Uyoyou Ọghẹnẹ U Ku Rai Gbe

OKENỌ a to ukoko Ileleikristi na họ evaọ ikpe-udhusoi ọsosuọ orọ Ekele Oke mai na, obọdẹ oware jọ nọ a rọ riẹ ai odẹ—ghelọ koria koria nọ ahwo riẹ a no ze họ—okugbe nọ a wo. Idibo Ọghẹnẹ uzẹme yena a no erẹwho Asia, Europe, gbe Africa ze. A rẹ jọ udevie rai ruẹ ahwo nọ a no oghẹrẹ uyero sa-sa ze—izerẹ, elakpa, erigbo, ahwo nọ a dhẹ no orẹwho rai fiki okpẹtu jọ, gbe ehreki. Ejọ e jọ ahwo Ju, efa e jọ ahwo orẹwho Egedhọ. Ibuobu rai e jọ ibrẹnwae vẹre, ahwo nọ a wo uruemu ezae-duezae, egbidi, iji hayo igbulegbu. Ghele na, okenọ a zihe ruọ Ileleikristi no, a tẹ se ekpere uruemu rai ba je wo okugbe ọvo evaọ ẹrọwọ na.

Eme o fi obọ họ kẹ egagọ Ileleikristi ikpe-udhusoi ọsosuọ sai ku ahwo nana kpobi gbe evaọ okugbe ọvo? Ẹvẹ a sae rọ jọ udhedhẹ kugbe ohwohwo jekugbe amọfa? Fikieme a gbe je ro wobọ evaọ ọkparesuọ gbe ozighi hi? Fikieme Ileleikristi ọsosuọ a ro wo ohẹriẹ gaga no egagọ ilogbo nọ e viodẹ nẹnẹ?

Eme Ọ Whẹ Ahwo Ukoko Ileleikristi na Gbe?

Ugogo oware nọ u ku ibe enọ e rọwo gbe evaọ ikpe-udhusoi ọsosuọ na họ uyoyou nọ a wo kẹ Ọghẹnẹ. Ileleikristi yena a vuhumu inọ ute ọsosuọ rai họ re a rehọ udu, ẹwẹ, gbe eva rai kpobi you Ọghẹnẹ uzẹme na, Jihova. Wọhọ oriruo, a vi Pita ukọ na nọ ọ jọ ohwo Ju uwou re o weze kpohọ uwou ohwo orẹwho Egedhọ, ohwo nọ ọ hae te sae nya usu kugbe vẹre he. Uyoyou nọ o wo kẹ Jihova oye o wọ riẹ nya uwou yena. Pita gbe Ileleikristi ọsosuọ efa a reawere usu okpekpe kugbe Ọghẹnẹ, yọ onana o sae lọhọ fiki eriariẹ egbagba nọ a wo kpahe oghẹrẹ ohwo nọ Ọghẹnẹ ọ rrọ, eware nọ e rẹ were iẹe gbe enọ e rẹ dhae eva. Oke o be nyaharo na, Ileleikristi na kpobi a te ti vuhumu inọ o rrọ oreva Jihova kẹ ai re a “jọ iroro gbe oziẹ-obro ọvo.”—1 Ahwo Kọrint 1:10; Matiu 22:37; Iruẹru 10:1-35.

Ẹrọwọ nọ a fihọ Jesu Kristi u te je si ibe enọ e rọwo na kẹle oma viere. A gwọlọ nya lele oriruo riẹ kpekpekpe. Ọ kẹ rai ujaje nọ: “Whai ohwo o you ohwo wọhọ epanọ me you owhai . . . Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:34, 35) Onana o rẹ jọ uyoyou okpakpafua gheghe he, rekọ uyoyou omolahiẹ nọ a re wo kẹ omọfa. Eme uyoyou utionana u re su kpohọ? Jesu ọ lẹ kpahe ahwo nọ a fi ẹrọwọ họ iẹe nọ: “Mẹ lẹ . . . re ai kpobi a jọ ọvo; wọhọ owhẹ, Ọsẹ, epanọ whọ rọ eva mẹ, mẹ tẹ rọ eva ra, re a jọ eva mai re.”—Jọn 17:20, 21; 1 Pita 2:21.

