Ta Uzẹme kẹ Ọrivẹ Ra
1 Ojọ evaọ udevie ijaje ivẹ na nọ e mae rro họ: “You omọfa epanọ who you oma ra.” (Mat. 22:39) Uyoyou otiọye na o rẹ w’omai re ma ghale emamọ oware nọ ma wo—uzẹme nọ ma ruẹ evaọ Ẹme Ọghẹnẹ kugbe ọrivẹ mai. Nọ emagazini Uwou-Eroro gbe Awake! i bi ru evuẹ Ebaibol do na, ẹghale ebe enana evaọ amara May yọ edhere jọ nọ ma rẹ rọ ‘ta uzẹme kẹ erivẹ mai.’—Ẹf. 4:25.
2 A re fi “Awake!” ọ April 22 na họ ada bẹsenọ enọ e r’owhẹ obọ i re re no. Whọ sae mu họ whọ vẹ nọ inọ:
◼ “Eme who roro kpahe akpọ nọ ọ kare ẹmo? [Kuvẹ kẹ uyo.] Kọ whọ riẹ nọ egagọ akpọ e be ghinẹ wha emo gbe ikpakpe haro? [Kuvẹ kẹ uyo.] Wo ohẹriẹ no onana, muẹrohọ oware nọ Ebaibol na ọ ta nọ enọ e be gọ Ọghẹnẹ uzẹme na a ti ru.” Se Aizaya 2:2-4 no obehru ẹwẹ-obe 4 ọrọ emagazini na ze, gbe evaọ ẹwẹ-obe 10 se edhe ọsosuọ evaọ otọ uzoẹme na “Ese Enọ I You Udhedhẹ.” Ofariẹ, nọ inọ: “Kọ whọ riẹ oghẹrẹ nọ Ọghẹnẹ o ti ro ru oyena? A rẹ ruẹ uyo riẹ evaọ emagazini ọnana, yọ ọra nọ who ti se ọ na. Azọhọ ₦20 ọvo a re ro woi.”
3 Okenọ who te bi fi “Uwou-Eroro” ọrọ May 15 na họ ada, daoma t’ẹme te iyẹrẹ ekpokpọ jọ nọ e lẹliẹ ozọ mu ahwo, whọ vẹ nọ inọ:
◼ “Eme who roro nọ o te rehọ re a ru omai wo ufuoma evaọ uzuazọ onana? [Kuvẹ kẹ uyo.] Eva uzẹme kpobi, kọ u w’iroro re a fievahọ ahwo inọ a ti ku ebẹbẹ nọ e rẹriẹ ova dhe ohwo-akpọ họ? [Kuvẹ kẹ uyo; je se Olezi 146:3.] Ọnọ ọ so ilezi na ọ k’omai ẹjiroro nọ ma re ro wo ẹruore kpahe obaro. [Se Olezi 146:5, 6.] Uzoẹme onana, ‘Ufuoma Uzẹme, Enẹna gbe Bẹdẹ Bẹdẹ,’ u dhesẹ oware nọ ma je fievahọ Jihova Ọghẹnẹ nọ ọ te rehọ eyero owowoma ze akpọ na.” Dhesẹ ẹko emagazini je ru ọruẹrẹfihotọ re who zihe ze re whọ t’ẹme kpahe epanọ o rọ lọhọ re a reawere uzuazọ ufuoma enẹna.
4 Ma te roro kpahe ababọ osegboja kpahe egagọ nọ e wariẹ akpọ na họ, ẹsejọhọ a ti dede izoeme nọ e rọ “Awake!” ọ April 8, 1996, na rehọ ziezi. Whọ sae dhesẹ emagazini na ta nọ:
◼ “Ahwo buobu nẹnẹ a gbabọ kẹ egagọ rai no hayo a gbe wo ajọwha egagọ họ. Eme who roro nọ o wha riẹ ze?” (K’uvẹ kẹ uyo je jiri ọnọ o wo uwou na.) Whọ rẹ sae gbẹ ta haro nọ: “Fiki eviẹhọ nọ e rọ udevie isu egagọ na, ahwo buobu a gbe wo isiuru kpahe egagọ ọvo ho. Rekọ who roro nọ egagọ i ghine muẹme?” (K’uvẹ kẹ uyo.) Dhesẹ ẹwẹ-obe ọsosuọ emagazini na kẹ ọnọ o wo uwou na je se uzoẹme na via, “Kọ Egagọ I gbe Muẹme?” Rẹriẹ isiuru kpohọ izoẹme ivẹ ọsosuọ emagazini na, je se eme nọ e rọ ẹwẹ-obe 9 evaọ otọ uzoẹme na “Kọ A Kele Edẹ Egagọ No?” T’ẹme kpahe Aizaya 11:9, oria nọ a rehọ uye-ẹme na noze. Fi emagazini na họ ada, whọ vẹ ta nọ: “Evaọ iweze mẹ n’otha mẹ te gwọlọ t’ẹme kpahe epanọ a re ro duku egagọ nọ Ọghẹnẹ ọ rẹ jẹrehọ kugbe owhẹ.”
5 Otẹrọnọ odhesẹvia ọkpẹkpẹ whọ gwọlọ, whọ rẹ sae dawo ọnana:
◼ “O rọ ahwo buobu oma inọ emagazini inẹnẹ nọ e viodẹ e be riobọhọ eki-ọthuọ, owezẹ-ezaveyae, hayo ozighi ga hrọ. [Dhesẹ Uwou-Eroro Na gbe Awake!] Ma be ghale ebe ezi enana nọ i no Ebaibol ze. E rẹ kẹ emamọ eriariẹ je wuhrẹ omai re ma gọ Ọghẹnẹ, you ọrivẹ mai, jẹ yọrọ uruemu nọ u kiete. Otẹrọnọ oghẹrẹ ebe isase enana e mai were owhẹ ese, mẹ riẹ nọ whọ te reawere eware nọ who ti duku evaọ enana.”
6 Otẹrọnọ ma wo ajọwha evaọ uzẹme ota kẹ erivẹ mai, ma rẹ sae wha oghọghọ ulogbo se ahwo buobu.—Iruẹru 8:4, 8.