Isẹri-Ise kẹ Ahwo Evẹrẹ gbe Egagọ Kpobi

¹ Ileleikristi evaọ ikpe-udhusoi ọsosuọ na a se isẹri ọwhọ kẹ ahwo nọ e jẹ ta evẹrẹ efa gbe enọ e rọ egagọ sa-sa. Fikiere, “o wọhọ nọ evaọ ukpe avọ 100 ewho nọ e wariẹ Mediterenia họ kpobi a wo okegbe Oleleikristi evaọ eva rai.”—History of the Middle Ages.

² Evaọ Nigeria, ahwo buobu a be ta evẹrẹ nọ e fẹnoma no Oyibo. Ogbotu-ahwo a rọ egagọ sa-sa. Fiki evẹrẹ gbe egagọ sa-sa enana, o rọ uzedhe use-abọ re ma riẹ epanọ ma rẹ t’ẹme je se isẹri kẹ oghẹrẹ ahwo itieye na kpobi okenọ ma tẹ nyaku ai. Koyehọ, ma rẹ sai wo ẹkwotọ imishọnare evaọ okegbe mai. Ẹvẹ ma sai ro lele ujaje Jesu re ma ‘ta usiuwoma kẹ ahwo na je se uvi isẹri’ kẹ ahwo evẹrẹ gbe egagọ kpobi?—Iruẹru 10:42.

Isẹri-Ise kẹ Ahwo nọ E rẹ Ta Ẹvẹrẹ Ọfa

³ Efikparobọ Obrudhe Ẹvẹrẹ Na: Avro ọ riẹ hẹ inọ ahwo buobu a re wuhrẹ vẹrẹ avọ otoriẹ didi viere otẹrọnọ a rehọ ẹrọunu obọ rai wuhrẹ ai. “Fiki usiuwoma na” re a jẹ sae ‘ghale iẹe kugbe amọfa,’ inievo emezae gbe emetẹ buobu a wuhrẹ ẹvẹrẹ ọfa no. (1 Kọr. 9:23) Dede nọ aye nọ ọ rẹ ta ẹvẹrẹ China ọ jọ ejẹ emagazini oniọvo-ọmọtẹ nọ ọ rẹ ta Oyibo evaọ ikpe buobu, aye na ọ se uwuhrẹ Ebaibol bẹsenọ oniọvo-ọmọtẹ ọfa, ọnọ o je wuhrẹ ẹvẹrẹ China, ọ rọ kẹe obe evaọ ẹvẹrẹ ọyena. O mi rie avọ unevaze kugbe obe uwuhrẹ. Oware nọ o wha ẹhẹriẹ na ze họ omodawọ oniọvo-ọmọtẹ avivẹ na nọ ọ rọ jẹ ibieme jọ evaọ ẹvẹrẹ aye na.—Wawo Iruẹru 22:2.

⁴ Fiki emamọ ẹjiroro, Uwou-Eroro ọ November 1, 1992 (ọrọ Oyibo), o ta nọ: “Ewuhrẹ ẹvẹrẹ ọfa . . . orọnikọ o rẹ lẹliẹ ẹgba iroro emoha nyaharo ọvo ho rekọ o rẹ jẹ lẹliẹ ai w’iruo kẹ ukoko Jihova.” Ahwo iviuwou Ebẹtẹle buobu evaọ erẹwho buobu a dhomahọ iruo ewuhrẹ ẹvẹrẹ ọkpokpọ no. Evaọ edhere ọnana, inievo-emezae a fiobọhọ gaga no evaọ ikoko nọ a jọ gwọlọ ai nnọ a kobaro. Who te bi yo ẹvẹrẹ ọfa hayo whọ tẹ gwọlọ wuhrẹ, whọ rẹ sai je fiobọhọ kẹ ukoko hayo ẹko isẹri nọ e be ta ẹvẹrẹ ọfa.—Mat. 9:37, 38.