Jihova o ku ẹzi ọfuafo hayo ogaga iruo riẹ ku idibo uzẹme riẹ. Ẹzi ọnana ọ wha okugbe haro evaọ udevie rai. U fi obọ họ kẹ ai wo otoriẹ iwuhrẹ Ebaibol na, enọ a jẹrehọ evaọ ikoko na kpobi. Ovuẹ ovona idibo Jihova a je whowho—erufuọ odẹ Jihova ẹkwoma Uvie Mesaya Ọghẹnẹ na, egọmeti obọ odhiwu nọ o ti su ahwo-akpọ kpobi. Ileleikristi ọsosuọ a wo otoriẹ edikihẹ rai nọ a rọ rrọ ‘erọ akpọ na ha.’ Fikiere, oke kpobi nọ ohọre omoma hayo nọ ẹmo-ofio ọ tẹ roma via, Ileleikristi na a jọ abọ ọvuọvo ho. A ru udhedhẹ kugbe ahwo kpobi.—Jọn 14:26; 18:36; Matiu 6:9, 10; Iruẹru 2:1-4; Ahwo Rom 12:17-21.

Otu nọ ọ rọwo na kpobi a ru ẹkabọ rai evaọ ẹwhaharo udhedhẹ. Eva oghẹrẹ vẹ? Ẹkwoma ẹromuhọ inọ uruemu rai o rọwokugbe Ebaibol na. Oyejabọ nọ Pọl ukọ na o ro kere se Ileleikristi nọ: “Wha si obọnọ uruemu ẹdẹe nọ wha je yeri, ohwo anwae na,” jẹ “wha ohwo ọkpokpọ na họ oma.”—Ahwo Ẹfẹsọs 4:22-32.

A Yọrọ Udhedhẹ

Uzẹme, Ileleikristi ikpe-udhusoi ọsosuọ na a gba ha, yọ iyero jọ e roma via nọ i fi okugbe rai họ ẹdawọ. Wọhọ oriruo, Iruẹru 6:1-6 o ta nọ ẹwhọ ọ roma via eva udevie Ileleikristi nọ e be jẹ ẹvẹrẹ Griki gbe enọ e be jẹ ẹvẹrẹ Hibru. Enọ e be jẹ ẹvẹrẹ Griki a roro nọ a bi rri rai vo. Dede na, nọ a nwane vuẹ ikọ na kpahe ẹme na, a te ku ẹme na họ kpatiẹ ababọ oke oraha. Uwhremuna, ẹme avro kpahe uwuhrẹ o tẹ roma via kpahe owha-iruo ahwo nọ a rrọ ahwo Ju hu evaọ ukoko Ileleikristi na. A te ku ẹme na họ ro no ehri-izi Ebaibol ze, ukoko na kpobi a te ku unu gbe nọ oyena a re gine ru.—Iruẹru 15:1-29.

Iriruo enana i dhesẹ nọ avro o su kpohọ omohẹriẹ uyẹ hayo ikẹ-isio iwuhrẹ nọ a sai kuhọ họ evaọ udevie ukoko Ileleikristi ikpe-udhusoi ọsosuọ na ha. Fikieme? Fikinọ eware nọ i ku rai gbe—uyoyou nọ a wo kẹ Jihova, ẹrọwọ nọ a fihọ Jesu Kristi, uyoyou omolahiẹ nọ a wo kẹ ohwohwo, ọjẹrehọ ọkpọvio ẹzi ọfuafo na, otoriẹ ovo nọ aikpobi a wo kpahe iwuhrẹ Ebaibol na, gbe uruemu rai nọ a ruẹrẹ oma kpahe inọ a re nwene—e ga te epanọ e rọ wha okugbe gbe udhedhẹ fihọ udevie ukoko Ileleikristi ọsosuọ na.

Okugbe Egagọ Evaọ Oke Mai Na

Kọ a rẹ sae rehọ oghẹrẹ ovona wo okugbe nẹnẹ? Kọ eware evona e rẹ gbẹ sai ku ahwo nọ a wo ẹrọwọ ọvo kugbe je fi obọ họ kẹ ai ru udhedhẹ kugbe ahwo uyẹ sa-sa nọ a rrọ akpọ na? Ee! Isẹri Jihova a rrọ ọvo evaọ okugbe-inievo akpọ-soso nọ o kẹre te ekwotọ, ikoliko gbe erẹwho nọ i bu vi 230. Yọ eware evona nọ i ku Ileleikristi ikpe-udhusoi ọsosuọ kugbe na i ku rai gbe.

