Napalaka a Kombension Distrito iti 1995

¹ Anian a makaparagsak ti dumar-ay kadagiti espiritual a piesta, kadagiti man gimong ti kongregasion, asamblea sirkito, espesial nga aldaw ti asamblea, wenno kombension distrito! Apay? Makapabang-ar ti makikadua kadagiti kakabsattayo, ket dagiti espiritual a bambanag a maidatag ipalagipda kadatayo dagiti napatpateg a bambanag.

² Rinibu dagiti naallukoy iti kakasta nga espiritual a taripnong iti kallabes a tawtawen. Iti nagbaetan ti tawen 1985 ken 1994, immadu ti bilang dagiti kongregasion iti sangalubongan iti nasurok a 50 porsiento, manipud 49,716 aginggat’ 75,573. Bayat a pappapardasen ni Jehova ti trabaho, umad-adu ti bilang dagiti kombension distrito ken asamblea sirkito. (Isa. 60:22) Uray ti panagadu ti bilang dagiti naaramid a kombension ditoy laeng Pilipinas, manipud 23 idi 1985 aginggat’ 42 idi 1994, isarmingna daytoy dakkel a rinang-ayan iti bilang dagiti kongregasion. Dumakdakkel ti trabaho a nainaig iti panangurnos ken panangtaming kadagitoy a kombension. Idinto ta agtataripnongtayo tapno magunggonaan iti espiritual a programa a naisagana maipaay kadagitoy a piesta, nainsiriban a palakaen aginggat’ mabalin ti pannakataming dagiti pisikal a kasapulan.

³ Dagiti Kanayonan nga Addang a Maaramid: Kumitatayo ken Jehova a maipaay iti bendisionna bayat nga agtignaytayo a sirarang-ay. Maragsakantayo a makakita nga intedna kadagiti tattaona ti kasapulan nga espiritu ti kinasirib ken pannakaawat. Masapul a kumanunongtayo a babaen ti klase matalek ken masirib nga adipen, iturturong ni Jesu-Kristo dagiti bambanag a sisasayaat maipaay iti pannakaibanag ti panggep ni Jehova iti nakaskasdaaw a wagas. (Mat. 24:45-47; Col. 1:9, 10) Itan ti matalek nga adipen nangaramid itay nabiit iti kastoy nga anunsio: “Manipud kadagiti kombension distrito iti 1995 ken dagiti Setiembre 1995 nga asamblea sirkito ken espesial nga aldaw ti asamblea, awanton ti taraon a maiserbi. Mangitugot ti tunggal maysa iti bukodna a taraon ken inumen.” Yaplikartay met daytoy nga urnos ditoy Pilipinas. Mabalin nga itultuloy dagiti asamblea sirkito ken espesial nga aldaw ti asamblea ti agdama nga urnosda iti serbisio ti taraon agingga iti Agosto 1995 no kayatda. Nupay kasta, dagidiay nayeskediul kalpasan ti Setiembre 1 ti sumurotton iti urnos a nadakamat. Masiguromi nga addanto positibo a panangawat iti daytoy nga anunsio. Nalabit nga interesadokayo a mangammo no kasano a makagunggona daytoy a panagbalbaliw. Mabalin a ti sumaruno a panangrepaso iti panagbalbaliw a naaramiden iti kallabes a tawtawen ket nasayaat a pammalagip iti pagsayaatan a nagun-odanen iti panangpalaka iti trabaho kadagiti kombension.

