Video a Manglawlawag ken Mangtukay Kadakayo!
Bulan idi ti Abril 1951. Naummong ti rinibu a Saksi ni Jehova iti dati nga Union Soviet—amin a miembro ti pamiliada—naipaluganda kadagiti tren, sa naidestieroda idiay Siberia. Apay a determinado ti nabileg a gobierno ti Soviet a mangpaksiat kadakuada? Kasano a nakalasat dagiti kakabsattayo ken immaduda pay ketdi iti laksid ti adu a tawen a nakaro a pannakaidadanes? Maammuanyo dagiti sungbat iti video a Faithful Under Trials—Jehovah’s Witnesses in the Soviet Union. Buyaenyo, ket babaen iti makaisuro a mensahena matignaykayo koma a mangtaginayon iti kinamatalekyo ken Jehova, uray ania ti mapasamak!
Masungbatanyo kadi dagitoy a saludsod? (1) Kaano ti damo nga opisial a panangbigbig ti gobierno kadagiti Saksi ni Jehova idiay Russia? (2) Sakbay ken kalpasan ti Gubat Sangalubongan II, kasano nga immadu ti pamilia dagiti Saksi idiay Union Soviet? (3) Kasano a ti pammatida ket direkta a maikontra iti pilosopia ni Lenin? (4) Ania daydi Operation North, ket ania ti ninamnama ni Stalin a maaramidna babaen dayta? (5) Ania ti epektona kadagiti Saksi no maidestieroda, ket ania ti naibaga nga aramidenda tapno saanda a maidestiero? (6) Iti nawatiwat a panagbiaheda iti tren nga agturong idiay Siberia, kasano a nagpipinnaregta dagiti kakabsat a nagsiddaawan dagiti nangtiliw kadakuada? (7) Ania dagiti rigat a sinagaba dagiti Saksi idiay Siberia? (8) Ania a naespirituan a probision ti impateg unay ti ili ni Jehova, ken apay? (9) Apay a sidadaan dagiti kakabsat a mangirisgo iti biagda maigapu kadagiti literaturada, ket kasanoda a nagballigi iti laksid ti napinget a panangikagumaan dagiti agtuturay a manglapped iti pananggun-odda kadagita? (10) Kasano nga intultuloy ni Khrushchev nga idadanes ti ili ti Dios? (11) Kasano nga inkagumaan dagiti agtuturay a dadaelen ti pammati dagiti annak dagiti Saksi? (12) Ania ti nalawag a pannakaawat idi dagiti kakabsat no apay a maidaddadanesda? (2002 Tinawen a Libro, panid 203-4) (13) Kasano a nagballatek kadagiti manangidadanes ti napinget a panangbusorda iti organisasion ti Dios? (2002 Tinawen a Libro, panid 220-1) (14) Aniada a bambanag ti pimmudno a dati nga inar-arapaap laeng dagiti Saksi iti dati nga Union Soviet? (15) Ania ti nakatulong kadagiti kakabsattayo a nangibtur kadagiti pakasuotanda, ket kasano nga inladawan ti maudi nga eksena ti video ti kinapudno ti Jeremias 1:19? (16) Mangisalaysay iti maysa kadagiti aktual a kapadasan maipapan iti kinamatalek iti sidong ti pakasuotan a nangnangruna a nangtukay kenka.