Uzou Avọ Eree
‘Abọ-Omuo Wọso Ogaga Izi Imuomu’
1. Fikieme iruẹru izi imuemu na e jẹ mae rrọ isiuru k’omai?
AHWO buobu a re nyinwe a tẹ t’ẹme kpahe izi imuomu. Rekọ ẹme ehwẹ o rrọ họ. Makọ ahwo a rọwo e riẹ hayo a rọwo ho, izi imuomu e rrọ, yọ a be daoma kpọ ohwo kpobi. Enọ e be gọ Jihova a no rie he. Uzẹme riẹ họ, ae idhivẹri na e mae rehọ ovao dhe. Pọl ukọ na ọ j’omai riẹ kpahọ onana, ọ ta nọ: “Orọnọ uwo gbe azẹ ma bi lele họra na ha, rekọ iride uzou na [enọ a rẹ ruẹ hẹ na], bru egaga na, bi bru ikpahwo ebi akpọ nana, bi bru izi iyoma nọ e rọ eva eria ikpehru.” (Ahwo Ẹfẹsọs 6:12) Evaọ edẹ mai na ọyawọ nọ ogaga izi imuomu e be wha ze o kpehru thesiwa no fikinọ a gele Setan no odhiwu ze no yọ o wo ofu-ọkpoo, ọ riẹ nọ oke riẹ o rẹ kpẹkpẹre.—Eviavia 12:12.
2. Ẹvẹ o sae rọ lọhọ k’omai re ma kparobọ evaọ ohọre mukpahe izi nọ e ga viọ ohwo na?
2 Kọ o lọhọ re a kparobọ evaọ ohọre mukpahe egaga imizi nọ e ga viọ ohwo na? E, rekọ ajokpa ọ ẹkwoma ẹrorọsuọ Jihova riẹriẹriẹ ọvo. Ma rẹ gaviezọ kẹe je koko Ẹme riẹ hrọ. Ẹkwoma ere oruo, a rẹ sae thọ omai no enwoma ugboma, uruemu, gbe ẹraha ẹgba-iroro nọ enọ Setan o bi su e be ruẹ uye rai na.—Jemis 4:7.
Isu Akpọ nọ E Rrọ Eria Obọ Odhiwu
3. Amono Setan ọ kpareso kekeke, kọ evaọ oghẹrẹ vẹ?
3 Jihova o dhesẹ uyero akpọ na k’omai wọhọ epanọ ọ be rueriẹ no oria ukpehru riẹ evaọ obọ odhiwu ze. Ọ kẹ Jọn ukọ na eruẹaruẹ nọ a jo dhesẹ Setan wọhọ “odudu ọwawae ologbo.” Ọ ruẹrẹ oma họ re o tẹ lọhọ ọ raha Uvie Mesaya Ọghẹnẹ na okenọ a nwani yẹi evaọ obọ odhiwu evaọ 1914. Nọ oyena o vae abọ, Setan ọ tẹ rọ ọwọsuọ omuomu ro dhe enọ e jọ otọakpọ dikihẹ kẹ Uvie oyena. (Eviavia 12:3, 4, 13, 17) Ẹvẹ Setan o ti ro fi ẹmo nana? Ẹkwoma ahwo-akpọ nọ e rrọ ahwo ẹro riẹ.
4. Ono họ ehri ogaga egọmeti ahwo-akpọ, kọ ẹvẹ ma rọ riẹ ere?
4 Kẹsena a te dhesẹ arao ojihẹ jọ kẹ Jọn ọnọ o wo izou ihrẹ gbe izei ikpe, arao nọ o bi su “korua korua gbe ahwo gbe erọo-unu gbe orẹwho.” Arao ọyena o dikihẹ kẹ esuo akpọ na soso. A vuẹ Jọn nọ ‘odudu na [Setan Ẹdhọ na] ọ rehọ ogaga gbe isuẹsu gbe udu kpobi kẹ arao na.’ (Eviavia 13:1, 2, 7) Ẹhẹ, Setan họ ehri ogaga gbe udu-esuo egọmeti ahwo-akpọ. Fikiere, wọhọ epanọ Pọl ukọ na o kere, enọ e ghinẹ rrọ ‘isu akpọ nana’ họ “izi iyoma nọ e rọ eva eria ikpehru,” enọ e be kpọ egọmeti ahwo-akpọ. U fo re enọ e gwọlọ gọ Jihova kpobi a wo otoriẹ onana ziezi.—Luk 4:5, 6.