Oware ọsosuọ nọ o be zọhọ fihọ okugbe nọ Isẹri Jihova a be reawere riẹ na họ omarọkẹ rai kẹ Jihova Ọghẹnẹ. Onana u dhesẹ nọ a be daoma roma kpotọ kẹe eva otọ iyero kpobi. Isẹri Jihova a te je fi ẹrọwọ họ Jesu Kristi gbe iwuhrẹ riẹ. Ileleikristi nana a wo uyoyou omolahiẹ kẹ ibe enọ e rọwo, a tẹ jẹ be ta usiuwoma orọ Uvie Ọghẹnẹ ovona evaọ erẹwho kpobi nọ a rrọ. Eva e be were ai re a ta kpahe Uvie onana kẹ ahwo egagọ, uyẹ, erẹwho, gbe uyerakpọ kpobi. Isẹri Jihova a tẹ jẹ be yọrọ edikihẹ seomaba-edhehọ evaọ iruẹru akpọ na, onọ u bi fi obọ họ kẹ ai whaha itunyẹ ọ esuo-ohrowo, uyẹ, uyerakpọ, gbe ekiọthuọ nọ i bi fi ohẹriẹ họ ahwo-akpọ nẹnẹ na. Isẹri na kpobi a dede owha-iruo rai rehọ nọ a rẹ rọ wha udhedhẹ haro ẹkwoma itee Ebaibol na nọ a be nya lele.

Okugbe O re Si Amọfa Uru

Ẹsibuobu okugbe nana ọ kpare isiuru ahwo nọ a jọ Isẹri Jihova ha no. Wọhọ oriruo, Ilsea ọ jọ aye Kathọlik nọ ọ yawo oma riẹ kẹ iruẹru egagọ, nọ ọ jẹ rria uwou egagọ rai evaọ Germany. Eme ọ jọ oma Isẹri Jihova si ei uru? Ilse ọ ta nọ: “Ae họ ahwo nọ a mai woma kparobọ nọ mẹ nyaku no. A re kpohọ ẹmo ho; yọ a rẹ nwa omọfa oma ha. A gwọlọ fi obọ họ kẹ ahwo reawere uzuazọ eva aparadase otọakpọ nọ Uvie Ọghẹnẹ u ti su.”

Oriruo ọfa họ Günther, ọnọ ọ jọ alakpa Germany nọ a vi kpohọ France eva etoke ẹmo akpọ avivẹ. Eva ẹdẹjọ ozerẹ ichọche Protẹstant ọ tẹ jẹ lẹ kẹ elakpa-ẹmo nọ e rrọ utu Günther. Ozerẹ na ọ lẹ kẹ uketha, ọthọwẹ, gbe obokparọ. Okenọ olẹ na u kuhọ no, Günther o te mu iruo nọ a kẹ riẹ họ eru wọhọ oroiro. Nọ o rri ughẹgbe riẹ nọ a rẹ rọ ruẹ ugbothabọ, ọ tẹ ruẹ inọ ozerẹ jọ ọ be jẹ lẹ kẹ ogbaẹmo iwegrẹ riẹ nọ o rrọ abọdekọ. Günther ọ ta uwhremu na nọ: “Ẹsejọhọ ozerẹ obei na ọ jẹ lẹ kẹ uketha, ọthọwẹ, gbe obokparọ re. U gbomẹ unu gaga oghẹrẹ nọ ichọche Ileleikristi a rọ rrọ ọvuọ abọ riẹ be họre ohwohwo eva ẹmo.” Oware onana o thọrọ Günther ẹro ho. Uwhremu na nọ Günther ọ nyaku Isẹri Jihova, ahwo nọ a re fi ẹmo ho na, o te zihe ruọ omọvo okugbe-inievo akpọ-soso rai.

Ashok gbe Feema a jọ egagọ ofẹ Ovatha-Ọre jọ vẹre. A jọ uwou rai wo aruẹri kẹ ọghẹnẹ jọ. Nọ ẹyao ọgaga jọ ọ tehe uviuwou na, a tẹ wariẹ kiẹ egagọ rai riwi. Ẹme nọ a lele Isẹri Jihova ta nọ u dhesẹ iwuhrẹ Ebaibol na gbe uyoyou nọ o rrọ udevie Isẹri na u si rai uru gaga. Enẹna a zihe ruọ iwhowho-uvie ajọwha erọ emamọ usi Uvie Jihova no.

Ilse, Günther, Ashok, gbe Feema a rrọ ọvo kugbe ima Isẹri Jihova nọ e rrọ okugbe-inievo akpọ-soso. A rọwo eyaa Ebaibol na inọ oware ovo nọ u ku rai gbe evaọ egagọ nẹnẹ na, u ti ku ahwo-akpọ ẹmeoyo kpobi kugbe kẹlena. Kẹsena egagọ e gbẹ te wha ogbimaza, ababọ-okugbe, gbe ohẹriẹ ze ofa ha. Akpọ na kpobi ọ vẹ te jọ okugbe ọvo evaọ egagọ Ọghẹnẹ uzẹme na, Jihova.—Eviavia 21:4, 5.

[Oruvẹ-obotọ]

[Iwoho nọ e rrọ ẹwẹ-obe avọ 4, 5]

Dede nọ a no oghẹrẹ uyere sa-sa ze, Ileleikristi ọsosuọ na a jọ okugbe ọvo