USI UWOMA MATIU

1 Obe ikuigbe* Jesu Kristi,* ọmọzae Devidi,+ ọmọzae Abraham:+

17 Fikiere, ige na kpobi, no Abraham rite Devidi ige ikpegbene; no Devidi rite okenọ a ro mu ahwo Ju kpobọ Babilọn ige ikpegbene; no okenọ a ro mu ahwo Ju kpobọ Babilọn rite oke Kristi ige ikpegbene.

18 Rekọ enẹ eyẹ Jesu Kristi ọ jọ. Evaọ okenọ Josẹf ọ rọ sa Meri oni riẹ họ otọ, a tẹ ruẹ nọ ẹzi ọfuafo* o ru rie dihọ+ taure a tẹ te ruọ orọo. 19 Rekọ fikinọ Josẹf ọzae riẹ ọ jọ ohwo okiẹrẹe, yọ ọ gwọlọ ru ei oma vo evaọ ẹgbede he, ọ tẹ gwọlọ nọ ọ rẹ lẹlẹ se iẹe.+ 20 Rekọ nọ o roro kpahe eware nana no, ukọ-odhiwu Jihova* ọ tẹ romavia kẹe evaọ ewezẹ, ọ tẹ ta nọ: “Josẹf ọmọzae Devidi, ozọ u mu owhẹ hẹ re whọ rehọ Meri aye ra kpo, keme ẹzi ọfuafo o ru rie dieva na họ.+ 21 O ti yẹ ọmọzae, yọ who re se odẹ riẹ Jesu,*+ keme o ti siwi ahwo riẹ no izieraha rai.”+ 22 Eware nana kpobi e ginẹ via, re ẹme nọ Jihova* ọ rehọ ọruẹaro riẹ ta ọ ruẹsi rugba, inọ: 23 “Rri! Ọmọtẹ-kọkọ na o ti dihọ, o ve ti yẹ ọmọzae, a ve ti se odẹ riẹ Imanuẹl,”+ onọ otofa riẹ o rrọ, “Ọghẹnẹ Ọ Rrọ Kugbe Omai.”+

24 Nọ Josẹf ọ rọwo no owezẹ ze, o te ru epanọ ukọ-odhiwu Jihova* ọ ta kẹe na, ọ tẹ rehọ aye riẹ kpo. 25 Rekọ o lele i rie wezẹ hẹ bẹsenọ o ro yẹ ọmọzae,+ o te se odẹ riẹ Jesu.+

2 Nọ a yẹ Jesu no evaọ Bẹtlẹhẹm+ ọrọ Judia evaọ edẹ Herọd+ ovie na, rri! enọ i re rri isi obehru rọ gbẹva a te no obọ Ovatha-Ọre ziọ Jerusalẹm, 2 a tẹ ta nọ: “Diẹse ovie ahwo Ju nọ a yẹ na ọ rrọ?+ Keme ma ruẹ esi riẹ evaọ okenọ ma jọ obọ Ovatha-Ọre, yọ ma nyaze re ma guzou kpotọ kẹe.” 3 Nọ a yo onana, Herọd ovie na gbe Jerusalẹm soso a tẹ jẹ rova. 4 Nọ o se ilori izerẹ na gbe otu ikere-obe na kpobi kokohọ, ọ tẹ nọ ae oria nọ a ti jo yẹ Kristi na.* 5 A tẹ ta kẹe nọ: “Evaọ Bẹtlẹhẹm+ ọrọ Judia, keme enẹ ọruẹaro na o kere: 6 ‘O whẹ Bẹtlẹhẹm ọrọ ẹkwotọ Juda, whọ rrọ okpẹwho nọ isu Juda i re rri vo vievie he, keme osu o ti no eva ra ze, ọnọ ọ te rẹrote ahwo mẹ, Izrẹl.’”+

7 Kẹsena Herọd ọ tẹ lẹlẹ se enọ i re rri isi obehru rọ gbẹva na, ọ tẹ romatotọ nọ ae kpahe oke nọ esi na ọ rọ romavia. 8 Okenọ o je vi ai kpobọ Bẹtlẹhẹm, ọ ta nọ: “Wha nya re wha romatotọ gwọlọ ọmọ na, nọ wha tẹ ruẹ e riẹ no, wha zihe ze te vuẹ omẹ re mẹ ruẹse nyai guzou kpotọ kẹe re.” 9 Nọ a yo ẹme ovie na no, a tẹ ruọ edhere, rri! esi nọ a ruẹ okenọ a jọ obọ Ovatha-Ọre+ na ọ tẹ karo kẹ ae bẹsenọ ọ rọ daji evaọ ehru oria nọ ọmọ na ọ jọ. 10 Nọ a ruẹ esi na, a tẹ ghọghọ gaga. 11 Okenọ a ruọ eva uwou na, a tẹ ruẹ ọmọ na avọ Meri oni riẹ, a te kigwẹ, a te guzou kpotọ kẹe. A te je rovie eware nọ a fi ekwakwa-aghae rai họ, a tẹ kẹe ekẹ: igoru gbe frankinsẹns gbe mọr. 12 Rekọ, fikinọ Ọghẹnẹ ọ vẹvẹ e rai unu evaọ ewezẹ+ inọ a zihe bru Herọd ho, a tẹ rehọ edhere ọfa zihe kpobọ orẹwho rai.

13 Nọ a ruọ edhere no, rri! ukọ-odhiwu Jihova* ọ tẹ jọ ewezẹ romavia kẹ Josẹf,+ ọ tẹ ta nọ: “Kpama, rehọ ọmọ na avọ oni riẹ re wha dhẹ kpobọ Ijipti, wha vẹ jọ obei bẹsenọ mẹ te ta onọ who re ru kẹ owhẹ, keme uviemenẹ Herọd ọ te gwọlọ ọmọ na re o kpei no.” 14 Fikiere, Josẹf ọ tẹ kpama, ọ tẹ rehọ ọmọ na avọ oni ọmọ na kugbe oma evaọ aso, a te kpobọ Ijipti. 15 Ọ jọ obei bẹsenọ Herọd o ro whu. Onana u ru nọ ẹme nọ Jihova* ọ rehọ ọruẹaro riẹ ta o ro rugba, inọ: “Me se ọmọzae mẹ no evaọ Ijipti ze.”+

16 Kẹsena nọ Herọd ọ ruẹ nọ enọ i re rri isi obehru rọ gbẹva na a viẹ riẹ họ no, eva e tẹ dhae gaga, o te vi ahwo nyai kpe emezae kpobi nọ e rrọ Bẹtlẹhẹm gbe ibrotọ riẹ kpobi no, no umuo ikpe ivẹ kpotọ, wọhọ epaọ umuo oke nọ enọ i re rri isi obehru rọ gbẹva na a fodẹ nọ ọ romatotọ nọ ae.+ 17 Ẹme nọ a rehọ Jerimaya ọruẹaro na ta o te rugba, ọnọ ọ ta nọ: 18 “A yo urru jọ evaọ Rema, oviẹ gbe enuobro ọgaga. Reshẹl+ ọ jẹ viẹ fiki emọ riẹ, ọ rọwo nọ a sasa iẹe oma ha, keme a gbẹ rrọ họ.”+

19 Nọ Herọd o whu no, rri! ukọ-odhiwu Jihova* ọ tẹ jọ ewezẹ romavia+ kẹ Josẹf evaọ obọ Ijipti, 20 ọ tẹ ta nọ: “Kpama, rehọ ọmọ na avọ oni riẹ re wha kpobọ ẹkwotọ Izrẹl, keme enọ e jẹ gwọlọ uzuazọ* ọmọ na kpe a whu no.” 21 Fikiere ọ tẹ kpama, ọ tẹ rehọ ọmọ na avọ oni ọmọ na, a tẹ ruọ eva ẹkwotọ Izrẹl. 22 Rekọ nọ o yo nọ Akẹleyọs họ ọnọ o bi su Judia, ọnọ ọ rehọ ẹta Herọd ọsẹ riẹ, ozọ nọ o re ro kpohọ obei u te mu ei. Ofariẹ, fikinọ Ọghẹnẹ ọ vẹvẹ e riẹ unu evaọ ewezẹ,+ o te kpohọ ẹkwotọ Galili.+ 23 Ọ tẹ jẹ rria okpẹwho nọ a re se Nazarẹt,+ re ẹme nọ eruẹaro na e ta ọ ruẹsi rugba, inọ: “A re ti sei ohwo Nazarẹt.”*+

3 Evaọ edẹ yena, Jọn+ Ọhọahwo-Ame na o te mu ovuẹ họ ewhowho+ evaọ udhude Judia, 2 inọ: “Wha kurẹriẹ, keme Uvie odhiwu o kẹle no.”+ 3 Evaọ uzẹme, ọnana họ ọnọ a rehọ Aizaya ọruẹaro na+ ta eme nana kpahe inọ: “Uvou ohwo jọ o be jọ obọ udhude na woro nọ: ‘Wha ruẹrẹ edhere Jihova* kpahe! Wha ru idhere riẹ liọ.’”+ 4 Whaọ, Jọn ọ jẹ hai ku ewu eto ekamẹle họ avọ umueku oviẹ-arao nọ ọ jẹ rọ gba eku.+ Emu nọ ọ jẹ re họ ebaka-ẹkpẹ avọ ọnyọ.+ 5 Kẹsena ahwo Jerusalẹm gbe Judia soso gbe ewho kpobi nọ e wariẹ Jọdan họ a te je zurie bru ei,+ 6 ọ tẹ jẹ họ ae ame* evaọ Ethẹ Jọdan,+ yọ a be feva izieraha rai.

7 Nọ ọ ruẹ otu Farisi gbe otu Sadusi+ buobu nọ e be nyaze te họ-ame, ọ tẹ ta kẹ ae nọ: “Whai emọ eriwhẹ,+ ono ọ vẹvẹ owhai unu nọ wha dhẹ no ofu nọ ọ be tha na?+ 8 Fikiere wha mọ ibi nọ i re dhesẹ ekurẹriẹ. 9 Wha jọ udu rai ta ha inọ, ‘Abraham họ ọsẹ mai.’+ Keme mẹ be ta kẹ owhai nọ Ọghẹnẹ ọ rẹ sai zihe itho nana ruọ emọ kẹ Abraham. 10 Ewhe na ọ rrọ otọ ire na no. Fikiere, ure kpobi nọ o be mọ emamọ ubi hi, a ti koi fihọ otọ, a ve gbolo iei fihọ erae.+ 11 Mẹ be rọ ame họ owhai ame fiki ekurẹriẹ rai,+ rekọ ọnọ ọ rrọ emu mẹ nyaze na ọ ga vi omẹ, me te epanọ mẹ sae rọ ba eviẹ noi awọ họ.+ Ọyena ọ te rehọ ẹzi ọfuafo+ gbe erae rọ họ owhai ame.+ 12 O kru eshọvẹle riẹ nọ ọ rẹ rọ frẹ erara no ibi ekakọ họ obọ, yọ o ti ru oria riẹ nọ ọ rẹ jọ si ibi no igbe ekakọ na fihọ fuafo tẹtẹtẹ, o ve koko iwhiti riẹ họ uwou nọ ọ rẹ jọ sẹro* eware, rekọ ọ te rehọ erae nọ a rẹ sai furie he rọ mahe ehọrọ na no.”+

13 Kẹsena Jesu o te no obọ Galili ziọ Jọdan re Jọn ọ ruẹse họe ame.+ 14 Rekọ Jọn ọ tẹ jẹ gwọlọ whaha iẹe, inọ: “Whẹ u fo nọ whọ rẹ họ omẹ ame, whọ tẹ be nyabru omẹ ze?” 15 Jesu ọ tẹ kpahe kẹe nọ: “Jọ o jọ enẹ evaọ oke nana, keme ere oruo ma sai ro ru oware kpobi nọ u kiẹrẹe gba.” Fikiere ọ gbẹ whaha iẹe he. 16 Nọ Jesu ọ họ-ame jẹ nwane va no ame ze no, rri! idhiwu na i te rovie,+ ọ tẹ ruẹ ẹzi Ọghẹnẹ nọ o bi bru ei ze wọhọ erueruẹ.+ 17 Ofariẹ, urru jọ o ta ẹme no obọ idhiwu na ze+ inọ: “Ọnana họ Ọmọzae mẹ,+ oyoyou mẹ na, ọnọ mẹ jẹrehọ.”+

4 Nọ oyena o vrẹ no, ẹzi na ọ tẹ kpọ Jesu kpobọ udhude re Ẹdhọ ọ dawo iẹe.+ 2 Nọ ọ siọ emuọriọ ba edẹ udhuvẹ gbe eso udhuvẹ no, ohọo u te je kpei. 3 Ọdawo-Ahwo+ na ọ tẹ nyaze, ọ tẹ ta kẹe nọ: “Otẹrọnọ whẹ yọ ọmọ Ọghẹnẹ, ta kẹ itho nana re i zihe ruọ ikulu ebrẹdi.” 4 Rekọ ọ tẹ kẹ uyo nọ: “A kere nọ: ‘Orọnikọ ẹkwoma ebrẹdi ọvo ohwo ọ rẹ rọ jọ uzuazọ họ, rekọ ẹkwoma ẹme kpobi nọ o bi no unu Jihova* ze.’”+

5 Kẹsena Ẹdhọ ọ tẹ rehọ iẹe kpohọ okpẹwho ọrẹri na,+ ọ tẹ rehọ iẹe dikihẹ ehru ugbẹhẹ nọ o wariẹ ehru etẹmpol na họ,*+ 6 ọ tẹ ta kẹe nọ: “Otẹrọnọ whẹ yọ ọmọ Ọghẹnẹ, la fihọ otọ, keme a kere nọ: ‘O ti jie uzi kẹ ikọ-odhiwu riẹ fiki ra,’ gbe nọ ‘A te rehọ abọ rai wọ owhẹ re whọ siọ owọ ra ba ekpehọ utho.’”+ 7 Jesu ọ tẹ ta kẹe nọ: “A te je kere nọ: ‘Whọ rẹ dawo Jihova* Ọghẹnẹ ra vievie he.’”+

8 Ẹdhọ ọ tẹ jẹ rehọ iẹe kpohọ ugbehru nọ u kpehru thesiwa, o te dhesẹ ekwotọ-ivie akpọ na kpobi gbe oruaro rai kẹe.+ 9 Ọ tẹ ta kẹe nọ: “Mẹ te kẹ owhẹ eware nana kpobi otẹrọnọ who te kigwẹ gọ omẹ.”* 10 Kẹsena Jesu ọ tẹ ta kẹe nọ: “Nyavrẹ, Setan! Keme a kere nọ: ‘Jihova* Ọghẹnẹ ra o gba owhẹ họ nọ whọ rẹ gọ,+ yọ ọye ọvo o gba owhẹ họ nọ who re ru iruo ọrẹri* kẹ.’”+ 11 Kẹsena Ẹdhọ ọ tẹ nyase iẹe ba,+ rri! ikọ-odhiwu e tẹ nyaze, a tẹ be gbodibo kẹe.+

12 Whaọ, nọ o yo nọ a mu Jọn,+ o te kpobọ Galili.+ 13 Ofariẹ, nọ o no Nazarẹt no, ọ tẹ nyaze te rria Kapaniọm+ nọ o kẹle abade evaọ ibrotọ Zẹbulọn avọ Naftalae, 14 re ẹme nọ a rehọ Aizaya ọruẹaro na ta ọ ruẹsi rugba, ọnọ ọ ta nọ: 15 “O ẹkwotọ Zẹbulọn avọ ẹkwotọ Naftalae nọ e rrọ edhere abade na, evaọ abọdekọ Jọdan, koyehọ Galili erẹwho na! 16 Ahwo nọ a keria ebi a ruẹ elo ologbo, yọ enọ e keria ubrotọ nọ ebi uwhu ọ rrọ, elo+ o lo mu ae.”+ 17 No umuo oke yena vrẹ, Jesu o te muhọ ewhowho be ta nọ: “Wha kurẹriẹ, keme Uvie odhiwu o kẹle no.”+

18 Nọ ọ jẹ nya evaọ akotọ Abade Galili,* ọ tẹ ruẹ inievo ivẹ jọ, Saemọn nọ a re se Pita,+ gbe Andru oniọvo riẹ nọ a bi fi ẹriri họ evaọ abade na, keme ikuori a jọ.+ 19 Ọ tẹ ta kẹ ae nọ: “Wha lele omẹ, me ti ru owhai ikuori ahwo.”+ 20 A tẹ nwane nyasiọ iriri rai ba, a te lele iei.+ 21 Nọ ọ nya no etẹe no, ọ tẹ ruẹ inievo ivẹ efa, Jemis ọmọzae Zẹbẹdi avọ Jọn oniọvo riẹ.+ A jọ okọ kugbe Zẹbẹdi ọsẹ rai be ruẹrẹ iriri rai, o te se ai.+ 22 A tẹ nwane nyasiọ okọ na gbe ọsẹ rai ba, a te lele iei.

23 Kẹsena ọ tẹ nya Galili soso duwu,+ bi wuhrẹ evaọ isinagọgo* rai+ jẹ be ta usi uwoma Uvie na, yọ o bi siwi oghoghẹrẹ eyao kpobi gbe oghoghẹrẹ emo kpobi evaọ udevie ahwo na.+ 24 Usi riẹ u te do ruọ Siria soso, a tẹ rehọ ahwo kpobi nọ oghoghẹrẹ eyao gbe edada egaga e jọ oma bru ei ze,+ jegbe enọ idhivẹri e jọ oma,+ enọ i re kie ewawa,+ gbe enọ okie o kie, o te siwi ae. 25 Fikiere, ogbotu ahwo buobu nọ a no Galili gbe Dekapọlis* gbe Jerusalẹm gbe Judia gbe abọdekọ Jọdan ze a te lele iei.

5 Nọ ọ ruẹ ogbotu na, o te kpobọ ehru ugbehru na; nọ ọ keria no, ilele riẹ a tẹ nya bru ei ze. 2 O te rovie unu, o te mu ae họ ewuhrẹ, inọ:

3 “Eva e were enọ e riẹ nọ u fo re a riẹ Ọghẹnẹ,*+ keme Uvie odhiwu o rrọ kẹ ae.

4 “Eva e were enọ i bi weri, keme a te sasa ae oma.+

5 “Eva e were enọ e rrọ wowolẹ,*+ keme a te rọ otọakpọ na reuku.+

6 “Eva e were enọ ohọo gbe uruame ẹrẹreokie u bi kpe,+ keme eva e te vọ ae.+

7 “Eva e were enọ i wo ohrọ-oriọ,+ keme a te re ae ohrọ.

8 “Eva e were enọ udu rai o rrọ fuafo,+ keme a te ruẹ Ọghẹnẹ.

9 “Eva e were enọ i re ru udhedhẹ,+ keme a ti se ae emọ Ọghẹnẹ.

10 “Eva e were enọ a bi kpokpo fiki ẹrẹreokie,+ keme Uvie odhiwu o rrọ kẹ ae.

11 “Eva e were owhai nọ ahwo a tẹ la owhai eka+ je kpokpo owhai+ jẹ ta oghẹrẹ erue iyoma kpobi kpahe owhai fiki mẹ.+ 12 Wha ghọghọ jẹ wereva gaga,+ keme osohwa rai+ o rrọ ruaro evaọ obọ idhiwu na, keme ere a kpokpo eruẹaro nọ e kake rọ owhai jọ.+

13 “Whai họ uwhei+ akpọ na, rekọ otẹrọnọ uwhei u ku awere riẹ fiẹ, kọ ẹvẹ a sae rọ wariẹ ru ei were? U gbe wo iruo kẹ oware ovo ho, rekọ a re ku ei fiẹ,+ ahwo a vẹ rọ awọ thihi ei nyaotọ.

14 “Whai họ elo akpọ na.+ Okpẹwho nọ ọ rrọ ehru ugbehru ọ sai siomano ho. 15 Ahwo a tẹ rọ ukpẹ tu, a re fi ei họ otọ ekete* he, rekọ a re fi ei họ ehru ọkpọ-edada ukpẹ, yọ u re lo mu enọ e rrọ uwou na kpobi.+ 16 Epọvo na re, jọ elo rai o lo evaọ iraro ahwo,+ re a ruẹse ruẹ iruo iwoma rai,+ a vẹ rọ oruaro kẹ Ọsẹ rai nọ ọ rrọ obọ idhiwu na.+

17 “Wha du roro nọ mẹ nyaze te raha Uzi na hayo eme Eruẹaro na ha. Mẹ nyaze te raha ae he, rekọ re me ru ae gba.+ 18 Uzẹme mẹ be ta kẹ owhai inọ odhiwu gbe otọakpọ e tẹ make vrẹ, ubiẹme ovo nọ o mae kawo hayo ẹmẹwẹ ubiẹme ovo evaọ Uzi na o rẹ vrẹ hẹ, bẹsenọ eware na kpobi i re rugba no.+ 19 Fikiere ohwo kpobi nọ ọ raha uzi osese jọ evaọ Uzi na je bi wuhrẹ amọfa inọ a ru ere, a te rehọ iẹe nọ o te kẹ Uvie odhiwu hu. Rekọ ohwo kpobi nọ o bi koko ai jẹ be rehọ ae wuhrẹ amọfa, a te rehọ iẹe nọ o te kẹ Uvie odhiwu. 20 Keme mẹ be ta kẹ owhai nọ otẹrọnọ ẹrẹreokie rai o gbe vi ọrọ otu ikere-obe gbe otu Farisi na ha,+ wha te sae ruọ Uvie odhiwu vievie he.+

21 “Wha yo inọ a ta kẹ ahwo oke anwae nọ: ‘Who re kpe ohwo vievie he,+ rekọ ohwo kpobi nọ o kpe ohwo, a rẹ rehọ iẹe guẹdhọ evaọ okọto.’+ 22 Rekọ mẹ be ta kẹ owhai nọ ohwo kpobi nọ o bi mu ofu kẹ oniọvo riẹ,+ a te rehọ iẹe guẹdhọ evaọ okọto; yọ ohwo kpobi nọ ọ ta eme-aghọ kẹ oniọvo riẹ, a te rehọ iẹe guẹdhọ evaọ Okọto nọ O Mai Kpehru; rekọ ọnọ ọ ta nọ, ‘Ogheghẹ omuomu na!’ ọ so ẹme Gehena* nọ erae e rrọ.+

23 “Fikiere, nọ whọ tẹ be rehọ okẹ ra ziọ obọ agbada-idhe,+ whọ jẹ jọ etẹe kareghẹhọ nọ oware jọ o be lẹliẹ oniọvo ra dha eva kẹ owhẹ, 24 nyasiọ okẹ ra na ba aro agbada-idhe na, re whọ nya vrẹ. Kake ruẹrẹhọ kugbe oniọvo ra, kẹsena who ve zihe ze te kẹ okẹ ra.+

25 “Ruẹrẹhọ vẹrẹ vẹrẹ kugbe ohwo nọ o tu owhẹ ẹdhọ nọ wha tẹ rrọ edhere bi kpohọ okọto re ọ siọ owhẹ ba ẹrehọ kẹ obruoziẹ na, obruoziẹ na ọ vẹ rehọ owhẹ kẹ alakpa okọto, o ve fi owhẹ họ uwou-odi.+ 26 Uzẹme mẹ be ta kẹ owhẹ, who ti no etẹe ze he bẹsenọ whọ rẹ rehọ ubiugho osese urere* ra rọ hwosa no.

27 “Wha yo inọ a ta nọ: ‘Who re bruẹnwae vievie he.’+ 28 Rekọ mẹ be ta kẹ owhai nọ ohwo kpobi nọ o bi rri aye+ te epanọ o ro wo isiuru owezẹ kẹe yọ o lele aye na bruẹnwae no evaọ udu riẹ.+ 29 Fikiere, otẹrọnọ ubiẹro obọze ra u bi ru owhẹ zoruẹ,* vre ei no re who gbolo iei kufiẹ.+ Keme o mai woma kẹ owhẹ re oria jọ evaọ oma ra u vru viukpenọ a re gbolo ugboma ra soso fihọ Gehena.*+ 30 Ofariẹ, otẹrọnọ obọze ra u bi ru owhẹ zoruẹ, bru ei no re who gbolo iei kufiẹ.+ Keme o mai woma kẹ owhẹ re oria jọ evaọ oma ra u vru viukpenọ ugboma ra soso u re kpohọ Gehena.*+

31 “Ofariẹ, a ta nọ: ‘Ohwo kpobi nọ ọ be se aye riẹ, jọ ọ kẹe obe-udu orọo-ofa.’+ 32 Rekọ mẹ be ta kẹ owhai nọ, ohwo kpobi nọ ọ be se aye riẹ o gbẹ rrọ fiki ọfariẹ-ogbe* he, o bi fi ei họ odawọ ẹnwae-obro, yọ ohwo kpobi nọ ọ rehọ aye nọ a se na o bruẹnwae.+

33 “Wha te je yo inọ a ta kẹ ahwo oke anwae nọ: ‘Who re duwu iyei ababọ erugba vievie he,+ rekọ who re ru eyaa nọ whọ ya kẹ Jihova* gba hrọ.’+ 34 Rekọ mẹ be ta kẹ owhai nọ: Wha duwu iyei vievie he,+ wha rehọ odhiwu duwu iyei hi, keme etẹe agbara-uvie Ọghẹnẹ ọ rrọ; 35 hayo otọakpọ họ keme oye họ akpala nọ ọ rẹ rọ awọ kpahe;+ hayo Jerusalẹm ho keme oye họ okpẹwho Ovie ologbo na.+ 36 Whọ rẹ rọ uzou ra duwu iyei hi, keme whọ rẹ sai ru ubioto ovo fihọ fuafo hayo biebi hi. 37 Jọ ‘Ee’ rai o jọ Ee, re ‘Ijo’ rai o jọ Ijo,+ keme onọ o vrẹ onana, obọ omuomu na u no ze.+

38 “Wha yo inọ a ta nọ: ‘Ubiẹro rọkẹ ubiẹro, ubiakọ rọkẹ ubiakọ.’+ 39 Rekọ, mẹ be ta kẹ owhai nọ: Who lele ohwo oyoma họre he; rekọ ohwo kpobi nọ ọ tehe agba obọze ra, rehọ abọdekọ kẹe re.+ 40 Yọ otẹrọnọ ohwo jọ ọ gwọlọ tu owhẹ ẹdhọ kpohọ okọto re ọ ruẹse rehọ ewu obeva ra, rehọ ewu ehru ra kẹe re,+ 41 yọ otẹrọnọ ohwo nọ o wo udu-esuo ọ be gba owhẹ họ nọ whọ nya omaele* ovo, lele iei nya emaele ivẹ. 42 Ohwo ọ tẹ yare oware mi owhẹ, kẹe, yọ whọ se kẹ ọnọ ọ gwọlọ momo ugho* mi owhẹ hẹ.+

43 “Wha yo inọ a ta nọ: ‘Who re you ọrivẹ* ra hrọ,+ who ve mukpahe ọwegrẹ ra.’ 44 Rekọ mẹ be ta kẹ owhai nọ: Wha gbẹ hai you ewegrẹ rai+ jẹ hae lẹ roro enọ i bi kpokpo owhai,+ 45 re wha ruẹsi dhesẹ nọ whai yọ emọ Ọsẹ rai nọ ọ rrọ obọ idhiwu na,+ keme o bi ru ọre riẹ va ze kẹ ahwo oyoma gbe ahwo owoma, je bi ru oso rrọ kẹ ahwo okiẹrẹe gbe ahwo nọ a kiẹrẹe he.+ 46 Keme wha te you enọ i you owhai ọvo, osohwa vẹ u re te owhai?+ Kọ enọ i re mi osa-uzou a gbe bi ru epọvo na re? 47 Yọ otẹrọnọ imoni rai ọvo wha re yere, okpoware vẹ wha bi ru? Kọ ahwo erẹwho na a gbe bi ru epọvo na re? 48 Fikiere wha rẹ jọ gbagba hrọ wọhọ epanọ Ọsẹ obọ odhiwu rai ọ rrọ gbagba na.+

6 “Wha yọroma re wha gbe dhesẹ ẹrẹreokie rai evaọ aro ahwo re a ruẹse ruẹ owhai hi;+ keme o tẹ rrọ ere, wha ti wo osohwa ovo evaọ obọ Ọsẹ rai nọ ọ rrọ obọ idhiwu na ha. 2 Fikiere, nọ whọ tẹ be kẹ ekẹ ohrọ,* who kporo ọgba karo kẹ omara ha, wọhọ epanọ eviẹwẹ na i re ru evaọ isinagọgo* gbe evaọ iyẹrẹ re ahwo a ruẹsi jiri ae. Uzẹme mẹ be ta kẹ owhai, a wo osohwa rai kpobi no. 3 Rekọ nọ whọ tẹ be kẹ ekẹ ohrọ, who ru re ẹkpẹlobọ ra ọ riẹ oware nọ obọze ra u bi ru hu, 4 re ekẹ ohrọ ra e ruẹse jọ oware nọ u dhere. Kẹsena Ọsẹ ra nọ ọ rẹ ruẹ eware nọ i dhere na ọ vẹ te hwosa kẹ owhẹ.+

5 “Ofariẹ, nọ wha tẹ be lẹ, wha ru wọhọ eviẹwẹ na ha,+ keme nọ a tẹ be lẹ a rẹ gwọlọ dikihẹ isinagọgo* gbe akotọ idhere nọ i bi zurie re ahwo a ruẹse ruẹ e rai.+ Uzẹme mẹ be ta kẹ owhai, a wo osohwa rai kpobi no. 6 Rekọ nọ whọ tẹ gwọlọ lẹ, ruọ obọ ukpẹ ra, nọ who je si ẹthẹ ra họ no, whọ vẹ lẹ se Ọsẹ ra nọ a rẹ ruẹ hẹ na.+ Ọsẹ ra nọ ọ rẹ ruẹ eware nọ i dhere na, ọ vẹ te hwosa kẹ owhẹ. 7 Nọ whọ tẹ be lẹ, who dhe eme evona ẹwẹwariẹ hẹ wọhọ epanọ ahwo erẹwho na a re ru, keme a roro nọ epanọ a ta bu te a ti ro yo elẹ rai. 8 Fikiere wha jọ wọhọ ahwo yena ha, keme Ọsẹ rai ọ riẹ eware nọ wha gwọlọ+ taure wha tẹ te yare iẹe dede.