5. Diẹse a bi koko isu na kpohọ?
5 Dede nọ isu buobu a bi rri oma rai họ egba-egagọ, orẹwho ovuovo o riẹ nọ o be roma kpotọ kẹ esuo Jihova hayo ọrọ Ovie riẹ nọ o ro mu na, Jesu Kristi hi. Aikpobi a be họre re a keria esuo rai. Nẹnẹ, wọhọ epanọ ikuigbe obe Eviavia i dhesẹ, “izi ukumuomu” na a bi koko isu akpọ na họ ziọ “ẹdẹ ẹmo ologbo Ọghẹnẹ Erumeru na” eva Amagẹdọn.—Eviavia 16:13, 14, 16; 19:17-19.
6. Fikieme ma jẹ yọroma re a siọ omai ba esu ruọ ẹtha abọjọ uyerakpọ Setan?
6 Kẹdẹ kẹdẹ ozighi ọ isuẹsu, uyerakpọ, ekọ, gbe erọ egagọ nọ e be hẹriẹ uviuwou ahwo-akpọ na ekekẹ i bi kpomahọ izuazọ ahwo. Evaọ ohọre nana, o lọhọ re ahwo a rọ ẹmeunu hayo ugbobọ thọ orẹwho, uyẹ, ẹrọ-unu hayo utu nọ a rrọ. O tẹ make rọnọ uvumọ oware u te rai evaọ ohọre he, ahwo jọ a rẹ ruẹ nọ a be jẹ abọ jọ rehọ siọ ọjọ ba. Rekọ makọ abọ ohwo hayo edhere kpobi nọ a jẹ kẹhẹ, ono a be ghinẹ tha uke na? Ebaibol na ọ ta vevẹ nọ: “Akpọ na ọsoso ọ rọ obọ ogaga oyoma na.” (1 Jọn 5:19) Ẹvẹ ohwo ọ sae rọ whaha esu thọ lele ahwo-akpọ edekọ? Ajokpa ẹkwoma uketha ovọvọ riẹ nọ ọ rẹ rọ kẹ Uvie Ọghẹnẹ ọ gbẹ jọ abọ ọvuọvo vievie he evaọ ehọre ozighi akpọ na.—Jọn 17:15, 16.
Idhere Ẹghẹ Ukumuomu Na
7. Ẹvẹ ẹghẹ Setan o ro dhesẹ oma via no evaọ egagọ erue nọ o bi ro ruiruo?
7 Evaọ ikuigbe kpobi, Setan ọ rehọ olahiẹ ẹmeunu gbe ugboma ro si ahwo no egagọ uzẹme no. Ọ rehọ idhere eviẹhọ efa ro ruiruo no re—iruo ẹghẹ gbe idhere elẹliẹhọ. Ọ rehọ ẹghẹ gba ahwo buobu yao ebi no ẹkwoma egagọ erue, ru ai roro nọ Ọghẹnẹ a be gọ na. Fikinọ a kare eriariẹ egbagba Ọghẹnẹ jẹ kare uyoyou kẹ uzẹme na, iruẹru gbe iruemu urirẹ egagọ e rẹ sai si ai urru hayo kie lele iruo ilogbo rai. (2 Ahwo Tẹsalonika 2:9, 10) Rekọ a vẹvẹ omai unu inọ makọ evaọ udevie enọ e rrọ egagọ uzẹme, “ejọ e rẹ te hẹriẹ . . . a vẹ te kezọ kẹ izi ọviẹhọ avọ uwuhrẹ ikọ-imuomu.” (1 Timoti 4:1) Ẹvẹ oyena o sae rọ via?
8. Ẹvẹ Setan ọ sae rọ bẹbẹ omai ruọ egagọ erue o tẹ make rọnọ ma be gọ Jihova?
8 Evaọ edhere ẹghẹ, Ẹdhọ o re du obọ họ oyẹlẹ mai ro ruiruo. Kọ ozọ ohwo u gbe bi mu omai? Otẹrọ ere, ma rẹ sai kie kẹ otunyẹ nọ o re no obọ imoni hayo erivẹ ze re ma w’abọ evaọ iruemu nọ e tohọ no egagọ erue ze. Kọ ma wo omoya? Otẹrọ ere, eva e sae dh’omai a tẹ k’omai ohrẹ hayo amọfa a gbẹ rọwo kugbe ẹjiroro nọ ma jẹ hẹ. (Itẹ 15:10; 29:25; 1 Timoti 6:3, 4) Ukpenọ ma re nwene eriwo mai re e rọwo kugbe erọ oriruo Kristi, ma rẹ sai bigba enọ i re ‘wuhrẹ onọ ma gwọlọ,’ enọ e rẹ ta nọ ese Ebaibol na ọvo gbe ẹria emamọ uzuazọ u te. (2 Timoti 4:3) Makọ ma kuomagbe ẹko egagọ ọfa hayo ma be gọ evaọ edhere obọ mai nọ o were omai o rrọ Setan oja ha, oware nọ o riẹe oja họ thakpinọ ma be gọ Jihova evaọ edhere nọ Ọghẹnẹ ọ kpọ ẹkwoma Ẹme riẹ gbe ukoko riẹ hẹ.
