Nú er tími til að huga að auknu starfi

1. Hvaða tækifæri höfum við í kringum minningarhátíðina og hvernig getum við undirbúið okkur?

¹ Fyrir og eftir minningarhátíðina höfum við frábært tækifæri til að lofa Jehóva. (Sálm. 109:30) Langar þig til að sýna honum hversu þakklátur þú ert fyrir lausnarfórnina með því að auka við starf þitt í mars? Þá er ekki seinna vænna að fara að gera viðeigandi ráðstafanir. – Orðskv. 21:⁠5.

2. Hvernig brugðust þú og aðrir við þegar tilkynnt var um ný tímamörk fyrir aðstoðarbrautryðjendur í apríl í fyrra?

² Aðstoðarbrautryðjandastarf: Á síðasta ári glöddust vottar Jehóva um allan heim þegar þeir heyrðu að þeir sem vildu starfa sem aðstoðarbrautryðjendur í apríl gætu valið um að starfa 30 eða 50 klukkustundir. Bróðir nokkur skrifaði: „Ég er enn í framhaldskóla og hef ekki haft tök á að vera brautryðjandi. En í apríl ætla ég að sækja um að starfa 30 klukkustundir og reyna að ná 50.“ Systir, sem er í fullri vinnu, skrifaði: „Það er vel gerlegt að starfa í 30 tíma!“ Eftir að þessi ráðstöfun var tilkynnt sagði áttræð systir sem var áður brautryðjandi: „Ég hef verið að bíða eftir þessu. Jehóva veit að brautryðjandastarfið var skemmtilegasti hluti ævi minnar.“ Margir sem höfðu ekki tök á að gerast aðstoðarbrautryðjendur settu sér líka markmið að starfa meira.

3. Hvers vegna ættum við að hugleiða hvort við getum aukið starf okkar á vormánuðum?

³ Í mars höfum við kjörið tækifæri til að gerast aðstoðarbrautryðjendur því að þá fáum við aftur val um að starfa í 30 eða 50 klukkustundir. Þar að auki hefst átak laugardaginn 17. mars til að bjóða fólki á minningarhátíðina sem verður haldin 5. apríl. Margir eiga eflaust eftir að hafa svo gaman af brautryðjandastarfinu að þeir vilja halda því áfram í apríl og maí, en þá í 50 klukkustundir.

4. Hvernig getum við aukið við starf okkar og hvað munum við þá uppskera?

⁴ Hvernig væri að ræða á næsta biblíunámskvöldi fjölskyldunnar hvað hver og einn geti gert til að auka við starf sitt á vormánuðum? (Orðskv. 15:22) Biðjið Jehóva um að blessa áform ykkar. (1. Jóh. 3:22) Ef þú eykur við boðunarstarf þitt muntu uppskera aukna gleði og blessun Jehóva. – 2. Kor. 9:⁠6.