9 “Fikiere, enẹ wha rẹ lẹ:+

“‘Ọsẹ mai nọ ọ rrọ obọ idhiwu na, jọ odẹ ra+ o jọ fuafo.*+ 10 Jọ Uvie ra o ze.+ Jọ oreva ra+ u rugba evaọ otọakpọ na, wọhọ epanọ o rrọ evaọ obọ odhiwu.+ 11 Rehọ emu* okpẹdoke inẹnẹ mai kẹ omai nẹnẹ;+ 12 jẹ rehọ osoriọ mai rọvrẹ omai, wọhọ epanọ ma rọvrẹ enọ e reosa mai no na.+ 13 Who su omai ruọ odawọ họ,*+ rekọ siwi omai no obọ omuomu na.’+

14 “Keme otẹrọnọ wha rọ iruthọ amọfa rọvrẹ rai, Ọsẹ obọ odhiwu rai ọ te rọvrẹ owhai re;+ 15 rekọ otẹrọnọ wha gbẹ rọ iruthọ amọfa rọvrẹ rai hi, Ọsẹ rai ọ te rọ iruthọ rai rọvrẹ owhai gbe he.+

16 “Nọ wha tẹ siọ emuọriọ ba,+ wha siọ ovao ba emuhọ wọhọ eviẹwẹ na, keme a re ru ovao rai fihọ whọhọ whọhọ* re ahwo a ruẹse riẹ nọ a siọ emuọriọ ba.+ Uzẹme mẹ be ta kẹ owhai, a wo osohwa rai kpobi no. 17 Rekọ nọ whọ tẹ siọ emuọriọ ba, rọ udẹ wholo uzou ra jẹ wozẹ ovao ra, 18 re ahwo a gbẹ riẹ nọ whọ siọ emuọriọ ba ha, ajokpaọ Ọsẹ ra nọ a rẹ ruẹ hẹ na ọvo. Ọsẹ ra nọ ọ rẹ ruẹ eware nọ i dhere na ọ vẹ te hwosa kẹ owhẹ.

19 “Wha siọ efe ba ekokohọ kẹ omarai evaọ otọakpọ na,+ oria nọ emera gbe ekagba e rẹ jọ raha eware, gbe oria nọ iji e rẹ bẹre ruọ eva a ve tho. 20 Ukpoye, wha koko efe họ obọ odhiwu kẹ omarai,+ oria nọ emera hayo ekagba e rẹ jọ raha eware he,+ gbe oria nọ iji e rẹ bẹre ruọ eva a ve tho ho. 21 Keme oria nọ efe ra ọ rrọ, etẹe udu ra o rẹ jọ re.

22 “Ukpẹ oma na họ ubiẹro.+ Fikiere, otẹrọnọ ubiẹro ra o tọvi oware ovo,* oma ra soso u re lo.* 23 Rekọ otẹrọnọ ubiẹro ra o be re ihri,*+ oma ra soso u re muebi. Otẹrọnọ ebi họ elo nọ ọ rrọ owhẹ oma, kiyọ ebi na ọ rrọ ruaro!

24 “Ohwo ọvo ọ rẹ sae gbodibo kẹ ilori ivẹ hẹ; o re mukpahe ọjọ o ve you ọdekọ,+ hayo ọ rẹ talamu ọjọ ọ vẹ se ọdekọ. Wha sae gbodibo kẹ Ọghẹnẹ gbe Efe he.+

25 “Fiki onana mẹ be ta kẹ owhai nọ: Wha siọ awa ba ẹruọ+ kpahe uzuazọ rai fiki oware nọ wha rẹ re hayo oware nọ wha rẹ da hayo kpahe ugboma rai fiki oware nọ wha re kuhọ.+ Kọ uzuazọ* u gbe vi emu, kọ ugboma na u gbe vi iwu?+ 26 Wha muẹrohọ evra obọ ehru* na ziezi;+ a rẹ kọ ibi hayo vu hayo koko fihọ iwou nọ a rẹ jọ sẹro* eware he, ghele na, Ọsẹ obọ odhiwu rai ọ be kuọ ae. Kọ wha gbẹ ghare vi ae? 27 Ono evaọ usu rai ọ rẹ sae rọ fiki awaọruọ fi omoke* jọ ba uzuazọ riẹ?+ 28 Ofariẹ, fikieme wha jẹ be ruawa kpahe iwu nọ wha re kuhọ? Wha wuhrẹ mi idodo obọ ẹwọ, epanọ e be rọ rro; i re kporo udhu hu, hayo ko iwu* hu; 29 rekọ mẹ be ta kẹ owhai nọ makọ epanọ Solomọn+ o wo oruaro te na, ọ gọ ẹgọ woma te idodo nana ọvuọvo ho. 30 Whaọ otẹrọnọ Ọghẹnẹ ọ be gọ ododo obọ ẹwọ ẹgọ te enẹ, onọ o rrọ nẹnẹ odẹnotha a ve gbolo iei fihọ erae, kọ ọ gbẹ sae gọ owhai ẹgọ viere, whai nọ i wo ẹrọwọ ọkakao? 31 Fikiere, wha ruawa vievie he+ inọ, ‘Eme ma te re?’ hayo, ‘Eme ma te da?’ hayo, ‘Eme ma ti kuhọ?’+ 32 Keme enana kpobi họ eware nọ ahwo erẹwho na a bi le kiti kiti. Ọsẹ obọ odhiwu rai ọ riẹ nọ o roja re wha wo eware nana kpobi.

33 “Nọ o rrọ ere na, wha gbẹ hae kake gwọlọ Uvie na gbe ẹrẹreokie riẹ ẹsikpobi, a ve ti fi eware efa nana kpobi ba kẹ owhai.+ 34 Fikiere, wha ruawa odẹnotha vievie he,+ keme odẹnotha o ti wo ẹkẹ ebẹbẹ riẹ. Ebẹbẹ ẹdẹ kpobi i te kẹ ẹdẹ yena.

7 “Wha siọ ahwo ẹdhọ ba egu,+ re a gbẹ rọ owhai guẹdhọ gbe he; 2 keme oghẹrẹ nọ wha bi ro gu ahwo ẹdhọ, a ti ro gu owhai ẹdhọ re,+ yọ epaọ owawọ nọ wha be rọ wawọ kẹ amọfa a te rọ wawọ kẹ owhai re.+ 3 Kọ fikieme who bi ro rri orara nọ o rrọ ubiẹro oniọvo ra rekọ who bi muẹrohọ ubro-ure nọ o rrọ ubiẹro ra ha?+ 4 Hayo, ẹvẹ whọ rẹ ta kẹ oniọvo ra nọ, ‘Kẹ omẹ uvẹ re me si orara nọ o rrọ ubiẹro ra no,’ kpakiyọ ubro-ure o rrọ owhẹ ubiẹro? 5 Whẹ ọviẹwẹ! Kaki si ubro-ure nọ o rrọ ubiẹro ra no, kẹsena whọ vẹ te ruẹ ude ziezi si orara no ubiẹro oniọvo ra.

6 “Wha rehọ oware nọ o rrọ ọrẹri kẹ erakọ họ,+ hayo gbolo izuu rai kẹ isi hi, re a gbẹ rọ awọ rai thihi ai hi, a ve je kuomarẹriẹ nwa owhai oma.

7 “Wha ruabọhọ ẹyare, a te kẹ owhai;+ wha ruabọhọ ẹgwọlọ, wha te ruẹ; wha ruabọhọ ekporo, a ti rovie kẹ owhai;+ 8 keme ohwo kpobi nọ ọ be yare,+ a rẹ kẹe, ohwo kpobi nọ ọ be gwọlọ, ọ rẹ ruẹ, yọ ohwo kpobi nọ o bi kporo, a ti rovie kẹe. 9 Evaọ uzẹme, ono evaọ usu rai ọmọzae riẹ ọ rẹ yare ebrẹdi, ọ vẹ kẹe utho? 10 Hayo nọ ọ tẹ yare eri, kọ araomuomu ọ rẹ kẹe? 11 Fikiere, otẹrọnọ whai nọ wha rrọ muomu, wha riẹ epanọ wha rẹ rehọ emamọ ekẹ kẹ emọ rai, ẹvẹ Ọsẹ rai nọ ọ rrọ obọ idhiwu na ọ rẹ rehọ emamọ eware+ kẹ enọ e be yare iẹe te!+

12 “Fikiere, eware kpobi nọ wha gwọlọ nọ ahwo a ru kẹ owhai, o gba owhai họ nọ eye wha re ru kẹ ae re.+ Keme, onana họ otofa Uzi na gbe eme Eruẹaro na.+

13 “Wha rehọ unuẹthẹ ohwahwa na+ ruọ eva keme edhere nọ o bi su kpohọ ọraha o riama fihọ, unuẹthẹ na o rrọ kẹkẹe, yọ ibuobu e be rehọ iẹe ruọ eva; 14 rekọ edhere nọ o bi su kpohọ uzuazọ ọ rrọ kekeke, unuẹthẹ na o rrọ hwahwa, yọ umutho ahwo a bi duku ei.+

15 “Wha yọroma kẹ eruẹaro erue,+ enọ e rẹ rọ ovioma ogodẹ nyabru owhai ze,+ rekọ ijera nọ ohọo ogaga u bi kpe a rrọ evaọ obeva.+ 16 Ibi rai wha re ro vuhu ai. Ahwo a rẹ kọrọ ibi-ure evaọ idhigbo hayo kọrọ ibi ifigi evaọ enwẹnwẹ vievie he, kọ a sai ru ere?+ 17 Epọvo na re, emamọ ure kpobi o rẹ mọ emamọ ubi, rekọ ekpehre ure kpobi o rẹ mọ ekpehre ubi.+ 18 Emamọ ure o rẹ sae mọ ekpehre ubi hi, yọ ekpehre ure o rẹ sae mọ emamọ ubi hi.+ 19 Ure kpobi nọ o be mọ emamọ ubi hi, a re koi fihọ otọ, a ve gbolo iei fihọ erae.+ 20 Uzẹme, ibi nọ a be mọ wha re ro vuhu ahwo yena.+

21 “Orọnikọ ohwo kpobi nọ o bi se omẹ nọ, ‘Olori, Olori,’ ọ te ruọ Uvie obọ odhiwu hu, rekọ ọnọ o bi ru oreva Ọsẹ mẹ nọ ọ rrọ obọ idhiwu na ọvo.+ 22 Ahwo buobu a te ta kẹ omẹ ẹdẹ yena nọ: ‘Olori, Olori,+ kọ ma gbẹ rọ odẹ ra ruẹaro jẹ rọ odẹ ra le idhivẹri jẹ rọ odẹ ra ru iruo igbunu buobu?’+ 23 Kẹsena mẹ vẹ te ta kẹ ae nọ: ‘Mẹ riẹ owhai vievie he! Wha no etenẹ no, whai enọ i re koko uzi hi!’+

24 “Fikiere, ohwo kpobi nọ o bi yo eme mẹ nana je bi ru ai, ọ te wọhọ ọzae nọ o wo areghẹ, ọnọ ọ bọ uwou riẹ fihọ ehru utho.+ 25 Oso ọ rrọ ze, owhe o ku ze, ifou i fou, e tẹ tehe uwou na, rekọ u kie he, keme a bọ riẹ fihọ ehru utho. 26 Ofariẹ, ohwo kpobi nọ o bi yo eme mẹ nana nọ o bi ru ai hi, ọ te wọhọ ohwo ogheghẹ, ọnọ ọ bọ uwou riẹ fihọ ehru uwẹkpẹ.+ 27 Oso ọ rrọ ze, owhe o ku ze, ifou i fou, e tẹ tehe uwou na,+ uwou na u te kie, yọ ọraha riẹ ọ jọ ruaro.”

28 Nọ Jesu ọ ta eme nana no, oghẹrẹ nọ o ro wuhrẹ gbe eware nọ o wuhrẹ i te gbe ogbotu na unu,+ 29 keme o je wuhrẹ ae wọhọ ohwo nọ o wo udu,+ orọnikọ wọhọ epaọ otu ikere-obe rai hi.

8 Nọ o nwrotọ no ugbehru na ze no, ogbotu ahwo buobu a te lele iei. 2 Rri! Ọmoti jọ ọ tẹ nyabru ei ze, o te kigwẹ guzou kpotọ kẹe, ta nọ: “Olori, o tẹ ruọ owhẹ, whọ sai ru omẹ fo.”+ 3 Fikiere nọ ọ rriẹ obọ, ọ tẹ rọ obọ tei, ọ tẹ ta nọ: “O ruọ omẹ! Jọ oma ra o fo.”+ Ẹsiẹvo na, a te ru ei fo no oti riẹ na.+ 4 Kẹsena Jesu ọ tẹ ta kẹe nọ: “Ruẹ nọ whọ vuẹ ohwo ọvo ho,+ rekọ nyai dhesẹ oma ra kẹ ozerẹ na,+ re who dhe idhe wọhọ epanọ Uzi Mosis o ta,+ re o jọ isẹri kẹ ae.”

5 Nọ ọ ruọ eva Kapaniọm, oletu ogbaẹmo* jọ ọ tẹ nyabru ei ze, ọ tẹ be lẹe+ 6 be ta nọ: “Ọga, okie o kie odibo mẹ fihọ otọ evaọ obọ uwou, yọ o be lahiẹe gaga.” 7 Ọ tẹ ta kẹe nọ: “Me ti siwi ei nọ me te te obei.” 8 Oletu ogbaẹmo na ọ tẹ ta kẹe nọ: “Ọga, me te ohwo nọ whọ rẹ nyaze uwou riẹ hẹ, rekọ thakpe ta ẹme na ọvo, ẹyao odibo mẹ o ti kpo. 9 Keme mẹ omamẹ yọ ohwo nọ ọ rrọ otọ ahwo, me te je wo isoja nọ e rrọ otọ mẹ, yọ mẹ rẹ sae ta kẹ ọjọ nọ, ‘Nyavrẹ!’ ọ vẹ nyavrẹ, jẹ ta kẹ ọfa nọ, ‘Nyaze!’ ọ vẹ nyaze, jẹ ta kẹ odibo mẹ nọ, ‘Ru onana!’ o ve ru ei.” 10 Nọ Jesu o yo onana, u te gbei unu, ọ tẹ ta kẹ ahwo nọ a je lele iei nọ: “Uzẹme mẹ be ta kẹ owhai, mẹ re jọ evaọ Izrẹl ruẹ ohwo ọvo nọ o wo ẹrọwọ ologbo otiọna ha.+ 11 Mẹ be ta kẹ owhai nọ, ahwo buobu a ti no obọ ovatha-ọre gbe obọ ukiediwo-ọre ze ti lele Abraham gbe Aiziki gbe Jekọp keria re emu evaọ emẹjẹ evaọ Uvie obọ odhiwu na;+ 12 rekọ a ti gbolo emọ Uvie na fihọ ebi obọ otafe. Etẹe a te jọ viẹ jẹ rowo akọ.”+ 13 Jesu ọ tẹ ta kẹ oletu ogbaẹmo na nọ: “Nya kpo. Jọ o via kẹ owhẹ wọhọ epaọ ẹrọwọ ra.”+ Ẹyao odibo na ọ tẹ nwani kpo evaọ auwa yena.+

14 Nọ Jesu ọ nyaze uwou Pita, ọ tẹ ruẹ oni-aye+ Pita nọ o kiẹzẹ nọ ọ be mọ ifiva.+ 15 Ọ tẹ rọ obọ te obọ aye na,+ ifiva na i te kpo, ọ tẹ kpama, ọ tẹ be gbodibo kẹe. 16 Rekọ nọ owọwọ u te, ahwo a tẹ rehọ ahwo buobu nọ idhivẹri e rrọ oma bru ei ze; ọ tẹ rọ ẹmeunu ro le izi igbegbe na no ae oma, je siwi enọ e jẹ mọ kpobi, 17 re ẹme nọ a rehọ Aizaya ọruẹaro na ta ọ ruẹsi rugba, inọ: “Ọyomariẹ ọ rehọ eyao mai jẹ wọ edada mai.”+

18 Nọ Jesu ọ ruẹ ogbotu ahwo nọ a wariẹ e riẹ họ, ọ tẹ ta kẹ ilele riẹ nọ a bi kpohọ abọdekọ.+ 19 Okere-obe jọ ọ tẹ nyabru ei ze, ọ tẹ ta kẹe nọ: “Owuhrẹ, me ti lele owhẹ kpohọ oria kpobi nọ whọ be nya.”+ 20 Rekọ Jesu ọ tẹ ta kẹe nọ: “Iruakọ i wo ighogho, evra obọ ehru* i te je wo iwou, rekọ Ọmọ ohwo o wo oria nọ ọ rẹ rehọ uzou riẹ kpahe he.”+ 21 Kẹsena olele riẹ ọfa jọ ọ tẹ ta kẹe nọ: “Olori, kẹ omẹ uvẹ tao re mẹ nyai ki ọsẹ mẹ.”+ 22 Jesu ọ tẹ ta kẹe nọ: “Gbe lele omẹ, jọ enọ i whu no i ki enọ i whu no.”+

23 Nọ ọ ruọ eva okọ, ilele riẹ a tẹ ruọ eva lele iei.+ 24 Whaọ rri! ofou ọwhibo ọgaga o te muhọ efou evaọ abade na, te epanọ ẹkporo na o je ro kporo ame ruọ okọ na; rekọ ọyomariẹ ọ jọ owezẹ.+ 25 A tẹ nyaze te rọwo iẹe no owezẹ ze, be ta nọ: “Olori, siwi omai, ewhu ma rrọ na!” 26 Rekọ ọ tẹ ta kẹ ae nọ: “Fikieme ozọ u bi ro mu owhai ga tere, whai enọ i wo ẹrọwọ ọkakao?”+ Ọ tẹ kpama, ọ tẹ whọku ofou gbe abade na, oria kpobi o tẹ fọ rirẹ.+ 27 U te gbe ilele na unu, a tẹ ta nọ: “Nọ oghẹrẹ ohwo vẹ? Makọ ofou gbe abade dede i bi yoẹme kẹe.”

28 Nọ o te abọdekọ abade na no, evaọ ubrotọ ahwo Gadara, ezae ivẹ nọ idhivẹri e rrọ oma nọ i je no oria nọ iki* e rrọ ze, a tẹ nyabru ei.+ A jẹ hai dhuaro gaga, fikiere ohwo ọvo ọ jẹ hae gbaudu nya edhere yena vrẹ hẹ. 29 A te bo nọ: “Eme ma wo kugbe owhẹ, Ọmọ Ọghẹnẹ?+ Kọ whọ nyaze te kẹ omai uye+ taure oke nọ a fihọ na u te ti te?”+ 30 Whaọ, owa isi nọ o jọ buobu o jẹ re emu evaọ oria jọ nọ o dina thabọ no etẹe.+ 31 Fikiere idhivẹri na i te mu ei họ ẹlẹ nọ: “Otẹrọnọ who te bi le omai, le omai ruọ owa isi na.”+ 32 Ọ tẹ ta kẹ ae nọ: “Wha nya!” A te no oma ezae na a tẹ ruọ isi na, ẹsiẹvo na owa isi na soso o tẹ họrọ ruọ oria nọ o galevi na kie fihọ abade na, e tẹ da ame whu. 33 Rekọ enọ i je su isi na e tẹ dhẹ, nọ a ruọ okpẹwho na, a tẹ niyẹrẹ eware kpobi nọ e via, te oware nọ o via kẹ ezae nọ idhivẹri e jọ oma na. 34 Ahwo okpẹwho na kpobi a tẹ wọ lahwe re a nyabru Jesu, nọ a ruẹ e riẹ, a tẹ lẹe nọ o no ubrotọ rai no.+

9 Fikiere nọ ọ ruọ eva okọ na, ọ tẹ fa kpohọ abọdekọ, o te kpobọ ẹwho riẹ.+ 2 Whaọ rri! a jẹ wọ ọzae jọ nọ okie o kie nọ ọ rrọ ehwa sei. Nọ Jesu ọ ruẹ ẹrọwọ rai, ọ tẹ ta kẹ ọnọ okie o kie na nọ: “Kru udu ga, ọmọ! A rọ izieraha ra rọvrẹ owhẹ no.”+ 3 Otu ikere-obe jọ a tẹ be ta kẹ ohwohwo nọ: “Ohwo nana ọ be ta eme-aghọ.” 4 Fikinọ Jesu ọ riẹ oware nọ a bi roro, ọ tẹ ta nọ: “Fikieme wha be rọ jọ udu rai roro eware imuomu?+ 5 Wọhọ oriruo, ovẹ o mae lọhọ, re mẹ ta nọ, ‘A rọ izieraha ra rọvrẹ owhẹ no,’ hayo re mẹ ta nọ, ‘Kpama re whọ nya’?+ 6 Rekọ, re wha ruẹse riẹ nọ Ọmọ ohwo o wo udu nọ ọ rẹ rọ rehọ izieraha rọvrẹ ahwo evaọ otọakpọ na—” ọ tẹ ta kẹ ọnọ okie o kie na nọ: “Kpama, wọ ehwa ra, re who kpobọ uwou ra.”+ 7 Ọzae na ọ tẹ kpama, o te kpobọ uwou riẹ. 8 Nọ ogbotu na a ruẹ onana, ozọ u te mu ai, a te jiri Ọghẹnẹ, ọnọ ọ rehọ ogaga utioye na kẹ ahwo.

9 Ofariẹ, nọ Jesu o je no etẹe vrẹ, ọ tẹ ruẹ ọzae jọ nọ a re se Matiu nọ ọ keria uwou nọ a rẹ jọ mi osa-uzou, ọ tẹ ta kẹe nọ: “Jọ olele mẹ.” Ọ tẹ kpama, o te lele iei.+ 10 Oke ofa riẹ, nọ ọ jẹ re emu* evaọ uwou Matiu, rri! enọ i re mi osa-uzou gbe erahaizi buobu a tẹ nyaze, a te kuomagbe Jesu avọ ilele riẹ jẹ re emu.*+ 11 Rekọ nọ otu Farisi na a ruẹ onana, a tẹ ta kẹ ilele riẹ nọ: “Fikieme owuhrẹ rai o bi ro lele enọ i re mi osa-uzou gbe erahaizi re emu?”+ 12 Nọ Jesu o yo ẹme nọ a be ta, ọ tẹ ta nọ: “Ahwo nọ oma rai o ga a gwọlọ ọbo-imu hu, rekọ enọ e be mọ e gwọlọ ọbo-imu.+ 13 Fikiere, wha nya re wha wuhrẹ otofa ẹme nana: ‘Ohrọ-oriọ mẹ gwọlọ orọnikọ idheidhe he.’+ Keme erahaizi mẹ nyaze ti se, orọnikọ ahwo okiẹrẹe he.”

14 Kẹsena ilele Jọn a tẹ nyabru ei ze, a tẹ nọe nọ: “Emejabọ nọ mai gbe otu Farisi na ma rẹ rọ siọ emuọriọ ba rekọ ilele ra a rẹ siọ emuọriọ ba ha?”+ 15 Jesu ọ tẹ ta kẹ ae nọ: “Egbẹnyusu ọva na a wo ẹjiroro ọvo nọ a re ro weri hi nọ ọva na ọ rrọ kugbe ae na,+ manikọ ere he? Rekọ edẹ e be tha nọ a rẹ te rehọ ọva na siọ ae ba,+ kẹsena a vẹ te siọ emuọriọ ba. 16 Ohwo ọvo o re ko ẹwẹ-ohọ ọkpokpọ fihọ oria ewu anwae nọ ọ bẹre he, keme ẹwẹ-ohọ ọkpokpọ na ọ rẹ bẹre no ewu na, u ve ru ei bẹre vi epaọ ọsosuọ.+ 17 Yọ ahwo a re ku enwaene ọkpokpọ fihọ eviẹ-udi anwae he. Otẹrọnọ a te ru ere, eviẹ-udi na e rẹ sa bẹre, enwaene na o ve hwẹ kufiẹ, yọ eviẹ-udi na e raha no. Ukpoye, ahwo a re ku enwaene ọkpokpọ fihọ eviẹ-udi ekpokpọ, enwaene gbe eviẹ-udi na e vẹ jọ gbẹsinẹdẹ.”

18 Epanọ ọ jẹ rọ ta eme nana kẹ ae na, osu jọ ọ tẹ nyabru ei ze, o te kigwẹ fihọ aro riẹ, be ta nọ: “Nọ ma be ta ẹme na, mẹ riẹ nọ ọmọtẹ mẹ o ti whu no, rekọ nyaze whọ rọ obọ kpahe iẹe, ọ te ziọ uzuazọ.”+

19 Jesu ọ tẹ kpama, tei te ilele riẹ, a te lele iei. 20 Aye jọ nọ o bi hwẹ azẹ anwọ ikpe ikpegbivẹ+ ọ tẹ nyaze emu riẹ, ọ tẹ rọ obọ te efọlefọ ewu ehru riẹ,+ 21 keme ọ jẹ ta kẹ omariẹ nọ: “Otẹrọnọ mẹ tẹ sae rọ obọ te ewu ehru riẹ ọvo dede, ẹyao mẹ o ti kpo.” 22 Jesu o te kuomarẹriẹ, nọ ọ ruẹ e riẹ ọ tẹ ta nọ: “Kru udu ga, ọmọtẹ! Ẹrọwọ ra o siwi owhẹ no.”+ No auwa yena vrẹ, ẹyao aye na o te kpo.+

23 Whaọ nọ o te uwou osu na jẹ ruẹ ahwo nọ a bi kporo irete gbe ogbotu na nọ a bi ru edo,+ 24 Jesu ọ tẹ ta nọ: “Wha ruọ otafe, keme ọmọtẹ na o whu hu rekọ ọ be wezẹ.”+ Fikiere a te mu ei họ ẹhwẹ avọ ẹkoko. 25 Nọ ogbotu na a nwane ruọ otafe no, ọ tẹ ruọ eva uwou na, o te kru obọ ọmọtẹ na,+ ọmọtẹ ọsese na ọ tẹ kpama.+ 26 Usi onana u te do ruọ ubrotọ yena soso.

27 Nọ Jesu o je no etẹe vrẹ, ezae ivẹ nọ i tuaro+ a te lele iei, bi bo nọ: “Jọ ohrọ mai o re owhẹ, Ọmọzae Devidi.” 28 Nọ ọ ruọ eva uwou no, ezae nọ i tuaro na a tẹ nyabru ei ze, Jesu ọ tẹ nọ ae nọ: “Kọ wha wo ẹrọwọ nọ mẹ sai ru onana?”+ A tẹ kẹe uyo nọ: “Ee, Olori.” 29 Kẹsena ọ tẹ rọ obọ te ibiaro rai,+ ọ tẹ ta nọ: “Jọ o via kẹ owhai wọhọ epaọ ẹrọwọ rai.” 30 A te mu ude họ ẹruẹ. Jesu ọ tẹ vẹvẹ ae unu gaga nọ: “Wha ru re ohwo ọvo ọ riẹ hẹ.”+ 31 Rekọ nọ a ruọ otafe no, a te whowho usi riẹ fihọ ubrotọ yena soso.

