Oware nọ Ohwo nọ Ọ Rrọ Uweri O re Rẹro Riẹ

Ahwo kpobi a rrọ epọvo na ha, fikiere nọ ohwo o te whu, orọnikọ oghẹrẹ ọvona ahwo kpobi a re ro weri hi. Ahwo jọ nọ ohwo rai o whu a re ru wọhọ ẹsenọ ọ be dae he, yọ efa dede a rẹ tubẹ viẹ hẹ. Dede nọ oviẹ o rẹ sai ru edada ohwo nọ ọ rrọ uweri kpotọ, orọnikọ oviẹ ọvo u re dhesẹ nọ ohwo o bi weri hi. U wo idhere sa-sa nọ ahwo a re ro weri. Eware jọ nọ i re kpomahọ oghẹrẹ nọ ohwo o re ro weri họ, uruemu ẹwho riẹ, oghẹrẹ ohwo nọ ọ rrọ, eware nọ e via kẹe no evaọ uzuazọ, gbe oghẹrẹ nọ ohwo riẹ na o ro whu.

ẸVẸ OHWO O TI WERI GA TE?

Nọ ohwo uviuwou ohwo o te whu, ọ rẹ sae riẹ oghẹrẹ nọ o ti weri ohwo riẹ na ga te he. Dede na, u wo iruemu jọ nọ ahwo a re dhesẹ gaga nọ ohwo rai o te whu. Joma ta kpahe iruemu nana jọ:

Ohwo ọ rẹ viẹ gaga yọ ọ rẹ gbẹ riẹ oware nọ o re ru hu. Ohwo nọ ohwo riẹ o whu ọ rẹ viẹ gaga, u re si ei urru re ọ jọ kugbe ohwo nọ o whu no na, yọ ovao riẹ o tẹ make sasa obọnana, u ri kri hi na yọ o muhọ ẹviẹ no. O re je roro iroro nọ ọ tẹ kareghẹhọ ohwo riẹ na hayo wezẹ ewezẹ kpahe iẹe. Evaọ oke ọsosuọ, ohwo o re roro nọ ohwo riẹ na o ri gine whu hu. Tiina ọ kareghẹhọ oware nọ o via kẹe evaọ okenọ ọzae riẹ, Timo o whu idudhe. Ọ ta nọ: “Me kpenu fihọ ọvo. Mẹ kake viẹ evaọ oke ọsosuọ họ. Oware nọ o via na o wha igwegwe fihọ omẹ oma te epanọ ẹwẹ mẹ o gbe je ro te otọ te ehru hu. U tube mu omẹ ẹro ho inọ ọzae mẹ o gine whu no.”

Ohwo ọ rẹ ruawa, eva e rẹ dhae, yọ udu u re brukpei. Ọzae jọ nọ a re se Ivan ọ ta nọ: “Okenọ ọmọzae mai, Eric nọ ọ jọ ikpe 24 o whu, eva ọvo e jẹ hae dha omẹ avọ aye mẹ, Yolanda. Onana u gbe omai unu gaga keme eva e rẹ kake dha omẹ avọ aye mẹ hẹ. Udu u je brukpe omai re keme ma je roro nọ o wọhọ nọ ma dhẹ họ oma ọmọzae mai na ziezi hi.” Epọvo na udu u je brukpe Alejandro evaọ okenọ aye riẹ o whu. Dede nọ aye riẹ ọ mọ oke krẹkri taure o te ti whu, Alejandro ọ ta nọ: “Evaọ oke ọsosuọ, me je roro nọ Ọghẹnẹ ọ be kẹ omẹ uye fikinọ mẹ yọ ekpehre ohwo. Rekọ udu u te bi brukpe omẹ keme o jọ wọhọ ẹsenọ mẹ be fo Ọghẹnẹ rọkẹ oware nọ o via na.” Kostas nọ ma ta kpahe evaọ uzoẹme nọ o vrẹ na ọ ta nọ: “Ẹsejọ eva e rẹ dha omẹ kẹ Sophia inọ o whu. Rekọ udu u ve bi brukpe omẹ keme mẹ riẹ nọ ọye ọvo o kpe omariẹ hẹ.”

