Tökum framförum í boðunarstarfinu – bregðumst rétt við reiðum húsráðanda

Af hverju er það mikilvægt? Flestir sem við hittum í boðunarstarfinu eru kurteisir. Jesús spáði því hins vegar að sumir myndu hata okkur. (Jóh. 17:14) Það ætti því ekki að koma okkur á óvart að hitta reiðan húsráðanda. Þegar slíkt gerist ættu viðbrögð okkar að vera Jehóva þóknanleg því að við erum fulltrúar hans. (Rómv. 12:17 – 21; 1. Pét. 3:15, 16) Þá komum við að öllum líkindum í veg fyrir að reiðin magnist. Það segir húsráðanda líka mikið um trú okkar og einnig þeim sem eru að fylgjast með. Þá eru meiri líkur á að þeir hlusti í næsta skipti þegar vottar Jehóva heimsækja þá. – 2. Kor. 6:3.

Hvernig förum við að?

Verum róleg og vingjarnleg. Það hjálpar til við að milda aðstæður. Taktu ekki viðbrögð húsráðandans persónulega. (Préd. 7:9) Kannski er hann í ójafnvægi vegna eigin vandamála eða vegna þess að þú bankaðir uppá á óhentugum tíma. Og þótt hann bregðist reiður við boðskap okkar gæti það vel verið vegna þess að hann hefur fengið rangar upplýsingar. – 2. Kor. 4:4.
Svaraðu á mildan og vinsamlegan hátt. (Orðskv. 15:1) Vaktir þú húsráðandann eða truflaðir með einhverjum hætti? Þótt við biðjumst ekki afsökunar á starfi okkar gætirðu beðist afsökunar á að koma á óhentugum tíma. Er hann reiður útaf einhverju ósönnu sem hann hefur heyrt sagt um okkur? Ef svo er gætirðu sagt: „Ég get vel skilið hvers vegna þetta kemur þér í uppnám. En það sem þú hefur heyrt um okkur virðist ekki alls kostar rétt. Má ég útskýra okkar hlið?“ Er hann mótfallin afstöðu okkar eins og til blóðgjafa eða að einhverjum sé vikið úr söfnuðinum? Þú gætir sagt: „Ég skil. Ég hef talað við aðra sem eru á sama máli og þú. En viðhorf okkar er byggt á ákveðnu biblíuversi, má ég kannski sýna þér það?“
Ef húsráðandi er í miklu uppnámi gæti verið best að fara án þess að reyna að svara honum. Ef hann biður um að fá ekki frekari heimsóknir frá vottum Jehóva skaltu fullvissa hann um að óskir hans verði virtar.

Prófaðu eftirfarandi í mánuðinum:

Æfið ykkur í tilbeiðslustund fjölskyldunnar.
Eftir að hafa kvatt húsráðanda skaltu ræða við starfsfélaga þinn um hvernig hægt hefði verið að bregðast betur við.