Panagbuya a Siaannad iti Telebision

AGSERBI ti telebision kas “ti kangrunaan a para estoria, para aw-awir ken para sukog iti opinion ti publiko,” kuna ti Not in the Public Interest​—Local TV News in America, maysa a report nga inurnong ti grupo a mangmonmonitor iti media idiay Estados Unidos. “Agkaiwara ti TV iti aglawlawtayo . . . Kas iti malang-ab nga asuk, adda dayta iti sadinoman.” Ket no kasano a makadangran ti malang-ab nga asuk, adda met dakes nga epekto ti panagbuya iti aniaman a programa ti TV iti adu nga oras​—nangnangruna kadagiti ubbing.

No maipapan iti krimen ken kinaranggas iti TV, kuna ti isu met la a report nga “impakita ti ginasut a panagsirarak a ti panagbuya kadagiti naranggas a pabuya ket adda dakes nga epektona iti panagsursuro, kinauyong ken pannakipagrikna dagiti ubbing.” Kinuna ti American Medical Association idi 1992 a “ti kinaranggas iti telebision ti dakkel a mamagpeggad iti salun-at dagiti agtutubo.”

Kasanom a makontrol ti impluensia dagiti makadangran a programa iti TV kadagiti annakmo? Nangilista ti report iti sumagmamano a singasing a naadaw kadagiti rekomendasion ti sumagmamano nga organisasion a mangtamtaming iti salun-at ti publiko, maipapan iti naannad a panagbuya iti telebision. Adtoy ti sumagmamano kadagidiay a singasing.

◼ Iplano ken limitaram ti panagbuyam iti TV. Itudingmo no kaano ti panagbuya ti annakmo. Saanka a mangikabil iti TV iti siled ti annakmo.

◼ Mangikabilka iti globe iti abay ti TV tapno makita ti annakmo dagiti lugar a mabuyada kadagiti programa.

◼ Kaduaem ti annakmo nga agbuya iti telebision tapno mailawlawagmo dagiti banag a kas iti nagdumaan ti pantasia ken ti pudno. Kanayon a saan a mailasin ti adu nga annak a nababbaba ngem sangapulo ti tawenda ti nagdudumaan ti bambanag.

◼ Iyakarmo ti telebision iti nalawa a lugar iti balaymo. Ikabilmo ti TV iti maserraan nga aparador. Gapu ta adda iti kasta a lugar, medio narigrigat ti manglukat ken agpili iti nadumaduma nga estasion.