Taginayonenyo ti Nasayaat a Kondukta a Pakaidayawan ti Dios
1 Sadinoman ti ayantayo, ti kababalin, panagkawkawes, ken panaglanglangatayo iparangarangda ti kinasiasinotayo ken ti Dios a pagdaydayawantayo. Ad-adda nga agminar daytoy kadagiti dadakkel a taripnong ti ili ti Dios, a pakapaliiwan kadatayo ti adu a tattao. No mapagulidanantayo, maitan-ok ti nagan ni Jehova. (1 Ped. 2:12) Nupay kasta, ti di umiso a kababalin wenno naalas a tigtignay ti sumagmamano a kakabsat mulitanda ti nagan ti Dios ken ti ilina. (Ecl. 9:18b) Agpannuray iti konduktatayo ti panangmatmat dagiti tattao iti organisasion nga ayantayo ken iti Dios a pagdaydayawantayo. No silalagiptay iti dayta, sigurado nga ‘aramidentayo ti isuamin a bambanag a maipaay iti dayag ti Dios.’—1 Cor. 10:31.
2 Umiso a Kababalin iti Kombension: Aniaman ti kita ti pasilidad a mausar, mamatmatan koma dayta a kas dakkel a Kingdom Hall kabayatan ti kombension. Umiso koma ti panagkawkawes ken panaglanglangatayo a kas met laeng no makigimongtayo iti kongregasion. Bayat ken kalpasan dagiti sesion ti kombension, liklikan koma dagiti kakabsat ti mangisuot kadagiti di natakneng wenno di maitutop nga uso a kawes, a mangiparangarang iti espiritu ti lubong ken mamagbalin kadatayo a narigat a malasin kas pudno a Kristiano. Siguraduen koma dagiti kabsat a babbai a maitutop ti kinatakneng ti estilo ken kagayad ti palda ken bestidada. (1 Tim. 2:9, 10) Makikombension man, ag-hotel, mangan iti restawran, wenno ag-shopping, kanayontay koma nga iyanninaw a ministronatayo ti Dios, ket ditay mangipaay iti pakaitibkolan ti siasinoman.—2 Cor. 6:3.
3 Maangayto ti bautismo iti agsapa ti Sabado iti kombension. Ilawlawag ti Abril 1, 1995 a Pagwanawanan, panid 30, ti kababalin a nasken nga iparangarangtayo iti dayta nga okasion. Kuna ti artikulo a “rumbeng a matmatantay ti bautismo a buyogen ti maitutop a kinaserioso. Saan a panawen dayta para iti naariwawa a panangyebkas ti rikrikna, panagpadaya, wenno panagkakatawa. Ngem saan met dayta a maysa a naliday wenno nakalkaldaang a panawen.” Saan a mayanatup nga agisuot dagiti agpabautisar iti nasaragasag a pagan-anay a pagdigus, lallaki man wenno babbai. Nasken ngarud nga iyanninaw ti amin ti kinaserioso ken kinaragsak ti Nakristianuan a bautismo.
4 Agbalonkayo Bayat ti Kombension: Kiddawen ti Sosiedad nga agbalontayo iti kada aldaw bayat ti kombension. Kaaduan a kakabsat ti nagtungpal iti daytoy a singasing ket nakitada a mapagsasanguanda a sangapamiliaan ti balonda apaman a malpas ti sesion iti agsapa. Adu ti nagkuna a makaay-ayo ti agrelaks ken makilangen kadagiti kakabsat kabayatan ti intermision iti aldaw. Maysa a rason no apay a maulit daytoy nga instruksion ket gapu ta nadlawmi a rummuar dagiti kakabsat manipud iti auditorium tapno gumatangda iti taraon kadagiti aglaklako iti lansangan ken fast-food a restawran nga adda iti asideg. No agbalon amin a kakabsat iti pangaldawda imbes a gumatang kadagiti agtagtagilako iti ruar, maliklikan nga aguurnong dagiti agtagtagilako kadagiti pagserkan ti pasilidad ti kombension, a pakaigapuan ti panagsisinneksek ken saan a makaay-ayo a buya.
5 Saan a Tiempo ti Panagnegosio: Yantangay ti pagkombensionan ket agbalin a dakkel a Kingdom Hall iti tallo nga aldaw, awan koma kadagiti tumabuno ti agnegosio sadiay. Saan nga umiso a gundawayan ti asinoman a kabsat ti agnegosio iti kombension, wenno mangaramid iti ilakona a kas kadagiti akkub ti libro wenno T-shirt, paypay, wenno kalendario a namarkaan iti tema ti kombension.
6 Panangtaginayon iti Kinadalus ti Pagkombensionan: No ibelleng ti tunggal kabsat ti basurana iti umiso a lugar wenno iyawidna laengen, nalaka la a taginayonen ti kinadalus ti pagkombensionan. No madlawyo ti aniaman a papel a nakawara, pidutenyo koma a dagus. Sanayen koma dagiti nagannak ti ubbingda a saan nga agiwara no di ket ibasurada dayta. No makapagboluntariokayo iti apagbiit tapno agdalus iti pagasambleaan kalpasan ti sesion iti kada aldaw, maapresiar unay dayta.
7 Palagipannatayo ni Pedro no ‘ania a kita ti tattao ti rebbeng koma a pagbalinantayo kadagiti nasantuan a panagbibiag ken ar-aramid ti nadiosan a debosion.’ (2 Ped. 3:11) Sapay koma ta ti panagsao ken panagtignaytayo bayat ti “Managtungpal iti Sao ti Dios” a Kombension Distrito ket tumulong kadagiti nasingpet ti panagpuspusoda a managpaliiw tapno maam-ammo ken dayawenda ti naindaklan a Diostayo, a maikari iti amin a dayaw ken dayag.—1 Cor. 14:24, 25.