9. Ẹvẹ Setan ọ be rọ ẹghẹ rehọ owezẹ ezaveyae ru ẹjiroro riẹ gba?
9 Setan ọ be jẹ rehọ ẹghẹ lẹliẹ ahwo họ re a ru isiuru rai gba evaọ idhere ethọthọ. O ru onana no ẹkwoma isiuru ọ omakugbe owezẹ ezaveyae. Be siọ ute ẹfuọ Ebaibol na, ibuobu evaọ akpọ na a rri owezẹ evaọ udevie imava nọ e rọo ho wọhọ omawere nọ o thọ họ hayo wọhọ edhere nọ a re ro dhesẹ nọ a kpako no. Kọ ẹvẹ kpahe enọ e rọo no? Ibuobu i re bruẹnwae. Yọ o tẹ make rọnọ ọrivẹ orọo rai o bi gb’ọfariẹ hẹ, ibuobu a rẹ gwọlọ orọo-ofa hayo ẹhẹriẹ re a ruẹse jọ kugbe omọfa. Setan ọ be rọ ẹghẹ kpakpa ahwo re a rria kẹ omawere obọnana—ru ai re a f’aro kẹ orọnikọ epanọ uruemu rai u ti kpoma họ ae hayo amọfa evaọ obaro ọvo ho rekọ maero oghẹrẹ nọ u ti kpomahọ usu rai kugbe Jihova gbe Ọmọ riẹ.—1 Ahwo Kọrint 6:9, 10; Ahwo Galesha 6:7, 8.
10. Idhere vẹ Setan ọ be rọ gwọlọ gbe uruemu mai kpahe ọfariẹ-ogbe gbe ozighi ku?
10 Isiuru efa jọ nọ a ro kugbe ma omai họ arozaha. Nọ o tẹ rrọ ziezi, o rẹ sai ru ugboma, iroro gbe ẹgba-iroro mai jọ sasasa. Rekọ eme ma re ru okenọ Setan ọ tẹ be rọ ẹghẹ rehọ etoke eriosehọ daoma rẹriẹ iroro mai no abọ Ọghẹnẹ? Wọhọ oriruo, ma riẹ nọ Jihova o mukpahe ọfariẹ-ogbe gbe ozighi. Rekọ a te bi dhesẹ eware itieye na evaọ ughe etẹlivisiọne hayo uwou isinima, kọ ma rẹ keria ọvo rri rai fihọ oma? Jẹ kareghẹhọ inọ Setan ọ te daoma re ọ ruẹ nọ eware itieye na e tọtọ viere nọ ọraha riẹ ọ be kẹle na, keme “ahwo omuomu gbe otu eviẹhọ a re ti no eyoma ruọ onọ o mai yoma, eviẹwẹ gbe enọ a viẹhọ.” (2 Timoti 3:13) Fikiere o gwọlọ nọ ma re muẹro h’otọ ẹsikpobi kpahe eghẹ Setan.—Emuhọ 6:13; Olezi 11:5; Ahwo Rom 1:24-32.
11. Idhere vẹ makọ ohwo nọ ọ riẹ uzẹme na kpahe uruemu imizi ọ sai ro kie ẹta ọ gbẹ yọrọ oma ha?
11 Ma tẹ jẹ riẹ inọ enọ i bi wo abọ kugbe oghẹrẹ iruemu imizi kpobi—iruẹru ẹvagba, iruẹru eda, hayo ẹmeọta kugbe enọ i whu no—e rrọ tọtọtọ kẹ Jihova. (Iziewariẹ 18:10-12) Ma te wo onana họ iroro, ma rẹ nekpẹ mi eboẹva ha, hayo kọ ma re zizie ai ze iwou mai re a ti ru iruẹru idhivẹri rai hi. Kọ ma rẹ gaviẹ ezọ kẹ ai a tẹ rehọ oma via evaọ etehe-ughe mai hayo Itanẹte? Dede nọ ma rẹ gwọlọ usiwo evaọ obọ ọboẹva ha, kọ ma re thuru ifi jọ fihọ obọ ọmọfofa mai, bi roro nọ o te thọ ọmọ na no enwoma jọ? Nọ ma riẹ nọ Ebaibol na e ghọ iruẹru imizi na, kọ okenọ ma tẹ be mọ, ma rẹ nyabru ohwo jọ nọ a roro nọ o wo ogaga nọ ọ rẹ rọ kpọ ẹyao no ohwo oma?—Ahwo Galesha 5:19-21.
