Panangidaulo iti Narang-ay a Panagadal iti Biblia Kadagiti Pagtaengan
1 Ania ti pagpapadaan ti maysa a nars idiay Tanzania, ti agtutubo idiay Argentina, ken ti maysa nga ina idiay Latvia? Ipadamag ti 1997 Yearbook (p. 8, 46, ken 56) a napartak ti irarang-ayda amin a tallo iti panagadalda iti Biblia kadagiti pagtaenganda, gapu ta kayatda nga adalen ti libro a Pannakaammo iti nasursurok ngem maminsan iti kada lawas. Naisingasing a no mabalin, ikagumaan koma nga iyadal dagiti agibumbunannag ti maysa a kapitulo ti libro iti kada panagadal. Nupay kasta, marigatan ti dadduma a mangaramid iti kasta. Nupay agpannuray dayta kadagiti kasasaad ken kabaelan ti tunggal estudiante, nagballigi dagiti aduan kapadasan a mannursuro babaen ti panangaramid kadagiti sumaganad a singasing.
2 Kas nailawlawag iti suplemento ti Ministeriotayo iti Pagarian a Hunio 1996, nasken a sanayenyo dagiti estudianteyo nga agsagana iti panagadal. Iti damo unay, nasayaat nga ilawlawag ken ipakita no kasano nga aramiden daytoy. Ipakitayo kadakuada ti libroyo a Pannakaammo. Kaduaenyo a mangisagana iti umuna a maadal. Tulonganyo dagiti estudiante a mangbirok kadagiti pannulbek a sasao wenno grupo dagiti sasao a direkta a mangsungbat iti nayimprenta a saludsod sa kalpasanna ugedan wenno markaanyo dagitoy. Dadduma nga agibumbunannag inikkanda pay dagiti estudianteda iti pagmarkada. Paregtaenyo ida a mangkita kadagiti amin a kasuratan bayat nga isaganada ti maadal. Babaen ti panangaramidyo iti daytoy, sansanayenyo met ida nga agsagana iti itatabunoda iti Panagadal iti Libro ti Kongregasion ken Panagadal iti Pagwanawanan.—Luc. 6:40.
3 Ti nasayaat a mannursuro pagsawenna ti estudiante ket saan nga isu ti makaadu nga agsao. Liklikanna ti pannakasinga kadagiti saan unay a napateg a punto. Manmano nga agusar iti kanayonan a material. Imbes ketdi, pagminarenna dagiti kangrunaan a punto ti leksion. Dadduma inikkanda dagiti estudiante iti kanayonan a literatura a tumulong kadakuada nga agbirok iti sungbat kadagiti saludsod. Mainayon pay, makagun-od dagiti interesado iti kanayonan a detalyado nga impormasion iti itatabunoda kadagiti gimong ti kongregasion.
4 Nalabit saan a nasken a kitaen amin a naisitar a kasuratan iti leksion. Mabalin a mailawlawag ti dadduma a kangrunaan a punto manipud kadagiti naadaw a teksto iti parapo. Kabayatan ti panagrepaso, pagminarenyo dagiti pannulbek a kasuratan a napagsasaritaan ken paregtaenyo ti estudiante a laglagipenna dagitoy.
5 Kasano ti Rumbeng a Kapaut ti Kada Sesion?: Saan a nasken a malimitaran ti panagadal iti maysa nga oras. Nawaya dagiti dadduma a bumalay ket mabalin a tarigagayanda ti napapaut a panagadal. Wenno nalabit kayat ti estudiante ti agadal iti nasursurok ngem maminsan iti makalawas. Makagunggona daytoy kadagidiay makaaramid iti kasta.
6 Kas panangiladawan ti Isaias 60:8, ginasut a ribu ita a kabbaro nga agdaydayaw ken Jehova ti “agtayab a kasla ulep, ken kakasla kalkalapati kadagiti tawada” a mapan kadagiti kongregasion dagiti tattaona. Aramidentayo koma amin ti pasettayo a makibinnadang ken Jehova bayat a pappapartakenna ti pannakaurnong dagiti arig-karnero a tattao.—Isa. 60:22.