Ti Abilidad Dagiti Hormone a Tumulong Kadagiti Organ a Mangaramid iti Trabahoda

Tapno agtultuloy a nasayaat ti panagandar ti bagitayo, masapul nga adda espesipiko a kaadu ti electrolyte iti daratayo. Maysa a pagarigan ti electrolyte ket ti calcium. Ngem agduduma ti kaadu ti electrolyte a mausartayo iti kada aldaw. Isu nga ania ti ar-aramiden ti bagim tapno agtultuloy nga eksakto ti kaadu ti electrolyte iti daram?

No nasalun-at ti bagim, pagtalinaedenna nga eksakto ti kaadu ti electrolyte-mo babaen ti panagaramid, panangidulin, ken panangiruarna kadagiti hormone a mapan iti daram. Dagiti hormone ket tumultulong kadagiti organ a mangaramid iti trabahoda. Uray bassit laeng a hormone ti mapan iti daram, dakkelen ti epekto dayta iti bagim. Sigun iti Encyclopedia Britannica, dayta a proseso ket “saan laeng a basta nairanrana a mapaspasamak. Nakakomkomplikado dayta, ngem eksakto ti pannakapasamakna.”

Kas pagarigan, dagiti parathyroid gland nga adda iti tengngedmo madetekda uray ti bassit laeng a panagbalbaliw iti kaadu ti calcium iti daram. Uppat amin dagitoy a gland, a ti tunggal maysa ket kasla kadakkel ti bagas.

No madetek dagitoy a gland a bimmassit ti calcium iti daram, dagus a mangiruarda iti hormone a mangibaga kadagiti tulangmo nga agiruarda kadagiti naidulinda a calcium tapno mapan iti daram. No dadduma, mano laeng a segundo a mapasamak dayta! Ibaga met daytoy a hormone kadagiti kidney-m nga isardengda ti agibelleng kadagiti calcium ken ibagana met iti small intestine-mo a kakaaduenna ti agsepenna a calcium kadagiti kankanem.

Ngem no adu unay ti calcium iti daram, ti sabali pay a gland a maawagan iti thyroid gland ket mangiruar iti sabali a hormone. Ibaga daytoy a hormone kadagiti tulangmo nga ad-aduenda ti agsepen ken idulinda a calcium, ken ibagana kadagiti kidney-m nga ad-aduenda ti ibellengda a calcium.

Dua laeng dagitoy a hormone iti ginasut a hormone iti bagim a tumultulong kadagiti organ-mo a mangaramid iti nagduduma a trabahoda.

Panagkunam? Ti kadi abilidad dagiti hormone a tumulong kadagiti organ-mo a mangaramid iti trabahoda ket resulta ti ebolusion? Wenno adda nangdisenio iti dayta?