Ebaibol Na—Obe-Ewuhrẹ nọ U Dhesẹ Oghẹrẹ nọ A Rẹ Rria

“ẸME Ọghẹnẹ ọ rẹjọ bẹdẹ, avọ iruo, ọ da vi ọpia akọava . . . gbe eva ekiẹ jẹ riẹ ẹjiroro obọ eva.” (Ahwo Hibru 4:12) Edhesẹ nana ọrọ oware nọ Ẹme Ọghẹnẹ ọ rẹ sai ru na o kpoka họ Ebaibol na wọhọ obe nọ o rro vi emamọ obe gheghe ọvo.

Okere-obe egagọ jọ ọ ta riẹ kpẹkpẹe nọ: “Ovuẹ riẹ u wuzou kẹ izuazọ mai wọhọ ẹwẹ-ose.” O te fibae nọ: “Who te wo isiuru gbe ẹgwọlọ mai kẹ usiwo inẹnẹ họ iroro ro se Ebaibol na, irere igbunu whọ rẹ ruẹ.” Wọhọ ukpẹ nọ u re lo nwranwranwra, Ebaibol na o re fielo họ eme gbe ebẹbẹ ilogbo ẹrria inẹnẹ buobu.—Olezi 119:105.

Evaọ uzẹme, areghẹ nọ a rovie via evaọ Ebaibol na o wo ẹgba nọ ọ rẹ rọ kpọ iroro mai, fiobọhọ k’omai ku ebẹbẹ họ, ru uzuazọ mai w’aro, jẹ thomai kpahe avọ ona nọ ma re ro thihakọ iyero ebẹbẹ nọ ma sai nwene he. Maero, Ebaibol na o re fiobọhọ k’omai riẹ je you Ọghẹnẹ.

Obe nọ O rẹ Kẹ Ẹjiroro

Ọnoweme Ebaibol na, Jihova Ọghẹnẹ, ‘ọ riẹ idhere mai kpobi.’ Ọ riẹ kpahe ẹgwọlọ ugboma, iroro, gbe abọ-ẹzi mai tube vi omai dede. (Olezi 139:1-3) Avọ iroro, o fi izi họ kpahe uruemu ahwo-akpọ. (Maeka 6:8) O rọ oware areghẹ re ma gwọlọ wo otoriẹ izi gbe ekpọvio eyena je wuhrẹ epanọ ma rẹ rọ rria lele ai. Ọso-ilezi na ọ ta nọ eva e rẹ were ohwo nọ “awere riẹ ọ rẹ jọ evaọ uzi ỌNOWO” na. “Koware koware nọ o ru, u re woyei obọ.” (Olezi 1:1-3) Irẹro itieye na i ghine fo kẹ ẹkiẹriwo mai.

Maurice, iticha isukulu nọ o seri iruo họ no, ọ rọwo n’otọ ze inọ Ebaibol na ọ rẹ kẹ erere evaọ abọ ikuigbe gbe obe-oriẹ. Ghele na, o wo avro sọ Ọghẹnẹ o ghine gie ẹwolo ku ei. Nọ ọ kezọ kẹ oruvẹ kpahe oware nọ Ọghẹnẹ ọ jẹ rehọ Ẹme riẹ kẹ ahwo-akpọ no, Maurice ọ tẹ kiẹ eruẹaruẹ Ebaibol sa-sa riwi. Wọhọ ọmoha, o wuhrẹ kpahe ikuigbe anwae, ebe nọ a kere, otokiẹ-eriariẹ, gbe ikuigbe-eria. Ọ rọwo nọ ọ jọ aro obọ riẹ wo areghẹ hrọ te epanọ ọ gbẹ sae rọ ruẹ iriruo sa-sa nọ e tha ẹgbagba Ebaibol na uke he. “Ilale ifofe erọ omosasọ, efe, gbe omawere uzuazọ i tu omẹ aro. U yoma kẹhẹ, mẹ jọ ogbori je tuaro kẹ ewoma gbe ẹgbagba obe nọ o mae rro nọ a kere no.”

Maurice, ọnọ ọ vrẹ ikpe 70 no enẹna, nọ ọ jẹ ta kpahe oma nọ Jesu ọ rọ via kẹ Tọmọs ukọ na, ọ ta avọ ovuhumuo nọ: “A kpọ obọ mẹ kpohọ ‘omola nọ u bi hwẹ’ na no onọ u ti si avro no iroro mẹ bẹdẹ bẹdẹ inọ Ebaibol na ghinọ uzẹme.” (Jọn 20:24-29) Wọhọ epanọ Pọl ukọ na ọ ta gbagba na, Ebaibol na ọ rẹ fere iroro eva via, yọ o rẹ rọ otofa kẹ uzuazọ. O ghinẹ rọ obe nọ u dhesẹ oghẹrẹ nọ a rẹ rria.

