Agbalinkayo a Nasantuan iti Amin a Kababalinyo
1. Apay a napateg ti agbalin a nasantuan iti amin a kababalintayo?
1 Kas ad-adipen ti nasantuan a Dios a ni Jehova, ikagumaantayo ti agbalin a nasantuan iti amin a kababalintayo. (1 Ped. 1:15, 16) Kayat a sawen daytoy nga ikagumaantayo nga itandudo dagiti pagalagadan ni Jehova iti amin nga aspeto ti biagtayo. Ti kombension distrito iti daytoy a tawen ipaayannatayo iti naisangsangayan a gundaway a mangiparangarang iti nasantuan a kababalin.
2. Kas panagsagana iti kombension distrito, apay a rumbeng a natakneng ti panaglanglangatayo?
2 Natakneng a Panaglanglanga: “Dagiti Saksi ni Jehova ti kasayaatan! Nasingpet ken nasayaat ti panagkawkawesda, ken ipakpakitada ti nauneg a panagraem.” Kasta ti kuna ti pannakabagi ti maysa a hotel idi naangay ti maysa a kombension distrito idi napan a tawen. Iti sabali pay a kombension, kastoy ti kuna ti maysa nga empleado iti hotel: “Nabatad a ti panagkawkawes dagiti miembroyo ket itakderanna ti Dios.” Wen, dagiti delegado iti kombension ket mapalpaliiw dagiti sabsabali. Kayattayo ngarud ti agkawes “iti pamay-an a maikari iti naimbag a damag.”—Fil. 1:27.
3. Apay a maysa a karit ti natakneng a panagkawkawes ken panaglanglanga?
3 Mabalin a maysa a karit ti natakneng a panaglanglanga. Ti imoral a lubong ni Satanas im-impluensiaanna dagiti tattao nga agaruat kadagiti saan a natakneng, makagargari, ken karkarna ti estilona a kawes a saan a maitutop. (1 Juan 2:15-17) Gapuna, no agkawestayo masapul a ‘tallikudantayo ti di kinanadiosan ken nailubongan a tartarigagay ken agbiagtayo buyogen ti kinasimbeng ti panunot . . . iti tengnga daytoy agdama a sistema ti bambanag.’ (Tito 2:12) Pulos a ditay kayat a masinga dagiti sabsabali—dagiti man kakabsattayo, agtartrabaho iti hotel wenno restawran, wenno dagiti agpalpaliiw—gapu iti panaglanglangatayo.—1 Cor. 10:32, 33.
4. Ania dagiti saludsod a tumulong kadatayo a mangsukimat iti panaglanglangatayo?
4 Naemma ken Naurnos a Kawes: No agsagsaganaka para iti kombension, isaludsodmo iti bagim: ‘Naemma kadi ti kawesko, wenno makaawis iti atension dagiti sabsabali? Ipakitana kadi ti panagraem iti rikna dagiti sabsabali? Nababa kadi ti putol ti blusak wenno nakiting unay? Makagargari kadi wenno nakipet dagiti kawesko? Maitutop kadi ti kawesko para iti maysa a delegado iti kombension nga agus-usar iti badge card? Bayat ti panagaliwaksay, mabainak kadi a mangasaba iti di pormal gapu iti kawesko?’—Roma 15:2, 3; 1 Tim. 2:9.
5. Kasano a makatulong kadatayo dagiti dadduma tapno maaddaantayo iti natakneng a langa?
5 Magunggonaantayo kadagiti kapaliiwan dagiti nataengan a Kristiano. Rumbeng a saludsoden dagiti assawa a babbai no ania ti makuna dagiti assawada iti kawesda. Dagiti managbuteng iti Dios a nagannak matulonganda dagiti annakda iti daytoy a banag. Maysa pay, dagiti mararaem a natataengan a kakabsat a babbai ‘mapasublida dagiti agtutubo a babbai iti rikriknada . . . a nasimbengda iti panunot, nadalus’ iti panaglanglanga “tapno ti sao ti Dios saan koma a mapagbassawangan.” (Tito 2:3-5) Mangipaay dagiti publikasiontayo kadagiti makatulong nga ilustrasion a mangiladladawan iti naemma ken naurnos a kawes.
6. Ania ti ramanen ti nasayaat a kababalin iti pagkombensionan?
6 Mangipakita iti Konsiderasion Kadagiti Sabsabali: Nangnangruna koma a nabatad ti nasayaat a kababalintayo iti pagkombensionan. Pangngaasiyo ta makikooperarkayo iti ibaga kadakayo dagiti attendant, iti paradaan ken iti auditorium. (Heb. 13:17) Katugaw koma dagiti nagannak ti annakda imbes a palubosanda ida, agraman dagiti agtutubo, a makikatugaw kadagiti grupo dagiti dadduma pay nga agtutubo. Awan koma ti maikonektar nga aniaman nga alikamen a pagirekord iti electrical wenno sound system ti pasilidad ken mausar laeng koma dagita iti pamay-an a saan a makasinga kadagiti sabsabali. Saanka nga agusar iti flash no kayatmo ti mangretrato bayat ti sesion. Saanmo a bay-an nga aguni ti pager ken cell phone tapno saan a makasinga.
7. Kasano a pakaidayawan ti Dios ti kababalintayo no addatayo iti kombension?
7 Ti konduktatayo ti mangiduma kadatayo kadagiti sabsabali ken pakaidayawan ti Diostayo. (1 Ped. 2:12) Iti kombension, adu ti makakita iti tigtignay dagiti Saksi ni Jehova. Gapuna, determinadokayo koma nga agbalin a nasantuan iti amin a kababalinyo.
[Kahon iti panid 5]
Mangiparangarang iti Nasantuan a Kababalin
◼ Agkawes iti maitutop kadagiti Saksi
◼ Siputanyo dagiti annakyo
◼ Mangipakita iti konsiderasion kadagiti sabsabali