‘Whowho Ẹme Ọghẹnẹ na Vọvọ’

¹ Who te ghine wo evawere kpahe oware uwoma jọ nọ u t’owhẹ obọ, kọ who gbe dhesẹ iẹe via ẹkwoma uruemu gbe iruo ra? Eme jabọ! Muẹrohọ eme nọ Pọl ukọ na ọ ta kpahe ewoma gbe uyoyou-ẹwo nọ Jihova o dhesẹ kẹ ahwo-akpọ. O bo via nọ: “Uyere u te Ọghẹnẹ fiki okẹ riẹ nọ a sae ruẹ unu ta ha!” Eme họ “okẹ” oyena? ‘Aruoriwo ologbo Ọghẹnẹ’ kpobi nọ o dhesẹ k’omai no, onọ Ọmọ obọriẹ nọ ọ rọ kẹ wọhọ ẹtanigbo rọkẹ imuemu mai o rrọ odhesẹvia riẹ nọ ọ mae rro na.—2 Kọr. 9:14, 15; Jọn 3:16.

² Kọ eme ọ uyere-okẹ Pọl na yọ ẹme unu gheghe? Vievie! Evaọ idhere buobu o dhesẹ ovuhumuo odidi riẹ via. O wo ọdawẹ kpahe ewoma abọ-ẹzi ọ ibe Ileleikristi riẹ gaga yọ ọ gwọlọ dao ẹgba riẹ re o fiobọhọ kẹ ae wo erere vọvọ no uyoyou-ẹwo Ọghẹnẹ ze. Rọ kpahe ahwo otiọye, Pọl ọ ta nọ: “Fiki epanọ ma gwọlọ owhai eva uyoyou o tẹ ruọ omai nọ ma rẹ ghale ẹkẹ oma mai jọ kẹ owhai re, orọnọ eva usiuwoma Ọghẹnẹ ọvo ho, keme wha jọ obọ mai ghare hrọ.” (1 Tẹs. 2:8) Fiba obọ nọ o fihọ kẹ enọ e jọ abọjọ ukoko na no re a wo esiwo, Pọl o whowho emamọ usi na ababọ oma nọ o rrọ riẹ, nya ikilomita idu buobu evaọ otọ gbe abade re ọ gwọlọ ahwo “nọ a ro mu kẹ uzuazọ ebẹdẹ bẹdẹ.” (Iruẹru 13:48) Ovuhumuo odidi ọ Pọl rọkẹ eware kpobi nọ Jihova o ru kẹe no ọ wọ riẹ re ‘o whowho ẹme Ọghẹnẹ na vọvọ.’—Kọl. 1:25.

³ Kọ ovuhumuo mai kẹ eware kpobi nọ Jihova o ru k’omai no o gbẹ be w’omai rehọ uketha abọ-ẹzi kẹ enọ e gwọlọ obufihọ evaọ ukoko mai? (Gal. 6:10) Kọ oma o gbẹ be w’omai re ma w’obọ vọvọ evaọ ewhowho emamọ usi Uvie na nya ẹkwotọ mai soso duwu?—Mat. 24:14.

⁴ Uvẹ nọ A re ro Dhesẹ Ovuhumuo: K’ukpe k’ukpe ehaa Ekareghẹhọ uwhu Kristi o rẹ k’omai uvẹ obọdẹ nọ ma re ro dhesẹ ovuhumuo kẹ eware nọ Jihova avọ Jesu a ru k’omai no. Onana o rrọ omakugbe ofa jọ gheghe he, hayo ekareghẹhọ oware jọ nọ o via gheghe he. Jesu ọ ta nọ: ‘Wha ru onana ro roro omẹ.’ (Luk 22:19) Ekareghẹhọ uwhu Kristi na yọ etoke nọ a re ro roro kpahe oghẹrẹ ohwo nọ Jesu ọ rrọ. O rrọ etoke nọ a re ro vuhumu nnọ ọ rrọ uzuazọ je bi ruiruo nẹnẹ na avọ oruaro gbe ọkwa-ovie nọ a kẹ riẹ fiki uzuazọ ẹrọwọ gbe idheidhe riẹ. Ekoko ekareghẹhọ nana o tẹ jẹ rrọ uvẹ nọ ma re ro dhesẹ omarokpotọ mai kẹ uzou-uwo Kristi nọ ọ be kpọ iruẹru ukoko Ileleikristi na. (Kọl. 1:17-20) Ahwo Ọghẹnẹ kpobi a rẹ rehọ avọ oma adhẹẹ jọ ehaa Ekareghẹhọ uwhu Kristi na. Enukpe nana a ti ru ei nọ ọre o te kiediwi no evaọ Edene-Oka, March 28, 2002.

