Tarigagayan ti Amin ti Nasayaat a Salun-at!
NASUROK a 2,700 a tawenen ti napalabas, maysa a mammadto ti nagkuna nga iti masanguanan awanton ti sakit. Naitalimeng daytoy a padto agingga iti kaaldawantayo ket masarakan dayta kadagiti nagkauna a surat ni Isaias. Insuratna ti maipapan iti tiempo nga “awanto ti agtataeng nga agkuna: ‘Masakitak,’” ket innayonna pay: “Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.” (Isaias 33:24; 35:5, 6) Salaysayen ti dadduma a padto ti Biblia ti kasta a masakbayan. Kas pagarigan, ti maudi a libro ti Biblia nga Apocalipsis iladawanna ti tiempo inton ti Dios ikkatenna ti ut-ot.—Apocalipsis 21:4.
Matungpalto kadi dagitoy a kari? Dumtengto ngata ti tiempo a sagrapen ti sangatauan ti nasayaat a salun-at ken kinaawan iti sakit? Ipapantayon nga adu ti mangsagsagrap iti nasaysayaat a salun-at ita ngem kadagiti naglabas a kaputotan. Ngem ti nasaysayaat a salun-at dina kaipapanan a daytan ti kasayaatan a salun-at. Adu pay laeng ti agsagsagaba gapu iti sakit. Makapadanag uray laeng ti panangpampanunot a maaddaanka iti sakit. Ket uray iti daytoy moderno a panawen, makapaleddaang ta mapasarantay amin ti pisikal ken mental a sakit.
Ti Sagabaentayo
Adu ti rigat nga iyeg ti panagsakit. Maysa a dakkel a pakaseknan ita isu ti nagdakkel a gastos gapu iti panagsakit. Kas pagarigan, iti nabiit pay a tawen, nasayang ti 500 a milion nga aldaw a panagtrabaho idiay Europa gapu kadagiti sakit. Kasta met laeng ti kasasaad iti dadduma a lugar. Apektadotayo amin iti dakkel a gastos gapu iti bumasbassit a magapuanan iti trabaho ken umad-adu a gastos iti panangaywan iti salun-at. Malugi met dagiti korporasion ti negosio, ken kasta met dagiti gobierno. Tapno masupusopan ti gastos, dagiti negosiante ingatoda ti presio dagiti produktoda ken ti gobierno ingatona ti buis. Siasino ti agbayad? Datayo met laeng!
Makapaladingit ta no napanglawka, kadawyan a nagrigat ti gumun-od iti umdas a pagpaagas, no adda man. Kasta ti nakalkaldaang a kasasaad ti nagadu a tattao kadagiti napanglaw a pagilian, a manmano wenno saan pay ketdi a pulos a makapagpadoktor. Uray pay kadagiti nabaknang a pagilian, masapul nga ikagumaan ti dadduma ti agpaagas kadagiti nalalaing a doktor. Masansan a kastoy ti kasasaad ti adu kadagiti 46 milion a tattao iti Estados Unidos nga awanan iti insurance para iti salun-at.
Saan laeng a ti magastos ti problema nga iyeg ti sakit. Ti kangrunaan a rigat nga iyegna isu ti panagsagaba iti makapapatay a sakit, tuok a mangandur iti nakaro nga ut-ot, panagleddaang a makakita iti panagsagaba ti dadduma iti nakaro a sakit, ken panagladingit gapu iti ipupusay ti inay-ayat.
Makaay-ayo ti namnama a dumtengto ti aldaw nga agbiagtayo iti lubong nga awanan iti sakit. Tarigagayan dagiti tattao iti lubong ti nasayaat a salun-at. Nupay kasla di nakappapati, agpayso dayta a namnama. Mamati ti dadduma a babaen ti teknolohia nga inaramid ti tao, dumtengto ti tiempo a maikkat ti dandani amin a sakit ken an-annayen. Iti kasumbangirna, patien dagidiay mamati iti Biblia a tungpalen ti Dios dagiti nagkauna a padtona maipapan iti maysa a lubong nga awanan iti sakit. Ti tao kadi ti makayeg iti tiempo nga awanton ti sakit? Wenno ti Dios ti makayeg iti dayta a tiempo? Ania ti agur-uray iti masanguanan?