OBE ỌSOSUỌ SAMUẸLE

1 Whaọ ọzae jọ ọ jariẹ nọ ọ rrọ ohwo Remateyẹm-zofim*+ evaọ ubrotọ igbehru Ifremu,+ odẹ riẹ Ẹlkena,+ ọmọzae Jeroham, ọmọzae Elaihu, ọmọzae Tohu, ọmọzae Zọf, ohwo orua Ifremu.* 2 O wo eyae ivẹ; odẹ ọjọ Hana, odẹ ọdekọ Pẹnina. Pẹnina o wo emọ, rekọ Hana o wo emọ họ. 3 Kukpe kukpe ọzae na ọ jẹ hai no okpẹwho riẹ nyae gọ* Jihova olori egbaẹmo je dhe idhe kẹe evaọ Shailo.+ Etẹe emezae ivẹ Ilai nọ a re se Hofini avọ Finihas+ a jẹ jọ izerẹ kẹ Jihova.+

4 Evaọ ẹdẹ jọ nọ Ẹlkena o dhe idhe, ọ tẹ jọ arao idhe na rehọ ekẹ jọ kẹ Pẹnina avọ emezae gbe emetẹ riẹ kpobi,+ 5 rekọ ọ tẹ kẹ Hana obọdẹ ẹkẹ, keme Hana ọ mai you; rekọ Jihova ọ re kẹ Hana emọ họ.* 6 Ofariẹ, ovruvrẹ riẹ ọ jẹ hae poviẹ ẹe ẹsikpobi re o ru eva dhae keme Jihova ọ re kẹe emọ họ. 7 Ere ọ jẹ hai ru kukpe kukpe; oke kpobi nọ Hana o te kpobọ uwou Jihova,+ ovruvrẹ riẹ na ọ rẹ poviẹ ẹe gaga te epanọ ọ rẹ rọ viẹ, ọ gbẹ re emu hu. 8 Rekọ Ẹlkena, ọzae riẹ ọ tẹ ta kẹe nọ: “Hana, fikieme whọ be rọ viẹ, fikieme whọ gbẹ be re emu hu, kọ fikieme who ro mu ovao họ?* Kọ me gbe woma kẹ owhẹ vi emezae ikpe?”

9 Kẹsena nọ a re jẹ da no evaọ Shailo, Hana ọ tẹ kpama. Oke yena yọ Ilai ozerẹ na ọ keria agbara nọ ọ kẹle unuẹthẹ etẹmpol*+ Jihova na. 10 Eva e jẹ were Hana* vievie he, ọ tẹ be lẹ se Jihova,+ jẹ be viẹ whrowhrowhro. 11 Ọ tẹ ya eyaa nana: “O Jihova olori egbaẹmo, who te rri oja nọ odibo ra ọ be re, whọ jẹ kareghẹhọ omẹ, odibo ra ọ gbẹ thọrọ owhẹ ẹro ho, whọ jẹ kẹ odibo ra ọmọzae,+ mẹ te rehọ iẹe kẹ Jihova evaọ edẹ uzuazọ riẹ kpobi, yọ erezọbledi o ti te uzou riẹ hẹ.”+

12 Evaọ oke yena nọ Hana ọ jẹ rọ lẹ se Jihova krẹkri na, yọ Ilai o bi rri unu riẹ. 13 Hana ọ jẹ ta ẹme họ eva, igbenu riẹ ọvo i je nuhu, a je yo uvou riẹ hẹ. Fikiere Ilai o te roro nọ ọ da idi no. 14 Ilai ọ tẹ ta kẹe nọ: “Ẹvẹ udi u re mu owhẹ kri te? Siọ udi ba ẹda.” 15 Hana o te yo kẹe nọ: “Ere he, olori mẹ! Mẹ yọ aye nọ idhọvẹ e da oma fia;* mẹ re da enwaene hayo udi ọvo nọ u re mu hu, rekọ me bi horie eva* mẹ kẹ Jihova.+ 16 Who roro nọ odibo ra yọ aye nọ o fioka ha ha, keme awa gbe idhọvẹ egaga nọ e rrọ omẹ oma eye e be lẹliẹ omẹ ta ẹme anwẹsiẹ na.” 17 Kẹsena Ilai ọ tẹ ta kẹe nọ: “Nya kpo tou, jọ Ọghẹnẹ Izrẹl o ru epanọ whọ yare na kẹ owhẹ.”+ 18 Fikiere Hana ọ tẹ ta nọ: “Jọ odibo ra o wo aruoriwo evaọ aro ra.” Aye na ọ tẹ nyavrẹ, ọ tẹ re emu, o gbe mu ovao họ ofa ha.

19 Ahwo uviuwou na a tẹ kpama evaọ irioke frifri, a te guzou kpotọ evaọ aro Jihova. Nọ a ru ere no, a te zihe kpobọ uwou rai evaọ Rema.+ Ẹlkena o te lele Hana aye riẹ wezẹ, Jihova ọ tẹ kareghẹhọ iẹe.+ 20 Evaọ oware ẹgbukpe ọvo* Hana o te dihọ, o te yẹ ọmọzae, o te se odẹ+ riẹ Samuẹle,* keme ọ ta nọ, “obọ Jihova mẹ jọ yare iẹe.”

21 Nọ oke u te, Ẹlkena avọ ahwo uwou riẹ soso a tẹ wọ re a nyai dhe idhe ẹgbukpe kẹ Jihova,+ re o je dhe idhe nọ ọ ya eyaa riẹ. 22 Rekọ Hana ọ nya ha,+ keme ọ ta kẹ ọzae riẹ nọ: “Nọ mẹ tẹ nwani bru ọmọ na evie no, mẹ te rehọ iẹe ze; mẹ vẹ rehọ iẹe kẹ Jihova, ọ vẹ te jọ etẹe no umuo oke yena vrẹ.”+ 23 Ẹlkena ọzae riẹ ọ tẹ ta kẹe nọ: “Ru onọ who roro nọ o mai kiehọ.* Jọ uwou bẹsenọ who re bru ọmọ na evie no. Jọ Jihova o ru oware nọ whọ ta na gba.” Fikiere aye na ọ tẹ jọ uwou, ọ tẹ rẹrote ọmọzae riẹ na bẹsenọ o ro bru ei evie no.

24 Nọ ọ nwani bru ọmọ na evie no, ọ tẹ wọe kpobọ Shailo, yọ ọ wha eruẹ nọ o te ikpe esa no, ifa* eflawa, gbe akana udi ologbo lele oma,+ tei te ọmọzae ọsese riẹ na a tẹ ziọ uwou Jihova evaọ Shailo.+ 25 Kẹsena a te kpe eruẹ na, a tẹ rehọ ọmọ na se Ilai. 26 Ọ tẹ ta kẹ Ilai nọ: “Ivie, olori mẹ! Nọ whọ rrọ uzuazọ na,* olori mẹ, mẹ họ aye nọ o dikihẹ etenẹ kugbe owhẹ nọ ọ jẹ lẹ se Jihova na.+ 27 Fiki ọmọ nana mẹ jẹ rọ lẹ na, yọ Jihova o ru oware nọ mẹ yare mi ei kẹ omẹ.+ 28 Fikiere, mẹ be rehọ iẹe* kẹ Jihova. Mẹ rehọ e riẹ kẹ Jihova no evaọ edẹ uzuazọ riẹ kpobi.”

Ọ* tẹ jọ etẹe guzou kpotọ kẹ Jihova.

² Kẹsena Hana ọ tẹ lẹ nọ:

11 Kẹsena Ẹlkena o te kpobọ uwou riẹ evaọ Rema, rekọ ọmọ na ọ tẹ jọ ọgbodibo* Jihova+ evaọ aro Ilai ozerẹ na.

12 Whaọ emezae Ilai a jọ ahwo omuomu;+ a wo adhẹẹ kẹ Jihova ha. 13 Enẹ a jẹ hai ru ẹkẹ nọ o re te izerẹ na evaọ eware nọ ahwo na a wha ze:+ Oke kpobi nọ ohwo o te bi dhe idhe, odibo ozerẹ na jọ ọ vẹ nyaze avọ ododo egha esa nọ o kru họ obọ okenọ arao na ọ be jọ erae họrọ na, 14 o ve du rie họ odhe na, uwho nọ u wo abọ-ivẹ na, ẹbẹro na, hayo uwho nọ u wo obọ-ọvo na. Oware kpobi nọ u lele ododo na ze, ozerẹ na ọ vẹ rehọ iẹe kẹ omariẹ. Ere a je ru ahwo Izrẹl kpobi nọ a jẹ nyaze Shailo. 15 U no ere no, taure ohwo nọ o bi dhe idhe na ọ tẹ te mahe iwhri na dede,+ odibo ozerẹ na jọ ọ vẹ nyaze, ọ vẹ ta kẹe nọ: “Kẹ ozerẹ na arao re ọ rọ tọ. Ọ te rehọ arao nọ a there no mi owhẹ hẹ, ajokpaọ arao ọkpokpọ ọvo.” 16 Nọ ohwo na ọ tẹ ta kẹe nọ: “Jọ a kake mahe iwhri na tao,+ kẹsena whọ vẹ rehọ oware kpobi nọ whọ gwọlọ kẹ omara,”* ọ vẹ ta nọ: “Ijo, rehọ iẹe kẹ omẹ obọnana; o gbẹ rrọ ere he, mẹ te rọ ogaga tọlọ iẹe!” 17 Fikiere uzioraha idibo na u te ti yoma thesiwa evaọ aro Jihova,+ keme a jẹ rọ idhe nọ ahwo a je dhe kẹ Jihova jijehwẹ.

18 Whaọ evaọ oke yena Samuẹle ọ jẹ gbodibo+ evaọ aro Jihova, yọ o je ku ẹfọd nọ a rọ ohọ-olọlọhọ ko họ,+ dede nọ ọ jọ ọmaha gheghe. 19 Ofariẹ, oni riẹ ọ jẹ hai ko emewu nọ o wo abọ họ ro sei kukpe kukpe nọ o te lele ọzae riẹ ziọ Shailo re a dhe idhe ẹgbukpe na.+ 20 Ilai ọ tẹ lẹ ẹro eghale kẹ Ẹlkena avọ aye riẹ inọ: “Jọ Jihova ọ rọ ẹkwoma aye ra nana kẹ owhẹ ọmọ ọfa ro nwene ọnọ whọ rehọ* kẹ Jihova na.”+ Kẹsena a te zihe kpo. 21 Jihova ọ tẹ wariẹ kareghẹhọ Hana, o te mu emọ họ eyẹ;+ o yẹ emezae esa efa gbe emetẹ ivẹ. Samuẹle ọ tẹ gbẹ jẹ rro evaọ aro Jihova.+

22 Whaọ Ilai ọ kpako gaga no, rekọ o yo kpahe eware kpobi nọ emezae riẹ a je ru+ ahwo Izrẹl kpobi gbe epanọ a je ro lele eyae nọ e jẹ gbodibo evaọ obọ unuẹthẹ uwou-udhu omakugbe na wezẹ.+ 23 Ọ jẹ hae ta kẹ ae nọ: “Fikieme wha bi ro ru eware itienana? Eware nọ ahwo kpobi a be ta kpahe owhai nọ wha bi ru na e rrọ yoyoma. 24 Ijo, emezae mẹ, usi nọ me bi yo kpahe owhai nọ u bi do evaọ udevie ahwo Jihova na u woma ha. 25 Otẹrọnọ ohwo o ru omọfa thọ, ohwo ọfa ọ sae lẹ Jihova kẹe;* rekọ otẹrọnọ ohwo ọ thọ uzi Jihova,+ ono ọ rẹ sae lẹ kẹ ohwo yena?” Rekọ a gaviezọ kẹ ọsẹ rai ghele he, keme Jihova ọ jiroro no inọ o ti kpe ai no.+ 26 Evaọ oke yena yọ Samuẹle ọ gbẹ be rro je bi wo aruoriwo evaọ obọ Jihova gbe evaọ obọ ahwo na.+

27 Ohwo Ọghẹnẹ jọ ọ tẹ nyabru Ilai ze, ọ tẹ ta kẹe nọ: “Enẹ Jihova ọ ta: ‘Kọ ogbẹrọnọ mẹ o dhesẹ oma mẹ vevẹ kẹ uwou ọsẹ ra okenọ a jọ erigbo kẹ uwou Fẹro evaọ obọ Ijipti?+ 28 Mẹ tẹ salọ iẹe no erua Izrẹl kpobi ze+ re ọ jọ ozerẹ kẹ omẹ, re ọ hae jọ agbada-idhe mẹ+ dhe idhe, mahe insẹnse,* je ku ẹfọd họ evaọ aro mẹ; mẹ tẹ jẹ kẹ uwou ọsẹ-esẹ ra udu nọ a rẹ rọ rehọ ẹkẹ jọ evaọ erao nọ ahwo Izrẹl* a rehọ ze ti dhe idhe.+ 29 Kọ fikieme wha be rọ rehọ idhe nọ a bi dhe kẹ omẹ gbe okẹ nọ me jie uzi nọ a rẹ kẹ omẹ evaọ oria nọ mẹ be rria ro jijehwẹ?*+ Kọ fikieme whọ gbẹ be rọ kẹ emezae ra ọghọ vi omẹ, nọ wha be rọ rehọ ẹkẹ nọ ọ mai woma evaọ idhe ahwo mẹ Izrẹl ro ru omarai jọ poriẹ poriẹ?+

30 “‘Oyejabọ nọ Jihova Ọghẹnẹ Izrẹl ọ rọ ta nọ: “Mẹ ta nọ uwou ra avọ uwou ọsẹ-esẹ ra e te gbodibo evaọ aro mẹ ẹsikpobi.”+ Rekọ enẹna Jihova ọ ta nọ: “Mẹ te gbẹ kuvẹ re o jọ ere vievie he, keme ahwo nọ a be kẹ omẹ ọghọ, mẹ rẹ kẹ ọghọ,+ ahwo nọ a be jẹ omẹ kufiẹ, a ti rri rai vo.” 31 Rri! Edẹ e be tha nọ me ti mi owhẹ avọ unuwou ọsẹ-esẹ ra ẹgba* rai no, ohwo ọvo ọ gbẹ te jọ unuwou ra kpako ho.+ 32 Ghelọ eware iwoma kpobi nọ i bi te Izrẹl, whọ te jọ oria nọ mẹ be rria wo ọwegrẹ evaọ aro ra,+ yọ ohwo nọ ọ kpako no ọ gbẹ te jọ uwou ra ofa vievie he. 33 Ohwo uwou ra nọ me ti si no ho, nọ ọ te gbẹ jọ agbada-idhe mẹ ru iruo, o ti ru ibiaro ra tu jẹ te wha uweri se owhẹ,* rekọ ọgbọdọ ahwo a ti ro kpe ahwo uwou ra buobu.+ 34 Oware nọ o te via kẹ emezae ivẹ ra, Hofini avọ Finihas o te jọ oka kẹ owhẹ: Aimava a ti whu evaọ ẹdẹ ọvo.+ 35 Kẹsena mẹ vẹ te rehọ ozerẹ nọ a re fievahọ mu kẹ omamẹ.+ O ti ru oware nọ o rọwokugbe udu mẹ;* mẹ te bọ uwou nọ o rẹ tọ kẹe, yọ ọ te jọ ozerẹ kẹ ọnọ me wholo na ẹsikpobi. 36 Ohwo kpobi nọ o ti kiọkọ uwou ra ọ te nyaze ti guzou kpotọ kẹe re a sae hwae umugho jọ jẹ kẹe ukulu ebrẹdi, ọ te ta kẹe nọ: “Ivie, fi omẹ họ ọkwa-ozerẹ na jọ re mẹ sae ruẹ ẹwẹ ebrẹdi nọ mẹ rẹ re.”’”+

3 Evaọ oke yena yọ ọmọ na, Samuẹle ọ be gbodibo+ kẹ Jihova evaọ aro Ilai, rekọ a gbe je yo ẹme no obọ Jihova ze tere evaọ oke yena ha; eruẹaruẹ+ e gbẹ jariẹ tere he.

2 Evaọ ẹdẹ jọ, Ilai o te kiẹzẹ obọ ubrukpẹ riẹ, yọ ibiaro riẹ i dhe no; ọ gbẹ jẹ ruẹ ude he.+ 3 Oke yena a ri furie ukpẹ Ọghẹnẹ+ no ho, yọ Samuẹle o kiẹzẹ etẹmpol*+ Jihova, oria nọ etehe ọvọ Ọghẹnẹ ọ jọ. 4 Jihova o te se Samuẹle. O te yo nọ: “Mẹ na.” 5 Ọ tẹ dhẹ bru Ilai, ọ tẹ ta nọ: “Mẹ na, keme who se omẹ.” Rekọ ọ tẹ ta kẹe nọ: “Me se owhẹ hẹ. Nyae wariẹ kiẹzẹ.” Ọ tẹ nyai kiẹzẹ. 6 Jihova ọ tẹ wariẹ sei nọ: “Samuẹle!” Samuẹle ọ tẹ kpama, ọ tẹ nyabru Ilai, ọ tẹ ta nọ: “Mẹ na, keme who se omẹ.” Rekọ ọ tẹ ta nọ: “Me se owhẹ hẹ, ọmọzae mẹ. Nyae wariẹ kiẹzẹ.” 7 (Whaọ evaọ oke yena Samuẹle ọ re riẹ Jihova ha, yọ Jihova o ri mu ei ẹme họ ẹta kẹ hẹ.)+ 8 Jihova ọ tẹ wariẹ sei orọ avọ isiasa nọ: “Samuẹle!” Ọ tẹ kpama, ọ tẹ nyabru Ilai, ọ tẹ ta nọ: “Mẹ na, keme who se omẹ.”

Ẹsiẹe Ilai o ro vuhumu nọ Jihova họ ọnọ o je se ọmọ na. 9 Fikiere Ilai ọ tẹ ta kẹ Samuẹle nọ: “Nyai kiẹzẹ, ọ tẹ wariẹ se owhẹ, whọ vẹ ta nọ, ‘Ta ẹme Jihova, keme odibo ra ọ be gaviezọ.’” Samuẹle ọ tẹ nyai kiẹzẹ oria riẹ.

10 Jihova ọ tẹ nyaze, o te dikihẹ etẹe, o te sei epanọ o se rie oke ọsosuọ na: “Samuẹle, Samuẹle!” Samuẹle ọ tẹ ta nọ: “Ta ẹme, keme odibo ra ọ be gaviezọ.” 11 Jihova ọ tẹ ta kẹ Samuẹle nọ: “Rri! Mẹ be te jọ Izrẹl ru oware jọ nọ o te gheghe ohwo kpobi nọ o yo kpahe iẹe ezọ.+ 12 Evaọ ẹdẹ yena, me ti ru oware kpobi nọ mẹ ta kpahe uwou Ilai gba, no emuhọ rite ekuhọ.+ 13 Whọ rẹ ta kẹe nọ, me bi bruoziẹ kpe uwou riẹ bẹdẹ bẹdẹ fiki oruthọ nọ ọ riẹ kpahe,+ keme emezae riẹ e be la Ọghẹnẹ eka,+ rekọ ọ whọku ai hi.+ 14 Oyejabọ nọ me ro duwu uwou Ilai iyei inọ a te sae rehọ idheidhe hayo idhe okẹ ro voro oruthọ uwou Ilai no vievie he.”+

15 Samuẹle o te kiẹzẹ rite ohiohiẹ; kẹsena o te rovie ethẹ uwou Jihova. Ozọ u te je mu Samuẹle re ọ vuẹ Ilai kpahe eruẹaruẹ na. 16 Rekọ Ilai o te se Samuẹle: “Samuẹle, ọmọzae mẹ!” O te yo nọ: “Mẹ na.” 17 Ọ tẹ nọe nọ: “Eme ọ ta kẹ owhẹ? Ivie, whọ ko ẹe dhere omẹ hẹ. Jọ Ọghẹnẹ ọ kẹ owhẹ uye je fibae* otẹrọnọ whọ ko ẹme jọ dhere omẹ evaọ eme nọ ọ ta kẹ owhẹ kpobi na.” 18 Fikiere Samuẹle ọ tẹ vuẹe oware kpobi, ọ ko oware ovo dhere iei hi. Ilai ọ tẹ ta nọ: “Jihova ọ ta ẹme kẹ owhẹ na. Jọ o ru onọ u kiehọ evaọ aro riẹ.”

19 Samuẹle ọ tẹ gbẹ jẹ rro, yọ Jihova omariẹ ọ jọ kugbei,+ yọ ọ kuvẹ re ẹme ọvo evaọ usu eme riẹ kpobi ọ seba erugba ha.* 20 Ahwo Izrẹl kpobi nọ a rrọ Dan rite Biẹ-shiba a tẹ te riẹ nọ a rehọ Samuẹle mu ọruẹaro Jihova no. 21 Jihova ọ tẹ gbẹ jẹ romavia evaọ Shailo, keme Jihova o dhesẹ omariẹ via kẹ Samuẹle evaọ Shailo ẹkwoma ẹme Jihova.+

4 Samuẹle ọ tẹ jẹ ta ẹme kẹ Izrẹl soso.

Kẹsena ahwo Izrẹl a tẹ wọ ẹmo bru ahwo Filistia; a tẹ fa evuẹ kẹle Ẹbẹniza, ahwo Filistia na a tẹ fa evuẹ fihọ Efẹk. 2 Ahwo Filistia a te dhe uhie ẹmo họ re a nyabru ahwo Izrẹl, rekọ ẹmo na ọ riẹ nya kẹ ahwo Izrẹl he, ahwo Filistia a te fi ai kparobọ, a kpe ezae Izrẹl nọ i bu te oware wọhọ idu ene (4,000) evaọ aro ẹmo na. 3 Nọ ahwo na a zihe kpobọ evuẹ na, ekpako ahwo Izrẹl a tẹ ta nọ: “Fikieme Jihova ọ rọ kuvẹ re ahwo Filistia a fi omai kparobọ* nẹnẹ na?+ Joma nyae rehọ etehe ọvọ Jihova no obọ Shailo ze,+ re o jọ kugbe omai, o ve siwi omai no obọ ewegrẹ mai.” 4 Fikiere ahwo na a te vi ezae jọ kpobọ Shailo, a tẹ jọ etẹe wọ etehe ọvọ Jihova olori egbaẹmo, ọnọ ọ keria agbara-uvie riẹ evaọ obehru* chẹrub na.+ Emezae ivẹ Ilai nọ a re se Hofini avọ Finihas+ e jọ kugbe etehe ọvọ Ọghẹnẹ uzẹme na re.

5 Nọ a nwane wọ etehe ọvọ Jihova te evuẹ na no, ahwo Izrẹl kpobi a tẹ jẹ koyẹ gaga, te epanọ otọ u ro nuhu. 6 Nọ ahwo Filistia a yo edo ẹkoyẹ na, a tẹ jẹ nọ nọ: “Eme ọ be lẹliẹ ahwo Hibru na koyẹ ga tere evaọ evuẹ rai?” A te ti yo nọ a wọ etehe ọvọ Jihova ziọ evuẹ na. 7 Ozọ u te je mu ahwo Filistia na, keme a jẹ ta nọ: “Ọghẹnẹ ọ nyaziọ evuẹ na no!”+ Fikiere a tẹ ta nọ: “Ma whu no, keme oware utionana o re via ẹdẹvo ho! 8 Ma whu no! Ono o ti siwi omai no obọ Ọghẹnẹ ologbo nana? Ọghẹnẹ nana họ ọnọ ọ rehọ oghẹrẹ sa-sa kpe ahwo Ijipti evaọ udhude na.+ 9 Wha kru udu ga je ru wọhọ ezae, whai ahwo Filistia, re wha siọ odibo ba ẹgba kẹ ahwo Hibru na nwane wọhọ epanọ a gbodibo kẹ owhai na.+ Wha ru wọhọ ezae re wha họre!” 10 Fikiere ahwo Filistia a tẹ họre ahwo Izrẹl, a te fi Izrẹl kparobọ,+ ọvuọ uwou-udhu riẹ ọ tẹ dhẹ kpohọ. Ahwo nọ a kpe a bu gaga; evaọ ofẹ Izrẹl, a kpe isoja owotọ nọ i bu te idu ọgba (30,000). 11 U no ere no, a wọ etehe ọvọ Ọghẹnẹ rehọ, emezae ivẹ Ilai, Hofini avọ Finihas a te je whu.+

12 Ohwo orua Bẹnjamin jọ ọ tẹ dhẹ no obọ ẹmo na ze, o te te Shailo evaọ ẹdẹ yena avọ iwu riẹ nọ e bẹre, gbe ẹkpẹ nọ ọ riẹe uzou.+ 13 Nọ ọzae na o te etẹe yọ Ilai ọ keria akpala nọ ọ rrọ akotọ edhere bi rri, keme udu u je bru ei fiki etehe ọvọ Ọghẹnẹ uzẹme na.+ Ọzae na ọ tẹ ruọ okpẹwho na re ọ niyẹrẹ usi na, ahwo okpẹwho na soso a te muhọ ẹviẹ. 14 Nọ Ilai o yo edo oviẹ na, ọ tẹ nọ nọ: “Eme ọ be wha edo ẹvohẹ nọ me bi yo na ze?” Ọzae ọvona ọ tẹ nwane dhẹ ze, ọ tẹ vuẹ Ilai usi na. 15 (Whaọ Ilai ọ kpako te ikpe udhone gbe ikpegberee no, yọ ibiaro riẹ i je ke ọvo, ọ gbẹ jẹ ruẹ ude he.)+ 16 Ọzae na ọ tẹ ta kẹ Ilai nọ: “Mẹ họ ohwo nọ o no obọ aro ẹmo na ze na! Nẹnẹ na mẹ dhẹ no obọ ẹmo na ze.” Ilai ọ tẹ nọe nọ: “Eme ọ jọ obei via, ọmọzae mẹ?” 17 Ọnọ ọ wha usi na ze na ọ tẹ ta nọ: “Ahwo Izrẹl a dhẹ kẹ ahwo Filistia, a kpe ahwo Izrẹl gaga;+ yọ emezae ivẹ ra, Hofini avọ Finihas a whu no,+ a tẹ jẹ wọ etehe ọvọ Ọghẹnẹ uzẹme na rehọ no.”+

18 Nọ ọ nwane fodẹ etehe ọvọ Ọghẹnẹ uzẹme na, Ilai o te kie rri emu no akpala nọ ọ keria evaọ akotọ unuighẹ na fihọ otọ, uriohọ riẹ u te wiri, o te whu, keme ọ who no jẹ jọ gbẹgbẹdẹ. Ọ jọ obruoziẹ Izrẹl evaọ ikpe udhuvẹ. 19 Oke yena yọ aye ọmọzae riẹ, aye Finihas o dihọ te eyẹ. Nọ o yo nọ a wọ etehe ọvọ Ọghẹnẹ uzẹme na rehọ, gbe nọ ọsọrọo riẹ avọ ọzae riẹ a whu no, o te ruwẹ idudhe, eva-eyẹ e tẹ nwani mu ei họ ẹda, o te yẹ. 20 Nọ o je whu, eyae nọ i dikihẹ gbae e tẹ ta kẹe nọ: “Jọ ozọ u mu owhẹ hẹ, keme who yẹ ọmọzae no.” Ọ kpunu hu, yọ ọ daezọ ẹme na ha.* 21 Rekọ o te se odẹ ọmọ na Ikabọd,*+ inọ: “Oruaro u no Izrẹl kpohọ igbo no,”+ ọ jẹ ta kpahe etehe ọvọ Ọghẹnẹ uzẹme na nọ a wọ rehọ na gbe oware nọ o via kẹ ọsọrọo riẹ avọ ọzae riẹ na.+ 22 Ọ ta nọ: “Oruaro u no Izrẹl kpohọ igbo no, keme a wọ etehe ọvọ Ọghẹnẹ uzẹme na rehọ no.”+

5 Nọ ahwo Filistia a wọ etehe ọvọ+ Ọghẹnẹ uzẹme na, a tẹ rehọ iẹe no Ẹbẹniza kpohọ Ashdọd. 2 Ahwo Filistia na a tẹ wọ etehe ọvọ Ọghẹnẹ uzẹme na kpohọ uwou* Degọn ọghẹnẹ rai, a te fi ei họ abotọ Degọn.+ 3 Nọ ahwo Ashdọd a kpama evaọ irioke okiokiọ riẹ, a tẹ ruẹ nọ Degọn o kie vovao tuotọ evaọ aro etehe ọvọ Jihova na.+ A tẹ wọ Degọn, a te zihe iei fihọ oria riẹ.+ 4 Nọ a kpama irioke frifri evaọ ẹdẹ nọ o lele i rie, a tẹ wariẹ ruẹ nọ Degọn o kie vovao tuotọ evaọ aro etehe ọvọ Jihova. Uzou Degọn avọ evabọ ivẹ riẹ i bru no, e rrọ unuwou na. Abọ nọ ọ rrọ emeri na ọvo* ọ gbẹ rrọ ọkọkọ. 5 Oyejabọ nọ rite ẹdẹ inẹnẹ na, izerẹ Degọn gbe ahwo kpobi nọ a be ruọ uwou Degọn a gbe ro thihi unuwou Degọn nọ ọ rrọ Ashdọd ho na.

