A Mu Emamọ Usi na Họ Omai Obọ
1 O rrọ obọdẹ uvẹ-ọghọ k’omai gaga nọ a ro mu ọ emamọ usi Ọghẹnẹ họ omai obọ! (1 Tẹs. 2:4) Dede nọ ahwo jọ a rẹ sae se obọdẹ ovuẹ nana, u re si ahwo udu oruọzewọ urru wọhọ ore-awere. (2 Kọr. 2:14-16) O rrọ esiwo kẹ ahwo nọ a jẹ emamọ usi na rehọ je yoẹme kẹe. (Rom 1:16) Ẹvẹ ma sae rọ rẹrote iruo emamọ usi nana nọ a muhọ omai obọ na?
2 Jesu gbe Ikọ Na: Jesu ọ rehọ ewhowho emamọ usi na karo. (Luk 4:18, 43) Makọ okenọ oma o rọe no avọ ohọo nọ u je kpei, uyoyou riẹ kẹ ahwo gbe ovuhumuo riẹ kẹ ovuẹ na o wọ riẹ whowho iei kẹ amọfa. (Mak 6:30-34) Ẹkwoma ẹmeunu gbe oriruo riẹ, o fi ọwhọ epanọ iruo ovuẹ Uvie na i w’uzou te họ iroro ilele riẹ.—Mat. 28:18-20; Mak 13:10.
3 Evaọ aruorokele Jesu, ikọ na a whowho ovuẹ Uvie na avọ ọwhọ. Makọ okenọ a fa ai jẹ ta kẹ ae nnọ a siọ usiuwoma ba ẹta, ‘a seri uwuhrẹ gbe ewhowho emamọ usi na họ họ.’ (Iruẹru 5:40-42) Pọl ukọ na o ru iruo nana ababọ-eriosehọ. (1 Kọr. 15:9, 10; Kọl. 1:29) O kele uvẹ ewhowho emamọ usi nana dhe osa nọ ọ re erivẹ riẹ, yọ u no rie eva ze re ọ kpairoro vrẹ ewoma omobọ riẹ re ọ ruẹsi ru ei gba.—Iruẹru 20:24; Rom 1:14-16.
4 Uvẹ-Ọghọ Mai Nẹnẹ: Ovuhumuo kẹ iruo efuafo nọ a muhọ omai obọ na o rẹ wọ omai gwọlọ idhere nọ ma re ro ru ẹkẹ-abọ mai kẹre evaọ iruo usiuwoma ota na. (Rom 15:16) Edward, ọnọ ẹyao o kru fihọ akaba-ọmo, ọ rẹ keria unuẹthẹ ehọtẹle jọ o ve lele ahwo nọ a kpahe ehọtẹle na t’ẹme kpahe ẹrọwọ riẹ. Dede na, nọ ọ gwọlọ nọ o re ru bu viere, o te ku uwou họ emu ipikọpo, ọ tẹ rehọ ipikọpo nana ru iruo ọkobaro evaọ ikpe buobu, rọ ere dhẹ ikilomita idu buobu evaọ iruo na. Wọhọ Edward, ibuobu i nwene iyero rai no nẹnẹ re a sai wo abọ ologbo evaọ ẹwhaharo emamọ usi na.
5 Evaọ aruorokele Jesu gbe ikọ na, wha joma rehọ iruo usiuwoma ota na karo ẹsikpobi evaọ izuazọ mai. Ẹkwoma ere oruo, yọ ma bi dhesẹ uyoyou nọ ma wo kẹ ahwo via gbe ovuhumuo nọ ma wo kẹ emamọ usi nọ a muhọ omai obọ na.