Agbalin nga Ulidan iti Nasayaat nga Ar-aramid
1. Apay a nasken a nangnangruna nga annadantayo ti konduktatayo iti kombension distrito?
1 No adutayo nga agtataripnong kadagiti kombension distrito, ti panagtigtignay ken pannakilangentayo kadagiti dadduma ti nangnangruna a madlaw dagiti mangpalpaliiw kadatayo. Gapuna, tunggal maysa kadatayo ipangagna koma nga ad-adda ti pammagbaga ti Biblia: ‘Nasimbeng koma ti panunotyo, nga iti amin a bambanag iparangyo ti bagiyo a mapagulidanan iti nasayaat nga ar-aramid.’ (Tito 2:6, 7) Mabalin a kasapulan ti kanayonan a panagregget tapno ‘maitultuloy a kitaen, saan a ti personal a panaginteres iti laeng bukod a bambanag, no di ket kasta met ti personal a panaginteres iti bambanag ti sabsabali.’ (Fil. 2:4) Usigentayo ti dadduma a benneg a mabalintayo nga iyaplikar daytoy iti mapaspasungad nga “Idayawyo ti Dios” a Kombension Distrito.
2. Ania ti masapul a laglagipentayo mainaig kadagiti urnos iti pannangan?
2 Dagiti Urnos iti Pannangan: Iparparangarangtayo ti nasayaat nga ar-aramid no simple ti balonentayo a pangaldaw ken ditay singaen dagidiay nakatugaw iti asidegtayo no mangaldawtayon. Nakonsiderartayo no ditay makaibelleng iti danum wenno juice bayat a mangmangantayo, ket no di inggagara a napasamak dayta, masapul a dalusantayo a dagus. Sakbay a pumanawtayo iti pagkombensionan, masapul a siguraduentayo nga awan ti nabatitayo a basura iti man nagtugawantayo wenno iti asidegna. Iti kasta, panawantayo a nadalus ti pasdek a kas iti kinadalusna a nasangpetantayo iti agsapa.
3. Kasanotayo a ‘makaaramid iti naimbag kadagiti amin’ no makikooperartayo kadagiti attendant?
3 Pagparadaan ken Dagiti Attendant: No adda luganyo, makikooperarkayo a naan-anay kadagiti parking attendant, a tungpalenyo ti ibagada a pagparadaanyo, uray no kasla saan a kombiniente kadakayo. Surotenyo ti ibaga dagiti attendant a pagtugawanyo, a laglagipenyo a dagiti dadduma a pagtugawan ket nairanta kadagiti lallakay ken babbaket ken nakapuy ti salun-atda. Maysa pay, no mangalakayo iti aniaman a kabbaro a nairuar a publikasion, dikay agdarasudos a mapan tapno laeng umunakayo iti pila uray di pay nalpas ti sesion, no di ket, siaanus nga urayenyo a malpas ti sesion. Kalpasanna, surotenyo dagiti instruksion ti tserman iti sesion ken dagiti attendant. Kadagitoy a wagas, ‘maaramidtayo ti naimbag kadagiti amin.’—Gal. 6:10.
4, 5. Kasano a dagiti ubbing maidayawda ni Jehova, ket ania ti responsabilidad dagiti nagannak?
4 Dagiti Nagannak ken Annak: Iti lubong nga adu nga agtutubo ti dakes ti kababalinda, madlaw a nagpaiduma dagiti annaktayo, ket pakaidayawan daytoy ni Jehova ken ti organisasionna. Ngem no dadduma, tumaud dagiti parikut no saan a maaywanan a naimbag dagiti annak. (Prov. 29:15) Dagiti nagannak dida koma baybay-an dagiti annakda bayat dagiti intermision.
5 Sakbay ti kombension, nadlaw ti dadduma a nagannak a makatulong no ibagada kadagiti annakda no ania a kababalin ti manamnama kadakuada. (Efe. 6:4) Tulonganda dagiti annakda a mangbigbig a ti napaypayso a Nakristianuan nga ayat ket “saan a naalas ti panagtigtignayna” wenno “saanna a sapulen dagiti bukodna a pagimbagan.” (1 Cor. 13:5) Nairanta ti kombension distrito a pakasursuruantayo ken ni Jehova, ket dagiti ubbing agraman dagiti adulto maipakitada ti panagraemda iti daytoy nga urnos babaen ti konduktada agpada iti pagkombensionan ken iti sadinoman.—Isa. 54:13.
6. Ania ti mabalin nga epekto ti nasayaat a konduktatayo kadagiti dadduma?
6 Ti naimbag a konduktatayo mailintegna dagiti di umiso a pagarup ken maguyugoyna dagiti tattao iti pudno a panagdayaw. (Mat. 5:16; 1 Ped. 2:12) Sapay koma ta amin a makalangentayo iti kombension distritotayo ket nasayaat ti makunada babaen ti panagtigtignay ken pannakilangentayo kadakuada. Iti daytoy a pamay-an ‘maiparangtayo ti bagitayo a mapagulidanan iti nasayaat nga ar-aramid’ ken maidayawtayo ni Jehova.—Tito 2:7.
[Kahon iti panid 4]
Nakonsiderasiontayo Koma Kadagiti Dadduma
▪ Dalusanyo ti nagtugawanyo sakbay a pumanawkayo
▪ Aganuskayo no mangalakayo kadagiti kabbaro a ruar a publikasion
▪ Makikooperarkayo kadagiti attendant
▪ Aywananyo a naimbag dagiti annakyo