Hjálpum fólki að heiðra Krist sem konung
1 „Þér eruð ljós heimsins,“ sagði Jesús við lærisveina sína. (Matt. 5:14) Fylgjendur Jesú skyldu segja fólki alls staðar frá ríki Jehóva og hjálpræði hans fyrir milligöngu Jesú. Með það í huga reynum við í desember að leiða fólki fyrir sjónir að Jesús er ríkjandi konungur á himni öllum til blessunar sem fylgja honum. Hér eru nokkrar tillögur um hvað við getum sagt og notað í þeim tilgangi.
2 Þú gætir sagt eftirfarandi með eigin orðum:
◼ „Í þessum mánuði ber oft fyrir augun myndir af Jesú sem nýfæddu barni í jötu. En hvernig skyldi hann vera núna? [Gefðu kost á svari.] Engillinn Gabríel gaf Maríu, móður hans, upplýsingar um það. [Lestu Lúkas 1:31-33.] Jesús átti því að verða konungur og það er hann núna. Biblían segir okkur að sem konungur Guðsríkis muni Jesús innan tíðar láta rætast fyrirheit Guðs um að bundinn verði endir á kvöl og þjáningar. Er það þessi boðskapur um hlutverk Jesú sem menn leggja áherslu á þegar þeir halda jól?“ Hlustaðu á svar húsráðandans og vektu síðan athygli hans á greininni „Hvaða þýðingu hafa jólin fyrir þig?“ í desembertölublaði Varðturnsins.
3 Þú gætir einnig sagt eitthvað þessu líkt:
◼ „Á þessum árstíma hugsar fólk gjarnan um Jesú. Mönnum kann þó að vera spurn hvort áhrifa Jesú gæti í nokkrum þeim mæli sem máli skiptir í heiminum. Hvað finnst þér um það? [Gefðu kost á svari.] Þótt það komi mörgum á óvart þá er það ekki Jesús sem er höfðingi heimsins.“ Taktu fram smáritið Hver er höfðingi heimsins? og lestu fyrstu tvær greinarnar á blaðsíðu 2. Ef húsráðandi sýnir áhuga getur þú farið nokkrum orðum um efnið undir næstu millifyrirsögn. Bjóddu honum smáritið og nefndu að gaman væri að heyra álit hans á þessu máli þegar þú kemur næst.
4 Hér er tillaga sem nota má til að bjóða „Biblíusögubókina“:
◼ „Börn og unglingar taka sér gjarnan einhverja til fyrirmyndar, þó ekki alltaf góðar fyrirmyndir enda eru þær vandfundnar. Jesús Kristur er sú besta fyrirmynd sem nokkur getur fylgt. [Lestu 1. Pétursbréf 2:21.] Hvaða áhrif heldur þú að það hefði ef fleiri reyndu að líkjast honum?“ Gefðu kost á svari. Bentu síðan á nauðsyn þess að kenna börnunum frá Biblíunni til þess að þau kynnist góðum fyrirmyndum til að líkja eftir. Sýndu hvernig Biblíusögubókin getur komið að góðum notum og bjóddu hana ef nægilegur áhugi er fyrir hendi.
5 Þú villt kannski segja eitthvað á þessa leið:
◼ „Þegar minnst er á Jesú Krist hugsa margir um hann annaðhvort sem smábarn eða sem þjáðan mann sem verið er að lífláta. Hugmynd þeirra um Jesú snertir aðeins fæðingu hans og dauða hans. Það sem hann sagði og gerði fer oft framhjá fólki. Það sem hann kom til leiðar hefur áhrif á alla sem lifað hafa. Þess vegna er nauðsynlegt að við lærum eins mikið og við getum um það sem hann gerði í okkar þágu.“ Lestu Jóhannes 17:3. Bentu á hversu nauðsynlegt er að kynna Biblíuna fyrir börnunum á þann hátt að þau fái löngun til að fræðast frá henni. Sýndu síðan hvernig Biblíusögubókin getur hjálpað foreldrum að innræta hjá börnum sínum virðingu fyrir orði Guðs og löngun til að nema það og þá ekki síst að fræðast um Jesú.
6 Gættu þess að halda skrá yfir þá sem sýndu áhuga eða þáðu rit til þess að þú getir fylgt því eftir með endurheimsókn. Leitum af kappi, meðan enn er tími, að hjartahreinu fólki og hjálpum því að heiðra Jesú Krist sem konung með því að fylgja honum og hlýða. — Matt. 16:24.