AIZAYA

 2 Whai idhiwu, wha yo, re whẹ otọakpọ+ whọ gaviezọ,

Keme Jihova ọ ta ẹme no inọ:

“Me wo emezae nọ mẹ yọrọ no otọ ze nọ i te ahwo no,+

Rekọ a kpareso omẹ.+

 3 Eruẹ ọ riẹ ohwo nọ ọ dẹ riẹ,

Yọ eketekete ọ riẹ oria emu erao nọ ohwo nọ o wo rie o re fi emu họ kẹe;

Rekọ Izrẹl ọ riẹ omẹ* hẹ,+

Ahwo obọmẹ a bi ru eware avọ otoriẹ hẹ.”

 4 Uye u te orẹwho nọ o vọ avọ uzioraha na,+

Ahwo nọ oruthọ ọ nyẹ nyaotọ,

Ogbotu ahwo omuomu, emọ nọ e raha no!

A nyasiọ Jihova ba no;+

A kẹ Ọrẹri Izrẹl na adhẹẹ hẹ;

A kiuke rai ku ei no.

Uzou na soso o be mọ,

Yọ ẹyao ọ vọ udu na soso.+

Emela, eria nọ i vre fihọ gbe ela nọ i rovie enu fihọ e rrọ oma na

—A ri siwi ai hi* hayo gba ae he hayo rehọ ewhri wholo ai hi re e lọhọ.+

 8 A nyasiọ ọmọtẹ Zayọn ba wọhọ uwou-owhre nọ o rrọ ọgbọ evaene,

Wọhọ umuwou nọ o rrọ udhu ikukumba,

Wọhọ okpẹwho nọ a ko họ.+

 9 Ogbẹrọnọ Jihova olori egbaẹmo ọ nyasiọ umutho ahwo jọ ba kẹ omai nọ a zọ họ,

Ma hae te jọ wọhọ Sọdọm,

Yọ ma hae te jọ wọhọ Gomora.+

Idhe emahọ nọ wha be rehọ igbo+ gbe iwhri erao epoporiẹ+ dhe e bẹ omẹ no,

Yọ me wo evawere kpahe azẹ+ iruẹ+ avọ imigodẹ gbe ewe+ he.

12 Nọ wha be nyaze aro mẹ na,+

Ono ọ ta nọ wha nyaze,

Nọ wha bi ro thihi ighẹ sa-sa nọ e rrọ uwou mẹ raha na?+

Ehaa ọvẹre ọkpokpọ,+ edijala,+ ikokohọ nọ wha bi se ahwo kokohọ kẹ+

—Mẹ sai thihakọ ogaga emajiki+ nọ a re ro ru eware avọ okokohọ urirẹ rai hi.

I zihe ruọ owha ogbẹgbẹdẹ kẹ omẹ no;

E bẹ omẹ ẹwha no.

15 Nọ wha tẹ rriẹ abọ rai fihọ re wha lẹ,

Mẹ rẹ ko ibiaro mẹ dhere owhai.+

Dede nọ wha be lẹ elẹ buobu,+

Mẹ be gaviezọ họ;+

Azẹ ọ vọ abọ rai.+

16 Wha họ omarai, wha ru omarai fo;+

Wha si iruẹru imuomu rai no aro mẹ no;

Wha siọ eyoma ba eru.+

17 Wha wuhrẹ epanọ a re ru oware uwoma, wha gwọlọ uvioziẹ+

Wha kpọ ọnọ o re kienyẹ ahwo na vi,

Wha thothọ ọmọ nọ o wo ọsẹ hẹ* evaọ eware nọ o wo udu rai,

Wha thothọ aye-uku.”+

“Dede nọ izieraha rai e rrọ wawae,

A ti ru ai jọ fuafo wọhọ ekpalekpa-ame;+

Dede nọ e rrọ wawae wọhọ ohọ owawae ogbagba,

E te jọ fuafo wọhọ uvovo.

19 Otẹrọnọ wha rọ unevaze gaviezọ,

Wha te re emamọ eware ẹkwotọ na.+

20 Rekọ otẹrọnọ wha gbẹ rọwo gaviezọ họ jẹ wọso,

A te rehọ ọgbọdọ kpe owhai muotọ,+

Keme unu Jihova o ta riẹ no.”

Uvioziẹ o da riẹ fia vẹre;+

Ẹrẹreokie ọ jẹ hae rria eva riẹ,+

Rekọ ijihẹ họ enọ e rrọ eva riẹ enẹna.+

22 Isiliva ra i zihe ruọ egbẹ nọ i no ayọno ze no,+

Yọ a rọ ame gua udi ebiẹ* ra no.

A re bru uvioziẹ kẹ enọ i wo esẹ hẹ hẹ,*

Yọ a rẹ jọ oborai guẹdhọ aye-uku vievie he.+

24 Fikiere Olori uzẹme na, Jihova olori egbaẹmo,

Ọnọ Ọ Rrọ Ọgba Izrẹl ọ ta nọ:

“U te no! Me ti si ewegrẹ mẹ no omamẹ,

Me ve ti ru ewegrẹ mẹ kele.+

25 Mẹ te rẹriẹ obọ mẹ rọsuọ owhẹ,

Mẹ te ghra ekagba ra kufiẹ wọhọ oware nọ a rehọ ame-ogo wozẹ,

Me ti si egbegbe ra kpobi no.+

26 Me ti ru owhẹ wariẹ wo ibruoziẹ wọhọ epanọ o jọ evaọ oke emuhọ

Je ti ru owhẹ wo ekiroro wọhọ epanọ o jọ evaọ emuhọ.+

27 A te rọ ẹkwoma uvioziẹ ta Zayọn zihe ze,+

Ahwo riẹ nọ a zihe ze kọ ẹkwoma ẹrẹreokie.

28 A ti wiri otu ọwọsuọ gbe erahaizi na kugbe,+

Yọ enọ e be nyasiọ Jihova ba i ti whu no.+

29 Keme oma ire ilogbo nọ e were owhai na o te vuọ ae,+

Yọ a ti kpomovuọ họ owhai oma fiki egbọ* nọ wha salọ.+

30 Keme wha te jọ wọhọ ure ulogbo nọ ebe riẹ i bi lo no,+

Jẹ jọ wọhọ ọgbọ nọ ame ọ rrọ họ.

31 Ọzae ọgaga na o ti zihe ruọ ufi,*

Iruo riẹ kọ ogẹgẹ-erae;

Tei te iruo riẹ a te to kugbe,

Ohwo ọvo ọ te jariẹ nọ o ti furie ae he.”

 2 Evaọ abọ urere edẹ na,*

A ti ru ugbehru uwou Jihova

Dikihẹ gaga evaọ obọ ehru igbehru na,+

A te kpare iẹe kpehru vi ikpehru na,

Yọ erẹwho na kpobi i ti zurie kpohọ iẹe.+

“Wha nyaze re ma kpobọ ugbehru Jihova,

Obọ uwou Ọghẹnẹ Jekọp.+

O ti wuhrẹ omai kpahe idhere riẹ,

Yọ ma te nya evaọ idhere riẹ.”+

Keme uzi* u ti no Zayọn ze,

Ẹme Jihova o ve ti no Jerusalẹm ze.+

 4 O ti bruoziẹ evaọ udevie erẹwho na

Jẹ kpọ eware vi rọkẹ ahwo buobu.

A ti duwu egbọdọ rai zihe ruọ etẹkpẹ

A ve ti duwu izuẹ rai zihe ruọ ibrẹbe.+

Orẹwho o gbẹ te kpare ọgbọdọ rọsuọ orẹwho ho,

Yọ a ti gbe wuhrẹ ẹmo-ofio ofa ha.+

 5 O whai ahwo uwou Jekọp, wha nyaze,

Re ma nya evaọ elo Jihova.+

 6 Keme whọ nyasiọ uwou Jekọp nọ a rrọ ahwo ra ba no,+

Fikinọ eware obọ Ovatha-ọre e vọ rai abọ;

A bi ru emajiki+ wọhọ ahwo Filistia,

Yọ emọ ahwo erẹwho efa e vọ udevie rai.

 7 Isiliva gbe igoru e vọ ẹkwotọ rai,

Yọ ekwakwa-aghae rai i wo umuo ho.

Enyenya e vọ ẹkwotọ rai,

Yọ ekẹkẹ rai i wo umuo ho.+

A bi guzou kpotọ kẹ iruo abọ obọrai,

Eware nọ a rehọ iziabọ obọrai ru.

 9 Ere ohwo-akpọ o bi ro ru omariẹ kpotọ, o gbe te oware ovo ho,

Yọ whọ sae rọvrẹ rai hi.

10 Ruọ eva utho na re who si omara no họ ẹkpẹ

Fiki idudu ofu Jihova

Jegbe erru urirẹ riẹ.+

11 A te rehọ ibiaro omorro ohwo-akpọ ziọ otọ,

Uke-ufuo ahwo u ti hrẹ kpotọ.

U bi bru ohwo kpobi nọ o wo omorro jẹ be wọ oma kpehru tha,

Ohwo kpobi, te ohwo ologbo hayo oruori,+

13 Te ire sida obọ Lebanọn kpobi nọ e rrọ kpekpehru

Gbe ire ok obọ Beshan kpobi,

14 Te igbehru ikpekpehru na kpobi

Gbe ikpehru ikpekpehru na kpobi,

15 Te uwou ukpekpehru kpobi gbe ugbẹhẹ kpobi nọ a ma gaga,

16 Te ekọ ilogbo Tashish kpobi+

Gbe ekọ iwowoma kpobi.

17 Omorro ohwo-akpọ o te ziọ otọ,

Uke-ufuo ahwo u ti hrẹ kpotọ.

19 Ahwo a te ruọ eva ighogho-itho

Jẹ ruọ eva ighogho nọ e rrọ otọ na,+

Fiki idudu ofu Jihova

Jegbe erru urirẹ riẹ,+

Okenọ ọ te kparoma re o ru otọakpọ na nuhu fiki idudu.

20 Evaọ ẹdẹ yena ahwo a te rehọ eghẹnẹ isiliva gbe erọ igoru rai

Enọ a ru kẹ omarai re a guzou kpotọ kẹ na,

A ve gbolo ae kẹ eronwa* gbe edha,+

21 Re a ruẹse ruọ eva ighogho-itho na

Gbe eva eria nọ e bẹre rovie fihọ evaọ igbehru-itho na,

Fiki idudu ofu Jihova

Jegbe erru urirẹ riẹ,

Okenọ ọ te kparoma re o ru otọakpọ na nuhu fiki idudu.

22 Re u woma kẹ owhai, wha gbẹ rẹroso ohwo-akpọ gheghe he,

Ọnọ ọ wọhọ ẹwẹ ighogho-inwe riẹ gheghe.*

3 Keme rri! Jihova olori egbaẹmo, Olori uzẹme na,

O bi si oghẹrẹ oware kpobi nọ o be kẹ Jerusalẹm avọ Juda uketha avọ emuore no,

Oware kpobi nọ u bi fiobọhọ kẹ ai wo ebrẹdi gbe ame,+

 2 Te ọzae ọgaga te ọgbaẹmo,

Obruoziẹ avọ ọruẹaro,+ ọgbẹva avọ ọkpako,

 3 Oletu utu ahwo udhuvẹ-gbikpe,+ ohwo ọghọ, gbe ọkiroro,*

Ọgba emajiki gbe ọnọ ọ riẹ epanọ a re ru araomuomu fihọ ruru.+

 4 Me ti fi emezae gheghe họ re a jọ ikpahwo-esuo rai,

Yọ enọ i wo ẹme obọ họ* i ti su ae.

 5 Ahwo na a ti kienyẹ ohwohwo,

Ọvuọ ọrivẹ riẹ o ti kienyẹ.+

Ọmọzae ọ te họre ọkpọkuọzae,

Yọ ọnọ a rri nọ o fioka ha o ti rri ọnọ a be kẹ adhẹẹ vo.+

“Mẹ rẹ jọ ọnọ ọ rẹ rẹrote omola rai* hi;

Me wo emuore hayo iwu evaọ uwou mẹ hẹ.

 8 Keme Jerusalẹm o zoruẹ no,

Yọ Juda o kie no,

Fikinọ a be rọ ẹmeunu gbe iruẹru rai rọ wọso Jihova;

A be wọso evaọ iraro ọnọ o wo oruaro na.*+

 9 Oghẹrẹ nọ a ru ovao rai u bi se isẹri kpe ai,

Yọ a bi woro uzioraha rai wọhọ ahwo Sọdọm;+

A be tubẹ ko ẹe dhere dede he.

10 Ta kẹ ikiẹrẹe na nọ eware e te riẹ nya kẹ ae;

A te hwa ae osa eware nọ a bi ru.*+

Okpẹtu o ti tei,

Keme epanọ ọ rehọ abọ riẹ ru a ti ru ei re!

12 Rọ kpahe ahwo mẹ, ahwo nọ a be kẹ ai iruo a be lahiẹ ae,

Yọ eyae họ enọ i bi su ae.

Ahwo mẹ, isu rai e be lẹliẹ owhai ghoro,

Yọ a bi ru nọ wha gbẹ be riẹ edhere nọ wha rẹ nya ha.+

13 Jihova o bi dikihẹ ẹta riẹ re o gu ẹkẹ unu riẹ;

O bi dikihẹ re o bruoziẹ ahwo.

“Wha mahe ọgbọ evaene na no,

Yọ oware nọ wha tho mi oyogbe o rrọ iwou rai.+

15 Ono ọ kẹ owhai udu inọ wha pẹhẹ ahwo mẹ

Je wuhu ovao iyogbe na evaọ otọ na?”+ ere Olori nọ Ọ Mai Kpehru na, Jihova olori egbaẹmo ọ ta.

16 Jihova ọ ta nọ: “Fikinọ emetẹ Zayọn i wo omorro,

Be nya kpare ovao* rai wha,*

Be rehọ ibiaro rai lẹliẹ ahwo, be nya gọlọ,

Be rehọ ifiare nọ a gba fihọ awọ ru edo,

17 Jihova ọ te rọ emẹvorẹ* tehe uzou emetẹ Zayọn,

Yọ Jihova o ti ru aruezo rai jọ rioriorio.+

18 Evaọ ẹdẹ yena Jihova o ti si erru emero ekwawọ rai no,

Te eware nọ a rẹ rọ gba uzou gbe ifiare nọ a ru wọhọ ọvẹre nọ ọ kpahe obọ,+

19 Te emero-ezọ,* ifiare-abọ, gbe iveli,*

20 Te itu uzou, ifiare awọ, gbe egbivie,*

Te emekpe idẹ nọ i re gbo ore awere gbe ibi ifiare ohawha,

21 Te emero iziabọ gbe emero unwe,

22 Te iwu ithethei nọ a re ro ru ehaa, iwu ehru, itogbo, gbe emekpa usiobọ,

23 Ighẹgbe obọ+ gbe iwu ohọ-olọlọhọ,*

Itu-udhọfọ gbe iveli.*

24 Viukpọ ewhri balsam,+ kọ ore ugbogbo o te jariẹ;

Viukpọ umueku, kọ ufi;

Viukpọ eto nọ a me wowoma, kọ uzou nọ o fa eto no;+

Viukpọ iwu eghaghae, kọ iwu ehọ-ekpa;*+

Viukpọ erru, kọ oma nọ a rọ oware orrorro ka oka họ.

25 Ọgbọdọ a ti ro kpe ezae nọ e rrọ eva ra,

Je kpe ezae egaga ra evaọ ẹmo.+

26 Eria nọ a rẹ rọ ruọ ẹe eva e te viẹ je weri,+

Yọ ọ te keria otọ ababọ.”+

“Ma te re ebrẹdi obọmai

Je fi iwu obọmai họ;

Jọ a thakpe rọ odẹ ra se omai

Re u si omovuọ no omai oma.”*+

5 Ivie, jomẹ so ole kẹ oyoyou mẹ

Ole kpahe oyoyou mẹ avọ ọgbọ evaene riẹ.+

Ọ kọ emamọ evaene nọ e rẹ mọ ibi ewawae fihọ iẹe,

Ọ bọ uwou ukpehru fihọ udevie riẹ,

Jẹ jọ utho bru ọgọdọ udi-uruo fihọ iẹe.+

Kẹsena o te bi rẹro nọ o te mọ emamọ ibi,

Rekọ o tẹ mọ ibi nọ i fioka ha ọvo.+

 3 “Whaọ enẹna, whai ahwo nọ a be rria Jerusalẹm gbe ezae Juda,

Ivie wha bruoziẹ mẹ avọ ọgbọ evaene mẹ.+

 4 Eme ọfa mẹ hai gbe ru kẹ ọgbọ evaene mẹ

Nọ me ri ru hu?+

Fikieme o rọ mọ ibi nọ i fioka ha ọvo,

Kpakiyọ me bi rẹro nọ emamọ ibi o te mọ?

 5 Enẹna, ivie, jomẹ vuẹ owhai

Oware nọ me ti ru ọgbọ evaene mẹ:

Me ti si ogba nọ o wariẹ e riẹ họ na no,

A vẹ te mahe iẹe no.+

Me ti kporo ugbẹhẹ itho riẹ fihọ otọ,

A ve ti thihi ehru riẹ.

 6 Me ti ru ei fihọ otọ nọ o raha no;+

A te rẹrote ekakọ riẹ hayo kporo otọ riẹ hẹ.

Idhigbo gbe ẹbe i ti di vọe,+

Yọ mẹ te ta kẹ ẹgho na nọ ọ rrọ oso ku ei vievie he.+

 7 Uwou Izrẹl họ ọgbọ evaene Jihova olori egbaẹmo;+

Ahwo Juda họ ọgbọ* nọ o jẹ were iẹe oma na.

O je rẹro uvioziẹ,+

Rekọ rri! okienyẹ ọ jariẹ;

O je rẹro ẹrẹreokie,

Rekọ rri! oviẹ ahwo nọ a be ruẹ uye o jariẹ.”+

 8 Uye u te enọ i bi ku uwou jọ kugbe uwou ofa+

Gbe enọ i bi ku udhu jọ kugbe udhu ofa+

Bẹsenọ oria ovo o gbe ro kiọkọ họ

Whai ọvo wha tẹ be rria ẹkwotọ na!

 9 Jihova olori egbaẹmo o duwu iyei nọ mẹ rọ ezọ mẹ yo

Inọ iwou buobu, dede nọ e rrọ ruaro je wo erru,

I ti zihe ruọ oware idudu,

Nọ ohwo ọvo ọ be rria ha.+

10 Udi nọ o rẹ vọ owawọ ebate* ovo u ti no egbudhu ikpe* ọrọ ọgbọ evaene ze,

Yọ ibi nọ e rẹ vọ owawọ ifa* ovo a te kọrọ evaọ oria nọ a rehọ ibi nọ e rẹ vọ owawọ homa* rọ kọ.+

11 Uye u te enọ e rẹ kpama evaọ irioke frifri re a da udi ogaga,+

Enọ e rẹ da ri te owọwọ bẹsenọ udi u re mu ai!