6 Obọ Jihova o tẹ rọsuọ ahwo Ashdọd gaga, o te fi ẹyao ọgaga họ ahwo Ashdọd avọ ekwotọ riẹ oma, eko uvinẹ rai u te je wolo ze.*+ 7 Nọ ahwo Ashdọd a ruẹ oware nọ o be via na, a tẹ ta nọ: “Wha wọ etehe ọvọ Ọghẹnẹ Izrẹl na zihe, keme ọye ọ be rehọ uye ogaga nana te omai gbe Degọn ọghẹnẹ mai na.” 8 Fikiere a te vi ahwo nyai se ilori ahwo Filistia kpobi kokohọ, a tẹ nọ ai nọ: “Ẹvẹ ma re ru etehe ọvọ Ọghẹnẹ Izrẹl na?” A te yo nọ: “Jọ a wọ etehe ọvọ Ọghẹnẹ Izrẹl na kpobọ Gat.”+ A tẹ wọ etehe ọvọ Ọghẹnẹ Izrẹl na kpohọ obei.

9 Nọ a wọe te obei no, obọ Jihova o tẹ rọsuọ okpẹwho na, o tẹ whẹ ozọ ogaga fihọ ai oma. Ọ tẹ rehọ ẹyao ọgaga tehe okpẹwho na, te ọmaha te ọkpako, eko uvinẹ rai u te bi wolo ze.+ 10 Fikiere a tẹ wọ etehe ọvọ Ọghẹnẹ uzẹme na kpohọ Ekrọn,+ rekọ nọ etehe ọvọ Ọghẹnẹ uzẹme na ọ nwani te Ekrọn, ahwo Ekrọn a te muhọ ebo nọ: “A wọ etehe ọvọ Ọghẹnẹ Izrẹl bru omai ze no re o kpe omai avọ ahwo mai no!”+ 11 A te vi ahwo nyai se ilori ahwo Filistia kpobi kokohọ, a tẹ ta nọ: “Wha wọ etehe ọvọ Ọghẹnẹ Izrẹl na no etenẹ no; wha zihe iei kpohọ obonọ o no ze re ọ siọ omai avọ ahwo mai ba ekpe no.” Keme ozọ u je mu ahwo okpẹwho na soso inọ a ti whu no; obọ Ọghẹnẹ uzẹme na o rọsuọ ae gaga evaọ etẹe,+ 12 yọ ẹyao eko uvinẹ nọ u re wolo ze o tehe ahwo nọ a whu hu. Oviẹ nọ ahwo okpẹwho na a jẹ viẹ kẹ obufihọ u do te obọ idhiwu na.

6 Emerae ihrẹ etehe ọvọ+ Jihova na ọ jọ ẹkwotọ ahwo Filistia. 2 Ahwo Filistia na a te se izerẹ gbe enọ e rẹ gbẹva na,+ a tẹ nọ ae nọ: “Ẹvẹ ma re ru etehe ọvọ Jihova na? Wha vuẹ omai oghẹrẹ nọ ma rẹ rọ rehọ iẹe zihe kpohọ obonọ o no ze.” 3 A tẹ ta kẹ ae nọ: “Wha te bi zihe etehe ọvọ Jihova Ọghẹnẹ Izrẹl na kpo, wha rẹ rehọ iẹe kpo ababọ idhe he. Wha re zihe iei sei avọ idhe uzioraha hrọ.+ Oware yena ọvo u ti siwi owhai, wha vẹ te riẹ oware nọ obọ riẹ o gbẹ re nyasiọ owhai ba ha.” 4 A tẹ nọ inọ: “Oghẹrẹ idhe uzioraha vẹ ma re vi lele iei?” A tẹ ta nọ: “Wha re vi emema igoru isoi erọ eko uvinẹ nọ u bi wolo ze* gbe emema idhogbi isoi nọ a rọ igoru ru, wọhọ epaọ unu ilori Filistia nọ wha wo na,+ keme oghẹrẹ ẹyao ọvona ọ tehe owhai kpobi avọ ilori rai. 5 Wha re ru emema eko uvinẹ nọ u bi wolo ze gbe emema idhogbi+ nọ i bi kpe ahwo ẹkwotọ rai muotọ na, yọ wha rẹ rọ orro kẹ Ọghẹnẹ Izrẹl. Ẹsejọhọ o ti ru obọ riẹ nọ ọ rọ kpahe owhai gbe ọghẹnẹ rai gbe ẹkwotọ rai na vori.+ 6 Kọ fikieme wha re ro ru udu rai gaga wọhọ epanọ ahwo Ijipti gbe Fẹro a ru udu rai gaga?+ Nọ Ọ rehọ uye ogaga te ai,+ ẹsiẹe a ro siobọno ahwo Izrẹl, a te kpo.+ 7 Wha ku akẹkẹ ọkpokpọ jẹ rehọ iruẹ ivẹ nọ i wo emọ, enọ e re jọ otọ owhowha ẹdẹvo ho. Wha ve thuru iruẹ na si akẹkẹ na, rekọ wha rẹ rehọ emọ-iruẹ na zihe kpo siọ ae ba. 8 Wha vẹ wọ etehe ọvọ Jihova na fihọ akẹkẹ na, wha ve je fi ekwakwa igoru nọ wha bi vi sei ro dhe idhe uzioraha na họ ẹkpẹti kẹle etehe ọvọ na.+ Kẹsena wha ve siobọno akẹkẹ na vrẹ 9 yọ wha bi rri: Ọ tẹ nya edhere na ovavo kpobọ Bẹt-shimẹsh,+ kpobọ ẹkwotọ riẹ, kiyọ ọye o ru omai eware iyoma nana. Rekọ o gbẹ via ere he, ma vẹ te riẹ nọ ọye ọ wha uye na se omai hi; koyehọ u mu via kẹ omai.”

10 Ahwo na a te gine ru ere. A tẹ rehọ iruẹ ivẹ nọ i wo emọ, a te thuru ai si akẹkẹ na, a te fi emọ-iruẹ na họ ogba rai. 11 A tẹ wọ etehe ọvọ Jihova na fihọ akẹkẹ na, a tẹ jẹ wọ ẹkpẹti na fihọ iẹe, onọ emema idhogbi igoru avọ emema eko uvinẹ nọ u bi wolo ze e rrọ na. 12 Iruẹ na e tẹ nya ovavo evaọ edhere nọ o kpobọ Bẹt-shimẹsh.+ Edhere ologbo na ọvo a jẹ nya, yọ a bi bo nọ a be nya na; a wẹriẹ kpohọ obọze hayo ẹkpẹlobọ họ. Nọ a be nya na, yọ ilori ahwo Filistia na a bi lele ai ukuke rite ugbo obọ uwhru Bẹt-shimẹsh. 13 Oke yena yọ ahwo Bẹt-shimẹsh a bi bru iwhiti evaọ ukiekpotọ opraprara na. Nọ a kpare ovao jẹ ruẹ etehe ọvọ na, a tẹ jẹ ghọghọ gaga. 14 Akẹkẹ na ọ tẹ nyaruọ udhu Joshua ohwo Bẹt-shimẹsh na, u te dikihẹ kẹle utho ulogbo jọ. A tẹ bẹre ire akẹkẹ na ro koko erae họ, a tẹ rehọ iruẹ na+ dhe idhe emahọ kẹ Jihova.

15 Ahwo Livae+ a tẹ wọ etehe ọvọ Jihova na gbe ẹkpẹti nọ ọ jọ kugbei na, onọ ekwakwa igoru na e rrọ eva na, a te fi ai họ ehru utho ulogbo na. Ahwo Bẹt-shimẹsh+ a te dhe idhe emahọ je dhe idhe efa kẹ Jihova evaọ ẹdẹ yena.

16 Nọ ilori isoi ahwo Filistia na a ruẹ oware nọ o via na, a te zihe kpobọ Ekrọn evaọ ẹdẹ yena. 17 Whaọ, emema igoru eko uvinẹ nọ u bi wolo ze nọ ahwo Filistia na a vi re a ro dhe idhe uzioraha kẹ Jihova na+ e jọ rọkẹ ikpewho nana: ọvo rọkẹ Ashdọd,+ ọvo rọkẹ Gaza, ọvo rọkẹ Ashkelọn, ọvo rọkẹ Gat,+ ọvo rọkẹ Ekrọn.+ 18 Yọ emema igoru idhogbi na i bu te unu ikpewho ahwo Filistia kpobi nọ ilori isoi na i je su—te ikpewho nọ a di ogba wariẹ họ* gbe iwhre nọ a di ogba wariẹ họ họ.

Utho ulogbo nọ a wọ etehe ọvọ Jihova fihọ evaọ udhu Joshua ohwo Bẹt-shimẹsh na yọ isẹri rite ẹdẹ inẹnẹ na. 19 Rekọ Ọghẹnẹ o te kpe ahwo Bẹt-shimẹsh, fikinọ a rri etehe ọvọ Jihova. O kpe ahwo idu udhuvẹ-gbikpe gbe udhosa-gbikpe (50,070),* ahwo na a te mu uweri họ keme Jihova o kpe ahwo rai buobu.+ 20 Fikiere ahwo Bẹt-shimẹsh a tẹ nọ nọ: “Ono ọ rẹ sai dikihẹ aro Jihova, Ọghẹnẹ ọrẹri nana,+ kọ ọ gbẹ nyasiọ omai ba bru amọfa?”+ 21 A te vi enyukọ nyae ta kẹ ahwo nọ a be rria Kiriat-jierim+ nọ: “Ahwo Filistia a zihe etehe ọvọ Jihova ze no. Wha nyaze re wha wọe vrẹ.”+

7 Fikiere ezae Kiriat-jierim e tẹ nyaze, a tẹ wọ etehe ọvọ Jihova na kpobọ uwou Abinadab+ nọ o rrọ ehru ugbehru, a te ru Ẹlieza ọmọzae riẹ fo re o rou etehe ọvọ Jihova na.

2 No ẹdẹ nọ a rọ wọ etehe ọvọ na ziọ Kiriat-jierim, oke lelehie o vrẹ, ikpe udhe soso, kẹsena ahwo uwou Izrẹl kpobi a te mu Jihova họ ẹgwọlọ.+ 3 Samuẹle ọ tẹ ta kẹ uwou Izrẹl soso nọ: “Otẹrọnọ udu rai kpobi wha bi ro zihe bru Jihova ze,+ wha si eghẹnẹ erẹwho efa+ gbe emema Ashtorẹt na+ no udevie rai no, re wha ku udu rai kpobi rẹriẹ bru Jihova ze,+ re wha gọ ọye ọvo, o ve ti siwi owhai no obọ ahwo Filistia.”+ 4 Fikiere ahwo Izrẹl a te si edhọ Bale gbe emema Ashtorẹt na no, a tẹ be gọ Jihova ọvo.+

5 Kẹsena Samuẹle ọ tẹ ta nọ: “Wha koko ahwo Izrẹl kpobi họ Mizpa,+ mẹ vẹ te lẹ se Jihova kẹ owhai.”+ 6 A te kokohọ Mizpa, a te vo ame, a te ku ei fihọ otọ evaọ aro Jihova jẹ siọ emuọriọ ba evaọ ẹdẹ yena.+ A tẹ jọ etẹe ta nọ: “Ma thọ uzi Jihova.”+ No oke yena vrẹ Samuẹle ọ tẹ jọ obruoziẹ+ kẹ ahwo Izrẹl evaọ Mizpa.

7 Nọ ahwo Filistia a yo nọ ahwo Izrẹl a kokohọ Mizpa, ilori ahwo Filistia+ a tẹ wọ ẹmo bru ahwo Izrẹl. Nọ ahwo Izrẹl a yo, ozọ u te je mu ai fiki ahwo Filistia na. 8 Fikiere ahwo Izrẹl a tẹ ta kẹ Samuẹle nọ: “Whọ siọ Jihova Ọghẹnẹ mai ba ẹlẹ se he+ re o fiobọhọ kẹ omai je siwi omai no obọ ahwo Filistia na.” 9 Kẹsena Samuẹle ọ tẹ rehọ omogodẹ nọ o gbe bi vi evie, ọ tẹ rehọ iẹe dhe idhe emahọ+ kẹ Jihova; Samuẹle o te bo se Jihova kẹ obufihọ fiki Izrẹl, Jihova o te yo kẹe.+ 10 Epanọ Samuẹle o je ro dhe idhe emahọ na, ahwo Filistia a tẹ wọ ẹmo bru ahwo Izrẹl ze. Jihova o te ru egbrara egaga va+ ku ahwo Filistia na evaọ ẹdẹ yena, O te ru ai reghe no,+ ahwo Izrẹl a te fi ai kparobọ.+ 11 Fikiere ezae Izrẹl e tẹ wọ no Mizpa vrẹ, a te mu ahwo Filistia na họ ele, a te kpe ai rite ugbo obọ obọze ovatha-ọre Bẹt-ka. 12 Kẹsena Samuẹle ọ tẹ rehọ utho,+ ọ tẹ rehọ iẹe vi evaọ udevie Mizpa avọ Jẹshana, o te sei Ẹbẹniza,* keme ọ ta nọ: “Rite enẹna, Jihova o bi fiobọhọ kẹ omai.”+ 13 Ere a ro fi ahwo Filistia kparobọ, a gbẹ wariẹ ziọ ẹkwotọ Izrẹl he;+ obọ Jihova o tẹ gbẹ rọsuọ ahwo Filistia na evaọ edẹ uzuazọ Samuẹle kpobi.+ 14 Ofariẹ, ahwo Filistia a zihe ikpewho nọ a rehọ mi ahwo Izrẹl kẹ ae, no Ekrọn rite Gat, ere ahwo Izrẹl a rọ rehọ ẹkwotọ nọ ahwo Filistia a mi rai zihe ze.

Udhedhẹ o tẹ jẹ jọ udevie ahwo Izrẹl avọ ahwo Amọ.+

15 Samuẹle ọ tẹ jọ obruoziẹ Izrẹl evaọ edẹ uzuazọ riẹ kpobi.+ 16 Kukpe kukpe Samuẹle ọ jẹ hae nya Bẹtẹl,+ Gilgal,+ gbe Mizpa+ wariẹ, yọ o je bruoziẹ Izrẹl evaọ eria nana kpobi. 17 Ukuhọ riẹ o ve zihe kpobọ Rema,+ keme uwou riẹ o jọ etẹe, yọ o je bruoziẹ Izrẹl evaọ etẹe re. Ọ bọ agbada-idhe fihọ etẹe kẹ Jihova.+

8 Nọ Samuẹle ọ kpako no, ọ tẹ rehọ emezae riẹ mu ibruoziẹ kẹ ahwo Izrẹl. 2 Odẹ ọmọ ọsosuọ riẹ Joẹl, odẹ ọmọ avọ ivẹ riẹ kọ Abaejah;+ a jọ ibruoziẹ evaọ Biẹ-shiba. 3 Rekọ emezae riẹ a lele oriruo riẹ hẹ; a jẹ hai ru eware nọ a re ro wo erere ewhariọ,+ a jẹ re udi,+ yọ a jẹ vẹ ẹdhọ tu.+

4 Nọ u te oke jọ, ekpako Izrẹl kpobi i te kokohọ, a tẹ nyabru Samuẹle ze evaọ Rema. 5 A tẹ ta kẹe nọ: “Rri! Whọ kpako no, rekọ emezae ra a bi lele oriruo ra ha. Fikiere rehọ ovie mu kẹ omai re o su omai wọhọ epanọ o rrọ kẹ erẹwho efa kpobi na.”+ 6 Rekọ o dha Samuẹle eva* okenọ a ta nọ: “Kẹ omai ovie nọ o re su omai.” Kẹsena Samuẹle ọ tẹ lẹ se Jihova, 7 Jihova ọ tẹ ta kẹ Samuẹle nọ: “Gaviezọ kẹ oware kpobi nọ ahwo na a ta kẹ owhẹ; keme orọnọ whẹ a se na ha, rekọ mẹ a se nọ ọ jọ ovie rai hi na.+ 8 Nwane epanọ a ru no anwọ okenọ mẹ rọ rehọ ai no Ijipti ze a bi ru na; a rẹ nyasiọ omẹ ba+ nyae gọ eghẹnẹ efa,+ yọ oware ovona a bi ru kẹ owhẹ na. 9 Gaviezọ kẹ ae. Rekọ whọ rẹ vẹvẹ ae unu gaga; vuẹ ae eware nọ ovie nọ o ti su ai na o ti wo udu nọ o re ro mi ai.”

10 Fikiere Samuẹle ọ tẹ vuẹ ahwo nọ a jẹ yare ovie na eme kpobi nọ Jihova ọ ta. 11 Ọ ta kẹ ae nọ: “Ovie nọ o ti su owhai o ti wo udu nọ o re ro mi owhai eware nana:+ Ọ te rehọ emezae rai+ fihọ ekẹkẹ riẹ+ je ru ai dhẹ enyenya riẹ,+ yọ emezae rai jọ e te hae rọ owotọ dhẹ karo kẹ ekẹkẹ riẹ. 12 Ọ te rehọ iletu mu kẹ omariẹ nọ i ti wuzou itu ahwo idu+ gbe iletu nọ i ti wuzou itu ahwo udhuvẹ-gbikpe,+ yọ ejọ e te hai kporo idhu riẹ,+ vu ekakọ riẹ,+ je ku ekwakwa ẹmo gbe ekwakwa ekẹkẹ riẹ.+ 13 Ọ te rehọ emetẹ rai re e jọ enọ i re ru idẹ,* there emu, je ru ebrẹdi.+ 14 O ti mi owhai idhu rai, egbọ evaene rai, gbe egbọ olivi rai nọ e mai woma,+ ọ vẹ te rehọ ae kẹ idibo riẹ. 15 O ti mi owhai abọvo abakpe idhu ekakọ rai gbe egbọ evaene rai, ọ vẹ te rehọ ai kẹ ahwo nọ a wuzou evaọ ọgwa-ovie riẹ gbe idibo riẹ. 16 O ti mi owhai idibo emezae gbe erọ emetẹ rai, ewa erao rai nọ e mai woma, gbe eketekete rai, ọ vẹ te rehọ ai ru iruo riẹ.+ 17 Ọ te rehọ abọvo abakpe ithuru erao rai mi owhai,+ yọ wha ti zihe ruọ idibo riẹ. 18 Oke o te tha nọ wha te viẹ fiki ovie nọ wha salọ kẹ omarai na,+ rekọ Jihova ọ te kezọ kẹ owhai evaọ oke yena ha.”

19 Rekọ ahwo na a rọwo kezọ kẹ eme nọ Samuẹle ọ ta kẹ ae na ha, a tẹ ta nọ: “Ma rọwo ho, ma gba riẹ mu nọ ma re wo ovie nọ o re su omai. 20 Ma vẹ te jọ wọhọ erẹwho efa kpobi, ovie mai o ve ti bruoziẹ mai, o ve ti su omai je fi emo mai kẹ omai.” 21 Nọ Samuẹle o yo eme kpobi nọ ahwo na a ta no, ọ tẹ wariẹ eme na kẹ Jihova. 22 Jihova ọ tẹ ta kẹ Samuẹle nọ: “Gaviezọ kẹ ae, re whọ rehọ ovie mu nọ o re su ai.”+ Kẹsena Samuẹle ọ tẹ ta kẹ ahwo Izrẹl nọ: “Whai kpobi wha zihe kpohọ ọvuọ okpẹwho riẹ.”

9 Ọzae jọ ọ jariẹ nọ ọ rrọ ohwo orua Bẹnjamin, odẹ riẹ Kish,+ ọmọzae Abayẹl, ọmọzae Zirọ, ọmọzae Bikorat, ọmọzae Afaya, ohwo orua Bẹnjamin,+ yọ ọzae na o fe gaga. 2 O wo ọmọzae jọ nọ a re se Sọl,+ ọ jọ ọmoha, yọ o wo erru gaga—ọzae ọvuọvo nọ o wo erru tei evaọ Izrẹl ọ jọ họ—nọ o te dikihẹ, o re theri vi ahwo na kpobi, ohwo ọvo ọ rẹ vrẹ ẹkoko riẹ hẹ.

3 Okenọ eketekete* Kish ọsẹ Sọl i vru, Kish ọ tẹ ta kẹ Sọl ọmọzae riẹ nọ: “Ivie, rehọ omọvo idibo na jọ kugbe oma re wha nyae gwọlọ eketekete na.” 4 A nya ubrotọ igbehru Ifremu gbe ẹkwotọ Shalisha duwu, rekọ a ruẹ e rai hi. A jọ ẹkwotọ Shealim soso gwọlọ eketekete na, rekọ a ruẹ e rai hi. A tẹ nya ẹkwotọ ahwo orua Bẹnjamin soso duwu, rekọ a ruẹ e rai ghele he.

5 A tẹ nyate ẹkwotọ Zọf, Sọl ọ tẹ ta kẹ odibo riẹ nọ a gbẹ jọ usu na nọ: “Nyaze re ma zihe kpo, o gbẹ rrọ ere he, ọsẹ mẹ o ve ti mu awa mai họ ẹruọ viukpọ eketekete na.”+ 6 Rekọ odibo na ọ tẹ ta kẹe nọ: “Rri, ohwo Ọghẹnẹ jọ ọ rrọ okpẹwho yena, ọzae nọ ahwo a rẹ kẹ ọghọ gaga. Ẹme kpobi nọ ọ ta ọ rẹ seba erugba ha.+ Joma nya obọnana. Ẹsejọhọ ọ te vuẹ omai obonọ ma rẹ nya rri.” 7 Fikiere Sọl ọ tẹ ta kẹ odibo riẹ na nọ: “Nọ ma tẹ nya, eme ma te wha se ọzae na? Uvumọ ebrẹdi ọ rrọ ẹkpa mai hi; yọ oware ovo o riẹ nọ ma sae rọ kẹ ohwo Ọghẹnẹ uzẹme na okẹ hẹ. Eme ma wo nọ ma sae rọ kẹe?” 8 Fikiere odibo na ọ tẹ wariẹ ta kẹ Sọl nọ: “Abọvo abane shẹkẹl isiliva* jọ ọ rrọ omẹ obọ. Mẹ te rehọ iẹe kẹ ohwo Ọghẹnẹ uzẹme na, o ve ti dhesẹ obonọ ma rẹ nya rri kẹ omai.” 9 (Evaọ oke anwae, nọ ohwo ọ tẹ gwọlọ nyae nekpẹ mi Ọghẹnẹ evaọ Izrẹl, enẹ ọ jẹ hae ta: “Nyaze re ma nyabru ọruẹ-ude na.”+ Keme ọruẹ-ude a jẹ hai se ọruẹaro evaọ oke anwae.) 10 Sọl ọ tẹ ta kẹ odibo riẹ nọ: “Emamọ ẹme whọ ta na. Joma nya.” Fikiere a tẹ nya kpohọ okpẹwho nọ ohwo Ọghẹnẹ uzẹme na ọ jọ na.

11 Nọ a jẹ nya evaọ edhere nọ a rẹ rọ gadiẹ kpohọ okpẹwho na, a te zere emetẹ nọ e be nyai vo ame. A tẹ nọ ae nọ: “Kọ ọruẹ-ude+ na ọ rrọ ẹwho nana?” 12 A te yo nọ: “Ọ riẹ. Rri, ọ rrọ aro rai na. Wha siawọ, keme ọ nyaze okpẹwho na nẹnẹ na, fikinọ ahwo na a bi dhe idhe+ nẹnẹ evaọ oria ukpehru na.+ 13 Nọ wha tẹ nwane ruọ okpẹwho na, wha te ruẹ e riẹ taure o te ti kpohọ oria ukpehru na nyae re emu. Ahwo na a rẹ re emu hu bẹsenọ ọ rẹ nyaze, keme ọye ọ rẹ lẹ fihọ emu idhe na. Nọ ọ tẹ nwane lẹ no, ahwo nọ a zizie a vẹ tẹ te re. Wha nya obọnana, wha te ruẹ e riẹ.” 14 Fikiere a tẹ nya kpohọ okpẹwho na. Nọ a be nya kẹle udevie okpẹwho na no, a tẹ ruẹ Samuẹle nọ ọ be nyabru ai ze re a kpohọ oria ukpehru na.

15 Evaọ ẹdẹ nọ ọ vrẹ taure Sọl ọ tẹ te nyaze, Jihova ọ ta kẹ* Samuẹle vẹre no nọ: 16 “Evaọ oke utiona odẹnotha, me ti vi ọzae jọ no ẹkwotọ Bẹnjamin bru owhẹ ze.+ Who re wholo iei re ọ jọ osu kẹ ahwo mẹ Izrẹl,+ yọ o re ti siwi ahwo mẹ no obọ ahwo Filistia. Keme mẹ ruẹ oja nọ ahwo mẹ a be re no, yọ edo oviẹ rai u do te omẹ oma no.”+ 17 Nọ Samuẹle ọ ruẹ Sọl, Jihova ọ tẹ ta kẹe nọ: “Ọzae na ọna, ọnọ mẹ ta kẹ owhẹ nọ, ‘Ọna họ ọnọ o ti su ahwo mẹ na.’”*+

18 Kẹsena Sọl ọ tẹ nyabru Samuẹle evaọ unuẹthẹ na, ọ tẹ ta kẹe nọ: “Ivie, vuẹ omẹ, diẹse uwou ọruẹ-ude na o rrọ?” 19 Samuẹle o te yo kẹ Sọl nọ: “Mẹ họ ọruẹ-ude na. Nyaruọ aro mẹ re ma kpobọ oria ukpehru na, who ti lele omẹ re emu nẹnẹ na.+ Me ti siobọno owhẹ kpo evaọ ohiohiẹ, yọ mẹ te vuẹ owhẹ oware kpobi nọ whọ gwọlọ riẹ.* 20 Who du ruawa kpahe eketekete nọ i vru edẹ esa nọ e vrẹ na ha,+ keme a ruẹ e rai no. Kọ ono o wo eware eghaghae Izrẹl kpobi? Kọ ogbẹrọnọ owhẹ avọ uwou ọsẹ ra soso?”+ 21 Fiki onana, Sọl ọ tẹ kẹ uyo nọ: “Kọ ogbẹrọnọ orua Bẹnjamin nọ o mae kawo evaọ Izrẹl me no ze,+ yọ unuwou mẹ họ onọ a mai rri nọ u fioka ha evaọ inuwou orua Bẹnjamin kpobi? Kọ fikieme whọ be rọ ta ẹme otiọna kẹ omẹ?”

22 Samuẹle ọ tẹ rehọ Sọl avọ odibo riẹ ziọ ubruwou emuọriọ na, ọ tẹ kẹ ae oria nọ o mae viodẹ evaọ udevie ahwo nọ a zizie na; enwenọ ezae ọgba e jariẹ. 23 Samuẹle ọ tẹ ta kẹ othere-emu na nọ: “Rehọ ẹkẹ arao nọ mẹ rọ kẹ owhẹ na ze, onọ mẹ ta kẹ owhẹ nọ who fihọ akotọ na.” 24 Othere-emu na ọ tẹ wọ owọ na ze, ọ tẹ wọe fihọ aro Sọl. Samuẹle ọ tẹ ta nọ: “Arao nọ ma fihọ obei fiki ra a wọ fihọ aro ra na. Re, keme whẹ a se riẹ ba kẹ fiki ẹkeria nana. Keme mẹ ta kẹ ae nọ, ‘Me zizie erara jọ.’” Fikiere Sọl o te lele Samuẹle re emu evaọ ẹdẹ yena. 25 Kẹsena a te no oria ukpehru na+ kpobọ okpẹwho na, o te gbe je lele Sọl ta ẹme evaọ obọ ehru uwou riẹ. 26 A tẹ kpama evaọ irioke, nọ oke o ke no, Samuẹle ọ tẹ kpaunu se Sọl evaọ ehru uwou na nọ: “Ruẹrẹ oma kpahe re me ti siobọno owhẹ kpo.” Fikiere Sọl ọ tẹ ruẹrẹ oma kpahe, tei te Samuẹle a tẹ ruọ otafe. 27 Nọ a jẹ nya rri obotọ kpohọ ughe okpẹwho na, Samuẹle ọ tẹ ta kẹ Sọl nọ: “Ta kẹ odibo na+ re ọ nya kpobọ aro siọ omai ba,” ọ tẹ nya kpobọ aro. “Rekọ whẹ omara, dikihẹ omojọ, re mẹ ruẹsi ru owhẹ yo ẹme Ọghẹnẹ.”