⁵ Oniọvo-ọmọzae jọ evaọ Florida, U.S.A., ọnọ o wuhrẹ ẹvẹrẹ Vietnam taure o te ti kurẹriẹ ọ be ruẹ oghọghọ ulogbo enẹna evaọ usiuwoma nọ ọ be ta kẹ ahwo ẹvẹrẹ Vietnam. Re ọ fialọ oma riẹ ze viere re ọ rehọ eriariẹ ẹvẹrẹ ọyena nọ o wo ro se isẹri, ọ tẹ kwa uviuwou riẹ kpohọ ofẹ orẹwho na nọ a rẹ jọ ta ẹvẹrẹ Vietnam nọ ẹgwọlọ ọ mae jọ rro. Anwẹnọ ọ rọ kwa na, o bi wo emamọ obokparọ evaọ Ebaibol nọ o bi wuhrẹ kugbe ahwo Vietnam buobu.

⁶ Oniọvo-ọmọtẹ ọkobaro jọ evaọ California, U.S.A., ọ nyaku ahwo idiezọ buobu evaọ ẹkwotọ riẹ. Ọ tẹ lẹ se Jihova re o fiobọhọ kẹe ruẹ ohwo nọ o re wuhrẹ iẹe ẹvẹrẹ obọ rọ t’ẹme re ọ ruẹsi wuhrẹ ai uzẹme na. Ẹdẹjọ nọ o kpohọ eki, ọ tẹ nyaku uvovo aye odiezọ jọ ọnọ o kere fihọ obe be yare iẹe inọ o fiobọhọ kẹe gwọlọ oware jọ. Nọ o fiobọhọ kẹe rue riẹ no, ọkobaro na o te kere fihọ obe bi dhesẹ ẹgwọlọ riẹ re o wuhrẹ ẹvẹrẹ obọ rọ t’ẹme na re ọ ruẹsi fiobọhọ kẹ idiezọ evaọ oria na. Aye odiezọ na o te kere, n’onọ inọ, “Fikieme whọ rọ gwọlọ fiobọhọ kẹ ahwo idiezọ?” Oniọvo na o te kere zihe nọ: “Mẹ yọ omọvo Isẹri Jihova, yọ mẹ gwọlọ fiobọhọ kẹ idiezọ na wo otoriẹ Ebaibol na. O te were omẹ re me wuhrẹ owhẹ Ebaibol na otẹrọnọ who re wuhrẹ omẹ obọ rọ t’ẹme.” Oniọvo-ọmọtẹ na ọ tẹ ta nọ: “Mẹ ghọghọ thesiwa nọ ọ ta nọ, ‘U woma.’ ” Oniọvo-ọmọtẹ na o te muọ uwou aye na họ ekpohọ k’owọwọ k’owọwọ evaọ eka ezeza. O te wuhrẹ ẹvẹrẹ obọ rọ t’ẹme na, aye odiezọ na o te wuhrẹ uzẹme na jẹ họ-ame! Oyena o via vrẹ ikpe 30 no, yọ oniọvo-ọmọtẹ ọkobaro na o gbe bi se isẹri kẹ idiezọ, yọ obọnana ọ rọ ukoko ẹvẹrẹ obọ rọ t’ẹme.

⁷ Otẹrọnọ whọ rẹ ta ẹvẹrẹ ọfa ziezi who te je wo isiuru na je te re whọ kwa kpohọ oria nọ ẹgwọlọ ọ mae jọ rro evaọ ẹkwotọ ọyena, eme jabọ whọ gbẹ t’ẹme na kugbe ekpako ukoko na ha. A te roro nọ who te kẹ ẹkwa otiọye na, nọ mi ọsẹro okogho na sọ oria ekẹloma jọ o riẹ nọ whọ sae jọ ruiruo. Oria o gbẹ riẹ hẹ, whọ rẹ sai kere se Ukoko-Ulogbo, thakpinọ ekpako na a vi ẹkẹ ileta rai kugbe oware nọ a muẹrohọ kpahe ete ra gbe epanọ whọ riẹ ẹvẹrẹ na te.—Rri Uwou-Eroro ọ August 15, 1988 (ọrọ Oyibo), ẹwẹ-obe avọ 21-23.

