Ẹvi U ru Ẹgwọlọ kẹ Egwa Uvie Rro

¹ U kri no nọ ọruaro Jihova ọ rọ ruaro inọ “efe erẹwho na kpobi e vẹ te ze.” (Hag. 2:7) Enẹna ma be ruẹ ahwo buobu nọ a bi wuhrẹ uzẹme na je bi zihe ruọ egegagọ Jihova. Ẹvẹ o jọ oghọghọ te nọ ma rọ ruẹ inọ ahwo 11,624 e họ-ame evaọ etoke ikokohọ ilogbo 1996 nọ a jọ Nigeria ọvo ru! Re ma gbe fiobọhọ kẹ ahwo ekpokpọ enana, u fo re ma ‘muẹrohọ idhere mai’ re ma ruẹ nọ ma be tha iruo Ọghẹnẹ uke te epanọ ẹgba mai o te. (Hag. 1:5) Edhere ologbo jọ nọ ma sai ro ru onana họ ẹkwoma ọ obọ nọ ma re fihọ re ma ruẹrẹ emamọ iwou egagọ họ kẹ ogbotu ahwo ekpokpọ nọ i bi jiri Jihova na.

² Ẹkpa-Ugho Ọgwa Uvie Ukoko-Ulogbo na o mu iruo họ te ikpe ihrẹ no yọ u ru rie lọhọ no kẹ ikoko 105 re a wo Egwa Uvie ekpokpọ hayo ruẹrẹ enọ a wo vẹre. Uyo nọ iwhowho-uvie na a be kẹ evaọ obufihọ ugho kẹ ẹkpa ugho ọnana o rọ oware evawere gaga. Igho nọ a bi momo kẹ ikoko na a be hwae tha re igho nọ a zọhọ ze kpobi a gbẹ hae rehọ ae ro ruiruo, n’ukpe ruọ ukpe, re a rọ bọ Egwa Uvie ekpokpọ.

³ Obufihọ Egbẹgwae Ebabọ Ubrotọ: Egbẹguae Ebabọ Ubrotọ 25 nọ e rọ Nigeria na a bi fiobọhọ kẹ ekpako nọ e rọ iruo ebabọ Egwa Uvie. A re fiobọhọ kiẹ sọ ẹgwọlọ Ọgwa Uvie ọkpokpọ o ghinẹ riẹ hayo ẹruẹrẹ ọgwa nọ a wo no vẹre, a vẹ jẹ rehọ obufihọ efa nọ a gwọlọ rọ kẹ no oke nọ a rọ dẹ otọ na bọwo oke nọ a rọ bọ Ọgwa Uvie na re no. A fiọ ukoko ọvuọvo họ otọ egbẹgwae enana jọ.

⁴ Iruiruo unevaze idu ahwo buobu a fialoma via no re a w’abọ evaọ iruo ẹruẹrẹ Egwa Uvie gbe ebabọ ekpokpọ. Ahwo unevaze enana, kugbe ahwo ewena gbe erọ akiruo buobu, a be rehọ oke gbe ẹgba rai kẹ ọvọvẹ evaọ eria wọhọ edadẹ otọ, oma ebabọ, gbe ekere ekwakwa nọ a rẹ dẹ. A re je fiobọhọ evaọ edadẹ ekwakwa iwoma nọ e rọ kuẹku, iruo ọsosuọ evaọ oria ebabọ na, gbe ẹruorote uzedhe ebabọ na. Ekwakwa rai nọ a bi ro mudhe evaọ abọ ọnana fiki isiuru Uvie na o rọ oware nọ u fo ejiro yọ o rẹ jẹ wha eghale buobu no obọ Jihova ze.—Itẹ 11:25.