32 Nọ a je no etẹe vrẹ, ahwo a tẹ rehọ ọzae jọ nọ o dienu nọ idhivẹri e rrọ oma ro sei;+ 33 nọ o le idhivẹri na noi oma no, ọzae nọ o dienu na o te mu ẹme họ ẹta.+ Onana u te gbe ogbotu na unu, a tẹ ta nọ: “A re ruẹ oware utiona evaọ Izrẹl vievie he.”+ 34 Rekọ otu Farisi na a jẹ ta nọ: “Ogaga osu idhivẹri na o bi ro le idhivẹri na no.”+

35 Jesu ọ tẹ jẹ nya ikpewho gbe iwhre kpobi duwu, bi wuhrẹ evaọ isinagọgo* rai jẹ be ta usi uwoma Uvie na, yọ o bi siwi oghoghẹrẹ eyao kpobi gbe oghoghẹrẹ emo kpobi.+ 36 Nọ ọ ruẹ ogbotu na, ohrọ rai o tẹ re iẹe+ keme a rrọ oyoya jẹ vahabọ wọhọ igodẹ nọ i wo othuru hu.+ 37 Kẹsena ọ tẹ ta kẹ ilele riẹ nọ: “Uzẹme, ivuẹvu na e rrọ ruaro, rekọ iruiruo na e rrọ kakao.+ 38 Fikiere, wha lẹ Olori ivuẹvu na re o vi iruiruo ziọ ivuẹvu riẹ.”+

10 Fikiere o te se ilele ikpegbivẹ riẹ, ọ tẹ kẹ ae udu nọ a re ro le izi igbegbe no,+ re a je siwi oghoghẹrẹ eyao kpobi gbe oghoghẹrẹ emo kpobi.

2 Edẹ ikọ ikpegbivẹ na ena:+ Ọrọ ọsosuọ, Saemọn, ọnọ a se Pita,+ avọ Andru+ oniọvo riẹ; Jemis ọmọzae Zẹbẹdi gbe Jọn+ oniọvo riẹ; 3 Filip avọ Batolomio;+ Tọmọs+ avọ Matiu,+ ọnọ o re mi osa-uzou na; Jemis ọmọzae Alfiọs; gbe Tadiọs; 4 Saemọn ohwo Kaninia na;* gbe Judas Iskariọt, ọnọ o vivie Jesu uwhremu na.+

5 Ikọ ikpegbivẹ nana Jesu o vi vrẹ, yọ ọ kẹ rai ehrẹ nana:+ “Wha du nyaruọ edhere ahwo erẹwho na ha, wha ruọ okpẹwho ahwo Sameria ọvo gbe he;+ 6 ukpoye, wha hae nyae gwọlọ igodẹ uwou Izrẹl nọ i vru.+ 7 Nọ wha be nya na, wha whowho nọ: ‘Uvie odhiwu o kẹle no.’+ 8 Wha siwi enọ e be mọ,+ wha kpare enọ i whu no, wha siwi emoti, wha le idhivẹri no ahwo oma. Ọvọvẹ a kẹ owhai, wha kẹ ọvọvẹ. 9 Wha wha igoru hayo isiliva hayo ekọpa evaọ umueku-ugho rai hi,+ 10 hayo wha ẹkpa emuore kẹ erẹ na ha, hayo iwu ivẹ,* hayo eviẹ ivẹ, hayo ubiọkpọ họ,+ keme u fo nọ a rẹ kẹ oruiruo emu.+

11 “Evaọ okpẹwho hayo iwhre kpobi nọ wha ruọ eva, wha jariẹ gwọlọ ọnọ o te, wha vẹ jọ etẹe bẹsenọ wha re kpo.+ 12 Nọ wha tẹ ruọ uwou, wha yere ahwo uwou na. 13 Otẹrọnọ a te dede owhai rehọ, jọ udhedhẹ rai u te uwou na;+ rekọ otẹrọnọ a gbe dede owhai rehọ họ, jọ udhedhẹ rai u zihe bru owhai ze. 14 Evaọ oria kpobi nọ a jọ dede owhai rehọ họ hayo gaviezọ kẹ owhai hi, nọ wha te bi no uwou yena hayo okpẹwho yena, wha tehe* ovu nọ ọ rrọ awọ rai no.+ 15 Uzẹme mẹ be ta kẹ owhai, o te mae lọhọ kẹ ẹkwotọ Sọdọm avọ Gomora+ vi okpẹwho yena evaọ Ẹdẹ Ẹdhoguo.

16 “Rri! Me bi vi owhai vrẹ wọhọ igodẹ evaọ udevie ijera; fikiere, wha wo areghẹ wọhọ eraomuomu, ghele na wha kare afuẹwẹ wọhọ irueruẹ.+ 17 Wha yọroma kẹ ahwo, keme a te rehọ owhai kpobọ ekọto rai,+ yọ a te fa owhai eviaviẹ+ evaọ isinagọgo* rai.+ 18 A te rehọ owhai kpohọ aro eba gbe ivie+ fiki mẹ, re o jọ isẹri kẹ ae gbe erẹwho na.+ 19 Rekọ nọ a tẹ rehọ owhai nya, wha du ruawa oghẹrẹ nọ wha te rọ ta ẹme he hayo ẹme nọ wha rẹ ta ha, keme a te kẹ owhai ẹme nọ wha te ta evaọ auwa yena;+ 20 keme orọnikọ owhai họ enọ e be ta ẹme na ha, rekọ ẹzi Ọsẹ rai ọ be rehọ owhai ta ẹme na.+ 21 Ofariẹ, oniọvo o ti vivie oniọvo riẹ re a kpei, ọsẹ o ti vivie ọmọzae riẹ, emọ e te wọso esẹgbini rai, a ve ru re a kpe ai.+ 22 Ahwo kpobi a ti mukpahe owhai fiki odẹ mẹ,+ rekọ ọnọ o thihakọ te urere a ti siwi ei.+ 23 Nọ a te kpokpo owhai evaọ okpẹwho jọ, wha dhẹ kpohọ ọfa;+ keme uzẹme mẹ be ta kẹ owhai, wha te sae ta usi uwoma na nya okogho ikpewho Izrẹl kpobi duwu vievie he bẹsenọ Ọmọ ohwo ọ te nyaze.

24 “Ọnọ a bi wuhrẹ ọ rro vi owuhrẹ riẹ hẹ, yọ ọrigbo ọ rro vi olori riẹ hẹ.+ 25 Ọnọ a bi wuhrẹ ọ tẹ rrọ wọhọ owuhrẹ riẹ u te, u te je te re ọrigbo ọ jọ wọhọ olori riẹ.+ Otẹrọnọ ahwo a se olori uwou na Beelzebọb,*+ a te siọ ahwo uwou riẹ ere ba ese he. 26 Fikiere, wha dhozọ rai hi, keme oware ovo nọ a si no nọ o te bẹre via ha o rrọ họ, yọ oware ovo nọ u dhere nọ a te riẹ hẹ o rrọ họ.+ 27 Oware nọ mẹ be ta kẹ owhai evaọ ebi, wha tae evaọ oria nọ elo ọ rrọ, yọ onọ me se họ owhai ozọ, wha whowho iei evaọ ehru iwou.+ 28 Wha dhozọ enọ i re kpe ugboma na ha, nọ e rẹ sae raha uzuazọ họ;*+ ukpoye wha dhozọ ọnọ ọ rẹ sae raha uzuazọ gbe ugboma evaọ Gehena.*+ 29 Ubiugho osese* a be zẹ imuedi ivẹ, o gbẹ rrọ ere? Ghele na, ọvuọvo rai o re kie fihọ otọ ababọ Ọsẹ rai nọ ọ rẹ riẹ hẹ.+ 30 Rekọ ọ tubẹ riẹ unu ibieto kpobi nọ e rrọ owhai uzou. 31 Fikiere, ozọ u mu owhai hi; wha ghare vi imuedi buobu.+

32 “Fikiere, ohwo kpobi nọ ọ rọwo omẹ evaọ aro ahwo,+ mẹ te rọwo iẹe re evaọ aro Ọsẹ mẹ nọ ọ rrọ obọ idhiwu na.+ 33 Rekọ ohwo kpobi nọ ọ se omẹ evaọ aro ahwo, mẹ te se iẹe re evaọ aro Ọsẹ mẹ nọ ọ rrọ obọ idhiwu na.+ 34 Wha du roro nọ mẹ nyaze ti fi udhedhẹ họ otọakpọ na ha; udhedhẹ mẹ nyaze ti fihọ iẹe he, rekọ ọgbọdọ.+ 35 Mẹ nyaze ti fi ohẹriẹ họ udevie ọmọzae avọ ọsẹ riẹ, udevie ọmọtẹ avọ oni riẹ, gbe udevie aye uwou-orọo avọ oniọrọo riẹ.+ 36 Evaọ uzẹme, ahwo uwou obọ ohwo a te jọ ewegrẹ riẹ. 37 Ohwo kpobi nọ o you ọsẹ hayo oni riẹ vi omẹ, o te ọnọ ọ rẹ jọ olele mẹ hẹ; yọ ohwo kpobi nọ o you ọmọzae hayo ọmọtẹ riẹ vi omẹ, o te ọnọ ọ rẹ jọ olele mẹ hẹ.+ 38 Ohwo kpobi nọ ọ rọwo wọ ure-oja* riẹ re o lele omẹ hẹ, o te ọnọ ọ rẹ jọ olele mẹ hẹ.+ 39 Ohwo kpobi nọ ọ be gwọlọ siwi uzuazọ* riẹ, uzuazọ riẹ u ti vru, yọ ohwo kpobi nọ uzuazọ* riẹ u vru fiki mẹ ọ te wariẹ woi.+

40 “Ohwo kpobi nọ o dede owhai rehọ o dede omẹ rehọ re, yọ ohwo kpobi nọ o dede omẹ rehọ o dede Ọnọ o vi omẹ ze rehọ re.+ 41 Ohwo kpobi nọ o dede ọruẹaro rehọ fikinọ ọruẹaro ọ rrọ, o ti wo osohwa ọruẹaro,+ yọ ohwo kpobi nọ o dede ohwo okiẹrẹe rehọ fikinọ ohwo okiẹrẹe ọ rrọ, o ti wo osohwa ohwo okiẹrẹe. 42 Yọ ohwo kpobi nọ ọ kẹ ọjọ evaọ usu esese nana makọ egho ame odhedhẹ da dede fikinọ olele mẹ ọ rrọ, uzẹme mẹ be ta kẹ owhai, ọ te siọ osohwa riẹ ba ewo vievie he.”+

11 Nọ Jesu ọ kẹ ilele ikpegbivẹ riẹ ehrẹ no, ọ tẹ ruọ edhere re ọ nyai wuhrẹ jẹ ta usi uwoma evaọ ikpewho rai.+

2 Rekọ, nọ Jọn ọ jọ uwou-odi yo+ kpahe iruo nọ Kristi o bi ru, o te vi ilele riẹ+ 3 re a nyae nọe nọ: “Kọ whẹ họ Ọnọ Ọ be Nyaze na, manikọ ma rẹro omọfa jọ?”+ 4 Jesu ọ tẹ kẹ ae uyo nọ: “Wha nyae vuẹ Jọn eware nọ wha bi yo jẹ be ruẹ na:+ 5 Enọ i tuaro i mu ude họ ẹruẹ no,+ enọ e ko e be nya, a bi ru emoti+ fo, enọ i diezọ i bi yo ẹme, a be kpare enọ i whu no ze, yọ a be ta usi uwoma na kẹ iyogbe.+ 6 Eva e were ọnọ ọ jọ oma mẹ ruẹ oware ovo nọ o rẹ wha ezoruẹ ze he.”+

7 Nọ ahwo na a ruọ edhere no, Jesu o te mu ogbotu na họ ẹta kẹ kpahe Jọn nọ: “Eme wha kpobọ udhude nyai rri?+ Ukpoko* nọ ofou o bi fou?+ 8 Kọ eme wha nyai rri? Ọzae nọ o ku iwu elọlọhọ* họ? Whaọ, enọ i ku iwu elọlọhọ họ e rrọ iwou ivie. 9 Kọ fikieme wha ginẹ rọ nya? Re wha ruẹ ọruẹaro? Ẹhẹ, mẹ be ta kẹ owhai nọ, o vi ọruẹaro gheghe.+ 10 Ọnana họ ọnọ a kere kpahe nọ: ‘Rri! Me bi vi ọnyukọ mẹ karo kẹ owhẹ,* ọnọ ọ te ruẹrẹ edhere ra họ re whọ tẹ nyaze!’+ 11 Uzẹme mẹ be ta kẹ owhai, evaọ usu ahwo nọ eyae i yẹ, ọnọ ọ rro vi Jọn Ọhọahwo-Ame na ọ rrọ họ, rekọ ọnọ ọ mae kawo evaọ Uvie obọ odhiwu ọ rro vi ei.+ 12 No anwọ oke Jọn Ọhọahwo-Ame na ze rite enẹna, Uvie odhiwu họ utee nọ ahwo a bi le, yọ enọ e be daoma rai kpobi a bi lei tobọ.+ 13 Keme aikpobi, koyehọ Eruẹaro na gbe Uzi na e ruẹaro rite oke Jọn;+ 14 yọ otẹrọnọ o ruọ owhai nọ wha rẹ rọwo onana, ọye họ ‘Elaejah nọ ọ te nyaze na.’+ 15 Jọ ọnọ o wo ezọ o yo.

16 “Amono mẹ rẹ rehọ oge nana wawo?+ O wọhọ emaha nọ e keria oria eki nọ e be ta ẹme kẹ emaha ibe rai, 17 inọ: ‘Ma kporo urete kẹ owhai, rekọ wha gbile he; ma viẹ gaga, rekọ wha rọ abọ tehe igbama rai avọ uweri hi.’ 18 Epọvo na re, Jọn ọ nyaze, ọ be re hayo da wọhọ ahwo edekọ họ, rekọ ahwo a be ta nọ, ‘Idhivẹri ọ riẹe oma.’ 19 Ọmọ ohwo ọ nyaze be re jẹ be da,+ rekọ ahwo a be ta nọ, ‘Rri! Ọgba-ore gbe ọgba-udi ọ rrọ, ogbẹnyusu enọ i re mi osa-uzou gbe erahaizi.’+ Oghẹrẹ kpobi kẹhẹ, iruo nọ areghẹ o ru* a rẹ rọ riẹ nọ o kiẹrẹe.”+

20 Kẹsena o te mu ikpewho nọ ọ mae jọ ru iruo igbunu riẹ họ ẹwhọku, keme a kurẹriẹ hẹ: 21 “Uye u te owhẹ, Korazin! Uye u te owhẹ, Bẹtsaida! keme o hae jọ nọ evaọ Taya gbe Saedọn a jọ ru iruo igbunu nọ mẹ jọ eva rai ru na, a hai ti kurẹriẹ kri no avọ ehọ-ekpa* nọ a ku họ yọ a keria enwo.+ 22 Rekọ mẹ be ta kẹ owhai nọ, o te mae lọhọ kẹ Taya gbe Saedọn vi owhai evaọ Ẹdẹ Ẹdhoguo.+ 23 Kọ whẹ Kapaniọm,+ a te kpare owhẹ kpobọ ehru? Obọ Uki* who ti kpohọ;+ keme o hae jọ nọ a jọ Sọdọm ru iruo igbunu nọ mẹ jọ eva ra ru na, ọ hae gbẹ jariẹ rite ẹdẹ inẹnẹ na. 24 Rekọ mẹ be ta kẹ owhai nọ, o te mae lọhọ kẹ ẹkwotọ Sọdọm vi owhẹ evaọ Ẹdẹ Ẹdhoguo.”+

25 Evaọ oke yena Jesu ọ tẹ ta nọ: “Mẹ be jọ iraro ahwo jiri owhẹ, Ọsẹ, Olori odhiwu gbe otọakpọ, keme whọ ko eware nana dhere no iwareghẹ gbe enọ e riẹ ikpebe, who te rovie ae via kẹ emaha.+ 26 Ere o rrọ, O Ọsẹ, keme onana họ edhere nọ whọ jẹrehọ. 27 Ọsẹ mẹ ọ rehọ eware kpobi họ omẹ obọ no,+ yọ ohwo ọvo ọ riẹ Ọmọ na totọ họ ajokpaọ Ọsẹ na;+ yọ ohwo ọvo ọ riẹ Ọsẹ na totọ họ ajokpaọ Ọmọ na gbe ohwo kpobi nọ u je Ọmọ na nọ o re dhesẹ Ọsẹ na kẹ.+ 28 Wha nyabru omẹ ze, whai kpobi nọ e be ruẹ uye, nọ ewha egbẹgbẹdẹ e rrọ uzou, mẹ te sasa owhai oma. 29 Wha rehọ owhowha mẹ je wuhrẹ mi omẹ, keme mẹ rrọ wowolẹ je wo omaurokpotọ,+ wha re ti wo omosasọ kẹ omarai.* 30 Keme owhowha mẹ o rẹ nyaoma ha,* yọ owha mẹ o rrọ vovori.”

12 Evaọ oke yena, Jesu ọ tẹ jẹ nya idhu iwhiti vrẹ evaọ Ẹdijala. Nọ ohọo u je kpe ilele riẹ, a te mu iwhiti họ ẹkọrọ be re.+ 2 Nọ otu Farisi na a ruẹ onana, a tẹ ta kẹe nọ: “Rri! Ilele ra i bi ru oware nọ o wọso uzi Ẹdijala.”+ 3 Ọ tẹ ta kẹ ae nọ: “Kọ wha ri se oware nọ Devidi o ru okenọ ohọo u je kpei avọ ezae nọ e jọ kugbei?+ 4 Nọ ọ rọ ruọ eva uwou Ọghẹnẹ, a tẹ re ebrẹdi nọ a ro mudhe kẹ Ọghẹnẹ,*+ oware nọ u fo nọ ọyomariẹ hayo ahwo nọ a jọ kugbei a rẹ re he ajokpaọ izerẹ na ọvo?+ 5 Hayo kọ wha re jọ Uzi na se inọ evaọ Edijala, izerẹ nọ e be jọ etẹmpol na ru iruo a rẹ reabe uzi Ẹdijala ha?+ 6 Rekọ mẹ be ta kẹ owhai nọ, ohwo nọ ọ rro vi etẹmpol na ọ rrọ etenẹ.+ 7 Rekọ otẹrọnọ wha wo otoriẹ ẹme nana, ‘Ohrọ-oriọ mẹ gwọlọ+ orọnikọ idheidhe he,’+ wha hai ti brukpe enana nọ e kare abe na ha. 8 Keme Ọmọ ohwo yọ Olori Ẹdijala na.”+

9 Nọ o no etẹe no, ọ tẹ ruọ eva isinagọgo* rai, 10 whaọ, ọzae jọ nọ obọ riẹ o ko* ọ jọ etẹe.+ Fikiere a tẹ nọe nọ, “Kọ u fo re a siwi ohwo evaọ Ẹdijala?” re a ruẹse ruẹ oware nọ a re gu fihọ iẹe uzou.+ 11 Ọ tẹ ta kẹ ae nọ: “Otẹrọnọ who wo ogodẹ ọvo, ogodẹ na o te kie fihọ ọgọdọ evaọ Ẹdijala, kọ ohwo jọ ọ rrọ usu rai na nọ ọ rẹ wọe lahwe he?+ 12 Kọ ohwo-akpọ ọ gbẹ ghare vi ogodẹ? Fikiere, u fo re a ru oware ezi evaọ Ẹdijala.” 13 Ọ tẹ ta kẹ ọzae na nọ: “Rriẹ obọ ra.” Ọ tẹ rriẹ obọ na, obọ na o tẹ ruẹrẹhọ wọhọ ọdekọ. 14 Rekọ otu Farisi na a tẹ ruọ otafe, a tẹ lẹlẹ gba ẹgwae epanọ a re ro kpei. 15 Nọ Jesu ọ riẹ onana, o te no etẹe. Ahwo buobu a lele i rie,+ yọ o siwi rai kpobi, 16 rekọ ọ vẹvẹ e rai unu gaga inọ a dhesẹ ohwo nọ ọ rrọ via ha,+ 17 re ẹme nọ a rehọ Aizaya ọruẹaro na ta ọ ruẹsi rugba, ọnọ ọ ta nọ:

18 “Rri! Odibo mẹ,+ ọnọ mẹ salọ, oyoyou mẹ na, ọnọ mẹ jẹrehọ!+ Me ti fi ẹzi mẹ họ iẹe oma,+ yọ o ti dhesẹ oware nọ uvioziẹ o rrọ vevẹ kẹ erẹwho na. 19 Ọ te whọ ẹwhọ họ+ hayo ru edo ho, yọ ohwo ọvo o ti yo urru riẹ evaọ oko-ore he. 20 O ti wiri ukpoko nọ u wiri rẹrẹ no ho, yọ o ti furie uwhiki nọ u bi kuye iwiri hi+ bẹsenọ ọ rẹ kpọ eware kpobi nọ e thọ vi no riẹriẹriẹ. 21 Evaọ uzẹme, odẹ riẹ erẹwho i ti fi ẹruore họ.”+

22 Kẹsena a tẹ wọ ọzae jọ nọ idhivẹri e rrọ oma bru ei ze, ọnọ o tuaro je dienu, o te siwi ei, ọzae na o te mu ẹme họ ẹta je mu ude họ ẹruẹ. 23 Onana u te gbe ogbotu ahwo na kpobi unu, a te muhọ ẹta nọ: “Kọ ogbẹrọnọ Ọmọzae Devidi na ọna?” 24 Nọ otu Farisi na a yo onana, a tẹ ta nọ: “Ogaga Beelzebọb,* osu idhivẹri na ohwo nana o bi ro le idhivẹri na no.”+ 25 Fikinọ ọ riẹ iroro rai, ọ tẹ ta kẹ ae nọ: “Uvie kpobi nọ o be họre omobọ riẹ o rẹ raha no, yọ okpẹwho hayo uwou kpobi nọ o be họre omobọ riẹ u re dikihẹ hẹ. 26 Epọvo na re, otẹrọnọ Setan o bi le Setan no, koyehọ ọ be họre omobọ riẹ; kọ ẹvẹ uvie riẹ o sai ro dikihẹ? 27 Ofariẹ, otẹrọnọ ogaga Beelzebọb me bi ro le idhivẹri na no, kọ ogaga ono emezae rai a bi ro le ai no? Fiki onana ahwo obọrai a ti brukpe owhai. 28 Rekọ, otẹrọnọ ẹkwoma ẹzi Ọghẹnẹ me bi ro le idhivẹri na no, kiyọ Uvie Ọghẹnẹ o ginẹ vrẹ owhai no.+ 29 Hayo ẹvẹ ohwo ọ sae rọ ruọ uwou ọgba ọ vẹ kwa eyero riẹ? Ajokpanọ ọ rẹ kake gba ọgba na fihọ otọ, ẹsiẹe ọvo ọ sae rọ kwa eware uwou riẹ. 30 Ohwo kpobi nọ ọ rrọ abọ mẹ hẹ yọ o mukpahe omẹ, yọ ohwo kpobi nọ o bi kuomagbe omẹ koko ahwo họ họ, o bi le ahwo no omẹ oma.+

31 “Fiki onana mẹ be ta kẹ owhai nọ, a te rehọ oghẹrẹ uzioraha gbe eme-aghọ kpobi rọvrẹ ahwo, rekọ ọnọ ọ ta eme-aghọ mukpahe ẹzi ọfuafo na o ti wo erọvrẹ hẹ.+ 32 Wọhọ oriruo, ohwo kpobi nọ ọ ta ẹme mukpahe Ọmọ ohwo, a te rọvrẹ riẹ;+ rekọ ohwo kpobi nọ ọ ta ẹme mukpahe ẹzi ọfuafo na, a te rọvrẹ riẹ hẹ, ijo, evaọ uyero-akpọ* nana hayo onọ o be tha na.+

33 “Wha sai ru ure na fihọ emamọ ure o vẹ mọ emamọ ubi hayo ru ure na fihọ ekpehre ure o vẹ mọ ekpehre ubi, keme ubi-ure a re ro vuhu ure.+ 34 Emọ eriwhẹ,+ ẹvẹ wha sae rọ ta eme iwoma kpakiyọ wha rrọ muomu? Keme eme ibuobu nọ e vọ udu na eye unu o rẹ ta via.+ 35 Emamọ ohwo ọ rẹ rehọ emamọ eware no emamọ eware nọ o kokohọ ze, rekọ ohwo omuomu ọ rẹ rehọ eware imuomu no eware imuomu nọ o kokohọ ze.+ 36 Mẹ be ta kẹ owhai nọ ahwo a ti gu ẹkẹ-unu rai+ evaọ Ẹdẹ Ẹdhoguo fiki ẹme oyoma kpobi nọ a ta; 37 keme eme ra a ti ro brukẹ owhẹ inọ who kiẹrẹe, yọ eme ra a ti ro brukpe owhẹ.”

38 Kẹsena otu ikere-obe gbe otu Farisi na jọ a tẹ kpahe kẹe nọ: “Owuhrẹ, ma gwọlọ nọ who dhesẹ oka jọ kẹ omai.”+ 39 Ọ tẹ kpahe kẹ ae nọ: “Oge omuomu nọ o bi bruẹnwae* ọ be gwọlọ oka, rekọ a te kẹe uvumọ oka ha ajokpaọ oka Jona ọruẹaro na.+ 40 Keme nwane wọhọ epanọ Jona ọ jọ eva eri ologbo na edẹ esa gbe eso esa na,+ ere Ọmọ ohwo ọ te jọ uki edẹ esa gbe eso esa.+ 41 Ahwo Nanivi avọ oge nana a te kparoma ze evaọ oke ẹdhoguo na, a ve ti brukpe oge nana, keme a kurẹriẹ nọ Jona o whowho ovuẹ Ọghẹnẹ kẹ ae.+ Rekọ, rri! ohwo nọ ọ rro vi Jona ọ rrọ etenẹ.+ 42 Ovie-aye obọ obọze ovatha-ọre avọ oge nana a te kparoma ze evaọ oke ẹdhoguo na, o ve ti brukpe oge nana, keme o no obọ oka otọakpọ na ze te gaviezọ kẹ eme areghẹ Solomọn.+ Rekọ rri! ohwo nọ ọ rro vi Solomọn ọ rrọ etenẹ.+

43 “Nọ ẹzi ogbegbe o te no ohwo oma, ọ rẹ nya eria nọ ame ọ rrọ họ be gwọlọ oria eriosehọ, rekọ ọ gbẹ ruẹ hẹ,+ 44 ọ vẹ ta nọ, ‘Me re zihe kpobọ uwou mẹ nọ mẹ kwa no na,’ nọ o te te etẹe, ọ jẹ ruẹ nọ a be rria uwou na ha, rekọ a hwere i rie fihọ fuafo jẹ whẹ erru họ iẹe, 45 ọ vẹ nyavrẹ je zizie izi ihrẹ efa nọ i muomu vi ọyomariẹ kugbe oma, nọ a tẹ ruọ eva no, a vẹ be rria etẹe; uyero ohwo yena evaọ uwhremu na u ve yoma vi epaọ ọsosuọ.+ Ere o te jọ kẹ oge omuomu ọnana re.”