⁸ Efihiruo Ekwakwa nọ A Kẹ: A kporo ebe mai fihọ evẹrẹ Nigeria buobu gbe evẹrẹ erẹwho efa. U re woma re whọ wha ebe-evẹvẹ hayo ibroshọ Gwọlọ na evaọ evẹrẹ nọ a be jọ ẹkwotọ ra ta. Otẹrọnọ Oyibo họ ẹvẹrẹ nọ ohwo o bi yo ziezi hi, nọ ohwo na evẹrẹ nọ o re se. Onana o rẹ lẹliẹ owhẹ wo oghoghẹrẹ ebe nọ who re fihọ ada. Wọhọ oriruo, ẹsejọhọ ohwo nọ ọ rẹ jẹ ẹvẹrẹ Urdu ọ rẹ sai se Arabic re.

⁹ Whọ gbẹ be make jẹ ẹvẹrẹ ohwo nọ whọ nyaku evaọ iruo isẹri-ise ra ha, whọ rẹ sae ta usiuwoma na kẹe. Evaọ oghẹrẹ vẹ? Ẹkwoma efihiruo omobe na Good News for All Nations. U wo ovuẹ okpẹkpẹe nọ a rehọ evẹrẹ 59 ro kere. Wọhọ epanọ uthubro nọ o rọ ẹwẹ-obe avọ 2 omobe na o ta, nọ whọ tẹ riẹ kpahe ẹvẹrẹ nọ ọnọ o wo uwou na ọ rẹ ta no, jọ o se ovuẹ nọ a kporo na evaọ ẹwẹ-obe nọ ẹvẹrẹ riẹ ọ rọ evaọ omobe na. Nọ o te sei no, dhesẹ obe jọ kẹe evaọ ẹvẹrẹ riẹ. Who gbe wo ovuovo ho, dhesẹ obe na kẹe evaọ Oyibo. Dhesẹ kẹe inọ whọ te daoma rehọ ọrọ ẹvẹrẹ riẹ zihe ze. N’onọ odẹ riẹ, je kere iei fihọ otọ avọ adrẹse riẹ. Ẹsejọhọ whọ rẹ sai kpeze ovuẹ na se ukoko hayo ẹko isẹri nọ o mae kẹle etẹe nọ o rẹ jẹ ẹvẹrẹ na. Otẹrọnọ ohwo ọvo nọ ọ rẹ jẹ ẹvẹrẹ na ọ riẹ hẹ re o ru ozihebro na, whọ rẹ sae wha ohwa na, tube kru obe Oyibo ro wuhrẹ kugbe ohwo na.—1 Kọr. 9:19-23.

Isẹri-Ise kẹ Ahwo nọ E rọ Egagọ Ileleikristi Hi

¹⁰ Re ma wo eriariẹ jọ kpahe oghẹrẹ egagọ nọ ohwo ọ rọ u re fiobọhọ k’omai se isẹri ziezi kpahe Uvie Ọghẹnẹ. Obe na Mankind’s Search for God o k’omai otoriẹ kpahe egagọ ilogbo akpọ na re ma sai wo otoriẹ orọwọ ahwo ziezi te epanọ ma re ro fiobọhọ kẹ ai nyaze ti wo eriariẹ uzẹme na.

¹¹ Ẹkpẹti nọ ọ rọ ẹwẹ-obe urere ọrọ uko-obeva ọnana o fodẹ ebe nọ ukoko Jihova u kporo no nọ a re ro se isẹri kẹ ahwo nọ e rọ egagọ Ileleikristi hi. Ẹkwoma ebe enana nọ ma re se, ma rẹ riẹ epanọ ma rẹ rọ wha emamọ usi na bru ahwo. Okwakwa obufihọ jọ nọ o rẹ thọrọ ẹro ho họ obe Reasoning na. Ẹwẹ-obe avọ 21-24 ọrọ obe na o k’omai uvi ẹjiroro kpahe epanọ a rẹ kuyo kẹ ahwo Buddha, Hindu, Ju, gbe Muslim.

