Rehọ Ebe-Uzizie Ruiruo Ziezi
1 Ebe-uzizie ukoko i w’iruo kẹ ọjọriẹ ahwo okegbe na kpahe adrẹse ọ Ọgwa Uvie gbe oke ogbagba iwuhrẹ na. U re woma re whọ rọ ojọ kẹ ohwo kpobi nọ whọ nyabru. Fiki iroro yena, ukoko kpobi u re wo ebe-uzizie buobu evaọ evu-ebe rai. Rọ kẹ ikoko nọ i re nwene oke iwuhrẹ rai k’ukpe k’ukpe evaọ January, a re vi ebe-uzizie ekpokpọ evaọ October nọ u kp’emu evaọ k’ukpe k’ukpe re a hae kẹ oke ogbagba iwuhrẹ ẹsikpobi. Efọmo Handbill Request oye a re ro vi ai. Nọ wha tẹ nwani wo ai no, oghẹrẹ vẹ a sae rọ rehọ ebe-uzizie na ruiruo kẹ obọdẹ erere?
2 Iwhowho-uvie buobu a ruẹ nnọ re a rehọ ovo jọ kẹ ohwo yọ edhere nọ u re w’iruo nọ a re ro dhesẹ oma rai je mu ẹmeọta họ. Re a riobọhọ oma iwuhrẹ na hayo ovuẹ nọ o rọ abọ ọdekọ riẹ na o rẹ sai rovie edhere fihọ kẹ ẹmeọta kpahe iruo mai gbe ẹjiroro riẹ. Eyewọ e rẹ sai fi emọ rai họ odibọgba na ẹkwoma obe-uzizie nọ a rẹ ta kẹ emọ rai re a rọ kẹ ahwo evaọ unuẹthẹ. Iwhowho-uvie nọ e rẹ rehọ ileta-ikere ro se isẹri a re fi obe-uzizie jọ họ evaọ ileta rai je zizie ohwo na re o kpohọ iwuhrẹ na. Ẹsejọhọ a sae nya siọ ebe-uzizie ba kẹ ahwo nọ a rọ uwou hu, thakpinọ a muẹro h’otọ re a fi ai họ otọ unuẹthẹ nọ amọfa a rẹ ruẹ vievie he.
3 Ebe-uzizie e rọ okwakwa nọ a be rọ kpọ ahwo udu oruọzewọ ziọ ukoko na. Oriruo jọ o ta kpahe aye jọ, nọ ọ sai wo ẹgwọlọ etoke uzuazọ riẹ kpobi t’obọ re o w’otoriẹ Ebaibol na fiki obe-uzizie na. Nọ ọ lẹ se Ọghẹnẹ no evaọ aso jọ, imava-orọo Isẹri jọ a te kporo ẹgogo-ẹthẹ riẹ evaọ ohiohiẹ. Nọ ọ rọ eghogho uwou na nori, ọ tẹ ta via se ai nnọ o bi rovie ẹthẹ na tao ho. Isẹri na a tẹ thuẹthuẹ obe-uzizie jọ họ otọ ẹthẹ na. U se nnọ: “Riẹ Ebaibol Ra.” Nọ ọ rue riẹ o te rovie ẹthẹ na. Uwuhrẹ u te muhọ ovavo, uwhremu na ọ tẹ họ-ame. Nọ ma re rri ogaga ẹzi Ọghẹnẹ kakao ho na, j’oma hae rehọ ebe-uzizie ruiruo zizie nọ ma bi ru odibọgba mai vọvọ na.