⁵ Ẹkwoma omodawọ nọ ma ru avọ osegboja taure Ekareghẹhọ ukpe n’ukpo na o te ti te, ma wo unu nọ o mai bu kpaobọ nọ o nya nọ u bu te 639,237 evaọ Nigeria. Kọ bro ahwo a te jariẹ enukpe nana? O roma hwa epanọ ma ‘ruiruo gaga jẹ ya’ te, fiobọhọ kẹ amọfa buobu re a nya.—1 Tim. 4:10.

⁶ Fiba ekpohọ Emu Owọwọ Olori na, ma rẹ sai ru iruo usiuwoma ota mai vi viere. Ababọ avro, idu buobu erọ inievo na a ti ru ọkobaro obufihọ amara ọvo hayo vrẹ ere. A tẹ ghale iẹe evaọ ikpe isoi nọ i kpemu na, k’ukpe k’ukpe ma wo ekobaro ubroke 13,864 evaọ ezi Ekareghẹhọ na no, March rite May. Kọ whọ sae ruẹrẹ iruẹru ra họ re whọ reawere uvẹ-ọghọ orọ ọkobaro obufihọ enukpe nana? O te jọ emamọ edhere nọ who re ro dhesẹ uvi ovuhumuo ra kẹ ọruẹrẹfihotọ oyoyou Ọghẹnẹ ọrọ idheidhe Kristi na. Whọ rẹ sai wo imuẹro eghale Jihova, wọhọ epanọ iyẹrẹ obotọ na i dhesẹ na.

⁷ Oniọvo-ọmọtẹ jọ nọ ọ rrọ iruo nọ e rẹ rehọ oke riẹ kpobi o kere kpahe iruo ọkobaro obufihọ riẹ evaọ amara March nọ o kpo na nọ: “Odibọgba Uvie Mai ọrọ February 2001 o tuduhọ ohwo kpobi nọ iyero riẹ e kẹ uvẹ nnọ o ru ọkobaro obufihọ evaọ ezi Ekareghẹhọ na. Nọ March o wo Ẹdẹ-Ọmaha isoi na, onana u kiehọ omaa na ziezi. Fikiere mẹ tẹ jiroro re me fi obe họ kẹ ọkobaro.” Nọ o mu amara na họ, o te fi ute họ kẹ oma riẹ re ọ daoma mu ebe-uwuhrẹ Ebaibol họ. Kọ ọ kparobọ? Ẹhẹ, o mu obe-uwuhrẹ Ebaibol họ evaọ auwa avọ 52 ọrọ isẹri-ise riẹ evaọ amara na! Kọ ẹvẹ o ro ku ei họ? “Ma re wo eghale igbunu evaọ okenọ ma tẹ dao ẹgba mai kpobi.”

⁸ Didi irere i re te uviuwou nọ u ru iruo ọkobaro kugbe? Uviuwou imane jọ nọ u ru ere evaọ April a ruẹ nnọ o jọ amara nọ a rẹ kareghẹhọ ẹsikpobi. Oni na ọ ta nọ: “Ma je wo eriwo ọliọliọ evaọ kẹdẹ kẹdẹ, keme ma je kuomagbe evaọ odibọgba na! Ẹmeọta-kugbe kpahe iruẹru okpẹdẹ mai evaọ odibọgba na u ru etoke emu owọwọ mai jọ orọ omawere.” Ọmọzae rai ọ ta nọ: “Mẹ reawere usiuwoma nọ me je lele ọsẹ mẹ nya evaọ edẹ oka na nọ o re ro kpohọ iruo riẹ vẹre na.” Ọsẹ na o fibae nọ: “Wọhọ ọnọ o w’uzou uviuwou, o k’omẹ evevọwẹ re mẹ riẹ nnọ iruo nọ e mai w’uzou evaọ oke mai na ma je ru kugbe na.” Kọ uviuwou ra o sai ru iruo ọkobaro kugbe? Kọ wha gbẹ gba ẹgwae uviuwou re wha ruẹ sọ o lọhọ re uviuwou na soso u ru ọkobaro obufihọ evaọ ezi Ekareghẹhọ na?