⁵ Ekpako a rẹ nyabru Ogbẹgwae Ebabọ Ubrotọ oria rai okenọ ukoko rai o tẹ kake jiroro ẹruẹrẹ Ọgwa Uvie nọ a wo no vẹre hayo ebabọ ọkpokpọ. Fikieme? Egbẹgwae ubrotọ na a wo ekpọvio nọ e rẹ sai fiobọhọ kẹ ikoko evaọ ẹjiroro ọsosuọ rai. Ẹsalọ oria nọ a rẹ bọ uwou na fihọ o gwọlọ vi unuigho nọ a rẹ rọ dẹ otọ na ọvo. Eware efa e rẹ sae ru unuigho otọ na kpehru viere, wọhọ iruo buobu evaọ oria uwou na, ẹwhẹno eware enwoma hayo ezuzu. Otẹrọnọ ukoko o gwọlọ obufihọ ugho mi Ukoko-Ulogbo, egbẹguae ẹkuotọ na a wo efọmo Ugho Momo Rọkẹ Ọgwa Uvie na yọ a rẹ sai fiobọhọ kẹ ikoko kere eme fihọ iẹe.

⁶ Ukoko-Ulogbo ọ jiroro oma ebabọ Egwa Uvie rọ kẹ Egbẹguae Ebabọ Ubrotọ no. Re a tẹ te salọ oma ebabọ na, ekpako ukoko na a rẹ nyabru ogbẹgwae ubrotọ na a vẹ t’ẹme kpahe oma ebabọ na kpobi, avọ oma ebabọ Ukoko-Ulogbo na nọ o rẹ kpọ ai. Orọnikọ onana u re ru unuigho uwou na kpotọ ọvo ho rekọ u re fiobọhọ kẹ ukoko na salọ ebabọ nọ o rẹ jọ kpatiẹ je woma gbe onọ a rẹ sae bọ vẹrẹ na.

⁷ A re kere araha igho na kpobi fihọ otọ ziezi. Inievo nọ i wo eriariẹ a fialoma rai ze no re a ruiruo kugbe egbẹgwae ubrotọ na re a fiobọhọ kẹ ikoko riẹ oghẹrẹ nọ a re ro kele igho rai jẹ yọrọ ai. Onana u re fiobọhọ gaga, keme ekpako ikoko a be rehọ ikelakele igho Ọgwa Uvie itieye na ruiruo oke kpobi wọhọ inievo enana nọ i wo eriariẹ gbe enọ a wuhrẹ ziezi no na ha. A te ku iruo na họ no, obe ikelakele igho ebabọ na kpobi o rẹ nyabru ogbẹgwae ubrotọ na.

⁸ Evaọ erẹwho efa, inievo na a wo ona ebabọ ovẹrẹ no re a bọ Ọgwa Uvie ọkpokpọ jọ re evaọ umutho edẹ jọ ọvo. Kẹvẹ kpahe Nigeria? O rọ vevẹ inọ ebabọ Ọgwa Uvie u bi sienẹ hemu gaga evaọ ẹgwọlọ unu ikoko nọ i bi vihọ evaọ Nigeria. A bi rri ebabọ Ọgwa Uvie wọhọ iruo nọ i re kuhọ họ. Evaọ udevie 1996, Ukoko-Ulogbo o tẹ jiroro re a fi ebabọ ovẹrẹ na họ iruo. Eva oke ọsosuọ, ahwo buobu a dina wo avro sọ a sae jọ obonẹ ru ei keme ekwakwa ebabọ e rọ epọvo na wọhọ enọ e rọ ẹwho iyibo ho. Dede na, avọ evifihọ Jihova iruo na e tẹ nyaharo. Ọgwa Uvie ọsosuọ nọ a rọ edhere ọnana bọ evaọ Nigeria o roma via eva iwhre Ewossa, ikilomita 51 no Ebẹtẹle eva Igieduma. Ọgwa Uvie na u wo oria ẹkeria ọ egbara 150.

⁹ Ẹvẹ onana o sae rọ via? Inievo nọ i wo eriariẹ a rọ m’oma ọ ebabọ na, unuigho nọ o rẹ rehọ, gbe edadẹ ekwakwa nọ a gwọlọ. A se iruiruo na ze lele akiruo rai. A vuẹ ukoko na kpahe ekwakwa nọ a gwọlọ gbe iruo efa nọ a re ru no taure uzedhe ẹdẹ ebabọ na o te ti te. Iruo ọsosuọ itieye na e rehọ oware wọhọ emerae ezeza. Uzedhe ebabọ ovẹrẹ na o rehọ edẹ 15 ọvo. Ekwakwa obonẹ a rọ bọe, wọhọ ibriki nọ a mahe, ọbia igbẹhẹ obeva uwou na, idhe nọ a ralọ, gbe ekpọ okpo uwou na.

