Dagiti Nangyun-una iti Medisina
LIVER transplant ti naibaga a kasapulan ti 61 anyos a ni José a taga Oupeye, maysa a bassit nga ili idiay Belgium. “Daydi ti kasaeman a pasamak iti biagko,” kunana. Iti napalabas nga uppat la a dekada, imposible a maaramid ti liver transplant. Uray idi dekada 1970, agarup 30 a porsiento laeng dagiti manamnama a makalasat. Ngem ita, gagangayen a maar-aramid ti liver transplant, nga ad-adun nga amang dagiti manamnama a makalasat.
Ngem adda pay laeng ti kangrunaan a pagdaksanna. Tangay masansan nga adu ti agsayasay a dara kadagiti maaramid a liver transplant, gagangay a mangyalison dagiti doktor iti dara kabayatan ti operasion. Gapu iti narelihiosuan a pammatina, saan a kayat ni José ti agpayalison iti dara. Ngem kayatna ti liver transplant. Imposible? Nalabit kasta ti ipagarup ti dadduma. Ngem patien ti chief surgeon nga isu ken dagiti katrabahuanna ket addaan iti dakkel a gundaway a mangopera a sibaballigi a di mausar ti dara. Ket kasta nga agpayso ti inaramidda! Duapulo ket lima la nga aldaw kalpasan a naopera ni José, nagawiden a kadua ni baketna ken ti balasangda.a
Gapu iti kinalaing dagidiay awagan ti magasin a Time kas “bannuar iti medisina,” mas gagangayen ngem idi ti panangagas ken panagopera a di mausar ti dara. Ngem apay nga umad-adu dagiti agkalikagum iti dayta? Tapno masungbatan dayta a saludsod, usigentayo ti nariribuk a historia ti panangyalison iti dara.
[Footnote]
a Matmatan dagiti Saksi ni Jehova dagiti operasion a mangi-transplant iti paset ti bagi kas banag nga ikeddeng ti konsiensia ti maysa nga indibidual.
[Ladawan iti panid 3]
Iti intero a lubong, addan nasurok a 90,000 a doktor ti nangipakaammo a situtulokda a mangagas kadagiti Saksi ni Jehova a di mausar ti dara