⁹ Kọ Ma Sai Ru March Fihọ Amara nọ Ọ Mai Woma Kpaobọ k’Omai? Evaọ emuhọ 2000, Odibọgba Uvie Mai o nọ onọ na: “Kọ Ma Sai Ru April 2000 Fihọ Amara nọ Ọ Mai Woma Kpaobọ k’Omai?” Didi owọ ahwo a jẹ kpahe iẹe? Ma wo ẹvi ọkpokpọ evaọ abọ buobu. Ma wo unu nọ o mai bu kpaobọ orọ ekobaro ubroke 22,714 evaọ amara ọvo. Fibae, ma wo ẹvi ọkpokpọ evaọ unu euwa, emagazini nọ a fihọ ada, gbe izihebro. Kọ whọ kareghẹhọ ọwhọ nọ ọ romavia evaọ ukoko ra rono ubu iruẹru abọ-ẹzi evaọ etoke amara obọdẹ yena ze? Kọ ma sai ru epọvo na hayo tube ru viere enukpe nana? Ẹkwoma omodawọ nọ mai kpobi ma re kuomagbe ru, March 2002 ọ sae jọ “Amara nọ Ọ Mai Woma Kpaobọ k’Omai.” Fikieme o jẹ rrọ March?

¹⁰ Eware ivẹ jọ e riẹ nọ amara March ọ jẹ jọ obọdẹ amara iruo. Orọ ọsosuọ, Ekareghẹhọ na e tẹ jọ ubrobọ urere ọ March, nọ o k’omai uvẹ ziezi evaọ emuhọ amara na re ma daoma mai kpobi ro zizie ahwo buobu re a nya. Orọ avivẹ, March ọrọ enukpe nana o wo urere-oka isoi, nọ u ru rie lọhọ kẹ ahwo nọ a rrọ iruo oyibo hayo enọ i bi kpohọ isukulu re a ruiruo ọkobaro obufihọ. Kọ wha gbẹ keria enẹna re wha m’omaa nọ u re ruiruo avọ obufihọ ukeledẹ nọ a fihọ uko-obeva nana? Ọkobaro obufihọ o rẹ sae lọhọ vi epanọ who roro. Wọhọ oriruo, ẹkwoma omaa euwa 8 erọ usiuwoma ota evaọ urere-oka isoi na ọvuọvo, euwa 10 efa ọvo whọ rẹ m’omaa kẹ evaọ etoke nọ o kiọkọ evaọ amara na re whọ nyate euwa 50 nọ a gwọlọ na.

¹¹ Eme ekpako na e rẹ sai ru ro fiobọhọ kẹ ahwo ukoko na kpobi re a ‘whowho ẹme Ọghẹnẹ na vọvọ’? Bọ ọwhọ ẹkwoma iwuhrẹ ukoko gbe ẹmeọta omobọ ohwo. Iwuhrẹ ọ Ewuhrẹ Obe Ukoko gbe ethabọ rai a rẹ sae rehọ unevaze t’ẹme kugbe omomọvo nọ a ghale fihọ utu rai re a kẹ ae uketha. O sae jọ nọ umutho eme ẹwo erọ uduotahawọ jọ hayo iroro-ejẹ jọ nọ i re w’iruo ọvo họ oware nọ a gwọlọ. (Itẹ 25:11) Ibuobu e te ruẹ nnọ ẹkwoma enwene jọ kakao ọvo evaọ omaa rai, a rẹ sae reawere uvẹ-ọghọ orọ iruo ọkobaro obufihọ na. Evaọ ikoko buobu, ibuobu ekpako gbe idibo iruiruo avọ eyae rai, a rẹ kẹ emamọ oriruo ẹkwoma iruo ọkobaro nọ a re ru kugbe evaọ ezi Ekareghẹhọ na. Onana o tuduhọ iwhowho-uvie buobu awọ no re a kuomagbe ai. Fiki ọnyaba ugboma hayo iyero efa, iwhowho-uvie jọ e sai ruiruo ọkobaro ho, rekọ a rẹ sae tuduhọ ai awọ re a dhesẹ ovuhumuo rai ẹkwoma uthoma rai nọ a re ru evaọ odibọgba na kugbe ahwo ukoko na.