12 A wo akpata avọ akpata-ifi,

Ojẹjẹ, urete, gbe enwaene evaọ ehaa rai;

Rekọ a re roro kpahe iruẹru Jihova ha,

Yọ a rẹ ruẹ iruo abọ riẹ hẹ.

13 Fikiere ahwo mẹ a ti kpohọ igbo

Fikinọ a wo eriariẹ hẹ;+

Ohọo u ti kpe ezae nọ e jọ usu rai wo oruaro,+

Yọ uruame u ti kpe ahwo rai kpobi.

14 Fikiere Uki* na u ru omariẹ* kẹre vi epanọ o jọ no,

U rovie unu riẹ fihọ gbaladha no, u wo umuo ho;+

Yọ erru okpẹwho na,* ogbotu ahwo riẹ nọ a bi ru edo na, gbe ahwo riẹ nọ a bi ru ehaa odode

A te siọ eva Uki na ba ekpohọ họ.

15 Ohwo-akpọ o ti hrẹ kpotọ,

A te rehọ ohwo-akpọ ziọ otọ,

Yọ a te rehọ ibiaro ahwo omorro na ziọ otọ.

16 Ẹdhoguo* Jihova olori egbaẹmo o te kpare iẹe kpehru;

Ọghẹnẹ uzẹme na, Ọnọ Ọ rrọ Ọrẹri na,+ o ti ru omariẹ fo ẹkwoma ẹrẹreokie.+

17 Imigodẹ na e te re ẹbe wọhọ epaọ okenọ a rrọ otọ obọrai nọ ẹbe ọ rrọ;

Erara nọ e te rria etẹe e te re emu evaọ eria ifofe nọ erao epoporiẹ e jọ.

18 Uye u te enọ e rẹ rọ ifi eviẹhọ si iruthọ rai lele oma

Jẹ rehọ ifi akẹkẹ si izieraha rai;

19 Enọ e rẹ ta nọ: “Jọ O ru iruo riẹ kpata kpata;

Jọ o nyaze vẹrẹ vẹrẹ re ma ruẹ e riẹ.

Jọ ẹjiroro* ọnọ ọ rrọ Ọrẹri Izrẹl o rugba

Re ma ruẹse riẹ kpahe iẹe!”+

20 Uye u te enọ e rẹ ta nọ ewoma yọ eyoma jẹ ta nọ eyoma yọ ewoma,+

Enọ e rẹ rehọ ebi nwene elo jẹ rehọ elo nwene ebi,

Enọ e rẹ rehọ oware oyayare nwene omemere jẹ rehọ omemere nwene oyayare!

21 Uye u te enọ i rri omarai nọ a wo areghẹ gaga

Je roro nọ a re rri oware mu gaga!+

22 Uye u te enọ e rrọ egba udi-oda

Gbe ahwo nọ a riẹ kpahe epanọ a rẹ gua idi egaga kugbe da,+

23 Enọ i re brukẹ ohwo omuomu inọ ọ rease nọ a tẹ re udi no+

Gbe enọ i re brukpe ohwo okiẹrẹe inọ ọ reabe!+

24 Fikiere, nwane wọhọ epanọ erae e rẹ mahe igbeka nọ a gbẹre dhe no na

Gbe epanọ erri erae o re ru ẹbe ọyaya siku na,

Awọ rai o ti gbo no,

Yọ idodo rai e te vaha no wọhọ ovu,

Keme a siọ uzi* Jihova olori egbaẹmo

A te je veghe uzou kẹ ẹme Ọrẹri Izrẹl.+

25 Oyejabọ nọ Jihova o bi ro mu ofu ọgaga kẹ ahwo riẹ na,

Yọ ọ te rriẹ obọ riẹ riwi ae re ọ kẹ ae uye.+

Igbehru na i ti nuhu,

Iri rai e te jọ wọhọ ezuzu evaọ iyẹrẹ.+

Fiki eware nana kpobi, ofu riẹ o ri hrẹ hẹ,

Obọ riẹ o gbẹ rriẹ fihọ re ọ kẹ ae uye.

26 Ọ kpare oware oka* jọ kpehru rọkẹ orẹwho nọ o rrọ ugbothabọ;+

Ọ rehọ oviọlọ ro se ai re a no oka avọ oka otọakpọ na ze;+

Rri! a bi siawọ ze kpata kpata.+

Umueku nọ a rọ gba eku o fere he,

Yọ ifi eviẹ rai e sawo ho.

28 Ese rai kpobi e rrọ dada,

Yọ a vẹ ize rai kpobi fihọ.*

Ekothawọ enyenya rai e wọhọ utho ọgaga,

Yọ etẹ ekẹkẹ rai e wọhọ okpofou.+

29 Enuodo rai ọ wọhọ ọrọ okpohrokpo;

A bi do enu wọhọ ikpohrokpo egaga.*+

A te go, a ve mu arao

A vẹ wọe vrẹ ababọ ohwo ọvo nọ o ti siwi ei no obọ rai.

30 Evaọ ẹdẹ yena a te go fiki riẹ

Wọhọ epanọ abade na ọ rẹ go.+

Ohwo kpobi nọ o bi rri ẹkwotọ na ọ te ruẹ ebi nọ ọ rẹ kẹ idhọvẹ;

Makọ elo na dede o zihe ruọ ebi no fiki ẹgho na.+

Mẹ te seba ewhu hu,*

Keme mẹ yọ ohwo nọ igbenu riẹ e fo ho,

Yọ mẹ be rria udevie ahwo nọ igbenu rai e fo ho;+

Keme ibiaro mẹ e ruẹ Ovie na no, Jihova olori egbaẹmo omariẹ!”

A si abe-ọriọ ra no,

Yọ a si uzioraha ra no.”

‘Wha ti dhe eyeyo,

Rekọ wha ti wo otoriẹ hẹ;

Wha ti dhe ẹruẹruẹ;

Rekọ wha ti wo eriariẹ ọvuọvo ho.’+

10 Ru udu ahwo nana fihọ gaga,+

Ru ezọ rai di no,+

Ru ibiaro rai tamu,

Re a gbẹ rọ ibiaro rai ruẹ ude he

Hayo rọ ezọ rai yo ho,

Re udu rai u gbe wo otoriẹ hẹ,

Yọ a ti kurẹriẹ hẹ re a siwi ai.”+

“Bẹsenọ ikpewho na e rẹ raha kuotọ no nọ ohwo ọvo ọ gbẹ be rria ae he,

Yọ ahwo a gbẹ rrọ iwou na ha,

Ẹkwotọ na ọ tẹ jẹ raha jẹ rrọ ofofe no;+

12 Bẹsenọ Jihova ọ rẹ rehọ ahwo-akpọ vrẹ kpohọ ugbothabọ no+

Yọ eria nọ e rrọ ofofe evaọ ẹkwotọ na e rrọ buobu gaga no.

“A te sai ru ei hi,

Yọ o te via ha.

 8 Keme Damaskọs họ ọnọ o wuzou Siria,

Rizin o te wuzou Damaskọs.

Evaọ ikpe udhosa-gbisoi ọvo

A te raha Ifremu muotọ, yọ o gbẹ te jọ orẹwho ho.+

 9 Sameria họ ọnọ o wuzou Ifremu,+

Ọmọzae Rẹmalaya o te wuzou Sameria.+

Ajokpanọ who re wo ẹrọwọ ọgaga,

O gbẹ rrọ ere he, whọ te sai dikihẹ gaga ha.”’”

 6 “Fikinọ ahwo nana a siọ ame Shailoa*+ nọ o bi su ẹmẹrera na,

A tẹ be ghọghọ fiki Rizin gbe ọmọzae Rẹmalaya,+

 7 Rri! Jihova ọ te rehọ

Ame Ethẹ* na nọ ọ rrọ buobu jẹ rrọ kẹkẹe na rọ wọso ae,

Koyehọ ovie Asiria+ avọ oruaro riẹ kpobi.

Ọ te wọ ze ruru otọ iko-ame riẹ kpobi

Ọ vẹ te vọ ruọ okpa riẹ kpobi

 8 O ve su ruọ Juda soso.

Ọ te wọhọ owhe, o ve ti ku omariẹ soso, rite obọ uriohọ riẹ;+

Ibekpe riẹ nọ ọ rriẹ fihọ e te rehọ okẹkẹe ẹkwotọ ra,

O Imanuẹl!”*+

Wha ta ẹme kpobi nọ u je owhai, rekọ o te via ha,

Keme Ọghẹnẹ ọ rrọ kugbe omai!*+

Wha dhozọ oware nọ a be dhozọ riẹ hẹ;

Wha nuhu fiki riẹ hẹ.

13 Jihova olori egbaẹmo họ Ọnọ wha re rri nọ ọ rrọ ọrẹri,+

Ọye họ Ọnọ wha rẹ dhozọ riẹ,

Yọ ọye họ Ọnọ ọ rẹ lẹliẹ owhai nuhu.”+

14 Ọ te jọ wọhọ aruẹri,

Rekọ ọ te jọ wọhọ utho nọ a re kpe owọ họ

Jẹ wọhọ utho nọ u re ru ohwo zoruẹ,+

Rọkẹ iwou ivẹ Izrẹl na,

Wọhọ ẹta gbe agbefẹ

Rọkẹ ahwo nọ a be rria Jerusalẹm.

15 Ibuobu rai i ti zoruẹ je kie, a vẹ nwoma;

A te kpahe ẹta kẹ ae, a ve mu ai.

16 Kpiri obe nọ a kere ovuẹ na fihọ na;*

Gba uzi* na di evaọ udevie ilele mẹ!

 2 Ahwo nọ a jẹ nya evaọ ebi na

A ruẹ elo ologbo no.

Yọ enọ e be rria ẹkwotọ ebi ọlala,

Elo o lo mu ai no.+

 3 Who ru orẹwho na fihọ buobu no;

Who ru rie wo oghọghọ ulogbo no.

A be ghọghọ evaọ aro ra

Wọhọ epanọ ahwo a rẹ ghọghọ evaọ oke ivuẹvu,

Wọhọ ahwo nọ a be rọ oghọghọ ghale egbo-ẹmo.

 4 Who wiri owhowha nọ a rọ wha owha rai ibribro no,

Te ọkpọ nọ ọ rrọ ikoko rai, ubiọkpọ ohwo nọ o re dhe iruo na,

Wọhọ epaọ ẹdẹ nọ a ro fi Midian kparobọ.+

 5 Eviẹ-ibutu kpobi nọ o re nuhu otọakpọ na nọ a tẹ be rehọ iẹe nya onya,

Gbe ewu kpobi nọ a bru họ azẹ

U ti zihe ruọ ire erae.

 6 Keme a yẹ ọmọ jọ kẹ omai no,+

A kẹ omai ọmọzae jọ no;

Isuẹsu* na e rẹ te jọ ẹkoko riẹ.+

 7 Isuẹsu* riẹ e te kẹre thabọ

Yọ udhedhẹ u ti wo oba ha,+

Evaọ agbara-uvie Devidi+ gbe uvie riẹ

Re ọ ruẹse rehọ iẹe dikihẹ gaga+ jẹ sẹro riẹ

Ẹkwoma uvioziẹ+ gbe ẹrẹreokie,+

No enẹna vrẹ rite ebẹdẹ bẹdẹ.

 8 Jihova o vi ovuẹ jọ rọ kẹ Jekọp unuovẹvẹ,

Yọ o via kẹ Izrẹl no.+

 9 Ahwo na kpobi a te riẹ kpahe iẹe

—Ifremu avọ ahwo nọ a be rria Sameria—

Enọ e be rọ omorro rai gbe udu ogaga rai ta nọ:

 10 “Ibriki i kie no,

Rekọ ma te rehọ itho nọ a bru rọ bọ.+

A bru ire sikamọ fihọ otọ no,

Rekọ ma te rehọ ire sida nwene ai.”

 11 Jihova ọ te kpare ewegrẹ Rizin wọso ẹe,

O ti ru ewegrẹ riẹ jowọ,

12 Siria o ti no obọ ovatha-ọre ze, ahwo Filistia a ve no obọ ukiediwo-ọre ze,*+

A te rọ inu nọ i rovie fihọ lọ Izrẹl no.+

Fiki eware nana kpobi, ofu riẹ o ri hrẹ hẹ,

Obọ riẹ o gbẹ rriẹ fihọ re ọ kẹ ae uye.+

13 Keme ahwo na a ri ti zihe bru Ọnọ ọ kẹ rai uye he;

A re gwọlọ Jihova olori egbaẹmo ho.+

14 Jihova o ti bru uzou gbe uweli no Izrẹl,

Te ẹbe nọ ọ dhẹ ze obọ avọ ẹbe nọ o di kpekpehru no,* evaọ ẹdẹ ọvo.+

15 Ọkpako na avọ ọnọ a be kẹ adhẹẹ gaga na họ uzou na,

Yọ ọruẹaro nọ ọ be kẹ uthubro ọrue na họ uweli na.+

16 Enọ i bi su ahwo nana a bi ru ai ghoro,

Yọ enọ a bi su na i reghe no.

17 Oyejabọ nọ eva izoge emezae rai e gbẹ te rọ were Jihova ha na,

Yọ o ti wo ohrọ-oriọ kẹ emọ rai nọ i wo esẹ hẹ hẹ* gbe eyae-uku rai

Keme aikpobi yọ enọ e siọ orọwọ na no, a tẹ jẹ rrọ irumuomu,+

Yọ unu ohwo kpobi o be ta eme igheghẹ.

Fiki eware nana kpobi, ofu riẹ o ri hrẹ hẹ,

Obọ riẹ o gbẹ rriẹ fihọ re ọ kẹ ae uye.+

18 Keme umuomu o be ware wọhọ erae,

Be to ire inwe avọ ẹbe no.

U ti tu erae họ ituetue nọ e rrọ owhawho,

I ve ti kuye iwiri kpobọ ehru dududu.

19 Fiki ofu ọgaga Jihova olori egbaẹmo,

A tu erae họ ẹkwotọ na no,

Yọ ahwo na a ti zihe ruọ ire erae.

20 Ohwo o ti bru emu fihọ otọ evaọ obọze

Rekọ ohọo u ti gbe kpei ghele;

Ohwo ọ te re emu evaọ ẹkpẹlobọ

Rekọ eva e te vọe he.

Omomọvo ọ te re uwo ugbobọ obọriẹ no,

21 Manasẹ ọ te re Ifremu no,

Yọ Ifremu ọ te re Manasẹ no.

Fiki eware nana kpobi, ofu riẹ o ri hrẹ hẹ,

Obọ riẹ o gbẹ rriẹ fihọ re ọ kẹ ae uye.+

10 Uye u te enọ i re fi ijaje imuomu họ,+

Enọ i re kere izi okienyẹ kẹse kẹse,

 2 Re oyogbe o gbe wo uvẹ gu ẹkẹ unu riẹ hẹ,

Re a siọ uvioziẹ ba ebru kẹ oruori nọ ọ rrọ udevie ahwo mẹ,+

A be kwa eware eyae-uku wọhọ egbo-ẹmo

Jẹ be kwa eware emọ nọ i wo esẹ hẹ* rehọ!+

 3 Ẹvẹ who ti ru evaọ ẹdẹ nọ who ti gu epanọ who ru te,*+

Okenọ ọraha o ti no obọ ugbothabọ ze?+

Ono whọ te dhẹ bru kẹ obufihọ,+

Kọ diẹse whọ te nyasiọ ekwakwa efe* ra ba?

 4 Oware ovo u kiọkọ họ ajokpaọ ekieviẹ nọ o ti kieviẹ evaọ udevie enọ e rrọ uwou-odi

Hayo ekie nọ o ti kie fihọ udevie enọ a kpe fihọ otọ.

Fiki eware nana kpobi, ofu riẹ o ri hrẹ hẹ,

Obọ riẹ o gbẹ rriẹ fihọ re ọ kẹ ae uye.+

 5 “Rri! Ohwo Asiria na,+

Ọkpọ nọ me ti ro dhesẹ ofu mẹ via,+

Yọ ubiọkpọ nọ ọ rrọ obọ rai na me ti ro dhesẹ obrukpe mẹ!

 6 Me ti vi ei rọsuọ orẹwho nọ o siọ orọwọ no,+

Rọsuọ ahwo nọ a ru omẹ eva dha gaga;

Mẹ te ta kẹe nọ ọ kwa egbo-ẹmo buobu gbe eware buobu

Re o je thihi ae nyaotọ wọhọ ọloho nọ ọ rrọ iyẹrẹ.+

 7 Rekọ ọ te gwọlọ ru onana ha,

Yọ omaa utiona o te jọ udu riẹ hẹ;

Keme oware nọ o rrọ udu riẹ họ re ọ raha muotọ,

Re o bru erẹwho buobu kufiẹ, orọnikọ umutho ho.

 8 Keme ọ ta nọ,

‘Kọ ikpahwo-esuo mẹ kpobi ogbẹrọnọ ivie a rrọ?+

10 Obọ mẹ u kru ekwotọ-ivie erọ eghẹnẹ nọ i fioka ha na no,

Enọ emema rai nọ a kare i bu vi erọ Jerusalẹm gbe Sameria!+

11 Kọ me gbe ti ru Jerusalẹm avọ emedhọ riẹ

Wọhọ epanọ me ru Sameria avọ eghẹnẹ riẹ nọ i fioka ha na?’+

12 “Okenọ Jihova o te ku iruo riẹ kpobi họ no evaọ Ugbehru Zayọn gbe Jerusalẹm, Ọ* te kẹ ovie Asiria uye fiki udu ogaga riẹ gbe uriwo omorro riẹ.+ 13 Keme ọ ta nọ,

‘Ogaga obọ mẹ me ti ro ru onana

Gbe areghẹ mẹ, keme me wo areghẹ.

Me ti si iwhru etọ ahwo no+

Mẹ vẹ kwa eware aghae rai rehọ,+

Yọ me ti mu ahwo nọ a be rria ae wọhọ ọgba.+

14 Obọ mẹ u ti kru ekwakwa ahwo na,

Wọhọ ohwo nọ o bi dhobọ họ uwou ọvra;

Me ti koko otọakpọ na soso họ,

Wọhọ ohwo nọ o bi koko ike nọ a gbabọkẹ no họ!