¹² Yọrọ Oma Kpahe Ẹme nọ Whọ rẹ Ta: Ma rẹ yọrọ oma re ma siọ ubiẹro ovo na ba ero rri ahwo egagọ jọ ẹkwoma eroro inọ orọwọ rai o te jọ oghẹrẹ ovo na kugbe ahwo egagọ rai efa. Ukpoye, daoma wo otoriẹ epanọ ohwo nọ whọ be t’ẹme kugbe na o re roro. (Iruẹru 10:24-35) Wọhọ ohwo Muslim, a yọrọ Salimoon re ọ rọwo nnọ Koran na yọ ẹme Ọghẹnẹ. Rekọ ọ rọwo ewuhrẹ ahwo Muslim na tere he inọ Ọghẹnẹ nọ o wo ohrọ kpobi ọ te lahiẹ ahwo bẹdẹ bẹdẹ evaọ ehẹle nọ o be to. Ẹdẹjọ, Isẹri Jihova a te ziziei kpohọ ewuhrẹ. Ọ nwani vuhu uzẹme na mu, enẹna ọ be rọ evawere gọ wọhọ ọkpako evaọ ukoko Ileleikristi na.

¹³ Ma te bi se isẹri kẹ ahwo nọ e rọ egagọ Ileleikristi hi, ma rẹ yọrọ oma re epanọ ma rẹ rọ nyabru ai u gbe mi omai uvẹ nọ ma re ro lele ai t’ẹme kpahe emamọ usi na ha. (Iruẹru 24:16) O rẹ dha ahwo egagọ jọ eva gaga a tẹ riẹ nọ whọ gwọlọ ku ai rẹriẹ no egagọ rai. Fikiere fiẹrohọ igogo eme nọ wha rẹ rọwo kugbe re whọ kpọ ai ziọ oma uzẹme Ẹme Ọghẹnẹ kpobi. Ahwo nọ e wọhọ igodẹ a te kuyo kẹ ẹme nọ a ta avọ ẹwo gbe uzẹme na nọ a re ru vẹ ziezi.

¹⁴ U te je wuzou nọ ma roro kpahe ẹsalọ ẹme nọ ma rẹ ta, ogbẹrọ ere he ma vẹ rọ ogbori lẹliẹ ahwo dhẹ no ovuẹ mai. Wọhọ oriruo, who te dhesẹ oma ra vẹrẹ vẹrẹ wọhọ Oleleikristi, ọnọ ọ be gaviezọ k’owhẹ na ọ sai rri owhẹ fihọ ichọche Kristẹndọm, onọ o sae wha obrudhe ze. U re je wo erere re who se Ebaibol na “ikere” na hayo “ikere ẹri na.”—Mat. 21:42; 2 Tim. 3:15.

¹⁵ Whọ tẹ nyaku ohwo nọ ọ rọ egagọ Oleleikristi hi, who te je roro nọ whọ thomavẹrẹ te epanọ who re ro se isẹri kẹe ovavo ho, rehọ uvẹ na mu ogbẹnyusu kugbei, kẹe obe-ovẹvẹ, se odẹ ra kẹe jẹ nọ odẹ riẹ. Ẹdẹ ọvo hayo ivẹ e tẹ ruemu no who ve zihe, nọ whọ ruẹrẹ oma kpahe ziezi no kẹ isẹri-ise.—1 Tim. 4:16; 2 Tim. 3:17.

¹⁶ Isẹri-Ise kẹ Ahwo Egagọ Buddha: (Rri uzou avọ 6 evaọ Mankind’s Search for God.) Orọwọ ahwo egagọ Buddha i wo ohẹriẹ gaga no ohwo ruọ ohwo. Ukpenọ a wuhrẹ ẹrria Ọnọma nọ ọ rọ uzuazọ, egagọ Buddha a bi lele ọzae India na, Buddha Gautama, ọrọ ikpe-udhusoi avọ ezeza B.C.E., wọhọ ọnọ a re rri ru evaọ egagọ. Okenọ ọ kake ruẹ ọzae nọ ọ be mọ, ọkpọkuọzae, gbe ọzae owhuowhu, Gautama ọ tẹ rova kpahe otofa uzuazọ. U te gbei unu nọ: ‘Kọ a yẹ ohwo re ọ ruẹ uye ọvo, rro kpako, je whu?’ Whaọ, ma rẹ sae kẹ uyo enọ eyena kẹ ohwo egagọ Buddha oruọzewọ ọnọ ọ gwọlọ riẹ iyo na.