⁴ Dagiti Napalabas a Panagbalbaliw a Mangpalaka: Sakbay ti napalaka nga urnos ti kombension distrito, kas iti serbisio ti taraon, boluntario a serbisio, ken pagdagusan, nawadwad a trabaho ti kinasapulan iti biang dagiti rinibu a lokal a kakabsattayo iti trabaho sakbay ti kombension. Gapu kadagiti pakakumikoman dagiti kakabsattayo a patauden ti inaldaw a panagbiag ken agtultuloy a panagrang-ay ti organisasion, ti panangbalbaliw a mangpalaka iti trabaho ket talaga a kasapulan. Mainayon pay, kas resulta ti panangpalakada iti panagandar ti serbisio ti taraon idiay Estados Unidos idi 1978, nasurok a 70,000 a kakabsat idi ti nagtrabaho a sipipinget bayat dagiti sesion a mangipaay iti taraon ti nabalinandan ti dumngeg iti programa. Idi 1987, adda kanayonan a panangpalaka a naaramid iti serbisio ti taraon kadagiti kombension ken Assembly Hall idiay Estados Unidos. Kalpasanna, naiserbi dagiti taraon kadagiti kombension ken asamblea nga awan bayad kadagidiay tumabuno. Anian a nagsayaat a panagbalbaliw dagitoy, a mangpalag-an iti trabaho ken mangipalubos iti napaspasnek a panagimdeng kadagiti espiritual a benneg ti kombension, a dagiti trabahador ket mabalinda ti dumngeg ken lalo nga agsagrap iti programa. (Deut. 31:12) Ngem ania pay a trabaho ti mabalin nga isardeng tapno ad-adda a naan-anay a magunggonaantayo iti espiritual a programa?

⁵ Ninamnama a Panagbalbaliw: Bayat dagiti tawen a napasimple ti putahe a naidasar idiay Estados Unidos ken iti dadduma a pagilian, adda laeng “sumagmamano a bambanag” a pudno a “kasapulan.” (Idiligyo iti Lucas 10:38-42.) Nupay kasta, kaskasdi a kinasapulan latta daytoy ti adu a suplay ken trabaho, agraman nangina a kagawaan. Kasta met, adu a boluntario ti kinasapulan a mangorganisar ken mangsuportar kadagiti urnos. Nagusar ti Sosiedad kadagiti dadakkel a napalamiisan a trailer iti dadduma a pagilian a mangibiahe iti taraon iti adu a milia. Kinasapulan dagitoy ti panangaywan. Babaen ti mainayon a panangpalaka, maisardengen daytoy kanayonan a trabaho ken gasto.

⁶ Maipateg unay ti natulok a serbisio dagidiay a nagserbi kas boluntario kadagitoy a lugar. Nupay kasta, babaen daytoy a kanayonan a panangpalaka, dagidiay a kakabsat a nagtrabaho iti panaggatang, panagsagana, ken nagiserbi iti taraon mabalindan nga usaren ti tiempoda iti sabali a nasken nga ar-aramid ti Pagarian, agraman panangtagiragsak a naan-anay iti panagkakadua iti kombension. Dagidiay boluntario nga agserserbi idi iti Food Service mabalinda itan ti tumulong kadagiti sabali a departamento, kas iti Attendant ken Cleaning. Daytoy ti mangpalag-an iti trabaho ti tunggal maysa ken saanna a kasapulan ti panagtrabaho ti adu agingga ti kaadalman ti rabii, iti agsapa unay, wenno bayat dagiti sesion, kas iti ar-aramiden ti adu iti Food Service.

⁷ Panangsuportar Kadagiti Urnos: Patgen unay ti Sosiedad ti nasayaat a suporta nga impaayyo a kakabsat “buyogen ti naan-anay a puso” kadagiti urnos ti kombension, agraman iti serbisio ti taraon, kadagiti napalpalabas a tawen. (1 Cron. 29:9) Nakatulong daytoy iti adu a wagas. Pinagbalin daytoy a posible ti panangabang kadagiti pasilidad ti kombension ken pangsupusop kadagiti gasto iti kombension. Nakatulong met daytoy kadagidiay tumabtabuno nga agtalinaed iti pagkombensionan bayat iti pangngaldaw tapno nalakada la a makagun-od ti taraon, tapno mabang-aran, kalpasanna presenteda iti espiritual a programa. Ket awan duadua nga agtultuloy ti kinamanagparabur ken suporta nga impakita dagiti kakabsat iti boluntario a kontribusion iti paggastuan ti kombension, a mausar dagiti kahon ti kontribusion.​—Prov. 11:25; Luc. 16:9.