16 Fikiere Olori uzẹme na, Jihova olori egbaẹmo,

O ti ru ahwo riẹ nọ a rrọ fuẹfu dọ,+

Yọ o ti koko ebruerae họ otọ oruaro riẹ.+

17 Elo Izrẹl+ o ti zihe ruọ erae,+

Ọrẹri riẹ o ve ti zihe ruọ erri erae;

O te ware, o vẹ mahe ebe ẹwọ riẹ gbe ire inwe riẹ muotọ evaọ ẹdẹ ọvo.

18 O ti si erru owhawho riẹ gbe egbọ ekakọ riẹ no riẹriẹriẹ;

O te jọ wọhọ epaọ ohwo nọ ọ be mọ nọ o bi dhe ẹdẹdọ.+

19 Ire owhawho riẹ nọ i ti kiọkọ

E te kawo te epanọ ọmaha ọ sai ro kele ai mu.

20 Evaọ ẹdẹ yena, enọ i kiọkọ evaọ Izrẹl

Avọ enọ e zọ evaọ uwou Jekọp

A gbẹ te rẹroso ọnọ ọ kẹ rai uye na ha;+

Rekọ a te rẹroso Jihova,

Ọrẹri Izrẹl na, avọ ọtẹruo.

21 Ikiọkotọ jọ ọvo i ti zihe,

Ikiọkotọ Jekọp i ti zihe bru Ọghẹnẹ Ologbo na.+

22 Keme dede nọ ahwo ra, O Izrẹl,

A wọhọ uwẹkpẹ abade,

Ikiọkotọ jọ ọvo evaọ usu rai i ti zihe.+

A jiroro nọ a ti kpe ahwo ra muotọ no,+

Yọ uvioziẹ* u ti ruru ai.+

23 Ẹhẹ, iroro nọ Olori nọ Ọ Mai Kpehru na, Jihova olori egbaẹmo ọ jẹ inọ a ti kpe ai muotọ na,

A ti ru ei gba evaọ ẹkwotọ na soso.+

27 Evaọ ẹdẹ yena, owha riẹ u ti no ẹkoko ra,+

Owhowha riẹ u ti no uriohọ ra,+

Yọ a ti wiri owhowha na+ fiki ewhri na.”

28 Ọ nyaziọ Aiyat no;+

Ọ nya Migrọn vrẹ no;

Ọ wọ ewha riẹ fihọ Mikmash.+

29 A nya eria ekpakpafua na vrẹ no;

A rrọ Giba evaọ aso na;+

Rema o bi nuhu, Gibiah+ ọrọ Sọl ọ dhẹ no.+

Ọ fare obọgo kẹ ugbehru ọmọtẹ Zayọn,

Ukpehru Jerusalẹm.

33 Rri! Olori uzẹme na, Jihova olori egbaẹmo,

O bi ko egha ire fihọ otọ avọ edo imuozọ nọ i bi ru;+

A bi ko ire nọ e mai theri fihọ otọ,

Yọ a be rehọ enọ e rrọ kpekpehru ziọ otọ.

34 Ọ be rọ okwakwa ayọno* ko ire owhawho na fihọ otọ,

Yọ ọgba o ti gele Lebanọn kie.

11 Omogha+ jọ o te ta no ehri-ure Jẹsi ze,+

Yọ okakọ nọ o te dhẹ+ no awọ riẹ ze o te mọ ubi.

 2 Ẹzi Jihova ọ te ruọ ẹe oma,+

Ẹzi areghẹ+ gbe ọrọ otoriẹ,

Ẹzi nọ ọ rẹ rọ kẹ ohrẹ gbe ọrọ ogaga,+

Ẹzi eriariẹ gbe ọrọ ozodhẹ Jihova.

Orọnikọ oware nọ ọ rọ ibiaro riẹ ruẹ o ti ro bruoziẹ hẹ,

Hayo kọ oware nọ ọ rọ ezọ riẹ yo ọvo ọ te rọ kẹ ọwhọkuo ho.+

 4 O ti bruoziẹ iruori na ababọ okienyẹ,*

Yọ ọ te rọ ẹrẹreokie whọku ahwo fiki enọ e be romakpotọ evaọ otọakpọ na.

Ọ te rehọ ọkpọ unu riẹ fa otọakpọ na,+

Ọ vẹ rehọ ẹwẹ* igbenu riẹ kpe ahwo omuomu na no.+

 5 Ẹrẹreokie ọ te jọ umueku nọ ọ rọ gba eku riẹ,

Yọ ọtẹruo ọ te jọ umueku eku riẹ.+

 6 Ojera avọ omogodẹ a te hae jọ kugbe ẹsejọ,+

Yọ okeke o ti ruẹ kugbe ọmọ ẹwe,

Ọmọ-eruẹ avọ okpohrokpo* gbe arao ọpoporiẹ a te jọ kugbe;*+

Yọ ọmọzae ọsese o ti su ai.

 7 Eruẹ avọ adaka a te re emu kugbe,

Yọ emọ rai i ti ruẹ fihọ oria ovo kugbe.

 8 Ọmọ unuevie ọ te jọ eghogho ọrọza* zaharo,

Ọmọ nọ a bru evie no o ti dhobọ họ eghogho araomuomu nọ o wo obi.

 9 A te wha enwoma ọvo ze he+

Hayo wha ọraha ọvo ze he evaọ ugbehru ọrẹri mẹ na soso,+

Keme eriariẹ Jihova e te ginẹ vọ otọakpọ na

Wọhọ epanọ ame ọ vọ abade na.+

Ọye erẹwho na e te nyabru re ọ kpọ ae,*+

Yọ oria eriosehọ riẹ o ti wo erru.

13 Ihri-eriọ Ifremu i ti kuhọ,+

Yọ a re ti si enọ i bi mukpahe Juda no.

Ifremu ọ gbẹ te re Juda ihri hi,

Yọ Juda o gbe ti mukpahe Ifremu hu.+

14 A te vẹruọ ikiekpotọ* ahwo Filistia evaọ ofẹ ukiediwo-ọre;

A ti kuomagbe kwa eware ahwo obọ Ovatha-ọre.

A te rriẹ obọ rai rọsuọ* Edọm+ avọ Moab,+

Yọ ahwo Ammọn a ti zihe ruọ ahwo nọ a rrọ otọ rai.+

15 Jihova ọ te ghale uto* abade Ijipti na kpohọ abava*+

Je veghe obọ riẹ evaọ ehru Ethẹ na.*+

Ọ te rehọ ẹwẹ* ọrrorro riẹ tehe iẹe evaọ* iko-ame ihrẹ riẹ,

O ve ti ru ahwo nyaruọ abọdekọ riẹ avọ eviẹ nọ a kuhọ.

16 Edhere ologbo+ nọ a re ro no Asiria ọ vẹ te jariẹ kẹ ikiọkotọ ahwo riẹ nọ a kiọkọ,+

Wọhọ epanọ o jọ kẹ Izrẹl evaọ ẹdẹ nọ o ro no ẹkwotọ Ijipti ze.

“O Jihova, me yere owhẹ,

Keme dede nọ who je mu ofu kẹ omẹ,

Ofu ra ọ rọ ẹmẹrera hrẹ kpotọ, whọ tẹ sasa omẹ oma.+

Mẹ te rẹroso ẹe, yọ ozọ u ti mu omẹ hẹ;+

Keme Jah* Jihova họ ẹgba gbe ogaga mẹ,

Yọ o zihe ruọ esiwo mẹ no.”+

 3 Wha te rọ oghọghọ si ame no

Iyeri-ame esiwo ze.+

“Wha yere Jihova, wha bo se odẹ riẹ,

Wha dhesẹ iruẹru riẹ via evaọ udevie ahwo na!+

 6 Bo via jẹ ghọghọ, whẹ ọnọ ọ be rria* Zayọn,

Keme Ọrẹri Izrẹl nọ ọ rrọ udevie ra na ọ rrọ ruaro.”

Wha kpaunu se ai, wha veghe obọ rai,

Re a ruẹse nyaze obaro iwou ikpahwo na.

 4 Wha gaviezọ! Ogbotu ahwo jọ a rrọ obọ igbehru na;

Edo rai ọ wọhọ edo ahwo buobu!

Wha gaviezọ! Ẹvohẹ ọ rrọ udevie ekwotọ-ivie,

Udevie erẹwho nọ i kokohọ!+

 5 A bi no ẹkwotọ ugbothabọ jọ ze,

No obọ oka idhiwu na ze,+

Jihova avọ ekwakwa ẹmo ofu riẹ,

Re ọ raha otọakpọ na soso no.+

 7 Oyejabọ nọ abọ kpobi e te rọ ko,

Yọ udu u ti no ohwo kpobi awọ* fiki ozọ.+

Ewawa gbe edada i kru rai no,

Wọhọ aye nọ ọ be thuẹ othuẹ eyẹ.

A bi rri ohwohwo avọ idudu,

Avọ ovao nọ awa ọ dafia.

 9 Rri! Ẹdẹ Jihova ọ be tha,

Avọ ofu gbe evedha egaga, o te re ohrọ ohwo ọvo ho,

Re u ru ẹkwotọ na fihọ oware idudu,+

Re o kpe erahaizi ẹkwotọ na muotọ.

10 Keme isi obọ ehru* na avọ eko isi rai,*+

I ti gbe lo ho;

Ọre na o ti muebi evaọ okenọ ọ te va ze,

Yọ ọvẹre na o ti siobọno elo riẹ hẹ.

11 Mẹ te rehọ ahwo nọ a be rria otọakpọ na guẹdhọ fiki eyoma riẹ,+

Gbe ahwo omuomu na fiki oruthọ rai.

Me ti ru omorro otu omoya serihọ,

Je ti hrẹ omorro otu egeva kpotọ.+

12 Me ti ru ohwo-akpọ gheghe bẹ ẹgwọlọ vi igoru nọ a ru fo no,+

Je ti ru ahwo-akpọ bẹ ẹgwọlọ vi igoru obọ Ofaya.+

13 Oyejabọ nọ me ti ro ru idhiwu na nuhu,

Yọ otọakpọ na u ti nuhu no oria riẹ+

Fiki ofu ọgaga nọ Jihova olori egbaẹmo o ti mu evaọ ẹdẹ ofu ọgaga riẹ.

14 Wọhọ ugbosu nọ a bi le jẹ wọhọ igodẹ nọ i wo ohwo nọ o re koko ai họ họ,

Omomọvo o ti zihe bru ahwo obọriẹ;

Omomọvo ọ te dhẹ kpobọ ẹkwotọ obọriẹ.+

15 A ti duwu ohwo kpobi nọ a ruẹ lafi,

Yọ a te rehọ ọgbọdọ kpe ohwo kpobi nọ a kru.+

16 A te rehọ emọ rai fi otọ bẹre ehehẹhẹ evaọ iraro rai,+

A te kwa eware iwou rai rehọ,

Yọ a te gba eyae rai du.

17 Mẹ be kpare ahwo Midia rọsuọ ae,+

Enọ i rri isiliva fihọ oware ovo ho,

Enọ igoru i re siuru hu.

18 Ize rai e te sa izoge emezae rai kpe;+

A te re ohrọ ubi nọ u no edhede na ze he

Hayo re ohrọ emọ họ.

19 Yọ Babilọn, uvie nọ o mai wo oruaro evaọ usu ekwotọ-ivie,*+

Ọnọ ọ rrọ erru gbe omorro ahwo Kaldia+ na,

Ọ te jọ wọhọ Sọdọm avọ Gomora evaọ okenọ Ọghẹnẹ ọ raha ai no.+

20 A te rriae vievie he,

Yọ ọ te jọ oria nọ a rẹ rria ha evaọ ige kpobi.+

Ohwo Arab ọvo ọ te rehọ uwou-udhu vi etẹe he,

Yọ uvumọ ithuru-igodẹ i ti su igodẹ rai kpohọ etẹe nyai serihọ họ.

21 Emama udhude i ti kiẹzẹ etẹe;

Ikpukpuru e te vọ iwou rai.

Igomugoro e te rria etẹe,+

Ewe ẹwọ* e te jọ etẹe duola kpenẹ avọ enẹ.

22 Erao nọ i re bo i ti bo evaọ iwou ikpehru riẹ,

Yọ ikozi e te jọ emamọ iwou ilogbo riẹ.

 5 Jihova o wiri ọkpọ ahwo omuomu na no,

Ubiọkpọ isu na,+

 6 Ọnọ ọ be rọ ofu bọwo ahwo ego ababọ eriosehọ,+

Ọnọ ọ be rọ evedha su erẹwho avọ ukpokpoma nọ u bi kuhọ họ.+

 8 Makọ ire junipa dede e be ghọghọ fiki ra,

Te ire sida obọ Lebanọn.

A be ta nọ, ‘Anwẹnọ who ro kie na,

Obru-ire ọvo ọ re gbẹ nyaze ti bru omai hi.’

 9 Makọ Uki* nọ o rrọ obotọ dede u duwuku

Nọ a ruẹ owhẹ evaọ etẹe.

Fiki ra, ọ rọwo enọ i whu no nọ i wo ogaga ha kpama,

Isu okienyẹ* otọakpọ na kpobi.

10 Aikpobi a te mu ẹme họ ẹta, be ta kẹ owhẹ nọ,

‘Kọ who zihe ruọ ọnọ o wo ogaga ha no wọhọ omai?

11 A rehọ omorro ra ziọ obọ Uki* no,

Te edo ekpata-ifi ra.+

Ihoi e ruẹrẹ oma họ obotọ ra wọhọ ehwa,

Ezazọ* who ro wowo.’

12 Rri epanọ who kie no obọ odhiwu ze,

O ọnọ o bi lo, ọmọzae oke nọ o ke no!

Rri epanọ a gbẹre owhẹ kie fihọ otọakpọ,

Whẹ ọnọ ọ raha erẹwho muotọ!+

Mẹ te kpare agbara-uvie mẹ kpobọ ehru vi isi Ọghẹnẹ,+

Yọ mẹ te keria ehru ugbehru ẹgwae,

Evaọ abọ nọ ọ mai thabọ evaọ obọ ẹkpẹlobọ ovatha-ọre.+

14 Mẹ te nya kpehru vi obọ ehru ẹgho na;

Me ti ru omamẹ tho Ọnọ Ọ Mai Kpehru na.’

15 Ukpoye, a te rehọ owhẹ ziọ obọ Uki,*

Ziọ obonọ ọ mai kodo evaọ ọgọdọ na.

16 Ahwo nọ a be ruẹ owhẹ a te tẹrovi owhẹ;

A te romatotọ rri owhẹ, yọ a be nọ nọ,

‘Kọ ọzae nọ o je nuhu akpọ na ọna,

Ọnọ o je ru ekwotọ-ivie nuhu na,+

17 Ọnọ o ru otọakpọ na jọ wọhọ udhude na

Je fi ikpewho riẹ kparobọ na,+

Ọnọ ọ rọwo siobọno ahwo uwou-odi riẹ kpo ho na?’+

18 A ki ivie erẹwho efa kpobi

Emamọ ekio, ẹhẹ, aikpobi,

Omomọvo rai ọ rrọ eva uki* obọriẹ.

19 Rekọ a gbolo owhẹ kufiẹ ababọ uki nọ a ki owhẹ fihọ,

Wọhọ okakọ* nọ u bi tu ohwo oma,

Ọnọ ọ rehọ ahwo nọ a rọ ọgbọdọ duwu kpe gọ ẹgọ,

Enọ i re kpobọ ọgọdọ nọ itho e vọ,

Wọhọ ori nọ a thihi nyaotọ.

20 Who ti kuomagbe ae evaọ uki hi,

Keme whọ raha ẹkwotọ obọra,

Who kpe ahwo obọra.

21 Wha ruẹrẹ oria nọ a te jọ kpe emezae riẹ họ

Fiki abe-ọriọ esẹ-esẹ rai,

Re a gbẹ kparoma ze jẹ rehọ otọakpọ na no ho

A vẹ bọ ikpewho rai vọ ẹkwotọ na.”

“Nwane wọhọ epanọ mẹ gwọlọ na, ere o te via,

Yọ nwane wọhọ epanọ mẹ jiroro na, ere o te via dẹẹ.

25 Mẹ te pẹhẹ ohwo Asiria nọ ọ rrọ ẹkwotọ mẹ na no,

Yọ me ti thihi ei evaọ ehru igbehru mẹ.+

Me ti si owhowha riẹ no oma ahwo mẹ,

Yọ me ti si owha riẹ no ẹkoko rai.”+

26 Onana họ oware nọ ọ jiroro riẹ no* inọ o ti ru otọakpọ na soso,

Yọ onana họ obọ nọ o rriẹ fihọ rọsuọ* erẹwho na kpobi.

27 Keme Jihova olori egbaẹmo ọ jiroro no,

Kọ ono ọ rẹ sae raha iẹe?+

Obọ riẹ o rriẹ fihọ,

Kọ ono ọ rẹ sai kpiri ei zihe?+

29 “Who du ghọghọ họ, Filistia, ohwo ọvo evaọ usu rai o du ghọghọ họ,

Fikinọ a wiri ubiọkpọ ọnọ ọ be fa owhai na no.

Keme araomuomu+ nọ o wo obi o ti no uyẹ araomuomu na ze,+

Yọ ọmọ riẹ ọ te jọ araomuomu nọ o wo erae nọ ọ be rra.*

30 Emọ ọsosuọ iruori na e te re eva vọ

Yọ iyogbe i ti kiẹzẹ avọ omofọwẹ,

Rekọ mẹ te rọ ohọo kpe uyẹ ra no,

Yọ a ti kpe ahwo ra nọ a kiọkọ no.+

Keme iwiri jọ i bi no obọ ẹkpẹlobọ ovatha-ọre ze,

Yọ ohwo ọvo o bi sienẹ họ emu evaọ usu itu ẹmo riẹ hẹ.”

A ti yo kẹ ae nọ Jihova ọ wọ otọhotọ Zayọn họ no,+

Gbe nọ iruori nọ e rrọ usu ahwo riẹ a te dhẹ ruọ eva riẹ.

A ru ẹwho Ar+ ọrọ Moab fọ rirẹ no,

Fikinọ a raha e riẹ no evaọ aso.

A ru ẹwho Kiẹ+ ọrọ Moab fọ rirẹ no,

Fikinọ a raha e riẹ no evaọ aso.

 2 Ọ nya kpobọ Uwou* na je kpobọ Daebọn no,+

Kpohọ eria ikpehru na re ọ nyae viẹ.

