Maitampok Inton Setiembre ti Espesial a Ruar ti Agriingkayo!
1 Dandani amin ti mangtagtagiragsak iti uni dagiti billit ken ti buya ti lumlumnek nga init. Nupay kasta, adu ti saan a mangbigbig a ti naayat a nailangitan nga Ama ti nangparsua kadagitoy a bambanag. Addaantayo iti naisangsangayan a gundaway a mangiwaragawag iti kinalaing ni Jehova a mangparsua babaen ti panagiwaras iti espesial a ruar ti Agriingkayo! (Isa. 40:28; 43:10) Ti intero a Setiembre a ruar ket naipamaysa iti topiko nga “Adda Kadi Namarsua?”
2 Iti Teritoria: No mabalin, iyurnosmo ti makiraman iti ministerio a panagbalaybalay a kadua ti kongregasion iti tunggal Sabado. Ngem siempre, mabalinmo latta nga itukon ti espesial a ruar iti sabali pay a tiempo bayat ti lawas. Mabalin a ti nangnangruna nga interesado iti daytoy a ruar ket dagiti mannursuro ken ti dadduma pay nga agtartrabaho iti tay-ak ti edukasion. Gapuna, mabalin ti mangaramid iti naisangsangayan nga urnos tapno masarungkaran dagiti kasta a tattao iti teritoriayo.
3 No adda mangipakita iti interes, mangibatika iti maysa a saludsod a sungbatamto iti sumaruno nga isasarungkarmo. Kas pagarigan, mabalinmo nga isaludsod no apay a ti naayat a Namarsua impalubosna ti kasta unay a panagsagaba. Kalpasanna, inton sumarungkarka, mabalinmo nga itampok ti kapitulo 1 wenno kapitulo 11 ti libro nga Isursuro ti Biblia. Wenno no kayatmo, mangibangonka iti saludsod maipapan iti panggep ti Namarsua ditoy daga sa ilawlawagmo ti kapitulo 3 inton sumarungkarka.
4 Iti Eskuelaan: No ages-eskuelaka, apay a dimo iregalo ti espesial a ruar ti Agriingkayo! kadagiti mannursuro ken kaeskuelaam? No mangikabilka iti kopia ti Agriingkayo! iti rabaw ti lamisaanmo, mabalin a matignay dagiti sabsabali nga agsaludsod maipapan kadagiti patpatientayo. Nalabit adda dagiti gundaway a mausarmo dagiti impormasion a linaon daytoy no ikalintegam ti pammatim bayat ti saritaan ti klaseyo wenno no agisagsaganaka kadagiti reportmo. Makatulong kenka daytoy a ruar ta addaan iti artikulo nga “Agimtuod Dagiti Agtutubo” a napauluan iti “Kasano a Maitakderak ti Panamatik iti Panamarsua?”
5 Maikari ni Jehova iti dayag ken dayaw gapu kadagiti pinarsuana. (Apoc. 4:11) Mapadayawantayo ti Namarsua kadatayo ken matulongantayo dagiti sabsabali a mangaramid iti dayta babaen ti sigaganetget a panangitukontayo iti Setiembre a ruar ti Agriingkayo!