⁸ Panangtaming Kadagiti Kasapulanyo a Taraon: Gapu kadagitoy a kanayonan a panagbalbaliw, nupay kasta, kasapulan ti tunggal maysa ken dagiti pamilia ti mangisagana iti bukodda a pangaldaw. Iraman daytoy dagiti payunir a mangitugotda met iti bukodda a taraon a kas no addada iti naituding a teritoriada. Tagipatgentay unay dagiti naimbag a magunggona iti espiritual a programa. Ti nalabes a panangipateg iti pisikal a taraon ket saan a nainsiriban. Nasken a tunggal maysa ‘siguraduenna dagiti napatpateg a bambanag’ maipapan iti daytoy. (Fil. 1:9, 10a) Sibaballigi a naangay dagiti kallabes a dadakkel a kombension dagiti tattao ni Jehova idiay Poland, Russia, ken Ukraine, agraman dadduma a luglugar, nga awan ti urnos iti serbisio ti taraon. Kadagitoy a lugar, intugot dagiti delegado ti bukodda a pangaldaw. No mangitugottayo iti kalalainganna laeng a pangaldaw, saan a nabuslon a taraon, naal-alerto ti panunottayo, ket naan-anay a magunggonaantayo iti programa iti malem. Mayataday iti daytoy, tunggal maysa ket mangitugot koma iti taraon a simple ken nasustansia. Kas pagarigan, idi pinakan ni Jesus ti umariwekwek, nangipaay laeng iti dua a banag, tinapay ken ikan. (Mat. 14:16-20; kitaenyo met ti Lucas 10:42a.) Iti kasta, maragsakankami a mangipaay iti sumagmamano a singasing no ania ti maitutop ken praktikal maigapu iti napaababa a panagsardeng iti matuon ken ti kita dagiti pasilidad a mausar.

⁹ Tangay awanton ti urnos iti serbisio ti taraon iti kombension, buyogen ti nasayaat a panagplano, matagiragsak dagiti tumabuno ti makipamigat iti pamiliada idiay balay wenno iti pagdagusanda, wenno iti lokal a panganan. Babaen ti umdas nga inana iti rabii sakbay dayta, rumbeng a nasapakayo nga agriing tapno maisaganayo dagiti kasapulanyo iti pammigat ken pangngaldaw ket sumangpetkayo iti kombension a nasapa a mangsagrap iti pannakipulapol kadagiti dadduma a delegado.

¹⁰ Medio ab-ababanto ti panagsardeng iti matuon ngem kadagiti naglabas a kombension. Nupay kasta, kaskasdi a mangted ti gundaway a mangan iti simple a taraon, agraman tiempo a makilangen kadagiti dadduma. Dagiti kakabsattayo nga agnanaed iti siudad a pakaangayan ti kombension wenno iti kabangibangna ken inaldaw nga agawid iti rabii ket nalaka laeng a makapagsagana iti kalalainganna a taraon a maipaay iti kada miembro ti pamilia a maitugot a maipaay iti pangngaldaw. Kaasping daytoy ti panangitugot ti balon dagiti agtutubo a mapan iti pagadalan, nalabit a bassit nga innapuy ken sida, wenno sandwich ken maysa a prutas, biskuit, ken inumen. Adu a tattao ti mangitugot iti kakasta a balon kadagiti sekular a panggedanda.

¹¹ Awan duadua a mangidatag daytoy iti lalo pay a karit kadagidiay tumabuno manipud luglugar iti ruar ti siudad a pagkombensionan, a kasapulan ti nasakbay a panagplano maipaay iti pangngaldawda. Mabalinda nga itugot dagiti napkin ken maibelleng a paper cups nga adda iti pagtaengan. Mabalin nga umdasen kadagiti dadduma ti bassit a masaramsam a kappuros a prutas a mangpennek iti kasapulanda, a dagitoy ti maitugot met manipud balayda. Dagiti dadduma a taraon iti inaldaw a pangaldawan ket mabalin a maala kadagiti paglakuan ti taraon iti siudad a pagkombensionan.

