Maitukon Inton Nobiembre ti Espesial a Ruar ti Agriingkayo!
1 Adu a tattao ti addaan kadagiti saludsod maipapan iti pateg ti Biblia. No tattao ti nangisurat, kasano a maikuna a Sao ti Dios dayta? Ania dagiti rason nga agtalekak iti panangiwanwan ti Biblia? Ania ti magunggonak no basaen ken adalek ti Biblia? Ania ti basaek a patarus iti Biblia? Dagitoy ti sumagmamano a saludsod a masungbatan iti espesial a ruar ti Agriingkayo! a napauluan iti “Mapagtalkanyo Kadi ti Biblia?”
2 Kayattayo nga iwaras daytoy nga espesial a ruar ti Agriingkayo! iti intero a teritoriatayo. No mabalbalin, makiramankayo iti kongregasion a mangasaba iti binalaybalay iti tunggal Sabado ti Nobiembre. Ipaimayo daytoy a ruar ti Agriingkayo! kadagiti kabagian, kaarruba, katrabahuan, mannursuro, kaeskuelaan, ken sarsarungkaranyo. Mangitugotkayo kadagiti kopia daytoy a ruar no mapankayo ag-shopping ken no agbiahekayo. Naidagadag kadagiti panglakayen a nayonanda ti pediduenda a kopia tapno adda umdas a suplay ti kongregasion.
3 Mangirugikayo iti Panangyadal iti Biblia: No makaipaimakayo iti magasin, mabalinyo ti mangibati iti pagpampanunotan ti bumalay sakbay nga agpakadakayo tapno adda rasonyo nga agsubli a mangyadal iti Biblia. Kas pagarigan, mabalinyo a kunaen, “Inton agsubliak, kayatko nga ipakita kadakayo ti sungbat ti Biblia iti daytoy a saludsod, ‘Ania ti panggep ti Dios iti daga?’” Kalpasanna, agsublikayo ket ipakitayo iti bumalay ti panid 4-5 ti libro nga Isursuro ti Biblia, wenno usigenyo ti parapo 1-3 iti kapitulo 3. Mabalinyo met a kunaen, “Inton agsubliak, kayatko ti mangilawlawag iti maysa a padto iti Biblia a matungtungpal itan.” Inton agsublikayo, ipakitayo iti bumalay ti kapitulo 9 ti libro nga Isursuro ti Biblia sa usigenyo ti parapo 1-3. Wenno, mabalinyo a kunaen laeng iti bumalay: “Saan a maawatan ti adu a tattao ti mabasbasada iti Biblia. Inton agsubliak, kayatkayo a tulongan a mangadal iti Bibliayo.” Inton sumarungkarkayo, ipakitayo ti libro nga Isursuro ti Biblia, ken idemostrayo ti panagadal.
4 Ti laeng Biblia ti naglaon kadagiti “nasantuan a sursurat” a ‘mamagsirib kadatayo maipaay iti pannakaisalakan.’ (2 Tim. 3:15) Gapuna, reggetantayo amin ti makiraman iti panangiwaras iti daytoy espesial a ruar ti Agriingkayo! tapno masursuro dagiti tattao ti agtalek iti Biblia!