Aikpobi a bi kuenu oviẹ evaọ ehru iwou rai gbe iko-ore rai;

A bi kpo obotọ avọ oviẹ.+

 4 Hẹshbọn avọ Ẹliyela+ a bi bo;

A bi yo edo uvou rai evaọ ugbo obọ Jehaz.+

A be viẹ nọ a be nya evaọ edhere-ukpehru Luhit na;

A be viẹ fiki okpẹtu na nọ a rrọ edhere bi kpohọ Horoneyẹm na.+

 6 Keme ame Nimrim ọ kpọ yamu no;

Ẹbe ọrọrọ na o whu no,

Ẹbe na o whu re no, ẹbe ọrọrọ ọvo o gbe kiọkọ họ.

 7 Oyejabọ nọ a be rọ wọ eware rai nọ a kokohọ gbe efe rai nọ i kiọkọ vrẹ na;

A be fa ukiekpotọ* ire pọpla vrẹ.

Enu oviẹ na o bi do te obọ Ẹgleyẹm;

Enu oviẹ na o bi do te obọ Biẹ-ilim.

 9 Keme ame Daemọn ọ vọ avọ azẹ,

Yọ me gbe wo eware efa nọ me ti ru Daemọn:

Okpohrokpo o ti kpe ahwo Moab nọ e vabọ

Gbe enọ i kiọkọ ẹkwotọ na.+

16 Wha vi egbo se osu ẹkwotọ na,

Wha rehọ iẹe evaọ Sila, wha vẹ nya orọ udhude na

Kpobọ ugbehru ọmọtẹ Zayọn.

 2 Emetẹ Moab e te jọ wọhọ ọvra nọ a le no uwou riẹ,+

Evaọ eria ekpakpafua Anọn.+

Ọnọ o bi kienyẹ ahwo na ọ gbẹ te jọ họ,

Ọraha na o ti kuhọ,

Yọ ahwo nọ a bi thihi amọfa nyaotọ a ti whu no otọakpọ na.

Ọnọ ọ te keriae evaọ uwou-udhu Devidi ọ te jọ ọnọ a re fievahọ;+

O ti bruoziẹ ababọ okienyẹ je ru oware nọ u kiẹrẹe ababọ oke oraha.”+

 6 Ma yo kpahe omorro Moab no—o wo omorro gaga+—

Omoya riẹ gbe omorro riẹ gbe ofu ọgaga riẹ;+

Rekọ oware ovo u ti no eme ifofe riẹ ze he.

 7 Fikiere Moab o ti kuenu oviẹ fiki okpẹtu riẹ;

Aikpobi a ti kuenu oviẹ.+

 8 Idhu ekakọ Hẹshbọn+ i lo no,

Evaene Sibma,+

Isu erẹwho na i thihi egha riẹ nọ emamọ ibi e rrọ* nyaotọ no;

I te ugbo obọ Jeza+ no vẹre;

E kẹre abọ ruọ obọ udhude na no vẹre.

Mẹ te rọ irui-oviẹ mẹ ru oma ra vuavo, O Hẹshbọn avọ Ẹliyela,+

Keme edo nọ a bi ru fiki ibi-ire ezi ivo ra gbe ivuẹvu ra o kuhọ no.*

10 A si oghọghọ gbe evawere no ọgbọ na no,

Yọ a be jọ egbọ evaene so ile oghọghọ hayo ru edo ho.+

Ọnọ o re thihi ibi-ire na o gbe bi thihi ibi-ire ro ru enwaene evaọ eria udi-uruo na ha,

Keme me ru edo na serihọ no.+

11 Oyejabọ nọ me bi ro nuhu evaọ obeva fiki Moab,+

Wọhọ akpata nọ a bi kporo,

Gbe evaọ obọ edidi eva mẹ fiki Kiẹ-haresẹt.+

“Rri! Damaskọs ọ gbẹ te jọ okpẹwho ho,

O ti zihe ruọ okpẹwho nọ a raha no.+

 2 A ti gbabọkẹ ikpewho Aroa;+

I ti zihe ruọ eria nọ ithuru erao i re ruẹ fihọ

Yọ ohwo ọvo o ti ru ozọ mu ai hi.

 3 Ikpewho nọ a di ogba wariẹ họ* e te gbẹ jọ Ifremu hu,+

Yọ uvie na o te gbẹ jọ Damaskọs ho;+

Yọ ahwo Siria nọ a kiọkọ

A te wọhọ oruaro ahwo Izrẹl,”* ere Jihova olori egbaẹmo ọ ta.

 4 “Evaọ ẹdẹ yena, oruaro Jekọp o te kawo no,

Yọ emamọ oma riẹ o te dọ no.*

 5 O te jọ wọhọ okenọ ovu-ivuẹvu o bi koko iwhiti nọ i gbe dikihẹ họ

Ọ vẹ rehọ ugbobọ riẹ bru iwhiti na,

Wọhọ okenọ ohwo ọ be jọ udhu iwhiti si isogẹ evaọ Ukiekpotọ* Rẹfeyẹm.+

 6 Enọ a re ro si isogẹ ọvo i ti kiọkọ,

Wọhọ okenọ a nuhu ure olivi,

Ibi olivi ivẹ hayo esa nọ e ware ọvo i te kiọkọ ogha nọ o mai kpehru,

Ibi ene hayo isoi ọvo i te kiọkọ egha riẹ nọ e rẹ mọ ibi,”+ ere Jihova Ọghẹnẹ Izrẹl ọ ta.

 9 Evaọ ẹdẹ yena, ikpewho adhẹzọ riẹ e te jọ wọhọ eria nọ a gbabọkẹ no evaọ owhawho,+

Wọhọ ogha ure nọ a gbabọkẹ evaọ aro ahwo Izrẹl;

O ti zihe ruọ otọ nọ o raha no.

10 Keme Ọghẹnẹ esiwo ra ọ thọrọ owhẹ ẹro no;+

Whọ gbẹ kareghẹhọ Utho+ oria adhẹzọ ra ha.

Oyejabọ nọ whọ rọ kọ egbọ iwowoma*

Whọ tẹ kọ ekakọ eboba ọrara* fihọ udevie rai.

11 Evaọ oke uvo, whọ te romatotọ di ogba wariẹ ọgbọ ra họ,

Evaọ ohiohiẹ, who ti ru ubi ra dhẹ ze,

Rekọ eware nọ who vu e te rayẹ no evaọ ẹdẹ nọ whọ te mọ gaga je wo edada nọ a sai siwi kpo ho.+

12 Gaviezọ! Ozighi ọ rrọ udevie ahwo buobu,

Enọ i bi ru edo wọhọ ebade na!

Ẹvohẹ ọ rrọ erẹwho na,

Edo rai ọ wọhọ edo ame obuobu!

O ti doku ai, a vẹ te dhẹ thethabọ,

A ti le ai wọhọ ehọrọ nọ e rrọ igbehru nọ ofou o bi fou,

Wọhọ enwẹnwẹ nọ okpofou o bi fou kurẹriẹ.*

Onana họ ẹkẹ nọ u ti te enọ i bi tho eware mai

Gbe oware nọ o te via kẹ enọ e be kwa eware mai rehọ.

18 Uye u te ẹkwotọ nọ edo ibekpe ebaka e vọ

Evaọ ubrotọ ithẹ Ẹtiopia!+

 2 O vi enyukọ nya orọ abade,

Re a rọ ekọ papirọs fa vrẹ kpohọ abọdekọ ame na, yọ ọ ta nọ:

“Wha nya, whai enyukọ nọ i re siawọ gaga,

Wha nyabru orẹwho nọ o rrọ thethei je wo oma oriẹriẹ,*

Bru enọ ahwo a be dhozọ rai evaọ oria kpobi,+

Bru orẹwho ogaga nọ u bi fi kparobọ,*

Ọnọ ithẹ i su ẹkwotọ riẹ kufiẹ no.”

 3 Whai ahwo kpobi nọ a be rria ẹkwotọ na gbe owhai enọ e be rria otọakpọ na,

Wha te ruẹ oware jọ nọ o te wọhọ oware oka* nọ a kpare evaọ ehru igbehru na,

Yọ wha ti yo edo nọ ọ wọhọ edo onware nọ a bi kporo.

“Mẹ te fọ tou, me ve rri oria mẹ nọ mẹ ruẹrẹhọ no,*

Wọhọ ẹrrorro elo ọre na nọ o bi mu oria,

Wọhọ igrigri nọ i bi kie evaọ oke ivuẹvu nọ ẹrrorro ọ rrọ.

 5 Keme taure ivuẹvu na i te ti te,

Nọ ivo na e tẹ whẹhọ re no, yọ ododo na o zihe ruọ ubi nọ o ware no,

A te rehọ ibrẹbe bru egha eboba na no

Yọ a te kpare imigbe na no, a ve ku ai fiẹ.

 6 A te nyasiọ aikpobi ba kẹ evra obọ igbehru nọ i re kpe erao

Jẹ rọkẹ erao ẹwọ otọakpọ na.

Evra nọ i re kpe erao na e te jọ ehru rai evaọ ezi ivo,

Yọ erao ẹwọ kpobi nọ e rrọ otọakpọ na e te jọ ehru rai evaọ oke ivuẹvu.

 7 Evaọ oke yena, a te rehọ okẹ se Jihova olori egbaẹmo,

U ti no obọ orẹwho nọ o rrọ thethei je wo oma oriẹriẹ* ze,

No obọ enọ ahwo a be dhozọ rai evaọ oria kpobi ze,

No obọ orẹwho ogaga nọ u bi fi kparobọ* ze,

Ọnọ ithẹ i su ẹkwotọ riẹ kufiẹ no,

Kpohọ oria nọ a be rehọ odẹ Jihova olori egbaẹmo se, koyehọ Ugbehru Zayọn.”+

Eghẹnẹ Ijipti nọ i fioka ha na i ti nuhu evaọ aro riẹ,+

Yọ udu u ti no Ijipti awọ.*

 2 “Me ti ru ahwo Ijipti wọso ahwo Ijipti,

A te họre ohwohwo,

Omomọvo ọ te wọso omoni riẹ gbe ọrivẹ riẹ,

Okpẹwho o te wọso okpẹwho, uvie o te wọso uvie.

 3 Iroro i ti dhe Ijipti ọvẹ,

Mẹ te raha omaa riẹ no.+

A te dhẹ bru eghẹnẹ nọ i fioka ha,

Bru enuahwo gbe ahwo nọ a re lele izi ta ẹme jegbe egbẹva.+

 4 Mẹ te rehọ Ijipti họ obọ olori ọgeva,

Yọ ovie ọgeva o ti su ai,”+ ere Olori uzẹme na, Jihova olori egbaẹmo ọ ta.

 5 Ame abade na ọ te kpọ no,

Yọ ethẹ na ọ te kpọ jẹ yamu.+

 6 Ithẹ na i ti gbo dududu;

Iko-ame Naele Ijipti e te kpọ jẹ yamu.

 7 Ekakọ nọ e rrọ akotọ Ethẹ Naele evaọ obọ unu Naele na,

Jegbe otọ kpobi nọ a kọ eware fihọ evaọ akotọ Ethẹ Naele+ na o te ya fia.+

 8 Ikuori na i ti weri,

Enọ i bi si eghọlọ evaọ Naele na i ti bruenu,

Yọ enọ i bi fi iriri rai họ ame na i ti gbe bu hu.

 9 A ti ru oma vuọ enọ e rẹ rehọ ẹbe eflase*+ nọ a ru fihọ ilulu zuo eware

Gbe enọ e rẹ rehọ ekpọ nọ a re fi ilulu họ zuo eware ro ru ehọ efuafo.

10 A te whọlọ enọ e rẹ jọ eva riẹ zuo eware no;

Iruiruo kpobi nọ a rehọ iruo i ti weri.

“Mẹ yọ ohwo uyẹ iwareghẹ,

Ohwo uyẹ ivie oke anwae”?

13 Ikpahwo-esuo Zoan a ru oware ugheghẹ no;

A viẹ ikpahwo-esuo Nọf*+ họ no;

Iletu erua Ijipti i su Ijipti thọ no.

14 Jihova o ku ẹzi ereghe ku ei no;+

Yọ a su Ijipti thọ no evaọ oware kpobi nọ o bi ru,

Wọhọ ohwo nọ ọ da idi bẹ no nọ o bi kpo geli geli evaọ ehru eware nọ o geli.

15 Ijipti o gbe ti wo iruo ọvo nọ o re ru hu,

Makọ rọkẹ uzou na hayo uweli na, ogha oboba na hayo ẹbe othethei na.*

O be nyaze wọhọ okpofou nọ o bi fou evaọ ofẹ obọze ovatha-ọre,

No obọ udhude na ze, no obọ ẹkwotọ imuozọ ze.+

Ohwo eviẹhọ na o bi ru eware eviẹhọ,

Ohwo ọraha na ọ be raha ọraha.

Edada e ruọ omẹ oma no,

Wọhọ epaọ aye nọ o bi yẹ.

Idhọvẹ nọ e rrọ omẹ oma e ga vi epanọ me re ro yo ẹme;

Ukpokpoma nọ o rrọ omẹ oma o ga vi epanọ mẹ rẹ rọ ruẹ ude.

 7 Ọ tẹ ruẹ akẹkẹ ẹmo nọ utu enyenya i bi si,

Akẹkẹ ẹmo nọ eketekete i bi si,

Akẹkẹ ẹmo nọ ekamẹle i bi si.

“O Jihova, ehru uwou-eroro na me bi dikihẹ kẹse kẹse evaọ oke uvo,

Yọ mẹ rẹ jọ oria mẹ nọ me bi jo rou na kaso kaso.+

10 O ahwo mẹ nọ a si ehọrọ no oma no,

Ubi nọ u no* oria mẹ nọ mẹ rẹ jọ si ibi no igbe ekakọ ze,+

Mẹ niyẹrẹ oware nọ me yo mi Jihova olori egbaẹmo, Ọghẹnẹ Izrẹl kẹ owhai no.

Evaọ owhawho nọ o rrọ udhude na wha te jọ asohẹrioke,

O whai ahwo Didan nọ avọ erao rai a bi kpohọ erẹ.+

14 Wha rehọ ame se ọnọ uruame u bi kpe na,

Whai enọ e be rria ẹkwotọ Tima,+

Re wha jẹ rehọ ebrẹdi se ọnọ ọ be dhẹ na.

15 Keme a dhẹ no fiki ọgbọdọ na, fiki ọgbọdọ nọ a yolo lahwe na,

Fiki uze nọ a vẹ na, jegbe fiki epanọ ẹmo na ọ ga te.

 2 Ẹvohẹ ọ vọ eva ra vẹre,

Whọ jọ okpẹwho nọ edo ọ vọ, ẹwho oghọghọ.

Orọnikọ ọgbọdọ a ro kpe ahwo ra nọ a kpe he,

Hayo kọ ẹmo a jọ whu hu.+

A mu ahwo kpobi nọ a ruẹ rehọ,+

Dede nọ a dhẹ thethabọ no vẹre.

 4 Oyejabọ nọ mẹ rọ ta nọ: “Si ibiaro ra no omẹ,

Mẹ te viẹ gaga.+

Who du si ikẹ hẹ inọ whọ rẹ sasa omẹ oma

Fiki ọraha nọ o te ọmọtẹ* ahwo mẹ.+

 5 Keme ẹdẹ nana yọ ẹdẹ ereghe gbe ẹdẹ ekie gbe ẹdẹ iguegue+

Nọ u no obọ Olori nọ Ọ Mai Kpehru na, Jihova olori egbaẹmo ze

Evaọ Ukiekpotọ Eruẹaruẹ na.

A bi kporo ugbẹhẹ na fihọ otọ+

Yọ a bi bo se ugbehru na.

 6 Ilam+ ọ tọlọ owha-ese

Nọ o rrọ eva ekẹkẹ nọ enyenya* i re si,

Yọ ẹwho Kiẹ+ ọ fariẹ eware no ojese na no.*

 7 Ekẹkẹ ẹmo e te vọ

Ikiekpotọ* ra nọ e mai woma,

Yọ enyenya* na i ti dikihẹ ọvuọ oria rai evaọ obọ unuẹthẹ na,

 8 A ti si oware nọ a ro di* Juda no.

12 Evaọ ẹdẹ yena Olori nọ Ọ Mai Kpehru na, Jihova olori egbaẹmo,

Ọ te ta nọ a viẹ je weri,+

Inọ a nware izou rai je ku ehọ-ekpa* họ.

13 Ukpoye a bi ru ehaa jẹ be ghọghọ,

A bi kpe iruẹ je bi kpe igodẹ,

A be re erao jẹ be da enwaene.+

 3 A rehọ ibi ekakọ* Shaehọ* fa ame buobu vrẹ,+

Eware nọ a jọ ubrotọ Naele vu, enọ o bi wo ugho no ze,

Be rọ ere wha erere erẹwho na ze.+

 4 Jọ oma o vuọ owhẹ, O Saedọn, whẹ oria omofọwẹ abade na,

Keme abade na ọ ta nọ:

“Me ri wo edada eyẹ ẹdẹvo ho, me ri yẹ ẹdẹvo ho,

Yọ mẹ re te yọrọ emezae hayo yọrọ emetẹ hẹ.”*+

 5 Uweri o te jọ ahwo oma fiki usi nọ a ti yo kpahe Taya,+

Wọhọ epanọ o jọ okenọ a yo usi kpahe Ijipti.+

 8 Ono ọ jiroro nana kpahe Taya,

Ọnọ ọ rẹ rehọ itu-uvie tu ahwo na,

Ọnọ egba-ihreki riẹ e jọ ikpahwo-esuo,

Ọnọ a jẹ kẹ ethueki riẹ ọghọ evaọ otọakpọ na soso?+

 9 Jihova olori egbaẹmo omariẹ họ ọnọ ọ jiroro nana,

Re o ru eware nọ ọ be rọ yoma gbe erru riẹ kpobi fihọ eware nọ i fioka ha,

Re o ru oma vuọ ahwo kpobi nọ a jẹ kẹ ọghọ evaọ otọakpọ na soso.+

11 Ọ rriẹ obọ riẹ fihọ abade na no;

O nuhu ekwotọ-ivie no.

12 Yọ ọ ta nọ: “Whọ te gbẹ ghọghọ ofa ha,+

O ọnọ a kienyẹ, ọmọtẹ-kọkọ Saedọn.

Ahwo nana họ ahwo na—Asiria+ họ ahwo na ha—

A ru rie fihọ oria nọ erao udhude e rẹ rria.

A bọ iwou ikpehru ẹmo-ofio rai no;

A kporo iwou ikpehru riẹ nọ e rẹ bẹ ẹvẹruọ kuotọ no,+

A tẹ rọ ere guọghọ iẹe muotọ.

14 Wha kuenu oviẹ, whai ekọ ilogbo Tashish,

Keme a raha oria omofọwẹ rai no.+

Rehọ onaa kporo akpata ra;

So ile buobu,

Re a kareghẹhọ owhẹ.”