O Rẹ Lẹliẹ Uzuazọ Idhọvẹ Dọmu

Ebaibol na ọ rẹ jẹ kẹ ohrẹ nọ u re fiobọhọ kẹ ahwo siobọno ekpere uruemu. Daniel ọ sai siobọno uruemu ugbegbe ivovavovo, jẹ se epati ọ uruemu odode gbe idieda ba. (Ahwo Rom 13:13; 2 Ahwo Kọrint 7:1; Ahwo Galesha 5:19-21) U re vevẹ, re a siobọno iruemu itieye na je fi “ohwo ọkpokpọ na họ oma” o gwọlọ omodawọ ogaga. (Ahwo Ẹfẹsọs 4:22-24) Daniel ọ ta nọ: “O jọ use-abọ, keme ma gba ha.” Ghele na, ọ kparobọ. Enẹna Daniel o bi se Ẹme Ọghẹnẹ kẹdẹ kẹdẹ, yọ u ru rie kẹle Jihova.

Nọ ọ jẹ rro kpako, Daniel o wo adhẹẹ odidi gaga kẹ Ebaibol na—dede nọ o se rie ẹdọvo ho—yọ ọ jẹ hae lẹ se Ọghẹnẹ k’aso k’aso. Ghele na, oware jọ o kare riẹ. O wo evawere he. Enwene ologbo ọ tẹ roma via nọ ọ ruẹ odẹ Ọghẹnẹ evaọ Ebaibol. (Ọnyano 6:3; Olezi 83:18) O te je se odẹ na Jihova evaọ okenọ ọ tẹ be lẹ, elẹ riẹ i te koko oma họ viere. “Jihova o te ti zihe ruọ ohwo nọ ọ mae kẹle omẹ kpobi, yọ ọ gbẹ rọ ogbẹnyusu nọ ọ mae kẹle omẹ.”

Taure o te ti wuhrẹ kpahe Ebaibol na, eriwo Daniel kpahe obaro na ọ jọ bizi bizi. Ọ ta nọ: “O bẹ hẹ re a riẹ oware nọ o rọ akpọ na via. Ozọ u je mu omẹ, mẹ tẹ jẹ daoma re me ruiruo gaga re mẹ se onana ba eroro kpahe.” O te ti wuhrẹ nọ Ọghẹnẹ ọ te rehọ uvi-ẹdhoguo ze evaọ otọakpọ ọfuafo, oria nọ ahwo-akpọ ẹmeoyo a te jọ reawere udhedhẹ gbe evawere ebẹdẹ bẹdẹ. (Olezi 37:10, 11; Daniẹl 2:44; Eviavia 21:3, 4) Enẹna Daniel o wo ẹruore nọ o muẹro. Okpomahọ ọgaga Ebaibol ọnana o te fiobọhọ kẹe wo eriwo ọliọliọ ọrọ uzuazọ.

Obufihọ Rọkẹ Efikparobọ Ebẹbẹ Iroro

George ọ jọ ikpe ihrẹ nọ oni riẹ o whu. Ozọ ekiẹzẹ evaọ aso u je mu ei, keme ọ riẹ hẹ sọ ọ te hẹrioke. Kẹsena o te se eme nọ Jesu ọ ta kpahe uwhu gbe ẹkparomatha: “Oke o be tha nọ enọ e rọ eva [uki] kpobi i je ti yo uru [Jesu], a vẹ te nya via.” Eme Jesu enana i te je duobọ tei: “Mẹ họ ẹkparomatha gbe uzuazọ: ọ nọ ọ rọwo omẹ makọ o whu no, ọ rẹ te zọ.” (Jọn 5:28, 29; 11:25) Eme itieye na i wo iroro, e rrọ gbagba, jẹ kẹ omosasọ. George ọ ta nọ: “Orọnikọ uzẹme nana u re kpomahọ iroro na ọvo ho rekọ u re duobọte udu na.”

Daniel, ọnọ ma kake fodẹ na, o wo ozodhẹ re. Oni riẹ ọvo ọ sae yọrọ iẹe he, fikiere ọ tẹ jẹ ria iwou ẹruorote sa-sa. Oma o jẹ jariẹ wọhọ ọrara yọ o je siuru ufuoma ọ uviuwou uyoyou. Uwhremu na, o te duku oware nọ ọ jẹ gwọlọ na ẹkwoma uwuhrẹ Ebaibol na. Daniel o te kuomagbe ukoko Ileleikristi orọ Isẹri Jihova o te zihe ruọ abọ jọ uviuwou abọ-ẹzi, oria nọ ọ jọ ruẹ oma odederehọ gbe uyoyou amọfa. Evaọ uzẹme, Ebaibol na ọ rẹ ghinẹ kẹ erere evaọ edhere nọ o re ruiruo gbe evaọ edhere nọ ọ rẹ veva.