¹⁰ Evaọ edẹ esa, igbẹhẹ Ọgwa Uvie na kpobi gbe oria amiokuo i te re. Evaọ edẹ esa efa a tẹ ralọ igbẹhẹ eva iwou ivẹ na re no. Ẹtehe uwou na o rehọ ẹdẹ ọvuọvo. Isilini, ikpẹ, ẹruẹrẹ otọ ighẹ na, ẹralọ, ẹwhẹhọ ethẹ gbe inwido, gbe ẹruẹrẹ egbara i te re riẹriẹriẹ evaọ ẹdẹ avọ 15. A rehọ Ọgwa Uvie na ro mudhe eva January 25, 1997.

¹¹ U Gbe Iriughe Unu: Imuẹro ẹzi ọfuafo Jihova evaọ oma inievo nọ i bi ruiruo evaọ Egwa Uvie u zihe ruọ isẹri no kẹ amọfa. Evaọ Ewossa, upelẹ ọzae jọ nọ o weze ze iwhre na ọ tẹ ruẹ inievo na nọ a be ruẹrẹ eware họ kẹ okiokiọ riẹ. Okenọ o zihe ze evaọ oka nọ u lele i rie, imoni riẹ a tẹ ta kẹe nọ: “Ahwo Jihova a bọ uwou rai re no.” Nọ o je bi weze bru omoni riẹ jọ, ọ tẹ nya edhere nọ Ọgwa Uvie na ọ rọ na. O te dikihẹ oria ovo ọ tẹ ta inọ: “Okugbe nọ ọ rọ ahwo Jihova oma o were omẹ kẹhẹ. O rọ omẹ ẹro inọ me re kuomagbe ai evaọ iruo na.”

¹² Onojie (Ovie ẹwho) na ọ ta nọ: “Onana yọ ọghọ kẹ iwhre mai. Oware nọ wha be rọ okugbe rai ru o be were omẹ. Wha ruabọhọ iẹe. Enẹna mẹ te ta kẹ ahwo nọ i you oware ezi inọ a nya e ruẹ oware nọ Isẹri Jihova a bi ru.”

¹³ T’emaha t’ekpako a w’abọ evaọ iruo na. Ọzae jọ nọ ọ kpako te ikpe 70 no ọnọ ọ jariẹ evaọ etoke ebabọ na kpobi, imoni ọwọsuọ riẹ a tẹ ta kẹe inọ ọ seba ẹnya. A ta inọ: “Whọ gbẹ seba ẹnya ha, oware uyoma jọ o te via k’owhẹ.” Ọzae na ọ tẹ kuyo nọ: “Anwẹ nọ me bi ro kpohọ iwuhrẹ rai, oware uyoma ovo o re te via k’omẹ hẹ. Oware nọ ma bi ru enẹna o be were omẹ dede nọ mẹ be sai ru t’ere he.” Okenọ imoni riẹ ọvo a weze ziọ oria ebabọ na jẹ ruẹ nọ ebabọ na o whoma re no, a tẹ siẹe ba ekpokpo.

