Telebision
DI NAGBAYAG kalpasan a nasursuro dagiti tattao nga ibrodkas ti uni, pinampanunot dagiti imbentor no kasano a ti aktual a paspasamak ket maipabuyada met iti sabali a lugar. Tapno maawatam no kasano karikut dayta, usigem no kasano nga agan-andar ti telebision.
Umuna, ti kamera ti TV ipokusna ti maysa nga eksena iti alikamen a “mangbasa” iti ladawan a kas iti panangbasam iti nayimprenta a sasao. Ngem imbes nga agsasaruno a letra ti basaen ti alikamen, agsasaruno ketdi a tulnek (pixel) ti basaenna iti ladawan. Dagiti mabasa dayta ket pagbalinenna nga elektroniko a signal ti video a mayallatiw iti sabali a lugar. Kalpasanna, adda alikamen (receiver) a mangallawat iti signal sana pagbalinen manen dagita a ladawan ti aktual a paspasamak.
Ni John Logie Baird a taga-Scotland ti mabigbig a nangimbento iti telebision. Idi insardengna ti trabahona kas electrical engineer gapu iti nakapuy a salun-atna, inasikasonan ti paginteresanna sipud pay idi barito—no kasano a makaaramid iti makina a makayallatiw kadagiti aktual a ladawan iti adayo a luglugar.
Ti kamera ti telebision ni Baird ket addaan iti disk (hatbox idi damo) nga addaan iti agarup 30 nga abut a kasla nakunikon ti panagsasarunoda. Bayat nga agtaytayyek ti disk, dagiti abut basaenda ti agsasaruno a linia ti ladawan ken pasarutenda ti lawag iti photoelectric cell. Dayta a cell ket mangpataud iti signal ti video nga agturong iti mangallawat nga alikamen. Iti daytoy nga alikamen, mapapigsa ti signal tapno rumaniag ti agbaliwbaliw a lawag iti likudan ti umasping nga agtaytayyek a disk a mangipakita manen iti ladawan. Problema idi ti panamaggiddan iti panagtayyek dagiti disk. Bayat ti panangasikaso ni Baird iti proyektona, sinuportaranna ti bagina babaen iti panagbitonna kadagiti sapatos.
Idi Oktubre 2, 1925, inyallatiw ni Baird dagiti kaunaan a ladawan iti telebision manipud iti maysa a pungto ti siled iti ngato ti balayda agingga iti maysa pay a pungto dayta. Ti kaunaan a nagparang iti TV ket ti madandanagan nga agop-opisina a lalaki iti baba ti balayda a tinangdananna iti kagudua ti crown wenno agarup 10 a pisos. Idi 1928, imbrodkas ni Baird dagiti kaunaan a ladawan iti telebision iti ballasiw ti Atlantico. Idi nakadanon ni John Baird idiay New York, mababain unay ta adda banda dagiti tumutokar iti gaita a nangpasangbay kenkuana. Nalataken ni Baird. Ngem isu kadi ti kaunaan a nangyallatiw kadagiti ladawan dagiti aktual a pasamak?