Kasano no Agsinan Dagiti Nagannakko?

No agsina wenno agdiborsio dagiti nagannakmo, mabalin a dayta ti maysa kadagiti karirigatan a sanguem. Ania ti mabalinmo nga aramiden tapno maibturam ti saem a marikriknam?

Iti daytoy nga artikulo

• Tallo a banag a saanmo nga ar-aramiden

• Tallo a banag a mabalinmo nga aramiden

• Ti kuna dagiti padam nga agtutubo

Tallo a banag a saanmo nga ar-aramiden

1. Pabasolem ti bagim

“Naibaga idi ni Mommy a sipud kano nayanakak, nangrugin dagiti problemada ken Daddy. Isu a panagriknak, siak ti rason no apay a nagsinada.”—Diana.

Laglagipem: Saanmo a basol no agsina dagiti nagannakmo. Agsinada gapu ta adda dagiti problema iti relasionda. Saan a sika ti makagapu kadagiti problemada, ken saanmo met a masolusionan dagita. Isuda ti masapul a mangurnos kadagiti problema iti relasionda.

2. Agipempenka iti sakit ti nakem

“Kagurgurak unay ni Daddy idi nakirelasion iti sabali. Narigatanak nga agtalek manen kenkuana.”—Rianna.

Laglagipem: Mabalin a makapungtot ken madismayaka iti mapaspasamak kadagiti nagannakmo, ket normal laeng a mariknam dagita. Ngem saan a nasayaat no agipempenka iti sakit ti nakem ta madi ti epekto dayta iti bagim ken iti emosionmo. Isu nga ibagbagada a no agipempenka iti sakit ti nakem, kaska la imminum iti sabidong sa ur-urayem a madangran ti sabali.a

3. Panunotem a saanto met a naragsak ti panagasawam

“Mabutengak a baka maaramidko met ti inaramid ni Papa. Baka inton agasawaak ken addan annakko, maaramidko met ti banag a nagsinaan dagiti nagannakko.”—Jessica.

Laglagipem: Saan a gapu ta nagsina dagiti nagannakmo, agsinakayto metten iti asawam. Ti agpayso, mabalin a makasursuroka iti napasamak kadagiti nagannakmo. Kas pagarigan, mas ammomon no ania dagiti ugali a birokem iti agbalinto nga asawam. Mabalin met a mapasayaatmo pay dagiti ugalim tapno agbalinkanto a nasaysayaat nga asawa.

Tallo a banag a mabalinmo nga aramiden

1. Makisaritaka. Dagiti tattao a mangsolsolo kadagiti problemada ket dakdakkel ti posibilidadna a makasursuro kadagiti dakes a bisio, kas iti panagbartek wenno panagdroga. Imbes nga aramidem dagita, padasem dagitoy:

Makisaritaka kadagiti nagannakmo. No sangkaibaga kenka dagiti nagannakmo wenno ti maysa kadakuada dagiti problemada nga agassawa, kalmado ngem seriosoka koma a mangibaga no kasano a maap-apektaranka iti dayta. No marigatanka a makisarita iti personal, mabalinmo ti agsurat.

Makisaritaka iti pagtaltalkam a gayyem. Mabang-aranka no adda uray maysa laeng a dumngeg kenka. Ibaga ti Biblia a “ti pudno a gayyem agayat iti amin a tiempo ken maysa a kabsat a mapangnamnamaan no adda rigat.”—Proverbio 17:17.

Makisaritaka iti Namarsua kenka. Kanayon a dumngeg kenka ni Jehova a Dios, ti “Managdengngeg iti kararag.” (Salmo 65:2) Ibaga ti Biblia a mabalinmo nga ‘ipalladaw kenkuana ti amin a pakadanagam, ta ipatpategnaka.’—1 Pedro 5:7.

• Asino kadagiti nagannakmo ti mabalinmo a kasarita iti kalmado a pamay-an?

• Asino a pagtaltalkam a gayyem (kaedadmo man wenno adulto) ti mabalin a makatulong kenka tapno makayam ti situasionmo?

• Ania dagiti espesipiko a problema a mabalinmo nga ikararag?

2. Ag-adjust-ka

Gapu iti panagsina dagiti nagannakmo, baka kasapulan nga ag-adjust-ka iti baro a balay, eskuelaan, pinansial a kasasaad, wenno gagayyem pay ketdi. Siempre, posible a makapadismaya ken makapa-stress dayta, ken baka mariknam a naperdi ti biagmo. Ania ti makatulong kenka tapno nalaklakaka a makapag-adjust? Ikagumaam ti agpokus iti baro a situasionmo.

• Ania ti kadakkelan a panagbalbaliw a masapul nga aramidem gapu iti panagsina dagiti nagannakmo?

• Ania dagiti mabalinmo nga aramiden tapno makapag-adjust-ka iti dayta?

3. Kitaem dagiti nasayaat nga ugalim

Mabalin nga adu dagiti pagdandanagam no nagsina dagiti nagannakmo, ngem mabalin a makatulong met dayta tapno makitam dagiti nasayaat nga ugalim. Baka maaddaanka pay kadagiti baro nga ugali. “Idi nagdiborsio dagiti nagannakko, kapilitan nga agbalinak a mas responsable,” imbaga ni Jeremy a nagsina dagiti nagannakna idi 13 isuna. “Gapu ta siak ti in-inauna, kasapulan a siak ti ad-adda a tumulong ken Mama ken mangaywan iti adingko a lalaki.”

• Gapu iti panagsina dagiti nagannakmo, ania dagiti nakitam a nasayaat nga ugalim?

• Ania pay dagiti ugali a kayatmo a maadda kenka?