Te ahwo na te ozerẹ na,

Odibo avọ olori riẹ,

Odibo-ọmọtẹ avọ oni-uwou riẹ,

Ọnọ ọ be dẹ avọ ọnọ ọ be zẹ,

Ọnọ o re momo kẹ ahwo avọ ọnọ a momo kẹ,

Ọnọ a reosa riẹ avọ ọnọ ọ reosa.+

 3 A ti ru ẹkwotọ na fihọ ofofe riẹriẹriẹ;

A te kwa eware ẹkwotọ na muotọ riẹriẹriẹ,+

Keme Jihova ọ ta ẹme nana no.

 5 Ahwo nọ a be rria ẹkwotọ na a zue ẹkwotọ na no,+

Keme a la izi na vrẹ no,+

A nwene ujaje na no,+

A tẹ jẹ raha ọvọ ebẹdẹ bẹdẹ* na no.+

 6 Oyejabọ nọ ehao nọ a bọwo ẹkwotọ na e rọ raha iẹe no na,+

Yọ ahwo nọ a be rria ẹkwotọ na a reabe.

Oyejabọ nọ ahwo nọ a be rria ẹkwotọ na a rọ kawo no na,

Yọ umutho ezae jọ ọvo i kiọkọ.+

 7 Enwaene okpokpọ na u bi weri,* evaene na o lo no,+

Yọ ahwo kpobi nọ eva e be were a bi dimẹ.+

 8 Edo oghọghọ ejẹjẹ na u serihọ no;

Edo ahwo nọ a bi ru ehaa odode na u kuhọ no;

Edo evawere akpata na u serihọ no.+

 9 A be da enwaene ababọ ole,

Yọ udi ogaga o be yare evaọ unu ahwo nọ a be dae.

10 Ẹwho nọ a gbabọkẹ no na u kporo kuotọ no;+

A kare ethẹ uwou kpobi no, re ohwo ọvo ọ gbẹ sae ruọ eva ha.

Oghọghọ kpobi u serihọ no;

Oghọghọ u no ẹkwotọ na no.+

12 A raha okpẹwho na kuotọ no;

A whọlọ unuẹthẹ na fihọ otọ no riẹriẹriẹ.+

Wọhọ epaọ ibi nọ i re kiọkọ nọ a tẹ kpare* ibi ure olivi no,+

Wọhọ epaọ isogẹ nọ a si nọ okenọ a rẹ rọ kọrọ ibi-ire o vrẹ no.+

14 A te kpare urru rai,

A ti bo ubo oghọghọ.

15 Oyejabọ nọ a te rọ kẹ Jihova orro evaọ ubrotọ elo;*+

A te kẹ odẹ Jihova Ọghẹnẹ Izrẹl orro evaọ ikoliko abade na.+

Uye u te omẹ! Ahwo eviẹhọ na a ru eware eviẹhọ no;

Ahwo eviẹhọ na a rọ ẹghẹ ru eware eviẹhọ no.”+

18 Ohwo kpobi nọ ọ be dhẹ fiki edo ozọ ogaga o ti kie fihọ ọgọdọ na,

Yọ ohwo kpobi nọ o bi no ọgọdọ na ze, ẹta na o ti mu ei.+

Keme a ti rovie inuethẹ ame obọ odhiwu na,

Yọ etọhotọ ẹkwotọ na i ti nuhu.

19 Ẹkwotọ na ọ bẹre rovie fihọ no;

A nuhu ẹkwotọ na no;

Ẹkwotọ na o bi nuhu zighi zighi.+

20 Ẹkwotọ na o bi kpo geli geli wọhọ ohwo nọ ọ da idi no,

Yọ o bi nuhu kpenẹ avọ enẹ wọhọ uwou-owhre nọ ofou o bi fou.

Uzioraha riẹ o gbẹdẹ vi ei oma,+

O ti kie, yọ ọ te sae wariẹ kparoma ha.

21 Evaọ ẹdẹ yena, Jihova ọ te rẹriẹ ovao riẹ rri ogbaẹmo obọ ihru na

Jegbe ivie otọakpọ na nọ e rrọ otọakpọ na.

22 A ve ti koko ai họ oria ovo

Wọhọ ahwo nọ a fihọ uwou-odi evaọ ọgọdọ,

Yọ a te kare ai dhe uwou-odi na;

Nọ edẹ buobu e tẹ vrẹ no, a ve ti ru oware jọ kpahe ae.

23 Oma o te vuọ ọvẹre nọ o ghelie no na,

Oma o te vuọ ọre nọ o bi lo na,+

Keme Jihova olori egbaẹmo o zihe ruọ Ovie+ no evaọ Ugbehru Zayọn+ gbe evaọ Jerusalẹm,

O wo oruaro evaọ aro ekpako ahwo riẹ.*+

Mẹ be kẹ owhẹ orro, me bi jiri odẹ ra,

Keme who ru eware igbunu no,+

Eware nọ whọ jiroro rai no oke anwae ze,+

Who ru ẹme ra gba,+ je dhesẹ nọ a re fievahọ owhẹ.

  2 Keme who zihe okpẹwho ruọ itho nọ a kwa kuku no,

Who zihe ẹwho nọ a di ogba wariẹ họ* ruọ oria nọ o raha no.

Uwou ukpehru ohwo orẹwho ọfa na o gbẹ rrọ okpẹwho vievie he;

A te gbẹ wariẹ bọe vievie he.

 3 Oyejabọ nọ ahwo nọ a rrọ gaga a te rọ kẹ owhẹ orro;

Yọ okpẹwho ahwo erẹwho egeva o te dhozọ ra.+

 4 Keme who zihe ruọ oria omofọwẹ rọkẹ oruori no,

Oria omofọwẹ rọkẹ oyogbe evaọ oke idhọvẹ riẹ,+

Oria adhẹzọ evaọ oke okposo,

Edhedhẹ evaọ oke ẹrrorro.+

Nọ ofu ahwo egeva na ọ tẹ tehe ugbẹhẹ wọhọ okposo,

 5 Jẹ wọhọ ẹrrorro evaọ otọ oyaya,

Who re ru enuodo erara kpotọ.

Wọhọ epanọ uwoho ẹgho u re ru ẹrrorro uvo kpotọ na,

Ere ole ahwo egeva na u do serihọ no.

 6 Jihova olori egbaẹmo ọ te jọ ugbehru+ nana ruẹrẹ

Ehaa emuọriọ nọ a jọ there obọdẹ emu họ rọkẹ ahwo na kpobi,+

Ehaa emuọriọ nọ emamọ enwaene* o rrọ,

Orọ obọdẹ emu nọ a rehọ iwhri ighogho-igbenwa there,

Gbe orọ emamọ enwaene nọ a zẹ erara no.

 7 Ọ te jọ ugbehru nana si* ohọ nọ u ruru ahwo kpobi na no

Jegbe ohọ* nọ a si ruru erẹwho na kpobi na.

 8 Ọ te lọ* uwhu no bẹdẹ bẹdẹ,+

Yọ Jihova Olori nọ Ọ Mai Kpehru na o ti ririe irui-oviẹ no ovao kpobi.+

O ti si ekela ahwo riẹ no otọakpọ na kpobi no,

Keme Jihova omariẹ ọ ta riẹ no.

Ma fi ẹruore mai họ iẹe no,+

Yọ o ti siwi omai.+

10 Keme obọ Jihova o te jọ ehru ugbehru nana,+

Yọ a ti thihi Moab nyaotọ evaọ oria riẹ+

Wọhọ ẹbe ọyaya nọ a thihi ruọ eva ẹko emaniọ.

11 Ọ te rriẹ abọ riẹ rọ fae

Wọhọ ohwo nọ ọ be ya ame nọ ọ be rehọ abọ riẹ fa ame,

Ọ vẹ te rọ onaa veghe abọ riẹ

Ro hrẹ omorro riẹ kpotọ.+

12 Okpẹwho nọ a di ogba wariẹ họ* na avọ igbẹhẹ ikpekpehru ra na,

O ti kporo ai fihọ otọ;

Ọ te fa ai fihọ otọ, i ti kie te otọ.

 2 Rovie inuethẹ na fihọ+ re orẹwho okiẹrẹe na o ruẹse ruọ eva,

Orẹwho nọ o bi yoẹme kẹ Ọghẹnẹ.

 3 Whọ te sẹro enọ e rẹroso owhẹ riẹriẹriẹ;*

Whọ te kẹ ae udhedhẹ nọ u wo oba ha,+

Keme whẹ a fievahọ.+

 4 Fievahọ Jihova bẹdẹ bẹdẹ,+

Keme Jah* Jihova họ Utho ebẹdẹ bẹdẹ na.+

O kporo i rie fihọ otọ,

O kporo i rie totọ;

O gbolo i rie fihọ otọ ẹkpẹ na.

 6 A te rehọ evawọ thihi ei nyaotọ,

Evawọ ọnọ ọ be reoja, ithihi iruori na.”

Fikinọ who kiete,

Who ti ru edhere ohwo okiẹrẹe na fihọ riẹriẹriẹ.

 8 O Jihova, nọ ma bi lele edhere uvioziẹ ra na

Whẹ ma fi ẹruore mai họ.

 9 Mẹ rẹ rọ oma mẹ kpobi* gwọlọ owhẹ evaọ aso,

Ẹhẹ, ẹzi mẹ ọ rẹ ruabọhọ gwọlọ owhẹ;+

Keme nọ who te gu otọakpọ na ẹdhọ,

Ahwo nọ a be rria ẹkwotọ na a re wuhrẹ kpahe ẹrẹreokie.+

10 A tẹ maki dhesẹ aruoriwo kẹ ohwo omuomu dede,

O ti wuhrẹ ẹrẹreokie he.+

O ti ru oware umuomu ghele makọ evaọ ẹkwotọ nọ a rẹ jọ ru oware nọ u kiete,*+

Yọ ọ te ruẹ oruaro Jihova ha.+

12 O Jihova, whọ te kẹ omai udhedhẹ,+

Keme oware kpobi nọ ma ru,

Whẹ họ ọnọ o ru rie kẹ omai.

13 O Jihova Ọghẹnẹ mai, u te no owhẹ no ilori efa i su omai no,+

Rekọ odẹ ra ọvo ma rẹ fodẹ.+

Keme whọ rẹriẹ ovao ra rri rai no

Re who kpe ai muotọ je ru re a siọ ae ba ẹkareghẹhọ.

15 O Jihova, who ru orẹwho na kẹre no,

Who ru orẹwho na kẹre no;

Whọ kẹ omara orro no.+

16 O Jihova, a bo bru owhẹ ze evaọ etoke idhọvẹ;

Nọ whọ kẹ ae uye, a rọ unu kpotọ horie eva rai kẹ owhẹ evaọ olẹ.+

17 Nwane wọhọ epanọ aye nọ o dihọ te eyẹ no

Ọ rẹ thuẹ othuẹ eyẹ jẹ viẹ fiki edada na,

Ere ọvona o rrọ kẹ omai fiki ra, O Jihova.

18 Ma dihọ, ma thuẹ othuẹ eyẹ,

Rekọ o jọ wọhọ ẹsenọ ma yẹ ofou.

Ma re wha esiwo ziọ ẹkwotọ na ha,

Yọ ma yẹ ohwo ọvo nọ ọ rẹ rria ẹkwotọ na ha.

Wha rọwo ze re wha bo ubo oghọghọ,

Whai enọ e be rria evaọ ẹkpẹ na!+

Keme igrigri ra e wọhọ igrigri ohiohiẹ,*

Yọ otọakpọ na u ti siobọno enọ i whu no nọ i wo ogaga ovo ho na zihe ziọ uzuazọ.*

20 Ahwo mẹ, wha nya, wha ruọ eva ibrikpẹ obeva rai,

Wha kare ethẹ rai dhe oma.+

Wha dhere omoke kpẹkpẹe

Bẹsenọ ofu* na ọ rẹ vrẹ no.+

21 Keme rri! Jihova o bi no oria riẹ ze

Re ọ rehọ ahwo nọ a be rria ẹkwotọ na guẹdhọ fiki oruthọ rai,

Ẹkwotọ na ọ vẹ te fere azẹ-okpe riẹ via

Yọ ọ gbẹ te ko ahwo nọ o kpe no dhere he.”

27 Evaọ ẹdẹ yena, Jihova avọ ọgbọdọ riẹ nọ ọ rrọ dada, ruaro jẹ rrọ gaga,+

Ọ te rẹriẹ ovao riẹ rri Levayatan,* araomuomu nọ o re siawọ riariaria na,

Levayatan, araomuomu nọ o re ghriri oma na,

O ve ti kpe arao ologbo nọ ọ rrọ abade na no.

Mẹ be sẹro riẹ te aso te uvo.

Re ohwo ọvo ọ gbẹ nwae oma ha.+

Jọ o ru udhedhẹ kugbe omẹ;

Udhedhẹ họ oware nọ o re ru kugbe omẹ.”

 6 Evaọ edẹ nọ e be tha na, Jekọp ọ te ta awọ fihọ otọ,

Izrẹl ọ te whẹ ebe họ jẹ ta egha ekpokpọ ze,+

Yọ ibi rai e te vọ ẹkwotọ na.+

 9 Fikiere enẹ a te rọ rehọ omavoro ruru oruthọ Jekọp,+

Yọ nọ a te si uzioraha riẹ no, oware nọ u ti noi ze kpobi ona:

O ti ru itho agbada-idhe na kpobi

Jọ wọhọ itho-echọko nọ a wuhu no,

Yọ ekpọ ọrẹri* hayo egbada insẹnse evuevo i ti kiọkọ họ.+

10 Keme a te dhẹ siọ okpẹwho nọ a di ogba wariẹ họ* na ba;

A te nyasiọ etọ nọ erao e rẹ jọ re ẹbe na ba je gbabọkẹ ae wọhọ udhude.+

Etẹe ọmọ-eruẹ ọ te jọ re ẹbe je ruẹ fihọ

Yọ ọ te re ebe egha riẹ no.+

11 Nọ emegha ire riẹ i te whu no,

Eyae na e te nyaze ti wiri ai no,

A vẹ rehọ ae koko erae họ.

Oyejabọ nọ Ọnọ ọ ma rai ọ te rọ re ae ohrọ họ na,

Yọ Ọnọ ọ ruẹrẹ e rai họ o ti dhesẹ aruoriwo kẹ ae he.+

28 Uye u te etu-uvie* oma-udhesẹ* egba-idi Ifremu+

Gbe ododo nọ ọ rọ whẹ erru ọnwranwra họ oma nọ ọ be hiẹ no na,

Onọ o rrọ uzou ukiekpotọ nọ u re wou eware na, oria ahwo nọ udi u bi mu!

Wọhọ oso-itho avọ egbrara, ofou ọwhibo ọraha,

Wọhọ ame owhe ologbo nọ o bi ru edo ọgaga,

Ọ te rehọ ogaga gbolo iei fihọ otọakpọ na.

 3 A ti thihi

Itu-uvie oma-udhesẹ* egba-idi Ifremu na nyaotọ.+

 4 Yọ ododo nọ ọ rọ whẹ erru ọnwranwra họ oma nọ ọ be hiẹ no na,

Onọ o rrọ uzou ukiekpotọ nọ u re wou eware na,

O te jọ wọhọ ibi ifigi ọsosuọ nọ e rẹ romavia taure ezi ivo o te ti te.

 7 Yọ enana e be nyathọ re fiki enwaene;

Idi egaga rai i bi ru ai kpo geli geli.

Ozerẹ avọ ọruẹaro a be nyathọ fiki udi ogaga;

Enwaene u bi ru ai reghe,

Yọ udi ogaga rai u bi ru ai kpo geli geli;

Eruẹaruẹ rai i bi ru ai nyathọ,

Yọ a bi bruoziẹ thọ.+

 8 Eware etọtọ nọ a geli e vọ emẹjẹ rai

—E rrọ oria kpobi.

 9 Kọ ono o re ti wuhrẹ eriariẹ,

Kọ ono ọ te fa otọ ovuẹ na kẹ?

Kọ enọ a bru evie obọ,

Enọ a si evie no unu obọ?

10 Keme “ujaje rọ kpahe ujaje, ujaje rọ kpahe ujaje,

Ufi rọ kpahe ufi, ufi rọ kpahe ufi,*+

Omojọ o rrọ etenẹ, omojọ o rrọ etẹe.”

“Ujaje rọ kpahe ujaje, ujaje rọ kpahe ujaje,

Ufi rọ kpahe ufi, ufi rọ kpahe ufi,*+

Omojọ o rrọ etenẹ, omojọ o rrọ etẹe,”

Re nọ a tẹ be nya onya,

A ve ti zoruẹ je kie rri emu

A vẹ nwoma, kie ẹta, a ve mu ae.+

14 Fikiere wha yo ẹme nọ Jihova ọ ta, whai enọ i re seha,

Whai isu ahwo nana nọ e rrọ Jerusalẹm,

15 Keme wha be ta nọ:

“Ma lele uwhu re ọvọ no,+

Yọ ma ru ọtamuo kugbe Uki* no.*

Nọ ẹkẹre ọgaga na o ti kporo vrẹ,

O ti te omai oma ha,

Keme ma ru ọrue họ oria adhẹzọ mai no

Yọ ma kuọ omamai dhere eva ọrue-ọta no.”+

“Mẹ be rehọ utho nọ a dawo no rọ wọ otọhotọ họ evaọ Zayọn,+

Utho ubienẹ oghaghae+ nọ a rọ wọ otọhotọ ogaga họ.+

17 Me ti ru uvioziẹ jọ ufi nọ a rẹ rọ ma oware+

Ẹrẹreokie ọ vẹ te jọ okwakwa nọ a rẹ rọ ma oware sọ o kpọvi.+

Oso-itho na o ti su oria adhẹzọ ọrue na kufiẹ,

Yọ ame na o ti ku oria nọ a dhere na.

18 Ọvọ nọ wha re kugbe Uwhu na ọ te raha no,

Ọtamuo nọ wha ru kugbe Uki* na o ti dikihẹ hẹ.+

Nọ ẹkẹre ọgaga na o ti kporo vrẹ,

Ọ te pẹhẹ owhai no.

19 Unuẹse nọ ame na o su vrẹ kpobi,

O ti su owhai kufiẹ;+

Keme o ti su vrẹ kohiohiẹ kohiohiẹ,

Te aso te uvo,

20 Keme ehwa na e kpẹre vi epanọ a sae rọ jariẹ rriẹ oma,

Yọ ohọ na o kawo vi epanọ a sai ro si ei wowo.