10 Samuẹle ọ tẹ rehọ ukoko ewhri na, o te ku ei họ Sọl uzou.+ Ọ tẹ viọlọ Sọl jẹ ta nọ: “Jihova o wholo owhẹ no re whọ jọ osu+ kẹ ukuoriọ riẹ.+ 2 Nọ who ti kpo siọ omẹ ba nẹnẹ na, whọ te ruẹ ezae ivẹ jọ nọ i dikihẹ kẹle uki Reshẹl+ evaọ ẹwho Zẹlza nọ o rrọ ẹkwotọ Bẹnjamin, a te ta kẹ owhẹ nọ, ‘A ruẹ eketekete nọ whọ nyae gwọlọ na no, yọ ọsẹ ra ọ kpairoro vrẹ ẹme eketekete na no dede,+ rekọ owhẹ ọ be ruawa riẹ. Ọ be ta nọ: “Kọ ẹvẹ me ti ru enẹna nọ ọmọzae mẹ o ri zihe ze he na?”’ 3 Who ve no etẹe nyavrẹ bẹsenọ who re te oria nọ ure ulogbo o rrọ evaọ Tebọ, whọ te jọ etẹe zere ezae esa nọ e be nyae gọ Ọghẹnẹ uzẹme na evaọ obọ Bẹtẹl,+ ọjọ ọ wọ emọ ewe esa, ọfa ọ wha ikulu ebrẹdi esa, ọdekọ ọ tẹ wọ akana udi ologbo. 4 A te nọ epanọ eware e rrọ kẹ owhẹ, a vẹ te kẹ owhẹ ikulu ebrẹdi ivẹ, yọ who re mi ae ebrẹdi na. 5 U te no ere no, whọ te nyate ukpehru Ọghẹnẹ uzẹme na, oria nọ utu isoja ahwo Filistia o rrọ. Nọ whọ tẹ ruọ okpẹwho na, whọ te nyaku utu eruẹaro jọ nọ i bi no oria ukpehru na ze, a te jọ obaro rai kporo akpata-ifi gbe ojẹjẹ gbe urete gbe akpata, yọ a be ruẹaro. 6 Ẹzi Jihova ọ te kẹ owhẹ ogaga,+ who ve ti kuomagbe ae ruẹaro, o vẹ te jọ wọhọ ẹsenọ who nwene zihe ruọ omọfa no.+ 7 Nọ eware oka nana e tẹ via no, ru oware kpobi nọ whọ rẹ sai ru keme Ọghẹnẹ uzẹme na ọ rrọ kugbe owhẹ. 8 Kẹsena whọ vẹ kake rọ omẹ nya kpobọ Gilgal,+ mẹ te nyabru owhẹ ziọ obei ti dhe idhe emahọ gbe idhe ọriẹyeri. Whọ rẹ hẹrẹ edẹ ihrẹ bẹsenọ mẹ rẹ nyabru owhẹ ze. Mẹ vẹ te vuẹ owhẹ oware nọ who re ru.”

9 Nọ Sọl ọ nwani kuomarẹriẹ re ọ nyasiọ Samuẹle ba, Ọghẹnẹ o te mu udu riẹ họ enwene, yọ eware oka nana kpobi e via evaọ ẹdẹ yena. 10 A tẹ nya no etẹe kpobọ ukpehru na, utu eruẹaro jọ a te zere iei. Ẹsiẹvo na, ẹzi Ọghẹnẹ ọ tẹ kẹe ogaga,+ o te kuomagbe ae mu aro họ ẹruẹ.+ 11 Nọ ahwo kpobi nọ a riẹ riẹ vẹre a ruẹ nọ o kuomagbe eruẹaro na be ruẹaro, a tẹ be ta kẹ ohwohwo nọ: “Eme ọ be via kẹ ọmọzae Kish na? Kọ Sọl ọ rrọ usu eruẹaro na re?” 12 Ọzae jọ nọ ọ rrọ etẹe ọ tẹ ta nọ: “Kọ amono họ esẹ eruẹaro nana?” Fikiere u te zihe ruọ odẹme* inọ: “Kọ Sọl ọ rrọ usu eruẹaro na re?”+

13 Nọ ọ ruẹaro kuhọ no, ọ tẹ nyaziọ oria ukpehru na. 14 Oniọvo ọsẹ Sọl ọ tẹ nọe avọ odibo riẹ nọ: “Bovẹ wha nya?” Sọl ọ tẹ kẹ uyo nọ: “Ma nyae gwọlọ eketekete na,+ rekọ nọ ma ruẹ e rai hi, ma tẹ nyabru Samuẹle.” 15 Oniọvo ọsẹ Sọl ọ tẹ nọe nọ: “Ivie vuẹ omẹ, eme Samuẹle ọ ta kẹ owhẹ?” 16 Sọl ọ tẹ vuẹ oniọvo ọsẹ riẹ nọ: “Ọ vuẹ omai nọ a ruẹ eketekete na no.” Rekọ Sọl ọ vuẹ riẹ kpahe ẹme ovie nọ Samuẹle ọ ta kẹe na ha.

17 Samuẹle o te se ahwo na kokohọ bru Jihova evaọ Mizpa,+ 18 ọ tẹ ta kẹ ahwo Izrẹl na nọ: “Enẹ Jihova Ọghẹnẹ Izrẹl ọ ta: ‘Mẹ họ ọnọ ọ rehọ Izrẹl no Ijipti ze je siwi owhai no obọ ahwo Ijipti+ je no obọ ekwotọ-ivie kpobi nọ i je kienyẹ owhai. 19 Rekọ nẹnẹ na, wha siọ Ọghẹnẹ rai no,+ ọnọ ọ jọ Osiwi nọ o siwi owhai no ebẹbẹ gbe eware nọ e jẹ kẹ owhai idhọvẹ kpobi, wha tẹ ta nọ: “Ma rọwo ho, rehọ ovie mu nọ o re su omai.” Obọnana wha dikihẹ ọvuọ orua gbe unuwou riẹ evaọ aro Jihova.’”

20 Fikiere Samuẹle ọ tẹ ta kẹ erua Izrẹl na kpobi nọ a nya lahwe unọjọ utọjọ,+ a tẹ salọ orua Bẹnjamin.+ 21 Kẹsena ọ tẹ ta kẹ inuwou orua Bẹnjamin inọ a nya lahwe unọjọ utọjọ, a tẹ salọ unuwou Mata. Ukuhọ riẹ a tẹ salọ Sọl ọmọzae Kish.+ Rekọ nọ a nyae gwọlọ iẹe, a jọ oria ovo ruẹ e riẹ hẹ. 22 Fikiere a tẹ nekpẹ mi Jihova nọ:+ “Kọ ọzae na ọ nyaze obonẹ no?” Jihova ọ tẹ kẹ uyo nọ: “O dhere udevie ewha na evaọ etẹe.” 23 A tẹ dhẹ nyae rehọ iẹe no etẹe ze. Nọ o dikihẹ udevie ahwo na, o theri vi ahwo na kpobi, ohwo ọvo ọ vrẹ ẹkoko riẹ hẹ.+ 24 Samuẹle ọ tẹ ta kẹ ahwo na kpobi nọ: “Kọ wha ruẹ ọnọ Jihova ọ salọ,+ inọ ohwo ọvo nọ ọ wọhọ e riẹ evaọ udevie ahwo na kpobi ọ rrọ họ?” Ahwo na kpobi a te muhọ ebo nọ: “Jọ ovie na ọ rria tọ!”

25 Samuẹle ọ tẹ vuẹ ahwo na eware nọ ivie nọ i ti su ai e te gwọlọ mi ai,+ o te kere ai fihọ obe, o te fi ei họ aro Jihova. Kẹsena Samuẹle ọ tẹ ta kẹ ahwo na kpobi inọ a kpohọ ọvuọ uwou riẹ. 26 Sọl o te kpobọ uwou riẹ re evaọ Gibiah, avọ egbaẹmo nọ Jihova o dhobọte udu nọ i lele i rie. 27 Rekọ ezae jọ nọ i fioka ha e tẹ ta nọ: “Kọ ẹvẹ ọnana ọ te sai ro siwi omai?”+ Fikiere a tẹ jẹe kufiẹ, a gbẹ rehọ uvumọ okẹ sei hi.+ Rekọ ọ ta ẹme ọvo kpahe iẹe he.*

11 Kẹsena Nehash ohwo Ammọn ọ tẹ wọ ze,+ ọ tẹ fa evuẹ fihọ Jebẹsh+ nọ ọ rrọ Giliad re ọ họre ae. Ahwo Jebẹsh kpobi a tẹ ta kẹ Nehash nọ: “Re ọvọ* kugbe omai, ma te gbodibo kẹ owhẹ.” 2 Nehash ohwo Ammọn na ọ tẹ ta kẹ ae nọ: “Mẹ te re ọvọ kugbe owhai nọ wha te ru oware nana: whai kpobi wha re vre ubiẹro obọze rai no. Me ti ru onana ro kpomovuọ họ Izrẹl soso oma.” 3 Ekpako Jebẹsh a tẹ kpahe kẹe nọ: “Kẹ omai edẹ ihrẹ re ma vi enyukọ kpohọ ẹkwotọ Izrẹl soso. Otẹrọnọ ohwo ọvo ọ gbẹ sai siwi omai hi, ma te rọ omamai kẹ owhẹ.” 4 Kẹsena enyukọ na e tẹ ziọ Gibiah+ ẹwho Sọl, a tẹ ta eme nana kẹ ahwo na, ahwo na kpobi a tẹ jẹ viẹ gaga.

5 Rekọ evaọ oke yena Sọl ọ jọ emu owa erao na bi su ai no obọ ẹwọ ze, ọ tẹ nọ nọ: “Eme ọ via kẹ ahwo na? Fikieme a be rọ viẹ?” A tẹ vuẹe eme nọ ahwo Jebẹsh a ta. 6 Ẹzi Ọghẹnẹ ọ tẹ kẹ Sọl ogaga+ nọ o yo eme nana, ofu o te mu ei gaga. 7 Fikiere ọ tẹ rehọ iruẹ ivẹ ọ tẹ va ae ekekẹ, ọ tẹ rehọ ae kẹ enyukọ na inọ a vi ai kpohọ ẹkwotọ Izrẹl soso, yọ a jẹ ta nọ: “Ohwo kpobi nọ o lele Sọl avọ Samuẹle he, enẹ a ti ru iruẹ riẹ!” Jihova o te ru ozọ ruọ ahwo na oma, a tẹ rọ eva evo wọ lahwe.* 8 Kẹsena o te kele ai evaọ Bizẹk, ahwo Izrẹl a bu te idu egba esa (300,000), ahwo Juda kọ idu ọgba (30,000). 9 A tẹ ta kẹ enyukọ na nọ: “Enẹ wha rẹ ta kẹ ahwo Jebẹsh nọ ọ rrọ Giliad, ‘Ma ti siwi owhai odẹnotha nọ ọre o te te uzou no.’” Enyukọ na e tẹ nyae vuẹ ahwo Jebẹsh, a tẹ jẹ ghọghọ gaga. 10 Ahwo Jebẹsh a tẹ ta nọ: “Odẹnotha ma te rọ omamai kẹ owhai, wha ve ru omai oware kpobi nọ u kiehọ owhai oma.”+

11 Evaọ okiokiọ riẹ, Sọl ọ tẹ ghale ahwo na fihọ itu esa, a tẹ rọ oghẹrẹ jọ ruọ udevie evuẹ na evaọ irioke ilogbo,* a te kpe ahwo Ammọn na+ bẹsenọ ọre o ro te uzou. Ahwo nọ a zọ a tẹ vahabọ, tube te epanọ imava dede e gbẹ rọ jọ kugbe he. 12 Kẹsena ahwo na a tẹ ta kẹ Samuẹle nọ: “Amono a jẹ ta nọ, ‘Kọ Sọl ọ rẹ jọ ovie mai?’+ Rehọ ezae na ze re ma kpe ai no.” 13 Rekọ Sọl ọ tẹ ta nọ: “A re kpe uvumọ ohwo evaọ ẹdẹ inẹnẹ na ha,+ keme Jihova o siwi Izrẹl no nẹnẹ na.”

14 Uwhremu na, Samuẹle ọ tẹ ta kẹ ahwo na nọ: “Wha nyaze re ma kpobọ Gilgal,+ re ma wariẹ whowho nọ a rehọ Sọl mu ovie no.”+ 15 Fikiere ahwo na kpobi a te kpobọ Gilgal, a tẹ jọ aro Jihova rọ Sọl mu ovie evaọ Gilgal. Kẹsena a tẹ jọ etẹe dhe idhe ọriẹyeri evaọ aro Jihova,+ Sọl avọ ahwo Izrẹl kpobi a te ru ehaa yọ a be ghọghọ gaga.+

12 Ukuhọ riẹ Samuẹle ọ tẹ ta kẹ ahwo Izrẹl kpobi nọ: “Me ru* oware kpobi nọ wha ta nọ me ru no, mẹ rehọ ovie mu kẹ owhai no.+ 2 Whaọ, ovie nọ o bi su owhai ọna!*+ Rọkẹ omẹ, mẹ who jẹ dhẹ eza no, yọ emezae mẹ e rrọ etenẹ kugbe owhai.+ No anwọ oke uzoge mẹ ze me bi ro su owhai rite inẹnẹ na.+ 3 Mẹ na. Wha se isẹri kpe omẹ evaọ aro Jihova gbe ọnọ o wholo na:+ Eruẹ ono hayo eketekete ono mẹ rehọ no?+ Hayo kọ ono me fi iwhayo hayo kienyẹ no? Ono mẹ jọ obọ riẹ re udi no* re mẹ vẹ ẹdhọ tu?+ Otẹrọnọ me ru ere, me ti zihe iei kẹ owhai.”+ 4 A tẹ za kẹe nọ: “Who ri fi omai iwhayo ho hayo kienyẹ omai hi, yọ whọ re jọ obọ ohwo ọvo mi oware ovo ho.” 5 Fikiere ọ tẹ ta kẹ ae nọ: “Jihova o ti se isẹri kpe owhai, yọ ọnọ o wholo na ọ rrọ osẹri nẹnẹ na re inọ wha ruẹ oware ovo nọ wha sai ro kru omẹ hẹ.”* A tẹ ta nọ: “Ọye họ osẹri.”

6 Fikiere Samuẹle ọ tẹ ta kẹ ahwo na nọ: “Jihova nọ ọ rehọ Mosis avọ Erọn si esẹ-esẹ rai no ẹkwotọ Ijipti ze na+ họ osẹri. 7 Enẹna, wha dikihẹ ọvuọ oria riẹ, me ve ti gu owhai ẹdhọ evaọ aro Jihova fiki iruẹru ikiẹrẹe kpobi nọ Jihova o ru kẹ owhai gbe esẹ-esẹ rai no.

8 “Nọ Jekọp ọ nwani kpohọ Ijipti no,+ nọ esẹ-esẹ rai a je mu Jihova họ ebo se kẹ obufihọ,+ Jihova o te vi Mosis+ avọ Erọn re a su esẹ-esẹ rai no Ijipti, o te ru ai re a rria ẹkwotọ nana.+ 9 Rekọ Jihova Ọghẹnẹ rai ọ tẹ thọrọ ae ẹro, o te siobọno ai+ kẹ Sisera,+ oletu ogbaẹmo Hezọ, o te je siobọno ai kẹ ahwo Filistia+ gbe ovie Moab,+ a tẹ jẹ họre Izrẹl. 10 A te bo se Jihova kẹ obufihọ+ inọ: ‘Ma raha uzi no,+ keme ma nyasiọ Jihova ba no be gọ edhọ Bale+ gbe emema Ashtorẹt;+ fikiere siwi omai no obọ ewegrẹ mai re ma ruẹse gọ owhẹ.’ 11 Kẹsena Jihova o te vi Jerubale,+ Bidan, Jẹfta,+ gbe Samuẹle,+ o te siwi owhai no obọ ewegrẹ nọ e wariẹ owhai họ kpobi re wha sai wo omofọwẹ.+ 12 Nọ wha ruẹ nọ Nehash,+ ovie ahwo Ammọn ọ wọ ẹmo bru owhai ze, wha tẹ jẹ ta kẹ omẹ nọ, ‘Ma rọwo ho, ma gba riẹ mu nọ ma re wo ovie nọ o re su omai!’+ dede nọ Jihova Ọghẹnẹ rai họ Ovie rai.+ 13 Whaọ ovie nọ wha salọ ọna, ọnọ wha yare na. Rri! Jihova ọ rehọ ovie mu kẹ owhai no.+ 14 Otẹrọnọ wha be dhozọ Jihova+ jẹ be gọe,+ je bi yoẹme kẹ urru riẹ,+ nọ wha gbẹ wọso izi Jihova ha, whai avọ ovie nọ o bi su owhai wha je bi lele Jihova Ọghẹnẹ rai, kiyọ u woma. 15 Rekọ otẹrọnọ wha yoẹme kẹ urru Jihova ha, wha jẹ wọso uzi Jihova, obọ Jihova o te rọsuọ owhai avọ esẹ rai.+ 16 Wha dikihẹ oria ovo obọnana re wha ruẹ oware ulogbo nana nọ Jihova o ti ru evaọ iraro rai na. 17 Kọ inẹnẹ na ọ gbẹ rrọ ẹdẹ nọ a re bru iwhiti? Me ti bo se Jihova re o ru egbrara va je ru oso rrọ; wha vẹ te riẹ je vuhumu inọ umuomu wha ru evaọ aro Jihova nọ wha rọ yare ovie kẹ omarai.”+

18 Fikiere Samuẹle o te bo se Jihova, Jihova o te ru egbrara va je ru oso rrọ evaọ ẹdẹ yena, o tẹ lẹliẹ ozọ Jihova avọ Samuẹle mu ahwo na kpobi gaga. 19 Ahwo na kpobi a tẹ ta kẹ Samuẹle nọ: “Lẹ se Jihova Ọghẹnẹ ra kẹ omai idibo ra,+ ma gwọlọ whu hu, keme ma fi umuomu ofa ba izieraha ibuobu mai no nọ ma rọ yare ovie kẹ omamai.”

20 Samuẹle ọ tẹ ta kẹ ahwo na nọ: “Jọ ozọ u mu owhai hi. Eware imuomu wha gine ru na. Rekọ wha thakpi kuomarẹriẹ siọ Jihova ba elele he,+ wha rehọ udu rai kpobi gọ Jihova.+ 21 Wha du kurẹriẹ bru eware ifofe he,+ enọ i wo erere ọvo ho,+ yọ e rẹ sai siwi hi, keme ifofe e rrọ. 22 Jihova o ti gbabọkẹ ahwo riẹ hẹ+ fiki odẹ ulogbo riẹ,+ keme iroro obọ Jihova o ro ru owhai họ ahwo riẹ.+ 23 Rọkẹ omẹ, o rrọ oware nọ me re roro kpahe vievie he re mẹ siọ owhai ba ẹlẹ kẹ, keme me te ru ere yọ mẹ thọ uzi Jihova no. Yọ mẹ te gbẹ hai wuhrẹ owhai edhere nọ o woma je kiehọ. 24 Wha thakpe dhozọ Jihova+ jẹ rehọ udu rai kpobi gọe avọ ọtẹruo,* wha kareghẹhọ eware ilogbo nọ o ru kẹ owhai no.+ 25 Rekọ wha te keke aro fihọ ru oware uyoma, o ti hwere owhai kufiẹ,+ te owhai te ovie rai.”+

13 Ikpe . . .* Sọl ọ jọ nọ o zihe ruọ ovie,+ yọ ikpe ivẹ o su Izrẹl. 2 Sọl ọ salọ ezae idu esa (3,000) evaọ Izrẹl; ezae idu ivẹ (2,000) evaọ usu rai e jọ kugbe Sọl evaọ Mikmash gbe evaọ ubrotọ igbehru Bẹtẹl, ezae odu ọvo (1,000) e tẹ jọ kugbe Jonatan+ evaọ Gibiah+ ọrọ Bẹnjamin. O te vi ahwo nọ a kiọkọ kpohọ ọvuọ uwou-udhu riẹ. 3 Kẹsena Jonatan o te kpe utu isoja ahwo Filistia+ nọ e jọ Giba,+ ahwo Filistia a te yo kpahe iẹe. Sọl ọ tẹ ta nọ a kporo onware+ nya ẹkwotọ na soso duwu, yọ a be ta nọ: “Jọ ahwo Hibru a yo!” 4 Ahwo Izrẹl kpobi a te yo usi na inọ: “Sọl o kpe utu isoja ahwo Filistia jọ no, enẹna ahwo Izrẹl a bi tu ahwo Filistia oma.” Fikiere a te se ahwo na kokohọ re a nyabru Sọl evaọ Gilgal.+

5 Ahwo Filistia omarai a te kokohọ re a họre ahwo Izrẹl, a wo ekẹkẹ ẹmo idu ọgba (30,000) avọ edhẹ-enyenya idu ezeza (6,000) gbe egbaẹmo nọ e rrọ buobu gbidi gbidi wọhọ uwẹkpẹ nọ o rrọ akotọ abade;+ a tẹ wọ nya, a tẹ fa evuẹ fihọ Mikmash evaọ ofẹ ovatha-ọre Bẹt-evẹn.+ 6 Ahwo Izrẹl a tẹ ruẹ nọ uye u te rai oma no, keme ahwo Filistia a keke rai ba; fikiere ahwo na a te dhere ighogho-itho,+ ighogho, igbehru-itho, eria nọ i siomano evaọ iwou, gbe egọdọ-ame.* 7 Ahwo Hibru na jọ dede a fa Jọdan na vrẹ kpohọ ẹkwotọ Gad avọ Giliad.+ Rekọ Sọl ọ gbẹ jọ Gilgal, yọ ahwo kpobi nọ a je lele iei a bi nuhu. 8 Ọ tẹ hẹrẹ edẹ ihrẹ bẹsenọ oke nọ Samuẹle o fihọ u ro te, rekọ Samuẹle ọ nyaze Gilgal he, yọ ahwo na a be vahabọ siọ iẹe ba no. 9 Ukuhọ riẹ Sọl ọ tẹ ta nọ: “Wha rehọ eware idhe emahọ gbe idhe ọriẹyeri na se omẹ.” O te dhe idhe emahọ na.+

10 Rekọ nọ ọ nwani dhe idhe emahọ na re no, Samuẹle ọ tẹ nyaze. Sọl ọ tẹ nyabru ei, o te yere iei. 11 Samuẹle ọ tẹ nọe nọ: “Kinọ eme who ru na?” Sọl ọ tẹ kẹ uyo nọ: “Ahwo na a jẹ nyasiọ omẹ ba,+ yọ whọ nyaze evaọ oke nọ ma fihọ họ, mẹ tẹ jẹ ruẹ nọ ahwo Filistia a bi kokohọ evaọ Mikmash.+ 12 Mẹ tẹ ta kẹ omamẹ nọ, ‘Whaọ ahwo Filistia na a te wọ bru omẹ ze evaọ Gilgal, yọ mẹ re yare aruoriwo Jihova ha.’ Me te rri nọ o gba omẹ họ re me dhe idhe emahọ na.”

13 Fikiere Samuẹle ọ tẹ ta kẹ Sọl nọ: “Oware ugheghẹ who ru na. Who koko ujaje nọ Jihova Ọghẹnẹ ra ọ kẹ owhẹ hẹ.+ O hae jọ nọ who koko iei, Jihova ọ hai ti ru uvie ra dikihẹ gaga evaọ Izrẹl bẹdẹ bẹdẹ. 14 Rekọ enẹna, uvie ra o te tọ họ.+ Jihova ọ te gwọlọ ọzae nọ o kiehọ udu riẹ,+ Jihova ọ vẹ te rehọ iẹe mu osu kẹ ahwo riẹ,+ keme who koko ujaje nọ Jihova ọ kẹ owhẹ hẹ.”+

15 Kẹsena Samuẹle ọ tẹ kpama, ọ tẹ nya no Gilgal kpobọ Gibiah ọrọ Bẹnjamin, Sọl o te kele ahwo na; enwenọ ezae egba ezeza (600) e gbẹ jọ kugbei.+ 16 Sọl avọ Jonatan ọmọzae riẹ, gbe ahwo nọ a gbẹ jọ kugbe ai a jẹ rria Giba+ ọrọ Bẹnjamin, yọ ahwo Filistia a fa evuẹ fihọ Mikmash.+ 17 Egbaẹmo nọ e jẹ hae wọ no evuẹ ahwo Filistia nyae vẹruọ ahwo na a jẹ hae ghale oma fihọ itu esa. Utu jọ o rẹ nya rri edhere nọ o kpobọ Ọfra, kpobọ ẹkwotọ Shual; 18 utu ofa o vẹ nya rri obọ edhere Bẹt-horọn;+ utu avọ esa u ve kpohọ edhere nọ a re ro kpohọ uwhru nọ o rẹriẹ ovao ku ukiekpotọ Zeboẹm, evaọ ofẹ udhude na.

19 Whaọ oke yena odhogu ọvuọvo ọ jọ ẹkwotọ Izrẹl soso ho, fikinọ ahwo Filistia na a ta nọ: “Re ahwo Hibru na a gbe duwu ọgbọdọ hayo ozuẹ hẹ.” 20 Fikiere ahwo Izrẹl kpobi a jẹ hae nya kpobọ ahwo Filistia nyae thọ ewhẹ, idiga, iwhe hayo ejale rai. 21 Pim* họ unuigho nọ a rẹ hwa nọ a tẹ thọ ẹwhẹ, idiga, ayọno nọ o wo egha esa, ewhe, hayo okenọ a tẹ ruẹrẹ ọkpọ ọsiọsiọle rai nọ a re ro su iruẹ. 22 Evaọ ẹdẹ ẹmo, uvumọ ohwo evaọ usu ahwo nọ a jọ kugbe Sọl avọ Jonatan o wo ọgbọdọ hayo ozuẹ hẹ;+ Sọl avọ Jonatan ọvo a wo ekwakwa ẹmo.

23 Whaọ utu isoja ahwo Filistia jọ u kpohọ edhere nọ a rẹ rọ fa ukiekpotọ Mikmash vrẹ no.+

14 Evaọ ẹdẹ jọ, Jonatan+ ọmọzae Sọl ọ tẹ ta kẹ odibo nọ ọ be wha ekwakwa ẹmo riẹ nọ: “Nyaze re ma fa vrẹ kpohọ obonọ iwou isoja ahwo Filistia e rrọ evaọ abọdekọ na.” Rekọ ọ vuẹ ọsẹ riẹ hẹ. 2 Whaọ Sọl ọ jọ obọ ughe Gibiah+ evaọ otọ ure pọmegranet nọ o jọ Migrọn, yọ enwenọ ezae egba ezeza (600) e jọ kugbei.+ 3 (Evaọ oke yena yọ Ahaejah ọmọzae Ahaetọb,+ oniọvo Ikabọd,+ ọmọzae Finihas,+ ọmọzae Ilai,+ nọ ọ jọ ozerẹ Jihova evaọ Shailo+ o je ku ẹfọd na họ.)+ Ahwo na a riẹ nọ Jonatan ọ nyavrẹ hẹ. 4 Whaọ evaọ tabọ tabọ idhere esese nọ Jonatan ọ jẹ gwọlọ rọ fa vrẹ kpohọ iwou isoja ahwo Filistia na, ugbehru-utho nọ o wọhọ ubiakọ o jọ abọjọ, ugbehru-utho nọ o wọhọ ubiakọ o tẹ jẹ jọ abọdekọ; odẹ ọjọ họ Bozẹz, odẹ ọdekọ kọ Sinẹ. 5 Ugbehru-utho na jọ o wọhọ ipila evaọ ofẹ ẹkpẹlobọ ovatha-ọre rẹriẹ ovao ku Mikmash, yọ ọdekọ ọ jọ obọze ovatha-ọre rẹriẹ ovao ku Giba.+

6 Jonatan ọ tẹ ta kẹ ọnọ ọ rẹ wha ekwakwa ẹmo riẹ nọ: “Nyaze re ma fa vrẹ kpohọ obonọ iwou isoja ahwo nana nọ a yawo ho na e rrọ na.+ Ẹsejọhọ Jihova o ti fiobọhọ kẹ omai, keme oware ovo o rẹ za Jihova dhe he nọ ọ tẹ gwọlọ rọ ahwo buobu hayo umutho ahwo siwi.”+ 7 Fikiere ọnọ ọ rẹ wha ekwakwa ẹmo riẹ na ọ tẹ ta kẹe nọ: “Ru oware kpobi nọ o rrọ owhẹ udu. Kpohọ oria kpobi nọ u je owhẹ, me ti lele owhẹ kpohọ oria kpobi nọ o rrọ owhẹ udu.” 8 Jonatan ọ tẹ ta nọ: “Ma te fa bru ezae yena, ma vẹ romavia kẹ ae. 9 Otẹrọnọ a ta kẹ omai nọ, ‘Wha dikihẹ oria ovo bẹsenọ ma rẹ nyabru owhai ze!’ ma ve dikihẹ oria nọ ma rrọ, ma te nyabru ai hi. 10 Rekọ a tẹ ta nọ, ‘Wha nyaze te họre omai!’ ma vẹ nyabru ai, keme Jihova ọ te rehọ ae họ obọ mai. Onana o te jọ oka kẹ omai.”+

11 Kẹsena aimava a tẹ romavia kẹ isoja ahwo Filistia na. Ahwo Filistia a tẹ ta nọ: “Wha rri! Ahwo Hibru na a bi no ighogho nọ a dhere ze.”+ 12 Fikiere egbaẹmo nọ e rrọ iwou isoja na e tẹ ta kẹ Jonatan avọ ọnọ ọ wha ekwakwa ẹmo riẹ na nọ: “Wha nyabru omai ze, ma ti dhesẹ oware kẹ owhai!”+ Jonatan ọ tẹ nwane ta kẹ ọnọ ọ rẹ wha ekwakwa ẹmo riẹ na nọ: “Lele omẹ, keme Jihova ọ te rehọ ae họ obọ Izrẹl.”+ 13 Jonatan ọ tẹ rehọ abọ gbe awọ gadiẹ kpohọ oria nọ a rrọ na, yọ ọnọ ọ rẹ wha ekwakwa ẹmo riẹ na ọ rrọ emu riẹ; Jonatan o te mu ahwo Filistia na họ ekpe, yọ ọnọ ọ rẹ wha ekwakwa ẹmo riẹ na ọ be jọ obemu riẹ kpe enọ i ri whu totọ họ. 14 Evaọ ohọre ọsosuọ nọ Jonatan avọ ọnọ ọ rẹ wha ekwakwa ẹmo riẹ a nyae họre na, a kpe enwenọ ezae udhe evaọ ẹmẹwẹ-otọ.*