¹² Obokparọ o roma hwa omaa nọ ekpako na e rẹ romatotọ maa. A rẹ m’omaa iwuhrẹ kẹ usiuwoma ota fihọ oke nọ u re kiehọ ahwo oma evaọ ẹkpoka na soso. O tẹ lọhọ, ọsẹro usiuwoma ota na ọ rẹ kake ta kẹ inievo nọ i te ziezi kpahotọ re a ru iwuhrẹ kẹ usiuwoma ota kpobi. O gwọlọ emamọ omaruẹrẹhọ re iwuhrẹ enana e siọ iminiti 10 rite 15 ba ẹvrẹ, te ẹghale ahwo, ẹkwotọ ọrọkẹ, gbe olẹ. (Rri Ẹkpẹti Onọ evaọ Odibọgba Uvie Mai ọrọ September 2001.) A re dhesẹ omaa iruo amara na vevẹ kẹ ukoko na a vẹ tae mu ebọdo ovuẹ na.

¹³ A rẹ ruẹrẹ ẹkwotọ nọ o re te ru fihọ. Ọsẹro usiuwoma ota na o re lele inievo nọ e be rẹrote ẹkwotọ na jiroro re a ru ọruẹrẹfihotọ rọkẹ eruo ekwotọ nọ a re ru reno kẹse kẹse he na. A re fiẹgbahọ eruo iwou nọ a di ahwo họ vẹre he, isẹri-ise evaọ iyẹrẹ gbe no uhie-eki te uhie-eki, gbe isẹri-ise owọwọ. Oria nọ u je fo, a rẹ sai fiobọhọ kẹ iwhowho-uvie jọ re a ru isẹri-ise ifonu.

¹⁴ Fiobọhọ Kẹ Ae re A Wariẹ Ruiruo: Kọ ahwo jọ a rrọ ẹkwotọ ra nọ e siọ emamọ usi na ba ewhowho no? Ahwo otiọye na a gbẹ rrọ abọjọ ukoko na yọ a gwọlọ obufihọ. (Ol. 119:176) Nọ ekuhọ akpọ anwae ọnana ọ kẹle gaga no na yọ akpọ ọkpokpọ na ọ kẹle no na, ma wo uvi iroro nọ ma rẹ rọ daoma kpobi re ma fiobọhọ kẹ enọ e siọ iruo usiuwoma ota ba no. (Rom 13:11, 12) Evaọ ikpe ene nọ e vrẹ no na, ahwo nọ a bu vi 2,500 k’ukpe k’ukpe a j’owọ kẹ obufihọ no nọ a wariẹ mu iruo họ no. Eme ma rẹ sai ru ro fiobọhọ kẹ amọfa buobu re a wariẹ fou errae họ uyoyou gbe evaifihọ nọ a wo evaọ oke ọsosuọ na?—Hib. 3:12-14.

¹⁵ O gwọlọ nọ ugboma ekpako na a t’ẹme kpahe epanọ a sai ro fiobọhọ kẹ ahwo nọ a siọ iruo uvie ba no riẹriẹriẹ evaọ umutho ikpe jọ nọ e vrẹ na. (Mat. 18:12-14) Okere-obe na ọ rẹ kiẹ ekade Iruo Owhowho-Uvie Ukoko na o ve kere edẹ ahwo kpobi nọ a siọ iruo uvie ba no fihọ obe. A rẹ daoma ziezi re a kẹ uketha ẹkwoma ọruẹrẹfihotọ iweze ẹruorote. Ọkpako jọ ọ sai weze bru owhowho-uvie jọ fikinọ avọ ohwo na a riẹ oma vẹre, hayo a sae ta kẹ iwhowho-uvie efa re a fiobọhọ. Ẹsejọhọ ae a wuhrẹ obe kugbe ọnọ ọ siọ iruo uvie ba no na yọ a te jẹ uvẹ obọdẹ na rehọ re a kẹ uketha evaọ oke ẹgwọlọ nana. Ma rẹro nọ, ibuobu nọ e siọ iruo uvie ba no na a te wariẹ muọ ẹme Ọghẹnẹ họ ewhowho. Otẹrọnọ a te, oke ofa nọ o mai woma kẹ ae nọ a re ro muhọ vi ezi Ekareghẹhọ na o riẹ hẹ!—Rri Ẹkpẹti Onọ evaọ Odibọgba Uvie Mai ọrọ November 2000 rọkẹ evuẹ efa.