¹⁷ Who te bi lele ohwo egagọ Buddha t’ẹme, gale ova vi ovuẹ ẹruore gbe uzẹme uvevẹ nọ a rẹ jọ obe ẹri nọ o mae rro kpobi duku na, Ebaibol na. Wọhọ ahwo buobu, ahwo egagọ Buddha a wo isiuru gaga kpahe udhedhẹ, ẹfuọ, gbe uzuazọ uviuwou, yọ o rẹ were ai re a t’ẹme kpahe eme itieye na. Onana o sai su kpohọ Uvie na nọ who re fielo họ wọhọ uvi ifue kẹ ebẹbẹ ohwo-akpọ.

¹⁸ Evaọ eria ilogbo jọ evaọ United States, ahwo China buobu a bi zurie ze enọ e rọ egagọ Buddha gbe iroro-ifofe ofẹ Ovatha-Ọre efa. Ibuobu rai emọ-isukulu nọ i bi kpohọ yunivasiti evaọ United States. Okenọ oniọvo-ọmọtẹ jọ evaọ Montana ọ ruẹ ọzae China jọ evaọ uwou-eki emuore, ọ tẹ kẹe obe-ovẹvẹ jọ evaọ ẹvẹrẹ riẹ ọ tẹ jẹ fodẹ uwuhrẹ Ebaibol kẹe. Ọ tẹ ta nọ: “Ebaibol Ẹri na whọ ta na? Anwẹ nọ a ro y’omẹ mẹ be rọ gwọlọ onana!” O te muọ uwuhrẹ họ oka oyena je muọ iwuhrẹ na kpobi họ ẹnya.

¹⁹ Bu vi ikpe ikpe, oniọvo-ọmọtẹ ọkobaro jọ evaọ Nevada ọ be rọ uzẹme na wuhrẹ emọ-isukulu China. Okenọ ọ jẹ ta usiuwoma evaọ ighẹ nọ u wo ihie-ibruwou eree nọ emọ-isukulu enana e be rria, ọ tẹ lẹ se Jihova re o fiobọhọ kẹe muọ uwuhrẹ họ evaọ uhie-ubruwou. Evaọ eka ivẹ, o tẹ kawo o te muhọ ewuhrẹ kugbe ọmọ-isukulu ọvo evaọ uhie-ubruwou. Edhere ẹmeọta nọ u ruiruo kẹe họ, ọ rẹ ta nnọ ọ ruẹ oware jọ nọ o be kẹ emọ-isukulu uye—aikpobi a gwọlọ udhedhẹ gbe evawere. Ọ vẹ nọ sọ onana o rọ awaọruọ rai re. A rẹ nwani fiuzou. Ọ vẹ kpọ iroro rai kpohọ ibroshọ na Lasting Peace and Happiness—How to Find Them, onọ a ruẹrẹ họ kẹ ahwo China. Nọ a wuhrẹ isiasoi ọvo no, ọmọ-isukulu jọ ọ tẹ ta kẹe nnọ u kri no nọ ọ be rọ gwọlọ uzẹme na, yọ enẹna ọ rue riẹ no.