15 Kẹsena ozọ ogaga o tẹ ruọ evuẹ na gbe ahwo kpobi nọ a rrọ iwou isoja na oma, ozọ u je tube mu itu isoja nọ e rẹ wọ nyae vẹruọ ahwo na dede.+ Otọ na u te muhọ enuhu, Ọghẹnẹ ọ tẹ whẹ ozọ ogaga họ ae oma. 16 Iroroke Sọl nọ e jọ Gibiah+ ọrọ Bẹnjamin e tẹ ruẹ nọ ozighi na ọ be vaha ruọ oria kpobi.+

17 Sọl ọ tẹ ta kẹ ahwo nọ a rrọ kugbei nọ: “Ivie wha kele ahwo na, re ma riẹ ohwo nọ ọ nyasiọ omai ba.” Nọ a kele ahwo na, a tẹ ruẹ nọ Jonatan avọ ọnọ ọ rẹ wha ekwakwa ẹmo riẹ a rrọ etẹe he. 18 Sọl ọ tẹ ta kẹ Ahaejah nọ:+ “Wọ etehe ọvọ Ọghẹnẹ uzẹme na ze!” (Keme etehe ọvọ Ọghẹnẹ uzẹme na o jọ kugbe ahwo Izrẹl na evaọ oke yena.*) 19 Epanọ Sọl ọ jẹ rọ ta ẹme kẹ ozerẹ na, yọ ozighi nọ ọ jọ evuẹ ahwo Filistia na o bi dhe ẹgẹga. Sọl ọ tẹ ta kẹ ozerẹ na nọ: “Siọ oware nọ who bi ru ba.”* 20 Fikiere Sọl avọ ahwo nọ a rrọ kugbei kpobi a te kokohọ, a te kpohọ ẹmo na, a tẹ ruẹ nọ ahwo Filistia na a be rọ egbọdọ obọrai kpe omoma rai, yọ ozighi na ọ ga thesiwa. 21 Ofariẹ, ahwo Hibru nọ a jọ abọ ahwo Filistia nọ i lele i rai ziọ evuẹ na a tẹ be ziọ abọ ahwo Izrẹl nọ a jọ otọ Sọl avọ Jonatan. 22 Ezae Izrẹl kpobi nọ i dhere vẹre+ evaọ ubrotọ igbehru Ifremu a te yo nọ ahwo Filistia a be dhẹ, ai omarai a te kuomagbe ẹmo na bi le ahwo Filistia na. 23 Ere Jihova o ro siwi Izrẹl evaọ ẹdẹ yena,+ a fi ẹmo na thabọ te ugbo obọ Bẹt-evẹn.+

24 Rekọ oma o lọhọ ahwo Izrẹl na gaga evaọ ẹdẹ yena, keme Sọl o duwu iyei kẹ ahwo na nọ: “Uye u re te ohwo nọ ọ re emu* taure owọwọ u te ti te gbe bẹsenọ me re ru ewegrẹ mẹ kele no!” Fikiere ahwo na ọvuọvo ọ re emu hu.+

25 Ahwo* na kpobi a tẹ ruọ evaọ owhawho na, yọ ọnyọ ọ jọ otọ na. 26 Nọ ahwo na a ruọ owhawho na, a tẹ ruẹ nọ ọnyọ o bi su fihọ otọ, rekọ ohwo ọvo ọ jẹ rọ obọ te unu hu, keme ozọ iyei nọ a duwu na u je mu ai. 27 Rekọ Jonatan o ri yo nọ ọsẹ riẹ o duwu iyei kẹ ahwo na ha,+ fikiere ọ tẹ rriẹ ọkpọ nọ ọ jariẹ obọ, o te du rie họ othuzou-ọnyọ na. Nọ ọ rehọ ọnyọ na te unu, ibiaro riẹ i te bi lo. 28 Fikiere omọvo ahwo na jọ ọ tẹ ta nọ: “Binọ ọsẹ ra o duwu ahwo na iyei egaga, inọ: ‘Uye u re te ohwo nọ ọ re emu nẹnẹ na!’+ Oyejabọ nọ oma o rọ lọhọ ahwo na kpobi no na.” 29 Rekọ Jonatan ọ tẹ ta nọ: “Ọsẹ mẹ ọ wha uye* ulogbo ziọ otọ na no. Rri epanọ ibiaro mẹ i bi lo fiki ọmọnyọ nana nọ me ro te unu. 30 O hẹ mai woma o hae jọ nọ a kẹ ahwo na uvẹ re a jọ eware ewegrẹ rai nọ a kwa na re epanọ u je rai!+ A hai ti kpe ahwo Filistia bu vi epanọ a kpe na.”

31 Evaọ ẹdẹ yena, a te gbe je kpe ahwo Filistia na no Mikmash rite Aijalọn,+ oma o tẹ lọhọ ahwo na gaga no. 32 Fikiere ahwo na a te mu egbo-ẹmo na họ eviri, a tẹ rehọ igodẹ, iruẹ, gbe emọ-iruẹ, a tẹ va ae fihọ otọ, a te mu erao na họ ẹre avọ azẹ.+ 33 Fikiere a tẹ vuẹ Sọl inọ: “Rri! Ahwo na a be raha uzi Jihova, a be re erao avọ azẹ.”+ Sọl ọ tẹ ta nọ: “Wha ghẹmeeyo no! Wha ghelie utho ulogbo se omẹ vẹrẹ vẹrẹ.” 34 Sọl ọ tẹ ta nọ: “Wha nyaruọ udevie ahwo na re wha ta kẹ ae nọ, ‘Jọ ohwo kpobi ọ rehọ eruẹ riẹ avọ ogodẹ riẹ ze re ọ jọ etenẹ kpe ai, wha vẹ tẹ re ae. Wha du raha uzi Jihova ẹkwoma erao nọ wha rẹ re avọ azẹ hẹ.’”+ Fikiere omomọvo ọ tẹ rehọ eruẹ riẹ ze evaọ aso yena jẹ jọ etẹe kpei. 35 Sọl ọ tẹ bọ agbada-idhe kẹ Jihova.+ Yọ ọnana họ agbada-idhe ọsosuọ nọ ọ bọ kẹ Jihova.

36 Uwhremu na Sọl ọ tẹ ta nọ: “Joma nyae họre ahwo Filistia na evaọ aso re ma jẹ kwa eware rai rite ohiohiẹ. Ma te siọ ohwo ọvo ba uzuazọ họ.” Ahwo na a tẹ ta nọ: “Ru oware kpobi nọ u kiehọ evaọ aro ra.” Kẹsena ozerẹ na ọ tẹ ta nọ: “Joma nekpẹ mi Ọghẹnẹ uzẹme na evaọ etenẹ.”+ 37 Sọl ọ tẹ nekpẹ mi Ọghẹnẹ nọ: “Kọ mẹ wọ bru ahwo Filistia na?+ Kọ whọ te rehọ ae họ obọ ahwo Izrẹl?” Rekọ Ọghẹnẹ ọ kẹ riẹ uyo ẹdẹ yena ha. 38 Fikiere Sọl ọ tẹ ta nọ: “Wha nyaze etenẹ, whai iletu ahwo na kpobi, wha kiẹ otọ re ma riẹ uzi nọ ma raha nẹnẹ na. 39 Keme nọ Jihova ọ rrọ uzuazọ na, ọnọ o siwi Izrẹl na, ohwo nọ ọ raha uzi na o ti whu hrọ, o tẹ make rrọ Jonatan ọmọzae mẹ dede.” Rekọ ohwo ọvo ọ kpọ riẹ unu hu. 40 Kẹsena ọ tẹ ta kẹ Izrẹl soso nọ: “Wha te jọ abọ ọvo, mẹ avọ Jonatan ọmọzae mẹ ma vẹ jọ abọdekọ.” Ahwo na a tẹ kpahe kẹ Sọl nọ: “Ru oware kpobi nọ u kiehọ evaọ aro ra.”

41 Kẹsena Sọl ọ tẹ ta kẹ Jihova nọ: “O Ọghẹnẹ Izrẹl, rehọ Tumim na kẹ omai uyo!”+ Tumim na u te mu Jonatan avọ Sọl, obọ u gbe te ahwo na ha. 42 Sọl ọ tẹ ta nọ: “Wha ma ẹta+ re ma riẹ sọ omẹ hayo Jonatan ọmọzae mẹ o ru oware na.” Ẹta na o te mu Jonatan. 43 Sọl ọ tẹ ta kẹ Jonatan nọ: “Ta kẹ omẹ, eme who ru?” Jonatan ọ tẹ ta kẹe nọ: “Ọmọnyọ nọ ọ jọ ẹroro ọkpọ nọ ọ jọ omẹ obọ me dhe te unu.+ Mẹ na! Wha kpe omẹ no!”

44 Fikiere Sọl ọ tẹ ta nọ: “Jọ Ọghẹnẹ ọ kẹ omẹ uye je fibae* otẹrọnọ who gbe whu nẹnẹ na ha, Jonatan.”+ 45 Rekọ ahwo na a tẹ ta kẹ Sọl nọ: “Kọ u fo re Jonatan o whu—ọnọ ọ wha obokparọ* ulogbo nana+ se Izrẹl na? Yọ oware nọ a re roro kpahe vievie he! Nọ Jihova ọ rrọ uzuazọ na, makọ ubioto ovo riẹ dede u re kie te otọ họ, keme Ọghẹnẹ họ ọnọ o fiobọhọ kẹe ru oware nọ o ru nẹnẹ na.”+ Ere ahwo na a ro siwi* Jonatan, a gbe kpei hi.

46 Sọl ọ tẹ siọ ahwo Filistia na ba ele, ahwo Filistia na a te kpobọ ẹkwotọ rai.

47 Sọl o te ru uvie riẹ dikihẹ gaga evaọ Izrẹl, ọ tẹ jẹ họre ewegrẹ riẹ kpobi evaọ ofẹ kpobi, ọ họre ahwo Moab,+ ahwo Ammọn,+ ahwo Edọm,+ ivie Zoba,+ gbe ahwo Filistia;+ yọ o je fi ahwo kpobi nọ ọ wọ ẹmo bru kparobọ. 48 Ọ họre ahwo Amalẹk ududu,+ o te fi ai kparobọ je siwi ahwo Izrẹl no obọ ahwo nọ a je tho eware rai.

49 Odẹ emezae Sọl họ Jonatan, Ishvae, gbe Malkae-shua.+ O yẹ emetẹ ivẹ; odẹ ọrọ ọkpako họ Mirab,+ odẹ ọrọ ọmaha kọ Maekal.+ 50 Odẹ aye Sọl họ Ahinoam ọmọtẹ Ahimehaz. Odẹ oletu ogbaẹmo riẹ họ Abna+ ọmọzae Nẹr, oniọvo-ọsẹ Sọl. 51 Kish+ họ ọsẹ Sọl, Nẹr+ ọsẹ Abna yọ ọmọzae Abayẹl.

52 Sọl o lele ahwo Filistia fi ẹmo gaga evaọ oke uzuazọ riẹ kpobi.+ Nọ Sọl ọ tẹ ruẹ ọzae nọ ọ goma hayo gudu, ọ vẹ rehọ iẹe fihọ usu egbaẹmo riẹ.+

15 Kẹsena Samuẹle ọ tẹ ta kẹ Sọl nọ: “Jihova họ ọnọ o vi omẹ inọ me wholo owhẹ re whọ jọ ovie kẹ ahwo riẹ Izrẹl;+ enẹna gaviezọ kẹ ẹme nọ Jihova ọ gwọlọ ta.+ 2 Enẹ Jihova olori egbaẹmo ọ ta: ‘Me ti ru ahwo Amalẹk kele fiki oware nọ a ru ahwo Izrẹl nọ a rọ wọso ai evaọ edhere okenọ a je no Ijipti ze.+ 3 Enẹna, nya re who kpe ahwo Amalẹk na no,+ re whọ jẹ raha ae+ avọ eware kpobi nọ a wo muotọ. Whọ rẹ siọ oware ovo ba uzuazọ họ;* who re kpe aikpobi no,+ te ọzae te aye, te ọmaha te ọmọboba, te eruẹ te ogodẹ, te ekamẹle te eketekete.’”+ 4 Sọl o te koko ahwo na kpobi họ je kele ai evaọ Teleyẹm: Isoja owotọ idu egba ivẹ (200,000) e jariẹ gbe ezae Juda nọ i bu te idu ikpe (10,000).+

5 Sọl ọ tẹ nyate ugbo obọ okpẹwho Amalẹk, a te dhere ukiekpotọ* na. 6 Sọl ọ tẹ ta kẹ ahwo Kẹn nọ:+ “Wha no udevie ahwo Amalẹk na no re mẹ siọ owhai ba ehwere kufiẹ kugbe ahwo Amalẹk na.+ Keme wha dhesẹ uyoyou nọ o rẹ hiẹ hẹ kẹ ahwo Izrẹl kpobi+ okenọ a je no Ijipti ze.” Fikiere ahwo Kẹn na a te no udevie ahwo Amalẹk. 7 Nọ oyena o vrẹ no, Sọl o te kpe ahwo Amalẹk na,+ no Havila+ rite ugbo obọ Shọ+ nọ o kẹle Ijipti. 8 O te mu Egag+ ovie Amalẹk kpo ọkpokpọ, rekọ ọ tẹ rọ ọgbọdọ kpe ahwo nọ a kiọkọ kpobi no.+ 9 Rekọ Sọl avọ ahwo na a siọ Egag ba uzuazọ,* jegbe erao nọ e mai woma evaọ uthuru erao, owa erao, erao nọ e rrọ poriẹ poriẹ, igbo, gbe eware iwowoma kpobi.+ A gwọlọ raha ae kufiẹ hẹ. Rekọ eware kpobi nọ i fioka ha gbe enọ a gwọlọ họ, eye a raha kufiẹ.

10 Kẹsena ẹme Jihova o te bru Samuẹle ze, inọ: 11 “O da omẹ* nọ mẹ rehọ Sọl mu ovie, keme ọ siọ omẹ ba elele no, yọ o ru epanọ mẹ ta kẹe he.”+ O tẹ jẹ kẹ Samuẹle uye gaga, ọ tẹ jẹ viẹ kẹ Jihova evaọ aso na soso.+ 12 Nọ Samuẹle ọ kpama evaọ irioke frifri re ọ nyabru Sọl, a tẹ vuẹ Samuẹle nọ: “Sọl o kpobọ Kamẹl,+ ọ tẹ jọ obei rehọ oware ekareghẹhọ jọ vi kẹ omariẹ.+ Kẹsena o te kuomarẹriẹ, o te kpobọ Gilgal.” 13 Ukuhọ riẹ nọ Samuẹle ọ nyabru ei, Sọl ọ tẹ ta kẹe nọ: “Jọ Jihova ọ ghale owhẹ. Me ru epanọ Jihova ọ ta no.” 14 Rekọ Samuẹle ọ tẹ nọe nọ: “Kọ ẹvẹ igodẹ nọ i bi bo gbe iruẹ nọ i bi bo nọ me bi yo edo rai na e nya?”+ 15 Sọl ọ tẹ ta nọ: “Obọ ahwo Amalẹk na a wha rai no ze, keme ahwo na a nyasiọ erao nọ e mai woma ba* evaọ uthuru erao gbe owa erao na re a rehọ ai dhe idhe kẹ Jihova Ọghẹnẹ ra; rekọ ma raha eware nọ i kiọkọ kpobi kufiẹ no.” 16 Fikiere Samuẹle ọ tẹ ta kẹ Sọl nọ: “Onọ whọ ta u te no! Jomẹ vuẹ owhẹ ẹme nọ Jihova ọ ta kẹ omẹ aso odẹnukpo.”+ Sọl ọ tẹ ta kẹe nọ: “Ta ze!”

17 Samuẹle ọ tẹ ta nọ: “Kọ ogbẹrọnọ owhẹ who je rri omara nọ who fioka ha+ evaọ okenọ a rọ owhẹ mu ọnọ o wuzou erua Izrẹl gbe okenọ Jihova o wholo owhẹ re whọ jọ ovie kẹ Izrẹl?+ 18 Uwhremu na Jihova o te vi owhẹ uwou nọ: ‘Nya re whọ raha ahwo Amalẹk irumuomu na no.+ Họre ai bẹsenọ whọ rẹ raha ai muotọ.’+ 19 Kọ fikieme who gbe yoẹme kẹ urru Jihova ha? Ukpoye, whọ tẹ rọ uvou-uthei họrọ nyae kwa egbo-ẹmo na,+ whọ tẹ rọ ere ru oware nọ u yoma evaọ aro Jihova!”

20 Rekọ Sọl ọ tẹ ta kẹ Samuẹle nọ: “Rekọ me yoẹme kẹ urru Jihova! Mẹ nya uwou nọ Jihova o vi omẹ, me te mu Egag ovie Amalẹk kpozi, yọ mẹ raha ahwo Amalẹk kpobi muotọ.+ 21 Rekọ ahwo na a tẹ jọ egbo-ẹmo na rehọ igodẹ gbe iruẹ, enọ e mai woma evaọ usu eware nọ a ta nọ a raha no na, re a ro dhe idhe kẹ Jihova Ọghẹnẹ ra evaọ Gilgal.”+

22 Samuẹle ọ tẹ ta kẹe nọ: “Kọ idhe emahọ gbe oghẹrẹ idheidhe efa+ e rẹ were Jihova te urru Jihova nọ a re yoẹme kẹ? Rri obonẹ! Ẹmeoyo o woma vi idheidhe,+ yọ re a romatotọ gaviezọ u woma vi iwhri+ igbo; 23 keme ọwọsuọ+ avọ uzioraha ẹva-ọgba+ epọvo na, yọ omorro nọ a re ro ru oware nọ a vi ohwo ho avọ ogaga emajiki nọ a re ro ru oware gbe ẹdhọgọ* epọvo na. Fikinọ whọ siọ ẹme Jihova,+ ọ siọ owhẹ no inọ whọ te gbẹ jọ ovie he.”+

24 Sọl ọ tẹ ta kẹ Samuẹle nọ: “Mẹ raha uzi no, mẹ la uzi Jihova gbe ẹme ra vrẹ, keme ozọ ahwo na u mu omẹ, mẹ tẹ gaviezọ kẹ ẹme rai. 25 Whaọ enẹna, ivie, rehọ uzioraha mẹ rọvrẹ omẹ, re who lele omẹ zihe, re mẹ ruẹsi guzou kpotọ kẹ Jihova.”+ 26 Rekọ Samuẹle ọ tẹ ta kẹ Sọl nọ: “Me ti lele owhẹ zihe he, keme whọ siọ ẹme Jihova, yọ Jihova ọ siọ owhẹ no inọ whọ gbẹ jọ ovie Izrẹl he.”+ 27 Epanọ Samuẹle o je ro kuomarẹriẹ re ọ nyavrẹ na, Sọl ọ tẹ jabọ họ obotọ ewu riẹ nọ o wo abọ họ, ewu na ọ tẹ bẹre. 28 Samuẹle ọ tẹ ta kẹe nọ: “Jihova ọ bẹre esuo uvie Izrẹl mi owhẹ no nẹnẹ na, yọ ọ te rehọ uvie na kẹ ọzae ọfa nọ o woma vi owhẹ.+ 29 Ofariẹ, Oride Izrẹl+ ọ rẹ ta ọrue+ hayo nwene iroro ho, keme ohwo-akpọ Ọ rrọ họ nọ o re ro nwene iroro riẹ.”*+

30 Sọl ọ tẹ ta nọ: “Mẹ raha uzi no. Rekọ ivie, kẹ omẹ ọghọ evaọ iraro ekpako ahwo mẹ gbe evaọ iraro Izrẹl. Lele omẹ zihe, me ti guzou kpotọ kẹ Jihova Ọghẹnẹ ra.”+ 31 Fikiere Samuẹle ọ tẹ jọ obemu Sọl lele iei zihe, Sọl o te guzou kpotọ kẹ Jihova. 32 Samuẹle ọ tẹ ta nọ: “Rehọ Egag ovie Amalẹk na se omẹ.” Egag ọ tẹ rọ awọ siotọ bru ei ze,* keme Egag ọ jẹ ta kẹ omariẹ nọ: ‘U mu omẹ ẹro nọ uwhu* o vrẹ omẹ no.’ 33 Rekọ Samuẹle ọ tẹ ta kẹe nọ: “Nwane wọhọ epanọ ọgbọdọ ra o ru eyae rrọ ababọ emọ na, ere oni ra ọ te jọ ababọ emọ re evaọ udevie eyae na, yọ oriẹ o te mai yoma.” Fikiere, Samuẹle ọ tẹ gbẹre Egag ekekẹ evaọ aro Jihova evaọ Gilgal.+

34 Samuẹle o te kpohọ Rema, Sọl o te kpobọ uwou riẹ evaọ Gibiah orọ Sọl. 35 Samuẹle ọ gbẹ ruẹ Sọl ofa bọo ẹdẹ uwhu riẹ hẹ, keme Samuẹle o je weri fiki Sọl.+ Yọ o da Jihova inọ ọ rehọ Sọl mu ovie kẹ Izrẹl.+

16 Jihova ọ tẹ ta kẹ Samuẹle uwhremu na nọ: “Ẹvẹ who re weri kẹ Sọl kri te+ nọ orọnọ mẹ se riẹ no inọ ọ gbẹ jọ ovie kẹ Izrẹl he na?+ Ku ewhri fihọ onware* ra+ re whọ wọ. Me ti vi owhẹ bru Jẹsi+ ohwo Bẹtlẹhẹm na keme mẹ jọ usu emezae riẹ salọ ovie kẹ omamẹ no.”+ 2 Rekọ Samuẹle ọ tẹ ta nọ: “Ẹvẹ mẹ sae rọ nya? Nọ Sọl o te yo kpahe iẹe, o ti kpe omẹ no.”+ Jihova ọ tẹ kpahe kẹe nọ: “Rehọ eruẹ ọsese kugbe oma, whọ vẹ ta nọ, ‘Mẹ nyaze re me dhe idhe kẹ Jihova.’ 3 Who re zizie Jẹsi kpohọ oria nọ whọ te jọ dhe idhe na; mẹ vẹ te vuẹ owhẹ oware nọ who ti ru. Who re wholo ohwo nọ me ti dhesẹ kẹ owhẹ na rọ kẹ omẹ hrọ.”+

4 Samuẹle o te ru epanọ Jihova ọ ta kẹe. Nọ o te Bẹtlẹhẹm,+ ekpako okpẹwho na i te je nuhu nọ a nyabru ei, a tẹ nọe nọ: “Kọ ẹnyaze ra na orọ udhedhẹ?” 5 Ọ tẹ ta nọ: “Orọ udhedhẹ. Mẹ nyaze re me dhe idhe kẹ Jihova. Wha ru omarai fo re wha lele omẹ kpohọ oria nọ mẹ te jọ dhe idhe na.” Kẹsena o te ru Jẹsi avọ emezae riẹ fo, o te se ai kpohọ oria nọ ọ te jọ dhe idhe na. 6 Nọ a te etẹe, ọ jẹ ruẹ Ẹlayab,+ ọ tẹ ta nọ: “U mu omẹ ẹro nọ ọnọ Jihova o wholo* ọna.” 7 Rekọ Jihova ọ tẹ ta kẹ Samuẹle nọ: “Who rri oma riẹ gbe epanọ o theri te he,+ keme ọye mẹ salọ họ. Orọnikọ epanọ ohwo-akpọ o re rri eware ere Ọghẹnẹ o re rri eware he, keme oware nọ ibiaro ohwo-akpọ e be ruẹ ọvo ọ rẹ ruẹ, rekọ Jihova ọ rẹ ruẹ obọ udu na.”+ 8 Jẹsi o te se Abinadab+ ziọ aro Samuẹle, rekọ ọ tẹ ta nọ: “Jihova ọ salọ ọnana gbe he.” 9 Jẹsi o te je se Shamah ziọ aro riẹ,+ rekọ ọ tẹ ta nọ: “Jihova ọ salọ ọnana gbe he.” 10 Ere Jẹsi o ro se emezae ihrẹ riẹ ziọ aro Samuẹle, rekọ Samuẹle ọ tẹ ta kẹ Jẹsi nọ: “Jihova ọ salọ ohwo ọvo evaọ ahwo nana ha.”

11 Ukuhọ riẹ Samuẹle ọ tẹ nọ Jẹsi nọ: “Kọ emezae ra kpobi ena?” O te yo nọ: “Ọrọ ọmaha na+ ọvo o gbe kiọkọ; ọ be rẹrote igodẹ na.”+ Samuẹle ọ tẹ ta kẹ Jẹsi nọ: “Vi ohwo nyai sei ze, keme ma te keria re emu na ha bẹsenọ ọ rẹ nyaze.” 12 Fikiere o te vi ohwo nyai sei, ọ tẹ nyaze. Whaọ ọ jọ wawae avọ ibiaro iwowoma, o te je wo erru.+ Kẹsena Jihova ọ tẹ ta nọ: “Kpama, wholo iei,* keme ọna họ ohwo na!”+ 13 Fikiere Samuẹle ọ tẹ rehọ onware* nọ ewhri ọ rrọ eva na,+ o te wholo iei evaọ iraro inievo riẹ. Ẹzi Jihova ọ tẹ jẹ kẹ Devidi ogaga no umuo ẹdẹ yena vrẹ.+ Kẹsena Samuẹle ọ tẹ wọ, o te kpobọ Rema.+

14 Whaọ ẹzi Jihova o no Sọl oma no,+ ẹzi oyoma nọ o no obọ Jihova ze o te je kpokpo iei.+ 15 Idibo Sọl e tẹ ta kẹe nọ: “Whọ be ruẹ nọ ẹzi oyoma nọ o no obọ Ọghẹnẹ ze o bi kpokpo owhẹ. 16 Ivie, jọ olori mai ọ ta kẹ idibo riẹ re a gwọlọ ohwo nọ ọ riẹ akpata ekporo ziezi.+ Oke kpobi nọ ẹzi oyoma o te no obọ Ọghẹnẹ bru owhẹ ze, o ve kporo iei, oma o vẹ sasa owhẹ.” 17 Fikiere Sọl ọ tẹ ta kẹ idibo riẹ nọ: “Ivie, wha gwọlọ ohwo nọ ọ riẹ ekporo ziezi re wha rehọ iẹe se omẹ.”

18 Omọvo idibo na jọ ọ tẹ ta nọ: “Mẹ riẹ ọmọzae Jẹsi ohwo Bẹtlẹhẹm na jọ nọ ọ riẹ ekporo ziezi, ọ tẹ jẹ rrọ ọgbaẹmo ọgaga nọ ọ gudu.+ Ọ riẹ ẹme ẹta ziezi, o wo erru,+ yọ Jihova ọ rrọ kugbei.”+ 19 Fikiere Sọl o te vi enyukọ bru Jẹsi inọ: “Vi Devidi ọmọzae ra se omẹ, ọnọ ọ be rẹrote uthuru igodẹ na.”+ 20 Fikiere Jẹsi ọ tẹ rehọ ebrẹdi, ukoko oviẹ-arao nọ enwaene ọ rrọ eva, gbe ọmọ ẹwe, ọ tẹ wọ ae họ ehru eketekete, o te vi ai se Sọl kugbe Devidi ọmọzae riẹ. 21 Ere Devidi ọ rọ nyabru Sọl, ọ tẹ jẹ gbodibo kẹe.+ Sọl o te you rie gaga, o te zihe ruọ ọnọ ọ rẹ wha ekwakwa ẹmo riẹ. 22 Sọl o te vi uwou se Jẹsi nọ: “Ivie, jọ Devidi ọ jọ kugbe omẹ re ọ hae gbodibo kẹ omẹ, keme o kiehọ omẹ oma gaga.” 23 Oke kpobi nọ ẹzi oyoma o te no obọ Ọghẹnẹ ze ruọ Sọl oma, nọ Devidi ọ jẹ tọlọ akpata na je mu ei họ ekporo, oma o vẹ fọ Sọl, ọ vẹ sasa, ẹzi oyoma na o ve noi oma.+

17 Ahwo Filistia+ a te koko egbaẹmo* rai họ kẹ ẹmo. A kokohọ Sokọ+ orọ Juda, a tẹ fa evuẹ fihọ udevie Sokọ avọ Azika+ evaọ Ifes-damim.+ 2 Sọl avọ ezae Izrẹl a te kokohọ jẹ fa evuẹ fihọ Ukiekpotọ* Ilah,+ a te dhe uhie ẹmo họ re a họre ahwo Filistia. 3 Ahwo Filistia na a kokohọ ugbehru nọ o rrọ abọjọ, yọ ahwo Izrẹl a kokohọ ugbehru nọ o rrọ abọdekọ, ukiekpotọ na o tẹ rrọ udevie rai.

