Otẹrọnọ U Wo Emamọ Iyẹrẹ, Rehọ Iẹe Ruiruo!
1 Odibọgba Uvie Mai o be k’omai eghẹrẹ ẹmeọta sa-sa nọ ma re ro ruiruo evaọ odibọgba na. Onana o rẹ k’omai ẹjiroro ọkpokpọ kpahe oghẹrẹ nọ a rẹ rọ kpare isiuru fihọ ovuẹ Uvie na. O sae jọ nọ whọ be daoma k’amara k’amara re who wuhrẹ edhere ẹmeọta ọvo jọ hayo bu viere evaọ usu enana. Dede na, iwhowho-uvie jọ a rẹ sae ruẹ nọ okenọ a tẹ rọ ojọ ruiruo umutho oke jọ no, uvitha Odibọgba Uvie Mai ofa o vẹ kẹ idhere ẹmeọta ekpokpọ. U re vevẹ nnọ o sae lọhọ kẹ ohwo kpobi hi re o wuhrẹ edhere ẹmeọta ọkpokpọ taure ọ tẹ te riẹ ọ rọ anwae na fihọ uzou.
2 Dede na, idu ekobaro gbe iwhowho-uvie efa e riẹ nọ e be raha oke buobu evaọ usiuwoma ota na. Ofariẹ, ikoko buobu a bi ru ekwotọ rai soso re no umutho eka jọ kẹse kẹse. Evaọ iyero enana, o rẹ were iwhowho-uvie re a wo idhere ẹmeọta gbe ẹjiroro ekpokpọ rọkẹ ovuẹ na. Onana u re fiobọhọ kẹ ae wo ẹnyaharo evaọ ona rai. U re je ru odibọgba rai mai siuru jẹ mọ ibi je fiobọhọ kẹ ae dadamu kẹ use-abọ nọ a nyaku.
3 Oghẹrẹ kpobi nọ o rọ, otẹrọnọ whọ ruẹrẹ edhere ẹmeọta nọ u ruiruo ziezi họ no evaọ ẹbọ isiuru, evaọ edhere kpobi gbẹ hae rehọ iẹ ruiruo! U du fo re whọ siọ edhere ẹmeọta nọ u bi wo emamọ iyẹrẹ ba ha. Ruẹrẹ iẹe họ lele obe nọ a bi fihọ ada evaọ amara na ọvo. Nọ whọ be kiẹ ẹjiroro nọ a kẹ fihọ Odibọgba Uvie Mai riwi na, gwọlọ eme isiuru nọ whọ sai fiba edhere ẹmeọta ra.
4 Fikiere okenọ uvitha okpokpọ ọrọ Odibọgba Uvie Mai u te t’owhẹ obọ, kareghẹhọ nnọ edhere ẹmeọta nọ e riẹ eva na yọ ẹjiroro gheghe. Otẹrọnọ whọ sae rehọ ae ruiruo, yọ u re ziezi. Rekọ otẹrọnọ who wo edhere ẹmeọta jọ nọ u bi wo emamọ iyẹrẹ evaọ ẹkwotọ ra, rehọ iẹe ruiruo! Oware nọ u w’uzou na họ re who “ru iruo ra gbunu” evaọ emamọ edhere, ẹgwọlọ enọ i wo isiuru je fiobọhọ kẹ ae re a ziọ ilele.—2 Tim. 4:5.