²⁰ Isẹri-Ise kẹ Ahwo Egagọ Hindu: (Rri uzou avọ 5 evaọ Mankind’s Search for God.) Egagọ Hindu u wo obe uzi nọ a rẹ gbobọ kru hu. Eriariẹ rai e kpakre gaga. Egagọ Hindu i wo ẹkẹ uwuhrẹ esanerọvo rai ọrọ ọghẹnẹ ologbo rai Brahman (Brahma Ọnọma na, Vishnu Osiwi na, gbe Siva Ọrahọraha na). Orọwọ ẹwẹ nọ o re whu hu u wuzou kẹ uwuhrẹ ọwariẹyẹ rai, onọ o rẹ kẹ ahwo egagọ Hindu eriwo ẹruore kẹ uzuazọ. (Rri obe ọ Reasoning na, ẹwẹ-obe avọ 317-321, gbe Uwou-Eroro Na, May 15, 1997 (ọrọ Oyibo), ẹwẹ-obe avọ 3-8.) Egagọ ahwo Hindu u re wuhrẹ obọ-olọlọhọ, inọ egagọ kpobi i bi su kpohọ uzẹme ovo na.

²¹ Epanọ who re ro muọ isẹri-ise họ kugbe ohwo Hindu họ eruvẹ ẹruore Ebaibol mai ọrọ ẹrria ebẹdẹ bẹdẹ evaọ ẹgbagba ohwo-akpọ evaọ otọakpọ gbe iyo evevọwẹ nọ Ebaibol na ọ kẹ kpahe enọ ilogbo nọ e rẹriẹ ova ku ohwo-akpọ kpobi.

²² Isẹri-Ise kẹ Ahwo Ju: (Rri uzou avọ 9 evaọ Mankind’s Search for God.) Wo ohẹriẹ no egagọ efa nọ e rọ Ileleikristi hi, egagọ ahwo Ju i wo ọwhọ fihọ ikuigbe uzẹme, orọnikọ iku esia ha. No Ikereakere Hibru efuafo na ze, a dhesẹ edhere na nọ ohwo-akpọ ọ rẹ rọ gwọlọ Ọghẹnẹ uzẹme na. Yọ ghele na, mukpahe Ẹme Ọghẹnẹ, ugogo uwuhrẹ egagọ Ju ọgbọna họ ẹrọwo ẹwẹ ohwo-akpọ nọ o re whu hu. Ma sae rọ ẹme ọrọwokugbe jọ ro mu ẹkwoma ẹrọwo nnọ ma be gọ Ọghẹnẹ Abraham gbe ẹkwoma ẹrọwo inọ ebẹbẹ evo na ma rẹriẹ ova ku evaọ akpọ inẹnẹ.

²³ Whọ tẹ nyaku ohwo Ju nọ ọ kare ẹrọwọ fihọ Ọghẹnẹ, re whọ nọ sọ ere ọ be hai roro anwẹdẹ o rẹ sai fiobọhọ k’owhẹ riẹ oware nọ o te mae were iẹe. Wọhọ oriruo, ẹsejọhọ oware nọ Ọghẹnẹ ọ rọ kẹ uye-oruẹ uvẹ u ti voi ẹro ho. A rẹ sae tudu họ ahwo Ju oruọzewọ awọ re a wariẹ kiẹ evuhumu Jesu riwi wọhọ Mesaya na, orọnikọ ẹkwoma odhesẹthọ Kristẹndọm ho, rekọ epanọ ikere-ebe Ju erọ Ikereakere Griki na a rehọ e riẹ.

²⁴ Isẹri-Ise kẹ Ahwo Muslim: (Rri uzou avọ 12 evaọ Mankind’s Search for God.) Ahwo Muslim (hayo, ahwo Moslem) yọ otu egagọ Islam (hayo, egagọ Muhammadan), nọ u kugbe orọwọ fihọ Allah, ọghẹnẹ ọvo rai gbe Muhammad (570-632 C.E.) wọhọ ọruẹaro urere riẹ gbe ọnọ ọ mae rro. Fikinọ a rọwo nnọ Ọghẹnẹ o wo ọmọ họ, oware nọ ahwo Muslim a rọwo kpahe Jesu Kristi kpobi họ ọruẹaro ọsese Ọghẹnẹ nọ ọ rọ ọvo. Koran na, onọ o te kpako te ikpe 1,400 ho, o t’ẹme no Ikereakere Hibru na gbe Griki na ze. Ithatho buobu e rọ udevie Islam avọ Kathọlik. Egagọ ivẹ na a re wuhrẹ ẹwẹ ohwo-akpọ nọ o re whu hu, olahiẹ ubroke, gbe ehẹle nọ o be to.