Ohwo o re roro iroro gaga. Iroro ohwo nọ ohwo riẹ o whu e rẹ gba tere ẹsejọ họ. Wọhọ oriruo, ohwo nọ ọ rrọ uweri o re roro nọ ohwo riẹ nọ o whu no na o bi yo ẹme riẹ, ọ rrọ etẹe kugbei hayo ọ be ruẹ e riẹ. Hayo o sae jọ bẹbẹ kẹe re ọ tẹrovi oware ọvo hayo re ọ kareghẹhọ eware. Tiina ọ ta nọ: “Ẹsejọ nọ mẹ avọ ohwo a tẹ be ta ẹme, yọ iroro mẹ e rrọ oria ọfa. Evaọ oke yena yọ me bi roro kpahe eware nọ e via evaọ etoke uwhu Timo na. O jẹ hae kẹ omẹ uye gaga inọ iroro mẹ e jẹ dọmu oria ọvo ẹsejọ họ.”

Ohwo ọ rẹ gwọlọ jọ kugbe ahwo ho. Ẹsejọ o rẹ were ohwo nọ ohwo riẹ o whu re ọ jọ kugbe ahwo ho. Kostas ọ ta nọ: “Mẹ tẹ rrọ kugbe ahwo nọ a rọo no, me re rri omamẹ inọ me fo ohwo nọ ọ rẹ jọ usu rai hi. Yọ mẹ tẹ rrọ kugbe ahwo nọ a re rọo ho, me re rri omamẹ nọ me fo ohwo nọ ọ rẹ jọ usu rai gbe he.” Aye Ivan nọ a re se Yolanda ọ kareghẹhọ nọ: “O jọ bẹbẹ kẹ omẹ re mẹ jọ kugbe ahwo nọ a be ta kpahe ebẹbẹ rai nọ i tulo ho, nọ a tẹ rehọ ae wawọ omai! Yọ amọfa jọ a rẹ vuẹ omai kpahe epanọ emọ rai a be riẹ ru te. Dede nọ eva e jẹ hae were omẹ kẹ ae, o jọ bẹbẹ kẹ omẹ re mẹ gaviezọ kẹ ae. Mẹ avọ ọzae mẹ ma riẹ nọ makọ oware nọ o via kẹhẹ, ahwo a re gbe yeri uzuazọ rai vrẹ ghele, rekọ o jọ bẹbẹ kẹ omai re ma yeri uzuazọ mai vrẹ wọhọ epanọ o jọ vẹre.”

Ohwo ọ rẹ mọ. Emu o re si ohwo nọ ọ rrọ uweri urru tere he, o re kiekpo, yọ ọ rẹ wezẹ ziezi hi. Aaron ọ kareghẹhọ oware nọ o via kẹe evaọ ukpe nọ u lele i rie nọ ọsẹ riẹ o whu no. Ọ ta nọ: “Kaso kaso mẹ rẹ rọwo ze evaọ oke ovona, me ve muhọ eroro kpahe uwhu ọsẹ mẹ na.”

Alejandro ọ kareghẹhọ nọ ọ jẹ mọ oghẹrẹ ẹyao nọ ọ re mọ ẹdẹvo ho. Ọ ta nọ: “Ẹsibuobu mẹ jẹ hae nyabru edọkita re o rri oma mẹ na rekọ ọ rẹ ruẹ oware ọvo ho, ukpoye ọ rẹ ta nọ oma mẹ ọ rrọ ziezi. Onana o tẹ jẹ lẹliẹ omẹ roro nọ uweri nọ mẹ rrọ na, oye o be wha ẹyao na ze.” Nọ oke o be nyaharo na, ẹyao na ọvo o te kpo kẹ omariẹ. O make via ere na, oware areghẹ Alejandro o ru na nọ ọ rọ nyae ruẹ edọkita. Uweri o sae whae ze nọ oma na o gbẹ rọ họre ẹyao tere he, ru nọ ẹyao nọ o rrọ ohwo oma no vẹre ọ rẹ rọ ga viere, je tube ru nọ ohwo ọ rẹ rọ mọ ẹyao nọ ọ re mọ ẹdẹvo ho.

O sae jọ bẹbẹ kẹ ohwo re ọye ọvo o ru eware jọ nọ e roja. Ivan ọ ta nọ: “Nọ Eric o whu no, ma tẹ jẹ dhogbo epanọ ma rẹ rọ ta kẹ imoni mai gbe egbẹnyusu mai. Ma tẹ jẹ gwọlọ epanọ ma rẹ rọ vuẹ ọga iruo riẹ gbe ohwo nọ o wo ighẹ nọ ọ jẹ rria na. U te je wo ebe ekọto sa-sa nọ o gwọlọ nọ ma re kere eme fihọ. O tẹ jẹ gwọlọ nọ ma re koko eware kpobi nọ Eric o wo họ. Eware nana kpobi o gwọlọ nọ ma re ru ghelọ uweri ogaga nọ o jọ omai oma.”