¹⁴ O rọ isiuru mai inọ oghẹrẹ ebabọ otiọna a re dhesẹ iẹe via evaọ abọ orẹwho na kpobi. A rehọ ebabọ obọ Ewossa na ro wuhrẹ Egbẹgwae Ebabọ Ubrotọ esa gbe iruiruo rai no. Enẹna a ruẹrẹ oma họ no re a sae wha oghẹrẹ ebabọ otiọye na haro ababọ Ukoko-Ulogbo nọ u re w’obọ gaga. Avọ emamọ oma, ewuhrẹ otiọye na o te kẹre te ahwo nọ e fialoma ze kpobi. Ikoko nọ e be jiroro ebabọ hayo ẹruẹrẹ Egwa Uvie rai evaọ obaro nọ e gwọlọ fi oghẹrẹ ebabọ ọnana h’iruo a rẹ sae vuẹ Ogbẹgwae Ebabọ Ubrotọ oria rai. Ma rehọ ovuẹ eware nọ a gwọlọ rọ kẹ ai no. Wha re je kere se Ukoko-Ulogbo re otẹrọnọ wha gwọlọ ebabọ ovẹrẹ na, keme orọnikọ Egwa Uvie kpobi a be rọ edhere ovẹrẹ bọ họ.

¹⁵ Ma Gwọlọ Ahwo Unevaze Efa: Ogbẹgwae ubrotọ na a niyẹrẹ nọ a gbẹ gwọlọ ahwo unevaze efa. Onana yọ iruo nọ e r’oja evaọ uketha isiuru Uvie na. (1 Kọr. 15:58) Ma gwọlọ iruiruo ona, jegbe inievo efa nọ i te evaọ ẹzi, o tẹ make rọnọ a wo eriariẹ ebabọ họ. Otẹrọnọ who te, kọ whọ sai ru inwene jọ re whọ fialoma via? (Aiz. 6:8) Wọhọ oriruo, ekpako gbe idibo iruiruo jọ a rẹ sai fiobọhọ evaọ ebabọ Ọgwa Uvie evaọ urere oka ọvo hayo ivẹ evaọ amara. A rẹ sai wuhrẹ ai evaọ afẹ sa-sa, makọ evaọ iruo nọ o kpomahọ ebabọ họ. Onana o rẹ sae jọ obufihọ kẹ inievo nọ i bi ruiruo gaga na evaọ ẹruorote ebabọ enana.

¹⁶ Egbẹgwae Ebabọ Ubrotọ gbe egbẹgwae ebabọ ikoko na a rẹ ghale ahwo nọ e fialoma ze na re a ruẹse jọ oria ebabọ na evaọ okenọ a gwọlọ obufihọ rai ọvo. Ahwo unevaze enana a ve zihe kpohọ ikoko gbe iviuwou rai vẹrẹ vẹrẹ a gbe mu siọ iwuhrẹ gbe usiuwoma ota ba ha. Ahwo nọ e rẹ jọ oria ebabọ họ (1) ahwo nọ e fialoma ze enọ ahwo nọ i wuzou iruo na a salọ dẹẹ re a jọ etẹe, gbe (2) ahwo nọ i no ikoko nọ e rọ oria nọ a be bọ ọgwa na fihọ ze enọ i ru iruiruo nọ i wo ona ebabọ họ via. A tudu họ ahwo nọ ikiọkọ awọ re a tha usiuwoma ota gbe iwuhrẹ uke evaọ ikoko rai.

¹⁷ Ẹhẹ, ahwo nọ a bi w’abọ evaọ ebabọ iwou kẹ egagọ Jihova a be ruẹ nọ Olezi 127:1 o rọ uzẹme. Dede nọ iruiruo nọ i wo ona a rẹ rehọ oke gbe ẹgba rai bọ Egwa Uvie iwoma vẹrẹ vẹrẹ, oghale Jihova oye o rẹ kẹ imuẹro obokparọ. Ma gbẹ gwọlọ Egwa Uvie efa. Anwẹ nọ u ro muhọ, Ẹkpa-Ugho Ọgwa Uvie Ukoko-Ulogbo na u fiobọhọ kẹ ikoko buobu no evaọ ebabọ Ọgwa Uvie rai. Jomai kpobi ma gbẹ rọ unevaze rọ oke gbe “eware eghaghae” mai kẹ nọ ma bi rri bru Jihova re ọ ghale omodawọ mai na.—Itẹ 3:9.

[Pictures on page 4]

Ọgwa Uvie Ọkpokpọ na Evaọ obọ Ewossa

Ẹdẹ avọ 9 ọ ebabọ na

Ọgwa Uvie nọ a bọ re no evaọ ẹdẹ avọ 15