21 Keme Jihova ọ te kpama wọhọ epanọ o ru evaọ obọ Ugbehru Perezim;

Ọ te jowọ wọhọ epanọ o ru evaọ ukiekpotọ* nọ o kẹle Gibiọn,+

Re ọ ruẹsi ru iruẹru riẹ—iruẹru igbunu riẹ—

Re ọ ruẹsi ru iruo riẹ—iruo aghẹruẹ riẹ.+

22 Enẹna, wha se ẹkoko ho,+

Re a gbe si ifi nọ a rọ gba owhai na keke viere he,

Keme mẹ jọ obọ Olori nọ Ọ Mai Kpehru na, Jihova olori egbaẹmo yo no,

Inọ a jiroro epanọ a ti ro kpe ahwo ẹkwotọ na soso*+ muotọ no.

23 Wha fi ezọ hotọ, wha gaviezọ kẹ urru mẹ;

Wha kezọ re wha gaviezọ kẹ ẹme nọ mẹ be ta.

25 Nọ ọ tẹ ruẹrẹ otọ na họ no,

Kọ ọ gbẹ vravra kumin obiebi fihọ iẹe jẹ kọ kumin gheghe,

Kọ ọ gbẹ kọ iwhiti, imilẹte gbe ebali fihọ eria rai

Jẹ kọ espẹte*+ fihọ akotọ riẹ wariẹ họ?

26 Keme O bi wuhrẹ iẹe* evaọ edhere nọ o kiehọ;

Ọghẹnẹ riẹ o bi wuhrẹ iẹe.+

27 Keme a rẹ rehọ ewẹ ekpala nọ a re ro si ibi no igbe ekakọ+ ro si ibi kumin obiebi no ho,

Yọ a rẹ rehọ ẹtẹ akẹkẹ dhẹ ehru kumin gheghe he.

Rekọ ọkpọ a rẹ rọ tehe kumin obiebi,

A vẹ rehọ ubiọkpọ tehe kumin gheghe.

Ijo, keme ọ rẹ tehe ae rifihọ họ;+

Yọ okenọ ọ tẹ be rehọ enyenya riẹ si akẹkẹ riẹ nọ o wo etẹ na evaọ ehru ekakọ na,

Ọ rẹ whọlọ ibi na ha.+

29 Obọ Jihova olori egbaẹmo onana u no ze re,

Ọnọ ẹjiroro riẹ u gbunu

Ọnọ o re ru eware ilogbo.*+

No ukpe te ukpe;

Jọ a ruabọhọ ehaa sa-sa nọ a re ru kukpe kukpe na.+

 2 Rekọ mẹ te kẹ Eriẹl uye,+

Uweri gbe enuobro e te jariẹ,+

Ọ vẹ te jọ kẹ omẹ wọhọ enyerae agbada-idhe Ọghẹnẹ.+

 3 Mẹ te fa evuẹ họ ofẹ kpobi rọsuọ owhẹ,

Mẹ te rehọ ire di ogba ro ko owhẹ họ

Jẹ ma ogba ro ko owhẹ họ.+

 4 A te rọ owhẹ ziọ otọ;

Obotọ whọ te ta ẹme no ze,

Ẹkpẹ o ti ru ẹme nọ whọ be ta do didi.

Obotọ na uvou ra u ti do no ze

Wọhọ uvou ohwo nọ o re lele izi ta ẹme,+

Yọ eme ra i ti do no obọ ẹkpẹ na ze wọhọ ẹme nọ a bi se họ ohwo ozọ.

 5 Ogbotu ewegrẹ* ra e te jọ wọhọ ovu,+

Ogbotu ahwo egeva na a te jọ wọhọ ehọrọ nọ ofou o bi fou.+

 6 Jihova olori egbaẹmo ọ te rẹriẹ ovao riẹ bru owhẹ ze re o siwi owhẹ

Avọ egbrara gbe otọ nọ u re nuhu gbe edo ọgaga,

Avọ okpofou gbe ofou ọwhibo gbe erri ebruerae.”+

 7 Kẹsena ogbotu erẹwho na kpobi nọ i bi fi Eriẹl ẹmo na+

—Enọ i bi fi ei ẹmo na kpobi,

Iwou ikpehru nọ a bọ ro koi họ na,

Gbe enọ e be wha uye sei na—

E te jọ wọhọ ewezẹ, eruẹaruẹ oke aso.

 8 Ẹhẹ, o te jọ wọhọ epaọ ohwo nọ ohọo u bi kpe nọ ọ be wezẹ ewezẹ nọ ọ be re emu,

Rekọ ọ vẹ rọwo ze avọ ohọo nọ u bi kpei,*

Jẹ wọhọ epaọ ohwo nọ uruame u bi kpe nọ ọ be wezẹ ewezẹ nọ ọ be da ame,

Rekọ ọ vẹ rọwo ze avọ oma nọ o rrọ riẹ no yọ uruame u bi kpei.*

Ere o te via kẹ ogbotu erẹwho kpobi

Nọ i bi fi Ugbehru Zayọn ẹmo.+

 9 Mudhe kpoko avọ igbunu;+

Wha tu omobọ rai aro re wha tuaro no.+

Idi i bi mu ai, yọ orọnikọ a da enwaene he;

A bi kpo geli geli, yọ orọnikọ a da udi ogaga ha.

10 Keme Jihova o ku ẹzi owezẹ udidi ku owhai no;+

Ọ fare ibiaro rai no, koyehọ eruẹaro na,+

Yọ o ruru izou rai no, koyehọ eruẹ-ude na.+

13 Jihova ọ ta nọ: “Unu gheghe ahwo nana a bi ro bru omẹ ze

Yọ igbenu rai a be rọ kẹ omẹ ọghọ,+

Rekọ udu rai u thabọ no omẹ gaga;

Yọ ijaje ahwo-akpọ nọ a ro wuhrẹ ai no a bi lele rọ dhozọ mẹ.+

14 Fikiere, mẹ họ Ọnọ ọ te wariẹ ru eware igbunu kpahe ahwo nana,+

Eware nọ i re gbunu gaga;

Areghẹ ezae iwareghẹ rai ọ te raha no,

Yọ a te kuọ otoriẹ ezae iwareghẹ rai dhere.”+

Ebi a rẹ jọ ru iruẹru rai,

Yọ a be ta nọ: “Ono ọ be ruẹ omai?

17 Nọ omoke kakao o tẹ vrẹ no, a ti zihe Lebanọn ruọ ọgbọ,+

Yọ a ti rri ọgbọ na fihọ owhawho.+

18 Evaọ ẹdẹ yena, enọ i diezọ i ti yo eme obe na,

Yọ ibiaro enọ i tuaro e te ruẹ ude nọ ẹgho gbe ebi na ọ gbẹ riẹ hẹ.+

19 Enọ e be romakpotọ e te ghọghọ gaga fiki Jihova,

Yọ ọnọ ọ rrọ oyogbe evaọ udevie ahwo-akpọ ọ te ghọghọ fiki Ọrẹri Izrẹl na.+

20 Keme ohwo ọgeva na ọ gbẹ te jariẹ hẹ,

Ọnọ o re seha na o ti whu no,

Yọ a te raha ahwo kpobi nọ a bi fiẹrohotọ re a ru eyoma,+

21 Enọ e rẹ rehọ ẹme ọrue ro ru amọfa reabe,

Enọ e rẹ kpahe eta kẹ ọthothọ* nọ ọ rrọ unuẹthẹ okpẹwho na,+

Gbe enọ e rẹ vro avro ofofe ro ru nọ a gbe bru uvioziẹ kẹ okiẹrẹe he.+

“Oma o gbẹ te vuọ Jekọp ho,

Yọ ovao riẹ u gbe ti sihọ ofa ha.*+

23 Keme nọ ọ te ruẹ emọ riẹ,

Enọ e rrọ iruo abọ mẹ, evaọ udevie riẹ,

A ti ru odẹ mẹ fo;+

Ẹhẹ, a ti ru odẹ Ọrẹri Jekọp na fo,

Yọ ọwhewhe Ọghẹnẹ Izrẹl o ti mu ai.+

24 Enọ i reghe no evaọ ẹzi a ti wo otoriẹ,

Yọ enọ e be go e te jẹ uthubro rehọ.”

30 “Uye u te emezae nọ i wo udu ogaga na,”+ ere Jihova ọ ta,

“Enọ i re ru eware nọ mẹ ma omaa rai hi,+

Enọ i re mu usu kugbe amọfa,* yọ orọnikọ ẹzi mẹ ọ kpọ rai hi,

Re a ruẹsi fi uzioraha ba uzioraha.

 2 A nya kpobọ Ijipti+ ababọ ẹvuẹ nọ a vuẹ omẹ,*+

Re Fẹro ọ thọ ae,*

Re a dhẹ ruọ otọ edhedhẹ Ijipti!

 3 Rekọ ẹthọ nọ Fẹro ọ te thọ owhai na o ti zihe ruọ oware omovuọ kẹ owhai,

Yọ otọ edhedhẹ Ijipti nọ wha dhẹ ro na o te wha omovuọ se owhai.+

 4 Keme ikpahwo-esuo riẹ a rrọ Zoan,+

Yọ enyukọ riẹ i te Henẹs no.

 5 Ahwo nọ a rẹ sae wha erere ọvo se ai hi

A ti ru oma vuọ aikpobi,

Enọ obufihọ ọvo gbe erere ọvo o re no obọ rai ze he,

Rekọ omovuọ gbe ekela ọvo.”+

A wọ ekwakwa efe rai fihọ ehru eketekete sa-sa,

Gbe emu rai fihọ ugbuke ekamẹle sa-sa

Rọ nya ẹkwotọ uye gbe idhọvẹ vrẹ,

Ẹkwotọ okpohrokpo, okpohrokpo nọ o bi do enu na,

Ẹkwotọ ọriwhẹ gbe araomuomu nọ o wo erae nọ ọ be rra na.*

 8 “Enẹna nya, re who kere iei fihọ ẹwẹ-utho ọkpakpala* evaọ iraro rai,

Je kere iei fihọ obe,+

Re o ruẹse jọ osẹri ebẹdẹ bẹdẹ+

Evaọ ẹdẹ nọ ọ rrọ obaro tha.

 9 Keme ahwo ọwọsuọ a rrọ,+ emezae eviẹhọ,+

Emezae nọ e gwọlọ yo uzi* Jihova ha.+

“Nọ orọnọ wha siọ ẹme nana+

Wha je fievahọ ewhariọ gbe eviẹhọ na

Jẹ be rẹroso ae na,+

13 Oruthọ nana ọ rẹ te jọ kẹ owhai wọhọ ugbẹhẹ nọ o va no,

Wọhọ ugbẹhẹ ukpekpehru nọ u nwo rẹrẹ no nọ o gwọlọ kie.

14 U ti kporo no wọhọ othẹ ologbo nọ ọmebẹ ọ ma,

U ti kporo hẹhẹhẹ te epanọ a gbẹ te rọ ruẹ ohẹhẹ ovo

Nọ a rẹ rọ wọ erae no enyerae ze he

Hayo onọ a rẹ rọ sẹrẹ ame no ọmọgọdọ ame ze.”

“Nọ wha te zihe bru omẹ ze je dhomamu oria ovo, me ti siwi owhai;

Nọ wha tẹ rọ udu kpotọ je fievahọ omẹ, wha ti wo ẹgba.”+

Fikiere wha te ginẹ dhẹ.

“Yọ enyenya nọ i re siawọ ma te dhẹ!”+

17 Nọ omọvo o te guegue ahwo odu, a ti nuhu;+

Nọ imasoi i je guegue owhai, wha vẹ te dhẹ

Bẹsenọ ahwo rai nọ a kiọkọ a te rọ jọ wọhọ ọkpọ nọ o dikihẹ goli evaọ ehru ugbehru,

Wọhọ ọkpọ oka nọ ọ rrọ ehru ukpehru.+

18 Rekọ Jihova ọ be rọ odiri hẹrẹ owhai* re o dhesẹ aruoriwo kẹ owhai,+

Yọ ọ rẹ te kparoma re o dhesẹ ohrọ kẹ owhai.+

27 Rri! Odẹ Jihova u bi no ugbothabọ ze,

Ọ be tha avọ ofu nọ ọ vọ riẹ eva gbe ẹgho ọlala.

Igbenu riẹ e vọ avọ ofu ọgaga,

Yọ ẹrọo riẹ ọ wọhọ ebruerae.+

28 Ẹzi* riẹ ọ wọhọ oko-ame nọ o bi kporo ẹkẹre nọ u te obọ uriohọ,

Re o nuhu erẹwho na evaọ oyẹyẹ ọraha;*

Yọ ufi o te jọ agba ahwo+ na nọ u ti su ai thọ.

29 Rekọ ole rai o te jọ wọhọ onọ a rẹ so evaọ aso

Nọ wha tẹ be ruẹrẹ oma kpahe* kẹ ehaa,+

Yọ oghọghọ o te jọ udu rai wọhọ ohwo

Nọ ọ be nya avọ* urete,

Nọ ọ rrọ edhere bi kpobọ ugbehru Jihova, obọ Utho Izrẹl na.+

30 Jihova o ti ru nọ a ti ro yo edo uvou ulogbo riẹ+

Je dhesẹ ugbobọ riẹ via+ nọ o be ziọ otọ avọ ofu na,+

Avọ erri ebruerae,+

Okposo idudhe+ gbe egbrara gbe oso-itho.+

31 Keme edo uvou Jihova u ti ru ozọ mu Asiria gaga;+

Ọ te rehọ ọkpọ fae.+

32 Yọ evaọ oke kpobi nọ Jihova o veghe ọkpọ riẹ nọ ọ be rọ kẹ uye na,

Onọ ọ te rọ fa Asiria na,

A ti kporo ejẹjẹ gbe ekpata+

Nọ o bi veghe ugbobọ riẹ rọsuọ ae evaọ ẹmo na.+

33 Keme ọ ruẹrẹ Tofẹt*+ riẹ kpahe no;

A tẹ jẹ ruẹrẹ iẹe họ no kẹ ovie na.+

O ru oria nọ o re koko ire họ na kodo jẹ kẹre no,

Avọ erae egaga gbe ire buobu nọ e riẹe eva.

Ẹwẹ Jihova nọ o wọhọ isọ-ọre nọ i bi kporo ẹkẹre

U ti tu erae họ iẹe.

31 Uye u te enọ e nya kpobọ Ijipti re a fiobọhọ kẹ ae,+

Enọ e rẹroso enyenya,+

Enọ i fievahọ ekẹkẹ ẹmo fikinọ e rrọ buobu,

Je fievahọ enyenya ẹmo* fikinọ e rrọ gaga.

Rekọ a rẹroso Ọrẹri Izrẹl he,

Yọ a kiẹ gwọlọ Jihova ha.

 2 Rekọ o wo areghẹ re, yọ ọ te rehọ okpẹtu ze,

O ti zihe eme riẹ hẹ.

Ọ te kparoma wọso uwou irumuomu

Jẹ wọso enọ i bi fiobọhọ kẹ irumuomu.+

 3 Rekọ ahwo Ijipti na yọ ahwo-akpọ gheghe, Ọghẹnẹ a rrọ họ;

Enyenya rai yọ uwo, orọnikọ ẹzi hi.+

Okenọ Jihova ọ tẹ rriẹ obọ riẹ,

Ohwo kpobi nọ o bi fiobọhọ kẹ ohwo o ti zoruẹ

Yọ ohwo kpobi nọ a fiobọhọ kẹ o ti kie;

 4 Keme enẹ Jihova ọ ta kẹ omẹ:

“Nwane wọhọ epanọ okpohrokpo, okpohrokpo ọgaga* ọ rẹ go fiki arao nọ o kpe na,

Nọ a jẹ maki se utu ithuru-igodẹ kokohọ bru ei,

Edo uvou rai u re ru ozọ mu ei hi na

Yọ edo ọgaga rai o re ru ei guegue he na,

Ere Jihova olori egbaẹmo o ti nwrotọ ze ti fi ẹmo

Fiki Ugbehru Zayọn gbe fiki ukpehru riẹ.

 8 A te rehọ ọgbọdọ nọ ọ rrọ ọrọ ohwo-akpọ họ kpe ohwo Asiria na;

Yọ ọgbọdọ nọ ọ rrọ ọrọ ohwo-akpọ họ ọ te raha iẹe no.+

Ọ te dhẹ fiki ọgbọdọ na,

Yọ a te rọ izoge emezae riẹ ru iruo ọgbahọ.

 9 Ugbehru-utho riẹ o te rayẹ no fiki ozọ ogaga,

Yọ ozọ u ti mu ikpahwo-esuo riẹ fiki ọkpọ oka na,” ere Jihova ọ ta,

Ọnọ elo riẹ ọ rrọ* Zayọn, gbe ọnọ umuwou-erae riẹ ọ rrọ Jerusalẹm.

32 Rri! Ovie+ o ti su re ẹrẹreokie ọ jariẹ,+

Yọ isu i ti su re uvioziẹ o jariẹ.

 2 Yọ omomọvo rai ọ te jọ wọhọ oria* nọ a re dhere nọ ofou o te bi fou,

Oria nọ a re dhere* nọ okposo ọ tẹ be rrọ,

A te jọ wọhọ iko-ame evaọ ẹkwotọ nọ ame ọ rrọ họ,+

Wọhọ edhedhẹ ugbehru-utho ulogbo evaọ otọ nọ o ya fia.

 3 Kẹsena a gbe ti ru ibiaro ahwo nọ a be ruẹ ude tamu hu,

Yọ ezọ enọ i bi yo ẹme e te gaviezọ.

 4 Udu enọ e rẹ rọ okpakpa ru eware u ti roro kpahe eriariẹ,

Yọ ẹrọo nọ o re bru ekọkọ na ọ te ta ẹme gbagba vevẹ.+

 5 A gbe ti se ogheghẹ na oruọghọ họ,

Yọ a ti se ogbọfariẹ na okpohwo ho;

 6 Keme ohwo ogheghẹ na ọ te ta eme igheghẹ,

Yọ udu riẹ o te ma omaa eware iyoma,+

Re o ru ahwo siọ orọwọ na,* re ọ jẹ ta eme nọ i fioka ha kpahe Jihova,

Re o ru ọnọ ohọo u bi kpe na jọ eveva,

Je ru re ọnọ uruame u bi kpe na ọ siọ ame ba ẹruẹ da.

 7 Eware nọ ogbọfariẹ na ọ be ma omaa rai e rrọ yoyoma;+

Ọ be wha uruemu omovuọ haro

Re ọ rehọ ọrue-ọta raha ọnọ ọ be reoja na+

Makọ okenọ oyogbe ọ tẹ ta oware nọ o gba.