¹⁶ Kọ Amọfa A Te re A Ta Usiuwoma? Jihova ọ gbẹ be ghale ahwo riẹ ẹkwoma ẹrọze “efe erẹwho na kpobi.” (Hag. 2:7) K’ukpe k’ukpe idu ahwo a bi te wọhọ iwhowho-uvie nọ e te họ-ame he. Kọ amono aye? Emọ Isẹri Jihova gbe emọ-uwuhrẹ Ebaibol nọ e be nyaharo. Ẹvẹ ma rẹ rọ riẹ sọ a te kẹ iwhowho-uvie erọ emamọ usi na?

¹⁷ Emọ Isẹri Jihova: Emọ buobu i lele esẹ gbe ini rai n’uwou ruọ uwou te ikpe buobu no, dede na a ri zihe ruọ iwhowho-uvie nọ e te họ-ame he no ho. Amara March ọ sae jọ emamọ oke nọ a re ro ru ai re a muhọ. Ẹvẹ whọ rẹ rọ riẹ sọ ọmọ ra o te no? Ẹwẹ-obe avọ 100 evaọ Organized to Accomplish Our Ministry na o ta nọ “okenọ ọmọ na ọ tẹ rrọ emamọ oriruo evaọ uruemu yọ ọ be sae rọ eme obọriẹ ta ẹrọwọ riẹ via ẹkwoma emamọ usi na nọ ọ be ta kẹ amọfa, yọ o bi ru ere no udu ze.” Who te roro nnọ ọmọ ra o te, ta kẹ ọkpako jọ evaọ Ogbẹgwae Iruo Ukoko na.

¹⁸ Emọ-Uwuhrẹ Ebaibol nọ I Tẹ: Nọ ọmọ-uwuhrẹ Ebaibol o te wo eriariẹ je kpohọ iwuhrẹ te oke jọ no, ọ sae gwọlọ jọ ọvuovuẹ Uvie na. Otẹrọnọ who bi wuhrẹ obe kugbe ọmọ-uwuhrẹ otiọye na, roro kpahe enọ enana: Kọ o bi ru ẹnyaharo nya lele unuikpe gbe ẹgba riẹ? Kọ o muọ ẹrọwọ riẹ họ ẹta kẹ amọfa evaọ edhere ọnyakuo no? Kọ ọ be whẹ “uruemu okpokpọ” na họ oma? (Kọl. 3:10) Kọ ọ nyate itee rọkẹ iwhowho-uvie nọ e te họ-ame he, enọ a kere fihọ obe ọ Our Ministry na evaọ ẹwẹ-obe avọ 97-99 na? O tẹ rrọ ere, ta kẹ Ogbẹgwae Iruo Ukoko na re a ru ọruẹrẹfihotọ re ekpako ivẹ i lele owhẹ avọ ọmọ-uwuhrẹ na t’ẹme. Otẹrọnọ o te, ekpako ivẹ na e te vuẹe inọ ọ sai muọ odibọgba ẹgbede na họ.

¹⁹ Kọ Ẹvẹ Kpahe April gbe May? Enana e te jẹ jọ emerae obọdẹ rọkẹ iruo buobu evaọ usiuwoma ota na re. Ibuobu nọ i ruiruo ọkobaro obufihọ evaọ March a rẹ sae wariẹ ru ei evaọ April gbe/hayo May. Evaọ April gbe May, ma te rehọ efihọ ada emagazini ọ Watchtower gbe Awake! na karo evaọ odibọgba na. Irere nọ e wha se izuazọ ahwo nọ a se rai no e rro kẹhẹ! Emagazini enana i w’abọ ologbo no evaọ ẹvi igbunu nọ ọ romavia no evaọ akpọ soso na. Ma te daoma gaga evaọ April gbe May re ma fi emagazini na họ ada kẹ ahwo buobu te epanọ ẹgba mai o te kpobi. M’omaa enẹna re who w’obọ vọvọ.