46 Nọ ọ gbẹ jẹ ta ẹme kẹ ogbotu na, yọ oni riẹ avọ inievo-emezae riẹ+ a dikihẹ obọ otafe, be gwọlọ nọ a rẹ ta ẹme kẹe.+ 47 Fikiere ohwo jọ ọ tẹ ta kẹe nọ: “Rri! Oni ra avọ inievo-emezae ra a dikihẹ obọ otafe, be gwọlọ nọ a rẹ ta ẹme kẹ owhẹ.” 48 Ọ tẹ kpahe kẹ ohwo nọ ọ ta ẹme na kẹe na nọ: “Ono họ oni mẹ, kọ amono họ inievo-emezae mẹ?” 49 Nọ ọ rriẹ obọ họ ilele riẹ, ọ tẹ ta nọ: “Rri! Ahwo nana họ oni mẹ gbe inievo-emezae mẹ!+ 50 Keme ohwo kpobi nọ o bi ru oreva Ọsẹ mẹ nọ ọ rrọ obọ odhiwu, ọye họ oniọvo-ọmọzae mẹ, gbe oniọvo-ọmọtẹ mẹ, gbe oni mẹ.”+

13 Evaọ ẹdẹ yena Jesu o te no uwou na, ọ tẹ nyae keria akotọ abade. 2 Ogbotu ahwo buobu a tẹ nyabru ei, fikiere ọ tẹ ruọ eva okọ, ọ tẹ keria, yọ ogbotu na kpobi a dikihẹ okpa.+ 3 Ọ tẹ rehọ etadhesẹ ro wuhrẹ ae eware buobu,+ inọ: “Rri! Ọkibi jọ ọ nyae kọ ibi.+ 4 Epanọ ọ jẹ rọ kọ na, ibi jọ i te kie fihọ akotọ edhere, nọ evra e rra ze e tẹ soro ae lọ no.+ 5 Efa i kie fihọ otọ itho, oria nọ u wo ẹkpẹ bu hu, e tẹ nwane dhẹ lahwe fikinọ ẹkpẹ na o diwi hi.+ 6 Rekọ nọ ọre ọ va ze, i te lo je whu no fikinọ i wo awọ họ. 7 Efa i kie fihọ udevie idhigbo, nọ idhigbo na e rro ze, e tẹ lẹliẹ ekakọ na ko no.+ 8 Rekọ efa i kie fihọ emamọ otọ, i te mu ibi họ ẹmọ, ọnana ọ mọ ibi udhusoi (100) efa, ọyena udhosa, ọdekọ ọgba.+ 9 Jọ ọnọ o wo ezọ o yo.”+

10 Fikiere ilele na e tẹ nyabru ei ze, a tẹ nọe nọ: “Emejabọ whọ be rọ rehọ etadhesẹ ta ẹme kẹ ahwo na?”+ 11 Ọ tẹ kẹ ae uyo nọ: “Whai họ enọ a kuvẹ re wha wo otoriẹ eware ididi ọrẹri+ Uvie odhiwu na, rekọ a kẹ rai uvẹ na ha. 12 Keme ohwo kpobi nọ o wo, a te kẹe efa kugbe; o ve ti wo buobu, rekọ ohwo nọ o wo ho, a ti mi ei makọ onọ o wo na dede.+ 13 Oyejabọ nọ mẹ be rọ rehọ etadhesẹ ta ẹme kẹ ae na; keme a bi rri, rekọ a be ruẹ hẹ, a be gaviezọ, rekọ a bi yo ho, yọ a bi wo otoriẹ hẹ.+ 14 Eruẹaruẹ Aizaya e be jọ oma rai rugba. Onọ o ta nọ: ‘Wha ti gine yo, rekọ wha ti wo otoriẹ vievie he, yọ wha ti gine rri, rekọ wha te ruẹ vievie he.+ 15 Keme udu ahwo nana o rrọ gaga, a be rọ ezọ rai yo rekọ a be daezọ họ, a fare ibiaro rai, re a gbẹ rehọ ibiaro rai ruẹ ude jẹ rehọ ezọ rai yo jẹ jọ udu rai wo otoriẹ ẹme na je kurẹriẹ vievie he, re mẹ siọ ae ba esiwi.’+

16 “Rekọ, eva e were owhai keme ibiaro rai e be ruẹ ude, yọ ezọ rai i bi yo ẹme.+ 17 Uzẹme mẹ be ta kẹ owhai, eruẹaro gbe ahwo okiẹrẹe buobu a jẹ gwọlọ nọ a rẹ ruẹ eware nọ wha be ruẹ na, rekọ a ruẹ e rai hi,+ a jẹ gwọlọ nọ a re yo eme nọ wha bi yo na, rekọ a yo rai hi.

18 “Whaọ, wha gaviezọ kẹ otofa ọtadhesẹ ọzae nọ ọ kọ ibi na.+ 19 Ohwo o te yo ovuẹ Uvie na rekọ o wo otoriẹ ovuẹ na ha, omuomu na+ ọ rẹ nyaze ọ vẹ tọlọ ẹme nọ a kọ fihọ udu riẹ no; ọnana họ ọnọ o kie fihọ akotọ edhere na.+ 20 Kpahe ọnọ o kie fihọ otọ itho na, ọnana họ ọnọ o yo ẹme na, ọ tẹ nwane rọ oghọghọ jẹe rehọ.+ 21 Rekọ ẹme na ọ ta awọ ze evaọ oma riẹ hẹ, ghele na ọ jọ evaọ omoke, nọ uye hayo ukpokpoma o ze fiki ẹme na, ọ tẹ nwani zoruẹ. 22 Kpahe ọnọ o kie fihọ udevie idhigbo na, ọnana họ ọnọ o yo ẹme na, rekọ awaọruọ uyero-akpọ*+ nana gbe ogaga eviẹhọ efe e tẹ lẹliẹ ẹme na ko no, ọ gbẹ mọ ibi hi.+ 23 Kpahe enọ i kie fihọ emamọ otọ na, enana họ enọ i yo ẹme na je wo otoriẹ ẹme na, a tẹ mọ ibi, ọnana ọ mọ ibi udhusoi (100) efa, ọyena udhosa, ọdekọ ọgba.”+

24 Ọ tẹ rehọ ọtadhesẹ ọfa ta ẹme kẹ ae, inọ: “A sae rehọ Uvie odhiwu dhesẹ ọzae nọ ọ kọ emamọ ibi fihọ udhu riẹ. 25 Nọ ahwo a jẹ wezẹ, ọwegrẹ riẹ ọ tẹ nyae kọ ikpoko* fihọ udevie iwhiti na, ọ tẹ nyavrẹ. 26 Okenọ iwhiti na e dhẹ ze jẹ mọ ibi, ikpoko na e dhẹ ze re. 27 Fikiere erigbo olori uwou na e tẹ nyaze, a tẹ nọe nọ, ‘Ọga, kọ ogbẹrọnọ emamọ ibi whọ kọ fihọ udhu ra? Kọ ẹvẹ ikpoko e rọ rrọ udhu na?’ 28 Ọ tẹ ta kẹ ae nọ, ‘Ọzae jọ nọ ọ rrọ ọwegrẹ mẹ o ru onana.’+ Erigbo na e tẹ ta kẹe nọ, ‘Kọ whọ gwọlọ nọ ma nya re ma wolo ai no?’ 29 Ọ tẹ ta nọ, ‘Ijo, keme nọ wha ti wolo ikpoko na wha sae rọ ethobọ wolo iwhiti na kugbe ai. 30 Wha nyasiọ iwhiti na avọ ikpoko na ba bọo oke ivuẹvu, evaọ oke ivuẹvu na, mẹ te ta kẹ ekọrọ-ibi na nọ: Wha kaki koko ikpoko na họ jẹ gba ae ekru re a mahe ae; kẹsena wha ve koko iwhiti na họ uwou nọ mẹ rẹ jọ sẹro* eware.’”+

31 Ọ tẹ rehọ ọtadhesẹ ọfa ta ẹme kẹ ae, inọ: “Uvie odhiwu o wọhọ ubi mọstad, onọ ọzae jọ ọ rehọ, ọ tẹ kọe fihọ udhu riẹ.+ 32 Evaọ uzẹme, oye họ ubi nọ o mae kawo kpobi, rekọ nọ o rro no, o tẹ rrọ okakọ nọ o mae rro evaọ usu ekakọ nọ a rẹ re je zihe ruọ ure, u te ru nọ evra obọ ehru i bi ro kiemu ei jẹ be rria egha riẹ.”

33 Ọ tẹ rehọ ọtadhesẹ ọfa ta ẹme kẹ ae, inọ: “Uvie odhiwu o wọhọ ẹvi,* onọ aye ọ gua kugbe eflawa nọ e rẹ vọ owawọ ilogbo esa bẹsenọ u ro ru ukulu na soso fu.”+

34 Ẹkwoma etadhesẹ Jesu ọ rọ ta eme nana kpobi kẹ ogbotu na. Evaọ uzẹme, ababọ ọtadhesẹ ọ rẹ ta ẹme ọvo kẹ ae he,+ 35 re ẹme nọ a rehọ ọruẹaro na ta ọ ruẹsi rugba, inọ: “Me ti rovie unu mẹ re mẹ ta etadhesẹ; me ti whowho eware nọ a ko dhere no emuhọ* ze via.”+

36 Kẹsena nọ o siobọno ogbotu na vrẹ no, ọ tẹ ruọ eva uwou. Ilele riẹ e tẹ nyabru ei ze, a tẹ ta nọ: “Fa otọ ọtadhesẹ ikpoko nọ e rrọ udhu na kẹ omai.” 37 Ọ tẹ ta kẹ ae nọ: “Ọnọ ọ kọ emamọ ubi na họ Ọmọ ohwo; 38 udhu na họ akpọ na.+ Kpahe emamọ ibi na, eye họ emọ Uvie na, rekọ ikpoko na họ emọ omuomu na,+ 39 yọ ọwegrẹ nọ ọ kọ rai na họ Ẹdhọ. Oke ivuẹvu na yọ oke urere uyero-akpọ,* ekọrọ-ibi na yọ ikọ-odhiwu. 40 Fikiere, nwane wọhọ epanọ a kua ikpoko na koko a jẹ rọ erae mahe ae na, ere o te jọ evaọ oke urere uyero-akpọ* na.+ 41 Ọmọ ohwo o ti vi ikọ-odhiwu riẹ, a ve ti koko eware kpobi nọ e be wha ezoruẹ ze gbe ahwo nọ a bi koko uzi hi họ, a ve si ai no Uvie riẹ, 42 a ve ti gbolo ai fihọ umuwou-erae nọ ebruerae ọ rrọ na.+ Etẹe a te jọ viẹ jẹ rowo akọ. 43 Evaọ oke yena ikiẹrẹe na i ti lo nwranwranwra wọhọ ọre+ evaọ Uvie Ọsẹ rai. Jọ ọnọ o wo ezọ o yo.

44 “Uvie odhiwu o wọhọ okwakwa-aghae nọ a si no họ udhu, onọ ọzae jọ o duku, o te si ei no; yọ fiki oghọghọ riẹ, ọ tẹ nyae zẹ eware kpobi nọ o wo, ọ tẹ dẹ udhu na.+

45 “Uvie odhiwu o tẹ jẹ wọhọ ọgba-ọhreki nọ o re no oria ruọ oria be gwọlọ emamọ izuu. 46 Nọ ọ ruẹ uzuu jọ nọ u wo aghae gaga, o te zihe kpo, ọ tẹ zẹ eware kpobi nọ o wo ovovẹrẹ, ọ tẹ dẹe.+

47 “Uvie odhiwu o tẹ jẹ wọhọ osakrosa nọ a fihọ abade nọ u bi si oghoghẹrẹ iyei kpobi kokohọ. 48 Nọ o vọ no, a te si rie ruọ okpa, a tẹ keria, a tẹ tọlọ emamọ iyei+ na fihọ idhe, rekọ a te gbolo ikpehre+ na kufiẹ. 49 Ere o te jọ evaọ oke urere uyero-akpọ* na. Ikọ-odhiwu a te nya via, a vẹ hẹriẹ ahwo omuomu no udevie ahwo okiẹrẹe, 50 a ve gbolo ai fihọ umuwou-erae nọ ebruerae ọ rrọ na. Etẹe a te jọ viẹ jẹ rowo akọ.

51 “Kọ wha wo otoriẹ eme nana kpobi?” A tẹ kẹe uyo nọ: “Ee.” 52 Ọ tẹ ta kẹ ae nọ: “Nọ o rrọ ere na, owuhrẹ kpobi nọ a wuhrẹ kpahe Uvie odhiwu ọ wọhọ ọzae, olori uwou, ọnọ ọ rẹ rehọ eware ekpokpọ gbe erọ anwae no oria nọ ọ rẹ jọ sẹro* ekwakwa-aghae riẹ ze.”

53 Nọ Jesu ọ rehọ etadhesẹ nana ta ẹme no, o te no etẹe. 54 Nọ ọ nyaze ẹwho riẹ,+ o te mu ae họ ewuhrẹ evaọ isinagọgo* rai, fikiere u te gbe ai unu, a tẹ ta nọ: “Diẹse ọzae nana o jo wo areghẹ nana gbe ogaga nọ o bi ro ru iruo igbunu enana?+ 55 Kọ ogbẹrọnọ ọmọzae ekapenta na ọna?+ Kọ oni riẹ a re se Meri, inievo-emezae riẹ kọ Jemis gbe Josẹf gbe Saemọn gbe Judas?+ 56 Yọ inievo-emetẹ riẹ, aikpobi a rrọ kugbe omai na? Kọ diẹse o jo wo areghẹ gbe ogaga nana kpobi?”+ 57 Fikiere a gbẹ jẹe rehọ họ.+ Rekọ Jesu ọ tẹ ta kẹ ae nọ: “Ọruẹaro o re wo ọghọ evaọ oria kpobi ajokpaọ evaọ ẹwho riẹ gbe uwou riẹ.”+ 58 Fikinọ a wo ẹrọwọ họ, ọ gbẹ jọ etẹe ru iruo igbunu buobu hu.

14 Evaọ oke yena, Herọd osu ubrotọ na,* o te yo usi kpahe Jesu,+ 2 ọ tẹ ta kẹ idibo riẹ nọ: “Ohwo nana yọ Jọn Ọhọahwo-Ame na. Ọ kparoma no uwhu ze, oyejabọ nọ ọ be sai ro ru iruo igbunu nana.”+ 3 Keme Herọd* o mu Jọn, a tẹ rọ egbregba kare iẹe je fi ei họ uwou-odi fiki Herodias, aye Filip oniọvo Herọd.+ 4 Keme Jọn ọ jẹ hae ta kẹe nọ: “U fo ho re whọ rehọ iẹe wọhọ aye ra.”+ 5 Yọ, dede nọ ọ gwọlọ nọ o re kpei no, ọ jẹ dhozọ ogbotu ahwo na keme a rehọ Jọn fihọ ọruẹaro.+ 6 Rekọ okenọ Herọd+ o je ru ehaa ẹdẹ-eyẹ riẹ, ọmọtẹ Herodias o te gbile evaọ ehaa na nọ o were Herọd gaga+ 7 te epanọ ọ rọ ya eyaa avọ iyei iduwu inọ ọ rẹ kẹe oware kpobi nọ ọ yare. 8 Kẹsena ọmọtẹ na ọ tẹ ta oware nọ oni riẹ ọ ta kẹe inọ: “Fi uzou Jọn Ọhọahwo-Ame na họ omodhe ọkpakpala kẹ omẹ.”+ 9 Dede nọ onana o kẹ ovie na uye, fiki iyei nọ o duwu na gbe ahwo nọ a jọ kugbei jẹ re jẹ da na,* ọ tẹ ta nọ a rehọ iẹe kẹe. 10 Fikiere o te vi ahwo, a te bru uzou Jọn evaọ uwou-odi na. 11 A tẹ rọ omodhe ọkpakpala wọ uzou na ze rọkẹ ọmọtẹ na, ọ tẹ wọe se oni riẹ. 12 Kẹsena ilele riẹ e tẹ nyaze, a tẹ wọ ori riẹ vrẹ, a te ki ei; a tẹ nyaze te vuẹ Jesu. 13 Nọ Jesu o yo onana, ọ tẹ ruọ okọ no etẹe kpohọ oria nọ u siomano re ọye ọvo ọ jọ oria. Rekọ nọ ogbotu ahwo na a yo kpahe iẹe, a te no ikpewho na ze rọ owotọ kpohọ obonọ ọ ruọ okọ bi kpohọ na.+

14 Nọ ọ ruọ okpa, ọ tẹ ruẹ ogbotu ahwo buobu, ohrọ rai o tẹ re iẹe,+ o te siwi enọ e jẹ mọ.+ 15 Rekọ nọ owọwọ u bi te no, ilele riẹ e tẹ nyabru ei ze, a tẹ ta nọ: “Ahwo a be rria oria nana ha yọ oke u thabọ no; siobọno ogbotu na re a kpohọ iwhre nọ e kẹle onana nyae dẹ emu nọ a rẹ re.”+ 16 Rekọ Jesu ọ tẹ ta kẹ ae nọ: “U du gwọlọ nọ a rẹ nyavrẹ hẹ; wha kẹ ae oware nọ a rẹ re.” 17 A tẹ ta kẹe nọ: “Ma wo oware ovo evaọ etenẹ hẹ ajokpaọ ikulu ebrẹdi isoi gbe imiyei ivẹ.” 18 Ọ tẹ ta nọ: “Wha rehọ ai se omẹ.” 19 Ọ tẹ ta kẹ ogbotu na nọ a keria ẹbe na. Kẹsena ọ tẹ rehọ ebrẹdi isoi gbe imiyei ivẹ na, nọ o rri obọ odhiwu, ọ tẹ lẹ,+ nọ o bru ebrẹdi na ibribro no, ọ tẹ rehọ ae kẹ ilele na, ilele na e tẹ ghale ae kẹ ogbotu na. 20 Ahwo na kpobi a tẹ re, eva e tẹ vọ ae, a tẹ kwa ewẹ nọ i kiọkọ koko, e vọ ikete ikpegbivẹ.+ 21 Whaọ, ahwo nọ a re emu na a bu te oware wọhọ ezae idu isoi (5,000), te eyae te emaha na.+ 22 Kẹsena, ababọ oke oraha, ọ tẹ ta kẹ ilele riẹ nọ a ruọ okọ re a bi kpohọ abọdekọ nyae hẹrẹ iẹe, ọyomariẹ o te siobọno ogbotu na kpo.+

23 Nọ o siobọno ogbotu na kpo no, ọye ọvo o te kpobọ ehru ugbehru na nyae lẹ.+ Nọ oke u kpo no, ọye ọvo ọ jọ etẹe. 24 Evaọ oke nana yọ okọ nọ ilele riẹ a jọ na o rehọ eyade udhusoi (100) buobu* thabọ no okpa no, yọ ẹkporo ọgaga o bi fi okọ na keme ofou na ọ rọsuọ ae. 25 Rekọ evaọ etoke iroi avọ ene aso,* ọ tẹ be nya ehru ame na bru ai. 26 Nọ a ruẹ e riẹ nọ ọ be nya evaọ ehru abade na, ozọ u te mu ilele na, a tẹ be ta nọ: “Nọ ẹwoho!” A te bi bo. 27 Rekọ Jesu ọ tẹ nwane ta kẹ ae nọ: “Jọ udu u te owhai otọ! Mẹ wha be ruẹ na; ozọ u mu owhai hi.”+ 28 Pita ọ tẹ kpahe kẹe nọ: “Olori, o tẹ ginẹ rrọ nọ owhẹ, ta kẹ omẹ nọ mẹ nya ehru ame na bru owhẹ ze.” 29 Ọ tẹ ta nọ: “Nyaze!” Fikiere Pita o te no okọ na, ọ tẹ be nya ehru ame na bru Jesu. 30 Rekọ nọ o rri ofou ọwhibo na, ozọ u te mu ei. Nọ o muhọ ekiediwi, o te bo nọ: “Olori, siwi omẹ!” 31 Jesu ọ tẹ nwane rriẹ obọ, ọ tẹ jobọ kru ei, ọ tẹ ta nọ: “Whẹ nọ o wo ẹrọwọ ọkakao, fikieme who ro wo avro?”+ 32 Nọ a ruọ eva okọ na no, ofou ọwhibo na o te serihọ. 33 Otu nọ e rrọ okọ na a te guzou kpotọ kẹe, be ta nọ: “Whẹ ginọ Ọmọ Ọghẹnẹ.” 34 Kẹsena a tẹ fa te abọ obei, a tẹ ruọ okpa evaọ Gẹnesarẹt.+

35 Nọ ahwo ẹwho yena a vuhu nọ ọye, a tẹ vuẹ se ahwo ẹkwotọ yena soso, a tẹ rehọ ahwo kpobi nọ a jẹ mọ ro sei. 36 A tẹ lẹe nọ ọ kẹ ae uvẹ re a thakpe rọ obọ te efọlefọ ewu ehru riẹ,+ ẹyao enọ e rọ obọ tei kpobi o te kpo riẹriẹriẹ.

15 Kẹsena otu Farisi gbe otu ikere-obe a te no obọ Jerusalẹm bru Jesu ze,+ be ta nọ: 2 “Fikieme ilele ra e be rọ la uruemu ahwo oke anwae vrẹ? Wọhọ oriruo, a rẹ wozẹ abọ họ* nọ a tẹ gwọlọ re emu.”+

3 Ọ tẹ kpahe kẹ ae nọ: “Fikieme whai omarai wha be rọ la ujaje Ọghẹnẹ vrẹ fiki uruemu rai nọ u no anwae ze?+ 4 Wọhọ oriruo, Ọghẹnẹ ọ ta nọ, ‘Rọ ọghọ kẹ ọsẹ ra avọ oni ra,’+ yọ ‘Ọnọ ọ be ta ẹme oyoma kpahe ọsẹ hayo oni riẹ* a re kpei no.’+ 5 Rekọ wha rẹ ta nọ, ‘Ohwo kpobi nọ ọ ta kẹ ọsẹ hayo oni riẹ nọ: “Oware kpobi nọ me wo nọ o hae kẹ owhẹ erere, mẹ rehọ e riẹ mudhe kẹ Ọghẹnẹ no,”+ 6 o gbẹ gwọlọ nọ ọ rẹ kẹ ọsẹ riẹ ọghọ vievie he.’ Fikiere, wha rehọ uruemu rai nọ u no anwae ze rọ raha ẹme Ọghẹnẹ no.+ 7 Whai eviẹwẹ, Aizaya ọ ta gba nọ ọ ruẹaro kpahe owhai nọ:+ 8 ‘Igbenu rai ahwo nana a be rọ kẹ omẹ ọghọ, rekọ udu rai u thabọ no omẹ gaga. 9 A be gọ omẹ kufiẹ gheghe, keme ijaje ahwo a bi ro wuhrẹ.’”+ 10 Kẹsena o te se ogbotu na kẹle oma, ọ tẹ ta kẹ ae nọ: “Wha gaviezọ re wha wo otoriẹ ẹme nọ mẹ be ta na:+ 11 Orọnikọ oware nọ o ruọ unu ohwo oye u re zue ei oma ha, rekọ oware nọ u no unu riẹ ze oye u re zue ei oma.”+

12 Kẹsena ilele na e tẹ nyabru ei ze, a tẹ ta kẹe nọ: “Kọ whọ riẹ nọ ẹme nọ whọ ta na o lẹliẹ otu Farisi na zoruẹ?”+ 13 Ọ tẹ kẹ ae uyo nọ: “Okakọ kpobi nọ Ọsẹ obọ odhiwu mẹ ọ kọ họ a ti vi ei no. 14 Wha kpairoro vrẹ rai. Isu ituaro a rrọ. Otẹrọnọ ohwo otuaro o te bi su ohwo otuaro, aimava a re kie ruọ ọgọdọ.”+ 15 Pita ọ tẹ ta kẹe nọ: “Ru ọtadhesẹ na vẹ kẹ omai.” 16 Jesu ọ tẹ ta nọ: “Kọ wha gbẹ kare otoriẹ re?+ 17 Kọ wha gbẹ riẹ nọ oware kpobi nọ o ruọ unu na u re kpobọ eva, a ve nei kufiẹ? 18 Rekọ, eware kpobi nọ i bi no unu na ze, obọ udu na i bi no ze, yọ eye họ eware nọ i re zue ohwo oma.+ 19 Wọhọ oriruo, evaọ udu na iroro imuomu i re no ze:+ ohwo-okpe, ẹnwae-obro, ọfariẹ-ogbe,* uji-utho, isẹi ọrue, eme-aghọ. 20 Enana họ eware nọ i re zue ohwo oma; orọnikọ abọ nọ ohwo ọ wozẹ hẹ* taure ọ tẹ te re emu oye u re zue ei oma ha.”

21 Nọ Jesu o no etẹe no, ọ tẹ nya kpobọ ubrotọ Taya avọ Saedọn.+ 22 Rri! Aye jọ nọ ọ rrọ ohwo Fonisia* nọ o no ubrotọ yena ze ọ tẹ nyabru ei ze bi bo nọ: “Jọ ohrọ mẹ o re owhẹ, Olori, Ọmọzae Devidi. Idhivẹri nọ e rrọ ọmọtẹ mẹ oma e be lahiẹ iẹe gaga.”+ 23 Rekọ ọ kpahe ẹme kẹ aye na ha. Fikiere, ilele riẹ e tẹ nyabru ei ze, a tẹ be ta kẹe nọ: “Ta kẹe re ọ nyavrẹ keme o bi bo lele omai.” 24 Ọ tẹ kẹ uyo nọ: “Fiki igodẹ uwou Izrẹl nọ i vru ọvo a ro vi omẹ ze, orọnọ fiki amọfa ha.”+ 25 Rekọ aye na ọ tẹ nya tei oma, o te kigwẹ fihọ aro riẹ, be ta nọ: “Olori, fiobọhọ kẹ omẹ!” 26 Ọ tẹ kpahe kẹe nọ: “U kiehọ họ re a tọlọ ebrẹdi emọ na gbolo kẹ emọ erakọ.” 27 Ọ tẹ ta nọ: “Ginọ ere, Olori, rekọ emọ erakọ na e rẹ re ehẹhẹ nọ i bi kie no emẹjẹ ilori rai ze.”+ 28 Jesu ọ tẹ kpahe kẹe nọ: “O aye, ẹrọwọ ra ọ rro kẹhẹ; jọ o via kẹ owhẹ epaọ ẹgwọlọ ra.” Oma ọmọtẹ riẹ o tẹ ga no auwa yena vrẹ.

29 Nọ Jesu o no etẹe, ọ tẹ nya kẹle Abade Galili,+ nọ ọ nya kpobọ ehru ugbehru na, ọ tẹ keria etẹe. 30 Ogbotu ahwo buobu a tẹ nyabru ei ze avọ emo, enọ e ko, enọ i tuaro, enọ i dienu, gbe enọ i wo eyao efa sa-sa nọ a rehọ ze, a tẹ wọ ae fihọ aro riẹ, o te siwi ai.+ 31 Fikiere u te gbe ogbotu na unu nọ a ruẹ enọ i dienu nọ e be ta ẹme, enọ e ko nọ a bi siwi, emo nọ e be nya, gbe enọ i tuaro nọ e be ruẹ ude, a te jiri Ọghẹnẹ Izrẹl.+

32 Rekọ Jesu o te se ilele riẹ, ọ tẹ ta nọ: “Ohrọ ogbotu na o be re omẹ+ keme anwọ edẹ esa ena a rrọ kugbe omẹ na yọ a wo oware ovo nọ a rẹ re he. Mẹ gwọlọ siobọno ai kpo eveva ha, keme ibiaro e sai bi ae evaọ edhere.”+ 33 Rekọ ilele na e tẹ ta kẹe nọ: “Diẹse ma sae jọ ruẹ ebrẹdi nọ i re te ogbotu nana soso re evaọ oria nana nọ ahwo a rrọ họ na?”+ 34 Jesu ọ tẹ ta kẹ ae nọ: “Bro ebrẹdi wha wo?” A tẹ ta nọ: “Ebrẹdi ihrẹ gbe umutho imiyei esese jọ.” 35 Fikiere nọ ọ ta kẹ ogbotu na nọ a keria otọ no, 36 ọ tẹ rehọ ebrẹdi ihrẹ na gbe imiyei na, nọ ọ lẹ yere Ọghẹnẹ no, o te bru ebrẹdi na ibribro, ọ tẹ be rehọ ae kẹ ilele na, ilele na e tẹ ghale ae kẹ ogbotu na.+ 37 Ahwo na kpobi a tẹ re, eva e tẹ vọ ae, a tẹ kwa ewẹ nọ i kiọkọ koko, e vọ ikete ilogbo ihrẹ.+ 38 Whaọ enọ e re emu na i bu te ezae idu ene (4,000), te eyae te emaha na. 39 Ukuhọ riẹ, nọ o siobọno ogbotu na kpo no, ọ tẹ ruọ okọ, ọ tẹ ziọ ubrotọ Magadan.+

16 Otu Farisi gbe otu Sadusi a tẹ nyabru Jesu ze evaọ etẹe, yọ re a dawo iẹe, a tẹ ta kẹe nọ o dhesẹ oka jọ kẹ ae no ehru ze.+ 2 Ọ tẹ ta kẹ ae nọ: “Nọ owọwọ u te te, wha rẹ ta nọ, ‘Odẹnotha ehru ọ te ghariẹ, keme ovao ehru na o rrọ wawae,’ 3 yọ evaọ ohiohiẹ, wha rẹ ta nọ, ‘Oso ọ te rrọ nẹnẹ avọ ekpahe keme ovao ehru na o rrọ wawae rekọ o mu ovao họ.’ Wha riẹ epanọ wha rẹ fa otọ ovao ehru, rekọ wha riẹ epanọ wha rẹ fa otọ eka oke na ha. 4 Oge omuomu nọ o bi bruẹnwae* ọ be gwọlọ oka, rekọ a te kẹe uvumọ oka ha+ ajokpaọ oka Jona.”+ Ọ ta ere no, ọ tẹ nyase ae ba etẹe.