¹² Gapu iti daytoy a baro nga urnos, kayatmi nga amin dagiti tumabuno manipud adayo a lugar nga agsurat ken agkiddawda koma iti pagdagusan iti pribado a pagtaengan wenno asideg nga otel, imbes a kadagiti siled a pagadalan wenno arubayan ti estadium. Ngamin, siiinget a MAIPARIT TI AGLUTO ITI ANIAMAN A TIEMPO ITI UNEG TI PASILIDAD TI KOMBENSION. Saan laeng a napeggad daytoy, no di pay ket naalas a kitaen. Gapuna dagidiay agngayangay nga agluto iti pangngaldawda kasapulan nga aramidenda daytoy idiay balay wenno pagdagusanda sakbay nga umayda iti kombension. Wenno nalabit nga adda tiendaan ti taraon iti asideg ti pagdagusanyo nga addaan kadagiti naluton a taraon. Saanen a kasapulan wenno nalaklaka ti mangisagana iti taraon idiay pagdagusanyo no gumatangkayo kadagitoy a kita ti makan. Iti dadduma a paset ti pagilian, dagiti kakabsat ammoda ti agluto iti innapuy iti wagas a saan mabangles uray kalpasan ti sumagmamano nga aldaw. Kasta met, dagiti karing wenno tinapa wenno adobo ket mabalin a maidulin iti mabayag a tiempo a saan a madadael. No maisagana dagitoy a nasaksakbay, maliklikan ti panagluto iti inaldaw.

¹³ Tangay ti disso a pagkombensionan ket aktual nga agbalin a dakkel a Kingdom Hall bayat ti kombension, nainsiriban met a ditay pagbalinen a kasla piknik ti pangngaldaw. Gapuna, kasayaatan no kada miembro ti pamilia ket adda bukodna a bassit a pagbalonan, a mapunno iti taraon sakbay a pumanaw idiay pagdagusan iti agsapa, imbes a mangitugot iti dakkel a pagkargaan a pagsasanguan ti kada miembro ti pamilia idiay kombension. Ket no kasano a saantayo a mangan bayat dagiti gimong idiay Kingdom Hall, saantay met koma a mangmangan wenno umin-inum bayat dagiti sesion ti kombension. Dagiti dadakkel a pangpamilia a picnic cooler ket saan a maipalubos iti pasilidad a pakaaramidan ti kombension. Mamagpeggad ken makasalida iti pagnaan wenno saanda a maipuesto kadagiti pagtugawan. Nalabit a dagiti supot a papel wenno babassit a pagkargaan a plastik ti mas maiparbeng kadagiti saramsam a kasapulan iti pangngaldaw, No kasapulan, maysa a bassit a cooler a maipasirok, saan a maiparabaw iti tugaw, ti mabalin nga usaren.

¹⁴ Maipaayan met ti panagannad ti kita dagiti pagkargaan ti inumen a kayattay nga itugot iti pagkombensionan. Dagiti napudot wenno nalamiis nga inumen ti mabalin nga ikarga iti termos. Dagiti aniaman a kita ti mabuong a pagkargaan ket mamagpeligro. Kiddawenmi, ngarud, nga AWAN TI MABUONG A PAGKARGAAN a maitugot iti aglawlaw. No ti napiliyo a nalamiis nga inumen ket saan a magatang iti plastik wenno aluminum a pagkargaan, nasaysayaat no ibukbokyo iti sabali a plastik a pagkargaan.

¹⁵ Kanayonan a Pakagunggonaan: Pudno a makitatayo ti pagsayaatan nga itden ti kasta a nagbalbaliw nga urnos. Mabalin dagiti amin nga ipaay ti naan-anay nga atension iti panangawat kadagiti espiritual a gunggona​—ti pudpudno a panggep ti panagtataripnongtayo. Dagitoy a gunggona ti maipaay iti timpuyog a sagsagrapentayo agraman ti programa a mismo. Isu nga imbes a rummuartayo iti panagsardeng iti pangngaldaw a gumatang iti taraon kadagiti asideg a restauran, mas makagunggona no mangitugottayon iti makan. Pagbalinen daytoy a posible ti pannakilangen kadagiti kakabsattayo ken lapdannatayo a maikapis iti aniaman a programa iti malem. Upayenna met ti panaggatang kadagiti taga-ruar nga aglaklako a mayat a manggundaway iti dadakkel a tallaong.

¹⁶ Bayat a nabang-aran iti naespirituan kalpasan ti programa iti malem, mabalin a maragsakan dagiti dadduma a mangituloy iti Nakristianuan a panaglalangen iti nadagdagsen a pangmalem a kadua ti pamilia ken gagayyemda iti lokal a restauran. Dagiti dadduma mabalin a dumagasda Iaengen iti sumagmamano a taraon iti groseria inton agawidda. Dagidiay makaawid iti bukodda a balay mabalin a mangrabiida sadiay, kas iti dadduma nga aldaw no mapanda iti sekular a trabaho wenno iti tay-ak ti serbisio.

