Horfðu fram í tímann!
1 Skipulag Jehóva lætur í té guðræðislega dagskrá sem fullnægir öllum andlegum þörfum okkar. Þakklæti knýr okkur til að nýta okkur til fulls allt sem hefur verið skipulagt, svo sem heimsóknir farandhirðisins, mót og aðra sérstaka viðburði á okkar svæði. (Matt. 5:3) En sumir missa af mörgum þessara andlegu ráðstafana af því að þeir hafa bundið sig við eitthvað annað. Hvað er hægt að gera til að koma í veg fyrir það? Hvernig getum við séð til þess að óguðræðislegt starf ryðji ekki úr vegi ‚þeim hlutum sem máli skipta,‘ og ættu að vera efst á blaði allra kristinna manna? — Fil. 1:10.
2 Skynsamlegur undirbúningur er nauðsynlegur: Orðskviðirnir 21:5 segja: „Fyrirætlanir iðjumannsins reynast fésamar vel, en öll flasfærni lendir í fjárskorti.“ Til að okkur vegni vel andlega þurfa fyrirætlanir okkar að taka mið af þeirri guðræðislegu starfsemi sem er á döfinni. Við ættum að tímasetja fyrirætlanir okkar þannig að þær torveldi okkur ekki að vera til staðar til að uppskera andlega blessun. Ef við skipuleggjum frí, ferðalög og afþreyingu í fljótræði án þess að leiða hugann að komandi guðræðislegum viðburðum, þá er líklegt að við líðum andlegan ‚skort.‘
3 Misstu ekki af neinu! Við gerum öll áætlanir um framtíðina, meðal annars um frí, viðskiptaferðir, heimsóknir til ættingja og svo framvegis. Áður en þú skuldbindur þig eða fullgerir áætlanir þínar skaltu athuga hvaða guðræðislegir viðburðir séu í vændum. Ef í ljós kemur að farandhirðirinn er væntanlegur eða að mót verður haldið á sama tíma og þú kynnir að vera í burtu skaltu gera allt sem þú getur til að endurskipuleggja mál þín svo að þú getir verið viðstaddur. Við erum látin vita með góðum fyrirvara um helstu viðburði sem fram undan eru. Öldungarnir í söfnuði þínum geta sagt þér hvaða áætlanir hafa verið gerðar á þínu svæði.
4 Með því að vera framsýn og horfa fram í tímann á það sem máli skiptir verðum við ‚auðug að réttlætis ávexti . . . til dýrðar og lofs Guði.‘ — Fil. 1:11.