5 Whaọ, ilele na e tẹ fa vrẹ kpohọ abọdekọ, rekọ a kareghẹhọ wha ebrẹdi lele oma ha.+ 6 Jesu ọ tẹ ta kẹ ae nọ: “Wha rovie aro rai fihọ re wha muẹrohotọ kẹ ẹvi* otu Farisi gbe otu Sadusi.”+ 7 Fikiere a te mu ohwohwo họ ẹta kẹ nọ: “Ma wha uvumọ ebrẹdi lele oma ha.” 8 Fikinọ Jesu ọ riẹ oware nọ a bi roro, ọ tẹ ta nọ: “Emejabọ wha be rọ ta kẹ ohwohwo nọ wha wo ebrẹdi hi, whai nọ i wo ẹrọwọ ọkakao? 9 Kọ wha ri wo otoriẹ ẹme na ghele, hayo kọ wha gbẹ kareghẹhọ ebrẹdi isoi nọ mẹ rọ kuọ ezae idu isoi (5,000) na gbe unu ikete nọ wha kwa koko?+ 10 Hayo ebrẹdi ihrẹ nọ mẹ rọ kuọ ezae idu ene (4,000) na gbe unu ikete ilogbo nọ wha kwa koko?+ 11 Ẹvẹ wha gbe ro vuhumu hu inọ ebrẹdi mẹ ta kẹ owhai kpahe he? Ẹme nọ mẹ be ta na họ, wha muẹrohotọ kẹ ẹvi otu Farisi gbe otu Sadusi na.”+ 12 Kẹsena, a te vuhumu inọ orọnọ ẹvi nọ u re ru ebrẹdi fu ọ be ta nọ a muẹrohotọ kẹ hẹ, rekọ iwuhrẹ otu Farisi gbe otu Sadusi na.

13 Nọ Jesu ọ nyaziọ ubrotọ Sisaria ọrọ Filipai, ọ tẹ nọ ilele riẹ nọ: “Ono ahwo a be ta nọ Ọmọ ohwo ọ rrọ?”+ 14 A tẹ ta nọ: “Ejọ e be ta nọ Jọn Ọhọahwo-Ame na,+ efa Elaejah,+ efa kọ Jerimaya hayo omọvo eruẹaro na.” 15 Ọ tẹ ta kẹ ae nọ: “Kọ owhai, ono wha be ta nọ mẹ rrọ?” 16 Saemọn Pita ọ tẹ kẹ uyo nọ: “Whẹ họ Kristi na,+ Ọmọ Ọghẹnẹ nọ ọ rrọ uzuazọ na.”+ 17 Jesu ọ tẹ ta kẹe nọ: “Eva e were owhẹ, Saemọn ọmọzae Jona, keme orọnikọ uwo gbe azẹ o* fere onana via kẹ owhẹ hẹ, rekọ Ọsẹ mẹ nọ ọ rrọ obọ idhiwu na.+ 18 Mẹ be jẹ ta kẹ owhẹ nọ: Whẹ họ Pita,+ yọ ehru utho nana+ mẹ te bọ ukoko mẹ fihọ, yọ inuethẹ Uki* e te ga obọ vi ei hi. 19 Mẹ te kẹ owhẹ isiavẹ Uvie odhiwu, yọ oware kpobi nọ whọ te gba evaọ otọakpọ, o te jọ onọ a gba no evaọ obọ idhiwu na, yọ oware kpobi nọ whọ te rra evaọ otọakpọ, o te jọ onọ a rra no evaọ obọ idhiwu na.” 20 Kẹsena ọ tẹ vẹvẹ ilele na unu gaga inọ a ta kẹ ohwo ọvo ho inọ ọye họ Kristi na.+

21 No oke yena vrẹ, Jesu o te mu ilele riẹ họ ẹta kẹ vevẹ inọ o gba riẹ họ nọ o re kpobọ Jerusalẹm, ọ vẹ te ruẹ uye eware buobu evaọ obọ ekpako na gbe ilori izerẹ na gbe otu ikere-obe na, a ve ti kpei, rekọ evaọ ẹdẹ avọ esa a te kpare iẹe ze.+ 22 Fikiere Pita o te sei họ akotọ, o te mu ei họ ẹwhọku nọ: “Whọ rọ uye bẹ omara ha Olori; onana o rẹ via kẹ owhẹ vievie he.”+ 23 Rekọ nọ o kuomarẹriẹ, ọ tẹ ta kẹ Pita nọ: “Ruọ emu mẹ, Setan! Whẹ yọ utho ezoruẹ kẹ omẹ keme orọnọ iroro Ọghẹnẹ who bi roro na ha, rekọ erọ ahwo-akpọ.”+

24 Kẹsena Jesu ọ tẹ ta kẹ ilele riẹ nọ: “Otẹrọnọ ohwo jọ ọ gwọlọ lele omẹ, jọ ọ vro omobọ riẹ re ọ wọ ure-oja* riẹ, o ve lele omẹ ẹsikpobi.+ 25 Keme ohwo kpobi nọ ọ be gwọlọ siwi uzuazọ* riẹ, uzuazọ riẹ u ti vru, rekọ ohwo kpobi nọ uzuazọ* riẹ u vru fiki mẹ ọ te wariẹ woi.+ 26 Evaọ uzẹme, didi ewoma o rẹ jọ kẹ ohwo otẹrọnọ o wo akpọ na soso rekọ uzuazọ* riẹ u te vru?+ Hayo kọ eme ohwo ọ sai ro nwene uzuazọ* riẹ?+ 27 Keme Ọmọ ohwo ọ te nyaze evaọ oruaro Ọsẹ riẹ, tei te ikọ-odhiwu riẹ, ọ vẹ te hwosa kẹ ohwo kpobi wọhọ epanọ uruemu riẹ o rrọ.+ 28 Uzẹme mẹ be ta kẹ owhai inọ ejọ e rrọ nọ i dikihẹ etenẹ na nọ i ti whu vievie he ajokpanọ a ruẹ Ọmọ ohwo nọ ọ be nyaze evaọ Uvie riẹ tao.”+

17 Nọ edẹ ezeza e vrẹ no, Jesu ọ tẹ rehọ Pita, Jemis gbe Jọn oniọvo riẹ kugbe oma, aimane na ọvo a te kpobọ ehru ugbehru ukpekpehru jọ.+ 2 Ọ tẹ rẹriẹ evaọ iraro rai; ovao riẹ u te je lo wọhọ ọre, iwu ehru riẹ i te je lo nwranwranwra.*+ 3 Ẹsiẹvo na, Mosis avọ Elaejah a tẹ romavia kẹ ae, bi lele iei ta ẹme. 4 Kẹsena Pita ọ tẹ ta kẹ Jesu nọ: “Olori, u woma nọ ma rọ rrọ etenẹ. Otẹrọnọ o were owhẹ, mẹ te bọ iwou-udhu esa fihọ etenẹ, ọjọ rọkẹ owhẹ, ọjọ rọkẹ Mosis, ọjọ rọkẹ Elaejah.” 5 Epanọ ọ gbẹ jẹ rọ ta ẹme na, rri! ẹgho ọnwranwra o te ruru ae, urru jọ o tẹ ta ẹme no ẹgho na ze inọ: “Ọnana họ Ọmọzae mẹ, oyoyou mẹ na, ọnọ mẹ jẹrehọ.+ Wha gaviezọ kẹe.”+ 6 Nọ ilele na i yo onana, ozọ u te mu ae gaga, a te kie vovao tuotọ. 7 Kẹsena Jesu ọ tẹ nya kẹle ae, nọ ọ rọ obọ te ae, ọ tẹ ta nọ: “Wha kpama. Ozọ u mu owhai hi!” 8 Nọ a kpare ovao, a gbẹ ruẹ ohwo ọvo ho ajokpaọ Jesu ọvo. 9 Nọ a je no ugbehru na ruọ otọ, Jesu ọ tẹ vẹvẹ ae unu nọ: “Wha ta eruẹaruẹ na kẹ ohwo ọvo ho bẹsenọ a rẹ kpare Ọmọ ohwo no uwhu ze no.”+

10 Rekọ ilele na e tẹ nọe nọ: “Kọ fikieme otu ikere-obe na a be rọ ta nọ o gba họ nọ Elaejah ọ rẹ kake nyaze tao?”+ 11 Ọ tẹ kẹ ae uyo nọ: “Elaejah ọ te ginẹ nyaze ọ vẹ ruẹrẹ eware kpobi họ.+ 12 Rekọ mẹ be ta kẹ owhai nọ Elaejah ọ nyaze no, yọ a vuhu i rie he, rekọ a ru rie oware kpobi nọ u je rai.+ Epọvo na re Ọmọ ohwo ọ te ruẹ uye evaọ obọ rai.”+ 13 Kẹsena ilele na i te vuhumu nọ Jọn Ọhọahwo-Ame na ọ be ta kpahe na.

14 Nọ a nya kẹle ogbotu na no,+ ọzae jọ ọ tẹ nyabru ei ze, o te kigwẹ fihọ aro riẹ, ọ tẹ ta nọ: 15 “Olori, jọ ohrọ ọmọzae mẹ o re owhẹ keme o re kie ewawa, yọ ọ be mọ. Ẹsibuobu o re kie fihọ erae je kie fihọ ame.+ 16 Mẹ wọ riẹ bru ilele ra ze rekọ a sai siwi ei hi.” 17 Jesu ọ tẹ ta nọ: “O oge nọ ọ kare ẹrọwọ jẹ vọ avọ uzioraha,+ ẹvẹ mẹ rẹ jọ kugbe owhai kri te? Ẹvẹ me re thihakọ kẹ owhai kri te? Rehọ ọmọ na se omẹ.” 18 Kẹsena Jesu ọ tẹ whọku idhivẹri na, o te no ọmọ na oma, oma ọmọ na o tẹ ga no auwa yena vrẹ.+ 19 Ilele na e tẹ nyabru Jesu ze nọ ọye ọvo ọ jọ oria, a tẹ nọe nọ: “Fikieme ma gbẹ sai le idhivẹri na no ho?” 20 Ọ tẹ ta kẹ ae nọ: “Fiki ẹrọwọ ọkakao rai. Uzẹme mẹ be ta kẹ owhai, otẹrọnọ wha te wo ẹrọwọ nọ ọ make kawo wọhọ ubi mọstad, wha te ta kẹ ugbehru nana nọ, ‘No etenẹ kpohọ obei,’ o ve no etẹe, yọ oware ovo o te bẹ owhai eru hu.”+ 21 *——

22 Nọ a kokohọ evaọ Galili, etẹe Jesu ọ jọ ta kẹ ae nọ: “A ti vivie Ọmọ ohwo họ obọ ahwo,+ 23 a ve ti kpei, ẹdẹ avọ esa a vẹ kpare iẹe ze.”+ Uweri ogaga o tẹ jarae oma.

24 Nọ a te Kapaniọm no, ezae nọ i bi mi osa-uzou ibiugho edrakma* ivẹ na e tẹ nyabru Pita ze, a tẹ nọe nọ: “Kọ owuhrẹ rai ọ rẹ hwa osa-uzou ibiugho edrakma ivẹ na?”+ 25 Ọ tẹ kẹ uyo nọ: “Ee.” Rekọ nọ ọ ruọ eva uwou na, Jesu ọ tẹ kaki mu ẹme na họ kẹe inọ: “Saemọn, ẹvẹ who roro? Amono ivie akpọ na i re mi azọhọ hayo osa-uzou? Emezae rai manikọ erara?” 26 Nọ ọ kẹ uyo nọ: “Erara,” Jesu ọ tẹ ta kẹe nọ: “Koyehọ, emezae na e rẹ hwa osa-uzou hu. 27 Rekọ re ma siọ ae ba eru zoruẹ,+ kpobọ abade, who fi oghọlọ họ ame, whọ vẹ rehọ eri ọsosuọ nọ o ti mu, nọ who te rovie unu riẹ, whọ te ruẹ ubiugho isiliva.* Rehọ iẹe kẹ ae rọ hwa osa-uzou mẹ avọ ọra.”

18 Evaọ auwa yena ilele na e tẹ nya kẹle Jesu, a tẹ nọe nọ: “Ono ọ ginẹ mae rro evaọ Uvie odhiwu?”+ 2 Nọ o se ọmaha jọ ze, ọ tẹ rehọ iẹe dikihẹ udevie rai, 3 ọ tẹ ta nọ: “Uzẹme mẹ be ta kẹ owhai, ajokpanọ wha re nwene* re wha jọ wọhọ emaha, o gbẹ rrọ ere he,+ wha sae ruọ Uvie odhiwu vievie he.+ 4 Fikiere, ohwo kpobi nọ ọ rẹ romakpotọ wọhọ ọmaha nana họ ọnọ ọ mae rro evaọ Uvie odhiwu;+ 5 yọ ohwo kpobi nọ o dede ọmaha otiọye na rehọ fiki odẹ mẹ o dede omẹ rehọ re. 6 Rekọ ohwo kpobi nọ o ru ọjọ evaọ usu esese nana nọ i fi ẹrọwọ họ omẹ na zoruẹ, o te mai woma kẹe otẹrọnọ a gba utho nọ a re ro wuhu eware nọ eketekete ọ rẹ thahe kurẹriẹ fihọ iẹe uriohọ, a ve gbolo iei fihọ abade ọraragha.+

7 “Uye u te akpọ na fiki itho ezoruẹ nọ e vọ riẹ! Evaọ uzẹme, itho ezoruẹ e rẹ jariẹ hrọ, rekọ uye u te ohwo nọ ọ be wha utho ezoruẹ na ze! 8 Fikiere, otẹrọnọ obọ ra hayo owọ ra u bi ru owhẹ zoruẹ,* bru ei no re who gbolo iei kufiẹ.+ O mai woma kẹ owhẹ re whọ rọ owọ ovo hayo obọ ovo ruọ uzuazọ viukpenọ a re gbolo owhẹ avọ abọ ivẹ hayo awọ ivẹ fihọ erae ebẹdẹ bẹdẹ.+ 9 Ofariẹ, otẹrọnọ ubiẹro ra u bi ru owhẹ zoruẹ, vre ei no re who gbolo iei kufiẹ. O mai woma kẹ owhẹ re whọ rọ ubiẹro ovo ruọ uzuazọ viukpenọ a re gbolo owhẹ avọ ibiaro ivẹ fihọ Gehena* nọ erae e rrọ.+ 10 Wha yọroma re wha siọ ọjọ evaọ usu esese nana ba erivo, keme mẹ be ta kẹ owhai nọ ikọ-odhiwu rai nọ e rrọ obọ odhiwu i bi rri ovao Ọsẹ mẹ nọ ọ rrọ obọ odhiwu ẹsikpobi.+ 11 *——

12 “Ẹvẹ wha roro? Otẹrọnọ ọzae jọ o wo igodẹ udhusoi (100) rekọ ọvo jọ o te ghoro vrẹ,+ kọ ọ gbẹ te nyasiọ udhone gbe ikpegbizii na ba obọ igbehru, ọ vẹ nyae gwọlọ ọnọ o ghoro vrẹ na?+ 13 Yọ otẹrọnọ ọ ruẹ e riẹ, uzẹme mẹ be ta kẹ owhai, ọ rẹ ghọghọ fiki riẹ vi udhone gbe ikpegbizii nọ i ghoro vrẹ hẹ na. 14 Epọvo na re, o rẹ were Ọsẹ mẹ* nọ ọ rrọ obọ odhiwu hu re makọ ọvo dede evaọ usu esese nana o whu.+

15 “Ofariẹ, otẹrọnọ oniọvo ra o ru owhẹ thọ, nya re whọ ta oware nọ o ru thọ na kẹe* nọ whai imava ọvo wha tẹ rrọ oria.+ Otẹrọnọ ọ gaviezọ kẹ owhẹ, yọ who wo oniọvo ra tobọ no.+ 16 Rekọ otẹrọnọ ọ gbẹ gaviezọ họ, rehọ omọvo hayo imava efa lele oma, re a ruẹse jọ isẹri* imava hayo imasa vuhu uzẹme ẹme kpobi.+ 17 Otẹrọnọ ọ gbẹ gaviezọ kẹ ae he, whọ vẹ ta kẹ ukoko na. Otẹrọnọ ọ gbẹ gaviezọ kẹ makọ ukoko na dede he, whọ vẹ rehọ iẹe wọhọ ohwo erẹwho na+ jẹ wọhọ ọnọ o re mi osa-uzou.+

18 “Uzẹme mẹ be ta kẹ owhai, oware kpobi nọ wha te gba evaọ otọakpọ, o te jọ onọ a gba no evaọ obọ odhiwu, yọ oware kpobi nọ wha te rra evaọ otọakpọ, o te jọ onọ a rra no evaọ obọ odhiwu. 19 Mẹ tẹ jẹ be ta kẹ owhai nọ, otẹrọnọ imava rai jọ evaọ otọakpọ na a rọwokugbe evaọ oware jọ nọ u wuzou nọ a be yare, Ọsẹ mẹ nọ ọ rrọ obọ odhiwu o ti ru ei kẹ ae.+ 20 Keme oria nọ imava hayo imasa i kokohọ evaọ odẹ mẹ,+ mẹ rrọ udevie rai evaọ etẹe.”

21 Kẹsena Pita ọ tẹ nyabru ei ze, ọ tẹ nọe nọ: “Olori, brẹse oniọvo mẹ o re ru omẹ thọ nọ mẹ jẹ rọvrẹ riẹ? Kọ u re te isiahrẹ?” 22 Jesu ọ tẹ ta kẹe nọ: “Mẹ be ta kẹ owhẹ nọ orọnikọ isiahrẹ hẹ, rekọ u re te isia udhosa gbe ikpegbihrẹ.+

23 “Oyejabọ nọ a sae rọ rehọ Uvie odhiwu dhesẹ ovie nọ o se erigbo riẹ re a hwa igho nọ a reosa riẹ na. 24 Nọ a je ru onana, a tẹ rehọ ọzae jọ ze nọ ọ reosa riẹ etalẹnte idu ikpe (10,000).* 25 Rekọ fikinọ ọzae na o wo oghẹrẹ ovo nọ ọ sae rọ hwa igho na zihe he, olori riẹ ọ tẹ ta nọ a zẹ ọzae na avọ aye riẹ gbe emọ riẹ gbe eware kpobi nọ o wo re a rọ hwa osa na.+ 26 Fikiere, ọrigbo na o te kigwẹ fihọ aro riẹ, o te guzou kpotọ kẹe be ta nọ, ‘Gbe thihakọ kẹ omẹ, mẹ te hwa igho na kpobi zihe kẹ owhẹ.’ 27 Ohrọ ọrigbo na o tẹ re olori na, o te vu ei wa jẹ kpairoro vrẹ osa nọ ọ re na.+ 28 Rekọ nọ ọrigbo yena ọ ruọ otafe, ọ tẹ ruẹ ibe ọrigbo riẹ nọ ọ reosa riẹ dinariọs* udhusoi (100), ọ tẹ jabọ kru ei, o te si ewu mu ei uvou, be ta nọ, ‘Hwa igho kpobi nọ whọ reosa mẹ kẹ omẹ.’ 29 Fikiere, ibe ọrigbo riẹ o te kigwẹ, o te mu ei họ ẹlẹ nọ, ‘Gbe thihakọ kẹ omẹ, mẹ te hwa igho na zihe kẹ owhẹ.’ 30 Rekọ ọ rọwo ho, ukpoye ọ tẹ nyavrẹ, o te ru epanọ a ro fi ei họ uwou-odi re ọ jọ etẹe bẹsenọ ọ rẹ hwa osa nọ ọ re na no. 31 Nọ ibe erigbo riẹ a ruẹ oware nọ o via na, o tẹ kẹ ae uye gaga, a tẹ nyae vuẹ olori rai eware kpobi nọ e via na. 32 Kẹsena olori riẹ o te sei, ọ tẹ ta kẹe nọ: ‘Ọrigbo omuomu, mẹ kpairoro vrẹ igho buobu yena nọ whọ reosa mẹ na nọ whọ lẹ omẹ. 33 Kọ o gbẹ hai fo re whọ re ohrọ ibe ọrigbo ra wọhọ epanọ mẹ re ohrọ ra na?’+ 34 Fiki onana, ofu o te mu olori riẹ gaga, ọ tẹ rehọ iẹe kẹ iriekarọ re ọ jọ uwou-odi bẹsenọ ọ rẹ hwa osa nọ ọ re kpobi no. 35 Ere Ọsẹ obọ odhiwu mẹ o ti ru owhai re+ otẹrọnọ whai omomọvo ọ gbẹ rọvrẹ oniọvo riẹ no udu ze he.”+

19 Nọ Jesu ọ ta eware nana no, o te no Galili kpobọ iwhru ẹkwotọ Judia evaọ abọdekọ Jọdan.+ 2 Yọ ogbotu ahwo buobu a lele i rie, ọ tẹ jọ etẹe siwi ai.

3 Otu Farisi a tẹ nyabru ei ze fikinọ a gwọlọ dawo iẹe, a tẹ nọe nọ: “Kọ u fo re ọzae ọ se aye riẹ fiki oghẹrẹ oware kpobi?”+ 4 Ọ tẹ kẹ ae uyo nọ: “Kọ wha ri se inọ ọnọ ọ ma rai no emuhọ ze ọ ma rai ọzae gbe aye+ 5 jẹ ta nọ: ‘Fiki onana ọzae ọ rẹ nyasiọ ọsẹ riẹ gbe oni riẹ ba ọ vẹ talamu aye riẹ, aimava na a vẹ jọ uwo ovo’?+ 6 A gbẹ rrọ uwo ivẹ hẹ rekọ uwo ovo. Fikiere, onọ Ọghẹnẹ o kugbe no, ajọ ohwo ọvo ọ hẹriẹ iẹe he.”+ 7 A tẹ nọe nọ: “O tẹ rrọ ere, kọ fikieme Mosis ọ rọ ta nọ a sae kẹ aye obe-udu orọo-ofa a vẹ se iẹe?”+ 8 Ọ tẹ ta kẹ ae nọ: “Fiki udu ogaga rai Mosis ọ rọ kẹ owhai uvẹ nọ wha sae se eyae rai,+ orọnikọ ere o rrọ no emuhọ ze he.+ 9 Mẹ be ta kẹ owhai nọ ohwo kpobi nọ ọ se aye riẹ o gbẹ rrọ fiki ọfariẹ-ogbe* he, ọ jẹ rehọ ọfa o bruẹnwae.”+

10 Ilele na e tẹ ta kẹe nọ: “Otẹrọnọ ere orọo o rrọ, kiyọ u fo ho re ohwo ọ rọo.” 11 Ọ tẹ ta kẹ ae nọ: “Orọnikọ ahwo kpobi a re ru epanọ wha ta na ha, ajokpaọ enọ i wo okẹ na ọvo.+ 12 Keme ejọ e riẹ nọ a yẹ ewharọ, yọ ejọ e riẹ nọ ahwo a ru ewharọ, yọ ejọ e riẹ nọ i ru omarai ewharọ fiki Uvie odhiwu. Jọ ọnọ ọ rẹ sai ru ere o ru ere.”+

13 Kẹsena a tẹ rehọ emaha ro sei re ọ rọ obọ kpahe ae jẹ lẹ kẹ ae, rekọ ilele na i te doku ae.+ 14 Rekọ Jesu ọ tẹ ta nọ: “Wha vu emaha na wa re a nyabru omẹ ze, wha whaha ae he, keme Uvie odhiwu o rrọ kẹ itieye na.”+ 15 Ọ tẹ rọ abọ riẹ kpahe ae, o te no etẹe.

16 Whaọ, rri! ohwo jọ ọ tẹ nyabru ei ze, ọ tẹ nọe nọ: “Owuhrẹ, oware uwoma vẹ me re ru hrọ re me wo uzuazọ ebẹdẹ bẹdẹ?”+ 17 Ọ tẹ ta kẹe nọ: “Fikieme whọ rọ nọ omẹ kpahe oware uwoma? Omọvo jọ ọvo o woma.+ Rekọ, otẹrọnọ whọ tẹ gwọlọ wo uzuazọ, gbẹ hai koko ijaje na.”+ 18 Ọ tẹ nọe nọ: “Ijaje vẹ?” Jesu ọ tẹ ta nọ: “Who re kpe ohwo vievie he,+ who re bruẹnwae vievie he,+ who re tho uji vievie he;+ who re se isẹri ọrue vievie he,+ 19 rọ ọghọ kẹ ọsẹ ra avọ oni ra,+ yọ who re you ọrivẹ ra wọhọ omobọ ra hrọ.”+ 20 Ọmoha na ọ tẹ ta kẹe nọ: “Mẹ be hai koko izi nana kpobi; eme ọfa o gbe kiọkọ nọ me re ru?” 21 Jesu ọ tẹ ta kẹe nọ: “Whọ tẹ gwọlọ jọ gbagba, nyae zẹ eyero ra re whọ rọ igho na kẹ iyogbe, who ve ti wo efe evaọ obọ odhiwu;+ whọ vẹ nyaze te jọ olele mẹ.”+ 22 Nọ ọmoha na o yo onana, ọ tẹ nyavrẹ uwuweri, keme o wo eyero buobu.+ 23 Kẹsena Jesu ọ tẹ ta kẹ ilele riẹ nọ: “Uzẹme mẹ be ta kẹ owhai inọ o te jọ bẹbẹ kẹ ọdafe re ọ ruọ Uvie odhiwu.+ 24 Mẹ be jẹ ta kẹ owhai nọ, o rẹ mae lọhọ re ekamẹle ọ nya eghogho ẹguede lafi viọ ọdafe nọ ọ rẹ ruọ Uvie Ọghẹnẹ.”+

25 Nọ ilele na i yo onana, u te gbe ai unu gaga, a tẹ be ta nọ: “Ono a te sai gine siwi?”+ 26 Jesu o te je rri rai kiọkiọkiọ, ọ tẹ ta kẹ ae nọ: “Rọkẹ ahwo, onana yọ oware nọ a rẹ sai ru hu, rekọ Ọghẹnẹ ọ rẹ sai ru eware kpobi.”+

27 Kẹsena Pita ọ tẹ ta nọ: “Rri! Ma nyasiọ eware kpobi ba ma te lele owhẹ; kọ erere vẹ o ti te omai?”+ 28 Jesu ọ tẹ ta kẹ ae nọ: “Uzẹme mẹ be ta kẹ owhai, evaọ okenọ a ti ru eware kpobi kpokpọ na, nọ Ọmọ ohwo ọ te keria agbara-uvie oruaro riẹ, whai enọ i lele omẹ wha te keria egbara-uvie ikpegbivẹ, ti bruoziẹ erua ikpegbivẹ Izrẹl.+ 29 Yọ ohwo kpobi nọ ọ nyasiọ iwou hayo inievo-emezae hayo inievo-emetẹ hayo ọsẹ hayo oni hayo emọ hayo etọ ba fiki odẹ mẹ o ti wo ai isia udhusoi (100), ọ vẹ te jẹ reuku uzuazọ ebẹdẹ bẹdẹ.+

30 “Rekọ ibuobu nọ e rrọ erọ ọsosuọ e te jọ erọ urere, erọ urere e vẹ te jọ erọ ọsosuọ.+

20 “Keme Uvie odhiwu o wọhọ olori uwou nọ ọ kpama evaọ irioke frifri nyae gwọlọ enọ i re ru iruo evaọ ọgbọ evaene riẹ.+ 2 Nọ ọ rọwo kẹ iruiruo na no inọ ọ te hwa ae dinariọs* ọvo evaọ okpẹdẹ, o te vi ai kpobọ ọgbọ evaene riẹ. 3 Nọ ọ wariẹ nya evaọ auwa avọ esa,* ọ tẹ ruẹ amọfa nọ a dikihẹ oria eki nọ a rehọ iruo ho; 4 ọ tẹ ta kẹ ae nọ, ‘Wha kpobọ ọgbọ evaene na re, mẹ te kẹ owhai oware kpobi nọ u fo.’ 5 Fikiere a tẹ nya. Ọ tẹ wariẹ nya evaọ auwa avọ ezeza* gbe auwa avọ izii,* o te ru epọvo na. 6 Ukuhọ riẹ, evaọ oware wọhọ auwa avọ ikpegbọvo,* ọ tẹ nya, ọ tẹ ruẹ amọfa nọ a dikihẹ, ọ tẹ ta kẹ ae nọ, ‘Fikieme wha ro dikihẹ etenẹ anwọ ohiohiẹ ababọ iruo?’ 7 A tẹ kẹ uyo nọ, ‘Fikinọ ohwo ọvo ọ rehọ omai iruo ho.’ Ọ tẹ ta kẹ ae nọ, ‘Wha kpobọ ọgbọ evaene na re.’

