Suportaran ti Grecia Dagiti Kalintegan ti Relihion
ITI DAMO UNAY, impalubos ti gobierno ti Grecia idi napan a tawen nga usaren dagiti Saksi ni Jehova ti maysa kadagiti kapatgan a pasilidadna a pagay-ayaman para iti dakkel a kombension. Daytoy ti Olympic Sportshall a natikub a pagay-ayaman nga addaan iti 20,000 a pagtugawan. Daytoy nga air-conditioned a pagay-ayaman ket paset iti grupo dagiti pasdek a mausar iti Olympic Games inton 2004 idiay Atenas.
Makapainteres ta idi 1963 ken 1988, inyurnosen dagiti Saksi ti panangusarda kadagiti dadakkel a pasilidad a pagay-ayaman idiay Atenas para iti kombensionda. Ngem kadagidi a tiempo, timmulok dagiti agtuturay iti pammutbuteng ti Greek Orthodox Church ket dida impalubos ti panangusar dagiti Saksi kadagitoy.
Naiduma a Nagbanagan
Idi Pebrero 2001, nagkiddaw dagiti Saksi iti permiso nga usarenda ti Olympic Sportshall—maysa kadagiti manmano a natikub a pasilidad a kalkalainganna a makalaon iti bilangda. Ngem pampanunotenda no maulit manen ti napasamak idi. Kas ninamnama, madi dagiti agtuturay.
Ngem dagus nga immadanida kadagiti nangato nga opisial a mabigbigbig a nainkalintegan ken di mangidumduma. Mayatda kadi a mangitandudo kadagiti kalintegan iti panagdayaw ken natalna a panagtataripnong kas sagudayen ti konstitusion? Matakderanda kadi ti narelihiosuan a panangpilit? Natakderanda, ket winaswas ti baro a desision ti napalabas a di panangaprobar. Daytoy ti nangted iti gundaway kadagiti Saksi a mangyeskediul iti kombensionda idiay Sportshall idi Hulio 27-29, 2001.
Maigiddato iti dayta, dagiti agtuturay pinalubosanda dagiti Saksi a mangusar iti maysa pay a tartarawidwidan ti gobierno a natikub a pasilidad a pagay-ayaman, ti Palais de Sport idiay Tesalonica.
Natungday ti Nakaro a Panangpilit
Idi umas-asidegen ti umuna nga aldaw ti kombension idiay Atenas, adda pay laeng dagiti di narisut a saludsod: Tungpalento kadi dagiti agtuturay ti tulagan nupay sugsugsogan ida ti klero nga Orthodox? Ket matagiragsakto aya dagiti Saksi ti panagtataripnongda a saan ida a singaen dagiti managdakdakes?
Inaramid latta ti Orthodox Church ti nabayagen a taktikana a mangimpluensia tapno mariribuk ti kombension. Imbutaktak dagiti estasion ti TV a kinalikaguman dagiti klero ti Orthodox nga awan ti madakdakamat maipapan iti kombension. Ngem idi agangay, natungday dagiti panangikagumaan ti simbaan.
Pagdaksanna ta ti Orthodox Church pinabasolna dagiti Saksi a nalimed a relihion. Ngem iti kinapudnona, ti simbaan a mismo ti nangikagumaan a mangilimed iti publiko ti mapaspasamak iti uneg ti Sportshall. Makaparagsak ta saan a timmulok dagiti natured a periodista a kameng ti media iti panangsugsog ti klero. Nasaknap ken nainkalintegan ti panangipadamagda maipapan iti kombension.
Kasta met nga impakaammo ti rinibu a delegado ti maipapan iti kombension ken inrakurakda ti pammatida. Sadinoman ti napananda, mailasin dagiti delegado babaen kadagiti duyaw a badge-da idiay kombension. Timmabuno iti kombension ti adu pay a sabsabali a naawis a saan a Saksi ni Jehova, isu a 15,760 ti kaadu ti timmabuno idi maudi nga aldaw iti Sportshall. Iti naudi a dua a ngudo ti lawas ti Hulio, 13,173 ti nagupgop a bilang dagiti timmabuno kadagiti kombension idiay Palais de Sport idiay Tesalonica.
Nasdaaw Dagiti Agpalpaliiw
Idi a ti 2,604 a boluntario a bin-ig a Saksi ni Jehova ket simmangpet iti Sportshall tapno agdalus, agpinta, ken agsagana para iti kombension, kinuna dagiti manedyer iti pagay-ayaman: “Immaykami ditoy tapno makitami a mismo ti di pay napaspasamak idi iti daytoy a lugar.” Kinuna ti maysa a tao: “Rumbeng a tinawen nga usarenyo daytoy a pasilidad tapno naan-anay a matarimaan.”
Nasdaaw ni Andreas Vardakis, ti public affairs director iti Sportshall. “Pinapintasyo daytoy a pasilidad,” kinunana. “Adu ti empleadomi a mangay-aywan iti daytoy a lugar. Ngem dakkel ti naitulong ti pannakipasetyo isu a nagballigi daytoy a kombension.”
Kabayatan ti kombension, idi madlawna a din masapul a mangibaon kadagiti polis a mangkontrol iti natalna a bunggoy, kinuna ti direktor ti polisia: “Ita pay laeng a nakakitaak iti kasta a kinaemma ken kinaurnos!”
Tampok ti Kombension
Iti pangserra a palawag iti kombension, nayanunsio a ti Greek Ministry of National Education and Religions binigbignan dagiti Saksi ni Jehova kas “mabigbigbig a relihion.” Kasta met nga opisial a binigbigen ti Ministry ti nasional a hedkuarter dagiti Saksi ni Jehova idiay Atenas. Kastoy ti sagudayen ti sumagmamano a paset ti dokumento ti gobierno:
“Ti administrasion ibilangnan [dagiti] Kristiano a Saksi ni Jehova kas mabigbigbig a relihion . . . nga addaan iti kalintegan a mangsagrap iti amin a probision ti linteg kas resulta daytoy. Ti makuna nga artikulo iti Konstitusion salaknibanna ti wayawaya iti panagdayaw, ti wagas ken pamay-an ti panangyebkas iti panagdayaw, ken ti wayawaya nga agpili iti wagas ti administrasion ken organisasion ti tunggal relihion wenno narelihiosuan a gimong. Daytoy a salaknib nabatad a saklawenna dagiti lugar ken pasilidad a masakupan ti organisasion iti Marousi [ti sanga nga opisina dagiti Saksi ni Jehova kas] sagrado ken naidedikar a lugar, naidedikar a pagdayawan iti Dios. Dagita a pasilidad ket maawagan a Bethel, kayatna a sawen, ‘Balay ti Dios.’”
Dagiti Saksi ni Jehova, agraman ti siasinoman a mangayat iti narelihiosuan a wayawaya, agyamanda kadagitoy a napasamak. Ikarkararagda a kas resultana, agtultuloyen a ‘natalinaay ken naulimek, buyogen ti naan-anay a nadiosan a debosion ken kinaserioso’ ti Nakristianuan a panagbiag dagiti tattao.—1 Timoteo 2:1, 2.
[Dagiti Ladawan iti panid 10]
Nagtataripnong dagiti Saksi idiay Olympic Sportshall
[Credit Line]
Harry Bilios