²⁵ Oria ovuọvo nọ ma rẹ jọ rọwo kugbe họ orọwọ mai inọ Ọghẹnẹ uzẹme ọvo ọ rọ gbe nnọ ọye ọ rọ ẹgba kere Ebaibol na. Ohwo nọ ọ roma totọ se Koran na ziezi ọ ruẹ nọ o t’ẹme kpahe Torah na, Ilezi na, gbe Usiuwoma na wọhọ Ẹme Ọghẹnẹ, o te je se nọ a re rri rai fihọ ere je yoẹme kẹ ae. Fikiere, whọ sae ta nọ whọ gwọlọ rehọ enana wuhrẹ obe kugbe ohwo na.

²⁶ Edhere ọnana ọ sai ruiruo kugbe ohwo nọ ọ ta nọ egagọ Muslim ọ rọ: “Me ri lele ahwo egagọ Muslim buobu t’ẹme he, rekọ mẹ dina se kpahe iwuhrẹ egagọ rai jọ no evaọ obe onana. [Rovie kpohọ ẹwẹ-obe avọ 24 evaọ obe Reasoning na.] O ta nọ wha rọwo nnọ Jesu yọ ọruẹaro rekinọ Muhammad họ ọruẹaro urere gbe ọnọ ọ mae rro. Kọ whọ rọwo nọ Mosis ọ jọ ọruẹaro uzẹme re? [K’uvẹ kẹ uyo.] Kọ mẹ sai dhesẹ oware nọ Mosis o wuhrẹ kpahe no obọ Ọghẹnẹ ze gbe odẹ oma Riẹ k’owhẹ?” Kẹsena who ve se Ọnyano 6:2, 3. Evaọ ozihebro na, whọ sae t’ẹme kpahe uzoẹme na “Ọghẹnẹ Ọvo, Egagọ Ọvo,” evaọ ẹwẹ-obe avọ 13 evaọ omobe na The Time for True Submission to God.

²⁷ Nẹnẹ na, ibuobu a bi ru lele eme Aizaya 55:6, onọ u se nọ: “Wha gwọlọ ỌNOWO na eva okenọ a rẹ rọ rue riẹ, wha se ei nọ ọ kẹle na.” Onana u kie kpahe ahwo udu oruọzewọ kpobi, makọ ẹvẹrẹ nọ a be ta hayo egagọ nọ a rọ. O rẹ sai mu omai ẹro nọ Jihova ọ te ghale omodawọ mai nọ ma be ya re ma nyai ‘ru ilele ahwo erẹwho kpobi’ na.—Mat. 28:19.

[Box on page 6]

Ebe Nọ A Ruẹrẹ Fihọ kẹ Ahwo Nọ E Rọ Egagọ Ileleikristi Hi

Ahwo Egagọ Buddha

In Search of a Father (Omobe)

“Ri! Me Bi Ru Eware Kpobi Fihọ Ekpokpọ” (Ibroshọ)

Ahwo China

Lasting Peace and Happiness—How to Find Them (Ibroshọ)

Ahwo Egagọ Hindu

From Kurukshetra to Armageddon—And Your Survival (Omobe)

Our Problems—Who Will Help Us Solve Them? (Ibroshọ)

The Path of Divine Truth Leading to Liberation (Omobe)

Victory Over Death—Is It Possible for You? (Omobe)

Why Should We Worship God in Love and Truth? (Ibroshọ)

Ahwo Ju

A Peaceful New World—Will It Come? (Obe-Ovẹvẹ Avọ 17)

Jehovah’s Witnesses—What Do They Believe? (Obe-Ovẹvẹ Avọ 18)

Will There Ever Be a World Without War? (Ibroshọ)

Ahwo Egagọ Muslim

How to Find the Road to Paradise (Obe-Ovẹvẹ)

The Time for True Submission to God (Omobe)