8 “Nọ owọwọ u te, ọnọ o wo ọgbọ evaene na ọ tẹ ta kẹ ọnọ ọ be rẹrote eyero riẹ nọ, ‘Se iruiruo na ze re whọ hwa ae osa rai,+ rehọ erọ urere na muhọ, whọ vẹ rehọ erọ ọsosuọ na kuhọ.’ 9 Nọ ahwo nọ a rehọ iruo evaọ auwa avọ ikpegbọvo na a nyaze, a tẹ kẹ ae omomọvo dinariọs* ọvo. 10 Fikiere nọ erọ ọsosuọ na e nyaze, a te roro nọ a te kẹ ae bu viere, rekọ dinariọs* ọvo a hwa kẹ ae omomọvo re. 11 Nọ a kẹ ae ugho na, a te muhọ ẹgo kpahe olori uwou na, 12 a tẹ ta nọ, ‘Auwa ọvo ahwo urere na a ru iruo; ghele na unuigho ovona whọ hwa kẹ ae avọ omai nọ i ru iruo okikpo evaọ uvo ogaga na!’ 13 Rekọ ọ tẹ kpahe kẹ omọvo rai jọ nọ, ‘Oko, me ru owhẹ thọ họ. Dinariọs* ọvo whọ rọwo kugbe omẹ, o gbẹ rrọ ere?+ 14 Rehọ osa ra re who kpo. Mẹ gwọlọ kẹ ahwo urere na unu ovona nọ mẹ kẹ owhẹ na. 15 Kọ me gbe wo udu nọ mẹ rẹ rọ rehọ eware obọmẹ ru onọ u je omẹ? Manikọ ubiẹro ra o be re ihri* fiki ewoma* nọ me ru?’+ 16 Enẹ erọ urere e te rọ jọ erọ ọsosuọ, erọ ọsosuọ e vẹ te jọ erọ urere.”+

17 Nọ a je kpobọ Jerusalẹm, Jesu o te se ilele ikpegbivẹ riẹ ruọ akotọ, ọ tẹ jọ edhere na ta kẹ ae nọ:+ 18 “Rri! Jerusalẹm ma bi kpohọ na, yọ a te rehọ Ọmọ ohwo kẹ ilori izerẹ gbe otu ikere-obe na. A ti bruoziẹ uwhu kpei,+ 19 a vẹ te rehọ iẹe kẹ ahwo erẹwho na re a rehọ iẹe jijehwẹ jẹ fae jẹ kare iẹe fihọ ure kpe;+ ẹdẹ avọ esa a vẹ kpare iẹe ze.”+

20 Kẹsena oni emezae Zẹbẹdi+ ọ tẹ nyabru Jesu ze avọ emezae riẹ, o te kigwẹ jẹ be yare iẹe oware jọ.+ 21 Ọ tẹ nọe nọ: “Eme whọ gwọlọ?” Aye na ọ tẹ kẹe uyo nọ: “Mẹ be yare nọ emezae ivẹ mẹ nana a keria kẹle owhẹ evaọ Uvie ra, ọjọ obọze ra ọdekọ ẹkpẹlobọ ra.”+ 22 Jesu ọ tẹ kẹ uyo nọ: “Wha riẹ oware nọ wha be yare na ha. Kọ wha sae da egho nọ mẹ be te da na?”+ A tẹ kẹ uyo nọ: “Ma sae dae.” 23 Ọ tẹ ta kẹ ae nọ: “Wha te ginẹ da egho mẹ,+ rekọ orọnọ mẹ ọ rẹ salọ enọ e rẹ keria obọze gbe ẹkpẹlobọ mẹ hẹ, rekọ oria yena o rrọ rọkẹ enọ Ọsẹ mẹ ọ ruẹrẹ e riẹ họ kẹ no.”+

24 Nọ ilele ikpe edekọ a yo kpahe iẹe, eva inievo ivẹ na e tẹ dha ae.+ 25 Rekọ Jesu o te se ae kẹle oma, ọ tẹ ta nọ: “Wha riẹ nọ isu erẹwho na i re ru omarai ilori kẹ enọ a bi su, yọ ahwo ologbo rai a rẹ rọ obọ ogaga su ae.+ 26 O rẹ jọ ere evaọ udevie rai vievie he;+ ukpoye, ohwo kpobi nọ ọ gwọlọ jọ ruaro evaọ udevie rai ọ rẹ jọ ọgbodibo rai hrọ,+ 27 yọ ohwo kpobi nọ ọ gwọlọ jọ ohwo ọsosuọ evaọ udevie rai ọ rẹ jọ ọrigbo rai hrọ.+ 28 Nwane wọhọ epanọ Ọmọ ohwo ọ nyaze na, orọnọ re a gbodibo kẹe he, rekọ re ọ gbodibo+ je siobọno uzuazọ* riẹ rọkẹ ẹtanigbo ahwo buobu.”+

29 Nọ a je no Jẹriko vrẹ, ogbotu ahwo buobu a te lele iei. 30 Rri! Ezae ivẹ jọ nọ i tuaro nọ e keria akotọ edhere na a te yo nọ Jesu ọ be nyavrẹ, a te bo nọ: “Olori, jọ ohrọ mai o re owhẹ, Ọmọzae Devidi!”+ 31 Rekọ ogbotu na a te doku ae, be ta kẹ ae nọ a fibo; ghele na a te bo ga viere, inọ: “Olori, jọ ohrọ mai o re owhẹ, Ọmọzae Devidi!” 32 Fikiere Jesu o te dikihẹ, o te se ae, ọ tẹ nọ ae nọ: “Eme wha gwọlọ nọ me ru kẹ owhai?” 33 A tẹ ta kẹe nọ: “Olori, joma mu ude họ ẹruẹ.” 34 Ohrọ rai o tẹ re Jesu, ọ tẹ rọ obọ te ibiaro rai,+ a tẹ nwani mu ude họ ẹruẹ, a te lele iei.

21 Nọ a kẹle Jerusalẹm no, a tẹ daji Bẹtfaji evaọ Ugbehru Olivi, Jesu o te vi ilele ivẹ riẹ uwou,+ 2 ọ ta kẹ ae nọ: “Wha kpohọ iwhre nọ wha be kparo ruẹ na, wha te nwane ruẹ eketekete avọ ọmọ riẹ nọ a thuru fihọ oria. Wha rra ufi no ae re wha rehọ ae se omẹ. 3 Otẹrọnọ ohwo jọ ọ tẹ ta ẹme jọ kẹ owhai, wha rẹ ta nọ, ‘Olori na ọ gwọlọ e rai.’ Ọ vẹ te nwane kẹ owhai uvẹ re wha rehọ ae ze.”

4 Onana o via re oware nọ a rehọ ọruẹaro na ta o ruẹsi rugba, ọnọ ọ ta nọ: 5 “Wha ta kẹ ọmọtẹ Zayọn nọ: ‘Rri! Ovie ra ọ be nyabru owhẹ ze,+ ọ rrọ wowolẹ+ yọ ọ keria ehru eketekete, ẹhẹ, ọmọ eketekete.’”+

6 Fikiere ilele na e tẹ nya, a te ru epanọ Jesu ọ ta kẹ ae na dẹẹ.+ 7 A tẹ rehọ eketekete na avọ ọmọ riẹ ze, a te fi iwu ehru rai họ ehru rai, Jesu ọ tẹ keria ehru iwu na.+ 8 Ibuobu evaọ ogbotu na a tẹ rehọ iwu ehru rai hwa edhere,+ yọ efa e be gbẹre eya-iriẹ jẹ be rehọ ae hwa edhere. 9 U te no ere no, ogbotu ahwo nọ a rrọ aro riẹ gbe enọ e rọ kpahe iẹe a je bo nọ: “Ma lẹ nọ, siwi Ọmọzae Devidi!+ Oghale u te ọnọ ọ be rọ odẹ Jihova* nyaze!+ Ma lẹ nọ, siwi ei, O ọnọ ọ rrọ obọ idhiwu na!”+

10 Nọ ọ ruọ Jerusalẹm, okpẹwho na soso o te duwuku, a tẹ be nọ nọ: “Kinọ ono?” 11 Ogbotu ahwo nọ a je lele iei na a tẹ be ta nọ: “Ọna họ Jesu ọruẹaro na,+ ọnọ o no Nazarẹt obọ Galili ze!”

12 Jesu ọ tẹ ruọ etẹmpol na, o te le ahwo kpobi nọ a jẹ zẹ eware gbe enọ e jẹ dẹ evaọ etẹmpol na ruọ otafe, o te gele emẹjẹ inwene-igho na kie gbe ekpala enọ e jẹ zẹ irueruẹ.+ 13 Ọ tẹ ta kẹ ae nọ: “A kere nọ, ‘A re ti se uwou mẹ uwou olẹ,’+ rekọ wha ru rie fihọ eghogho-utho iwhewheriwhe no.”+ 14 Ofariẹ, ahwo nọ i tuaro gbe enọ e ko a tẹ nyabru ei ze evaọ etẹmpol na, o te siwi ai.

15 Nọ ilori izerẹ na gbe otu ikere-obe na a ruẹ eware igbunu nọ o ru, gbe emezae na nọ i bi bo evaọ etẹmpol na nọ, “Ma lẹ nọ, siwi Ọmọzae Devidi!”+ eva e tẹ dha ae,+ 16 a tẹ ta kẹe nọ: “Kọ who bi yo ẹme nọ emọ nana a be ta na?” Jesu ọ tẹ ta kẹ ae nọ: “Ee. Kọ wha ri se onana inọ, ‘Whọ rehọ unu emaha gbe emọboba wha ujiro ze’?”+ 17 Ọ tẹ nyase ae ba, o te no okpẹwho na kpobọ Bẹtani, ọ tẹ wezẹ etẹe.+

18 Nọ o je zihe kpobọ okpẹwho na evaọ irioke frifri, ohọo u te je kpei.+ 19 Ọ tẹ kparo ruẹ ure ifigi jọ evaọ akotọ edhere na, ọ tẹ nyate ure na, rekọ ọ jariẹ ruẹ ubi hi ajokpaọ ebe ọvo,+ ọ tẹ ta kẹe nọ: “Whọ te gbẹ mọ ubi ofa ha.”+ Ure ifigi na o tẹ nwani lo no. 20 Nọ ilele na e ruẹ onana, u te gbe ae unu, a tẹ ta nọ: “Ẹvẹ ure ifigi na o sae rọ nwani lo no?”+ 21 Jesu ọ tẹ kẹ ae uyo nọ: “Uzẹme mẹ be ta kẹ owhai, otẹrọnọ wha te wo ẹrọwọ, nọ wha gbẹ vro ho, orọnikọ oware nọ me ru ure ifigi na ọvo wha te sai ru hu, rekọ nọ wha tẹ tubẹ ta kẹ ugbehru nana nọ, ‘Kparoma re whọ nyai kie fihọ abade na,’ o te via ere.+ 22 Yọ eware kpobi nọ wha yare evaọ olẹ, wha te wo ẹrọwọ, i ti te owhai obọ.”+

23 Nọ ọ ruọ etẹmpol na no, ilori izerẹ na gbe ekpako ahwo na e tẹ nyabru ei ze okenọ o je wuhrẹ ahwo, a tẹ nọe nọ: “Udu vẹ who bi ro ru eware nana? Kọ ono ọ kẹ owhẹ udu nana?”+ 24 Jesu ọ tẹ kpahe kẹ ae nọ: “Mẹ te nọ owhai onọ jọ re. Wha tẹ kẹ omẹ uyo riẹ, mẹ te vuẹ owhai udu nọ me bi ro ru eware nana re: 25 Bovẹ udu nọ Jọn ọ jẹ rọ họ ahwo ame u no ze? Obọ odhiwu manikọ obọ ahwo?”* Rekọ a te mu omoma rai họ ẹta kẹ nọ: “Otẹrọnọ ma tẹ ta nọ, ‘Obọ odhiwu,’ ọ te ta kẹ omai nọ, ‘Emejabọ wha gbẹ rọwo iẹe he?’+ 26 Rekọ otẹrọnọ ma tẹ ta nọ, ‘Obọ ahwo,’ ma riẹ onọ ogbotu na o ti ru hu, keme aikpobi a rehọ Jọn fihọ ọruẹaro.” 27 Fikiere a tẹ kẹ Jesu uyo nọ: “Ma riẹ hẹ.” Ọyomariẹ ọ tẹ ta kẹ ae re nọ: “Mẹ be vuẹ owhai udu nọ me bi ro ru eware nana gbe he.

28 “Ẹvẹ wha roro? Ọzae jọ o wo emọ ivẹ. Nọ ọ nyabru ọrọ ọsosuọ, ọ tẹ ta kẹe nọ, ‘Ọmọ mẹ, nyae jọ ọgbọ evaene na ru iruo nẹnẹ.’ 29 Ọ tẹ kẹ uyo nọ, ‘Mẹ be nya ha,’ rekọ uwhremu na, o tẹ dae, ọ tẹ nya. 30 Nọ ọ nyabru ọmọ avọ ivẹ, ọ tẹ ta ẹme ọvona kẹe. Ọmọ nana ọ tẹ kpahe kẹe nọ, ‘Mẹ te nya, Baba,’ rekọ ọ nya ha. 31 Ọvẹ evaọ usu ivẹ na o ru oreva ọsẹ riẹ?” A tẹ ta nọ: “Ọrọ ọsosuọ na.” Jesu ọ tẹ ta kẹ ae nọ: “Uzẹme mẹ be ta kẹ owhai inọ enọ i re mi osa-uzou gbe igberẹ a bi mi owhai aro no nyae ruọ Uvie Ọghẹnẹ. 32 Keme Jọn ọ nyabru owhai ze evaọ edhere ẹrẹreokie, rekọ wha rọwo e riẹ hẹ. Rekọ enọ i re mi osa-uzou gbe igberẹ na e rọwo e riẹ,+ yọ dede nọ wha ruẹ onana, o da owhai ghele he re wha rọwo iẹe.

33 “Wha gaviezọ kẹ ọtadhesẹ ọfa: Ọzae jọ ọ jariẹ nọ o wo otọ, ọnọ ọ kọ ọgbọ evaene+ je di ogba wariẹe họ, yọ ọ tọ ọgọdọ udi-uruo fihọ iẹe, ọ tẹ jẹ bọ uwou ukpehru fihọ iẹe;+ kẹsena ọ tẹ rehọ iẹe kẹ enọ e rẹ rẹrotei, o te kpohọ erẹ evaọ orẹwho ọfa.+ 34 Nọ ezi nọ ibi na e rẹ rọ ware u te, o te vi erigbo riẹ bru enọ e be rẹrote ọgbọ na re a kọrọ ibi riẹ sei. 35 Rekọ enọ e be rẹrote ọgbọ na a te kru erigbo na, a te kpe ọjọ ukpe igbabọ, a te kpe ọjọ whu, a tẹ rọ itho fi ọjọ kpe.+ 36 Ọ tẹ wariẹ vi erigbo efa, bu vi erọ ọsosuọ na, rekọ a te ru ai epọvo na.+ 37 Ukuhọ riẹ, o te vi ọmọzae riẹ bru ae, inọ ‘A te kẹ ọmọzae mẹ adhẹẹ.’ 38 Nọ enọ e be rẹrote ọgbọ na a ruẹ ọmọzae na, a tẹ ta kẹ omoma rai nọ, ‘Ọnana họ ọreuku na.+ Wha nyaze ma kpei no re ma rehọ ukuoriọ riẹ!’ 39 Fikiere a te kru ei, a te gele iei ruọ otafe ọgbọ evaene na, a te kpei no.+ 40 Nọ ohwo nọ o wo ọgbọ evaene na ọ tẹ nyaze, eme o ti ru enọ e be rẹrote ọgbọ na?” 41 A tẹ ta kẹe nọ: “Fikinọ a rrọ muomu, o ti kpe ai muotọ, ọ vẹ rehọ ọgbọ evaene na kẹ amọfa, enọ e te kọrọ ibi na kẹe evaọ ezi rai.”

42 Jesu ọ tẹ ta kẹ ae nọ: “Kọ wha re jọ Ikereakere na se, inọ, ‘Utho nọ ebebabọ na e se, oye u zihe ruọ utho ubienẹ nọ o mai wuzou* no na.+ Obọ Jihova* onana u no ze, yọ u woma gaga evaọ aro mai’?+ 43 Oyejabọ nọ mẹ be rọ ta kẹ owhai nọ a ti mi owhai Uvie Ọghẹnẹ no, a vẹ rehọ iẹe kẹ orẹwho nọ o be mọ ibi riẹ. 44 Ofariẹ, ohwo nọ o kie fihọ ehru utho nana o ti bru ibribro.+ Yọ ohwo kpobi nọ utho na u kie fihọ, o te pẹhẹ iẹe no.”+

45 Nọ ilori izerẹ na gbe otu Farisi na a yo etadhesẹ riẹ, a riẹ nọ ae omarai ọ be ta kpahe.+ 46 Dede nọ a jẹ gwọlọ epanọ a re ro kru ei,* a dhozọ ogbotu na keme a riẹ nọ a rehọ e riẹ fihọ ọruẹaro.+

22 Jesu ọ tẹ wariẹ rehọ etadhesẹ ta ẹme kẹ ae, inọ: 2 “A sae rehọ Uvie odhiwu dhesẹ ovie nọ o se ehaa orọo+ kẹ ọmọzae riẹ. 3 O te vi erigbo riẹ nyai se enọ a zizie kẹ ehaa orọo na, rekọ a rọwo nọ a rẹ nyaze he.+ 4 Ọ tẹ wariẹ vi erigbo efa nya, inọ, ‘Ta kẹ enọ a zizie na nọ: “Rri! Mẹ ruẹrẹ emu kpahe no, me kpe iruẹ gbe erao epoporiẹ mẹ, yọ a ruẹrẹ eware kpobi họ no. Wha nyaze ehaa orọo na.”’ 5 Rekọ a daezọ họ, a te kpohọ ọvuọ oboriẹ, ọjọ o kpobọ udhu riẹ, ọfa o kpohọ okọ riẹ;+ 6 rekọ enọ i kiọkọ i te kru erigbo riẹ na, a te gboja kẹ ae, a te kpe ai no.

7 “Ofu o te mu ovie na, o te vi egbaẹmo riẹ, a te kpe enọ i kpe erigbo riẹ na jẹ mahe okpẹwho rai.+ 8 Kẹsena ọ tẹ ta kẹ erigbo riẹ nọ, ‘Ma ruẹrẹ eware họ kẹ ehaa orọo na no, rekọ enọ a zizie na a fo* ahwo nọ a rẹ jọ ehaa orọo na ha.+ 9 Fikiere, wha kpobọ idhere nọ a re ro no okpẹwho na, re wha zizie ohwo kpobi nọ wha ruẹ ziọ ehaa orọo na.’+ 10 Fikiere erigbo na e tẹ nya kpobọ idhere na, a te se ahwo kpobi nọ a ruẹ ze, te ahwo omuomu te ahwo owoma; uwou ehaa orọo na o tẹ vọ avọ ahwo nọ a be re jẹ da.*

11 “Nọ ovie na ọ ruọ eva te kiẹ ahwo na riwi, ọ tẹ ruẹ ọzae jọ nọ o ku ewu ehaa orọo họ họ. 12 Ọ tẹ nọe nọ, ‘Ọzae, ẹvẹ whọ sae rọ ruọ eva etenẹ ababọ ewu ehaa orọo nọ who ku họ?’ Ọ sae kpahe ẹme he. 13 Kẹsena ovie na ọ tẹ ta kẹ idibo riẹ nọ, ‘Wha gbae abọ gbe awọ re wha gbolo iei fihọ ebi obọ otafe. Etẹe ọ te jọ viẹ jẹ rowo akọ.’

14 “Keme ibuobu a zizie, rekọ umutho a salọ.”

15 Kẹsena otu Farisi na a tẹ nyae lẹlẹ gba ẹgwae epanọ a sae rọ rehọ ẹmeunu riẹ kru ei.+ 16 Fikiere a te vi ilele rai gbe ahwo utu Herọd bru ei,+ inọ: “Owuhrẹ, ma riẹ nọ whọ rẹ ta uzẹme je bi wuhrẹ edhere Ọghẹnẹ evaọ uzẹme, yọ who re ru eware rọ gwọlọ aruoriwo ohwo ọvo ho, keme who re rri oghẹrẹ nọ ahwo a rrọ evaọ okafe he. 17 Fikiere, ta kẹ omai, ẹvẹ who roro? Kọ u fo* re a hwa osa-uzou kẹ Siza manikọ u fo ho?” 18 Rekọ fikinọ Jesu ọ riẹ iroro imuomu rai, ọ tẹ ta nọ: “Emejabọ wha be rọ dawo omẹ, eviẹwẹ na? 19 Wha dhesẹ ubiugho nọ a rẹ rọ hwa osa-uzou na kẹ omẹ.” A tẹ rehọ dinariọs* sei. 20 Ọ tẹ nọ ae nọ: “Nọ uwoho gbe odẹ ono?” 21 A tẹ ta nọ: “Erọ Siza.” Ọ tẹ ta kẹ ae nọ: “Fikiere, wha hwa eware Siza zihe kẹ Siza, rekọ eware Ọghẹnẹ kẹ Ọghẹnẹ.”+ 22 Nọ a yo onana u te gbe ai unu, a tẹ nyase iẹe ba.

23 Evaọ ẹdẹ yena, otu Sadusi, enọ e rẹ ta nọ ẹkparomatha ọ rrọ họ+ a tẹ nyaze, a tẹ nọe nọ:+ 24 “Owuhrẹ, Mosis ọ ta nọ: ‘Otẹrọnọ ọzae o whu ababọ emọ nọ o yẹ, oniọvo riẹ ọ rẹ rehọ aye riẹ re ọ ruẹsi yẹ emọ kẹ oniọvo riẹ nọ o whu no na.’+ 25 Whaọ, inievo ihrẹ jọ e jariẹ. Ọrọ ọsosuọ o wo aye o te ti whu siọ aye na ba, yọ fikinọ o yẹ ọmọ họ, oniọvo riẹ ọ tẹ rehọ aye na. 26 Ọrọ avọ ivẹ na o te je whu siọ aye na ba ababọ emọ. Ere ọvona o via kẹ ọrọ avọ esa rite ọrọ avọ ihrẹ. 27 Ukuhọ riẹ, aye na o te whu. 28 Fikiere, evaọ ẹkparomatha na, ọvẹ evaọ usu inievo ihrẹ na ọ te rehọ aye na? Keme ọ jọ aye kẹ aikpobi na.”

29 Jesu ọ tẹ kpahe kẹ ae nọ: “Wha bi roro thọ keme wha riẹ Ikereakere na hayo ogaga Ọghẹnẹ hẹ;+ 30 keme evaọ ẹkparomatha na, ezae i ti wo eyae he, yọ a te rọ eyae kpohọ orọo ho, rekọ a te jọ wọhọ ikọ-odhiwu.+ 31 Rọ kpahe ẹkparomatha enọ i whu no, kọ wha ri se ẹme nọ Ọghẹnẹ ọ ta kẹ owhai, inọ: 32 ‘Mẹ họ Ọghẹnẹ Abraham gbe Ọghẹnẹ Aiziki gbe Ọghẹnẹ Jekọp’?+ Ọ rrọ Ọghẹnẹ enọ i whu no ho, rekọ ọrọ enọ e rrọ uzuazọ.”+ 33 Nọ ogbotu na a yo onana, ewuhrẹ riẹ o te gbe ai unu.+

34 Nọ otu Farisi na a yo nọ Jesu ọ ta eme nọ i ru otu Sadusi na ruru unu, aikpobi a te kuomagbe nyabru ei ze. 35 Omọvo rai jọ nọ ọ riẹ Uzi na lafi ọ tẹ nọe onọ rọ dawo iẹe, inọ: 36 “Owuhrẹ, ujaje vẹ o mae rro evaọ Uzi na?”+ 37 Ọ tẹ ta kẹe nọ: “‘Whọ rẹ rehọ udu ra kpobi gbe uzuazọ* ra kpobi gbe iroro ra kpobi ro you Jihova* Ọghẹnẹ ra hrọ.’+ 38 Onana họ ujaje nọ o mae rro gbe orọ ọsosuọ. 39 Orọ avọ ivẹ, nọ o wọhọ e riẹ ona: ‘Who re you ọrivẹ ra wọhọ omobọ ra hrọ.’+ 40 Ijaje ivẹ nana Uzi na soso gbe eme Eruẹaro na e roma hwa.”+

41 Whaọ nọ otu Farisi na a kokohọ, Jesu ọ tẹ nọ ae nọ:+ 42 “Eme wha roro kpahe Kristi na? Ọmọ ono ọ rrọ?” A tẹ ta kẹe nọ: “Ọmọzae Devidi.”+ 43 Ọ tẹ nọ ae nọ: “O tẹ rrọ ere, kọ ẹvẹ Devidi o ro sei Olori okenọ ẹzi ọfuafo ọ wọe+ ta ẹme kpahe iẹe, inọ, 44 ‘Jihova* ọ ta kẹ Olori mẹ nọ: “Keria obọze mẹ bẹsenọ me re fi ewegrẹ ra họ otọ awọ ra”’?+ 45 Otẹrọnọ Devidi o se rie Olori, kọ ẹvẹ ọ rọ rrọ ọmọzae riẹ?”+ 46 Ohwo ọvo ọ sae kpahe ẹme ọvo kẹe he, yọ no umuo ẹdẹ yena vrẹ, ohwo ọvo ọ gbẹ dawo iẹe nọe onọ ofa ha.

23 Kẹsena Jesu ọ tẹ ta kẹ ogbotu na gbe ilele riẹ nọ: 2 “Otu ikere-obe na gbe otu Farisi na a rehọ omarai mu ọkwa Mosis. 3 Fikiere, wha ru je koko eware kpobi nọ a be ta kẹ owhai, rekọ wha rọ aro kele uruemu rai hi, keme a rẹ ta rekọ a re ru oware nọ a be ta ha.+ 4 A re kru ewha egbẹgbẹdẹ, a vẹ wọ ae họ ikoko ahwo,+ rekọ ae omarai a rẹ rọwo rehọ uziobọ rai te ai hi.+ 5 Eware kpobi nọ a re ru, a re ru ai re ahwo a ruẹ e rai,+ keme a re ru ẹmẹkpẹti ikereakere rai kẹkẹe, onọ a rẹ wha wọhọ ekpọfia,*+ a re je ru efọlefọ iwu rai thethei.+ 6 A rẹ gwọlọ keria eria nọ e mai kpehru evaọ ehaa gbe egbara obaro* evaọ isinagọgo,*+ 7 yọ a rẹ gwọlọ nọ ahwo a yere ai evaọ eria eki, re a je se ae Rabae.* 8 Rekọ, rọkẹ owhai, wha jọ ohwo ọvo o se owhai Rabae he, keme ọvuọvo họ Owuhrẹ rai,+ yọ whai kpobi inievo. 9 Ofariẹ, wha se ohwo ọvo ọsẹ rai evaọ otọakpọ họ, keme ọvuọvo họ Ọsẹ rai,+ Ọnọ ọ rrọ obọ odhiwu na. 10 Jọ a se owhai isu gbe he, keme ọvuọvo họ Osu rai, Kristi na. 11 Rekọ ọnọ ọ mae rro evaọ udevie rai ọ rẹ jọ ọgbodibo rai.+ 12 Ohwo kpobi nọ ọ be kpare omariẹ kpehru a ti hrẹ riẹ kpotọ,+ yọ ohwo kpobi nọ ọ be rọ omariẹ kpotọ a te kpare iẹe kpehru.+

13 “Uye u te owhai, whai otu ikere-obe gbe otu Farisi, eviẹwẹ na! keme wha kare ẹthẹ Uvie odhiwu dhe ahwo; whai omarai wha be ruọ ẹe he, yọ wha be kẹ enọ e gwọlọ ruọ ẹe uvẹ re a ruọ ẹe he.+ 14 *——

15 “Uye u te owhai, whai otu ikere-obe gbe otu Farisi, eviẹwẹ na!+ keme wha re bi abade soso re jẹ nya ugbothabọ re wha ruẹsi ku omọvo rẹriẹ,* nọ o je kurẹriẹ no, wha ve ru ei jọ ọnọ o fo kẹ Gehena* akuava tube vi owhai omarai dede.

16 “Uye u te owhai, whai isu ituaro,+ enọ e rẹ ta nọ, ‘Otẹrọnọ ohwo ọ be rehọ etẹmpol na duwu iyei, o rrọ okpoware ovo ho; rekọ otẹrọnọ ohwo ọ be rehọ igoru nọ e rrọ etẹmpol na duwu iyei, uzi o gba riẹ.’+ 17 Igheghẹ nọ i tuaro! Ovẹ o ginẹ mae rro, igoru na manikọ etẹmpol na nọ u ru igoru na họ ọrẹri? 18 Wha rẹ jẹ ta nọ, ‘Otẹrọnọ ohwo ọ be rehọ agbada-idhe na duwu iyei, o rrọ okpoware ovo ho; rekọ otẹrọnọ ohwo ọ be rehọ okẹ nọ o rrọ ehru riẹ duwu iyei, uzi o gba riẹ.’ 19 Ituaro na! Ovẹ o ginẹ mae rro, okẹ na manikọ agbada-idhe na nọ u re ru okẹ na họ ọrẹri? 20 Fikiere, ohwo kpobi nọ ọ be rehọ agbada-idhe na duwu iyei, ọ be rehọ agbada-idhe na gbe eware kpobi nọ e rrọ ehru riẹ duwu iyei; 21 yọ ohwo kpobi nọ ọ be rehọ etẹmpol na duwu iyei, ọ be rehọ etẹmpol na gbe Ọnọ ọ be rriae duwu iyei;+ 22 yọ ohwo kpobi nọ ọ be rehọ odhiwu duwu iyei, ọ be rehọ agbara-uvie Ọghẹnẹ gbe Ọnọ ọ keria eva riẹ duwu iyei.