4 Kẹsena ọgba jọ o te no evuẹ ahwo Filistia na ze; Goliat họ odẹ riẹ,+ ohwo Gat,+ yọ o theri te ikiubiti ezeza gbe okẹkẹe evabọ.* 5 O ku etu nọ a rọ ekọpa ru họ uzou, o te je ku ewu-ẹmo họ.* Ewu-ẹmo nọ a rọ ekọpa ru na o gbẹdẹ+ te shẹkẹl idu isoi (5,000).* 6 Ọ gba ẹwẹ-odhe ekọpa fihọ awọ riẹ, yọ ehi+ ekọpa o rrọ udevie ikoko riẹ. 7 Ọkpọ ozuẹ riẹ nọ a rehọ ure ru o jọ wọhọ ọkpọ ọgbogbodo ahwo nọ a re fi ilulu họ ekpọ ro zuo ehọ,+ uzou ozuẹ na nọ a rọ ayọno ru o gbẹdẹ te shẹkẹl egba ezeza (600);* yọ ohwo nọ ọ rẹ wha ojese riẹ ọ rrọ aro riẹ. 8 O te dikihẹ kpaunu se egbaẹmo Izrẹl nọ i dhe uhie ẹmo họ na+ nọ: “Eme ọ lẹliẹ owhai dhe uhie ẹmo họ? Kọ ogbẹrọnọ mẹ họ ohwo Filistia na, whai kọ idibo Sọl? Wha salọ ọzae jọ kẹ omarai re ọ nyabru omẹ ze. 9 Ọ tẹ sai lele omẹ họre je kpe omẹ no, ma ti zihe ruọ idibo rai. Rekọ mẹ tẹ gobọ vi ei je kpei, wha ti zihe ruọ idibo mai nọ e te gbodibo kẹ omai.” 10 Ohwo Filistia na ọ tẹ ta nọ: “Mẹ be poviẹ* egbaẹmo Izrẹl+ nẹnẹ na. Wha rehọ ọzae jọ ze re ma họre iẹe no ẹro no!”

11 Nọ Sọl avọ ahwo Izrẹl kpobi a yo eha nọ ohwo Filistia na o bi se, iguegue e tẹ ruọ ae oma avọ ozọ ogaga.

12 Whaọ Devidi yọ ọmọzae Jẹsi,+ ohwo Efrata+ nọ o no Bẹtlẹhẹm+ Juda ze. Jẹsi o wo emezae eree,+ evaọ edẹ Sọl yọ ọ kpako no. 13 Emezae ekpako esa Jẹsi i lele Sọl kpohọ ẹmo na.+ Odẹ emezae esa riẹ nọ i kpohọ ẹmo na họ Ẹlayab+ nọ ọ rrọ ọmọ ọsosuọ, Abinadab+ ọmọzae avọ ivẹ, gbe Shamah+ ọmọzae avọ esa. 14 Devidi họ ọmaha rai kpobi,+ yọ emezae ekpako esa na i lele Sọl.

15 Devidi ọ jẹ hai no uwou Sọl nyae rẹrote igodẹ+ ọsẹ riẹ evaọ Bẹtlẹhẹm, o ve zihe ze. 16 Evaọ oke nana, ohwo Filistia na ọ jẹ hae nya lahwe ti seha kẹ ae kohiohiẹ kohiohiẹ gbe kowọwọ kowọwọ evaọ edẹ udhuvẹ.

17 Kẹsena Jẹsi ọ tẹ ta kẹ Devidi ọmọzae riẹ nọ: “Ivie, rehọ ifa* eka nana nọ a sasa* na gbe ikulu ebrẹdi ikpe nana re whọ wọ ae se inievo ra nọ e rrọ obọ evuẹ na ovovẹrẹ. 18 Re whọ jẹ rehọ eko ikpe ichizi* kẹ oletu egbaẹmo odu na; whọ rẹ jẹ nọ epanọ eware e rrọ kẹ inievo ra, a vẹ jẹ vuẹ owhẹ epanọ eware e rrọ kẹ ai se omẹ.” 19 Emezae Jẹsi na a jọ kugbe Sọl avọ ahwo Izrẹl nọ a kiọkọ kpobi evaọ Ukiekpotọ* Ilah+ re a lele ahwo Filistia họre.+

20 Fikiere Devidi ọ tẹ kpama evaọ irioke frifri, ọ tẹ nyasiọ igodẹ na ba kẹ omọfa jọ; o te koko owha na họ, ọ tẹ nya nwane wọhọ epanọ Jẹsi ọsẹ riẹ o vi rie. Okenọ ọ nyate evuẹ na, yọ egbaẹmo na e be nya kpohọ oria nọ a te jọ fi ẹmo na yọ a bi bo ubo ẹmo. 21 Ahwo Izrẹl avọ ahwo Filistia a te dhe uhie ẹmo họ rẹriẹ ovao ku ohwohwo. 22 Devidi ọ tẹ nwane nyasiọ ewha riẹ ba kẹ ohwo nọ o re rri ewha na, ọ tẹ dhẹ kpohọ obonọ a dhe uhie ẹmo họ na. Nọ o te etẹe, ọ tẹ be nọ inievo riẹ epanọ eware e rrọ kẹ ae.+

23 Epanọ o je ro lele ae ta ẹme na, ọgba ahwo Filistia nọ a re se Goliat,+ ọnọ ọ rrọ ohwo Gat ọ tẹ nya lahwe. Udevie ahwo Filistia nọ a dhe uhie ẹmo họ na o no ze, ọ tẹ be wariẹ eme evona nọ ọ be hae ta na,+ Devidi o te yo. 24 Nọ ezae Izrẹl kpobi a ruẹ ọzae na, a tẹ dhẹ, yọ ozọ u bi mu ae gaga.+ 25 Ezae Izrẹl na a jẹ ta nọ: “Kọ whọ be ruẹ ọzae nana nọ ọ be nya lahwe na? Ọ rẹ nyaze te poviẹ* Izrẹl.+ Ovie ọ ta nọ ọ te kẹ ohwo kpobi nọ o kpe ọzae nana ekwakwa efe buobu, ọ te rehọ ọmọtẹ riẹ kẹe,+ yọ a gbe ti mi unuwou ọsẹ riẹ eware nọ a rẹ kẹ ovie evaọ Izrẹl he.”

26 Devidi o te mu ezae nọ i dikihẹ kẹle iẹe họ ẹnọ nọ: “Eme a ti ru kẹ ohwo nọ o kpe ohwo Filistia yena je si ekela no Izrẹl oma? Ono họ ohwo Filistia nana nọ a yawo ho na nọ ọ rẹ poviẹ* egbaẹmo Ọghẹnẹ nọ ọ rrọ uzuazọ na?”+ 27 Ahwo na a tẹ wariẹ eme evona kẹe, inọ: “Enẹ a ti ru kẹ ohwo nọ o kpe rie.” 28 Nọ Ẹlayab oniọvo-ọmọzae ọkpako riẹ+ o yo nọ o bi lele ezae na ta ẹme, eva Devidi e tẹ dhae, ọ tẹ ta nọ: “Eme whọ nyaze ti ru? Ono whọ nyasiọ umutho igodẹ yena ba kẹ evaọ obọ udhude na?+ Mẹ riẹ nọ who wo omorro, mẹ tẹ jẹ riẹ ekpehre iroro nọ e rrọ udu ra; ughe ẹmo na whọ nyaze ti rri na.” 29 Devidi ọ tẹ ta nọ: “Kọ eme me ru obọnana? Onọ gheghe mẹ jẹ nọ!” 30 Fikiere o te kuomarẹriẹ se iẹe ba rri omọfa, ọ tẹ nọ onọ ovona,+ ahwo na a tẹ kẹe uyo ovona.+

31 Eme nọ Devidi ọ ta i te fi ruọ ahwo jọ ezọ, a tẹ vuẹ Sọl. Sọl o te vi ohwo nyai sei. 32 Devidi ọ tẹ ta kẹ Sọl nọ: “Jọ udu u no ohwo ọvo awọ fiki riẹ hẹ. Odibo ra ọ te nyae họre ohwo Filistia yena.”+ 33 Rekọ Sọl ọ tẹ ta kẹ Devidi nọ: “Whọ te sae họre ohwo Filistia nana ha, keme ọmaha gheghe whọ rrọ,+ yọ anwọ oke uzoge riẹ ze ọ rọ rrọ isoja.”* 34 Kẹsena Devidi ọ tẹ ta kẹ Sọl nọ: “Oke jọ nọ odibo ra ọ jẹ rẹrote igodẹ ọsẹ riẹ, okpohrokpo+ ọ tẹ nyaze, ọ tẹ jọ udevie uthuru na wọ ogodẹ jọ, ere adaka o ru ẹdẹ jọ re. 35 Me te lei mu jẹ fae fihọ otọ, me te si ogodẹ na no unu riẹ. Nọ ọ kpama họrọ mu omẹ, mẹ tẹ jabọ kru ei eto* jẹ fae fihọ otọ, me te kpei no. 36 Odibo ra o kpe okpohrokpo avọ adaka na, ohwo Filistia nana nọ a yawo ho na ọ te jọ wọhọ e rai, keme egbaẹmo Ọghẹnẹ nọ ọ rrọ uzuazọ na ọ be poviẹ* na.”+ 37 Devidi ọ tẹ ta re nọ: “Jihova nọ o siwi omẹ no ikpituabọ okpohrokpo avọ adaka na, ọye o ti siwi omẹ no obọ ohwo Filistia nana.”+ Sọl ọ tẹ ta kẹ Devidi nọ: “Nya, jọ Jihova ọ jọ kugbe owhẹ.”

38 Sọl o te ku iwu ọyomariẹ họ Devidi oma. Ọ tẹ rọ etu ekọpa tu ei uzou, kẹsena o te ku ewu-ẹmo nọ a rọ ekọpa ru họ iẹe. 39 Kẹsena Devidi ọ tẹ gba ọgbọdọ riẹ fihọ ehru iwu riẹ, ọ tẹ be gwọlọ nya, rekọ ọ sae rehọ ae nya ha, keme o ri ku ae họ ẹdẹvo ho. Devidi ọ tẹ ta kẹ Sọl nọ: “Mẹ be sae rehọ iwu nana nya ha, keme me ri ku ae họ ẹdẹvo ho.” Fikiere Devidi ọ tẹ ba ai no. 40 Kẹsena ọ tẹ tọlọ ọkpọ riẹ, jẹ jọ akotọ unueri* na salọ ibitho eriẹriẹ isoi, o te fi ai họ ẹmẹkpa riẹ nọ ọ rẹ wha nyai thuru igodẹ, yọ udeme riẹ+ o rrọ obọ riẹ. O te mu ohwo Filistia na họ ẹnyabru.

41 Ohwo Filistia na ọ tẹ be nya kẹle Devidi ọvo, yọ ohwo nọ ọ rẹ wha ojese riẹ ọ rrọ aro riẹ. 42 Nọ ohwo Filistia na ọ ruẹ Devidi, o te je rri rie vo fikinọ ọmaha gheghe nọ oma riẹ o rrọ verọ verọ avọ erru ọ rrọ.+ 43 Ohwo Filistia na ọ tẹ ta kẹ Devidi nọ: “Kọ arakọ mẹ rrọ+ nọ whọ be rọ rehọ imire ze te họre omẹ?” Fikiere ohwo Filistia na ọ tẹ be rehọ odẹ edhọ riẹ bọwo Devidi ehao. 44 Ohwo Filistia na ọ tẹ ta kẹ Devidi nọ: “Thakpe nyaze, mẹ te rehọ uwo-oma ra kẹ evra obọ ehru* na gbe erao ẹwọ na.”

45 Devidi ọ tẹ za kẹ ohwo Filistia na nọ: “Whọ be rọ ọgbọdọ, ozuẹ, gbe ehi+ ze te họre omẹ, rekọ odẹ Jihova olori egbaẹmo+ mẹ be rọ nyaze te họre owhẹ, Ọghẹnẹ nọ o wo egbaẹmo Izrẹl nọ whọ be poviẹ* na.+ 46 Jihova ọ te rehọ owhẹ họ obọ mẹ nẹnẹ na,+ me ti kpe owhẹ je bru uzou ra no; yọ nẹnẹ na, mẹ te rehọ iri ahwo nọ a rrọ evuẹ Filistia na kẹ evra obọ ehru* na gbe erao ẹwọ otọakpọ na; ahwo nọ a rrọ otọakpọ na soso a vẹ te riẹ nọ Ọghẹnẹ jọ ọ rrọ Izrẹl.+ 47 Ahwo nọ a kokohọ etenẹ na kpobi* a te riẹ nọ orọnikọ ọgbọdọ hayo ozuẹ Jihova o re ro siwi hi,+ keme Jihova họ ọnọ o wo ẹmo na,+ yọ ọ te rọ owhai kpobi na họ obọ mai.”+

48 Kẹsena ohwo Filistia na ọ tẹ be nya kẹle Devidi, rekọ Devidi ọ tẹ dhẹ vẹrẹ vẹrẹ bru ohwo Filistia na kpohọ oria nọ a te jọ fi ẹmo na. 49 Devidi o te dhe obọ họ ẹmẹkpa riẹ, ọ tẹ tọlọ ubiutho ze fihọ udeme riẹ, o te veghe iei. U te kie ohwo Filistia na aruezo, ubiutho na o tẹ ruọ eva aruezo riẹ, o te kie vovao tuotọ.+ 50 Ere Devidi ọ rọ rehọ udeme avọ ubiutho fi ohwo Filistia na kparobọ; Devidi o kpe ohwo Filistia na dede nọ ọgbọdọ ọ jariẹ obọ họ.+ 51 Devidi ọ tẹ dhẹ nya, o te dikihẹ ehru riẹ. O te kru ọgbọdọ ohwo Filistia na+ o te yolo iei no owa riẹ ze, o te bru uzou riẹ no re ọ nabe ruẹ nọ o whu totọ. Nọ ahwo Filistia na a ruẹ nọ ọgba rai o whu no, a tẹ dhẹ.+

52 Fikiere ezae Izrẹl avọ Juda a tẹ wọ, a te bi bo je bi le ahwo Filistia na, a te le ai no ukiekpotọ na+ rite inuethẹ Ekrọn.+ A te kpe ahwo Filistia vọ otọ evaọ edhere nọ u no Sheareyẹm ze+ rite ugbo obọ Gat gbe Ekrọn. 53 Nọ ahwo Izrẹl na a le ahwo Filistia na kiti kiti vrẹ je zihe ze no, a tẹ kwa eware evuẹ rai rehọ.

54 Devidi ọ tẹ wọ uzou ohwo Filistia na, ọ tẹ rehọ iẹe ziọ Jerusalẹm, rekọ o te fi ekwakwa ẹmo ohwo Filistia na họ uwou-udhu riẹ.+

55 Okenọ Sọl ọ ruẹ Devidi nọ ọ jẹ nyabru ohwo Filistia na, ọ tẹ nọ Abna,+ oletu ogbaẹmo na nọ: “Abna, ọmọzae nana yọ ọmọ ono?”+ Abna o te yo nọ: “Nọ whọ rrọ uzuazọ na,* O ovie, mẹ riẹ hẹ!” 56 Ovie na ọ tẹ ta nọ: “Nọ re whọ riẹ ọmọ ohwo nọ ọ rrọ.” 57 Fikiere nọ Devidi ọ nwani zihe no obonọ ọ jọ kpe ohwo Filistia na ze no, Abna o te kru rie se Sọl avọ uzou ohwo Filistia na+ nọ o rrọ obọ riẹ. 58 Sọl ọ tẹ nọe nọ: “Ọmọzae mẹ, whẹ ọmọ ono?” Devidi ọ tẹ ta nọ: “Mẹ yọ ọmọzae odibo ra, Jẹsi+ ohwo Bẹtlẹhẹm na.”+

18 Nọ Devidi ọ nwani ku ẹme nọ ọ jẹ ta kẹ Sọl họ no, Jonatan+ avọ Devidi a tẹ dhẹ ruọ ohwohwo oma, a te zihe ruọ egbẹnyusu ekpekpe, Jonatan o te you rie wọhọ epanọ o you omariẹ.*+ 2 No umuo ẹdẹ yena vrẹ, Sọl o te fi Devidi họ uwou riẹ, ọ gbẹ kẹe uvẹ re o zihe kpobọ uwou ọsẹ riẹ hẹ.+ 3 Jonatan avọ Devidi a tẹ re ọvọ,+ keme Jonatan o you rie wọhọ epanọ o you omariẹ.*+ 4 Jonatan ọ tẹ ba ewu riẹ nọ o wo abọ họ no, ọ tẹ rehọ iẹe kẹ Devidi, ọ tẹ jẹ kẹe ewu ẹmo riẹ, ọgbọdọ riẹ, uze riẹ, gbe umueku riẹ. 5 Devidi o te mu ẹmo họ ẹnya, yọ ọ jẹ kparobọ*+ evaọ oria kpobi nọ Sọl o vi rie nya. Fikiere Sọl o te fi ei họ ọnọ o wuzou egbaẹmo na,+ yọ onana o were ahwo na kpobi gbe idibo Sọl.

6 Nọ Devidi avọ egbaẹmo nọ i kiọkọ a te zihe no obonọ a jọ nyai kpe ahwo Filistia ze no, eyae na i ve no ikpewho Izrẹl kpobi ze nyabru Sọl ovie na, yọ a be so ile+ je bi gbile avọ oghọghọ, bi kporo ejẹjẹ+ gbe ekpata-ifi-esa.* 7 Eyae nọ i je gbe ehaa na a jẹ so nọ:

8 Eva e tẹ dha Sọl gaga,+ yọ ole nana ọ were riẹ hẹ, keme ọ jẹ ta nọ: “A be ta nọ Devidi o kpe ewegrẹ idu ikpe eko buobu, a tẹ be ta nọ me kpe ewegrẹ idu. Uvie na ọvo họ oware nọ u kiọkọ nọ a te kẹe na!”+ 9 No umuo ẹdẹ yena vrẹ, Sọl o te je viẹro ku Devidi ẹsikpobi.

10 Okiokiọ riẹ, ẹzi oyoma nọ o no obọ Ọghẹnẹ ze ọ tẹ ruọ Sọl oma,+ o te je ru fariẹ fariẹ* evaọ uwou na, yọ Devidi ọ be rehọ akpata-ifi kporo ile+ wọhọ epanọ ọ be hai ru vẹre. Oke yena yọ ozuẹ ọ rrọ Sọl obọ,+ 11 o te fi ozuẹ na,+ yọ ọ be ta kẹ omariẹ nọ: ‘Me ti duwu Devidi yawo ugbẹhẹ na!’ Rekọ Devidi ọ va riẹ abọ isiava. 12 Ozọ Devidi u te je mu Sọl keme Jihova ọ jọ kugbei,+ rekọ ọ nyasiọ Sọl ba no.+ 13 Fikiere Sọl o te si Devidi no iruo nọ o je ru kẹe, ọ tẹ rehọ iẹe mu oletu egbaẹmo odu, Devidi ọ tẹ jẹ wha egbaẹmo na kpohọ ẹmo.*+ 14 Devidi o gbe je wo obokparọ+ evaọ oware kpobi nọ o je ru,* yọ Jihova ọ jọ kugbei.+ 15 Nọ Sọl ọ ruẹ nọ Devidi o bi wo obokparọ gaga, ozọ riẹ u te je mu ei. 16 Rekọ ahwo Izrẹl gbe Juda kpobi a you Devidi, keme o je su ai kpohọ emo nọ a je fi.

17 Uwhremu na, Sọl ọ tẹ ta kẹ Devidi nọ: “Ọmọtẹ ọkpako mẹ nọ a re se Mirab ọna,+ mẹ te rehọ iẹe kẹ owhẹ re ọ jọ aye ra.+ Rekọ whọ rẹ gbẹ gudu re who fi emo Jihova kẹ omẹ.”+ Keme Sọl ọ ta kẹ omariẹ nọ: ‘Mẹ te rọ obọ mẹ kpei hi. Jọ ahwo Filistia a rọ obọ rai kpei.’+ 18 Devidi ọ tẹ ta kẹ Sọl nọ: “Kọ mẹ yọ ono? Kọ amono họ ahwo unuwou ọsẹ mẹ evaọ Izrẹl nọ mẹ rẹ rọ jọ ọgọ ovie?”+ 19 Rekọ taure oke nọ a rẹ rọ rehọ Mirab ọmọtẹ Sọl kẹ Devidi u te ti te, yọ a rehọ e riẹ kẹ Edriẹl+ ohwo Mẹhola na no.

20 Whaọ evaọ oke yena yọ Devidi ọ dhẹ ruọ ọmọtẹ Sọl nọ a re se Maekal+ oma no, nọ a vuẹ Sọl kpahe iẹe, eva e tẹ were iẹe. 21 Fikiere Sọl ọ tẹ ta nọ: “Mẹ te rehọ iẹe kpahe ẹta kẹe re obọ ahwo Filistia na o sai tei.”+ Sọl ọ tẹ ta kẹ Devidi orọ avọ isiava nọ: “Who ti zihe ruọ ọgọ mẹ nẹnẹ na.” 22 Ofariẹ, Sọl ọ tẹ ta kẹ idibo riẹ nọ: “Wha nyae lẹlẹ ta kẹ Devidi nọ, ‘Eva ra e be were ovie na gaga, yọ oma ra o be were idibo riẹ kpobi. Fikiere, ru epanọ whọ rẹ rọ jọ ọgọ ovie na.’” 23 Nọ idibo Sọl a ta ẹme nana kẹ Devidi, ọ tẹ ta nọ: “Wha roro nọ oware osese o rrọ re a jọ ọgọ ovie, kpakiyọ mẹ yọ oyogbe, yọ ahwo a rri omẹ te oware ovo ho?”+ 24 Kẹsena idibo Sọl a tẹ ta kẹe nọ: “Enẹ gbe enẹ Devidi ọ ta.”

25 Fikiere Sọl ọ tẹ ta nọ: “Enẹ wha rẹ ta kẹ Devidi, ‘Ovie na o du gwọlọ igho ọmọtẹ+ mi owhẹ hẹ, iwoliwo* udhusoi (100)+ ahwo Filistia ọvo ọ gwọlọ mi owhẹ, re whọ rọ ere ru ewegrẹ ovie na kele.’” Keme Sọl ọ jẹ ma omaa epanọ ahwo Filistia na a re ro kpe Devidi. 26 Fikiere idibo Sọl a tẹ vuẹ Devidi eme nana, o tẹ were Devidi nọ ọ rẹ jọ ọgọ ovie na.+ Taure oke nọ a fihọ u te ti te, 27 Devidi avọ ahwo riẹ a tẹ nya, a te kpe ezae Filistia egba ivẹ (200), Devidi ọ tẹ rehọ iwoliwo* rai kpobi se ovie na, re ọ ruẹse jọ ọgọ ovie na. Fikiere Sọl ọ tẹ rehọ Maekal ọmọtẹ riẹ kẹe re ọ jọ aye riẹ.+ 28 Sọl ọ tẹ ruẹ nọ Jihova ọ rrọ kugbe Devidi+ jegbe nọ Maekal ọmọtẹ riẹ o you Devidi.+ 29 Onana u te ru ozọ Devidi mu Sọl vi epaọ ọsosuọ, Devidi o te zihe ruọ ọwegrẹ Sọl evaọ oke uzuazọ riẹ nọ u kiọkọ kpobi.+

30 Ikpahwo-esuo ahwo Filistia a jẹ hae wọ ẹmo bru ahwo Izrẹl, rekọ oke kpobi nọ a tẹ wọ bru ai, Devidi họ ohwo nọ ọ jẹ mai fi ai kparobọ* vi idibo Sọl nọ i kiọkọ kpobi,+ ahwo a tẹ jẹ kẹe adhẹẹ gaga.+

19 Uwhremu na Sọl ọ tẹ ta kẹ Jonatan ọmọzae riẹ gbe idibo riẹ kpobi inọ ọ gwọlọ kpe Devidi no.+ 2 Fikinọ Devidi ọ were Jonatan ọmọzae Sọl gaga,+ Jonatan ọ tẹ ta kẹ Devidi nọ: “Sọl ọsẹ mẹ ọ gwọlọ nọ a kpe owhẹ no. Ivie, yọroma evaọ ohiohiẹ odẹnotha re who kpohọ oria nọ u siomano, who ve dhere etẹe. 3 Mẹ avọ ọsẹ mẹ ma te nya kpohọ oria nọ whọ te jọ evaọ udhu na. Mẹ vẹ te ta ẹme kẹ ọsẹ mẹ kpahe owhẹ, yọ ọ tẹ ta ẹme jọ kpahe owhẹ, mẹ te siọ owhẹ ba ẹvuẹ hẹ.”+

4 Fikiere Jonatan ọ tẹ ta eme ezi Devidi+ kẹ Sọl ọsẹ riẹ. Ọ ta kẹe nọ: “Jọ ovie na o ru oware uyoma ovo kpahe Devidi odibo riẹ hẹ, keme o ri ru owhẹ oware uyoma ovo ho, yọ eware nọ o ru kẹ owhẹ, e kẹ owhẹ erere no. 5 O fi uzuazọ* riẹ họ ọza* re ọ ruẹsi kpe ohwo Filistia na,+ Jihova ọ tẹ wha obokparọ ulogbo* se Izrẹl soso. Iraro ra o jọ via, yọ eva e were owhẹ gaga. Kọ fikieme who re ro ru ohwo nọ ọ thọ uzi ovo ho oware uyoma? Kọ fikieme whọ be rọ gwọlọ kpe Devidi ekueku?”+ 6 Sọl ọ tẹ gaviezọ kẹ Jonatan, o te duwu iyei nọ: “Nọ Jihova ọ rrọ uzuazọ na, a ti kpei hi.” 7 Nọ oyena o vrẹ no, Jonatan o te se Devidi, ọ tẹ vuẹe eme nana kpobi. Fikiere Jonatan ọ tẹ rehọ Devidi bru Sọl, ọ tẹ jẹ gbodibo kẹe wọhọ epanọ o je ru vẹre.+

8 Nọ u te oke jọ, ẹmo ọ tẹ wariẹ du lahwe, Devidi ọ tẹ nyai lele ahwo Filistia na fi ẹmo, o te kpe ibuobu rai, a tẹ dhẹ.

9 Ẹzi oyoma nọ o no obọ Jihova ze ọ tẹ ruọ Sọl oma+ evaọ okenọ ọ keria uwou riẹ avọ ozuẹ riẹ nọ ọ rrọ obọ riẹ, yọ Devidi ọ be rehọ akpata-ifi kporo ile.+ 10 Sọl ọ tẹ gwọlọ rehọ ozuẹ na fi Devidi yawo ugbẹhẹ, rekọ Devidi ọ tẹ va Sọl abọ, ozuẹ na ọ tẹ zare vi ugbẹhẹ na. Devidi ọ tẹ dhẹ vabọ aso yena. 11 Uwhremu na, Sọl o te vi enyukọ kpobọ uwou Devidi re a rou uwou na,* a ve kpei no evaọ ohiohiẹ,+ rekọ Maekal aye Devidi ọ tẹ ta kẹe nọ: “Whọ gbẹ dhẹ* aso nana ha, ohwo owhuowhu whọ te jọ odẹnotha.” 12 Maekal ọ tẹ nwane rọ orọ unwido si Devidi ruọ otọ, re ọ sae dhẹ vabọ. 13 Maekal ọ tẹ rehọ ẹmema tẹrafim* na, ọ tẹ wọe fihọ ehru ehwa, o te fi etu nọ a rọ eto ẹwe ru họ oria nọ o re fi uzou họ, o te si ohọ ruru iei.

14 Sọl o te vi enyukọ nya re a rehọ Devidi ze, rekọ Maekal ọ tẹ ta nọ: “Ọ be mọ.” 15 Sọl ọ tẹ wariẹ vi enyukọ na inọ a nyai rri Devidi, yọ ọ ta kẹ ae nọ: “Wha wọe ze avọ epanọ ọ rọ rrọ ehwa na re me kpei no.”+ 16 Nọ enyukọ na e ruọ eva uwou na, a tẹ ruẹ ẹmema tẹrafim* evaọ ehru ehwa na avọ etu nọ a rọ eto ẹwe ru nọ o rrọ oria nọ o re fi uzou họ. 17 Sọl ọ tẹ nọ Maekal nọ: “Fikieme whọ rọ viẹ omẹ họ enẹ je ru nọ ọwegrẹ mẹ+ ọ rọ vabọ?” Maekal ọ tẹ kpahe kẹ Sọl nọ: “Ọ ta kẹ omẹ nọ, ‘Siobọno omẹ vrẹ, o gbẹ rrọ ere he me ti kpe owhẹ no!’”

18 Devidi ọ tẹ dhẹ vabọ, ọ tẹ nyabru Samuẹle ziọ obọ Rema.+ Ọ tẹ vuẹe eware kpobi nọ Sọl o ru rie. Kẹsena Devidi avọ Samuẹle a tẹ nyavrẹ, a tẹ jọ Nayọt.+ 19 Nọ u te oke jọ, a tẹ vuẹ Sọl nọ: “Whaọ Devidi ọ rrọ obọ Nayọt evaọ Rema.” 20 Sọl ọ tẹ nwani vi enyukọ re a nyai mu Devidi. Nọ a ruẹ eruẹaro nọ e kpako no evaọ usu eruẹaro na nọ e be ruẹaro, yọ Samuẹle o dikihẹ wọhọ ọnọ o wuzou rai, ẹzi Ọghẹnẹ ọ tẹ ruọ enyukọ Sọl na oma, a te muhọ eru wọhọ eruẹaro re.