 8 Rekọ ọnọ o re ru ọghọ na o wo iroro ọghoruo,

Yọ o re kru oma ga evaọ eware ọghoruo.*

10 Nọ ukpe ovo o tẹ nwane vrẹ no, whai enọ e be ruawa oware ovo ho na wha ti nuhu fiki ozọ,

Keme ezi nọ a rẹ rọ kọrọ ibi-ire na o ti re no, rekiyọ a re sai koko uvumọ ubi họ họ.+

Wha ba omobọ rai fihọ,

Re wha rehọ ehọ-ekpa* zuo eku rai.+

12 Wha tehe igbama rai avọ uweri

Fiki oware nọ o via kẹ emamọ idhu na gbe ure evaene nọ o rẹ mọ ibi na.

13 Keme idhigbo gbe ekpajẹ i ti di ruru otọ ahwo mẹ;

I ti ruru iwou nọ a jẹ jọ ghọghọ na kpobi,

Ẹhẹ, okpẹwho evawere+ na.

14 Keme a gbabọkẹ uwou ukpehru nọ o rẹ bẹ ẹvẹruọ na no;

A nyasiọ okpẹwho edo na ba no.+

Ofẹl+ avọ uwou-eroro na i zihe ruọ otọ nọ o raha no bẹdẹ bẹdẹ,

Oria nọ eketekete ẹwọ e rẹ jọ duola,

Oria nọ ithuru erao e rẹ jọ re ẹbe,+

15 Bẹsenọ a re ku ẹzi na ku omai no obọ ehru ze,+

Udhude na u ve zihe ruọ ọgbọ,

A ve bi rri ọgbọ na wọhọ owhawho.+

16 Kẹsena uvioziẹ o vẹ te jọ udhude na,

Yọ ẹrẹreokie o te rria ọgbọ na.+

17 Udhedhẹ họ oware nọ u ti no uvi ẹrẹreokie ze,+

Yọ ibi nọ uvi ẹrẹreokie o te mọ họ udhedhẹ gbe omofọwẹ nọ o rẹ jọ ribri.+

18 Ahwo mẹ a te rria oria nọ udhedhẹ o dafia,

Evaọ iwou nọ e foma gbe evaọ eria eriosehọ nọ e rrọ dhedhẹ.+

19 Rekọ oso-itho na o ti kpe owhawho na fihọ otọ,

Yọ a ti kporo okpẹwho na fihọ otọ riẹriẹriẹ.

20 Eva e were owhai enọ e be kọ ibi fihọ akotọ ame kpobi,

Enọ i bi vi* eruẹ na gbe eketekete+ na vrẹ.”

33 Uye u te owhẹ, whẹ ọnọ ọ rẹ raha ọraha na nọ a re te raha ha;+

Whẹ ọnọ o re vivie ahwo nọ a ri vivie he!

Jọ ugbobọ* mai+ kohiohiẹ kohiohiẹ,

Ẹhẹ, jọ esiwo mai evaọ oke uye.+

 4 Wọhọ epanọ ebaka-ẹkpẹ nọ e rẹ re oware muotọ i re su kokohọ na, ere a ti su wariẹ egbo-ẹmo rai họ;

Ahwo a ti su viri ai wọhọ ebaka-ẹkpẹ nọ e rrọ gbidi gbidi.

 5 A te kpare Jihova kpehru,

Keme obọ ihru na ọ be rria.

 6 Ọye họ ọnọ o bi ru oke rai dọmu;

Ọnọ ọ be kẹ esiwo+ ologbo, areghẹ, eriariẹ, gbe ozodhẹ Jihova+

—Onana họ okwakwa-aghae riẹ.

 7 Rri! Egba rai i bi bo evaọ iyẹrẹ;

Ewhovuẹ udhedhẹ na e be viẹ whrowhrowhro.

 8 A gbabọkẹ idhere ilogbo na no;

Ohwo ọvo ọ be nya imidhere na ha.

Ọ* raha ọvọ na no;

Ọ siọ ikpewho na no;

Ọ rẹ daezọ ohwo-akpọ họ.+

Sharọn ọ wọhọ udhude no,

Yọ Beshan avọ Kamẹl a fa ebe no.+

10 Jihova ọ ta nọ, “Enẹna mẹ te kparoma,

Enẹna mẹ te kpare omamẹ kpehru;+

Enẹna me ti ru omamẹ ruaro.

14 Ozọ u bi mu erahaizi nọ e rrọ Zayọn;+

Enọ e siọ orọwọ na no i bi nuhu:

15 Ọnọ ọ rẹ ruabọhọ nya evaọ ẹrẹreokie,+

Ọnọ ọ rẹ ta ẹme nọ ọ gba,+

Ọnọ ọ rẹ siọ erere ewhariọ nọ a rẹ rọ iwhayo wo,

Ọnọ abọ riẹ ọ rẹ siọ udi-oriọ, ọ rẹ jabọ kru ei hi,+

Ọnọ ọ rẹ tehe ezọ riẹ di nọ a tẹ be ta ẹme azẹ-okpe,

Ọnọ ọ rẹ fare ibiaro riẹ re ọ siọ oware nọ u yoma ba ẹruẹ

16 —Ọ te rria obọ ehru na;

Oria adhẹzọ riẹ nọ o foma* o te jọ eria nọ i siomano evaọ itho,

A te kẹe ebrẹdi nọ ọ rẹ re,

Yọ oria nọ ame riẹ o bi no ze o te kpọ vievie he.”+

17 Ibiaro ra e te ruẹ ovie nọ ọ vọ avọ erru;

A te ruẹ ẹkwotọ ugbothabọ.

19 Whọ gbẹ te ruẹ ahwo orivo na vievie he,

Ahwo nọ a rẹ kaki wo otoriẹ ẹvẹrẹ rai hi fikinọ o vẹ hẹ,*

Enọ ẹrọo rai o re bru ekọkọ nọ whọ sai wo otoriẹ ẹme rai hi.+

Ibiaro ra e te ruẹ nọ Jerusalẹm yọ oria odhedhẹ nọ a rẹ rria,

Uwou-udhu nọ a te wọ no oria riẹ hẹ.+

A ti wolo ighele uwou-udhu na no vievie he,

Yọ a te sawo ifi riẹ ọvuọvo ho.

21 Rekọ etẹe Jihova, Ọnọ O Wo Oruaro na,

Ọ te jọ jọ kẹ omai wọhọ ubrotọ nọ u wo ithẹ, nọ u wo iko-ame ekẹkẹe,

Oria nọ uhie ekọ-ivi evuevo e te ruọ eva ha,

Yọ ekọ ilogbo evuevo i ti bi ei vrẹ hẹ.

22 Keme Jihova họ Obruoziẹ mai,+

Jihova họ Ọkẹ-Uzi mai,+

Jihova họ Ovie mai;+

Ọye họ ọnọ o ti siwi omai.+

23 Ifi ra e te jọ whrehe whrehe;

E rẹ sai kru ọkpọ na dikihẹ hẹ, hayo rriẹ ẹwẹ-ohọ okọ na ha.

Evaọ oke yena a te ghale egbo-ẹmo buobu gbidi gbidi;

Makọ enọ e ko dede e te kwa eware buobu rehọ.+

34 Wha go ze re wha yo, whai erẹwho,

Wha gaviezọ, whai ahwo.

Jọ otọakpọ na avọ eware nọ e riẹe eva kpobi a gaviezọ,

Te otọ na avọ eware kpobi nọ i no rie ze.

 2 Keme Jihova ọ be dha eva kẹ erẹwho na kpobi,+

O te je bi mu ofu kẹ ogbaẹmo rai kpobi.+

Ọ te raha ai no;

O ti kpe ai no.+

 3 A ti gbolo ahwo rai nọ a kpe kufiẹ,

Ore ogaga orọ iri rai u ti gbo lahwe;+

Igbehru na e te ghra fiki* azẹ rai.+

 4 Ogbaẹmo obọ idhiwu na kpobi u ti gbo no,

Yọ a ti kpiri idhiwu na wọhọ uko-obe.

Ogbaẹmo rai kpobi u ti lo no

Wọhọ epanọ ẹbe owhuowhu ọ rẹ kpare no ure evaene na,

Jẹ wọhọ epanọ ubi ifigi nọ u siku o rẹ kpare no ure ifigi na.

U ti bru Edọm ze evaọ ẹdhoguo,+

Ahwo nọ mẹ te raha no.

Iwhri i ti wholo oma riẹ soso,+

Azẹ imigbo gbe ewe o ti wholo oma riẹ soso,

Iwhri ibieku igbo i ti wholo oma riẹ soso.

Keme Jihova o wo idheidhe evaọ Bọzra,

O ti kpe ahwo buobu evaọ ẹkwotọ Edọm.+

 7 A ti kpe igholi na kugbe ai,

A ti kpe iruẹ esese na kugbe egaga na.

Azẹ o ti ru ẹkwotọ rai fihọ vuavo,

Iwhri i ve ti ru ẹkpẹ rai fihọ tovo tovo.”

 8 Keme Jihova o wo ẹdẹ orukele,+

Ukpe nọ ahwo a te rọ rehọ osa eware iyoma nọ a ru Zayọn.+

 9 A ti zihe iko-ame riẹ* ruọ ikolota,

Ẹkpẹ riẹ kọ isọ-ọre,

Ẹkwotọ riẹ o te jọ wọhọ ikolota nọ e be to.

10 A ti furie iei evaọ aso hayo uvo ho;

Iwiri riẹ i ti kuye kpehru bẹdẹ bẹdẹ.

No oge te oge, ọ te jọ oria nọ a raha no;

Ohwo ọvo ọ te nyae vrẹ bẹdẹ bẹdẹ hẹ.+

11 Okpitolo avọ evuẹ họ enọ i re ti woi,

Ikpukpuru nọ i wo ezọ ithethei avọ ekọlọbe e te rria eva riẹ.

Ọ te rriẹ ufi ofofe nọ a rẹ rọ ma oware fihọ iẹe

Jẹ rriẹ ufi ọraha nọ a rẹ rọ ma oware sọ o kpọvi* fihọ iẹe.

12 A te rehọ ikpahwo riẹ ọvuọvo mu ovie he,

Yọ ikpahwo-esuo riẹ kpobi e te gbẹ jọ họ.

13 Idhigbo i ti di fihọ iwou ikpehru riẹ nọ e rẹ bẹ ẹvẹruọ,

Esokpọ gbe ebe inwe i ti di fihọ eria adhẹzọ riẹ.

O ti zihe ruọ eghogho nọ ikozi e rẹ jọ,+

Gbe ogba nọ igomugoro e rẹ rria.

14 Emama udhude e te nyaku erao nọ i re bo,

Ẹwe ẹwọ* o ti bo se ọrivẹ riẹ.

15 Etẹe ogbo ọ te bọ uwou riẹ fihọ je fi ike họ,

Yọ ọ te sa ike na je koko ai họ otọ riẹ.

Ọvuọvo evaọ usu rai o ti vru hu;

Ọvuọvo evaọ usu rai ọ te jọ ababọ ọrivẹ hẹ,

Keme unu Jihova o ta ẹme na no,

Yọ ẹzi riẹ o koko i rai họ kugbe.

17 Ọye họ Ọnọ ọ ma ẹta na kẹ ai,

Yọ obọ obọriẹ o ma oria nọ a kẹ rai na no.*

A ti woi evaọ oke kpobi;

A te rriae evaọ ige kpobi.

35 Udhude na avọ otọ oyaya na e te wereva,+

Yọ udhude opraprara na o te ghọghọ jẹ whẹ idodo họ wọhọ ododo safrọn.*+

 2 O te siọ idodo ba ẹwhẹhọ họ;+

O te ghọghọ je bo ubo oghọghọ.

A te rehọ oruaro Lebanọn kẹe,+

Te erru Kamẹl+ avọ ọrọ Sharọn.+

 3 Ru abọ nọ e ga ha na ga,

Je ru ighilawọ nọ i bi nuhu na dikihẹ ga.+

Rri! Ọghẹnẹ rai ọ te nyaze ti ru orukele,

Ọghẹnẹ ọ te nyaze te hwosa eware iyoma nọ ahwo a ru.+

 5 Evaọ oke yena, ibiaro enọ i tuaro i ti rovie,+

Ezọ enọ i diezọ i ti yo ẹme.+

 6 Evaọ oke yena, ọmo o ti duola wọhọ orua,+

Yọ ẹrọo ọnọ o dienu o ti bo ubo oghọghọ.+

Ame ọ te va no udhude na ze,

Yọ iko-ame e te jọ udhude opraprara.

 7 Otọ nọ o ya fia kokoroko o ti zihe ruọ ẹtẹre-ame nọ ikpoko* e rrọ,

Yọ otọ nọ ame ọ rrọ họ o ti zihe ruọ eyeri-ame.+

Ẹbe ọrọrọ gbe ikpoko* gbe agẹ-ethẹ

E te jọ ighogho nọ ikozi e jẹ hae wezẹ.+

 8 Edhere ologbo jọ ọ te jọ etẹe,+

Ẹhẹ, edhere nọ a se Edhere Ọrẹri.

A ruẹrẹ e riẹ kpahe kẹ ọnọ ọ be nya evaọ edhere na;

Uvumọ ohwo ogheghẹ o ti ghoro ruọ ẹe eva ha.

 9 Uvumọ okpohrokpo ọ te jọ etẹe he,

Yọ uvumọ erao ijihẹ e te ruọ ẹe eva ha.

A te jọ etẹe ruẹ e rai hi;+

Enọ a wariẹ dẹ zihe ze na ọvo e te nya etẹe.+

A te wereva jẹ ghọghọ,

Yọ uweri gbe unuofiẹ e te dhẹ no.+

Ono whọ kpare uvou ra ta ẹme wọso na+

Jẹ kpare aro oheri ra rri?

24 Whọ rehọ idibo ra poviẹ Jihova+ jẹ ta nọ,

‘Mẹ te rehọ ekẹkẹ ẹmo ibuobu mẹ

Rọ gadiẹ kpohọ obehru igbehru,+

Kpohọ eria nọ e mai thabọ evaọ Lebanọn.

25 Mẹ te tọ eza jẹ da ame;

Mẹ te rehọ evawọ mẹ ru ito* Ijipti kpọ no.’

27 A te ruẹ ohwo fiobọhọ kẹ ahwo nọ a be rria ae he;

Ozọ u ti mu ai gaga, yọ a ti ru oma vuọ ae.

A te jọ wọhọ ẹbe ẹwọ gbe ẹbe ọrọrọ,

Wọhọ ẹbe nọ ọ rrọ ehru uwou nọ ofou obọ ovatha-ọre ọ to no.

28 Rekọ mẹ riẹ owhẹ ziezi, mẹ riẹ okenọ whọ rẹ keria, okenọ whọ rẹ ruọ otafe, okenọ whọ rẹ ruọ eva,+

Gbe okenọ who te bi mu ofu rọsuọ omẹ,+

29 Keme ofu nọ who mu kpahe omẹ+ gbe enuodo ra i do te ezọ mẹ no.+

Fikiere mẹ te jẹ oghọlọ mẹ họ unwe ra jẹ jẹ ufi-anyenya+ mẹ họ udevie igbenu ra,

Mẹ vẹ te rehọ edhere nọ whọ rọ nyaze na su owhẹ zihe.”

“Ọ te ruọ eva okpẹwho nana ha+

Hayo sa ose evaọ etẹe he

Hayo rehọ ojese họre iẹe he

Hayo ma igbuhru ro koi họ họ.”’+

34 ‘Edhere nọ ọ rọ nyaze o ti ro zihe;

Ọ te ruọ eva okpẹwho nana ha,’ ere Jihova ọ ta.

35 ‘Mẹ te thọ okpẹwho nana+ je siwi ei fiki odẹ mẹ+

Jegbe fiki Devidi+ odibo mẹ.’”

10 Mẹ ta nọ: “Evaọ udevie uzuazọ mẹ

Mẹ te siọ eva inuethẹ Uki* ba ẹruọ họ.

Me gbe ti rri ahwo-akpọ họ

Nọ mẹ tẹ rrọ kugbe ahwo nọ a rrọ oria nọ uzuazọ o rrọ họ.

12 A wolo oria nọ mẹ be rria no jẹ wọe vrẹ no+

Wọhọ uwou-udhu othuru-igodẹ.

Me kpiri uzuazọ mẹ no wọhọ epanọ ohwo nọ o re fi ilulu họ ekpọ ro zuo ehọ o re kpiri ohọ;

O bru omẹ kufiẹ no wọhọ ilulu nọ e nya uthethei ohọ nọ a bru no ohọ nọ a zuo re no.

O bi wiri igbenwa mẹ wọhọ okpohrokpo;

No oke uvo rite oke aso whọ be rehọ omẹ ziọ ekuhọ.+

14 Me bi ru edo wọhọ ọmọvra owisẹ hayo ọmọka;*+

Me bi dimẹ wọhọ erueruẹ.+

‘O Jihova, idhọvẹ egaga e rrọ omẹ oma;

Jọ ọthuke mẹ!’*+

Mẹ te romakpotọ nya evaọ ikpe uzuazọ mẹ kpobi

Fiki idhọvẹ egaga mẹ.

16 ‘O Jihova, ẹkwoma eware nana* ohwo kpobi ọ rọ rrọ uzuazọ,

Yọ eye i ru ẹzi mẹ rrọ uzuazọ.

17 Rri! Idhọvẹ egaga e jọ omẹ oma viukpọ udhedhẹ;

Rekọ fiki evawere nọ who wo kpahe omẹ,*

Who siwi omẹ no ọgọdọ ọraha ze.+

18 Keme Uki* o rẹ sae kẹ owhẹ orro ho,+

Uwhu o rẹ sai jiri owhẹ hẹ.+

19 Enọ e rrọ uzuazọ, enọ e rrọ uzuazọ họ enọ e rẹ sai jiri owhẹ,

Nwane wọhọ epanọ mẹ rẹ sai ru nẹnẹ na.

20 O Jihova, siwi omẹ,

Ma vẹ te rehọ ekpata-ifi kporo ile mẹ+

Evaọ edẹ uzuazọ mai kpobi evaọ uwou Jihova.’”+

 2 “Ta ẹme te udu* Jerusalẹm,

Whowho kẹe nọ etoke iruo ọgbahọ riẹ i kuhọ no,

Inọ a hwosa abe-ọriọ riẹ no.+

 4 Jọ a lẹ ukiekpotọ kpobi kpehru,

Je ru ugbehru gbe ukpehru kpobi kpotọ.