12. (a) Ẹvẹ a sae rọ rehọ ikporakporo ru omai roro kpahe eware nọ ma riẹ nọ e thọ? (b) Ẹvẹ oghẹrẹ ẹgọ ohwo, oghẹrẹ nọ o re ru eto, hayo oghẹrẹ ẹmeọta riẹ e sai ro dhesẹ nọ ohwo ọ be rehọ adhẹẹ kẹ enọ Jihova o mukpahe edhere uzuazọ rai? (c) Eme a gwọlọ mi omai otẹrọnọ ma rẹ whaha ekie ruọ idhere elẹliẹhọ Setan?
12 Ebaibol na ọ ta nọ igberedha gbe egbegbe kpobi a rẹ tubẹ fodẹ ae (avọ ẹjiroro oyoma) evaọ udevie mai hi. (Ahwo Ẹfẹsọs 5:3-5) Rekọ ẹvẹ otẹrọnọ a rehọ eme itieye na rọ so ile avọ edo ikporakporo nọ i re siuru nọ i bi kie ziezi, enọ i re mu urirẹ? Kọ ma te wariẹ ile nọ i bi jiri owezẹ ezaveyae nọ e rrọ orọo ho, ibimu egaga nọ a rẹ lọ kẹ omawere, gbe iruemu iyoma efa? Hayo nọ ma riẹ nọ ma rẹ raro kele edhere uzuazọ enọ i bi ru eware itieye he na, kọ ma be gwọlọ dhesẹ oma mai kugbe ai ẹkwoma aruorokele edhere ẹgọ, oghẹrẹ nọ a re bru eto, hayo oghẹrẹ ẹmeọta rai? Ẹvẹ idhere nọ Setan o bi ro ruiruo rọ viẹ ahwo họ nwene kpohọ iroro ogbekuo riẹ i sioma no jẹ vọ avọ enwoma te! (2 Ahwo Kọrint 4:3, 4) Re ma whaha ekie ruọ idhere eviẹhọ riẹ, ma rẹ whaha ekie lele akpọ na. U fo nọ ma riẹ enọ e rrọ “ikpahwo ebi akpọ ọnana” jẹ họre mukpahe osuthọ rai.—1 Pita 5:8.
Thoma Kpahe re Whọ Kparobọ
13. Ẹvẹ o sae rọ lọhọ k’omai, ghelọ sebaẹgba mai, re ma fi akpọ nọ Setan o bi su na kparobọ?
13 Taure Jesu o te ti whu, ọ ta kẹ ikọ riẹ nọ: “Wha kru udu ga! Me fi akpọ na kparobọ no.” ( Jọn 16:33, NW ) A sae jọ enọ e rẹ kparobọ re. Oware wọhọ ikpe 60 e ruọ emu no, Jọn ukọ na o kere nọ: ‘Ono họ ọnọ o fi akpọ na kparobọ no, ogbẹrọ ọnọ ọ rọwo nọ Jesu họ Ọmọ Ọghẹnẹ?’ (1 Jọn 5:5) Ma re dhesẹ ẹrọwọ otiọye na via ẹkwoma ijaje Jesu nọ ma re yoẹme kẹ jẹ rẹro so Ẹme Ọghẹnẹ, wọhọ epanọ Jesu o ru. Eme ọfa o gwọlọ? Inọ ma bigba ukoko nọ ọ rrọ Uzou riẹ na. Ma te ruthọ, ma re kurẹriẹ jẹ gwọlọ erọvrẹ Ọghẹnẹ ẹkwoma idhe Jesu. Evaọ edhere otiọna, ghelọ sebaẹgba gbe iruthọ mai, ma rẹ sae kparobọ re.—Olezi 130:3, 4.
14. Se Ahwo Ẹfẹsọs 6:13-17, re whọ rehọ enọ gbe ikereakere nọ e rrọ edhe-ẹme nana rọ t’ẹme kpahe irere nọ ma re wo no abọ ọvuọvo ẹgọ-ẹmo abọ-ẹzi na ze.
