Getur þú gerst aðstoðarbrautryðjandi?
1. Af hverju er gott að nota tímabilið fyrir og eftir minningarhátíðina til að starfa meira?
1 Það er tilvalið að nota tímabilið fyrir og eftir minningarhátíðina til að auka við boðunarstarf okkar. Þetta er sá tími þegar við minnumst þess mikla kærleika sem Jehóva sýndi með því að færa son sinn að lausnarfórn fyrir okkur. (Jóh. 3:16) Að hugsa um þetta eykur þakklæti okkar í hans garð og okkur langar enn frekar til að segja öðrum frá því sem Jehóva mun bráðlega gera fyrir mannkynið. (Jes. 12:4, 5; Lúk. 6:45) Á þessum tíma tökum við líka þátt í ánægjulegu átaki þar sem við bjóðum kunningjum og fólki, sem býr á starfssvæðinu, að vera viðstatt minningarhátíðina með okkur. Eftir minningarhátíðina reynum við svo að fylgja áhuganum eftir hjá þeim sem þáðu boðið. Geturðu aukið við boðunarstarf þitt og gerst aðstoðarbrautryðjandi í mars, apríl eða maí?
2. Af hverju er mars tilvalinn til aðstoðarbrautryðjendastarfs?
2 Gerðu sérstakt átak í mars: Í mars fáum við kjörið tækifæri til að gerast aðstoðarbrautryðjendur því að þá fáum við að velja hvort við viljum starfa í 30 eða 50 klukkustundir. Ef farandhirðirinn heimsækir söfnuðinn í mars mega aðstoðarbrautryðjendur vera með allan tímann á fundinum fyrir brautryðjendur og sérbrautryðjendur. Átakið til að bjóða fólki á minningarhátíðina, sem verður haldin þriðjudaginn 26. mars 2013, nær nú yfir lengri tíma en það hefur gert undanfarin ár og hefst það 1. mars. Í mars eru líka heilar fimm helgar. Væri því ekki tilvalið að hugleiða í fullri alvöru hvort þú getir verið með í að gera þennan mánuð að þeim eftirminnilegasta á árinu?
3. Hvað getum við gert til að auka við boðunarstarf okkar?
3 Gerðu strax áætlun: Við skulum byrja strax að skoða hvernig stundaskrá okkar lítur út og athuga hverju við þurfum að breyta til að geta verið aðstoðarbrautryðjendur. Samvinna innan fjölskyldunnar skiptir miklu máli. Takið frá tíma í tilbeiðslustund fjölskyldunnar og ræðið saman um markmið ykkar og gerið svo áætlun. (Orðskv. 15:22) Ekki láta það draga úr þér kjarkinn þótt þú getir ekki verið aðstoðarbrautryðjandi. Gætirðu kannski komið því þannig við að þú getir starfað lengur þá daga sem þú ert í boðunarstarfinu? Gætirðu starfað einn dag aukalega í hverri viku?
4. Hvernig njótum við góðs af því að auka við starf okkar í mars, apríl og maí?
4 Þegar við aukum við starf okkar í mars, apríl og maí eykst jafnframt sú gleði og ánægja sem fylgir því að þjóna Jehóva og gefa af sér. (Jóh. 4:34; Post. 20:35) Það sem meira er, fórnfýsi okkar gleður Jehóva. – Orðskv. 27:11.