23 “Uye u te owhai, whai otu ikere-obe gbe otu Farisi, eviẹwẹ na! keme wha rẹ kẹ abọvo abakpe ọrọ mint gbe dil gbe kumin,*+ rekọ wha gbabọkẹ eware nọ e mai wuzou evaọ Uzi na no, koyehọ, uvioziẹ+ gbe ohrọ+ gbe ọtẹruo. U fo re a ru eware nana, rekọ orọnọ a re gbabọkẹ eware edekọ na ha.+ 24 Isu ituaro,+ enọ i re nwo otọle kufiẹ+ rekọ a ve si ekamẹle lọ!+

25 “Uye u te owhai, whai otu ikere-obe gbe otu Farisi, eviẹwẹ na! keme wha rẹ wozẹ uke egho gbe uke omodhe,+ rekọ obeva rai o vọ avọ uvou-uthei*+ gbe isiuru iyoma.+ 26 Whẹ ohwo Farisi otuaro na, kake wozẹ obeva egho gbe obeva omodhe na fo, re uke riẹ o ruẹse fo re.

27 “Uye u te owhai, whai otu ikere-obe gbe otu Farisi, eviẹwẹ na!+ keme wha wọhọ iki nọ a rọ ọda ọfuafo ralọ,+ enọ ehru rai e rẹ jọ wowoma, rekọ obeva rai e vọ avọ igbenwa ahwo nọ a whu no gbe oghẹrẹ egbegbe kpobi. 28 Ere ọvona re, evaọ okafe wha wọhọ ahwo nọ a kiẹrẹe evaọ aro ahwo, rekọ evaọ obeva, wha vọ avọ eviẹhọ gbe emuemu.+

29 “Uye u te owhai, whai otu ikere-obe gbe otu Farisi, eviẹwẹ na!+ keme wha be bọ iki eruẹaro na jẹ be whẹ erru họ iki* enọ i kiẹrẹe na,+ 30 yọ wha be ta nọ, ‘Ma hae jariẹ evaọ oke esẹ-esẹ mai, ma hai kuomagbe ai kpe azẹ eruẹaro na ha.’ 31 Fikiere, wha bi se isẹri kpe omarai inọ whai yọ emọ enọ i kpe eruẹaro na.+ 32 Nọ o rrọ ere na, wha ru onọ esẹ-esẹ rai i muhọ na te oka.

33 “Eraomuomu, emọ eriwhẹ,+ ẹvẹ wha te sae rọ dhẹ vabọ no obrukpe Gehena?*+ 34 Fiki onana, me bi vi eruẹaro+ gbe ahwo iwareghẹ gbe iwuhrẹ se owhai.+ Wha ti kpe jẹ kare ejọ fihọ ure kpe,+ wha te fa ejọ+ evaọ isinagọgo* rai je kpokpo ai+ no okpẹwho ruọ okpẹwho, 35 re azẹ ahwo okiẹrẹe kpobi nọ a kpe no evaọ akpọ na ọ ruẹse jọ owhai uzou, no azẹ Ebẹle+ ohwo okiẹrẹe na rite azẹ Zẹkaraya ọmọzae Barakaya, ọnọ wha kpe evaọ udevie aruẹri na avọ agbada-idhe na.+ 36 Uzẹme mẹ be ta kẹ owhai, eware nana kpobi i ti te oge nana.

37 “Jerusalẹm, Jerusalẹm, ọnọ o re kpe eruẹaro na jẹ rọ itho fi enọ a vi sei+—unuẹse buobu mẹ jẹ gwọlọ koko emọ ra họ epanọ ovu o re koko emọ riẹ họ otọ ibekpe riẹ! Rekọ wha rọwo ho.+ 38 Rri! A nyasiọ uwou rai ba kẹ owhai no.*+ 39 Keme mẹ be ta kẹ owhai nọ, wha te gbẹ ruẹ omẹ ofa vievie he bẹsenọ wha rẹ ta nọ, ‘Oghale u te ọnọ ọ be rọ odẹ Jihova* nyaze!’”+

24 Whaọ epanọ Jesu o je ro no etẹmpol na vrẹ na, ilele riẹ e tẹ nyabru ei ze, a te bi dhesẹ iwou etẹmpol na soso kẹe. 2 Ọ tẹ ta kẹ ae nọ: “Kọ wha be ruẹ eware nana kpobi na? Uzẹme mẹ be ta kẹ owhai, a te nyasiọ utho ovo ba ehru utho evaọ etenẹ na vievie he nọ a ti kporo fihọ otọ họ.”+

3 Nọ ọ keria ehru Ugbehru Olivi, ilele na ọvo e tẹ nyabru ei, a tẹ ta nọ: “Ta kẹ omai, oke vẹ eware nana e te rọ via, kọ eme ọ te jọ oka ọzino*+ ra gbe orọ oke urere uyero-akpọ* na?”+

4 Jesu ọ tẹ kẹ ae uyo nọ: “Wha muẹrohotọ re ohwo ọvo ọ siọ owhai ba esuthọ,+ 5 keme ibuobu e te rọ odẹ mẹ nyaze, ta nọ, ‘Mẹ họ Kristi na,’ a ve ti su ibuobu thọ.+ 6 Wha ti yo edo emo gbe usi emo. Wha jọ ozọ u mu owhai hi, keme eware nana e rẹ via hrọ, rekọ ekuhọ na o ri te he.+

7 “Keme orẹwho o te kpareso orẹwho, uvie o te kpareso uvie,+ yọ no oria ruọ oria ohọo u ti mu,+ etọ i ti nuhu.+ 8 Enana kpobi yọ emuhọ eware nọ e te wha edada ze.*

9 “Ahwo a ti kpokpo owhai+ je ti kpe owhai,+ yọ erẹwho na kpobi i ti mukpahe owhai fiki odẹ mẹ.+ 10 Ofariẹ, ibuobu i ti zoruẹ je ti vivie ohwohwo je mukpahe ohwohwo. 11 Eruẹaro erue buobu e te romavia a ve ti su ibuobu thọ;+ 12 yọ fiki epanọ emuemu o ti vihọ, uyoyou ibuobu u ti kiekpo.* 13 Rekọ ọnọ o thihakọ te urere a ti siwi ei.+ 14 Yọ a te ta usi uwoma Uvie na evaọ akpọ na soso re o jọ isẹri kẹ erẹwho na kpobi,+ kẹsena urere na o vẹ te ze.

15 “Fikiere, nọ wha tẹ ruẹ oware otọtọ nọ o rẹ wha ọraha ze na, onọ Daniẹl ọruẹaro na ọ ta kpahe na, nọ u dikihẹ oria ọrẹri+ (jọ ọnọ o bi se eme nana ọ rehọ orimuo wo otoriẹ rai), 16 jọ enọ e rrọ Judia a mu obọ igbehru na họ ẹdhẹ kpohọ.+ 17 Jọ ohwo nọ ọ rrọ ehru uwou* ọ ziọ otọ te kwa eware uwou riẹ hẹ, 18 jọ ohwo nọ ọ rrọ obọ ẹwọ o zihe ze te tọlọ ewu ehru riẹ hẹ. 19 U ti yoma gaga kẹ eyae nọ i dihọ gbe enọ i wo emọ unuevie evaọ edẹ yena! 20 Wha hae lẹ nọ oke nọ wha te rọ dhẹ u kie fihọ ezi ekpahe hayo ẹdẹ Ẹdijala ha; 21 keme oke yena uye ulogbo o te jọ,+ utionọ o re via no emuhọ akpọ na ze he, ijo, o gbẹ te via ofa ha.+ 22 Evaọ uzẹme, a gbe bru edẹ yena kpẹre he, uwo ovo o te zọ họ; rekọ fiki enọ a salọ na, a ti bru edẹ yena kpẹre.+

23 “Fikiere, otẹrọnọ ohwo jọ ọ tẹ ta kẹ owhai nọ, ‘Rri! Kristi na ọ rrọ etenẹ,’+ hayo, ‘Ọye ọ rrọ obei na!’ wha rọwo ho.+ 24 Keme Kristi erue gbe eruẹaro erue+ e te romavia, a ve ti ru eware eka ilogbo gbe iruo igbunu re a su ahwo thọ,+ otẹrọnọ o rẹ lọhọ, makọ enọ a salọ na dede. 25 Rri! Mẹ vẹvẹ owhai unu no. 26 Fikiere, ahwo a tẹ be ta kẹ owhai nọ, ‘Rri! Ọ rrọ obọ udhude,’ wha nya ha; ‘Rri! Ọ rrọ obọ ukpẹ,’ wha rọwo ho.+ 27 Keme nwane wọhọ epanọ elo egbrara o re lo no obọ ovatha-ọre ruọ obọ ukiediwo-ọre na, ere ọzino* Ọmọ ohwo ọ te jọ.+ 28 Oria kpobi nọ ori ọ rrọ, etẹe igo* i re kokohọ.+

29 “Nọ uye edẹ yena o tẹ nwane vrẹ no, ọre na o ti muebi,+ ọvẹre na o ti lo ho, isi na i ti kie no obọ ehru ze, yọ egaga obọ idhiwu na i ti nuhu.+ 30 Kẹsena oka Ọmọ ohwo o vẹ te romavia evaọ obọ ehru, erua otọakpọ na kpobi e vẹ te rọ abọ tehe igbama rai avọ uweri,+ yọ a te ruẹ Ọmọ ohwo+ nọ ọ be nyaze evaọ ẹgho odhiwu avọ ogaga gbe oruaro ulogbo.+ 31 O ve ti vi ikọ-odhiwu riẹ avọ edo ọgba ologbo, a ve ti koko eriẹ nọ a salọ na họ no ifou ene na ze, no oka jọ idhiwu na rite oka odekọ.+

32 “Enẹna, wha wuhrẹ ọtadhesẹ nana no ure ifigi ze: Nọ egha eboba riẹ e tẹ nwane whẹ ebe họ no, yọ wha riẹ nọ ezi ivo ọ kẹle no.+ 33 Ere owhai re, okenọ wha te ruẹ eware nana kpobi, wha riẹ nọ ọ kẹle no, ọ rrọ inuethẹ na.+ 34 Uzẹme mẹ be ta kẹ owhai inọ oge ọnana ọ te vrẹ vievie he bẹsenọ eware nana kpobi e rẹ via no. 35 Odhiwu gbe otọakpọ e te vrẹ, rekọ eme mẹ e te vrẹ vievie he.+

36 “Kpahe ẹdẹ gbe auwa yena ohwo ọvo ọ riẹ riẹ hẹ,+ makọ ikọ-odhiwu hayo Ọmọ na dede, rekọ Ọsẹ na ọvo.+ 37 Keme nwane wọhọ epanọ o jọ evaọ edẹ Noa,+ ere ọzino* Ọmọ ohwo ọ te jọ re.+ 38 Keme wọhọ epanọ o jọ evaọ oke yena taure Owhe na o te ti ku, a jẹ re a jẹ da, ezae e jẹ rọo, yọ a jẹ rọ eyae kpohọ orọo, bọo ẹdẹ nọ Noa ọ rọ ruọ eva okọ na,+ 39 a muẹrohọ họ bẹsenọ Owhe na ọ rọ ze, o te kpe ai kpobi no,+ ere ọzino* Ọmọ ohwo ọ te jọ. 40 Evaọ oke yena, ezae ivẹ e te jọ evaọ udhu; a te rehọ ọvo vrẹ, a vẹ nyasiọ ọdekọ ba. 41 Eyae ivẹ i ti wuhu eware evaọ oria nọ a rẹ jọ rọ obọ wuhu eware; a te rehọ ọvo vrẹ a vẹ nyasiọ ọdekọ ba.+ 42 Fikiere, wha ruabọhọ erou,* keme wha riẹ ẹdẹ nọ Olori rai ọ be nyaze he.+

43 “Rekọ wha riẹ onana: O hae jọ nọ ọnọ o wo uwou na ọ riẹ oke nọ oji na ọ be rọ nyaze,*+ ọ hai kpe aro fihọ, ọ hae kuvẹ hẹ re oji na o kporo uwou riẹ ruọ eva.+ 44 Fiki onana, whai omarai wha ruẹrẹ oma kpahe,+ keme Ọmọ ohwo ọ te nyaze evaọ auwa nọ wha roro ho.

45 “Kọ ginọ ono họ ọrigbo nọ a re fievahọ nọ o wo areghẹ* na, ọnọ olori riẹ o ro mu inọ ọ rẹrote idibo uwou riẹ, re ọ rehọ emu kẹ ae evaọ ẹruoke?+ 46 Eva e were ọrigbo yena otẹrọnọ olori riẹ ọ nyaze di ei họ nọ o bi ru ere!+ 47 Uzẹme mẹ be ta kẹ owhai, ọ te rehọ iẹe mu ọnọ ọ rẹ rẹrote eyero riẹ kpobi.

48 “Rekọ otẹrọnọ o via nọ ọrigbo omuomu yena ọ be jọ udu riẹ ta nọ, ‘Olori mẹ o lehie no,’+ 49 o je muọ ibe erigbo riẹ họ ekpe, bi lele egba-idi da jẹ re, 50 olori ọrigbo yena ọ te nyaze evaọ ẹdẹ nọ o rẹro riẹ hẹ gbe auwa nọ ọ riẹ hẹ,+ 51 ọ vẹ te kẹe uye nọ o mae ga kpaobọ je fi ei họ kugbe eviẹwẹ na. Etẹe ọ te jọ viẹ jẹ rowo akọ.+

25 “A sae rehọ Uvie odhiwu dhesẹ emetẹ-kọkọ ikpe nọ e tọlọ ikpẹ rai,+ a tẹ nyai zere ọva.+ 2 Isoi e jọ gheghẹ, isoi i wo areghẹ.*+ 3 Igheghẹ na e tọlọ ikpẹ rai rekọ a wha ewhri ọfa lele oma ha, 4 rekọ iwareghẹ na e wha ewhri ọfa evaọ ilolo rai kugbe ikpẹ rai. 5 Nọ ọva na ọ jẹ kake nyaze he, owezẹ u te mu aikpobi họ esu, a tẹ wezẹ no. 6 Evaọ udevie aso a te yo edo ubo, inọ: ‘Ọva na ọ be tha! Wha nyai zere iei.’ 7 Kẹsena emetẹ-kọkọ na kpobi e tẹ kpama, a tẹ ruẹrẹ ikpẹ rai họ.+ 8 Igheghẹ na e tẹ ta kẹ iwareghẹ na nọ, ‘Wha jọ ewhri rai kẹ omai omojọ keme ikpẹ mai i bi ti fu no.’ 9 Iwareghẹ na e tẹ kpahe kẹ ae nọ: ‘O wọhọ nọ ewhri mai na o ti te kẹ omai avọ owhai hi. Wha dhugbẹ nyabru enọ e rẹ zẹ re wha dẹ kẹ omarai.’ 10 Nọ a jẹ nyavrẹ nyae dẹ ewhri, ọva na ọ tẹ nyaze. Emetẹ-kọkọ nọ e ruẹrẹ oma kpahe na i te lele iei ruọ eva oria ehaa orọo na,+ a tẹ kare ẹthẹ na. 11 Uwhremu na, emetẹ-kọkọ edekọ na e tẹ nyaze re, be ta nọ, ‘Ọga, Ọga, rovie kẹ omai!’+ 12 Ọ tẹ kpahe kẹ ae nọ, ‘Uzẹme mẹ be ta kẹ owhai, mẹ riẹ owhai hi.’

13 “Fikiere, wha ruabọhọ erou,*+ keme wha riẹ ẹdẹ na hayo auwa na ha.+

14 “Keme o wọhọ epaọ ọzae nọ ọ gwọlọ kpohọ erẹ evaọ orẹwho ọfa nọ o se erigbo riẹ kokohọ, o te mu eyero riẹ họ ae obọ.+ 15 Ọ kẹ ọjọ etalẹnte* isoi, ọfa ivẹ, ọfa kọ ọvo, ọ kẹ omomọvo wọhọ epanọ ẹgba riẹ o mu, o te kpohọ erẹ. 16 Ọnọ a kẹ etalẹnte isoi na ọ tẹ nwane nyae rehọ ai mu eki họ ẹtho, o te wo isoi efa kugbe ae. 17 Ere ọvona ọnọ a kẹ ivẹ na o ru re, o te wo ivẹ efa kugbe ae. 18 Rekọ ọrigbo nọ a kẹ etalẹnte ọvo na ọ tẹ nyae tọ otọ, o te si ugho* olori riẹ na no.

19 “Nọ oke krẹkri o vrẹ no, olori erigbo na o te kpozi, o te se ai re a vuẹe epanọ a rọ igho na ru te.+ 20 Fikiere ọnọ a kẹ etalẹnte isoi na ọ tẹ nyaze avọ etalẹnte isoi efa nọ o wo kugbe ae, inọ, ‘Olori, etalẹnte isoi whọ kẹ omẹ; rri, me wo isoi efa kugbe ae.’+ 21 Olori riẹ ọ tẹ ta kẹe nọ: ‘Whẹ kobiruo, emamọ ọrigbo nọ a re fievahọ! Whọ riẹ ru evaọ umutho eware nọ a muhọ owhẹ obọ. Mẹ te rọ owhẹ mu re whọ rẹrote eware buobu.+ Nyaze te reawere oghọghọ olori ra.’+ 22 Ọnọ a kẹ etalẹnte ivẹ na ọ tẹ nyaze re, ọ tẹ ta nọ, ‘Olori, etalẹnte ivẹ whọ kẹ omẹ; rri, me wo ivẹ efa kugbe ae.’+ 23 Olori riẹ ọ tẹ ta kẹe nọ: ‘Whẹ kobiruo, emamọ ọrigbo nọ a re fievahọ! Whọ riẹ ru evaọ umutho eware nọ a muhọ owhẹ obọ. Mẹ te rọ owhẹ mu re whọ rẹrote eware buobu. Nyaze te reawere oghọghọ olori ra.’

24 “Ukuhọ riẹ, ọrigbo nọ a kẹ etalẹnte ọvo na ọ tẹ nyaze, ọ tẹ ta nọ: ‘Olori, mẹ riẹ nọ whẹ yọ ohwo nọ oware nọ omọfa o ru o rẹ kake da ẹro ho, who re vu evaọ oria nọ whọ kọ fihọ họ, je kokohọ evaọ oria nọ whọ jọ frẹ erara no ibi ekakọ họ.+ 25 Fikiere ozọ u te mu omẹ, mẹ tẹ nyae tọ etalẹnte ra họ otọ. Rri, ugho ra ona.’ 26 Olori na ọ tẹ ta kẹe nọ: ‘Ọrigbo omuomu, ọyẹlẹ na, whọ riẹ nọ me re vu evaọ oria nọ mẹ kọ fihọ họ, je kokohọ evaọ oria nọ mẹ jọ frẹ erara no ibi ekakọ họ, o gbẹ rrọ ere? 27 Nọ o rrọ ere na, whọ hai fi ugho* mẹ họ obọ uwou-igho, nọ mẹ nyaze na, a hae rehọ iẹe kẹ omẹ avọ isuo.

28 “‘Fikiere, wha mi ei etalẹnte na re wha rehọ iẹe kẹ ọnọ o wo etalẹnte ikpe na.+ 29 Keme ohwo kpobi nọ o wo a rẹ te kẹe efa kugbe, o ve ti wo buobu. Rekọ ọnọ o wo ho, a ti mi ei makọ onọ o wo na dede.+ 30 Wha gbolo ọrigbo nọ o fioka ha na fihọ ebi obọ otafe. Etẹe ọ te jọ viẹ jẹ rowo akọ.’

31 “Okenọ Ọmọ ohwo+ ọ te nyaze evaọ oruaro riẹ avọ ikọ-odhiwu kpobi nọ e rrọ kugbei,+ ọ te keria agbara-uvie oruaro riẹ. 32 Erẹwho na kpobi i ve ti kokohọ aro riẹ, ọ vẹ te hẹriẹ ahwo, nwane wọhọ epanọ othuru-igodẹ ọ rẹ hẹriẹ igodẹ no ewe na. 33 O ve ti fi igodẹ na+ họ obọze riẹ, ewe na kọ ẹkpẹlobọ riẹ.+

34 “Kẹsena Ovie na ọ vẹ te ta kẹ enọ e rrọ obọze riẹ nọ: ‘Wha nyaze, whai enọ Ọsẹ mẹ ọ ghale no, wha reuku Uvie nọ a ruẹrẹhọ kẹ owhai no emuhọ akpọ* na ze. 35 Keme nọ ohọo u je kpe omẹ wha kẹ omẹ emu re; nọ uruame u je kpe omẹ wha kẹ omẹ ame da. Mẹ jọ ọrara, wha dede omẹ rehọ;+ 36 nọ mẹ jọ ẹbẹba* wha kẹ omẹ ewu kuhọ.+ Nọ mẹ jẹ mọ wha rẹrote omẹ. Mẹ jọ uwou-odi, wha weze bru omẹ ze.’+ 37 Kẹsena ikiẹrẹe na e vẹ te ta kẹe nọ: ‘Olori, oke vẹ ma ruẹ owhẹ nọ ohọo u je kpe owhẹ nọ ma jẹ kẹ owhẹ emu re, hayo nọ uruame u je kpe owhẹ nọ ma jẹ kẹ owhẹ ame da?+ 38 Oke vẹ ma ruẹ owhẹ nọ whọ jọ ọrara nọ ma je dede owhẹ rehọ, hayo jọ ẹbẹba nọ ma jẹ kẹ owhẹ ewu kuhọ? 39 Oke vẹ ma ruẹ owhẹ nọ whọ jẹ mọ hayo nọ whọ jọ uwou-odi nọ ma je weze bru owhẹ ze?’ 40 Ovie na ọ vẹ te ta kẹ ae nọ, ‘Uzẹme mẹ be ta kẹ owhai, nọ orọnọ wha ru ere kẹ ọjọ evaọ usu enọ e mae kawo evaọ inievo mẹ nana, mẹ wha ru rie kẹ.’+

41 “Kẹsena ọ vẹ te ta kẹ enọ e rrọ ẹkpẹlobọ riẹ nọ: ‘Wha no etenẹ no,+ whai enọ a brukpe no, kpohọ erae ebẹdẹ bẹdẹ+ nọ a ruẹrẹhọ kẹ Ẹdhọ avọ ikọ-odhiwu riẹ.+ 42 Keme ohọo u je kpe omẹ rekọ wha kẹ omẹ emu re he; yọ uruame u je kpe omẹ rekọ wha kẹ omẹ ame da ha. 43 Mẹ jọ ọrara, rekọ wha dede omẹ rehọ họ; mẹ jọ ẹbẹba rekọ wha kẹ omẹ ewu kuhọ họ; mẹ jẹ mọ, mẹ jọ uwou-odi, rekọ wha rẹrote omẹ hẹ.’ 44 Kẹsena ae omarai a vẹ te ta kẹe nọ: ‘Olori, oke vẹ ma ruẹ owhẹ nọ ohọo u je kpe owhẹ hayo nọ uruame u je kpe owhẹ hayo nọ whọ jọ ọrara hayo jọ ẹbẹba hayo jẹ mọ hayo jọ uwou-odi nọ ma gbẹ gbodibo kẹ owhẹ hẹ?’ 45 Kẹsena ọ vẹ te ta kẹ ae nọ: ‘Uzẹme mẹ be ta kẹ owhai, nọ orọnọ wha ru ere kẹ ọvuọvo evaọ usu enana nọ e mae kawo na ha na, wha ru rie kẹ omẹ hẹ.’+ 46 Enana i re ti kpohọ ọraha ebẹdẹ bẹdẹ,*+ rekọ ikiẹrẹe na i re ti wo uzuazọ ebẹdẹ bẹdẹ.”+

26 Whaọ nọ Jesu ọ ta eware nana kpobi no, ọ tẹ ta kẹ ilele riẹ nọ: 2 “Wha riẹ nọ edẹ ivẹ i kiọkọ re a ru Ehaa Ọnyavrẹ na,+ yọ a te rehọ Ọmọ ohwo kẹ ewegrẹ re a kare iẹe fihọ ure kpe.”+

3 Kẹsena ilori izerẹ na gbe ekpako ahwo na i te kokohọ ighẹ ozerẹ okpehru na, ọnọ a re se Kayafas,+ 4 a tẹ gba ẹgwae+ epanọ a rẹ rọ rehọ ẹghẹ kru* Jesu, re a je kpei. 5 Rekọ a jẹ ta nọ: “Ma ru ei evaọ etoke ehaa na ha, re o siọ ozighi ba ẹwha ze evaọ udevie ahwo na.”

6 Nọ Jesu ọ jọ Bẹtani evaọ uwou Saemọn nọ ọ jọ ọmoti vẹre,+ 7 aye jọ ọ tẹ nyabru ei ze avọ ololo alabasta nọ udẹ nọ u re gbo ore awere nọ o rrọ ghaghae ọ rrọ eva, o te bi ku ei họ Jesu uzou epanọ ọ jẹ rọ re emu* na. 8 Nọ ilele na e ruẹ onana, eva e tẹ dha ae, a tẹ ta nọ: “Fikieme ọ be rọ raha udẹ na kufiẹ enẹ? 9 Keme a hae sae zẹ udẹ nana igho buobu, a vẹ rehọ igho na kẹ iyogbe.” 10 Nọ Jesu o yo onana, ọ tẹ ta kẹ ae nọ: “Fikieme wha be rọ gwọlọ aye na ẹme? Oware uwoma o ru kẹ omẹ na. 11 Keme iyogbe na e rrọ kugbe owhai ẹsikpobi,+ rekọ mẹ te jọ kugbe owhai ẹsikpobi hi.+ 12 Udẹ nana nọ o kuhọ omẹ oma na, o ru ei be rọ ruẹrẹ omẹ kpahe kẹ ukio.+ 13 Uzẹme mẹ be ta kẹ owhai, oria kpobi nọ a te jọ ta usi uwoma na evaọ akpọ na soso, a te ta kpahe oware nọ aye nana o ru na re rọ kareghẹhọ iẹe.”+

14 Kẹsena omọvo Ikpegbivẹ na, ọnọ a re se Judas Iskariọt,+ ọ tẹ nyabru ilori izerẹ na,+ 15 ọ tẹ ta kẹ ae nọ: “Eme wha te kẹ omẹ re me vivie iei kẹ owhai?”+ A tẹ rọwo nọ a rẹ kẹe ewẹ isiliva ọgba.+ 16 Fikiere, no umuo oke yena vrẹ, ọ tẹ jẹ gwọlọ oke nọ u kiehọ nọ o re ro vivie iei.

17 Evaọ ẹdẹ ọsosuọ Ehaa Ebrẹdi nọ Ọ Kare Ẹvi na,+ ilele na e tẹ nyabru Jesu ze, a tẹ nọe nọ: “Diẹse whọ gwọlọ nọ ma ruẹrẹhọ kẹ owhẹ nọ whọ te jọ re emu Ọnyavrẹ na?”+ 18 Ọ tẹ ta nọ: “Wha nyaruọ okpẹwho na, wha te ruẹ ọzae jọ, wha ta kẹe nọ, ‘Owuhrẹ na ọ ta nọ: “Oke nọ a fihọ kẹ omẹ o kẹle no; mẹ te jọ uwou ra ru Ehaa Ọnyavrẹ na kugbe ilele mẹ.”’” 19 Fikiere ilele na i te ru epanọ Jesu ọ ta kẹ ae na, a tẹ ruẹrẹ eware họ kẹ Ehaa Ọnyavrẹ na.

20 Nọ owọwọ u te,+ tei te ilele ikpegbivẹ na a tẹ keria jẹ re emu evaọ emẹjẹ.+ 21 Nọ a jẹ re emu na, ọ tẹ ta kẹ ae nọ: “Uzẹme mẹ be ta kẹ owhai, omọvo rai jọ o ti vivie omẹ.”+ 22 Fikinọ onana o kẹ rai uye gaga, omomọvo ọ tẹ jẹ nọe nọ: “Olori, kọ omẹ?” 23 Ọ tẹ ta kẹ ae nọ: “Ọnọ o bi lele omẹ dhe obọ riẹ họ omodhe emu na họ ọnọ o ti vivie omẹ.+ 24 Uzẹme, Ọmọ ohwo ọ be te nyasiọ owhai ba, nwane wọhọ epanọ a kere kpahe iẹe, rekọ uye+ u te ohwo yena nọ o bi ti vivie Ọmọ ohwo na!+ O hae mai woma kẹ ohwo yena o hae jọ nọ a yẹ riẹ hẹ.”+ 25 Judas, ọnọ o bi ti vivie iei na, ọ tẹ nọe nọ: “Rabae, kọ omẹ?” Jesu ọ tẹ kpahe kẹe nọ: “Whẹ ọvo whọ ta riẹ na.”