²⁰ Avọ iruo buobu nọ a m’omaa riẹ na, kọ o gwọlọ re who ru unu emagazini nọ whọ rẹ rehọ evaọ ukoko na bu viere? Evaọ ẹgbukpe na soso, ma re fi Uwou-Eroro Na gbe Awake! họ ada evaọ Ẹdẹ-Ọmaha kpobi, onọ ma salọ kẹ Ẹdẹ Emagazini. Dede na, nọ ahwo buobu a ti w’obọ evaọ ọkobaro obufihọ na yọ mai kpobi ma ti fi emagazini na họ ada evaọ emerae ivẹ soso na, o sai fo re who ru emagazini nọ i re t’owhẹ obọ evaọ ukoko na bu viere. O tẹ rrọ ere, iviena vuẹ ọsẹro emagazini ukoko ra ababọ oke oraha. Evaọ oke ovona, odibo ẹruọsa ebe na ọ rẹ ruẹ nọ emebe-evẹvẹ nọ i fo e riẹ buobu nọ ahwo kpobi a re ro ruiruo.

²¹ Ibuobu i dhesẹ ovuhumuo rai no kẹ uzoẹme ọ Odibọgba Uvie Mai na “Ẹme nọ Whọ rẹ Ta Kpahe Emagazini Na.” Kọ whọ rehọ uvẹ ọruẹrẹfihotọ nana ruiruo no ẹkwoma ewuhrẹ edhere sa-sa nọ a re ro fi emagazini họ ada na? Kọ whọ gbẹ rehọ abọjọ uwuhrẹ Ebaibol uviuwou ra k’oka k’oka ro wuhrẹ idhere ẹmeọta nana?

²² Rehọ Uvẹ Ezi Ekareghẹhọ na Ruiruo Vọvọ: Wọhọ Pọl ukọ na, j’oma dhesẹ kẹ Jihova epanọ ma wo ovuhumuo kẹ “okẹ riẹ nọ a sae ruẹ unu ta ha” te ẹkwoma abọ nọ ma re wo vọvọ evaọ iruo abọ-ẹzi nọ a m’omaa riẹ fihọ ezi Ekareghẹhọ nana. Enana họ (1) ekpohọ ehaa nọ e mae rro evaọ ẹgbukpe na, ekoko Emu Owọwọ Olori na evaọ Edene-Oka, March 28, 2002; (2) obufihọ kẹ ahwo nọ a siọ iruo uvie ba no re a wariẹ kpare “uyoyou ọsosuọ [rai]” ze (Evia. 2:4; Rom 12:11); (3) obufihọ kẹ emọ gbe emọ-uwuhrẹ Ebaibol mai nọ i te re a zihe ruọ iwhowho-uvie nọ e te họ-ame he; gbe (4) abọ owo evaọ iruo usiuwoma ota na vọvọ te epanọ o rẹ sae lọhọ te, tube ru iruo ọkobaro obufihọ evaọ March jẹ vrẹ etẹ.—2 Tim. 4:5.

²³ Ma be lẹ gaga re mai kpobi ma w’obọ vọvọ evaọ ewhowho emamọ usi Uvie na evaọ ezi Ekareghẹhọ nana, re ma rehọ ere dhesẹ epanọ ovuhumuo mai o diwi te rọkẹ eware kpobi nọ Jihova o ru k’omai no.

[Box on page 6]

Omaa Usiuwoma Ota Omobọ Mẹ Rọkẹ March 2002

Ẹdoka Ẹdọvo- Edivẹ- Edesa- Edene- Edisoi- Ẹdẹ-Ọmaha Oka Oka Oka Oka Oka

1 2

Ẹdẹ Emagazini

3 4 5 6 7 8 9

Ẹdẹ Emagazini

10 11 12 13 14 15 16

Ẹdẹ Emagazini

17 18 19 20 21 22 23

Ẹdẹ Emagazini

24 25 26 27 28 29 30

Ẹdẹ Emagazini

EKAREGHẸHỌ

ỌRE O TE KIEDIWI NO

31

Kọ whọ sae m’omaa ọ euwa 50 re who ru ọkobaro obufihọ evaọ March?