14 Re ma kparobọ, o gwọlọ nọ ma re fi “ẹgọ-ẹmo Ọghẹnẹ ọsoso họ oma,” ma rẹ siọ abọ ọvo riẹ ba ha. Iviena rovie Ebaibol ra kpohọ Ahwo Ẹfẹsọs 6:13-17, re who se oghẹrẹ nọ a dhesẹ ẹgọ-ẹmo ọyena. Ẹkwoma enọ obotọ na nọ whọ rẹ za, roro oghẹrẹ nọ whọ rẹ sai ro wo erere no uketha nọ abọ ọvuọvo ẹgọ-ẹmo na ọ rẹ k’owhẹ.
“Rehọ umueku uzẹme ro mu”
Dede nọ ma riẹ uzẹme na, ẹvẹ uwuhrẹ ẹsikpobi, eroro didi kpahe uzẹme Ebaibol na, gbe ewuhrẹ okpohọ e sae rọ thọ omai? (1 Ahwo Kọrint 10:12, 13; 2 Ahwo Kọrint 13:5; Ahwo Filipai 4:8, 9)
“Ẹgọ ẹrẹreokie”
Ono o wo ute ẹrẹreokie ọnana? (Eviavia 15:3)
Dhesẹ oghẹrẹ nọ aghẹmeeyo kẹ ijaje Jihova o rẹ sai ro kpe ohwo fihọ kẹ enwoma abọ-ẹzi. (Iziewariẹ 7:3, 4; 1 Samuẹle 15:22, 23)
“Wha eviẹ ọruẹrẹ kpahọ usiuwoma udhedhẹ họ awọ rai”
Ẹvẹ o jẹ rọ uketha k’omai re ma hae rọ awọ mai nyae ta kẹ amọfa kpahe ọruẹrẹfihotọ udhedhẹ Ọghẹnẹ ẹsikpobi? (Olezi 73:2, 3; Ahwo Rom 10:15; 1 Timoti 5:13)
“Ojese orọwọ”
Ma te wo ẹrọwọ nọ ọ ghinẹ dọmu whawha, ẹvẹ ma re ru nọ ma tẹ rẹriẹ ovao ku eware nọ e gwọlọ ru omai wo avro hayo dhẹ ozọ? (2 Ivie 6:15-17; 2 Timoti 1:12)
“Etu usiwo”
Ẹvẹ ẹruore esiwo o re ro fiobọhọ kẹ ohwo whaha ekie ruọ agbefẹ ọ awa nọ a rẹ ro vrẹta kpahe ekwakwa efe? (1 Timoti 6:7-10, 19)
“Ọgbọdọ Ẹzi na”
Eme ma rẹ rẹro so ẹsikpobi nọ ma tẹ be họre ewọsuọ nọ i mukpahe edikihẹ abọ-ẹzi mai hayo erọ amọfa? (Olezi 119:98; Itẹ 3:5, 6; Matiu 4:3, 4)
Eme ọfa ọ r’oja rọkẹ obokparọ evaọ ẹmo-ofio abọ-ẹzi? Ẹvẹ a rẹ rehọ iẹe ruiruo kpekpe te? Ono a rẹ rehọ iẹe ruiruo kpahe? (Ahwo Ẹfẹsọs 6:18, 19)
15. Ẹvẹ ma sai ro dikihẹ gaga evaọ ohọre abọ-ẹzi na?
15 Wọhọ isoja Kristi, ma rrọ abọ ogbaẹmo ulogbo nọ o be họre ohọre abọ-ẹzi. Ma tẹ jaja aro vi je fi ẹgọ-ẹmo Ọghẹnẹ ọsoso na họ uvi iruo, ma ti whu fihọ ẹmo na ha. Ukpoye, ma te jọ obufihọ kẹ ibe idibo Ọghẹnẹ. Ma rẹ te ruẹrẹ oma họ jẹ dada mu avọ ajọwha họre, vaha usiuwoma Uvie Mesaya Ọghẹnẹ, egọmeti obọ odhiwu nọ Setan ọ wọso gaga na.
Eme Ọkiẹkpemu
• Fikieme enọ e be gọ Jihova a jẹ r’oma họ akotọ evaọ ozighi akpọ na?
• Didi idhere elẹliẹhọ jọ Setan o bi ro su Ileleikristi kpohọ enwoma abọ-ẹzi?
• Ẹvẹ ẹgọ-ẹmo abọ-ẹzi nọ Ọghẹnẹ ọ kẹ ọ rẹ rọ thomai evaọ ẹmo-ofio abọ-ẹzi mai na?
[Iwoho nọ e rrọ ẹwẹ-obe avọ]
A bi koko erẹwho na kpohọ Amagẹdọn