Jiri Jihova Ẹkwoma Isẹri-Ise Ọnyakuo
1 Idibo omarokpotọ Jihova a rẹ gwọlọ uvẹ nọ a re ro jiri ei kẹdẹ kẹdẹ. (Ol. 96:2, 3; Hib. 13:15) Edhere jọ nọ ma sai ro ru ere họ ẹkwoma isẹri-ise ọnyakuo. Egegagọ Jihova buobu nẹnẹ a be kẹ uyere fikinọ ohwo jọ ọ wha ovuẹ Uvie na se ai ẹkwoma isẹri-ise ọnyakuo.
2 Usiuwoma ọnyakuo nọ a rẹ ta kẹ ohwo jọ u re rovie uvẹ nọ amọfa a re ro yo ovuẹ Uvie na. Wọhọ oriruo, ẹme nọ Jesu o lele aye Sameria ta eva obọ ozae ọ Jekọp u ru nọ amọfa buobu a ro dhesẹ isiuru kpahe emamọ usi na. (Jọn 4:6-30, 39-42) Nọ a fi Pọl avọ Saelas họ uwou-odi evaọ Filipai, a se isẹri kẹ oriekarọ na, ahwo uviuwou ọzae na soso a tẹ jẹ uzẹme na rehọ.—Iruẹru 16:25-34.
3 Uvẹ nọ U Re Rovie Fihọ: Didi uvẹ jọ who wo nọ who re ro se isẹri ọnyakuo? Ahwo jọ a re ru ere evaọ okenọ a tẹ be dẹ eware, nọ a tẹ rrọ omoto ofa, hayo nọ a tẹ be hẹrẹ oke nọ a te rọ kẹ ae usiwo imu evaọ ẹsipito. Amọfa a rẹ sae rehọ oke eriosehọ se isẹri eva obọ iruo hayo isukulu. Obe mai jọ nọ a kporo no Ebaibol ze nọ ma re fihọ oria nọ a jẹ rue riẹ, o rẹ sae wọ amọfa nọ enọ kpahe ẹrọwọ mai.—1 Pita 3:15.
4 Epanọ A Re Ro Muhọ: Ọmọtẹ ikpe ihrẹ jọ nọ ọ rẹ dhẹ omovuọ, ọ jọ eva ewuhrẹ yo epanọ u w’uzou te re ahwo kpobi a ta usiuwoma. Fikiere okenọ o je lele oni riẹ kpohọ eki, ọ tẹ tọlọ ibroshọ ivẹ fihọ ẹkpa riẹ. Nọ oni riẹ ọ jẹ tho eware, ọmọtẹ na ọ tẹ rehọ ibroshọ kẹ aye jọ, aye na ọ tẹ rehọ iẹe avọ evawere. Okenọ a nọe epanọ o ro wo udu nọ ọ rọ ta ẹme kẹ aye na, ọmọtẹ nana nọ ọ rẹ dhẹ omovuọ na ọ tẹ k’uyo nọ: “Mẹ ta kẹ oma mẹ nnọ, Ruẹrẹ oma kpahe, Kiọkọ omojọ, Muhọ ẹta! Koyehọ me muhọ ẹta!”
5 Re ma se isẹri ọnyakuo, mai kpobi a gwọlọ oghẹrẹ ẹzi ọmọtẹ ọsese ọyena. Eme ọ rẹ sai fi obọ họ k’omai? Lẹ kẹ aruọwha nọ whọ rẹ rọ t’ẹme. (1 Tẹs. 2:2) Wo onọ jọ hayo ẹme kpahe uzoẹme isiuru jọ fihọ iroro nọ whọ sai ro mu ẹmeọta họ. Who ve fievahọ nnọ Jihova ọ te ghale omodawọ ra.—Luk 12:11, 12.
6 Isẹri-ise ọnyakuo rọ kẹ ahwo nọ ma nya ku kẹdẹ kẹdẹ o rẹ wha ujiro se Jihova jẹ k’omai oghọghọ. O rẹ sai fi obọ họ kẹ ohwo jọ ziọ edhere uzuazọ ebẹdẹ bẹdẹ.