Manipud Kadagiti Agbasbasa

Cystic Fibrosis Pagyamanan iti artikulo a “Panangibtur iti Cystic Fibrosis.” (Oktubre 22, 1999) Nupay agtawenak laeng iti 17 ken awanan iti aniaman a grabe a sakit, naparegtaak unay iti pakasaritaan ni Jimmy Garatziotis. Tinulongannak a mangpanunot maipapan iti adu a banag, agraman no kasano kapateg ti panangapresiar iti adda kenka. Agpapan pay iti makatuok a sakitna, naragsak ken nabileg latta ti pammati ni Jimmy kadagiti kari ni Jehova. Ikarkararagko a sapay koma ta agtultuloy a maaddaan da Jimmy ken Deanne iti bileg a mangdaer kadagiti pakasuotanda.

E. Z., Russia

An-anito Saanak a Saksi ni Jehova, ngem dua a tawenen a basbasaek dagiti publikasionyo. Kayatko ti agyaman iti serye a “Ti Aya Gasat ti Mangkonkontrol iti Biagmo?” (Agosto 8, 1999) ken “An-anito​—Apay a Nakapegpeggad?” (Oktubre 22, 1999) Dati a manamatiak iti gasat ken an-anito gapu ta napadakkelak a kasta. Ngem ita patiek a pudno ti ibagbagayo maipapan iti pudno a Kristianidad.

N. D., Francia

Nasairak kadagiti artikulo maipapan iti an-anito. Debosionadoak a Romano Katoliko, ket maysa kadagiti artikulo ti nangdakamat nga an-anito ti “pananguros” dagiti pasahero. Aramiden dayta dagiti Katoliko kas paset ti panagkararagda a natalged koma ti biaheda. Napateg a paset daytoy iti pammatimi ken saan a rumbeng a maibilang nga an-anito.

S. W., Estados Unidos

Saan a mailibak nga adu ti manguros a saanda unay a pampanunoten ti narelihiosuan a debosion. Idi napagsaludsodan ti maysa nga Australiano a managay-ayam iti football no apay a nanguros idi adda iti pagay-ayaman, inadmitirna: “Pagarupek nga an-anito laeng dayta.” Di pakasdaawan a nanipud pay idi unana, daytoy a ritual ket addaanen iti inaanito a panangipasimudaag. Kuna ti “The Catholic Encyclopedia”: “Nanipud idi damo, daytat’ maus-usaren iti amin a panangpaksiat kadagiti dakes nga espiritu ken panagbuyon kas maysa nga igam maibusor kadagiti espiritu ti kinasipnget.”​—ED.

Droga Kayatko ti agyaman iti serye a “Konkontrolen Kadin ti Droga ti Lubong?” (Nobiembre 8, 1999) Gapu ta naimpluensiaan kadagiti gagayyemna, nasumoken ni tatangko ti droga ken arak. Saanen a pagkamangan ti pagtaenganmi no di ket ti lugar a masansan nga agpegpeggadak. Nupay kasta, diakto pulos nga isardeng nga awisen dagiti nagannak kaniak a mangsagrap kadagiti rag-o ti panagdayaw iti Dios.

M. L., Italia

Maminsan iti kada lawas, adda polis nga umay idiay pages-eskuelaak ken agpalawag maipapan kadagiti banag a kas iti droga ken arak. Inkeddengko nga iti sumaganad nga iyaayna iti klasemi, mangtedak kadagiti artikulo maipapan iti droga. Nagustuanna unay dagita ket binasana ti dadduma a pasetda iti klase. Nagunggonaan ti intero a klasek manipud kadagiti artikulo!

C. D., Estados Unidos

Baldado nga Anak Naabbukayak unay iti pakasaritaan ni Rosie Major a “Nasursuromi ti Agpannuray iti Dios Kadagiti Napasaranmi a Rigat.” (Nobiembre 22, 1999) Agnanaedkami idi iti siudad, ngem diak kayat ti wagas ti panangapektarna iti inauna a balasangko. Isu a nagbirokkami iti pagyananmi iti probinsia. Nasayaat amin ti kasasaad agingga a napukawko ti panggedak a pakabirokak iti $56,000 iti kada tawen. Addakami itan iti probinsia nga addaan iti tallo nga annak ken salda a babayadan. Talaga a makapadanag unay a kasasaad! Ngem kalpasan a nabasak ti pakasaritaan ni Rosie Major, kasla saanen a dakkel unay ti parikutko maipapan iti kuarta ta uray la a mabainak payen. Nagadu a tattao ti talaga nga agkasapulan iti tulong ti Dios! Mabalin kadi nga agsuskribeak iti Pagwanawanan ken Agriingkayo!?

M. F., Estados Unidos

Pinatganmi a siraragsak daytoy a kiddaw ti agbasbasa.​—ED.