21 Nọ a vuẹ Sọl, ọ tẹ nwani vi enyukọ efa nya, a te muhọ eru wọhọ eruẹaro re. Fikiere Sọl ọ tẹ wariẹ vi enyukọ efa, utu avọ esa, ahwo nana omarai a te muhọ eru wọhọ eruẹaro re. 22 Ukuhọ riẹ, Sọl o te kpobọ Rema. Nọ ọ nyate ọgọdọ-ame* ologbo nọ ọ rrọ Siku, ọ tẹ nọ nọ: “Diẹse Samuẹle avọ Devidi a rrọ?” A te yo kẹe nọ: “A rrọ Nayọt+ evaọ Rema.” 23 Nọ Sọl ọ jọ edhere bi no etẹe kpohọ Nayọt evaọ Rema, ẹzi Ọghẹnẹ ọ tẹ ruọ ẹe oma re, nọ ọ be nya na, o te bi ru wọhọ ọruẹaro bẹsenọ ọ rọ ziọ Nayọt evaọ Rema. 24 Ọ tẹ ba iwu riẹ no re, ọyomariẹ o te je ru wọhọ ọruẹaro re evaọ aro Samuẹle, o te kiẹzẹ etẹe ẹbẹba* evaọ ẹdẹ yena soso gbe aso yena soso. Oyejabọ nọ a rẹ rọ ta nọ: “Kọ Sọl ọ rrọ usu eruẹaro na re?”+

20 Kẹsena Devidi ọ tẹ dhẹ no Nayọt evaọ Rema. Ọ tẹ nyabru Jonatan ze, ọ tẹ ta kẹe nọ: “Eme me ru? Uzi vẹ mẹ thọ?+ Ẹvẹ me ro ru ọsẹ ra thọ nọ ọ be rọ gwọlọ uzuazọ* mẹ?” 2 Fikiere Jonatan ọ tẹ ta kẹe nọ: “Yọ oware nọ a re roro kpahe vievie he!+ Who ti whu hu. Whaọ, ọsẹ mẹ o re ru oware ovo ababọ ẹvuẹ nọ ọ rẹ vuẹ omẹ hẹ, te o kawo te o rro. Fikieme ọsẹ mẹ ọ be rọ ko ẹme nana dhere omẹ? Oware nana o rẹ via ha.” 3 Devidi ọ tẹ gbẹ ta nọ: “Ọsẹ ra ọ riẹ vevẹ nọ mẹ were owhẹ,+ yọ ọ sae ta nọ, ‘Jonatan ọ rẹ riẹ kpahe onana ha, keme ọ tẹ riẹ, eva e te dhae.’ Rekọ nọ Jihova ọ rrọ uzuazọ na, yọ whẹ omara* ọ rrọ uzuazọ na, uwhu o rọ kpahe omẹ!”+

4 Kẹsena Jonatan ọ tẹ ta kẹ Devidi nọ: “Oware kpobi nọ whọ ta* me ti ru kẹ owhẹ.” 5 Devidi ọ tẹ ta kẹ Jonatan nọ: “Odẹnotha họ ẹdẹ ehaa ọvẹre ọkpokpọ na,+ yọ o gba omẹ họ nọ mẹ rẹ keria kugbe ovie na re emu; rekọ kẹ omẹ uvẹ nyavrẹ re me dhere obọ ẹwọ rite owọwọ ẹdẹ avọ esa. 6 Ọsẹ ra ọ tẹ nọ onọ mẹ, whọ vẹ ta nọ, ‘Devidi ọ lẹ omẹ nọ mẹ kẹe uvẹ re ọ nya kpobọ Bẹtlẹhẹm okpẹwho riẹ vẹrẹ vẹrẹ,+ keme uviuwou na soso a bi dhe idhe nọ a re dhe kukpe kukpe.’+ 7 Otẹrọnọ ọ ta nọ, ‘U woma,’ kiyọ udhedhẹ o rrọ kẹ odibo ra. Rekọ eva e tẹ dhae, whọ vẹ riẹ nọ ọ gba riẹ mu nọ ọ rẹ nwa omẹ oma. 8 Dhesẹ uyoyou nọ o rẹ hiẹ hẹ kẹ odibo ra,+ keme whọ re ọvọ kugbe odibo ra no evaọ aro Jihova.+ Rekọ otẹrọnọ mẹ reabe,+ whẹ ọvo ọ rọ obọ ra kpe omẹ. Fikieme whọ jẹ rehọ omẹ kẹ ọsẹ ra?”

9 Jonatan ọ tẹ ta nọ: “Whọ ta ẹme otiọye na vievie he! Otẹrọnọ mẹ tẹ ruẹ nọ ọsẹ mẹ ọ gba riẹ mu nọ ọ rẹ nwa owhẹ oma, kọ mẹ gbẹ te vuẹ owhẹ?”+ 10 Kẹsena Devidi ọ tẹ ta kẹ Jonatan nọ: “Kọ ono ọ te vuẹ omẹ otẹrọnọ ọsẹ ra ọ kpahe ẹme ọgaga kẹ owhẹ?” 11 Jonatan ọ tẹ ta kẹ Devidi nọ: “Nyaze ma kpobọ ẹwọ na.” Fikiere aimava a te kpobọ ẹwọ. 12 Jonatan ọ tẹ ta kẹ Devidi nọ: “Jọ Jihova Ọghẹnẹ Izrẹl ọ jọ osẹri inọ evaọ oke utiona odẹnotha hayo evaọ ẹdẹ avọ esa, me ti mi ọsẹ mẹ ẹme. Otẹrọnọ o wo emamọ eva kpahe owhẹ Devidi, kọ me gbe ti vi uwou se owhẹ re whọ riẹ kpahe iẹe? 13 Rekọ otẹrọnọ ọsẹ mẹ ọ gwọlọ nwa owhẹ oma, jọ Jihova ọ kẹ omẹ Jonatan uye je fibae otẹrọnọ mẹ gbẹ vuẹ owhẹ je ru epanọ whọ rẹ rọ vabọ omakọkọ họ. Jọ Jihova ọ jọ kugbe owhẹ+ nwane wọhọ epanọ ọ jọ kugbe ọsẹ mẹ na.+ 14 Kọ who ti dhesẹ uyoyou Jihova nọ o rẹ hiẹ hẹ kẹ omẹ nọ mẹ rrọ uzuazọ na gbe okenọ me te whu no?+ 15 Who du siọ uyoyou nọ o rẹ hiẹ hẹ ba edhesẹ kẹ ahwo uwou mẹ hẹ,+ makọ evaọ okenọ Jihova o ti voro ewegrẹ Devidi kpobi no otọakpọ na.” 16 Fikiere Jonatan ọ tẹ re ọvọ kugbe uwou Devidi, ọ ta nọ, “Jihova ọ te nọ mi ewegrẹ Devidi jẹ rehọ ai guẹdhọ.” 17 Jonatan o te ru Devidi wariẹ duwu iyei kẹe inọ o you rie, keme Jonatan o you Devidi wọhọ epanọ o you omariẹ.*+

18 Kẹsena Jonatan ọ tẹ ta kẹe nọ: “Odẹnotha họ ẹdẹ ehaa ọvẹre ọkpokpọ,+ yọ a te nọ onọ ra keme agbara ra ọ te jọ ofofe. 19 Yọ ẹdẹ avọ esa na a te mae nọ onọ ra dede. Whọ rẹ ziọ oria nọ who dhere ẹdẹdekọ na,* whọ vẹ jọ kẹle utho nọ o rrọ etenẹ na. 20 Mẹ te sa ese esa rri abọvo riẹ jọ wọhọ ẹsenọ mẹ be sa oware jọ. 21 Okenọ me ti vi odibo na, enẹ mẹ te ta kẹe, ‘Nyae gwọlọ ese na.’ Mẹ tẹ ta kẹ odibo na nọ, ‘Rri! Ese na e rrọ abọ obonẹ ra na, tọlọ ae,’ who ve zihe ze, keme nọ Jihova ọ rrọ uzuazọ na, u dhesẹ nọ eware kpobi e rrọ ziezi kẹ owhẹ, ẹbẹbẹ ọvo ọ riẹ hẹ. 22 Rekọ otẹrọnọ mẹ ta kẹ ọmọzae na nọ, ‘Rri! Ese na e rrọ obaro ra na,’ whọ vẹ nyavrẹ, keme Jihova ọ gwọlọ nọ whọ nyavrẹ. 23 Jọ Jihova ọ jọ osẹri kẹ omẹ avọ owhẹ bẹdẹ bẹdẹ+ evaọ ọvọ nọ ma re na.”+

24 Fikiere Devidi o te dhere ẹwọ na. Nọ ẹdẹ ehaa ọvẹre ọkpokpọ na o te, ovie na ọ tẹ keria kẹ emuọriọ na.+ 25 Ovie na ọ keria agbara riẹ nọ ọ be hae keria vẹre kẹle ugbẹhẹ na. Jonatan ọ tẹ keria rẹriẹ ovao ku ei, yọ Abna+ ọ keria abotọ Sọl, rekọ agbara Devidi ọ jọ ofofe. 26 Sọl ọ ta ẹme ọvo kpahe Devidi ẹdẹ yena ha, keme ọ jẹ ta kẹ omariẹ nọ: ‘O wọhọ nọ oware jọ o via nọ ọ gbẹ rọ fo ho.+ Ere o te ginẹ jọ na, ọ fo ho.’ 27 Evaọ ẹdẹ avọ ivẹ, koyehọ ẹdẹ nọ o lele ẹdẹ ehaa ọvẹre ọkpokpọ na, agbara Devidi ọ tẹ gbẹ jọ ofofe. Sọl ọ tẹ nọ Jonatan ọmọzae riẹ nọ: “Fikieme ọmọzae Jẹsi na+ ọ gbẹ nyaziọ emuọriọ na odẹnukpo gbe inẹnẹ hẹ?” 28 Jonatan ọ tẹ ta kẹ Sọl nọ: “Devidi ọ lẹ omẹ nọ mẹ kẹe uvẹ re o kpobọ Bẹtlẹhẹm.+ 29 Ọ ta nọ, ‘Ivie kẹ omẹ uvẹ re mẹ nya, keme ahwo uviuwou mẹ a gwọlọ dhe idhe jọ evaọ okpẹwho na, yọ oniọvo mẹ ọ ta nọ mẹ nya. Fikiere otẹrọnọ who rri omẹ aro, ivie kẹ omẹ uvẹ re mẹ lẹlẹ nyae ruẹ inievo mẹ.’ Oyejabọ nọ ọ gbẹ re nyaze emuọriọ na ha na.” 30 Sọl o te mu ofu kẹ Jonatan gaga, ọ tẹ ta nọ: “Whẹ ọmọ ọwọsuọ na, kọ who roro nọ mẹ riẹ nọ abọ ọmọzae Jẹsi na whọ rrọ họ? Oma o te vuọ owhẹ jẹ vuọ oni ra.* 31 Nọ ọmọzae Jẹsi ọ rrọ uzuazọ evaọ otọakpọ na, whẹ avọ uvie ra wha te sai dikihẹ hẹ.+ Fikiere vi ohwo nyae rehọ iẹe se omẹ obọnana, keme o re whu hrọ.”*+

32 Rekọ Jonatan ọ tẹ ta kẹ Sọl ọsẹ riẹ nọ: “Fikieme a re ro kpei?+ Eme o ru?” 33 Fikiere Sọl ọ tẹ rehọ ozuẹ na fi ei,+ Jonatan ọ tẹ riẹ nọ ọsẹ riẹ ọ ginẹ gbaemu nọ o re kpe Devidi no.+ 34 Jonatan ọ tẹ nwane kpama no emẹjẹ na avọ ofu, ọ gbẹ re uvumọ emu evaọ ẹdẹ avọ ivẹ na ha, koyehọ ẹdẹ nọ o lele ẹdẹ ehaa ọvẹre ọkpokpọ na, keme eva e jẹ dhae fiki ẹme Devidi na,+ yọ ọsẹ obọriẹ o kpomovuọ họ iẹe oma.

35 Evaọ ohiohiẹ, Jonatan ọ tẹ nya kpobọ ẹwọ na wọhọ epanọ avọ Devidi a ta fihọ, yọ odibo ọmaha jọ ọ jọ kugbei.+ 36 Ọ tẹ ta kẹ odibo riẹ nọ: “Ivie dhẹ nyae gwọlọ ese nọ mẹ te sa na.” Odibo na ọ tẹ dhẹ nya, Jonatan ọ tẹ sa ose na kpobọ aro odibo riẹ na. 37 Nọ odibo na o te oria nọ Jonatan ọ sa ose na nya na, Jonatan ọ tẹ kpaunu sei nọ: “Kọ ogbẹrọnọ obaro ra ose na o rrọ?” 38 Jonatan ọ tẹ wariẹ kpaunu se odibo na nọ: “Siawọ! Nya ovovẹrẹ! Whọ raha oke he!” Odibo Jonatan ọ tẹ tọlọ ese na, o te zihe bru olori riẹ ze. 39 Odibo na ọ riẹ otọ oware nọ o jẹ via na vievie he; Jonatan avọ Devidi ọvo a riẹ otọ oware nọ o jẹ via na. 40 Kẹsena Jonatan ọ tẹ rehọ ekwakwa ẹmo riẹ kẹ odibo riẹ, ọ tẹ ta kẹe nọ: “Wha ai kpobọ okpẹwho na.”

41 Nọ odibo na ọ nyavrẹ no, Devidi o te no oria jọ nọ o kẹle etẹe ze evaọ ofẹ obọze ovatha-ọre. O te kigwẹ vovao tuotọ je guzou kpotọ isiasa, a tẹ viọlọ ohwohwo jẹ be viẹ kẹ ohwohwo, rekọ Devidi ọ mae viẹ. 42 Jonatan ọ tẹ ta kẹ Devidi nọ: “Nya tou, keme mẹ avọ owhẹ ma rọ odẹ Jihova duwu iyei no,+ inọ, ‘Jọ Jihova ọ jọ udevie mẹ avọ owhẹ gbe udevie emọ* mẹ avọ emọ* ra bẹdẹ bẹdẹ.’”+

Kẹsena Devidi ọ tẹ kpama, ọ tẹ nyavrẹ, Jonatan o te zihe kpobọ okpẹwho na.

21 Devidi ọ tẹ nyabru Ahimẹlẹk ozerẹ na evaọ Nọb.+ Nọ Ahimẹlẹk ọ ruẹ Devidi, o te muhọ enuhu avọ ozọ, ọ tẹ nọe nọ: “Eme whẹ ọvo whọ rọ rrọ usu, nọ ohwo ọvo o gbe lele owhẹ hẹ?”+ 2 Devidi o te yo kẹ Ahimẹlẹk ozerẹ na nọ: “Ovie na ọ vuẹ omẹ nọ me ru oware jọ, rekọ ọ ta kẹ omẹ nọ, ‘Who ru re ohwo ọvo ọ riẹ kpahe uwou nọ me bi vi owhẹ na ha, gbe epanọ mẹ ta nọ who ru na.’ Mẹ ta kẹ emoha nọ i bi lele omẹ nọ ma te ruẹ ẹro evaọ oria jọ. 3 Whaọ otẹrọnọ who wo ikulu ebrẹdi isoi jọ, rehọ ae kẹ omẹ, hayo kẹ omẹ oware kpobi nọ a rẹ re nọ who wo.” 4 Rekọ ozerẹ na ọ tẹ ta kẹ Devidi nọ: “Me wo ebrẹdi gheghe ọvo ho, rekọ ebrẹdi ọrẹri ọ riẹ+—emoha na e sae re ebrẹdi na otẹrọnọ a ri fou oma kẹle eyae kẹle he.”*+ 5 Devidi ọ tẹ ta kẹ ozerẹ na nọ: “Evaọ uzẹme, ma ri lele eyae wezẹ hẹ wọhọ epanọ o be hae jọ okenọ me te kpohọ ẹmo na.+ Otẹrọnọ emoha na e be hae jọ ọrẹri evaọ okenọ a te vi ai uwou gheghe, kabikọ inẹnẹ na a rẹ jọ ọrẹri hi!” 6 Fikiere ozerẹ na ọ tẹ kẹe ebrẹdi ọrẹri na,+ keme ebrẹdi ọfa ọ jariẹ hẹ ajokpaọ ebrẹdi udhesẹ na nọ a tọlọ no aro Jihova, enọ a rẹ rehọ ebrẹdi ekpokpọ nwene evaọ ẹdẹ nọ a rẹ rọ tọlọ ai no na.

7 Whaọ odibo Sọl jọ nọ a kru fihọ aro Jihova ọ jọ etẹe evaọ ẹdẹ yena. Odẹ riẹ họ Doẹg,+ ohwo Edọm+ nọ o wuzou ithuru-igodẹ Sọl.

8 Kẹsena Devidi ọ tẹ ta kẹ Ahimẹlẹk nọ: “Kọ who wo ozuẹ hayo ọgbọdọ jọ evaọ etenẹ? Mẹ wha ọgbọdọ mẹ hayo ekwakwa ẹmo mẹ lele oma ha, keme ovovẹrẹ ovie o ro vi omẹ uwou na.” 9 Ozerẹ na ọ tẹ ta nọ: “Ọgbọdọ Goliat ohwo+ Filistia nọ who kpe evaọ Ukiekpotọ* Ilah+ na ọ rrọ etenẹ, a rehọ ohọ variẹ iẹe evaọ emu ẹfọd na.+ Whọ tẹ gwọlọ tọlọ iẹe kẹ omara, tọlọ iẹe, keme ọgbọdọ yena ọvo ọ rrọ etenẹ.” Devidi ọ tẹ ta nọ: “Ọgbọdọ nọ ọ wọhọ e riẹ ọ rrọ họ. Rehọ iẹe kẹ omẹ.”

10 Devidi ọ tẹ wọ evaọ ẹdẹ yena gbẹ be dhẹ+ fiki Sọl, ọ tẹ nyabru Ekish, ovie Gat.+ 11 Idibo Ekish e tẹ ta kẹe nọ: “Kọ ogbẹrọnọ Devidi ọna, ovie ẹkwotọ na? Kọ ogbẹrọnọ fiki riẹ a je ro gbile jẹ so nọ,

‘Sọl o kpe ewegrẹ idu,

Devidi o te kpe ewegrẹ idu ikpe eko buobu’?”+

12 Devidi o te se eme nana gboja, ozọ Ekish ovie Gat u te je mu ei gaga.+ 13 Fikiere o te je ru wọhọ ohwo nọ ọ be mọ oruẹ+ evaọ udevie rai.* O te je si isi fihọ ethẹ unuẹthẹ okpẹwho na yọ eya i bi su no enu riẹ ze fihọ etuagba riẹ. 14 Ukuhọ riẹ, Ekish ọ tẹ ta kẹ idibo riẹ nọ: “Wha ruẹ nọ ọzae nana ọ be mọ oruẹ! Fikieme wha rọ rehọ iẹe se omẹ? 15 Kọ eruẹ nọ e rrọ obonẹ i te he wha rọ rehọ ọfa ze kugbe ai? Kọ ohwo otiọnana ọ rẹ ruọ eva uwou mẹ?”

22 Fikiere Devidi o te no etẹe+ dhẹ kpohọ eghogho-utho nọ o rrọ Adọlam.+ Nọ inievo-emezae riẹ gbe unuwou ọsẹ riẹ soso a yo kpahe iẹe, a tẹ nyabru ei evaọ obei. 2 Ahwo kpobi nọ a wo ẹbẹbẹ gbe enọ e riesa gbe enọ eware e vẹso no* a te kokohọ bru ei, ọ tẹ jọ ọnọ o wuzou rai. Enwenọ ezae egba ene (400) e jọ kugbei.

3 Uwhremu na, Devidi o te no etẹe kpohọ Mizpẹ evaọ Moab, ọ tẹ ta kẹ ovie Moab nọ:+ “Ivie, jọ ọsẹ gbe oni mẹ a jọ kugbe owhẹ bẹsenọ mẹ rẹ riẹ onọ Ọghẹnẹ o ti ru kẹ omẹ.” 4 Fikiere ọ tẹ nyase ae ba kẹ ovie Moab, a tẹ rria kugbei evaọ etoke nọ Devidi ọ rọ jọ oria nọ u siomano evaọ ugbehru na.+

5 Nọ u te oke jọ, Gad+ ọruẹaro na ọ tẹ ta kẹ Devidi nọ: “Whọ gbẹ rria oria nọ u siomano na ha. No etẹe kpobọ ẹkwotọ Juda.”+ Fikiere Devidi o te no etẹe, ọ tẹ nya kpobọ owhawho Hirẹt.

6 Sọl o te yo nọ a ruẹ Devidi avọ ahwo nọ a rrọ kugbei no. Evaọ oke yena yọ Sọl ọ keria otọ ure tamarisk nọ o rrọ oria ukpehru evaọ Gibiah+ avọ ozuẹ riẹ nọ o kru họ obọ. Yọ idibo riẹ kpobi i dikihẹ wariẹe họ. 7 Sọl ọ tẹ ta kẹ idibo riẹ nọ i dikihẹ wariẹe họ na nọ: “Ivie, wha gaviezọ, whai ahwo orua Bẹnjamin. Kọ ọmọzae Jẹsi+ na ọ te sae kẹ owhai kpobi idhu gbe egbọ evaene wọhọ omẹ? Kọ ọ te rehọ owhai kpobi mu iletu itu ahwo idu gbe iletu itu ahwo udhusoi?+ 8 Whai kpobi na wha wọso omẹ! Ohwo ọvo ọ vuẹ omẹ hẹ okenọ ọmọzae obọmẹ ọ re ọvọ kugbe ọmọzae Jẹsi!+ Uvumọ ohwo evaọ usu rai ọ sae re ohrọ mẹ re ọ vuẹ omẹ hẹ inọ ọmọzae obọmẹ o bi ru odibo mẹ dhere hẹrẹ omẹ wọhọ epanọ o be via nẹnẹ na.”

9 Kẹsena Doẹg+ ohwo Edọm na, ọnọ o wuzou idibo Sọl nọ e jọ etẹe, ọ tẹ ta nọ:+ “Mẹ ruẹ ọmọzae Jẹsi na nọ ọ nyabru Ahimẹlẹk ọmọzae Ahaetọb ze evaọ Nọb.+ 10 Ahimẹlẹk ọ nekpẹ mi Jihova kẹe jẹ kẹe emu nọ a rẹ re. Ọ tubẹ rehọ ọgbọdọ Goliat ohwo Filistia na kẹe dede.”+ 11 Ovie na ọ tẹ nwani vi ahwo nyai se Ahimẹlẹk ọmọzae Ahaetọb ozerẹ na gbe izerẹ unuwou ọsẹ riẹ kpobi nọ e jọ Nọb ze. Aikpobi a tẹ nyabru ovie na ze.

12 Sọl ọ tẹ ta nọ: “Ivie, gaviezọ, whẹ ọmọzae Ahaetọb!” Ahimẹlẹk o te yo kẹe nọ: “Me bi yo, olori mẹ.” 13 Sọl ọ tẹ ta kẹe nọ: “Fikieme whẹ avọ ọmọzae Jẹsi na wha ro kuomagbe be wọso omẹ, nọ whọ rọ kẹe ebrẹdi gbe ọgbọdọ jẹ nekpẹ mi Ọghẹnẹ kẹe? Ọ be wọso omẹ je bi dhere hẹrẹ omẹ wọhọ epanọ o be via nẹnẹ na.” 14 Ahimẹlẹk ọ tẹ ta kẹ ovie na nọ: “Ono evaọ usu idibo ra na kpobi a rẹ sai fievahọ wọhọ Devidi?+ Ọgọ ovie+ na ọ rrọ, ọ tẹ jẹ rrọ ọnọ o wuzou egbaẹmo nọ i re rou owhẹ, yọ a rẹ kẹe ọghọ evaọ uwou ra.+ 15 Kọ nẹnẹ họ orọ ọsosuọ nọ mẹ be rọ nekpẹ mi Ọghẹnẹ kẹe?+ Oware nọ o sae ziọ omẹ iroro vievie he whọ be ta na! Jọ ovie na ọ dha eva kẹ odibo riẹ avọ unuwou ọsẹ mẹ soso ho, keme odibo ra ọ riẹ oware ovo kpahe ẹme nana vievie he.”+

16 Rekọ ovie na ọ tẹ ta nọ: “Whọ te seba ewhu hu,+ Ahimẹlẹk, te owhẹ te unuwou ọsẹ ra kpobi.”+ 17 Ovie na ọ tẹ ta kẹ isoja* nọ i dikihẹ wariẹe họ na nọ: “Wha kuomarẹriẹ re wha kpe izerẹ Jihova na no, keme a rrọ abọ Devidi! A riẹ nọ ẹdhẹ ọ jẹ dhẹ, rekọ a vuẹ omẹ hẹ!” Rekọ idibo ovie na a gwọlọ nọ a rẹ rehọ obọ rai kpe izerẹ Jihova ha. 18 Ovie na ọ tẹ ta kẹ Doẹg nọ:+ “Whẹ, kuomarẹriẹ re who kpe izerẹ na no!” Doẹg ohwo Edọm+ na ọ tẹ nwane nya, o te kpe izerẹ na no. Evaọ ẹdẹ yena o kpe ezae udhone-gbisoi nọ i ku ẹfọd nọ a rọ ohọ-olọlọhọ ko họ.+ 19 Ọ tẹ jẹ rehọ ọgbọdọ kpe ahwo kpobi nọ a rrọ Nọb,+ okpẹwho izerẹ na; te ọzae te aye, te ọmaha te ọmọboba, te eruẹ, te eketekete, gbe ogodẹ, ọ rehọ ọgbọdọ kpe.

20 Rekọ ọmọzae Ahimẹlẹk jọ, ọmọzae Ahaetọb na, nọ a re se Abayata+ ọ tẹ dhẹ vabọ, ọ tẹ dhẹ bru Devidi. 21 Abayata ọ tẹ ta kẹ Devidi nọ: “Sọl o kpe izerẹ Jihova no.” 22 Devidi ọ tẹ ta kẹ Abayata nọ: “Mẹ riẹ nọ Doẹg ohwo Edọm nọ ọ jọ etẹe evaọ ẹdẹ yena,+ ọ te siọ Sọl ba ẹvuẹ hẹ. Mẹ họ ọnọ o si uwhu kpe ohwo* kpobi nọ ọ rrọ unuwou ọsẹ ra. 23 Jọ kugbe omẹ. Jọ ozọ u mu owhẹ hẹ, ohwo kpobi nọ ọ be gwọlọ uzuazọ* ra, yọ uzuazọ* mẹ ọ be gwọlọ na; mẹ te thọ owhẹ.”+

23 Nọ u te oke jọ, a tẹ vuẹ Devidi nọ: “Ahwo Filistia a be họre ahwo Kaela,+ yọ a be kwa emu rai rehọ evaọ eria nọ a rẹ jọ si ibi no igbe ekakọ.” 2 Fikiere Devidi ọ tẹ nekpẹ mi Jihova nọ:+ “Kọ mẹ nya re mẹ họre ahwo Filistia na?” Jihova ọ tẹ ta kẹ Devidi nọ: “Nyae họre ahwo Filistia na re who siwi Kaela.” 3 Rekọ ezae nọ i je lele Devidi na e tẹ ta kẹe nọ: “Whaọ, ma rrọ Juda yọ ozọ u bi mu omai;+ kabikọ okenọ ma tẹ nyae họre egbaẹmo ahwo Filistia+ evaọ Kaela!” 4 Fikiere Devidi ọ tẹ wariẹ nekpẹ mi Jihova.+ Jihova ọ tẹ kẹe uyo nọ: “Kparoma; nya kpobọ Kaela keme mẹ te rehọ ahwo Filistia na họ obọ ra.”+ 5 Fikiere Devidi avọ ahwo riẹ a tẹ nya kpobọ Kaela, a tẹ họre ahwo Filistia na; o te mu erao rai kpo je kpe ibuobu rai, Devidi ọ tẹ rọ ere siwi ahwo nọ a jẹ rria Kaela.+

6 Whaọ okenọ Abayata+ ọmọzae Ahimẹlẹk ọ rọ dhẹ bru Devidi evaọ Kaela, ọ wha ẹfọd lele oma. 7 A tẹ vuẹ Sọl nọ: “Devidi ọ nyaze Kaela no.” Sọl ọ tẹ ta nọ: “Ọghẹnẹ ọ rehọ e riẹ họ obọ mẹ no,*+ keme ọ kare omobọ riẹ dhe no nọ ọ ruọ okpẹwho nọ o wo ethẹ avọ ekpọ nọ a rọ kare ethẹ na.” 8 Fikiere Sọl o te koko ahwo na kpobi họ kẹ ẹmo re a kpobọ Kaela je ko Devidi avọ ahwo riẹ họ. 9 Nọ Devidi o yo nọ Sọl ọ be gba ẹgwae omuomu kpahe iẹe, ọ tẹ ta kẹ Abayata ozerẹ na nọ: “Rehọ ẹfọd na ze.”+ 10 Kẹsena Devidi ọ tẹ ta nọ: “O Jihova Ọghẹnẹ Izrẹl, odibo ra o yo nọ Sọl ọ gwọlọ nyaze Kaela re ọ raha okpẹwho na fiki mẹ.+ 11 Kọ isu* Kaela a te rehọ omẹ kẹe? Kọ Sọl ọ te nyaze wọhọ epanọ odibo ra o yo na? O Jihova Ọghẹnẹ Izrẹl, ivie vuẹ odibo ra.” Fikiere Jihova ọ tẹ ta nọ: “Ọ te nyaze.” 12 Devidi ọ tẹ nọ nọ: “Kọ isu Kaela a te rehọ omẹ avọ ahwo mẹ kẹ Sọl?” Jihova ọ tẹ kẹe uyo nọ: “A te rehọ owhai kẹe.”

