Einfaldar og áhrifaríkar endurheimsóknir
1 Ferð þú reglulega í endurheimsóknir eða finnst þér það yfirleitt erfitt vegna þess að þú veist ekki hvað þú átt að segja? Það er ástæðulaust að vera hræddur. Þrjú atriði munu hjálpa þér að ná góðum árangri: (1) góður undirbúningur; (2) það að geta rætt eitt eða tvö atriði varðandi nokkur einföld biblíuleg málefni og (3) fúsleiki til að hlusta á viðhorf húsráðandans.
2 Þegar þú býrð þig undir að fara í endurheimsókn hugleiddu þá hvaða málefni væri vel við hæfi að ræða um við húsráðandann. Er hann námsmaður? Margir námsmenn hafa tíma aflögu þennan mánuð til að ræða um biblíulegt efni vegna skólafrídaganna. Þú munt líklega finna að sumir eru opnir fyrir boðskapnum um Guðsríki. Barst þú fram spurningu í lok fyrri heimsóknar þinnar eða sýndi viðmælandi þinn áhuga á einhverju sérstöku málefni? Farðu yfir minnisblöðin þín og notaðu ef til vill Rökræðubókina til að finna þær upplýsingar sem þú þarft á að halda til að endurheimsóknin verði áhrifarík. Þegar þú síðan bankar upp á ættir þú að vera hlýlegur og vingjarnlegur. Heilsaðu húsráðandanum með nafni.
3 Ef þú útbreiddir Varðturninn eða Vaknið! hjá húsráðandanum gæti endurheimsókn þín byggst á nokkrum einföldum atriðum í einu tölublaði. Ef þú skildir eftir smárit í fyrstu heimsókninni gætir þú annaðhvort sagt eitthvað um smáritið sjálft eða fylgt útbreiðslu þess eftir með því að vekja athygli á viðeigandi efni í blaði eða bæklingi.
4 Ef þú útbreiddir „Mun þessi heimur bjargast?“ segðu þá einfaldlega:
◼ „Síðast töluðum við um hvernig Biblían hefur spáð alvarlegustu vandamálunum sem hrjá heiminn nú á dögum. En eins og við töluðum um þá spáir hún því líka að Guðsríki muni verða að veruleika hér á jörðinni og leysa öll þessi vandamál. Hvaða skilyrði telur þú að við þurfum að uppfylla til að fá að lifa í þeim nýja heimi sem þá verður?“ Leyfðu húsráðandanum að segja álit sitt og vektu síðan athygli á því sem fram kemur í Sálmi 37:9, 11, 29.
5 Ef þú útbreiddir apríl-júnítölublað „Vaknið!“ gætu þessar stuttu athugasemdir komið umræðum af stað:
◼ „Síðast skildi ég eftir hjá þér blaðið Vaknið! með grein um hversu heimurinn okkar er óstöðugur. Hann er alltaf að breytast en er það til batnaðar? Ég er hér með annað eintak af blaðinu og á blaðsíðu 4 eru umhugsunarverðar spurningar.“ Lestu nokkrar spurninganna síðast í greininni „Hvaða breytingum hefur heimurinn tekið?“ Blaðaðu í gegnum næstu grein og bentu á millifyrirsagnirnar og staldraðu við það sem vekur áhuga húsráðandans. Spyrðu um álit hans og hlustaðu vandlega á það sem hann hefur að segja og taktu mið af því þegar þú heldur samtalinu áfram. Ljúktu samræðunum með því að nota eitthvað af jákvæða efninu á blaðsíðu 11-13. Flettu upp fáeinum ritningarstöðum ef hægt er.
6 Húsráðandinn kann að láta í ljós skoðanir sem ekki eiga við rök að styðjast. Það er ekki nauðsynlegt að andmæla öllu sem hann heldur fram. Haltu þér við meginumræðuefnið. Þær óbiblíulegu hugmyndir, sem hann hefur, má leiðrétta í endurheimsóknum síðar.
7 Þú skalt fyrir alla muni einsetja þér að fylgja áhuganum eftir með því að fara í einfaldar og áhrifaríkar endurheimsóknir í apríl.