Kareghẹhọ, Jihova ọ rẹ ruẹ oware nọ o rọ udu mai ọ tẹ jẹ riẹ oware nọ ma be gwọlọ. Ọghẹnẹ ọ “riẹ otọ eva” na, yọ ọ rẹ “kẹ ohwo epanọ iruo riẹ e rọ.”—Itẹ 21:2; Jerimaya 17:10.

Ohrẹ nọ U re Ruiruo Evaọ Uzuazọ Uviuwou

Ebaibol na ọ rẹ kẹ ohrẹ nọ u re ruiruo evaọ eme oyerikugbe ahwo. George ọ ta nọ: “Ẹwhọ uruemu hayo ororothọ yọ usu iyero jọ nọ e rẹ mae kẹ idhọvẹ evaọ uzuazọ.” Ẹvẹ o bi ro yeri kugbe ai? “Me te roro nọ ohwo jọ o wo oware jọ kpahe omẹ, ohrẹ oliọliọ nọ o rọ Matiu 5:23, 24 na me re fihọ iruo: ‘Ru udhedhẹ kugbe oniọvo ra.’ Uzẹme olọlọhọ na nnọ mẹ rẹ sae ta kpahe ẹwhọ na o rẹ wha emamọ iyẹrẹ ze. Mẹ rẹ jọ oma mẹ ruẹ udhedhẹ Ọghẹnẹ nọ Ebaibol na ọ ta kpahe na. Ohrẹ Ebaibol na u re ruiruo. U w’iruo gaga.”—Ahwo Filipai 4:6, 7.

Avro ọ tẹ rọ udevie ọzae avọ aye, u re fo re aimava a “yo vẹrẹ, [a] vẹ rọ ẹrera ruọ ẹme-ọta, je muofu ẹrera.” (Jemis 1:19) Ohrẹ utioye na o rẹ lẹliẹ ẹmeọta-kugbe nyaharo. George o fibae nọ: “Okenọ me te fi ohrẹ kpahe eyou aye mẹ na h’iruo re me je ru ei epanọ me bi ru oma mẹ, mẹ rẹ ruẹ irere ẹsiẹsiẹ. O rẹ lọhọ kẹe viere re ọ k’omẹ adhẹẹ.” (Ahwo Ẹfẹsọs 5:28-33) Ẹhẹ, Ebaibol na o wuhrẹ omai epanọ ma re ro vuhumu je ruiruo kpahe sebaẹgba obọ mai gbe epanọ ma sae rọ kparobọ evaọ akothiho kẹ erọ amọfa.

Ohrẹ nọ O rẹ Tọ

Solomọn Ovie owareghẹ na ọ ta nọ: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.” (Itẹ 3:5, 6) Ẹvẹ eme eyena e lọhọ te, rekọ avọ iruo!

Ebaibol na ọ rẹ wha ewoma ze. Ọ rẹ lẹliẹ enọ i you Ọghẹnẹ kpọ uzuazọ rai rọwo kugbe oreva riẹ jẹ ruẹ evawere evaọ ẹnya “eva ujaje ỌNOWO!” (Olezi 119:1) Epanọ uyero mai o rọ kpobi kẹhẹ, Ebaibol na o wo ọkpọvio gbe ohrẹ nọ ma gwọlọ. (Aizaya 48:17, 18) Sei kẹdẹ kẹdẹ, roro kpahe oware nọ who se na, je fi ei họ iruo. U ti ru iroro ra jọ vevẹ jẹ tọvi eware nọ e rọ fuafo je woma. (Ahwo Filipai 4:8, 9) Orọnikọ who ti wuhrẹ epanọ a rẹ rria jẹ reawere uzuazọ ọvo ho rekọ te epanọ a re ro you Ọnọma uzuazọ na.

Ẹkwoma elele edhere otiọye na, Ebaibol na ọ te jọ oware nọ u vi emamọ obe jọ ọvo kẹ owhẹ wọhọ epanọ o rọ kẹ ima amọfa no na. O te ghinẹ jọ obe nọ u dhesẹ oghẹrẹ nọ a rẹ rria!

[Uwoho nọ o rrọ ẹwẹ-obe avọ 6]

Ebaibol na ọ sai ru ọtamuo ra ga viere re who fi iruemu enwoma kparobọ

[Uwoho nọ o rrọ ẹwẹ-obe avọ 7]

Ebaibol na o re wuhrẹ owhẹ epanọ a re ro sikẹle Ọghẹnẹ