26 Nọ a gbẹ be re na, Jesu ọ tẹ tọlọ ebrẹdi, nọ ọ lẹ yere Ọghẹnẹ no, o te bru ei,+ ọ tẹ rehọ iẹe kẹ ilele na, ọ tẹ ta nọ: “Wha mi re wha re. Onana u dikihẹ kẹ ugboma mẹ.”+ 27 Ọ tẹ rehọ egho, ọ tẹ lẹ yere Ọghẹnẹ, ọ tẹ rehọ iẹe kẹ ae, ọ tẹ ta nọ: “Wha jariẹ da, whai kpobi,+ 28 keme onana u dikihẹ kẹ azẹ mẹ,+ onọ o rrọ ‘azẹ ọvọ na,’+ nọ o ti hwẹ fiki erọvrẹ izieraha+ ahwo buobu.+ 29 Rekọ mẹ be ta kẹ owhai nọ: Mẹ gbẹ te wariẹ da oghẹrẹ udi nana nọ a rọ ubi-ure evaene ru na vievie he bọo ẹdẹ yena nọ me ti lele owhai da ọkpokpọ riẹ evaọ Uvie Ọsẹ mẹ.”+ 30 Ukuhọ riẹ, nọ a so ile ujiro* no, a te kpobọ Ugbehru Olivi.+

31 Kẹsena Jesu ọ tẹ ta kẹ ae nọ: “Whai kpobi wha ti zoruẹ aso nana fiki oware nọ o te via kẹ omẹ, keme a kere nọ: ‘Me ti duwu othuru-igodẹ na, igodẹ nọ e rrọ uthuru na e vẹ te vahabọ.’+ 32 Rekọ nọ a tẹ kpare omẹ ze no, me ti kpobọ Galili nyae hẹrẹ owhai.”+ 33 Rekọ Pita ọ tẹ ta kẹe nọ: “Ahwo nọ a kiọkọ kpobi a tẹ maki zoruẹ fiki oware nọ o te via kẹ owhẹ, me ti zoruẹ vievie he!”+ 34 Jesu ọ tẹ ta kẹe nọ: “Uzẹme mẹ be ta kẹ owhẹ, evaọ aso nana, taure ọkpa o te ti bo, whọ te vro omẹ isiasa.”+ 35 Pita ọ tẹ ta kẹe nọ: “O tẹ make rọnọ me re lele owhẹ whu dede, mẹ te vro owhẹ vievie he.”+ Ilele edekọ na kpobi e tẹ ta epọvo na re.

36 Kẹsena Jesu avọ ilele na a tẹ ziọ oria nọ a re se Gẹtsemane,+ ọ tẹ ta kẹ ae nọ: “Wha keria etenẹ, me bi kpohọ obei nyae lẹ.”+ 37 Nọ ọ rehọ Pita gbe emezae ivẹ Zẹbẹdi kugbe oma, o te muhọ eweri jẹ be rova gaga.+ 38 Ọ tẹ ta kẹ ae nọ: “Uweri o da omẹ oma* fia, enwenọ uwhu dede. Wha jọ etenẹ re wha lele omẹ ruabọhọ erou.”*+ 39 Nọ ọ nya họ obaro omojọ, o te kigwẹ vovao tuotọ, ọ tẹ be lẹ nọ:+ “Ọsẹ mẹ, otẹrọnọ o rẹ lọhọ, ru re egho nana+ ọ vrẹ omẹ. Ghele na, orọnikọ epaọ oreva mẹ hẹ, rekọ oreva ra.”+

40 Nọ o zihe bru ilele na ze, ọ tẹ ruẹ nọ a be wezẹ, ọ tẹ ta kẹ Pita nọ: “Kọ wha gbẹ sai lele omẹ ruabọhọ erou makọ auwa ọvo dede?+ 41 Wha ruabọhọ erou+ jẹ hae lẹ ẹsikpobi+ re wha siọ odawọ ba ekie ruọ.+ O ginẹ ruọ ẹzi na rekọ uwo na o ga ha.”+ 42 Ọ tẹ wariẹ nyavrẹ orọ avọ isiava nyae lẹ, inọ: “Ọsẹ mẹ, otẹrọnọ o rẹ lọhọ re onana o vrẹ omẹ hẹ ajokpanọ mẹ rẹ dae, jọ oreva ra u rugba.”+ 43 Ọ tẹ wariẹ zihe ze je di ae họ owezẹ, keme owezẹ o vọ rai aro. 44 Fikiere ọ tẹ nyase ae ba, ọ tẹ wariẹ nyae lẹ orọ avọ isiasa, be wariẹ ẹme ọvona. 45 Kẹsena o te zihe bru ilele na ze, ọ tẹ ta kẹ ae nọ: “Evaọ oke utionana wha be wezẹ je bi serihọ! Rri! Auwa nọ a ti ro vivie Ọmọ ohwo họ abọ erahaizi o kẹle no. 46 Wha kpama ma nyavrẹ. Rri! Ọnọ o bi vivie omẹ ọ kẹle etenẹ no.” 47 Epanọ ọ gbẹ jẹ rọ ta ẹme na, rri! Judas, omọvo Ikpegbivẹ na, ọ tẹ nyaze avọ ogbotu ahwo nọ a kru egbọdọ gbe ekpọ,* enọ ilori izerẹ na gbe ekpako ahwo na a vi ze.+

48 Whaọ ọnọ o bi ti vivie iei na ọ kẹ ahwo na oka, inọ: “Ohwo kpobi nọ mẹ te viọlọ, ọye họ ohwo na; wha mu ei.” 49 Ọ tẹ nya ovavo bru Jesu, ọ tẹ ta nọ: “Do, Rabae!” ọ tẹ nabe viọlọ iẹe. 50 Rekọ Jesu ọ tẹ ta kẹe nọ: “Oko, ẹjiroro vẹ whọ rọ rrọ etenẹ?”+ Kẹsena ahwo na a tẹ nyaze, a te kru Jesu, a te mu ei. 51 Rekọ omọvo enọ e jọ kugbe Jesu o te yolo ọgbọdọ riẹ lahwe, ọ tẹ nawo ozọ ọrigbo ozerẹ okpehru na no.+ 52 Jesu ọ tẹ ta kẹe nọ: “Zihe ọgbọdọ ra fihọ oria riẹ,+ keme enọ e tọlọ ọgbọdọ kpobi i ti whu uwhu ọgbọdọ.+ 53 Hayo kọ who roro nọ mẹ sae yare Ọsẹ mẹ re o vi ikọ-odhiwu idu buobu* se omẹ obọnana ha?+ 54 Kọ me te ru ere, ẹvẹ Ikereakere na nọ e ta nọ enẹ o te via e sai ro rugba?” 55 Jesu ọ tẹ ta kẹ ogbotu na evaọ auwa yena nọ: “Kọ wha wha egbọdọ gbe ekpọ* ze ti mu omẹ wọhọ ẹsenọ wha be gwọlọ ogbulegbu mu? Kẹdẹ kẹdẹ mẹ jẹ hae keria etẹmpol na wuhrẹ ahwo,+ ghele na wha mu omẹ hẹ.+ 56 Rekọ eware nana kpobi e be via re eme nọ eruẹaro na i kere e ruẹsi rugba.”+ Kẹsena ilele na kpobi e tẹ dhẹ se iẹe ba.+

57 Enọ i mu Jesu na e tẹ rehọ iẹe kpobọ Kayafas+ ozerẹ okpehru na, oria nọ otu ikere-obe gbe ekpako na a kokohọ.+ 58 Rekọ Pita o te je lele iei evaọ ugbo, rite ugbo obọ ighẹ ozerẹ okpehru na, nọ ọ ruọ eva no, ọ tẹ keria kugbe idibo uwou na re ọ ruẹ oware nọ o te via.+

59 Whaọ, ilori izerẹ na gbe ogbẹgwae Sanhẹdrin na soso a jẹ gwọlọ oware ọrue nọ a re gu fihọ Jesu uzou re a ruẹsi kpei.+ 60 Rekọ a ruẹ oware ovo ho, dede nọ isisẹri erue buobu e nya lahwe.+ Uwhremu na, ivẹ jọ e tẹ nya lahwe, 61 a tẹ ta nọ: “Ọzae nana ọ ta nọ, ‘Mẹ rẹ sai kporo etẹmpol Ọghẹnẹ na fihọ otọ mẹ vẹ rọ edẹ esa bọe.’”+ 62 Fikiere ozerẹ okpehru na ọ tẹ kpama, ọ tẹ ta kẹe nọ: “Kọ who wo ẹme ọvo nọ whọ rẹ kpahe? Eme ahwo nana a be ta kpahe owhẹ na?”+ 63 Rekọ Jesu o fibo ọvo.+ Fikiere ozerẹ okpehru na ọ tẹ ta kẹe nọ: “Mẹ be ta kẹ owhẹ nọ whọ rehọ odẹ Ọghẹnẹ nọ ọ rrọ uzuazọ na duwu iyei re whọ ta kẹ omai sọ whẹ họ Kristi na, Ọmọ Ọghẹnẹ!”+ 64 Jesu ọ tẹ ta kẹe nọ: “Whẹ ọvo whọ ta riẹ na. Rekọ mẹ be ta kẹ owhai nọ: No umuo enẹna vrẹ wha te ruẹ Ọmọ ohwo+ nọ ọ keria obọze Ọnọ o wo ogaga* na,+ nọ ọ be nyaze evaọ ẹgho odhiwu.”+ 65 Ozerẹ okpehru na ọ tẹ bẹre iwu ehru riẹ, ta nọ: “Ọ ta ẹme-aghọ no! Eme ọfa ma gbẹ gwọlọ isisẹri kẹ? Rri! Wha yo ẹme-aghọ nọ ọ ta na. 66 Ẹvẹ wha roro?” A tẹ kẹ uyo nọ: “O fo uwhu.”+ 67 A te nwo eya ku ei ovao+ jẹ bọwo iẹe.+ Efa e tẹ tehe iẹe ovao,+ 68 be ta nọ: “Ruẹaro kẹ omai, whẹ Kristi. Ono ọ tehe owhẹ na?”

69 Whaọ, Pita ọ keria obọ otafe evaọ ighẹ na, odibo-ọmọtẹ jọ ọ tẹ nyabru ei ze, ọ tẹ ta nọ: “Whọ jọ kugbe Jesu ohwo Galili na re!”+ 70 Rekọ ọ tẹ vro riẹ evaọ iraro rai kpobi, inọ: “Mẹ riẹ oware nọ whọ be ta kpahe na ha.” 71 Nọ ọ nya kpobọ unuighẹ na, ọmọtẹ ọfa jọ o te muẹrohọ iẹe jẹ ta kẹ enọ e rrọ etẹe nọ: “Ọzae nana ọ jọ kugbe Jesu ohwo Nazarẹt na.”+ 72 Ọ tẹ wariẹ vro riẹ avọ iyei iduwu, inọ: “Mẹ riẹ ọzae na ha!” 73 Omoke jọ o vrẹ no, enọ i dikihẹ etẹe e tẹ nyaze, a tẹ ta kẹ Pita nọ: “Ababọ avro, whẹ yọ omọvo rai jọ re, keme ẹrọunu ra o dhesẹ owhẹ fihọ ere.” 74 O te mu ehao họ ẹbọwo je bi duwu iyei nọ: “Mẹ riẹ ọzae na ha!” Ẹsiẹvo na, ọkpa o te bo. 75 Pita ọ tẹ kareghẹhọ ẹme nọ Jesu ọ ta, inọ: “Taure ọkpa o te ti bo, whọ te vro omẹ isiasa.”+ Ọ tẹ ruọ otafe, ọ tẹ viẹ gaga.

27 Nọ ohiohiẹ o te, ilori izerẹ na gbe ekpako ahwo na kpobi a tẹ gba ẹgwae epanọ a re ro kpe Jesu.+ 2 Nọ a gbae abọ no, a te su ei vrẹ, a tẹ rehọ iẹe kẹ Pailet, ọba na.+

3 Kẹsena, nọ Judas nọ o vivie i rie na ọ ruẹ nọ a bruoziẹ uwhu kpe Jesu no, o tẹ dae, ọ tẹ rehọ ewẹ isiliva ọgba na zihe se ilori izerẹ gbe ekpako na,+ 4 ọ tẹ ta nọ: “Mẹ thọ uzi nọ me ro vivie ohwo nọ o ru oware ovo thọ họ.” A tẹ ta kẹe nọ: “Ovẹ o jariẹ te omai? Yọ ẹme obọra!” 5 Fikiere o te gbolo ewẹ isiliva na fihọ etẹmpol na, ọ tẹ nyavrẹ. Kẹsena ọ tẹ nyai thuru whu.+ 6 Rekọ ilori izerẹ na e tẹ tọlọ ewẹ isiliva na, a tẹ ta nọ: “U fo ho re a fi ai họ oria ekwakwa-aghae nọ o rrọ etẹmpol na, keme igho azẹ e rrọ.” 7 Nọ a jiroro kpahe onana no, a tẹ rehọ igho na dẹ otọ ọmebẹ na,* re o jọ oria nọ a re ki erara fihọ. 8 Fikiere, a bi se otọ yena Otọ Azẹ+ rite inẹnẹ na. 9 Ẹme nọ a rehọ Jerimaya ọruẹaro na ta o te rugba, inọ: “A tẹ rehọ ewẹ isiliva ọgba na, unuigho nọ a fihọ inọ a rẹ rọ zẹ ọzae na, ọnọ emezae Izrẹl jọ e rọwo nọ a rẹ hwa ugho fihọ uzou, 10 a tẹ rehọ ae dẹ otọ ọmebẹ na, wọhọ epanọ Jihova* ọ ta kẹ omẹ.”+

11 Nọ Jesu o dikihẹ aro ọba na, ọba na ọ tẹ nọe nọ: “Kọ whẹ họ Ovie ahwo Ju na?” Jesu ọ tẹ kẹ uyo nọ: “Whẹ ọvo whọ ta riẹ na.”+ 12 Rekọ nọ ilori izerẹ na avọ ekpako na a je gu eme fihọ iẹe uzou, ọ kpahe ẹme he.+ 13 Kẹsena Pailet ọ tẹ ta kẹe nọ: “Kọ who bi yo eware kpobi nọ a be ta kpahe owhẹ na?” 14 Rekọ ọ kpahe ẹme kẹe he, makọ ẹme ọvo dede, u te gbe ọba na unu gaga.

15 Whaọ evaọ oke Ehaa Ọnyavrẹ kpobi, o jọ uruemu ọba na re o siobọno ohwo jọ nọ ọ rrọ uwou-odi kẹ ogbotu na, ohwo kpobi nọ a gwọlọ.+ 16 Whaọ, evaọ oke yena, ọzae jọ nọ a re se Barabas nọ o je thuethu gaga ọ jọ uwou-odi. 17 Fikiere, nọ ogbotu na a kokohọ, Pailet ọ tẹ nọ ae nọ: “Ono wha gwọlọ nọ me siobọno kẹ owhai, Barabas manikọ Jesu, ọnọ a bi se Kristi na?” 18 Keme Pailet ọ riẹ nọ fiki ihri-eriọ a rọ rehọ Jesu sei. 19 Ofariẹ, epanọ ọ rọ keria akaba oziẹobro na, aye riẹ o te vi uwou sei, inọ: “Who ru ọzae okiẹrẹe yena oware ovo ho, keme mẹ ruẹ uye gaga nẹnẹ na evaọ ewezẹ fiki riẹ.” 20 Rekọ ilori izerẹ na avọ ekpako na a tẹ tuduhọ ogbotu na awọ inọ a ta nọ Barabas a gwọlọ,+ re a kpe Jesu.+ 21 Ọba na ọ tẹ wariẹ nọ ae nọ: “Ono evaọ usu aimava na wha gwọlọ nọ me siobọno kẹ owhai?” A tẹ ta nọ: “Barabas.” 22 Pailet ọ tẹ nọ ae nọ: “Nọ o rrọ ere na, eme me re ru Jesu, ọnọ a bi se Kristi na?” Aikpobi a te kuenu nọ: “Kare iẹe fihọ ure!”*+ 23 Ọ tẹ nọ ae nọ: “Fikieme? Didi oware uyoma o ru?” Rekọ a te gbe bi bo ga viere inọ: “Kare iẹe fihọ ure!”+

24 Nọ ọ ruẹ nọ ọ be sai nwene iroro rai hi, ukpoye kọ ozighi o bi noi ze, Pailet ọ tẹ rehọ ame, ọ tẹ wozẹ abọ riẹ evaọ iraro ogbotu na, be ta nọ: “Azẹ ọzae nana ọ rrọ uzou mẹ hẹ. Uzou rai ọ rrọ.” 25 Fikiere ahwo na kpobi a te kuenu nọ: “Jọ azẹ riẹ ọ jọ uzou mai gbe uzou emọ mai.”+ 26 Kẹsena o te siobọno Barabas kẹ ae, rekọ ọ tẹ ta kẹ isoja na nọ a fa Jesu,+ nọ a fae no, ọ tẹ rehọ iẹe kẹ ae re a nyae kare iẹe fihọ ure kpe.+

27 Kẹsena isoja ọba na e tẹ rehọ Jesu kpohọ oria nọ ọba na ọ be rria, a te se ogbaẹmo na soso kokohọ wariẹe họ.+ 28 Nọ a ba ewu noi oma no, a te fi ogbru ọwawae họ iẹe oma,+ 29 a tẹ nwa etu idhigbo, a tẹ rehọ iẹe tu ei uzou jẹ rehọ ukpoko họ obọze riẹ. A te kigwẹ fihọ aro riẹ, a te bi sei ẹkoko nọ: “Do, whẹ Ovie ahwo Ju!” 30 A te nwo eya ku ei,+ a te mi ei ukpoko na, a tẹ be rehọ iẹe fae uzou. 31 Ukuhọ riẹ, nọ a sei ẹkoko bẹ no, a te si ogbru na noi oma, a je ku iwu ehru riẹ fihọ iẹe, a te su ei vrẹ re a nyae tehe iẹe fihọ ure.+

32 Nọ a jẹ nyavrẹ, a tẹ ruẹ ohwo Sairini jọ nọ a re se Saemọn. A tẹ gba ọzae nana họ re ọ wọ ure-oja* Jesu.+ 33 Nọ a te oria nọ a re se Golgota, koyehọ, Oria Ukolo-Uzou,+ 34 a tẹ kẹe enwaene nọ a rehọ oware ọyayare* jọ gua re ọ da;+ rekọ nọ o dhei te unu, ọ rọwo dae he. 35 Nọ a tehe iẹe fihọ ure no, a tẹ ghale iwu ehru riẹ ẹkwoma ẹta nọ a ma,+ 36 a tẹ keria etẹe bi rou rie.* 37 A te je kere uzi nọ a ta nọ ọ thọ fihọ ẹwẹ-akpala jẹ tehe iẹe họ ehru ure na, inọ: “Ọna họ Jesu, Ovie ahwo Ju.”+

38 Kẹsena a tẹ kare igbulegbu ivẹ fihọ ire evaọ akotọ riẹ, ọjọ ofẹ obọze riẹ ọdekọ kọ ẹkpẹlobọ riẹ.+ 39 Enọ e jẹ nyavrẹ a tẹ be rehọ iẹe jijehwẹ,+ bi nuhu uzou rai,+ 40 be ta nọ: “O whẹ nọ ọ ta nọ o re kporo etẹmpol na fihọ otọ ọ vẹ rọ edẹ esa bọe,+ siwi omara! Otẹrọnọ whẹ yọ ọmọ Ọghẹnẹ, nwrotọ no ure-oja* na ze!”+ 41 Epọvo na re, ilori izerẹ gbe otu ikere-obe gbe ekpako na a te mu ei ẹkoko họ ese, be ta nọ:+ 42 “O siwi amọfa; rekọ ọ be sai siwi omariẹ hẹ! Ọye họ Ovie Izrẹl;+ jọ o nwrotọ no ure-oja* na ze, ma ti fi ẹrọwọ họ iẹe. 43 O fievahọ Ọghẹnẹ; jọ O siwi ei otẹrọnọ Ọ gwọlọ e riẹ,+ keme ọ ta nọ, ‘Mẹ yọ Ọmọ Ọghẹnẹ.’”+ 44 Epọvo na re, makọ igbulegbu nọ a kare fihọ ire evaọ akotọ riẹ na i je sei ẹkoko re.+

45 No umuo auwa avọ ezeza* vrẹ, ẹkwotọ na soso o te muebi rite auwa avọ izii.*+ 46 Evaọ oware wọhọ auwa avọ izii, Jesu o te bo gaga nọ: “Eli, Eli, lama sabaktani?” koyehọ, “Ọghẹnẹ mẹ, Ọghẹnẹ mẹ, fikieme whọ rọ siọ omẹ ba?”+ 47 Nọ ejọ evaọ usu ahwo nọ a dikihẹ etẹe a yo onana, a te muhọ ẹta nọ: “Ọzae nana o bi se Elaejah.”+ 48 Ẹsiẹvo na, omọvo rai jọ ọ tẹ dhẹ nyae tọlọ uzi, o te duwu iei họ enwaene ogho, ọ tẹ jẹe họ ukpoko, ọ tẹ rehọ iẹe kẹe re ọ da.+ 49 Rekọ enọ i kiọkọ e tẹ ta nọ: “Vu ei wa. Joma ruẹ sọ Elaejah ọ te nyaze ti siwi ei.” 50 Jesu ọ tẹ wariẹ bo gaga, o te se ẹwẹ họ.*+

51 Kẹsena ekọtini aruẹri+ na ọ tẹ bẹre ewẹ ivẹ+ no ehru duwu otọ,+ otọ u te nuhu, itho e tẹ bẹre. 52 Iki* i te rovie, igboma erẹri buobu nọ i kie ruọ owezẹ no e tẹ lahwe, 53 (ahwo nọ a jẹ nya no oria nọ a re ki ahwo fihọ na ze evaọ okenọ Jesu ọ kparoma no a ruọ okpẹwho ọrẹri na), yọ ahwo buobu a ruẹ e rai. 54 Rekọ nọ oletu ogbaẹmo na avọ enọ a gbe je rou Jesu a ruẹ otọ nọ u nuhu na gbe eware nọ e be via, ozọ u te mu ae gaga, a tẹ ta nọ: “Ababọ avro, nọ Ọmọ Ọghẹnẹ.”+

55 Eyae buobu nọ i lele Jesu no Galili ze te gbodibo kẹe a jọ ugbo je rri;+ 56 ejọ evaọ usu rai họ, Meri Magdalini gbe Meri oni Jemis avọ Josis gbe oni emezae Zẹbẹdi.+

57 Whaọ nọ owọwọ u bi te no, ọzae jọ nọ o fe nọ ọ rrọ ohwo Arimatia nọ a re se Josẹf ọ tẹ nyaze, ọnọ o zihe ruọ olele Jesu no re.+ 58 Ọzae nana ọ tẹ nyabru Pailet, ọ tẹ yare nọ a rehọ ori Jesu kẹe.+ Pailet ọ tẹ kẹ udu nọ a rehọ iẹe kẹe.+ 59 Josẹf ọ tẹ wọ ori Jesu, ọ tẹ rehọ emamọ ehọ-elọlọhọ nọ e fo rọ variẹ iẹe,+ 60 ọ tẹ wọe fihọ uki* okpokpọ riẹ+ nọ ọ tọ fihọ utho. Nọ o ghelie utho ulogbo ro di unu uki* na no, ọ tẹ nyavrẹ. 61 Rekọ Meri Magdalini avọ Meri ọdekọ a tẹ gbẹ jọ etẹe, yọ a keria aro uki na.+

62 Whaọ ẹdẹ yena ọ jọ ẹdẹ Omaruẹrẹ-Kpahe kẹ Ẹdijala.+ Evaọ okiokiọ riẹ, ilori izerẹ na gbe otu Farisi na a te kokohọ aro Pailet, 63 be ta nọ: “O Ọba, ma kareghẹhọ oware nọ ọviẹahwohọ na ọ ta nọ ọ jọ uzuazọ, inọ, ‘Edẹ esa e tẹ vrẹ no, mẹ te kparoma ze.’+ 64 Fikiere, kẹ udu nọ a rou* uki na bọo ẹdẹ avọ esa na re ilele riẹ e gbẹ nyai tho ugboma na ha,+ a vẹ te ta kẹ ahwo nọ, ‘A kpare riẹ no uwhu ze no!’ Eviẹhọ uwhremu nana u ve ti yoma vi orọ ọsosuọ.” 65 Pailet ọ tẹ ta kẹ ae nọ: “Wha sae rehọ isoja. Wha nyai rou uki na oghẹrẹ kpobi nọ wha riẹ nọ a sai rou oria ga te.” 66 Fikiere, a tẹ nya, a te wuhu utho nọ o rrọ unu uki na di, je fi isoja họ etẹe.

28 Nọ Ẹdijala na ọ vrẹ no, nọ oke u je rie ze evaọ ẹdẹ ọsosuọ oka na,* Meri Magdalini avọ Meri ọdekọ na a tẹ nyaze ti rri uki na.+

2 Whaọ, otọ u nuhu gaga, keme ukọ-odhiwu Jihova* o no odhiwu ze, o te ghelie utho na no, ọ tẹ keria ehru riẹ.+ 3 O je lo nwranwranwra wọhọ elo egbrara, yọ iwu riẹ e jọ fuafo wọhọ ekpalekpa-ame.+ 4 Ẹhẹ, fiki ozọ riẹ nọ u mu rai, isoja nọ i je rou* uki na i te je nuhu, a tẹ wọhọ ahwo nọ a whu no.

5 Rekọ ukọ-odhiwu na ọ tẹ ta kẹ eyae na nọ: “Ozọ u mu owhai hi, keme mẹ riẹ nọ Jesu nọ a kare fihọ ure kpe na wha be gwọlọ.+ 6 Ọ rrọ etenẹ hẹ, keme a kpare riẹ no uwhu ze no, nwane wọhọ epanọ ọ ta.+ Wha nyaze, wha rri oria nọ ọ jọ. 7 Wha nya ovovẹrẹ nyae ta kẹ ilele riẹ inọ a kpare riẹ no uwhu ze no, yọ o bi kpobọ Galili nyae hẹrẹ owhai.+ Wha te jọ obei ruẹ e riẹ. Rri! Mẹ vuẹ owhai no.”+

8 Fikiere, a te siawọ no oria uki na avọ ozọ, ghele na avọ oghọghọ ulogbo, a tẹ be dhẹ nyae vuẹ ilele riẹ.+ 9 Ẹsiẹvo na, Jesu o te zere ai, ọ tẹ ta nọ: “Wha do!” A tẹ nya tei oma, a te kru awọ riẹ, a te guzou kpotọ kẹe. 10 Jesu ọ tẹ ta kẹ ae nọ: “Ozọ u mu owhai hi! Wha nyae vuẹ inievo mẹ re a kpobọ Galili, a te jọ obei ruẹ omẹ.”

11 Nọ eyae na e jọ edhere jẹ nyavrẹ, isoja na jọ+ e tẹ ruọ okpẹwho na, a tẹ ta eware kpobi nọ e via na kẹ ilori izerẹ na. 12 Nọ ilori izerẹ na avọ ekpako na a kokohọ gba ẹgwae no, a tẹ rehọ ewẹ isiliva buobu kẹ isoja na, 13 a tẹ ta kẹ ae nọ: “Wha ta nọ, ‘Ilele riẹ e nyaze evaọ aso a te thoi vrẹ nọ ma jọ owezẹ.’+ 14 Yọ otẹrọnọ onana u do te ọba na oma, ma ti lele iei ta ẹme,* fikiere wha du ruawa ha.” 15 A te mi ewẹ isiliva na, a te ru epanọ a ta kẹ ae na, iku nana e tẹ vaha ruọ udevie ahwo Ju kpobi rite ẹdẹ inẹnẹ na.

16 Rekọ ilele ikpegbọvo na i te kpobọ Galili+ kpohọ ugbehru nọ Jesu ọ vuẹ rai no vẹre nọ a te jọ ruẹ oma na.+ 17 Nọ a ruẹ e riẹ, a te guzou kpotọ kẹe, rekọ ejọ e vro. 18 Jesu ọ tẹ nyate ae oma, ọ tẹ ta kẹ ae nọ: “A rehọ udu-esuo kpobi kẹ omẹ no evaọ odhiwu gbe otọakpọ na.+ 19 Fikiere wha nya, re wha ru ahwo zihe ruọ ilele evaọ udevie ahwo erẹwho na kpobi,+ wha họ ae ame+ evaọ odẹ Ọsẹ na gbe Ọmọ na gbe ẹzi ọfuafo na, 20 wha wuhrẹ ae re a ru eware kpobi nọ me jie uzi rai kẹ owhai.+ Rri! Mẹ rrọ kugbe owhai edẹ na kpobi rite oke urere uyero-akpọ* na.”+