Rọkẹ ahwo jọ, a rẹ rẹriẹ ovao dhe ẹbẹbẹ uwhremu na nọ o tẹ gwọlọ nọ a re ru eware jọ nọ ohwo rai nọ o whu na ọ jẹ hai ru kẹ ae vẹre. Oware utiona o via kẹ Tiina. Ọ ta nọ: “Timo họ ohwo nọ ọ jẹ hae rẹrote eware ebanke gbe eware itieye efa. Rekọ obọnana, mẹ họ ohwo nọ o be rẹrote eware nana yọ o lọhọ kẹ omẹ vievie he. Kọ mẹ sae ginẹ rẹrote eware nana ababọ oware jọ nọ o rẹ thọ omẹ obọ?”

Eware nana nọ ma ta kpahe no na, koyehọ, iroro egaga, ọkora, gbe ẹyao, e sae lẹliẹ ohwo roro nọ edada gbe uweri nọ uwhu o rẹ wha ze e ga vi eware nọ ohwo o re thihakọ rai. O rẹ ginẹ da gaga nọ ohwo o te whu ku ohwo, rekọ nọ ohwo ọ tẹ riẹ nọ enẹ o rẹ jọ no, u re fiobọhọ kẹe thihakọ nọ ohwo riẹ o te whu. Kareghẹhọ re inọ orọnikọ eware kpobi nọ ma ta kpahe na e rẹ via kẹ ohwo kpobi nọ ọ rrọ uweri hi. Ofariẹ, nọ ohwo nọ ọ rrọ uweri ọ tẹ riẹ nọ enẹ o rẹ jọ kẹ ohwo nọ ohwo riẹ o whu, o rẹ lẹliẹ oma sasa iẹe viukpenọ o re roro nọ oware jọ o be thọ kugbei.

KỌ EVA E TE WARIẸ WERE OMẸ ẸDẸJỌ?

Oware nọ ohwo o re rẹro riẹ: Ghelọ epanọ ohwo o weri ga te kẹhẹ, uweri na u re kpotọ nọ oke o be nyaharo na. Orọnikọ onana u dhesẹ nọ uweri u re no ohwo oma riẹriẹriẹ hẹ, hayo kọ ọ te nwane kpairoro vrẹ ohwo riẹ nọ o whu na ha. Ẹme na họ, emẹrera na ohwo o re gbe weri te epaọ ọsosuọ họ. Rekọ edada na e sai wariẹ zihe ze nọ ohwo ọ tẹ kareghẹhọ eware jọ kpahe ohwo na, hayo evaọ oghẹrẹ oke jọ wọhọ ideti ẹdẹ nọ ohwo na o ro whu. Uwhremu na, uweri na u re kpotọ te epanọ ahwo buobu a re ro mu uzuazọ rai họ eyeri wọhọ epanọ o jọ vẹre. Onana o sae lọhọ otẹrọnọ ahwo uviuwou gbe egbẹnyusu ohwo nọ ọ rrọ uweri na a bi fiobọhọ kẹe, yọ ọyomariẹ o bi ru eware nọ i re fiobọhọ kẹe thihakọ.

Ẹvẹ ohwo o re weri kri te? Rọkẹ ahwo jọ, uweri ogaga u re no ae oma nọ umutho emerae jọ ọvo e tẹ vrẹ no. Rọkẹ amọfa buobu, u re te ukpe ọvo hayo ikpe ivẹ taure oma rai o tẹ te sasa. Yọ orọ ahwo jọ dede u re kri vrẹ ere.a Alejandro ọ ta nọ: “Rọkẹ omẹ, enwenọ ikpe esa soso me weri.”

Thihakọ, whọ rehọ omara wawọ amọfa ha. Riẹ nọ makọ epanọ edada gbe uweri ra e ga te kẹhẹ, no ẹdẹ te ẹdẹ na yọ i bi kpotọ. Nọ o rrọ ere na, kọ u wo eware jọ nọ whọ rẹ sai ru enẹna nọ e rẹ lẹliẹ uweri ra kpotọ je ru nọ who gbe ro weri kri ga hrọ họ?