¹⁷ Pudno a ragsakentayo ti espiritual a padaya kadagitoy nga asamblea ken kombension, a pakagun-odantayo kadagiti baro a publikasion, nasayaat a sursuro, ken praktikal a pammagbaga. Dagitoy a bendision isudat’ malaglagip ti tunggal maysa, agraman ti rag-o iti pannakitipon kadagiti tattao ti Dios. Kunaen ti Proverbio 10:22: “Ti bendision ni Jehova​—isu dayta ti mangpabaknang, ket saanna a nayonan dayta iti ut-ot.” Ngamin, kas tattao ni Jehova, saantayo a tumabuno kadagiti kombension gapu kadagiti material a kasapulan ken pagnam-ayan. Agtataripnongtayo a buyogen ti tarigagay a gumun-od iti kadakkelan a gunggona iti espiritual a wagas, ket sibabaknang a gunggonaannatayo ni Jehova iti espiritu nga ipakitatayo.​—1 Tim. 6:6-8; Heb. 11:6.

¹⁸ Dagitoy nga okasion a maipaay iti pammaregta ti mangipalagip met kadatayo iti irarang-ay ti espiritual a panagani. (Juan 4:35, 36) Ti panglukat a sasao ti Isaias kapitulo 54 yaw-awagna iti arig asawa nga organisasion ni Jehova nga agsagana a maipaay iti naragsak a panagrang-ay. Ti kanayonan a panagadu, ilalawa, ken napabaro a bileg isuda ti nasirmata kas impadto ni Isaias: “Palawaem ti disso ti toldam. Ket bistradem ti bengbeng ti tolda ti naindaklan a tabernakulom. Dika medmedan. Paatiddogem ti lubid ti toldam, ken patibkerem dagiti pasok ti toldam. Ta iti makanawan ken makatigid agsaknapkanto.” Ti kaitungpalan daytoy naragsak a padto nagbanag iti nagpaiduma nga ilalawa iti pudno a panagdayaw a makitkitatayo ita.​—Isa. 54:1-4.

¹⁹ Pudno unay a nainsiriban nga ipatungpal daytoy kanayonan a panangpalaka iti urnos ti kombension tapno maksayan ti pakasingaan ken matagiragsak ti amin ti espiritual a programa a naisagana. Agtalektayo met a bendisionan ni Jehova daytoy, tangay paannayasenna ti pannakataming ti kanayonan a panagrang-ay. Babaen ti panangipamaysa iti daydiay kasapulan, mabalintayo a sagrapen ti naiplanotayo nga al-aldaw ti naragsak a panaglalangen ken agkakaimbag nga espiritual a bambanag. Sipapasnek nga ikararagtayo a bendisionan ni Jehova ti amin a panagreggettayo bayat nga itultuloytay ti agtataripnong ken mataraonan iti lamisaanna.​—Idiligyo ti Deuteronomio 16:14, 15.

[Kahon iti panid 6]

Dagiti Magunggona No Awanen ti Urnos ti Food Service

◼ Basbassit a trabaho sakbay, bayat, ken kalpasan ti programa, a mangipalubos iti ad-adu a pannakilangen

◼ Awanen dagiti kagawaan a mantiniren a maipaay iti serbisio ti taraon

◼ Ad-adu ti makaipaay iti naan-anay nga atension iti espiritual a programa

◼ Ad-adu a boluntario ti makatulong iti dadduma a departamento

◼ Ad-adu a tiempo ti mausar iti dadduma a teokratiko nga ar-aramid

Dagiti Maisingasing a Maitugot iti Pangngaldaw

◼ Sangkabassit, simple, naluton a pangngaldaw

◼ Naipakirriit a prutas, sandwiches, kappuros a prutas

◼ Bassit a cooler no kasapulan

◼ Soft drinks, fruit juices, wenno danum a naibotelia iti pagkargaan a di mabuong

SAAN a Maitugot iti Pasilidad ti Kombension

◼ Naingel nga inumen

◼ Dagiti mabuong a pagkargaan

◼ Dadakkel a pangpamilia a picnic cooler

◼ Aniaman a kagawaan a paglutuan