13 Devidi avọ ahwo riẹ nọ i bu te oware wọhọ egba ezeza (600) a tẹ nwane wọ,+ a te no Kaela, a te kpohọ oria kpobi nọ u te rai obọ. Nọ a vuẹ Sọl nọ Devidi ọ dhẹ no Kaela no, ọ gbẹ nyai lei hi. 14 Devidi ọ tẹ jọ eria nọ e rẹ bẹ ẹnyaruọ evaọ udhude na, evaọ ubrotọ igbehru udhude Zif.+ Sọl ọ jẹ gwọlọ iẹe kẹse kẹse,+ rekọ Jihova ọ rehọ e riẹ họ obọ riẹ hẹ. 15 Nọ Devidi ọ jọ udhude Zif evaọ Horẹsh na, ọ riẹ nọ* Sọl ọ wọ lahwe be gwọlọ uzuazọ* riẹ.

16 Jonatan ọmọzae Sọl ọ tẹ nyabru Devidi evaọ Horẹsh, ọ tẹ tuduhọ iẹe awọ* re o fievahọ Jihova.+ 17 Ọ ta kẹe nọ: “Jọ ozọ u mu owhẹ hẹ, keme Sọl ọsẹ mẹ ọ te ruẹ owhẹ hẹ; whọ te jọ ovie Izrẹl,+ mẹ vẹ te rọ kẹle owhẹ; yọ Sọl ọsẹ mẹ ọ riẹ onana re.”+ 18 Kẹsena aimava na a tẹ re ọvọ+ evaọ aro Jihova, Devidi ọ tẹ gbẹ jọ Horẹsh, Jonatan o te kpobọ uwou riẹ.

19 Uwhremu na ahwo Zif a tẹ nyabru Sọl evaọ Gibiah,+ a tẹ ta kẹe nọ: “Kọ whọ gbẹ riẹ nọ Devidi o dhere kẹle omai+ evaọ eria nọ e rẹ bẹ ẹnyaruọ evaọ Horẹsh,+ evaọ ukpehru Hakaela+ nọ o rrọ obọze ovatha-ọre* Jeshaemọn?*+ 20 O ovie, whọ sae nyaze oke kpobi nọ o were owhẹ,* ma te rehọ iẹe họ obọ ovie na.”+ 21 Fikiere Sọl ọ tẹ ta nọ: “Jọ Jihova ọ ghale owhai, keme wha dhesẹ ọdawẹ kẹ omẹ no. 22 Ivie wha nya re wha gwọlọ ugogo oria nọ ọ rrọ gbe ohwo nọ ọ ruẹ e riẹ evaọ etẹe, keme a vuẹ omẹ nọ o wo ẹghẹ gaga. 23 Wha romatotọ kiẹ eria kpobi nọ o re dhere, wha ve zihe ze avọ oware nọ o kẹ owhai imuẹro na. Me ve ti lele owhai nya, yọ ọ tẹ rrọ ẹkwotọ na, mẹ te gwọlọ iẹe via evaọ udevie idu ahwo* Juda soso.”

24 Fikiere a tẹ kake rọ Sọl nyavrẹ kpobọ Zif,+ yọ Devidi avọ ezae nọ i je lele iei a jọ udhude Meọn,+ evaọ Araba*+ nọ o rrọ obọze ovatha-ọre Jeshaemọn. 25 Kẹsena Sọl avọ ezae nọ e jọ kugbei a tẹ nyaze te gwọlọ iẹe.+ Nọ a vuẹ Devidi, ọ tẹ nwane nya kpobọ eva eghogho-utho na+ ọ tẹ jọ udhude Meọn. Nọ Sọl o yo nọ ọ rrọ obei, ọ tẹ gwọlọ Devidi kpobọ udhude Meọn. 26 Okenọ Sọl ọ ziọ abọjọ ugbehru na yọ Devidi avọ ahwo riẹ a rrọ abọdekọ ugbehru na. Devidi o te je ru ovovẹrẹ re ọ dhẹ siọ+ Sọl ba, rekiyọ Sọl avọ ahwo riẹ a be kẹle Devidi avọ ahwo riẹ no re a mu ai.+ 27 Rekọ ọnyukọ jọ ọ tẹ nyaze te vuẹ Sọl nọ: “Nyaze ovovẹrẹ, keme ahwo Filistia a wọ ze ẹkwotọ na no!” 28 Fikiere Sọl ọ tẹ siọ Devidi ba ele,+ ọ tẹ nyae họre ahwo Filistia na. Fikioye a ro se oria yena Ugbehru-utho Ẹhẹriẹ na.

29 Kẹsena Devidi o te no etẹe, ọ tẹ jọ eria nọ e rẹ bẹ ẹnyaruọ evaọ Ẹn-gẹdi.+

24 Nọ Sọl ọ nwani zihe no obọ ahwo Filistia nọ o je le ze no, a tẹ vuẹe nọ: “Rri! Devidi ọ rrọ obọ udhude Ẹn-gẹdi.”+

2 Fikiere Sọl ọ tẹ rehọ ezae idu esa (3,000) nọ a jọ Izrẹl soso salọ, ọ tẹ nyae gwọlọ Devidi avọ ahwo riẹ evaọ eria igbehru-itho nọ ewe igbehru e rẹ jọ. 3 Sọl ọ tẹ nyate uwou-igodẹ itho nọ o jọ akotọ edhere na, nọ eghogho-utho o jọ, ọ tẹ ruọ obeva riẹ re o kuame,* oke yena yọ Devidi avọ ahwo riẹ a keria eria nọ i siomano evaọ obemu eghogho-utho na.+ 4 Ahwo Devidi a tẹ ta kẹe nọ: “Nẹnẹ họ ẹdẹ nọ Jihova ọ be ta kẹ owhẹ nọ, ‘Rri! Mẹ be rehọ ọwegrẹ ra họ obọ ra,+ whọ sai ru ei oware kpobi nọ o were owhẹ.’” Fikiere Devidi ọ tẹ kpama, ọ tẹ lẹlẹ bru ozọ ewu Sọl nọ o wo abọ họ no. 5 Rekọ nọ Devidi o ru ere no, udu* riẹ u te je brukpei+ fikinọ o bru ozọ ewu Sọl nọ o wo abọ họ no. 6 Ọ tẹ ta kẹ ahwo riẹ nọ: “Mẹ sai ru olori mẹ oware utioye vievie he, keme ọnọ Jihova o wholo ọ rrọ. O te were Jihova ha nọ mẹ tẹ kpare obọ mẹ rọsuọ ọnọ Jihova o wholo.”+ 7 Ere Devidi ọ rọ rehọ eme nana whaha ahwo riẹ* re a siọ oware nọ a je ti ru Sọl ba eru, ọ kẹ rai uvẹ re a nwae oma ha. Kẹsena Sọl o te no eghogho-utho na ze, o te muhọ ẹnyavrẹ.

8 Devidi ọ tẹ kpama no eva eghogho-utho na ze, ọ tẹ kpaunu se Sọl nọ: “Olori mẹ ovie!”+ Nọ Sọl o rri emu, Devidi o te kigwẹ guzou kpotọ je kiẹzẹ vovao tuotọ. 9 Devidi ọ tẹ ta kẹ Sọl nọ: “Fikieme whọ be rọ kezọ kẹ eme nọ ahwo a be ta inọ, ‘Binọ Devidi ọ be gwọlọ nwa owhẹ oma’?+ 10 Nẹnẹ na whọ rehọ ibiaro obọra ruẹ epanọ Jihova ọ rọ rehọ owhẹ họ obọ mẹ evaọ eghogho-utho na. Rekọ nọ ohwo jọ ọ ta nọ me kpe owhẹ no,+ mẹ re ohrọ ra, mẹ tẹ ta nọ, ‘Mẹ rẹ kpare obọ mẹ rọsuọ olori mẹ hẹ, keme ọnọ Jihova o wholo ọ rrọ.’+ 11 Rri, ọsẹ mẹ, rri ozọ ewu ra nọ o rrọ omẹ obọ; okenọ me ro bru ozọ ewu ra na, mẹ hae sai kpe owhẹ no, rekọ me kpe owhẹ hẹ. Whọ sae ruẹ je vuhumu enẹna nọ mẹ gwọlọ nwa owhẹ oma hayo wọso owhẹ hẹ, yọ me ru owhẹ oware ovo thọ họ,+ rekọ whọ be jọ oria kpobi gwọlọ uzuazọ* mẹ kpe.+ 12 Jọ Jihova o bruoziẹ mẹ avọ owhẹ,+ re Jihova o ru owhẹ kele kẹ omẹ,+ rekọ obọ mẹ u ti te owhẹ hẹ.+ 13 Nwane wọhọ epanọ a bru ohare no anwae ze nọ, ‘Ohwo omuomu ọye o re ru oware umuomu,’ fikiere mẹ te rehọ obọ mẹ te owhẹ hẹ. 14 Ono ovie Izrẹl ọ be gwọlọ? Ono who bi le? Kọ arakọ nọ o whu no? Kọ uthu* gheghe?+ 15 Jọ Jihova ọ jọ obruoziẹ na, o ti guẹdhọ mẹ avọ owhẹ, ọ te kiẹ ẹme na riwi je dikihẹ kẹ omẹ,+ o ve ti bruoziẹ mẹ je siwi omẹ no obọ ra.”

16 Nọ Devidi ọ nwane ta eme nana kẹ Sọl no, Sọl ọ tẹ nọe nọ: “Kọ uvou ra me bi yo na, Devidi ọmọzae mẹ?”+ Sọl o te mu enu oviẹ họ eku. 17 Ọ ta kẹ Devidi nọ: “Who kiẹrẹe vi omẹ, keme whọ riẹ omẹ ru, mẹ tẹ rehọ eyoma hwosa kẹ owhẹ.+ 18 Nẹnẹ na who dhesẹ via kẹ omẹ no inọ whọ be riẹ omẹ ru, keme who kpe omẹ hẹ nọ Jihova ọ rehọ omẹ họ obọ ra.+ 19 Ono ọwegrẹ riẹ o re kie ruọ abọ o ve siobọnoi vrẹ omakọkọ? Jihova ọ te rehọ ewoma hwa kẹ owhẹ+ fiki oware nọ who ru kẹ omẹ nẹnẹ na. 20 Whaọ enẹna rri, mẹ riẹ nọ whọ te siọ ovie ba ẹjọ họ,+ yọ uvie Izrẹl o te tọ evaọ obọ ra. 21 Rehọ odẹ Jihova duwu iyei kẹ omẹ+ nọ who ti voro uyẹ* mẹ no ho nọ me te whu no, gbe nọ who ti voro odẹ mẹ no unuwou ọsẹ mẹ hẹ.”+ 22 Fikiere Devidi o te duwu iyei kẹ Sọl, kẹsena Sọl o te kpo.+ Rekọ Devidi avọ ahwo riẹ a te kpohọ oria nọ u siomano na.+

25 Nọ u te oke jọ, Samuẹle+ o te whu; ahwo Izrẹl kpobi a te kokohọ re a weri fiki riẹ, re a je ki ei fihọ uwou riẹ evaọ Rema.+ Kẹsena Devidi ọ tẹ wọ, o te kpobọ udhude Peran.

2 Whaọ ọzae jọ ọ jọ Meọn+ nọ ọ jẹ kọ okọ evaọ obọ Kamẹl.*+ Ọzae na o fe gaga; o wo igodẹ idu esa (3,000) gbe ewe odu ọvo (1,000), yọ evaọ oke yena o je bru eto igodẹ riẹ evaọ Kamẹl. 3 Odẹ ọzae na Nebale,+ odẹ aye riẹ kọ Abigẹle.+ Aye na o wo areghẹ gaga o te je wo erru, rekọ ọzae riẹ nọ o no uyẹ Kelẹb+ ze ọ jẹ hai dhuaro, o te je wo ekpehre uruemu.+ 4 Devidi ọ tẹ jọ obọ udhude na yo nọ Nebale o bi bru eto igodẹ riẹ. 5 Fikiere Devidi o te vi emoha ikpe bru ei, Devidi ọ ta kẹ emoha na nọ: “Wha nya kpobọ Kamẹl, nọ wha te te oria Nebale, wha ta kẹe nọ me vi owhai ze te nọe epanọ eware e rrọ kẹe. 6 Wha vẹ ta nọ, ‘Jọ whọ rria tọ, jọ udhedhẹ u te owhẹ je te ahwo uwou ra gbe eware kpobi nọ who wo. 7 Whaọ me yo nọ who bi bru eto igodẹ ra. Yọ okenọ ithuru-igodẹ ra e jọ kugbe omai, ma ru rai oware uyoma ovo ho,+ uvumọ oware rai u vru hu evaọ etoke nọ a jọ obọ Kamẹl na. 8 Whọ tẹ nọ emoha ra, a te vuẹ owhẹ. Rri emoha mẹ aro keme oke evawere* ma rọ nyaze na. Ivie, kẹ idibo ra gbe Devidi ọmọzae ra oware kpobi nọ whọ sai siobọno.’”+

9 Emoha nọ Devidi o vi na a tẹ nya, a tẹ rehọ odẹ Devidi ta eme nana kpobi kẹ Nebale. Nọ a ta re no, 10 Nebale ọ tẹ kpahe kẹ idibo Devidi nọ: “Ono họ Devidi, kọ ono họ ọmọzae Jẹsi? Idibo ọgbọna buobu a be dhẹ siọ ega rai ba.+ 11 Kọ mẹ rẹ rehọ ebrẹdi mẹ gbe ame mẹ gbe erao nọ me kpe kẹ ahwo nọ a bi bru eto igodẹ mẹ, mẹ vẹ rehọ ai kẹ ahwo jọ nọ a ghoro no obojọ nọ mẹ riẹ hẹ ze?”

12 Emoha nọ Devidi o vi na a te zihe, a tẹ vuẹ Devidi eme nana kpobi. 13 Devidi ọ tẹ nwane ta kẹ ahwo riẹ nọ: “Ohwo kpobi ọ gba ọgbọdọ riẹ fihọ oma!”+ Aikpobi a tẹ gba egbọdọ rai fihọ oma, Devidi omariẹ ọ tẹ gba ọgbọdọ riẹ fihọ oma re, ezae nọ i bu te oware wọhọ egba ene (400) i te lele Devidi, yọ ezae egba ivẹ (200) e jọ kugbe ekwakwa rai.

14 Evaọ oke yena, omọvo idibo na jọ ọ tẹ vuẹ Abigẹle, aye Nebale nọ: “Binọ Devidi o vi enyukọ no obọ udhude na ze ti yere ọga mai, rekọ ọga mai o te je ku eka họ ai oma.+ 15 Ezae yena e jẹ riẹ omai ru gaga. Evaọ etoke nọ ma rọ jọ kugbe ai evaọ obọ ẹwọ na, a ru omai oware uyoma ovo ho, yọ uvumọ oware mai u vru hu.+ 16 A jẹ thọ omai wọhọ ugbẹhẹ nọ o wariẹ omai họ te aso te uvo evaọ etoke nọ ma jọ kugbe ai nọ ma jẹ rẹrote uthuru na. 17 Jiroro oware nọ who ti ru obọnana keme okpẹtu o bi ti te ọga mai gbe uwou riẹ soso,+ yọ whọ riẹ nọ ọga mai o re yo ẹme ohwo ho keme o fioka ohwo ho.”*+

18 Fikiere Abigẹle+ ọ tẹ nwane rehọ ikulu ebrẹdi egba ivẹ (200), ekana udi ilogbo ivẹ, igodẹ isoi nọ a va no, eka nọ a sasa* nọ e rẹ vọ owawọ siya* isoi, ikeki resin udhusoi (100), gbe ikeki ifigi egba ivẹ (200), ọ tẹ wọ aikpobi fihọ ehru eketekete.+ 19 Kẹsena Abigẹle ọ tẹ ta kẹ idibo riẹ nọ: “Wha kobaro; me ti lele owhai.” Rekọ ọ vuẹ Nebale, ọzae riẹ oware ovo ho.

20 Nọ ọ rrọ ehru eketekete na be nyavrẹ na, yọ Devidi avọ ahwo riẹ a be nya rri obonọ ọ rrọ na, rekọ ugbehru na u ru nọ a gbẹ jẹ ruẹ e riẹ hẹ, ẹsiẹvo na o te zere ai. 21 Whaọ Devidi ọ jẹ ta nọ: “Uye nọ mẹ ruẹ rọ rẹrote eware ọzae nana evaọ obọ udhude na kọ uvrẹvru. Uvumọ oware riẹ u vru hu,+ rekọ ọ be rọ eyoma hwosa ewoma nọ me ru kẹe.+ 22 Jọ Ọghẹnẹ o ru epọvo na kẹ ewegrẹ Devidi* je ru vrẹ ere otẹrọnọ mẹ tẹ kuvẹ re ọzae* jọ evaọ uwou riẹ ọ gbẹ jọ uzuazọ rite ohiohiẹ odẹnotha.”

23 Nọ Abigẹle ọ nwane kparo ruẹ Devidi, ọ tẹ rọ ovovẹrẹ no eketekete na ruọ otọ, o te kigwẹ vovao tuotọ evaọ aro Devidi. 24 Kẹsena o te kie fihọ awọ riẹ, ọ tẹ ta nọ: “Olori mẹ, jọ afuẹwẹ na ọ jọ uzou mẹ; jọ odibo ọmọtẹ ra ọ ta ẹme kẹ owhẹ, re whọ jẹ gaviezọ kẹ eme odibo ọmọtẹ ra. 25 Ivie, jọ olori mẹ ọ daezọ Nebale nana nọ o fioka ha na ha,+ keme ọ nwane rrọ wọhọ odẹ riẹ. Nebale* họ odẹ riẹ, yọ ugheghẹ o da riẹ oma fia. Rekọ mẹ odibo ọmọtẹ ra, mẹ ruẹ emoha nọ olori mẹ o vi ze na ha. 26 Whaọ, olori mẹ, nọ Jihova ọ rrọ uzuazọ na, whẹ omara* ọ tẹ jẹ rrọ uzuazọ na, Jihova họ ọnọ ọ whaha owhẹ na+ re whọ siọ abe azẹ ba ẹriọ,+ ọ tẹ jẹ whaha owhẹ re whọ gbẹ rọ obọ ra kioja ha.* Jọ ewegrẹ ra gbe enọ e be gwọlọ ru olori mẹ oware uyoma a jọ wọhọ Nebale. 27 Jọ a rehọ okẹ*+ nana nọ odibo ọmọtẹ ra o ro se olori mẹ na kẹ emoha nọ i bi lele olori mẹ na.+ 28 Ivie, rehọ oruthọ odibo ọmọtẹ ra rọvrẹ riẹ, keme Jihova ọ te siọ uwou ebẹdẹ bẹdẹ ba ẹbọ kẹ olori mẹ hẹ,+ fikinọ olori mẹ o bi fi emo Jihova,+ yọ a re jọ oma ra ruẹ eyoma ọvo ẹdẹvo ho.+ 29 Nọ ohwo jọ o te bi le owhẹ, be gwọlọ uzuazọ* ra kpe, Jihova Ọghẹnẹ ra ọ te nabe fare uzuazọ* olori mẹ uko fihọ ẹkpa uzuazọ, rekọ a ti gbolo uzuazọ* ewegrẹ ra kufiẹ wọhọ ibitho nọ a rọ udeme veghe kufiẹ.* 30 Nọ Jihova o te ru eware iwoma kpobi nọ ọ ya eyaa rai kẹ olori mẹ no, jẹ rehọ owhẹ mu osu Izrẹl no,+ 31 o te da owhẹ hẹ hayo whọ te vioja* evaọ udu ra ha inọ who kpe azẹ ọhaha gbe nọ olori mẹ ọ rehọ obọ riẹ kioja.*+ Nọ Jihova o te ru ewoma kẹ olori mẹ no, kareghẹhọ odibo ọmọtẹ ra.”

32 Devidi ọ tẹ ta kẹ Abigẹle nọ: “Ujiro u te Jihova Ọghẹnẹ Izrẹl, ọnọ o vi owhẹ ze ti zere omẹ nẹnẹ na! 33 Oghale u te owhẹ fiki areghẹ ra! Oghale u te owhẹ nọ whọ rọ whaha omẹ nẹnẹ na nọ mẹ gbẹ rọ reabe azẹ+ jẹ rehọ obọ mẹ kioja ha.* 34 Nọ Jihova Ọghẹnẹ Izrẹl nọ ọ whaha omẹ nọ me gbe ro kpe owhẹ hẹ+ ọ rrọ uzuazọ na, whọ gbẹ kake nyaze ti zere omẹ hẹ,+ ohiohiẹ odẹnotha ọzae* ọvuọvo ọ hai ti kiọkọ uwou Nebale he.”+ 35 Fikiere Devidi o te mi ei eware nọ ọ wha sei na, ọ tẹ ta kẹe nọ: “Nya kpobọ uwou ra dhedhẹ. Me yo ẹme nọ whọ ta na, me ti ru ayare ra na gba kẹ owhẹ.”

36 Uwhremu na Abigẹle o te zihe bru Nebale nọ o je ru ehaa emuọriọ wọhọ ovie evaọ uwou riẹ, yọ eva e jẹ were Nebale,* ọ tẹ jẹ da idi bẹ no. Abigẹle ọ ta ẹme ọvo kẹe he bẹsenọ oke o rọ ke. 37 Evaọ ohiohiẹ nọ udi o hiẹ no Nebale aro no, aye riẹ ọ tẹ vuẹe eware nana. Udu riẹ o tẹ wọhọ orọ ohwo nọ o whu no, o te kiẹzẹ oria ọvo wọhọ utho. 38 Nọ oware wọhọ edẹ ikpe e vrẹ no, Jihova ọ tẹ tehe Nebale kpe.

39 Nọ Devidi o yo nọ Nebale o whu no, ọ tẹ ta nọ: “Ujiro u te Jihova, ọnọ ọ thothọ mẹ+ okenọ Nebale ọ poviẹ omẹ,+ ọ tẹ jẹ whaha odibo riẹ nọ o gbe ro ru oware uyoma ovo ho,+ Jihova o te je zihe eyoma Nebale fihọ uzou obọriẹ!” Kẹsena Devidi o te vi ahwo bru Abigẹle re a ta kẹe nọ ọ gwọlọ nọ ọ jọ aye riẹ. 40 Fikiere idibo Devidi a tẹ nyabru Abigẹle evaọ obọ Kamẹl, a tẹ ta kẹe nọ: “Devidi o vi omai ze re ma rehọ owhẹ sei, re whọ jọ aye riẹ.” 41 Ọ tẹ nwane kpama, o te kigwẹ vovao tuotọ jẹ ta nọ: “O ruọ ọrigbo ra nọ ọ rẹ jọ odibo nọ ọ rẹ wozẹ awọ+ idibo olori mẹ.” 42 Kẹsena Abigẹle+ ọ tẹ kpama vẹrẹ vẹrẹ, ọ tẹ ruọ eketekete riẹ avọ idibo emetẹ isoi riẹ nọ e be nya lele iei; o te lele enyukọ nọ Devidi o vi ze na nyavrẹ, ọ tẹ jọ aye riẹ.

43 Oke yena Devidi ọ rehọ Ahinoam+ ohwo Jezrẹl+ na no re, aimava a tẹ jọ eyae riẹ.+

44 Rekọ Sọl ọ rehọ Maekal,+ aye Devidi kẹ Pọltae+ no, ọmọzae Leish nọ o no Galim ze.

26 Nọ u te oke jọ, ahwo Zif+ a tẹ nyabru Sọl ze evaọ Gibiah,+ a tẹ ta nọ: “Kọ whọ gbẹ riẹ nọ Devidi o dhere ukpehru Hakaela nọ o rẹriẹ ovao ku Jeshaemọn?”*+ 2 Fikiere Sọl ọ tẹ wọ, tei te ezae idu esa (3,000) nọ a jọ Izrẹl salọ a tẹ nya kpobọ udhude Zif re a nyae gwọlọ Devidi evaọ udhude Zif na.+ 3 Sọl ọ tẹ fa evuẹ fihọ ukpehru Hakaela nọ o kẹle edhere jẹ rẹriẹ ovao ku Jeshaemọn. Evaọ oke yena yọ Devidi ọ be rria udhude na, o te yo nọ Sọl ọ nyaze udhude na te gwọlọ iẹe. 4 Fikiere Devidi o te vi ahwo nyae kiẹ sọ Sọl ọ ginẹ nyaze. 5 Uwhremu na, Devidi ọ tẹ nya kpohọ oria nọ Sọl ọ fa evuẹ fihọ na, ọ tẹ ruẹ oria nọ Sọl avọ Abna+ ọmọzae Nẹr, oletu ogbaẹmo Sọl a kiẹzẹ be wezẹ; Sọl o kiẹzẹ be wezẹ evaọ udevie evuẹ na avọ egbaẹmo na kpobi nọ e wariẹ e riẹ họ. 6 Devidi ọ tẹ nọ Ahimẹlẹk, ohwo Hit na,+ gbe Abishae+ ọmọzae Zeruya,+ oniọvo Joab nọ: “Ono o ti lele omẹ nyabru Sọl evaọ obọ evuẹ na?” Abishae ọ tẹ ta nọ: “Me ti lele owhẹ nya.” 7 Fikiere Devidi avọ Abishae a tẹ rọ oghẹrẹ jọ ruọ udevie egbaẹmo na evaọ aso, a tẹ ruẹ Sọl nọ o kiẹzẹ be wezẹ evaọ udevie evuẹ na avọ ozuẹ riẹ nọ ọ thọrọ họ otọ kẹle uzou riẹ; yọ Abna avọ egbaẹmo na kpobi a kiẹzẹ wariẹe họ.

8 Abishae ọ tẹ ta kẹ Devidi nọ: “Ọghẹnẹ ọ rehọ ọwegrẹ ra họ obọ ra no nẹnẹ na.+ Ivie, kẹ omẹ uvẹ re mẹ rehọ ozuẹ na duwu iei nyaotọ ẹsiẹvo, me ti duwu iei isiava ha.” 9 Rekọ Devidi ọ tẹ ta kẹ Abishae nọ: “Whọ nwae oma ha. Ono ọ rẹ kpare obọ riẹ rọsuọ ọnọ Jihova o wholo,+ ọ vẹ kare abe?”+ 10 Devidi ọ tẹ jẹ ta nọ: “Nọ Jihova ọ rrọ uzuazọ na, Jihova ọvo o ti kpei,+ hayo nọ ẹdẹ uwhu riẹ o te te o ti whu,+ hayo o ti kpohọ ẹmo, o ve whu fihọ ẹmo na.+ 11 Mẹ sae kpare obọ mẹ rọsuọ ọnọ Jihova o wholo vievie he, keme o te were Jihova ha.+ Fikiere, ivie, tọlọ ozuẹ nọ ọ kẹle uzou riẹ na gbe ukoko ame na re ma nyavrẹ.” 12 Devidi ọ tẹ tọlọ ozuẹ na gbe ukoko ame nọ e kẹle uzou Sọl na, a tẹ nyavrẹ. Ohwo ọvo ọ ruẹ e rai+ hayo muẹrohọ ae he, hayo rọwo no owezẹ ze he, keme aikpobi a jẹ wezẹ fikinọ Jihova o fou rai họ owezẹ udidi. 13 Kẹsena Devidi ọ tẹ fa vrẹ kpohọ abọdekọ, o te dikihẹ ehru ugbehru na thabọ no ai omojọ, a kẹle ohwohwo tere he.

14 Devidi ọ tẹ kpaunu se egbaẹmo na gbe Abna,+ ọmọzae Nẹr, inọ: “Abna, kọ whọ gbẹ kpunu?” Abna ọ tẹ kpunu nọ: “Whẹ yọ ono nọ o bi se ovie na?” 15 Devidi ọ tẹ ta kẹ Abna nọ: “Ọzae whọ rrọ vẹre? Ono ọ wọhọ owhẹ evaọ Izrẹl? Kọ fikieme who gbe rou* olori ra ovie na ha? Keme omọvo egbaẹmo na jọ ọ nyaze evuẹ na re o kpe olori ra ovie na no.+ 16 Oware nọ who ru na u woma ha. Nọ Jihova ọ rrọ uzuazọ na, u fo nọ who re whu keme who bi rou* olori ra ovie na ha, ọnọ Jihova o wholo na.+ Whaọ, rri wariẹ! Kọ ozuẹ ovie na gbe ukoko ame+ nọ e jọ kẹle uzou riẹ na e rrọ?”

