas a periodo manipud Abril 24 aginggat’ Mayo 14.
2 Iti amin a paset ti lubong, dagiti tattao ti makmaklaat ken masapsaplit iti adu a problema. Masinunuo a ti Kingdom News ti mangpainteres kadagidiay a maseknan maipapan iti mapaspasamak, bayat nga iturongna ida iti Sao ti Dios a kas di agbiddut a gubuayan iti giya ti tao. (Sal. 119:105) Amintayo ti kumita iti masanguanan a mangala ti kopia ti Kingdom News inton mairuar iti Abril 23. Kabayatanna, adu ti masapul nga isagana a maipaay iti daytoy nalawa a tallo-lawas a kampania.
3 Paregtaen Dagiti Amin a Makiraman a Sipipinget: Siasino dagiti mabalin a makiraman iti trabaho? Sigurado a tunggal maysa nga agibumbunannagen ti sigagagar a mangaramid iti dayta! Dagiti met ngay estudiante ti Biblia a kanayonen a makigimgimong iti kongregasion? Dadduma kadakuada ti nabayagen a naitimpuyog kadatayo ken agprogprogresoda. No nayatadaydan ti kabibiagda a maitunos kadagiti Nainkasuratan a prinsipio, maikarida kadin a maibilang kas manangiwaragawag iti Pagarian? Ti agibumbunannag a mangidadaulo ti panagadal iti Biblia ti mangilawlawag iti estudiante maipapan daytoy a banag, ket no natarigagay a makiraman iti tay-ak ti serbisio, dua a panglakayen ti mangirepaso kenkuana iti material idiay pinanid 97-99 iti libro nga Organisado a Mangitungpal ti Ministeriotayo. Daytoy ti masapul a maaramid a dagus tapno dagidiay a maikari kas di bautisado nga agibumbunannag ket maaddaanda ti naan-anay a pannakiraman iti kampania. Dagiti estudiante ti Biblia a saan pay a maikari kas di bautisado nga agibumbunannag ti kaskasdi a maparegta a mangited iti tract kadagiti am-ammoda wenno miembro ti pamiliada.—Kitaenyo met Ti Pagwanawanan, Nobiembre 15, 1988, pinanid 17, parapo 8.
4 Saan a narigat daytoy a trabaho; tunggal maysa kabaelanna ti makiraman. Iti linawas a panagadal ti pamiliada, mabalin nga iraman dagiti nagannak iti sesion ti panaginsayo maipapan iti tract tapno amin a miembro ti pamilia ket nakasagana a mangipresenta iti Kingdom News iti panagbalaybalay. Ti simple a panangiparang isut’ masansan a kasayaatan. Kalpasan ti ababa nga introduksion, maitukon ti Kingdom News iti bumalay, ket paregtaen a basaenna dayta. No ti bumalay mangipakita iti interes, mairekord daytoy tapno masublianyo a parayrayen ti interesna. (1 Cor. 3:6, 7) Ti tulbek iti balligi isu ti kaadda ti simple, nasayaat pannakaisaganana a presentasion.
5 ‘Aduantayo ti aramiden’ bayat ti Abril ken Mayo. Iti sumaruno a bulan a ruar Ti Ministeriotayo iti Pagarian, ti kanayonan nga impormasion ti maipaay iti insert a napauluan iti “Aduankayo ti Aramiden iti Trabaho ti Apo.”—1 Cor. 15:58.