Otọ nọ o rrọ kothi kothi na o re zihe ruọ otọ opraprara hrọ,

Yọ otọ nọ o rrọ igbigburu na o ti zihe ruọ ukiekpotọ opraprara.+

 5 A ti dhesẹ oruaro Jihova via,+

Yọ uwo kpobi o* te ruẹ e riẹ,+

Keme unu Jihova o ta riẹ no.”

 7 Ẹbe ọrọrọ na o bi whu no,

Ododo na o bi lo no,+

Fikinọ ẹwẹ* Jihova o bi fou ku ai.+

 8 Ẹbe ọrọrọ na o bi whu no,

Ododo na o bi lo no,

Rekọ ẹme Ọghẹnẹ mai ọ rẹ jọ bẹdẹ bẹdẹ.”+

 9 Nya kpobọ ehru ugbehru ukpekpehru jọ,

Whẹ aye nọ ọ be wha emamọ usi bru Zayọn ze.+

Rehọ ogaga kpare uvou ra,

Whẹ aye nọ ọ be wha emamọ usi bru Jerusalẹm ze.

10 Rri! Jihova Olori nọ Ọ Mai Kpehru na ọ te nyaze avọ ogaga,

Yọ ugbobọ riẹ u ti su rọ kẹe.+

Rri! Osohwa riẹ o riẹe obọ,

Yọ osa nọ ọ te hwa o rrọ aro riẹ.+

Ọ te rehọ ugbobọ riẹ koko imigodẹ na họ,

Ọ te wọ ae fihọ igbama riẹ.

12 Ono ọ rehọ ẹkuobọ riẹ wawọ ame na kpobi no+

Jẹ rehọ okẹkẹe evabọ* riẹ ma epanọ idhiwu na e rro te?

Ono o koko ẹkpẹ otọakpọ na fihọ owawọ-eware no+

Hayo wawọ igbehru na evaọ iskeli

Jẹ wawọ ikpehru na evaọ iskeli no?

13 Ono ọ wawọ* ẹzi Jihova no,

Yọ ono ọ rẹ sae jọ ọkohrẹ riẹ re o wuhrẹ iẹe?+

14 Ono ọ nọ mi re o te ti wo otoriẹ,

Hayo ono o re wuhrẹ iẹe edhere uvioziẹ,

Hayo wuhrẹ iẹe eriariẹ,

Hayo dhesẹ edhere uvi otoriẹ kẹe?+

15 Rri! Erẹwho na e wọhọ ogẹ-ame nọ u su no ubokiti ze,

Yọ ọ rehọ e rai wọhọ ovu nọ ọ rrọ ehru iskeli.+

Rri! O re gbolo ikoliko na kpehru wọhọ ovu.

16 Makọ Lebanọn dede o te epanọ o re ro ru erae re e seba efu hu,*

Yọ erao ẹwọ riẹ i bu te epanọ a rẹ rọ rehọ ai dhe idhe emahọ họ.

17 Erẹwho na kpobi e wọhọ oware nọ o rrọ họ evaọ aro riẹ;+

O rri rai fihọ oware ufofe, a wọhọ oware nọ u muẹro ho.+

19 Ọwena o re ru ẹmẹdhọ,*

Odhogu ọ vẹ rehọ igoru tamu* oma riẹ soso,+

O ve je duwu egbregba isiliva.

20 Ọ rẹ salọ ure re o jọ ẹkẹ azọhọ riẹ,+

Ure nọ u re gbo ho.

Ọ rẹ gwọlọ ọwena nọ o wo onaa

Re o ru ẹmema nọ a kare nọ o ti vre kie he.+

22 Ọjọ ọ riẹ nọ ọ be rria obehru otọakpọ ogheghelie na,+

Yọ ahwo nọ a be rriae a wọhọ ebaka.

Ọ be rriẹ idhiwu na fihọ wọhọ ohọ ovrovro,

Yọ ọ be rriẹ ai fihọ wọhọ uwou-udhu nọ a rẹ rria.+

23 O re ru ahwo ologbo esuo zihe ruọ oware nọ u fioka ha

O ve ru ibruoziẹ* otọakpọ na họ oware ufofe.

24 Udugaga a re ro kporo ae họ otọ,

Udugaga a rẹ rọ kọ ae,

Udugaga igbe rai e rẹ rọ ta awọ fihọ otọ,

Yọ ofou o re fou rai, i ve lo no,

Ofou na ọ vẹ wọ ae vrẹ wọhọ ẹbe ọyaya.+

Ọye họ Ọnọ o bi su ai wọhọ ogbaẹmo, bi kele ai ọvuọvo;

Ọvuọ odẹ riẹ o re ro se aikpobi.+

Fiki ẹgba ologbo riẹ nọ o bi ruiruo ẹsikpobi gbe ogaga riẹ nọ u re mu ọwhewhe,+

Ọvuọvo rai o re voi ẹro ho.

27 O Jekọp, fikieme whọ rọ ta eme nana, O Izrẹl, fikieme who ro whowho eme nana inọ,

‘Edhere mẹ o dhere no Jihova,

Yọ Ọghẹnẹ o bru uvioziẹ kẹ omẹ hẹ’?+

29 Ọ rẹ kẹ ọnọ oma o rrọ no ogaga

Jẹ kẹ enọ i wo ẹgba ha ẹgba ologbo.+

30 O te bẹ emezae no, oma o vẹ te jẹ rrọ ae no,

Yọ izoge emezae na i ti zoruẹ je kie,

31 Rekọ enọ i fi ẹruore họ Jihova a te wariẹ wo ogaga.

A te dhẹ ohrẹ yọ oma o te rrọ ae he;

A te nya onya yọ o te bẹ ae he.”+

41 “Wha fibo re wha gaviezọ kẹ omẹ,* whai ikoliko;

Jọ erẹwho na e wariẹ wo ẹgba rai.

 2 Ono ọ rehọ ohwo jọ mu evaọ obọ ovatha-ọre na,+

Nọ o se rie ziọ awọ Riẹ re o ru uvioziẹ gba,*

Re ọ rehọ erẹwho kẹe

Re o je ru ei su ivie?+

Ono o zihe i rai ruọ ovu evaọ aro ọgbọdọ riẹ,

Wọhọ ẹbe ọyaya nọ ofou o fou kufiẹ evaọ aro uze riẹ?

 3 O bi le ai, be nyavrẹ ababọ ọzadhe

Evaọ idhere nọ awọ riẹ ọ re nya vẹre he.

 4 Ono ọ jowọ je ru onana,

Nọ o se ige na kokohọ no anwọ emuhọ ze?

Mẹ Jihova, mẹ họ Ọrọ Ọsosuọ na;+

Yọ epọvo na mẹ te jọ makọ rite erọ urere.”+

 6 Omomọvo o bi fiobọhọ kẹ ọrivẹ riẹ

Jẹ be ta kẹ oniọvo riẹ nọ: “Kru oma ga.”

 7 Fikiere ọwena na ọ be bọ odhogu na ga;+

Ọnọ ọ rẹ rehọ ogbokọ tehe eware fihọ kpakpala na

Ọ be bọ ọnọ ọ be tehe oware evaọ ehru ogbẹ ulogbo na ga.

 8 “Rekọ whẹ Izrẹl yọ odibo mẹ,+

Whẹ Jekọp yọ ọnọ mẹ salọ no,+

Ọmọ* Abraham ogbẹnyusu mẹ,+

 9 Whẹ yọ ọnọ mẹ rehọ no oka avọ oka otọakpọ na ze,+

Whẹ yọ ọnọ me se no eria otọakpọ na nọ e mai thabọ ze.

Mẹ ta kẹ owhẹ nọ, ‘Whẹ yọ odibo mẹ;+

Mẹ salọ owhẹ no; mẹ re siọ owhẹ hẹ.+

Me ti ru owhẹ ga, ẹhẹ, me ti fiobọhọ kẹ owhẹ,+

Mẹ te rehọ obọze ẹrẹreokie mẹ kru owhẹ kekeke.’

12 Whọ te kiẹ gwọlọ ezae nọ i bi lele owhẹ họre, rekọ whọ te ruẹ e rai hi;

Ezae nọ i bi lele owhẹ fi ẹmo a ti zihe ruọ oware nọ o rrọ họ, wọhọ oware ufofe.+

13 Keme mẹ Jihova Ọghẹnẹ ra, me bi kru obọze ra kekeke,

Ọnọ ọ be ta kẹ owhẹ nọ, ‘Jọ ozọ u mu owhẹ hẹ. Me ti fiobọhọ kẹ owhẹ.’+

14 Jọ ozọ u mu owhẹ hẹ, whẹ Jekọp adha* na,+

Whai ahwo Izrẹl, me ti fiobọhọ kẹ owhai,” ere Jihova ọ ta, Ọnọ ọ dẹ owhai zihe ze,+ Ọrẹri Izrẹl na.

15 “Rri! Me ru owhẹ fihọ ẹwẹ akpala nọ a re ro si ibi no igbe no,+

Okwakwa okpokpọ nọ a re ro si ibi no igbe nọ o wo akọ ivẹ.

Who ti thihi igbehru na nyaotọ jẹ guọghọ ae no

Je ru ikpehru na wọhọ ehọrọ.

16 Whọ te frẹ rai kpehru,

Ofou na o ve ti fou rai kufiẹ;

Ofou ọwhibo ọ te vaha ae.

Whọ te ghọghọ fiki Jihova,+

Yọ who ti seha fiki Ọrẹri Izrẹl.”+

18 Me ti ru ithẹ su evaọ ehru ikpehru ifofe+

Je ru iyeri-ame su evaọ ikiekpotọ epraprara na.+

Me ti zihe udhude na ruọ ẹtẹre-ame nọ ikpoko* e rrọ

Je ru ẹkwotọ nọ ame ọ rrọ họ zihe ruọ iyeri-ame.+

19 Mẹ te kọ ure sida fihọ udhude na,

Gbe ure akasha gbe ure idodo, gbe ure epaene.+

Mẹ te kọ ure junipa fihọ udhude opraprara na,

Jegbe ure ash gbe ure siprẹs,+

20 Re ahwo kpobi a ruẹse ruẹ jẹ riẹ,

Jẹ gaviezọ re a wo otoriẹ

Inọ obọ Jihova u ru onana,

Yọ Ọrẹri Izrẹl ọ ma riẹ.”+

Vuẹ omai kpahe eware nọ e vrẹ no,*

Re ma ruẹsi roro kpahe ae* jẹ riẹ oware nọ u no rai ze.

23 Wha vuẹ omai eware nọ e te via evaọ obaro,

Re ma ruẹse riẹ nọ whai yọ eghẹnẹ.+

Ẹhẹ, wha ru oware jọ, te uwoma hayo uyoma,

Re o ruẹsi gbe omai unu nọ ma tẹ ruẹ e riẹ.+

24 Rri! Whai yọ oware nọ o rrọ họ,

Yọ oware nọ wha wo te obọ ufofe.+

25 Mẹ rehọ ohwo jọ mu no evaọ obọ ẹkpẹlobọ ovatha-ọre, yọ ọ te nyaze,+

Ọnọ o no obọ ovatha-ọre ze+ nọ o ti se odẹ mẹ.

O ti thihi isu* nyaotọ wọhọ ẹsenọ a rrọ ọviẹ,+

Wọhọ ọmebẹ nọ o re thihi ọviẹ nọ ọ rrọ vuavo.

26 Ono ọ ta ẹme kpahe onana no emuhọ ze, re ma sae riẹ,

Hayo no oke nọ o vrẹ no ze, re ma sae ta nọ, ‘Ọ ta gba’?+

28 Rekọ me gbe je rri, yọ ohwo ọvo ọ jariẹ hẹ;

Ọvuọvo ọ jọ usu rai nọ ọ rẹ kẹ ohrẹ hẹ.

Me fi ẹzi mẹ họ iẹe oma no;+

Ọ te wha uvioziẹ ziọ erẹwho na.+

 2 O ti bo hayo kpare urru riẹ hẹ,

Yọ o ti ru re a yo urru riẹ evaọ oko-ore he.+

 3 O ti wiri ukpoko nọ u wiri rẹrẹ no ho,

Yọ o ti furie uwhiki nọ u bi kuye iwiri hi.+

 4 Oma o te rrọe hayo lọhọ iẹe he bẹsenọ o re ru uvioziẹ jọ otọakpọ na no;+

Yọ ikoliko na e be hẹrẹ uzi* riẹ.

 5 Enẹ Jihova, Ọghẹnẹ uzẹme na, ọ ta,

Ọmemama nọ ọ ma idhiwu na gbe Oride na nọ ọ rriẹ rai fihọ,+

Ọnọ ọ rriẹ otọakpọ na gbe eware nọ e riẹe eva fihọ,+

Ọnọ ọ be rehọ ẹwẹ kẹ ahwo nọ a riẹe eva+

Jẹ rehọ ẹzi kẹ ahwo nọ a be nya evaọ eva riẹ:+

 6 “Mẹ Jihova, me se owhẹ no evaọ ẹrẹreokie;

Me kru obọ ra no.

Mẹ te sẹro ra je ru re whọ jọ ọvọ evaọ udevie mẹ avọ ahwo na+

Je ru owhẹ jọ elo erẹwho na,+

 7 Re who rovie ibiaro enọ i tuaro,+

Re whọ rehọ ọnọ ọ rrọ uwou-odi no uwou-odi na ze

Jẹ rehọ ahwo nọ a keria ebi no uwou-odi ze.+

 8 Mẹ họ Jihova. Odẹ mẹ oye;

Mẹ rẹ rehọ oruaro mẹ kẹ omọfa ha,*

Hayo rehọ ujiro mẹ kẹ ẹmema nọ a kare he.+

 9 Rri, eware ọsosuọ na e vrẹ no;

Enẹna, me bi whowho eware ekpokpọ.

10 Wha so ole ọkpokpọ kẹ Jihova,+

Wha jiri ei evaọ oka avọ oka otọakpọ na,+

Whai enọ i re kpobọ abade na gbe eware kpobi nọ e riẹe eva,

Whai ikoliko gbe enọ e be rria eva rai.+

11 Jọ udhude na avọ ikpewho riẹ e kpare urru rai,+

Iwhre nọ ahwo Kida+ a be rria.

Jọ enọ e be rria ugbehru-utho na a bo ubo oghọghọ;

Jọ a bo no obọ ehru igbehru na ze.

12 Jọ a rehọ oruaro kẹ Jihova

Je jiri ei evaọ ikoliko na.+

O ti bo, ẹhẹ, o ti bo ubo ẹmo;

O ti dhesẹ nọ o wo ẹgba vi ewegrẹ riẹ.+

Wọhọ aye nọ o bi yẹ,

Me ti dimẹ, wẹ fuele fuele, je se ẹwẹ rehọ evaọ oke ovona.

15 Mẹ te raha igbehru gbe ikpehru

Je ru ekakọ rai kpobi whu no.

Me ti zihe ithẹ ruọ ikoliko*

Je ru etẹre-ame kpọ no.+

16 Me ti su ituaro na evaọ edhere nọ a riẹ hẹ+

Je ru ai nya idhere nọ a riẹ kpahe he.+

Me ti zihe ebi nọ ọ rrọ aro rai ruọ elo+

Je ti ru otọ nọ o rrọ kothi kothi na fihọ otọ opraprara.+

17 A ti ku ai rẹriẹ zihe, a ve ti ru oma vuọ ae yoyoma,

Enọ e rẹroso emema nọ a kare,

Enọ e be ta kẹ emema ayọno* nọ: “Whai họ eghẹnẹ mai.”+

18 Wha gaviezọ, whai enọ i diezọ;

Wha rri re wha ruẹ, whai enọ i tuaro.+

19 Kọ ono o tuaro, u te no odibo mẹ no,

Nọ o diezọ wọhọ ọnyukọ nọ me vi uwou?

Ono o tuaro wọhọ ọnọ a kẹ osa na,

Nọ o tuaro wọhọ odibo Jihova?+

21 Fiki ẹrẹreokie riẹ,

Jihova ọ rehọ evawere kpare uzi* na kpehru je ru ei wo oruaro.

22 Rekọ ahwo nana yọ ahwo nọ a tho jẹ kwa rehọ;+

A kare rai kpobi dhe ighogho je si ai no họ iwou-odi.+

A tho rai, yọ ohwo ọvo ọ riẹ nọ o re siwi ai hi,+

A kwa rai rehọ, yọ ohwo ọvo ọ riẹ hẹ nọ ọ be ta nọ: “Wha zihe ai ze!”

24 Ono o siobọno Jekọp nọ a rọ kwae rehọ

Je siobọno Izrẹl kẹ enọ i tho rie?

A rọwo nya evaọ idhere Riẹ hẹ,

Yọ a koko uzi* Riẹ hẹ.+

25 Fikiere O te je ku ofu riẹ,

Evedha riẹ gbe ofu ẹmo ku ei.+

43 Enẹna, enẹ Jihova ọ ta,

Ọmemama nọ ọ ma owhẹ, O Jekọp, Ọnọ ọ ruẹrẹ owhẹ họ, O Izrẹl:+

 2 Okenọ whọ te nya ame obuobu na vrẹ, mẹ te jọ kugbe owhẹ,+

Yọ okenọ whọ te nya ithẹ na vrẹ, ame na o ti le owhẹ no ho.+

Okenọ whọ te nya erae vrẹ, e te mahe owhẹ hẹ,

Yọ erri erae na o ti mu owhẹ hẹ.

 3 Keme mẹ họ Jihova Ọghẹnẹ ra,

Ọrẹri Izrẹl na, osiwi ra.

Mẹ rehọ Ijipti hwosa ẹtanigbo ra no,

Jẹ rehọ Ẹtiopia avọ Siba nwene owhẹ no.

 4 Keme whọ rrọ ghaghae evaọ ẹro mẹ,+

Mẹ kẹ owhẹ ọghọ, me te je you owhẹ.+

Fikiere mẹ te rehọ ahwo nwene oria ra

Jẹ rehọ erẹwho nwene uzuazọ* ra.

Mẹ te rehọ ọmọ* ra no obọ ovatha-ọre ze

Je koko owhẹ họ no obọ ukiediwo-ọre ze.+

Rehọ emezae mẹ no ugbothabọ ze, jẹ rehọ emetẹ mẹ no oka avọ oka otọakpọ na ze,+

 7 Ohwo kpobi nọ a be rehọ odẹ mẹ se,+

Enọ mẹ ma rọkẹ oruaro obọ mẹ,

Enọ mẹ ma je ru.’+

 8 Rehọ ahwo nọ a tuaro dede nọ a wo ibiaro na lahwe,

Gbe enọ i diezọ, dede nọ a wo ezọ.+

 9 Jọ erẹwho na kpobi i kokohọ oria ovo,

Re a je koko ahwo na họ.+

Jọ a rehọ isẹri rai ze re a dhesẹ nọ a rease,