17 Sọl o te vuhu uvou Devidi, ọ tẹ ta nọ: “Kọ uvou ra me bi yo na, Devidi ọmọzae mẹ?”+ Devidi ọ tẹ kẹe uyo nọ: “Uvou mẹ, olori mẹ ovie.” 18 Ọ tẹ jẹ ta nọ: “Fikieme olori mẹ o bi ro le odibo riẹ,+ eme me ru, kọ didi oware me ru thọ?+ 19 Ivie, jọ olori mẹ ovie ọ gaviezọ kẹ eme odibo riẹ: Otẹrọnọ Jihova họ ọnọ o ru owhẹ bi mukpahe omẹ na, jọ ọ jẹ* idhe ibi ekakọ nọ me ti dhe kẹe rehọ. Rekọ otẹrọnọ ahwo a ru nọ who bi ro mukpahe omẹ,+ jọ Jihova ọ kẹ ae uye, keme a le omẹ no udevie ukuoriọ Jihova no nẹnẹ na,+ be ta nọ: ‘Nyae gọ eghẹnẹ efa!’ 20 Enẹna, jọ who ru re azẹ mẹ o su fihọ otọ thabọ no aro Jihova ha, keme ovie Izrẹl ọ wọ lahwe be gwọlọ uthu* gheghe,+ wọhọ ẹsenọ o bi le ọkokowa evaọ ehru igbehru.”

21 Kẹsena Sọl ọ tẹ ta nọ: “Mẹ raha uzi no.+ Zihe ze, ọmọzae mẹ, me ti gbe ru owhẹ oware uyoma ovo ho, keme who rri uzuazọ* mẹ ghaghae+ nẹnẹ na. Evaọ uzẹme, oware ugheghẹ me ru na, yọ me ru thọ gaga no.” 22 Devidi ọ tẹ ta nọ: “Ozuẹ ovie na ọna. Jọ omọvo emoha na jọ ọ nyaze te rehọ iẹe. 23 Jihova họ ọnọ ọ te hwosa kẹ ohwo kpobi rọkẹ ẹrẹreokie riẹ+ gbe ọtẹruo riẹ, keme nẹnẹ na Jihova ọ rehọ owhẹ họ obọ mẹ, rekọ mẹ rọwo nọ mẹ rẹ kpare obọ mẹ rọsuọ ọnọ Jihova o wholo ho.+ 24 Rri! Nwane wọhọ epanọ me rri uzuazọ* ra ghaghae nẹnẹ na, jọ Jihova o rri uzuazọ* mẹ ghaghae re, re o je siwi omẹ no uye kpobi.”+ 25 Sọl ọ tẹ kpahe kẹ Devidi nọ: “Jọ eghale i te owhẹ, Devidi ọmọzae mẹ. Who ti gine ru ikpeware, yọ whọ te ginẹ kparobọ.”+ Kẹsena Devidi ọ tẹ nyavrẹ, Sọl o te zihe kpo.+

27 Rekọ Devidi ọ tẹ jọ udu riẹ ta nọ: “Sọl o ti kpe omẹ no ẹdẹ jọ. Oware nọ o mai woma nọ me re ru họ, mẹ rẹ dhẹ+ kpobọ ẹkwotọ ahwo Filistia; Sọl ọ vẹ te siọ omẹ ba ẹgwọlọ evaọ ẹkwotọ Izrẹl soso,+ mẹ vẹ te rọ ere vae abọ.” 2 Fikiere Devidi ọ tẹ wọ, tei te ezae egba ezeza (600)+ nọ e jọ kugbei a tẹ nyabru Ekish,+ ọmọzae Meyọk, ovie Gat. 3 Devidi ọ tẹ jẹ rria kugbe Ekish evaọ obọ Gat, tei te ezae nọ e jọ kugbei avọ ahwo uwou rai kpobi. Eyae ivẹ Devidi e jọ kugbei re, Ahinoam+ ohwo Jezrẹl, gbe Abigẹle+ ohwo Kamẹl na, ọnọ ọ jọ aye Nebale nọ o whu no. 4 Nọ a vuẹ Sọl nọ Devidi ọ dhẹ kpobọ Gat no, ọ tẹ se iẹe ba ẹgwọlọ.+

5 Kẹsena Devidi ọ tẹ ta kẹ Ekish nọ: “Otẹrọnọ mẹ were owhẹ, jọ a kẹ omẹ oria jọ nọ mẹ rẹ rria evaọ usu ikpewho nọ e rrọ obọ oka ẹkwotọ na. Fikieme odibo ra o re ro lele owhẹ rria okpẹwho ovie na?” 6 Fikiere Ekish ọ tẹ kẹe Ziklag+ evaọ ẹdẹ yena. Oyejabọ nọ Ziklag ọ rọ rrọ ẹwho ivie Juda rite ẹdẹ inẹnẹ na.

7 Etoke* nọ Devidi ọ rria ẹkwotọ ahwo Filistia na u te ẹgbukpe ọvo gbe emerae ene.+ 8 Devidi avọ ezae nọ e jọ kugbei a jẹ hae vẹruọ ahwo Gẹshọ,+ ahwo Gẹz, gbe ahwo Amalẹk,+ keme a jẹ rria ẹkwotọ nọ o no Tilam rite ugbo obọ Shọ+ je rite obọ ẹkwotọ Ijipti. 9 Nọ Devidi ọ tẹ nyae họre ahwo ẹkwotọ na, ọ rẹ siọ ọzae hayo aye ọvuọvo ba uzuazọ họ,+ rekọ ọ rẹ rehọ ithuru erao, owa erao, eketekete, ekamẹle gbe iwu rai, o ve zihe bru Ekish. 10 Ekish ọ vẹ nọe nọ: “Bovẹ whọ wọ ohọre nya nẹnẹ?” Devidi ọ vẹ ta nọ: “Obọze ovatha-ọre* Juda”+ hayo “Obọze ovatha-ọre ahwo uyẹ Jeramiẹl”+ hayo “Obọze ovatha-ọre ahwo Kẹn.”+ 11 Devidi ọ jẹ hae siọ ọzae hayo aye ọvuọvo ba uzuazọ nọ a rẹ wha lele oma kpohọ Gat he, keme ọ rẹ ta nọ: “Re a gbẹ vuẹ ae eware nọ ma ru hu inọ, ‘Enẹ gbe enẹ Devidi o ru.’” (Yọ ere ọ jẹ hai ru evaọ etoke nọ ọ rria ẹkwotọ ahwo Filistia na soso.) 12 Fikiere Ekish ọ tẹ rọwo ẹme Devidi, be ta kẹ omariẹ nọ: ‘Ababọ avro, o bi tu ahwo Izrẹl nọ a rrọ ahwo obọriẹ oma* enẹna, fikiere ọ te jọ odibo mẹ ẹsikpobi.’

28 Evaọ edẹ yena ahwo Filistia a te koko egbaẹmo rai họ re a lele Izrẹl fi ẹmo.+ Fikiere Ekish ọ tẹ ta kẹ Devidi nọ: “Whọ riẹ nọ whẹ avọ ezae nọ e rrọ kugbe owhẹ na wha ti lele omẹ kpohọ ẹmo.”+ 2 Devidi ọ tẹ ta kẹ Ekish nọ: “Whọ ginẹ riẹ oware nọ odibo ra o ti ru.” Ekish ọ tẹ ta kẹ Devidi nọ: “Fikioye mẹ te rọ rehọ owhẹ mu ọgbaẹmo nọ o re rou* omẹ oke kpobi na.”*+

3 Whaọ Samuẹle o whu no, yọ ahwo Izrẹl kpobi a weri rie no je ki ei fihọ Rema, ẹwho riẹ no.+ Evaọ oke yena yọ Sọl o si ahwo nọ a re lele izi ta ẹme gbe egbẹva no Izrẹl no.+

4 Ahwo Filistia na a te kokohọ, a tẹ nyae fa evuẹ fihọ Shunẹm.+ Fikiere Sọl o te koko Izrẹl soso họ, a tẹ fa evuẹ fihọ Gilboa.+ 5 Nọ Sọl ọ ruẹ egbaẹmo ahwo Filistia na, ozọ u te mu ei, udu u te je bru ei gaga.+ 6 Dede nọ Sọl ọ jẹ nekpẹ mi Jihova,+ Jihova ọ rehọ oghẹrẹ ovo kẹe uyo ho, makọ evaọ ewezẹ hayo ẹkwoma Yurim*+ na hayo eruẹaro na. 7 Ukuhọ riẹ, Sọl ọ tẹ ta kẹ idibo riẹ nọ: “Wha nyae gwọlọ aye nọ o re lele izi ta ẹme kẹ omẹ,+ re mẹ nyae nekpẹ mi ei.” Idibo riẹ e tẹ ta nọ: “Aye jọ nọ o re lele izi ta ẹme ọ rrọ obọ Ẹn-dọr.”+

8 Fikiere Sọl ọ tẹ ba iwu riẹ no, o te ku iwu efa họ re a gbe vuhu ei hi, tei te idibo ivẹ riẹ a tẹ nyabru aye na evaọ aso. Ọ tẹ ta nọ: “Ivie, rehọ ogaga ra nọ who re ro lele izi ta ẹme na gbẹva kẹ omẹ,+ re who se ohwo nọ mẹ te fodẹ kẹ owhẹ na kẹ omẹ.” 9 Rekọ aye na ọ tẹ ta kẹe nọ: “Whọ riẹ oware nọ Sọl o ru, o si ahwo nọ a re lele izi ta ẹme gbe egbẹva no Izrẹl no.+ Kọ fikieme whọ be rọ kpahe ẹta kẹ omẹ* re a kpe omẹ no?”+ 10 Sọl ọ tẹ rọ odẹ Jihova duwu iyei kẹe nọ: “Nọ Jihova ọ rrọ uzuazọ na, whọ te reabe evaọ ẹme nana vievie he!” 11 Fikiere aye na ọ tẹ nọe nọ: “Ono whọ gwọlọ nọ me se kẹ owhẹ?” Sọl ọ tẹ ta nọ: “Se Samuẹle kẹ omẹ.” 12 Nọ aye na ọ ruẹ “Samuẹle,”*+ o te bo gaga, ọ tẹ ta kẹ Sọl nọ: “Fikieme whọ rọ viẹ omẹ họ? Kpakọ whẹ yọ Sọl!” 13 Ovie na ọ tẹ ta kẹe nọ: “Jọ ozọ u mu owhẹ hẹ, eme whọ be ruẹ?” Aye na ọ tẹ kpahe kẹ Sọl nọ: “Mẹ be ruẹ ohwo jọ nọ ọ wọhọ ọghẹnẹ nọ o bi no otọ ze.” 14 Sọl ọ tẹ nwane nọ aye na nọ: “Oghẹrẹ vẹ ọ rrọ?” Aye na ọ tẹ ta nọ: “Ọkpọkuọzae jọ ọ be nya tha, yọ o ku ewu nọ o wo abọ họ họ.”+ Sọl ọ tẹ riẹ nọ “Samuẹle,” o te kigwẹ guzou kpotọ je kiẹzẹ vovao tuotọ.

15 Kẹsena “Samuẹle” ọ tẹ ta kẹ Sọl nọ: “Fikieme whọ rọ ta nọ a se omẹ lahwe, be rọ ere kpokpo omẹ?” Sọl ọ tẹ kẹ uyo nọ: “Mẹ rẹriẹ ovao dhe uye ulogbo. Ahwo Filistia a be họre omẹ, yọ Ọghẹnẹ ọ nyasiọ omẹ ba no, ọ gbẹ be kẹ omẹ uyo ho, makọ ẹkwoma eruẹaro na hayo evaọ ewezẹ;+ oyejabọ nọ me ro se owhẹ re whọ vuẹ omẹ oware nọ me re ru.”+

16 “Samuẹle” ọ tẹ ta nọ: “Fikieme whọ be rọ nekpẹ mi omẹ enẹna kpakiyọ Jihova ọ nyasiọ owhẹ ba no+ je zihe ruọ ọwegrẹ ra no? 17 Jihova o ti ru oware nọ ọ rehọ ẹkwoma mẹ ta na gba: Jihova ọ te bẹre uvie na no obọ ra, ọ vẹ te rehọ iẹe kẹ ọzae ibe ra, Devidi.+ 18 Jihova o bi ru owhẹ oware nana nẹnẹ fikinọ who yoẹme kẹ urru Jihova ha, who gbe je kpe ahwo Amalẹk muotọ họ,+ enọ e kpare ofu ọgaga riẹ. 19 Jihova ọ te jẹ rehọ owhẹ avọ ahwo Izrẹl họ obọ ahwo Filistia na,+ yọ evaọ odẹnotha, te owhẹ+ te emezae ra+ wha te jọ kugbe omẹ. Jihova ọ te jẹ rehọ egbaẹmo Izrẹl họ obọ ahwo Filistia na.”+

20 Sọl ọ tẹ nwani kie rriẹ oma họ otọ, ozọ u te je mu ei gaga fiki eme “Samuẹle” na. Ẹgba ọvo ọ gbẹ jariẹ oma ha, keme ọ re re emu anwọ ohiohiẹ rite aso yena ha. 21 Nọ aye na ọ nyabru Sọl ze, ọ jẹ ruẹ nọ oware na o be kẹe uye gaga, ọ tẹ ta kẹe nọ: “Whaọ odibo ra o ru oware nọ whọ ta kẹe no, me fi uzuazọ* mẹ họ ọza,*+ me te ru oware nọ whọ ta kẹ omẹ nọ me ru. 22 Enẹna, ivie, gaviezọ kẹ ẹme nọ odibo ra ọ te ta. Jomẹ kẹ owhẹ emebrẹdi jọ nọ whọ rẹ re, re who wo ẹmẹgba jọ nọ whọ sae rọ nya kpo.” 23 Rekọ Sọl ọ tẹ se, ọ tẹ ta nọ: “Mẹ be re he.” Ghele na, idibo riẹ gbe aye na a tẹ be lẹe. Ukuhọ riẹ ọ tẹ gaviezọ kẹ ae, ọ tẹ kpama no otọ, ọ tẹ keria ehru ehwa. 24 Whaọ aye na o wo ọmọ-eruẹ ọpoporiẹ jọ, o te kpei* vẹrẹ vẹrẹ, ọ tẹ rehọ eflawa, ọ tẹ mae fihọ ukulu, ọ tẹ rehọ iẹe there ebrẹdi nọ ọ kare ẹvi. 25 Ọ tẹ wọ emu na kẹ Sọl avọ idibo riẹ, a tẹ re. Nọ a re no a tẹ kparoma, a tẹ ruọ edhere evaọ aso na.+

29 Ahwo Filistia na+ a te koko egbaẹmo rai kpobi họ Efẹk, yọ ahwo Izrẹl a fa evuẹ fihọ akotọ ẹtẹre-ame nọ ọ rrọ Jezrẹl.+ 2 Ilori ahwo Filistia na a tẹ jẹ nyavrẹ avọ itu egbaẹmo udhusoi rai gbe itu egbaẹmo idu rai, yọ Devidi avọ ahwo riẹ a rrọ kugbe Ekish bi thihi lele ai evaọ obemu.+ 3 Rekọ ikpahwo-esuo ahwo Filistia na a tẹ ta nọ: “Fikieme ahwo Hibru nana a rọ rrọ etenẹ?” Ekish ọ tẹ ta kẹ ikpahwo-esuo ahwo Filistia na nọ: “Nọ Devidi, odibo Sọl ovie na nọ ọ rrọ kugbe omẹ anwọ ẹgbukpe gbọ na.+ Mẹ re ruẹ oware ovo nọ o ru thọ anwọ oke nọ ọ rọ dhẹ bru omẹ ze rite ẹdẹ inẹnẹ na ha.” 4 Rekọ eva riẹ e tẹ dha ikpahwo-esuo ahwo Filistia na gaga, a tẹ ta kẹe nọ: “Ta kẹ ọzae na nọ o zihe kpo.+ Jọ o zihe kpohọ oria nọ who fi rie họ. Whọ kẹe uvẹ re o lele omai kpohọ ẹmo na ha, re ọ siọ omai ba ẹhọre evaọ ẹmo na.+ Edhere ọfa vẹ ọ sai ro ru eva were olori riẹ u te no ahwo mai nọ o re kpe no? 5 Kọ ogbẹrọnọ Devidi ọna, ọnọ a jẹ rọ fiki riẹ gbile jẹ so nọ:

6 Ekish+ o te se Devidi, ọ tẹ ta kẹe nọ: “Nọ Jihova ọ rrọ uzuazọ na, whẹ emamọ ohwo, o tẹ jẹ were omẹ nọ who re lele egbaẹmo mẹ kpohọ ẹmo na,+ keme mẹ re ruẹ oware ovo nọ who ru thọ anwọ ẹdẹ nọ whọ rọ nyabru omẹ ze rite ẹdẹ inẹnẹ na ha.+ Rekọ ilori na a fievahọ owhẹ hẹ.+ 7 Fikiere zihe kpo dhedhẹ, who du ru oware ovo nọ o rẹ dha ilori Filistia na eva ha.” 8 Rekọ Devidi ọ tẹ ta kẹ Ekish nọ: “Fikieme, eme me ru? Eme whọ ruẹ nọ odibo ra o ru thọ anwọ okenọ mẹ rọ nyabru owhẹ ze rite ẹdẹ inẹnẹ na? Fikieme me gbe lele owhẹ nyae họre ewegrẹ olori mẹ ovie na ha?” 9 Ekish ọ tẹ ta kẹ Devidi nọ: “Rọkẹ omẹ, whọ rrọ wowoma wọhọ ukọ-odhiwu Ọghẹnẹ.+ Rekọ ikpahwo-esuo ahwo Filistia a ta kẹ omẹ nọ, ‘Whọ kẹe uvẹ re o lele omai kpohọ ẹmo na ha.’ 10 Fikiere whẹ avọ idibo olori ra nọ i lele owhẹ nyaze na wha rẹ kpama evaọ irioke frifri; wha vẹ wọ re wha nyavrẹ evaọ irioke nọ oke o tẹ nwane ke no.”

11 Fikiere Devidi avọ ahwo riẹ a tẹ kpama evaọ irioke frifri re a zihe kpohọ ẹkwotọ ahwo Filistia, ahwo Filistia na a te kpobọ Jezrẹl.+

30 Nọ Devidi avọ ahwo riẹ a te Ziklag+ evaọ ẹdẹ avọ esa, a tẹ ruẹ nọ ahwo Amalẹk+ a wọ ohọre ziọ ofẹ obọze ovatha-ọre* gbe Ziklag, yọ a vẹruọ Ziklag, a tẹ rehọ erae mahe iẹe no. 2 A mu eyae na+ gbe ahwo kpobi nọ a jọ okpẹwho na rehọ, te ọmaha te ọkpako. A kpe ohwo ọvo ho, rekọ a wha rai lele oma vrẹ. 3 Nọ Devidi avọ ahwo riẹ a te okpẹwho na, a tẹ ruẹ nọ a mahe riẹ muotọ no, yọ a mu eyae rai, emezae rai gbe emetẹ rai vrẹ no. 4 Fikiere Devidi avọ ahwo riẹ a te muhọ ẹviẹ gaga bẹsenọ oma o rọ lọhọ ae no, a gbẹ jẹ sae viẹ hẹ. 5 A mu eyae ivẹ Devidi rehọ re, Ahinoam ohwo Jezrẹl na, gbe Abigẹle ohwo Kamẹl na, ọnọ ọ jọ aye Nebale nọ o whu no.+ 6 Oware na o kẹ Devidi idhọvẹ gaga, keme ezae na e jẹ ta nọ a te rehọ itho fi ei, keme ofu o je mu ezae na* kpobi gaga fiki emezae gbe emetẹ rai nọ a mu rehọ na. Rekọ Devidi o wo ẹgba ẹkwoma Jihova Ọghẹnẹ riẹ nọ o bo bru.+

7 Kẹsena Devidi ọ tẹ ta kẹ Abayata+ ozerẹ na, ọmọzae Ahimẹlẹk nọ: “Ivie rehọ ẹfọd na ze.”+ Abayata ọ tẹ rehọ ẹfọd na se Devidi. 8 Devidi ọ tẹ nekpẹ mi Jihova nọ:+ “Kọ me le egbaẹmo nana nọ e wọ ze te kwa eware mai na? Kọ me ti le ai mu?” Ọghẹnẹ ọ tẹ kẹe uyo nọ: “Nyai le ai, keme whọ te siọ ae ba ele mu hu, yọ whọ te rehọ eware na gbe ahwo nọ a mu vrẹ na zihe ze.”+

9 Devidi avọ ezae egba ezeza (600)+ nọ e jọ kugbei na a tẹ nwane wọ vrẹ, a tẹ nyate ugbo obọ Uto* Bisọ, ezae na jọ e tẹ daji etẹe. 10 Devidi avọ ezae egba ene (400) a te gbe je le ai, rekọ ezae egba ivẹ (200) nọ e sae fa Uto Bisọ vrẹ hẹ fiki oma nọ o lọhọ e rai no, a tẹ daji etẹe.+

11 A tẹ jọ ẹwọ na ruẹ ọzae Ijipti jọ, a tẹ rehọ iẹe bru Devidi. A tẹ kẹe emu nọ ọ rẹ re gbe ame nọ ọ rẹ da, 12 a tẹ jẹ kẹe ẹwẹ ikeki ifigi gbe ikeki resin ivẹ. Nọ ọ re no, o te wo ẹgba* keme ọ re te re emu hayo da ame anwọ edẹ esa gbe eso esa ha. 13 Devidi ọ tẹ nọe nọ: “Ono họ olori ra, kọ bovẹ who no ze?” Ọ tẹ kẹ uyo nọ: “Mẹ yọ ohwo Ijipti, ọrigbo ọzae Amalẹk jọ, rekọ olori mẹ ọ nyase omẹ ba fiki ẹyao nọ o kie omẹ evaọ edẹ esa nọ e vrẹ. 14 Ma vẹruọ obọze ovatha-ọre* ahwo Kẹrẹt+ gbe ẹkwotọ Juda gbe obọze ovatha-ọre* ẹwho Kelẹb,+ ma tẹ rọ erae mahe Ziklag.” 15 Devidi ọ tẹ nọe nọ: “Kọ whọ sai su omẹ bru egbaẹmo nọ e nyae kwa eware na?” Ọ tẹ kẹ uyo nọ: “Whọ tẹ rọ odẹ Ọghẹnẹ duwu iyei kẹ omẹ nọ who ti kpe omẹ hẹ, yọ whọ te rehọ omẹ kẹ olori mẹ hẹ, me ti su owhẹ bru egbaẹmo na.”

16 Fikiere o te su ei kpohọ oria nọ egbaẹmo na e jọ vravra oma fihọ ẹkwotọ na soso, yọ a be re be da, je bi gbe ehaa fiki egbo-ẹmo buobu nọ a kwa rehọ evaọ ẹkwotọ ahwo Filistia gbe ẹkwotọ Juda. 17 Devidi o te mu ae họ ekpe evaọ irioke nọ oke u ri vẹ hẹ na rite owọwọ;* uvumọ ohwo ọ dhẹ vabọ họ,+ ajokpaọ ezae egba ene (400) nọ e ruọ ekamẹle dhẹ. 18 Devidi ọ tẹ rehọ eware kpobi nọ ahwo Amalẹk a tho na zihe,+ eyae ivẹ riẹ na i te je tei obọ re. 19 Uvumọ oware rai u vru hu, te osese te ulogbo. Emezae rai gbe emetẹ rai gbe eware na kpobi i te rai obọ;+ Devidi o mi rai eware kpobi nọ a kwa rehọ. 20 Devidi ọ tẹ rehọ ithuru erao avọ ewa erao rai kpobi, a te fi ai họ obaro erao obọrai nọ ahwo na a tho vẹre na. A tẹ ta nọ: “Enana yọ egbo-ẹmo Devidi.”

21 Kẹsena Devidi ọ tẹ nyabru ezae egba ivẹ (200) nọ e daji Uto Bisọ na, enọ e sai lele Devidi hi fiki oma nọ o lọhọ e rai,+ a tẹ nya lahwe ti zere Devidi gbe ahwo nọ a jọ kugbei. Nọ Devidi o te ezae na oma, ọ tẹ nọ ae epanọ eware e rrọ kẹ ae. 22 Rekọ ikpehre ezae nọ i fioka ha evaọ usu ahwo nọ a lele Devidi nya na a tẹ ta nọ: “Nọ orọnọ a lele omai nya ha na, ma te jọ egbo-ẹmo nọ ma rehọ zihe ze na kẹ ai uvumọ oware he, ọvuọ aye riẹ gbe emọ riẹ ọvo a rẹ rehọ a vẹ nyavrẹ.” 23 Rekọ Devidi ọ tẹ ta kẹ ae nọ: “Inievo mẹ, wha rehọ eware nọ Jihova ọ kẹ omai gbogbọ vievie he. Ọ thọ omai jẹ rehọ egbaẹmo nọ e wọ bru omai ze na họ obọ mai.+ 24 Ono ọ rẹ rọwokugbe owhai evaọ onana? Ẹkẹ nọ o re te ọnọ o kpohọ ẹmo na avọ onọ u re te ọnọ o je rri ewha o rẹ jọ ẹrẹrẹe.+ Ahwo na kpobi a rẹ ghale kẹ.”+ 25 No umuo ẹdẹ yena vrẹ, o te fi ei họ ujaje gbe uzi rọkẹ ahwo Izrẹl rite ẹdẹ inẹnẹ na.

26 Nọ Devidi o te obọ Ziklag, ọ tẹ jọ egbo-ẹmo na vi eware jọ se ekpako Juda nọ e jọ egbẹnyusu riẹ, ọ ta nọ: “Nọ okẹ* nọ me vi se owhai evaọ usu eware nọ mẹ kwa mi ewegrẹ Jihova.” 27 O vi se enọ e jọ Bẹtẹl,+ enọ e jọ Remọt ọrọ Negẹb na,* enọ e jọ Jata,+ 28 enọ e jọ Aroa, enọ e jọ Sifmọt, enọ e jọ Ẹshtẹmoa,+ 29 enọ e jọ Rekal, enọ e jọ ikpewho ahwo uyẹ Jeramiẹl,+ enọ e jọ ikpewho ahwo Kẹn,+ 30 enọ e jọ Họma,+ enọ e jọ Borashan, enọ e jọ Etak, 31 enọ e jọ Hebrọn,+ gbe enọ e jọ eria kpobi nọ Devidi avọ ahwo riẹ a jẹ hae nya kẹse kẹse.

31 Whaọ ahwo Filistia a jẹ họre ahwo Izrẹl.+ Ahwo Izrẹl a tẹ dhẹ kẹ ahwo Filistia na, a te kpe ahwo Izrẹl buobu evaọ Ugbehru Gilboa.+ 2 Ahwo Filistia na a tẹ rọ tua Sọl avọ emezae riẹ kpekpekpe, ahwo Filistia a te kpe Jonatan,+ Abinadab, gbe Malkae-shua, emezae Sọl.+ 3 Ẹmo na o te tunyẹ Sọl, enọ e rẹ sa ose e tẹ ruẹ e riẹ, a tẹ nwae oma gaga.+ 4 Sọl ọ tẹ ta kẹ ọnọ ọ rẹ wha ekwakwa ẹmo riẹ nọ: “Yolo ọgbọdọ ra ze re whọ rehọ iẹe duwu omẹ kpe, re ahwo nana nọ a yawo ho na+ a gbẹ nyaze ti duwu omẹ jẹ lahiẹ omẹ hẹ.”* Rekọ ọnọ ọ rẹ wha ekwakwa ẹmo riẹ na ọ jẹ rọwo ho, keme ozọ u je mu ei gaga. Fikiere Sọl ọ tẹ tọlọ ọgbọdọ na, o te kie fihọ ehru riẹ.+ 5 Nọ ọnọ ọ rẹ wha ekwakwa ẹmo Sọl ọ ruẹ nọ o whu no,+ ọyomariẹ o te kie fihọ ehru ọgbọdọ riẹ, o te whu lele iei. 6 Ere Sọl, emezae esa riẹ, ọnọ ọ rẹ wha ekwakwa ẹmo riẹ, gbe ahwo riẹ kpobi a ro whu evaọ ẹdẹ yena.+ 7 Nọ ahwo Izrẹl nọ a jọ ẹkwotọ ukiekpotọ* na gbe ẹkwotọ Jọdan a ruẹ nọ egbaẹmo Izrẹl e dhẹ no, yọ Sọl avọ emezae riẹ a whu no, a te mu ikpewho na họ ẹdhẹ no;+ ahwo Filistia a tẹ nyaze, a te mu ae họ ẹria.

8 Okiokiọ riẹ nọ ahwo Filistia na a nyaze re a kwa eware ahwo nọ a kpe na rehọ, a tẹ ruẹ Sọl avọ emezae esa riẹ nọ i whu fihọ ehru Ugbehru Gilboa.+ 9 A te bru uzou riẹ jẹ ba ẹgọ-ẹmo riẹ no, a tẹ vuẹ se ahwo ẹkwotọ Filistia soso inọ a vaha usi na+ evaọ iwou* emedhọ rai+ gbe evaọ udevie ahwo na. 10 Kẹsena a te fi ẹgọ-ẹmo riẹ na họ uwou emema Ashtorẹt, a tẹ tehe ori riẹ fihọ ugbẹhẹ Bẹt-shan.+ 11 Nọ ahwo nọ a be rria Jebẹsh-giliad+ a yo oware nọ ahwo Filistia a ru Sọl, 12 egbaẹmo na kpobi a tẹ wọ, a tẹ nya evaọ aso na soso, a te si ori Sọl avọ emezae esa riẹ no ugbẹhẹ Bẹt-shan. A te zihe kpohọ Jebẹsh, a tẹ jọ etẹe mahe ae. 13 Kẹsena a tẹ rehọ igbenwa rai,+ a te ki ai fihọ otọ ure tamarisk na evaọ Jebẹsh,+ a tẹ siọ emuọriọ ba edẹ ihrẹ.