Agaramidkayo iti Naimbag ket Mapadayawankayo!
1 “Addaanda iti kinatalingenngen a diak pay nakita iti sabali a tattao.” “Makaparagsak ti makilangen iti daytoy a grupo.” Kasta ti adu a positibo a komento a naawat manipud kadagiti umim-imatang kalpasan dagiti kombension distrito idi napalabas a tawen, a mangipakpakita iti nasayaat a reputasiontayo kas maysa nga organisasion. (Prov. 27:2; 1 Cor. 4:9) Pagultimuanna, pakaidayawan dayta ni Jehova. (Mat. 5:16) Mapaspasungadantay ti sabali pay a nagsayaat a gundaway a mangidayaw iti Dios bayat “Dagiti Mannursuro iti Sao ti Dios” a Kombension Distrito ita a tawen.
2 Tinawen a makaawattayo iti naayat a pammalagip maipapan iti maitutop a kababalin iti kombension. Apay? Gapu ta ditay kayat ti maibuyog iti agtultuloy a dumakdakes a kababalin, panagkawkawes, ken panagug-ugali ti lubong. Ditay kayat a madadael ti nasayaat a reputasiontayo. (Efe. 2:2; 4:17) Laglagipentayo koma dagiti sumaganad a panagannad.
3 Agaramid iti Naimbag—iti Kombension: Maay-ayo dagiti umim-imatang no makitada a nadayaw ken natulnog dagiti agtutubotayo. (Efe. 6:1, 2) Pangngaasiyo a nagannak ta asikasuenyo dagiti annakyo iti pagkombensionan tapno saanda a makasinga iti sabsabali. Bayat dagiti sesion, isuroyo ida no kasano ti simple a panaginotar ken panagatension. No malpas ti tunggal sesion, saanda koma a mabaybay-an nga agtaraytaray, yantangay ti pasilidad nga us-usarentayo ket mamatmatan a dakkel a Kingdom Hall bayat ti kombension.
4 Maminsan manen nga isingasingmi nga agbalon ti amin iti pangaldawda bayat ti kombension iti kada aldaw. Mangipaay daytoy iti nasayaat a gundaway nga agrelaks bayat ti intermision iti aldaw ken tiempo a makilangen kadagiti kakabsat manipud iti nagduduma a kongregasion. No agbalon amin a kakabsat imbes a gumatangda iti taraon kadagiti aglaklako iti lansangan wenno restawran, daytoy ti mangupay iti dadduma kadagitoy nga aglaklako nga agpupunipon kadagiti pagserkan ti pagkombensionan, a pakaigapuan ti kinailet ken di makaay-ayo a buya. Agbalonkayo iti simple laeng a taraon, saan a nakaad-adu, tapno mabalin a kanen dagita iti tugawyo ket saanyo a maokuparan ti nalawa nga espasio. Iti kasta saanyo a masinga ti sabsabali.
5 Kas panangraem iti naespirituan a lamisaan ni Jehova, awan koma ti asinoman kadagiti tumabuno ti agnegosio. Ti kombension ket saan a maiparbeng a gundawayan ti siasinoman a kabsat tapno iyam-ammo ti negosiona, wenno aglako iti bambanag, kas iti akkub ti libro wenno T-shirt, paypay, wenno kalendario a namarkaan iti tema ti kombension.
6 No ibelleng ti tunggal kabsat ti basurana iti umiso a lugar wenno iyawidna dayta, nalaka la a taginayonen ti kinadalus ti pagkombensionan. Sakbay a pumanawkayo iti malem, alertokay koma a mangpidut iti aniaman a papel wenno dadduma pay a banag a mabalin a naiwara. Sanayen koma dagiti nagannak ti ubbingda a saan nga agiwara no di ket ibasurada dayta. No makapagboluntariokayo apagbiit a tumulong a mangdalus iti pagkombensionan kalpasan ti sesion iti tunggal aldaw, apresiaren unay dayta dagiti kakabsat a natudingan iti departamento ti panagdalus.
7 Agaramid iti Naimbag—Babaen ti Panagkawkawes ken Panaglanglangatayo: Kalpasan ti maysa a kombension distrito iti napalabas a tawen, kastoy ti impablaak ti editor ti maysa a dakkel a pagiwarnakan iti siudad: “Kangrunaan ti amin, nakadkadlaw ti aw-awid dagiti Saksi. Anian a makaay-ayo a makita ti nagadu unay a tao a nadayaw ken natanang ti panagtignayda. Iti Domingo, ginasgasut a pamilia a nakapostura manipud iti amin a puli ken etniko a nalikudan ti siuulimek a nagturong iti arena. Naiduma unay ti aw-awidda iti kaaduan a tallaong nga aguummong iti arena. Kinapudnona, naiduma unay dagiti Saksi iti kaaduan a tallaong. Nagbalin a gagangay a makita ti nasabrak a kondukta iti publiko. . . . Pudno a makaay-ayo ti tallaong dagiti Saksi.” Ditay koma pulos ipalubos a ti panagkawkawes ken panaglanglanga wenno konduktatayo ti mangdadael iti naespirituan nga atmospera ti kombension.—Fil. 1:10; 1 Tim. 2:9, 10.
8 Agaramid iti Naimbag—Kabayatan ti Bautismo: Dagiti kandidato iti bautismo ti mangmatmat koma iti daytoy nga okasion buyogen ti dakkel a panagraem. Ti panangisuot iti nanakman a kawes a pagdigus ti mangipakita iti apresasion iti kinasagrado ti okasion. Sakbay a tumabuno dagiti estudiante iti kombension, makagunggona unay nga irepaso ti mangyad-adal kadakuada ti “Salsaludsod Dagiti Agbasbasa” ti Abril 1, 1995, a ruar ti Pagwanawanan.
9 Ti nasayaat nga ugali ken nadiosan a konduktatayo ti mangpatalged kadagiti Nakristianuan a patpatientayo ken tumulong kadagiti napudno a tattao a mangbigbig iti kinapudno. Gapuna, ‘itultuloytayo nga aramiden ti naimbag’ ket mapadayawantay bayat a tumabunotayo iti “Dagiti Mannursuro iti Sao ti Dios” a Kombension Distrito.—Rom. 13:3.