Baro a Programa iti Aldaw ti Espesial nga Asamblea
Ti programa iti aldaw ti espesial nga asamblea a mangrugi inton Pebrero 2000 ket natemaan iti: “Panangsukimat Kadagiti Nauneg a Bambanag ti Dios.” (1 Cor. 2:10) Anianto dagiti napapateg a banag a masursurotayo?
Iti panagbirokda iti pannakaammo, adu a tattao ti alusiisen iti masarakanda. Pakirdennatayo ti Biblia, kas ipakitanto ti manangaywan ti sirkito iti pasetna a napauluan “Ti Panagsukimat iti Sao ti Dios ket Mangpabang-ar.” Ipakitanto ti bisita nga agpalawag ti pakainaigan ti panagsukimat kadagiti nauneg a bambanag ti Dios ken ti panangikasaba iti naimbag a damag bayat nga ipalawagna ti saludsod a “Kasano ti Panangmatmatyo iti Panangikasaba iti Pagarian?”
Kasano a matulongan dagiti nagannak ti annakda a paunegen ti panagkalida iti Sao ti Dios? Maipaayto dagiti praktikal a singasing iti paset nga “Itukityo ti Sao ti Dios Kadagiti Annakyo.” Nasayaat ti impluensiana kadagiti Kristiano nga agtutubo ti pannakitimpuyogda kadagiti nataengan iti naespirituan iti kongregasion. Dagiti pagarigan no kasano ti nasayaat a pannakaapektarda ket maitampokto iti paset a “Dagiti Agtutubo a Nakasursuro Kadagiti Natataengan.”
Apay a rumbeng a ganetgetantayo ti agsukimat kadagiti nalmeng a naespirituan a gameng itatta? Ni Jehova ti Manangipalgak kadagiti palimed. Isalaysayto ti bisita nga agpalawag no aniada ti impalgak ni Jehova idi un-unana ken iti moderno a tiempo iti palawag nga “In-inut nga Ipalgak ni Jehova Dagiti Nauneg a Bambanag.” Daytoy ti mangpabileg iti determinasiontayo nga agtultuloy nga ‘agsukimat kadagiti nauneg a bambanag ti Dios.’
Iplanoyo itan ti tumabuno. Dagidiay agtarigagay a mangisimbolo iti dedikasionda ken Jehova babaen iti bautismo ipakaammoda koma dayta iti mamangulo a manangaywan iti kabiitan a tiempo. Ti napasnek a tarigagaytayo nga agsukimat iti Sao ti Dios ket mapabilegto babaen iti mangngegantayo. Gapuna, dikay langanan daytoy espesial nga aldaw ti naespirituan a panangisuro!